JASPER___chapter-14

Episode kal lai dah luhna

Moderator: writers

Ziki_nu
Posts: 254
Joined: May 23rd, 2021, 7:15 pm

JASPER___chapter-14

Unread post by Ziki_nu » November 25th, 2021, 8:04 pm

JASPER



Chapter-14

(By RuatiRenthlei)







"Mate.. Mate" tih paha nitei'n min rawn sawi deuh chuan thei leh thei lovin ka meng tawk tawk, "Dar 10 a ri rawh a, chaw te rawn ei ve phawt la i duh leh i mu leh zawk dawn nia" a tih chuan ka lo zimar tuah tuah.







Nitei chhuah hnu ah chiah tho chhuak in darthlalang ah ka in en hmasa leh te te, ka sam chu nizanah a huh chunga ka mut pui avangin a kawi tha hle a, a chhunglam a la hnawm chap bawk.








Ka lukham hnuaia ka phone chu la in WhatsApp ah ka lut a, Jas-a message a awm ka rin tehlul nen a awm miah lo, nizan khan a haw tlang em tih ka chiang lova, mahse a haw tlang hram chu ka beisei.










Be hmasa tua tan hreh viau thin mah ila tunah hi chuan biak hmasak a pawiin ka ringlo, nizanah khan ka ngaihtuah thu hmaichhan ah ngei ka hrilh a, phone a a that leh that loh va zawh ringawt chu a pawi vak awm lo emai a.








Message chu ka type dawn a, sawi mai tur ka hre leh chuang lo, "I tha em?" ka va ti dawn nge? Engtinnge ka va tih ang? Ngaihtuah tho mah ila uchuak taka tih lan ka hlau ve tho bawk si.









A tawp ah thinphu dup dup in *I tho tawh em?* ka va ti hram, tawngkam pangai a nia.. Nizan thil thleng nen.... A ngai kawi em lovang chu maw..






Hmai pawh phih lovin ka sam kawi nuai hui mam thuak thuak pah chuan ka chhuak a, nitei chuan hmun a lo phiat durh durh mai.






"Ee... Mate, chawhmeh kha chu a la lum vek ang, tlem tal ei ang che, chaw ei loh ngawt chu a tha lo hrim hrim" a lo ti nghal mawlh mawlh, thawh hlima chaw ei nghal ngawt chu a chakawm falua lo asin.







"In exam zawh tuk te a ni sia, ka kaitho hma duhlo che anih kha, exam zawh tukah hi chuan duh chen chen hi han mu ila a nuam ve a" tih leh pahin a nui hak hak a, a bula awm hi chuan a khawhar thlak loh a nia aw...







Thleng la in chaw tlem ka in khawrh a, alu kan leh maian bai bak ka suak peihlo, ei tan ak tum lo hrim hrim bawk a.






"Nizanah chhuat hi i nawt a mi a? Ka nawt bawk silo a, ka hmu fai riau in ka hria" a ti leh tawh, a sawi dawnlo emaw ka ti hman tawh aisn.







"Aw.. Ka muhil thei lawk lova, ka va tho leh a" tiin dawt ka hrilh leh tawh, nitei dawt ka hrilh apiangin Zomuansanga vang a ni ve ziah.






Nizana ka haw hnu khan ka huh zawr vek bawk nen bathroom ka panna lamah ringawt pawh chhuat a kawi nuai thei a nih kha.







Ka room ah tlangin ka inbual sawk sawk a, ka zawh veleh chhuat ka nawt leh vek, ka pheikhawk thla a kal kawi nuai a, nawh loh chi a ni lo hrim hrim.








Nitei chuan a awih leh hmak tawh aniang, a sawi zawm lo reng reng.




"I chauh viau loh chuan vawiin chu dawr ah lo kal ve la, thuamhnaw te pawh i thlang ve anga" ka chaw ei kham sofa a ka thut rual chuan a ti a, ka lo bu nghat nghat.







Exam chhung khan ka chhuak lo leh lutuk a, chhuah vah ve te pawh a chak awm alawm, "Tinge vawiin saturday a ni silo a, i van kal har?" tiin ka lo zawt let thung.






"Nia ka hmanhmawh lo mai mai, i kal ve duh chuan hruai che ka duh sia, hnathawk ho chu an kal tawh tho" a phone bih ngar ngar chung chuan a ti a, ka nitei hi chu a la nula ang reng ka tih kha, hun awl a neih ve hi chuan a phone nen an in hmachhawn ve chawt zel.








Ka insiam mawlh mawlh a, ka sam kawi chuan ka hmel thlengin a ti bam vek, engtin pawn ti ila a dik thei lo, a tawp ah ka phiar phah ringawt.







Kan chhuah dawn thleng chuan Zomuansanga message ka dawnglo, nuam lo ka lo ti ve em em ringawt.







Scooty in MC thleng kan inphur phei a, 2nd floor a Shop at Feyza tih lo in tar kulh na chu ka nitei dawr mah ni se vawi thum vel bak ka la kallo, a chhungah kan lut a, customer pawh an lo awm ve nuk.








Nitei chuan ka duh duh en kual a ha chhin vel tura min hrilhin min phêt san nghal dawr dawr, Tshirt ho chu ka en kual dan dan a, thingtlang nula e tilo hian thawmhnaw ah kher kher hi chuan ka khirh narawh.








Chutiangin hak sen loh khawpa tam ka nei ve lemlo a, mahse ka neih chhun te erawh ka duh taka ka lei leh thlan te vek.








"Ella" tih ri ka hriat chuan ka hawi phei thuak a, ka hmel hriat âwm tumah ka hnu bawk silo, ka hriat sual a nih ringin ka in her leh rual chiah a ka mi hmuh erawh chuan min thawngin min ti phu chiang hle.







"Nang?!" ka ti hap a, sawi zawm lovin ka en tlawk tlawk, "Min hmuh i in beisei biklo a ni maw" nui suka a tih chuan ka bu nghut.







"Aizawl chu i ngeih hle mai, i ngo in i thau thur thut mai alawm" nui paha a tih leh chuan ka Tshirt hak lian zet chhanah ka lo îp chawih chawih, ka vun hi chu a hang lo hrim hrim a, khawpuia awm ve takah phei chuan ka êng lehzual tih ka hre ve, mahse chutiang taka ka thau thur thur pawh ka hrelo e a.








"Eng nge hetah i tih a?" ka tih chuan a thil khai lai lo lek kang zeuhin "Ka bazaar" a lo ti sam êt leh nghal.







"Nang" tih paha a mit hmul a rawn San zuk chuan "Keipawh" ka lo ti ringawt, "Nangmah in a mi?" a tih leh zel tak si ah chuan ka nitei dawr a nih thu ka hrilh ve a, a ni erawh a mah in nge midang nen tih pawh ka zawt zui lo, a chhan chu ka bialpa hlui a nih tlat vang ani, care deuh anga lan chu ka duh bik miahlo.









Nitei'n "Mate" a rawn tih hlut takah chuan kan hawi phei vat a, thawmhnaw keng bawr tun chungin kan awmna lam a rawn pan, "Hengho hi lo en chhin rawh, i hak duh tur chi aniin ka hria" tih pahin min rawn hmehbel chawt leh nghal.







"Ohh i thianpa a mi?" tiin Hruaia a hmuh rual chuan min melh tawn nghal zak zak "Aw, kan khua a mi" tia ka chhan chuan pakhat chu a lo nui ri suk.







"A nih chu.. Lo ha chhin la, i duh loh ho chu Puia saw i pe leh mai dawn nia" tiin a hna thawk zinga mipa awmchhun chu a kawk zauh a, min kalsan leh nghal daih.









Nitei kalna lam ka en zui vung vung laiin ka bula mipa chu a rawn khuh kharh kharh a, ka hawi let leh chuan hnai zetan min lo chhuk en run.







"I thianpa pawh ni lovin khuaa awm ve ringawt maw ka nih?" a rawn ti thum dut a, a nui miahlo "A... Ka sawi awmzia te chu.. " ka tih laiin ka darah Tu emaw hian min rawn kuah hnawk a, ka hawi chhoh ruala Jas-a hmel ka hmu erawh ka phûl nghal hlut.








"Nangmaw?!" ring zet chuan ka ti chhuak hap,nui suka min siai zeuhin Hruaia chu a en a, an pahnih chuan engmah sawi lovin an in en dun vung vung ringawt.









Ka melh tawn zak zak hnu ah "" Eng nge i rawn tih?" tiin Jasper-a chu a nâk ah ka nghawk zauh a, "Ka rawn zawng che" tih pahin hnaizet ah min rawn en a, kan chal a insi lo chauh.







"Tinge?" a mita en kar chung chuan ka lo ti ve, "I tho tawh em? I rawn ti sia, hei ka tho tawh tih rawn en tir che ka tum" nui chunga a tih chuan keipawn ka lo nuih seih.









Hruaia aw rawn thian kharh kharh ah chuan hrechhuak in Jas-a âwmah chuan ka nam a, a awm sawn ve mai.










Sawi mai tur hrelo a ka awm laiin Hruaia zawk chuan "Ka hmanhmawh sia, ka kal phawt mai ang" a ti ta hlauh, nui chungin ka bu nghat nghat a, mahse ka ngaihbel nge pawh ka hrelot, Hruaia mitmeng kha a rum riau in ka hria mahse a ho, ka buaina tur ani tawh lo.










A kalliam hnu ah ka bula mi chuan ka thil ken lai a rawn pawt lawp a, a then chu chhuat ah ka tla bawk, keng pharha en kual thuak thuak in "Tunge khapa kha?" a ti a, min melh chuang miah silo.










"Kan khua a mi" tiin chhuat a thuamhnaw tla ho chu ka chhar a, "Chuzawng chu maw? " a ti leh hram, min en lo tih hre mah ila chhang peih lovin ka bu nghut ringawt.








"Hei hi a nalh" tiin dark grey a hmaa zawhte lem awm hi a rawn lek kang uut a, "Va ha chhin teh" tiin ka chhan hun pawh nghak lo chuan ka kut ah min pe a, min nam kal nghal dawt dawt








A awmdan teh thut chu mak ka ti lutuk a, hnial nachang pawh ka hrelo, nizan a mi leh tuna a hmel lan dan hi a hrang teh hlak lutuk a, tunah hi chuan a hmel hmuh a nuam in a hahdam thlak a, chhiat khum vak vak pawh ni ila engtinmah min ti duhlo hmel a pu.









Tshirt chu ka ha chhin a, a sawi ang tak tak in hak chuan a mawi phian, ka duh ang takin a loose hle a, ka in hmeh em ka hre chiah lo va chu, ka duhzawng tak a ni.









Ka chhuah leh hnu chuan sofa ah a phone khawihin a ban leh lam in a nghen chhan a lo hlam duai a, a bawp sei zet lehlam chu a mal chungah a dah bawk.








Min rawn hmuh rual chuan a phone ak tha in min rawn pan nghal a, "I duhlo mi?" tiin phâwk deuhin min en, "Duh e" ka ti a, "Anih chuan ha ta che, ka lo en dawn che alawm" a ti leh, "A ho, ka lo a dawn tho" ka tih hmuk takah chuan a nui suk ringawt.








Nalh ka tia mahse a hmuh laia hak chhin kher a tul na ka hrelo e a, khapui ka zeiloh zia chu a lang leh chiah, a dang ho chu ka en kual thuak thuak a, ka duhthusam tak ka hmuh tawhloh avangin ka lak belh tawhlo.










"Tak takin eng ti turin maw I lo kal?" thutna ruak awma thut pah chuan ka ti leh a, "Ka lo zawng che ka tih chu.. " a ti leh hram, "Aw.. Ngatinge min lo zawn?" awki sang deuh zawkin ka ti a, a hmui ti sawiin a dar a chhin ak duh chauh nia mawle.









Thaw hapin ka en reng ringawt a, ka bula min lah chuan 'ka lo zawng che' ti siin a phone min en San ngar ngar, "Engteh nizan kha.. "

"I lo kal vang khan lawm viau turah min lo ngai ange, ka lawm miahlo ania" ka sawi zawh hma hma in a rawn ti, a phone ngawt a la en sia.








Ner khum nawngin ka kut a hum ruh teuh, "A lo nih tak chu, keipawh ka lo kal kha ka inchhir khawp mai" ti ve hmakin ka hawi sawn daih a, a nui hak ri ka la hre tho.







"Inchhir hmel pawh i put loh kha. . " zawi deuha a tih leh chuan a bul chiah a thu ka ni bawk a, ka hrechiang viau.
"Inchhir teh reng e, nangmah vangin vawt ti lutuk in ka awm a, inchhung ka dai chiar nuai avangin peih lo chung chungin chhuat ka nawh phah a, nitei dawt ka hrilh phah bawk, chu chauh ni lovin ka sam a kawi chhe vek bawk a" ka tih khum tan tan.








Ka thinrim lutuk a, ka tawng chhung khan thawk ka la pawhin ka hrelo e a, ka hah vek thei, ngai pawimawh lo zetin a nui ringawt a, chungte hlei hlei chuan min ti thinrim zual.







"Nui zo vek rawh" tih paha thawh ka tum chuan ka ban rekah lo man in min pawt thu leh hnawk a, "Eng nge?" pawr zeta ka tih chuan ka lu lo dawmin hma lam min hawi tir a, "I sam chu i phiar a nih hi" a rawn ti.







Ka thil sawi kha a man chiah lo em mawni le, "Phiar e, a kawi lutuk a, phiar tawp loh te chuan tih ngaihna awm heklo" ka ti hmuk.








"Phiar ziah rawh i in hmeh" te chu a la ti tak deuh deuh a, sam phiar in hmeh min ti hmasa ber Tu a ni, chuan ka awih chhe te lo bawk, keimah ngei pawh hian ka inhmeh loh zia chu ka hre ve, chuvang chuan loh theih loh tawpah chiah ka phiar thin.









A sana bun lai chu bih thuak in ka banah min kai a, min kal pui dawr dawr, "Eng nge? Khawnge kan kal dawn" ka ti vak vak a, ka aw te chu a kir vel, ka va zak reuh e.








Nitei chu kawngka bulah a lo ding a, min hmuh rual chuan a lo nui ver ver, mak ti hmel pawh a pu miahlo, "I va zawng hmu thei maw" a dinna bul kan thlen chuan a lo ti nghal a, mahse keimah ni lovin Jasper-a a melh daih thung.








"Va hmu hram, anih chuan kan va kal lawk anga, hma deuhah ka lo thlah leh ang" pakhat chuan a lo ti ve bawk, an thil sawi hi ka man pha ve miahlo.







Ka hnunglam atanga ka dar tawn tawna rawn vuanin min nam kal leh dawt dawt a, ka Tshirt pawh kha ka la keng reng.








"Khawnge kan kal dawn?" ka ti lung lung reng a, min chhang duh leh thaklo, a bike dahna bul kan thlen chuan "Tinge?" a rawn ti ringawt a, ka hre thiam leh pek lo.







"Eng nge? Tinge hriatthiam loh tur a I awm kual reng a" ka ti ta ringawt, a chet dan leh tawng dan vel hi man pha ve tlat heklo.








"Tinge T-shirt kha i ken zel?" a tih leh chuan ka thil ken chu melh zawkin "Ka dah hma in min chhuah pui daih a nih kha, i kal chak fet fuat si" ka lo ti zek, zaidam taka biak ve tum pawh hian a theihlo, a mah hian a zir miau lo ani.









"Heiham" tiin a hoodie hak lai chu a phelh a, "Khawimaw" tih pahin ka tshirt ken lai chu a rawn la a, hak a tum chuan a tlangah ka lo pawt ve tang tang.








"I keng reng peih ami?" a rawn tih hluk chuan "I ha var vek ang" ka lo ti thung, oversized chu ni tho mahse hmeichhe hak ania, hepa hak atan mai mai hi chuan ka phal teuhlo, a dar a hlai si, a ha tret lo anih pawhin a var vek tho ang.









"Engtinnge ka tih anga? E... Nangmah khan ha nghal mai rawh" a ti leh tawh, ka va ning mai mai e, "Hak thuah chi a nih loh hi, nang angin hoodie lianpui ka ha ve lo, bakah ha pawh ni ila sûk fai loh te chuan ka ha tlang duh teuhlo" tiin ka hnial leh hram.









A beidawng ve ta deuh aniang, "Dawr ah ka han dah leh lawk mai ang, lo awm rawh" tiin ka chhan hmain a tlan leh nghal, tikhan a mah a in tir hah mai mai, nichin khan min kalpui dawr dawr lovin ngaihtuah hmasa ve se tha tur a nia, tlaw teh tuh lutuk.










Hruaia kha khawi lamah nge a kal tak ka hre zui lo va, hriat pawh ka duhlo, ka hmu thut kha ka hamhaih lutuk a, Jas-a lo kallo phei se chuan ka che buai ngawtin ka ring.








A hma angin a la hmeltha reng a, mahse min tih dan zawng zawng ka ngaihtuah hian ka hmuh dan a dang tawh tlat, naupan deuh lai thil thleng mah nise ka first kiss a ru a, min then leh daih avanga khan ka haw hrim hrim.








Awi ka rei, ka thil ngaihtuah chu a va ho mai mai e, ka lam pana Jas-a lo pen pawk pawk chu ka lo thlir reng a, kan in biak hlekin in hnial zel mah ila a bula awm hi nuam ka ti tlat.








"Vung vung zel che hian.. " tih pahin ka mit zawnah a kut a rawn beng ri khap a, ka phu leh zuk tho.







"Khawiah maw kan kal dawn?" a helmet a khum lai chuan ka ti leh a, "Min bazaar pui ang" tiin a kiai suk a, "Sawi vat ta che ka peih reng reng lo" ka ti hluai.








Dawt ka sawi lo, bazaar tak tak te chu ka peih teuh hleinem, "Sawi vat ta che, kan chhuak laklawh tawh" ka tawng dan ang chiah in a rawn ti ve leh, "Ka ti tak tak Jas, ka peih lo" ka ti hap, Hruaia kha ka hmu leh reu reu ang tih ania ka hlauh.








"Tinge I peih loh?" thu tak deuh zawka a rawn tih chuan sawi mai tur ka hre leh chuanglo, a tawp ah "Nitei" ka ti ta ringawt.








Nui chungin ka tukkhum ah min beng ri chawrh a, ka bu lawp thei, "I nitei chuan a phal khawp mai, peihlo mahla I lo kal dawn tho" a tih lai chuan bike ah a thu vung tawh.








"Chuang rawh, thil ka lei ve ang che" nuih za aw zeta a tih chuan ka melh rum nghek, chutiang mai maia thlem theih turin naupang chhia pawh ka ni tawh lo.








"Zing dar 2 velah ruah sur karah lehnghal keimah vangin I chhuak a ni lawm ni? Bazaar mai mai a harsa lo" a rawn ti khanglang leh nghal, ka peihloh thu in ka hnial ve tang tang a, ka hneh leh chuang lo, a tawp ah ka chuang leh ta nge nge e.
















NOTE:Aw le thiante u, karleh mai hian exam ka neih ve dawn avangin kan exam zawh hma chu ka lo dah thei rih dawn lo va, chu² ka lo in report 😂


Ka story ve teh lul min lo chhiar sak ve thin avangin ka lawm lutuk a❣️dawhthei taka min lo nghak hram² zel turin ka sawm bawk che u... Chuan zanin chu khawngaihin like leh comment ah khan tan min lo lak pui rawh aw😻






A hma khan ads khu i click lova, khawngaihin zanin chu lo click ve keuh tawh la👇



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)