ZUNZAM S 2 (CHAPTER - 2) by Ahmangaihi violette Khiangte

Episode kal lai dah luhna

Moderator: writers

Ahmangaihi violette
Posts: 148
Joined: February 1st, 2020, 3:14 pm

ZUNZAM S 2 (CHAPTER - 2) by Ahmangaihi violette Khiangte

Unread post by Ahmangaihi violette » November 26th, 2021, 12:50 am

ZUNZAM - by Ahmangaihi violette Khiangte

CHAPTER - 2

IMG_20211126_005720.jpg



Inhumruh ṭeuh chuan ka han hawi let a, thinrim in zak viau mahila han tih vak ngaihna lah chu ka hre mang si lo, an hmuh phak loh lamah ka lo inpet ruh fan fan ringawt. Chutih laichuan Mistiri ṭawng ri chu ka hre zui a "Awm ang lo lulai emai, hna ṭan leh tawh ru le, kan bang har tawh lo ang" dam thluam hian a ti a, midang ho chuan an lo fiam zui tak nain a uksak vak lo ni ngei tur a ni; a chhan letna ka hre zui tawh lem lo.




Counter-a ka ṭhut fel hnu rei lo teah Usangzuala a lo lut a, ka lo ding hluai chu phawk lek leka min lo enin "I va rawn let hma ve" a lo ti he haw a, ka melh no lem lo khawp mai.




"Hnathawk ho eitur in lo pe lo a" ka ti hmasa te te a, "Ehe! Chutia law" tih pahin a lei a chhuah zauh ringawt a, a inthiam lo tih hre tho mahila thinrimna dang ka la nei tlat. Min kal pelh nghal mai a tum chu "Usangzual" ka tih vang chuan a ding leh rih a, zawhna mitmenga min en lai chuan engthil emaw a vawm zawt ka chak a nia.




"Msa kha i hrechiang miah lo nge ni a, i hre sa vek zawk?" ka ti leh tawl ringawt.



"Eng nge i sawi awmzia?" Counter bawh chuan a rawn dinga, inhmatawnin kan inmelh ran tawh, a awmdan ah chuan engmah hre lo te pawh a ang lek lek a, hre chiang mang hlei lo a min sawi pui ringawt pawh chu a huatawm tawh hrim hrim.



"Hnamdang a nih kha, mizo a ni reng reng lo" ka aw chu a ring lem lo khawp mai, min ti hamhaih ve bawk em a ni.



"Hnamdang a? Tehdaih a!" Kei ai mah chuan mak a tih hmel zawkin ka hria, a, hahthlak hian...



"Hriatchian mang loh te in sawipui ringawt zel tur a ni hleinem?" ka ti leh hlak a, ka thinrim thar leh ut ut tawh.




"Eng hnam nge a nih a?" a tih chuan ka chek tlak a, "Chutiang ka hre si se lo, Mangal Singh-a a ni tih ka hria a a ni mai" ka ti leh hap a, Usangzuala chu a ner nang ringawt. "Msa tih chu Mangal singh tihna maw lo ni a, i hriat sual miah lo maw?" a rawn ti leh haw a, a chhan pawh ka chhang buai peih tawh lo.




"Mizo a van ang em em ve, Malsawmsanga, Malsawmzuala tih vel niturah ka lo ngai a, a va zia lo ve" a ti nuah nuah a, a nui tel sung bawk. Engmah pawh ka sawi leh hma chuan "Thlangkawr vai tawnah i liam ṭep anih chu a" nui pat pat chung hian a ti leh a, ham ham hian...




"In nupa hian in pawlawh emai a, tumah min sawipui rawn tum tawh suh u, ka peih tawh lo" ka tih hlak hnuah choka ah ka luhsan a, ka va chhuah leh chuan a lo awm tawh lo, inchung lamah a ṭawng lang lang ri ka hria a, Customer an awm tawh loh vangin haw tumin ka insiam a, Pa Rela hnenah chahbi hnutchhiahin ka hawsan zui bawk.




Ka Phone ka en chuan Msa Missed call dang a lo awm leh tawh a, ka thaw a ti ipik zual deuh deuh in ka hria, eng nge a bulah chuan va sawi tur pawh ka hre lo, a zahthlak ka tih rualin ka thinrim tho bawk si, Msa lakah erawh ka inthiam lo deuh a, sawifiah dan tur ka ngaihtuah ruai ringawt a, a rilru ti hrehawm lo zawnga sawi thiam ka duh takzet. Rilru nuam lo deuhin ka awm reng a, a Call lah chu ka chhang duh lo ringawt a, nuam lo ka ti telh telh mai.




Zanriah ei dawn chuan sitting room ah ka ṭhu a, ka lo inngaihtuah nasa deuh a niang chu ka epa ṭhu ka pa chuan min lo en vung vung hi a lo nia, a hmel ka hmuh rual chuan ka harh deuh kawk nghe nghe. "Chaw i ei leh dawn em?" ti a ka nuin min lo zawh chuan ka puar hauh lo nain chaw ka chak miah lo, ka engtih tha mah a tho lo a ni ber e.



"Dawr chung chu an khawih ta em?" Ka pa chuan a lo ti ve khauh a.



"Vawiinah an khawih ṭan a, bang leh inchung aṭangin tui a put a, a hautak hmel lutuk, duh angin ka ti thei lo ang tih ka hlau tak tak a ni" ka ti sap sap a, Usangzuala kutah engkim ka dah vang te chuan ka rilru a hah zual.




"Engtin nge tui a put theih a?" ka nu chuan a lo ti ve leh a, "Ka hrechiang bik lo, inchung lam chu a harsa lo anga, Storage room zawk ami kha khawih tur a tam hmel a, Building nei tu te Bathroom Leak nge ni?" ka sawi laichuan ka tuiloh zia ka hmelah a lang thei ang.




"Bathroom Leak a, a va tenawm duh awm ve, dawr chhungah a rawn luang lut tihna a mi, eitur zawrhna tur a ni sia" ka nu chuan a lo ti ve zung zung a, a ten chhe bawk a, a hmel a aṭang chuan kei aimahin a tuiloh hmel zawk.




"Ka hre chiah bik lo, an tui zem pawh a ni thei tho" ka ti niah niah a, keimah tak chuan Bathroom Leak anih ka ring zawk mah, Mistiri pawh khan a ring ve thoin ka hria.




"Sangzualan tihdan tur a hre mai lawm ni?" ka pain a tih chuan ka chhang lem lo, vawiin lam thil vang nge an nupa chungah hian ka innghat ngam meuh tawh lo, hlawhfa te phei chu vil ve ran an ngai a, Usangzuala chu a buai bawk si; a kuta dah chu a fel lo deuhin ka hria.




Ka chhungte chawei na bulah chuan ka va ṭhu phei ve ta tho a, chawhmeh tem zauh zauh pawh chuan vawiin lam thil chu ka sawi mawlh mawlh a, Msa chungchang erawh ka sawi tel lo thung, hnathawk ho eitur kan pek tlai em vanga ka zah thu chu hahipin ka sawi a, an ni pawn pawi an tih hmel khawp mai.




"Mawipuii a hman tho chuan dawr nghah tir la, nangin inchungah hnathawk vil ta mai la, vai Mistiri phei chu thut chilh chat tur, phakar deuh chhawr fuh te an awm ve ṭhin a nia" ka pain a tih laiin "Mizo Mistiri a nia kan chhawr chu, an hna chu a ṭhat hmel lutuk" ka lo ti ve thuai a, Mistiri lam hna hre ve vak lo mahila kan Mistiri chhawr kha chu mi fel tak niin ka hria, a hmel aṭang rengin ka mi rin zawng tak a ni ve tlat.




"Ṭhutchilh theih chuan ṭhutchilh a ṭha hrim hrim, eng ilo mamawh te pawh an nei thei a, chu loah an khawih laiin i duhdan te pawh i sawi ve zel anga, an kuta i dah mawl tawp chuan i duh dan lo a an lo siam palhin hna a rei duh, i tan leh i hnathawk te tan pawh a ṭha zawk" ka pain a tih chuan ka lo bu ve nghat nghat a, Msa chungchang kha hria se engtin tak sawizui ve ang maw?




Zan ka mu tur chu ka beisei loh deuh hnen aṭangin Call ka dawng ve hlawl mai, "Kan zin kan rawn haw tawh a, hei i Urosy-in Kurta a hawn che a, naktukah ka rawn pe kawi ang che" a rawn ti luam a, an reh ka lo ti viau kha a nia; an zin tih reng reng ka lo hre lo.




An zinna te zawtin kan inbe ve reng a, Ufamkima nu an lo zai ṭha leh niawm tak a ni, an chhungin Bangalore ah an kal a, niminah an lo thleng chiah tih te ka hre leh zel a, engmah chanchin min hrilh lo chu Ufamkima chuan ngaihdam te min dil nghal bawk nen lo vuina hun pawh min siam lo a ni ber.




"Nangmah i damṭha em?" Ka tih chuan zangkhai deuh hian a damṭhat thuin min lo chhang a, rei kan inbe lo, Phone kan dah hnu chuan khumah muin chunglam ka thlir vang vang a, keimah ah hian danglam a awm, ka sawifiah thiam hauh lo. Mahse, engthil emaw kim lo riaua inhriatna ka nei a ni. Ka lung a leng hauh si lo, Ufamkima ka biak zawh chiah vang em mawni dawn le?




Ani nen chuan ṭhianṭha tak ang chauh kan ni tawh a, ngaizawng rilru pu a ka en lohna pawh a rei tawh, chutih rualin ka duhsakna erawh tunhma ang thoin engmah ala danglam lo, mihringin a damchhunga thilṭha a dawn theih ang zawng zawng dawngin chhungkaw hlim tak nei sela, pasal ṭha tak leh Christa te unau tana pa ṭha tak ni bawk sela tih hi ka duhthusam a ni, chuan kei hi..a tana a ṭhian hlu tak ni ve bawk ila.....




Zingah chuan ka tho hma khawp mai, ka inbual rualin lu ka su nghal a, nidangah chuan tlai lamah zawk lu ka su tlangpui ṭhin a, chu pawh nikhat danah, tukin chu ka lu sukni a ni lo nain ka suk loh chuan ka awm a nuam thei tlat lo a ni.




Nidang aiin ka inchei te chu ka bei uluk a, ka kawr eng hak mil turin kekawr ka thlang a, ka sam chu ṭawn loin ka thlah bawk, darthlalang hmaah chuan ka ding vang vang a, thawk leh khatah ka tawt up up mai!



Hetianga awm tur hi ka ni tawh lo...



Ka sam chu ṭawn tumin ka hui khawm sawk sawk a, tuk danga samṭawn thlap ṭhin khan vawiin hian samthlah ka tum a, a chhan pawh sam thlah ka inhmeh thu min hrilh ṭhin tu kha min hmu tura a lo kal dawn vangin, hei chu zia lo tak a ni.




"Inngaihtuah harh rawh Saitluangpui" keimah leh keimah chu inhrilhin ka biang chu ka beng thawk thawk a, am zetin thawk ka la leh rih ṭhin, ṭhianṭha ang chauhin ka en tawh ka ti fo a mahse, ti nge hetiang hian ka la awm si, mi pasal a ni a, naupang duhawm tak tak te pa leh an tana mi hlu lutuk a ni, lo ngaih melh tur ka ni tawh lo, hetiang chuan engtin nge a nupui leh fa te ka hmachhawn theih ang, min ngaina em em vek a, chutih lai kara rilru le lo lutuk lo put hi thil dik lo tak a ni.




Ka sam chu ka ṭawn mawlh mawlh a, vawi thum lai ka ṭawn ṭhat hnuah sam thlah chung chuan ka chhuak ta tho chu a nia, danglam awm tlata inhriatna thleng hian ka paih bo a ngai a ni, ka sam ṭawn leh thlahin awmzia a nei tur a ni lo, tunah chuan kan paltlang zo tawh a lawm.




Dawr ka thlen chuan Pa Rela leh kan nula te pahnih an lo awm a, dawr chhung pawh an lo tifai diam tawh, rei vak loah Umawipuii a lo thleng a, ka lo sawi hma hauhin min rawn zawt zung zung mai, ka chhang hman meuh lo chu a ni.




"Sangzuala ka hau hrep, a ngaih a sam leh lutuk a, pasal nei rual tawh intihpui tur meuh te chu uluk ve tur ania, ka thinrim tak tak a ni, a nui a nui a, tukin phei chu ka hau nasa lutuk" a ti hlak hlak a, ṭawng na hun ka chang leh pek lo.




"A rawn be leh che em, nge maw chupa pui pawh chuan sawi nachang a hriat loh le? Mukesh singh-a a lo ni daih lehnghal a, ti awm ang lo.." a ṭawnglai chu lo pawt chatin "Mangal singh-a lawm" ka lo ti zauh a, a ner nang ringawt.



"Engtin nge i hriat chhuah reng reng?" a ti leh hluai a, sawi leh chak tawh loh nak a lai chuan.



"A ID ka hmu" tih zawngin ka chhang.



"Awi, inneih hmain i hrechhuak lo anga man hlan hun ah te i hre chauh ang tih a hlauhawm zawk anih chu" thawk ka lo la hluai a, phawr phawr zel hian...




"Engtik laiin nge ka nei dawn tih ka sawi a, kalpui rawh inhriat chian nan a ṭha in tia ka kalpui ringawt a lawm, kha tikhan ka kalchhan angin ka hrechiang a a ṭha a ni mai" ka lo ti hlak hlak a, Aumawii chu a ngawi dak tawh.




Ka bula rawn ṭhut pah chuan min thlek dak dak a, a nuih ruh ruh chu ka ngaithei vak lo. "Eng nge min nuih reng a?" ka tih rual chuan min rawn nghawk zauh a, "I puitling sawt riau" a ti mauh mai. Ka chhan veleh hma bawk chuan "Vawiin chu i van nalh ve, i hmelṭha set set riau mai" a ti leh zat a, hman aṭang tawhin serthlum rawng hi inhmeh min ti ve hrim hrim, ka melh rulha ka nui ṭha duh vak lo, lawm lo deuh anga lan ka la duh.




Coffee kan in laimekin hnathawk ho an lo thlenga, Mistiri ber chu a rawn tel lo, Helper ho hlir an ni, an bengchheng hle a, inchunga an chhoh hnu pawh chuan an thawm aṭha khawp mai.




UFamkiman min lo call em tih ngaichangin ka Phone chu ka bih khat tawk reng a, a rawn pen kawi hman ka rin chiah loh vangin a Motor lo chan a ngai maithei a, amah lah chuan engmah chanchin a rawn sawi si lo a, sana ka en chuan dar kua a lo pel fel der tawh, a kal tawh zawk em mawni dawn le?




"Msa a lo kal dawn a mi a?" Aumawiin a lo tih chuan chhang lawk loin pawn lam ka thlek dak dak a, "Awi be tawh suh, Sangzuala ka lo sawifel tir mai ang" tih pah chuan min rawn nghawk leh sawk a, ka Coffee in lai a ti baw lo chauh a ni.




Kawt maia Motor thawm ka hriat takah chuan Counter bawh chunga thokang meuhin pawnlam chu ka va thlek a, chutih laichuan Mistiri kha a rawn lang hlawl a, Ufamkima emaw tiin ka lo nuih hman pek a, a hmel ka han hmuh chian rual chuan ka nui tawp rang kher mai. An intiat angreng lutuka chuvang te pawh chu a niang.




Ka lo nuih vang chuan mak a ti tih hriat takin a hnung lam a lehhawi kher a, chutah a mah ngei ka nuih tih a inhria a ni chek ang chu, tawi te hian a rawn kiai ve suk a, Awi leh...min ti zak zawk e a.




"Mistiri kha a va chhe lo ve" Stepa a pen chho lai en ha ha chungin; ka beng bulah a rawn ti sur sur mai, "Tinge a nuih che a?" a rawn tih leh pawh chuan ka chhang duh miah lo.




"A va han chhe lo em em, nimin khan Mask a vuah a a hmel ka lo hmu miah lo a, a pian te kha.." ka ner nang a hmuh takah chuan a aw chu a zuih ral ti tih a, "I star a ni maw?" min ti ringawt nia, leh thawr zel a.



"I mawl a maw ni le?" ka tih hlak a, a la duhtawk mai lo. "I lo chan run dek dek kha" a la ti hram.



"Amah ka chang bawk lo e" ka ti vin leh hluk a, ṭawng tuma a an leh zuau laiin kawngkharah mipa khat a rawn lut a, kan hawi rual zawt a ni ber, Ufamkima ka hmu chiah chu ka ding hluai a, min rawn nuih var var ka hmuh rual chuan ka lungphu te chu a rang dup dup maiin ka hria.




Bag pawlah hian engthil emaw hi a rawn khai a, Counter lam a lo pan lai te chuan amah ngawt chu ka lo en a, a dam sam lo emaw ka ti rum rum a ni, a dawldang hle a, a mitkhur a thukin a lang upa ta sawt in a hriat a, a vun te chu a dik miah lo, ka ngaihbel zawk nge le, ka hmuh danah chuan dam lo a ang riau.




"Hei i thil tur chu, han enchhin teh le" a Bag khai min rawn pek pah chuan phur hmel deuh hian a ti a, ka lo ban ve thuai bawk, Kurta Sen nalh fahran hi a lo ni a, a chhungah chuan Snowball lem tereuhte awmna Key chain hi a lo awm bawk a, chu chu Ufamkima hnen aṭanga ka dawn ve anih ka ring.




"Aumawi, U rosy min lo hawn anih hi" ka bula Umawii ṭhu chu ka nek salh a, a lo nui lui ang sawng a, a duhloh lam hi chu a pe na ve thei a nia.




"Ka lawm lutuk tih min lo hrilh sak dawn nia aw, a zarah Kurta mawi tawk ka ha dawn a nia hei" tiin ka thiam tawkin lawmthu ka hrilh a, a nui hmel chu ka en rei duh vak lo, eng vang teh hrep nge ni, ka rilru le lo leh suahsual vang a niang Ufamkima chu ka khawngaih tlat a nih chu, a landan chuan min ti lungawi lo ve ringawt bawk a, zakthei lo hi ka in ti zawk.




"Hmuh loh chhungin i lo ṭhang a ni maw?" pawnah kan chhuah hnu a a tih chuan ka nui hak a, tunlai chu ka thau ve deuh a; a lo hmuthiam chat a nih chu.




"A mawi lo deuh tawh em?" Ka tih chuan lu a thing a, ngaihawm zetin min nuih bawk.




"I damṭha tih a lang zawk, i mawipui bawk a" a Motor kawngkhar hawn paha ti lehin lut mai lo chuan a ding vang vang a, sawitur ka van riau, ani pawh chu a ngawi vung vung a, "Kal tawh rawh, i tlai lutuk ange, dar kua a pel tawh a nia" ka tih takah chuan a lut ve chauh nghe nghe.




A tlan liam hnu chuan muangchangin ka inher a, Ufamkima landan mawlh chuan ani ka rilru tibuai, a zunthlum a sang deuh em mawni le, a vun te kha a nung loin a hil deuh bui in ka hria, a dang bawk si a, ahma a ti sen ang kha hmuh tur a awm tawh lo. An nupa kar a ṭha lo em mawni dawn le, nge a nu vang zawk ni ang aw?




Dawr chhunga ka luh leh rual chuan "Tihdanthiama kha i la be reng ṭhin ami a, kan inbe ngai tawh lo i ti emaw ka tia" Umawipuiin a lo ti sawk sawk a, "Be khat lutuk, an zin a, niminah an lo haw chauh" ka tih ve mai a, Bag a Keychain kha lo phawrh lehin "Hetiang thil Romantic te hi in la inpe bawk sia, nupui nei tawh chu kawm loh a ṭha asin, i bialpa hlui a ni bawk si a, vawikhat ṭawng sual palh hlek pawh a pawi thei" a ti mawlh mawlh a, a ngaih ang engmah a awm dawn lo tih erawh ka chiang, chutiang thil thlen tir chu ka duh loh ber kha a ni tlat.




"Engmah a awm tawh lo" ka tih pawh chuan "Kawm tawh lo ve mai la, a nupui pawn a ruk tak chuan a ngaithei miah lo ang che, kei ni ila ka pasalin a lo chuk a lo chuk tawh hnu nena an inkawm zui ka phal teuh lo mai" a ti leh zel a, mi mah rilru buai ve nak a lai chuan.




"Inchung ho ka han ngaihven lawk ange, tikhan lo ṭhu rawh" tih leh inchung lam pana kal ka rual a, ka awm reng chuan a ṭawng tawp leh mai lo ang, a zeldin thu mai mai pawh hrawk phiar tawn tawna an pui thei kha a ni miau a.




"USamu, i bialnu a lo kal" tih ri ah chuan ka ding dat a, kailawn ka chhuak chiah chu min lo nuih ṭha hlawm a, chutih laichuan leihlawn sang aṭangin Mistiri hmuihmulbuka khan min lo en ve reng a, min ti hamhaih lutuk chu sawi mai tur pawh ka hre lo, ka zah deuh chang lah hian ka dang a awk tlat zel lehnghal a.




"Sangzuala a lo kal dawn em?" a rawn ti thum deuh dut a, a nui lo a, a ṭawngkam a bul hle bawk.




"Dawn lo, vawiin chu keiman ka vil ang che u" pangngai thei ang bera ka tih chuan min rawn en leh ṭhap tawh.




Ka piah chiaha tlangval chuan "Chi nang a, hna kan thawk thei lo ang, Mistiri ber hi..." Mistiri in a lo melh dan vang chuan a ṭawng tawp chawt a, "Zela, nang ang rual fa a nei thei var var tawh rualpui chhaih suh" a lo ti nghut a, a lam ka hawi rang kher mai.




Eng ang hmuhin nge maw min lo hmuh le, mi zawng zawngin 'I lang upa thei lo, i lang tleirawl reng mai' min tih sup sup laiin Hmuihmulbuk-a hian fa tlangval nei rual hmuhin min lo hmu chu a nih hmel a, a mi biak lah chu kei aiin a naupang awrh chauhin a nia ka rin ni.



ZAWMNA



Ka lo melh tur deuh nge ni ka lam a rawn hawi chu tim deuh hian a lehhawi leh vat a, engtin phei chuan ka chhang zui bik lo, tlangval ho chu an titi pah bawrh bawrh reng a, Storage room en tura ka kal chu ka hnung maiah Mistiri chuan min rawn zui ve thuai bawk.




"Pipe lei la, tlai lamah kan siam dawn nia, Cement pawh a ngai ang" hnung lam aṭang chuan a lo ti thum dut dut a, kawngka ka hawng fel chiah chu chhuat ka rah na zawnah chuan tui a rawn luang chhuak zung zung a, kawrte ah chuan tui a lo tling khat vek tawh chu niin.



"Ekhai aw!.. avan tling chak ve maw le" ka pheikhawk a huh hlaua ka tawlh hnung tur chuan Mistiri chu ka va ngheng dawp a, ka tukkhumin a khabe ka han tauh sak a ni zawk mah.




"Awi...! I lo kun tih ka hre lo a" phawk lek lek a nuih tlawn deuh chungin ka ti leh rih a, a nui ve duh hauh lo, a khabe tuai rauh rauh chungin Room chhung chu a bih a, "Puanchhia in a hip chhuah theih ang, puan leh Bucket zuk la rawh" tih zawngin min chhang a, hmanhmawh deuh chuan kei ka tlan thla a, choka ah puanchhia hman mai tur an lo nei si lo, kut hrukna Towel lianpui chu ka pawt thla lawp a, Bucket kengin ka tlan chho leh hlawk hlawk a, ka han thlen chuan tui put chu dawr chhungah a lo luang kawi ngiai nguai tawh.




"Engtin maw ka tih dawn?" ka ten deuh reuh chuan ka khawih duh mai lo, chutih laiin ka Towel ken lai chu a rawn phih thla vut a, chhuat huh lai chu hru mawlh mawlhin Bucket chhungah chuan a sawr zel a, chhuat a hruk laichuan tlangval ho nen kan lo thlir ṭhap hlawm.




A hrechhuak thut a niang chu ka lam a rawn hawi vut a, "Lo ti rawh le" tih pah chuan chhuata Towel huh chu a melh zauh a, thuawih deuh chuan ka lo la ve leh mai bawk.




Storage room a tui tling zawng zawng la chhuak tur chuan hun a duh rei khawp mai, Bucket a khat zung zung a, Stepa ka khai thlakna lamah chhuat ka ti huh zeih zuih tawh.




"Tinge nangman i tih a, hnathawk ho kha tih tir ta che" Umawipuiin a tih chuan ka hrechhuak ve leh chiah a, mawl ka inti ve lek lek a ni. Ka han chhoh leh laichuan Ceiling siamin an lo la buai khawp mai. Khai peih tawh miau hek lo tu emaw ber chu ka tirh mai loh chuan.




Storage room bulah chuan dingin an hnathawk chu ka va en leh rih ṭhin a, ka tir ngam bawk si lo; tir duh bawk si chu ka inkhap buai khawp mai. Mistiri lo hawi laichuan zaizirin kan lo hrilh mawlh mawlh a, a nur nang ringawt a.




Rei vak loah a thil tih lai dah chuan a lo kal ve mai a, a naute tu emaw a tih tir ve mai ang chu ka tih laiin amah pui chuan a rawn ti nghal sawk sawk a, kawrte bula a kun duk duk lai chu inthlahrung ru deuhin ka lo thlir reng ringawt mai a ni.




Chawhma pum chu tui put kan buaipui a ni ber e, kan zawh hnuah thingpui an in a, keipawh inchungah ngawt chuan ka tap a, tlangval ho lah chuan min chhaih zuk zuk reng a, fiamthu an thawh a min ti nui min ti nui ve mai.




An Stool dah sang ir er ah chuan bawp khawkherh at a ṭhuin Phone ka khawih a, tlangval ho hnathawk chawl chu ka bul chhuatah an rawn ṭhu dar dar bawk. "Min lo vil ziah rawh aw nangman, anih loh chuan ril a ṭam thei emai" an zinga phawk berin a tih chuan "Vil ziah tawh ang" ka lo ti ve thuai a, chutih laiin Mistiri chu a lo chhuk ve mek a.



"Kum engzat nge i nih a?" rawn ti heu tu chu zing lama min lo chhaih tu kha a ni.



"Hmeichhe kum zat an zawt thawr thawr ngai lo, an thuruk ve a lawm" a ṭhianpa in a lo tih laichuan "Ka hre chak a lawm, kan inrual loh pawn kei aichuan a upa tam miah lo ang" chupa pui chuan a ti leh a, kei ka lo nui mai mai thung a.




"Nang angrual fa a nei thei tawh Usamuan a tih kha" pakhat zawkin nui chunga a tih leh chuan Mistiri chu ka va melh zawk a, kan inmelh fuh chiang thei em em mai lehnghal a, engtin emaw riau hian ka awm a ti nuam lo ṭhin, amah zawk chu a hawisawn vat zel bawk a, zak ang phei chuan a awm hauh lo.




Eng engemaw tiin a vei kual thuak thuak a, a che vel chu a hmuhnawm riauin ka hria, palian tak leh ṭawngtam lo tak anih na chuan engtin emaw zawng tak hian a ti zahawm riau a, a thinchhe viau dawn emaw ka tih laiin a dawhthei phian lawi a, a naute ho lah chuan a zai an ngai thiam em em bawk a, Mistiri ber a taimak em vang a nimahna tumah thatchhe fal leh awm awl mai mai an awm ngai miah lo.




"Kum engzat nge i nih zawk?" Tlangval bula ka tih chuan "19..nang ve?" a lo ti var a, hehh...kei aiin kum 10 dawnin a naupang a, chuti chung chuan a rualpui emaw amah aia upa awrh tur hmuhin min hmuh chu a nia, lawm loh chi pawh va ni suh.




"I nu rual anih kha" bang lam hawia ding chuan a rawn ti leh khauh mai, ka va hawi laichuan Wire a sam mual mual a, a tukkhum lam min chhawn tlat vangin a hmel ka hmu thei si lo a, a nui maithei a ni.



"Kum engzat nge i nih?" Ka bula mite chuan an lo ti leh a, Hmuihmulbuka min sawi dan kher kher vang chuan ka kum zat sawi chu ka duh ta tlat, kum 30 em pawh ka la tling hleinem, tunlai angah chuan nula Senior tih tur em em pawh ka niin ka inhre lo.




"Kum 28 ka nia, i rin aiin ka upa nge ka naupang?" ka sawi pah chuan Mistiri ka va melh kher a, a rawn lehhawi ka rin tehlul nen engtin mah zuk han danglam hauh lo chuan.




"I upa tho a..mahse....i naupan hmel! Kum 22 vel ni turah ka ngai che a" ka bula ding chuan a ti bah nak a, kei ka lo nuisang thung. Mistiri lam chu hawi ṭha lehin "Nang ang rual fa chu ka la nei pha chiah lo, ka rilru phei chuan Sweet sixteen a la pel miah lo zawk" nui pat pat chunga ka tih leh takah chuan a rawn inher ve ta hram e.




A Wire ken lai tum tel pahin a rawn kiai suk a, engmah phei chu a sawi lo, min ngai upa leh lutuk chu a tilui ni tlatin ka hria a, min chhaih ve deuh nge maw ni le, a awmdan ah lah chuan min chhaih tum hmel a pu mang bawk si lo a, a thutak run vei nen a mizia chu mak ka ti deuh riau a ni.




Tlangval ho chu tuichhe paihna tur hmanraw leitur chuan a tir a, ṭhenkhat an inzui chhuah tak hnu chuan kal ve lo mipa pahnih te nen kan lo awm a, sana ka en chuan dar 3 a lo ri leh reng tawh. Tlangval pahnih awm ve te chu Veranda lamah chhuakin zial an va zu a, an ṭawng lang lang ri chu ka hre pha a, Bike chungchang an sawi a nih hmel e.



"I ṭhutna kha ka lo hmang lawk ang chu" tih ri ah chuan ka hawi chhuak thuai a, ka hma zawnah lo dingin min lo en leh ran tawh a, a mitmeng hi a danglam riau a ni, mi thunun theihna mak deuh a nei niin ka hria, min tirh changa i he loa ka zawm zat zat ṭhin te hi hei vang hi a ni maithei, tunah pawh zawt buai miah loin ka tho leh tharh tawh chu ania.




"Ih..." ka lo tih chuan Chair-a a ding kang tawh chu a rawn hawithla leh a, a Tuboh ken lai chu lo melh vung vung chung hian "Ka upat hmel viau a mi a?" ka ti tawl mai.




A dar a chhin uk a, min ngaihsak zui loin bang chu a kilh ṭha mawlh mawlh a, min chhang tawh dawn lo emaw ka tih hnuah "Zela pawn a u rual emaw a tih che kha" a lo ti khauh a, chhan let mai dan tur chu ka bangbo hle.




"Nangmah khan upat hmel min tia mi?" ka ti leh ta ringawt a, ka lam a lo hawi leh laia a thutak hmel em vang chuan ka tim leh hnuhnawh a, thil ho mai mai a ni ka sawi ni, ani min hmuhdan mai mai te chu pawimawh tak pawh a ni lo a sin maw le.




"I thinrim em ni a?" a tih chuan lu ka thing rang viau a ni, "Thinrim lo e, fa tlangval nei rual tawh anga min ngai kha mak ka ti deuh mawle, ka lang upa viau aniang chu ka tia" lai deuh a tih pah chuan ka nui pat pat a, ani pawh a lo nui ve suk suk a, min hmuhdan chu sawifiah deuh se ka la ti ru hle thung.




"Kum 19 in a u rual anga a ngaih che chuan i lang upa vak lo aniang chu" a ti leh mai a, hepa pui hian lang upa min ti nge ka kum aiin ka lang naupang a ti zawk ka la hre thei hauh lo anih chu.




"Mahse, nangchuan..." ka tih leh laia min rawn enchian em vang chuan ka ṭawng a zuih ral khawp mai. "Ka hmuhdan che tinge hriat i duh a?" tiin min lo zawt let khauh a, ka ṭawng mai duh lo, ka dang a awk leh dawn tlatin ka hria.




"Ka rin aidaihin i upa?" nui sak chunga a tih chuan ka lawm leh lawm loh pawh ka hre lo, lan naupan chu engmah a lo ni leh silo te pawh a niang, a chhan chu ka upa tawh miau a.




"Nia, ka Senior tawh a lawm, mahni a Torch light nei chin kha ka ni tawh a" zah zela ka tih ham ham laichuan phawk fe hian min rawn en a, "Oh...mahnia Torch light nei hrang chin an tih ang rual kha ka nia" ka lo ti leh zauh a, a bu nghut ringawt.




"Keipawn Torch Light chu ka nei hrang a lawm mahse, a chhe tawh a" min en lo a, keiin ka en kiau thung, chhan let dan tur pawh ka hre lo.




"Kum engzat nge i nih ve?" ka ti thawr a, sir lam min chhawn mah se a kiai suk tih chu ka hria. "Nupui fanau te i nei tawh em?" ka lo tih zawm leh a, chutah muangchanga rawn chhuk te tein, ka hma ah chuan a rawn ding a, Mizo mipa ah chuan pianthiam pawl tak chu a ni ngei ang, a sang ṭhain dar rinawm hmel deuh a nei a, hna a thawk rim hle tih pawh hai theih a ni lo, a hmel erawh a hmulin a hliah ṭhen nasa ema ngaihdan ka siam mai thiam lo thung a; mahse, a mitmeng mawlh chu a ni, miten amah an Notice na hmasa ber a nih ka ring tlat.




"Nang aiin kum sawm in ka upa, nupui ka la nei lo a, ka nei ve ṭep tawh" tiin min chhang a, ka zawh tirha a hmel awmdan ang ai hian mi hi a chhang ṭha duh leh phian zel a, a dang zawh leh a chawh riau mai.




"Chutia law, kuminah em ni a?" nelawm taka nuisangin ka ti a, a mizia te hi ka kawm peih chi tak tur niin ka hria, hnathawk te tana nelawm tak nih chu ka tih tur niin ka hre ve bawk.



"Ni lo ang, hun thawl ka nei lo lutuka" a ti sam mai a, a kum zat a sawi danah a naupang zawk zawk tawh bik si lo a, nupui neih nana hun thawl nei lo a inti tlat chu ka hriat thiam loh zawng tak a ni.




"Ti nge...hunthawl vak a ngai chuang em ni, inneih te chu nikhatah a zo vek a lawm le, inbuatsaih leh neuh neuh tih nan karkhat vel ni bawk ta se, chutiang chhung lek te chu awm awl mai la" ka lo ti zat zat a, Chair-a a din leh tawh vangin dak vahin ka en chho bawk.




"Chutiang mai a awlsam a la ni lo a" a tih chuan zawhna dang ka la nei cheu.



"Eng ber nge buaithlak a?" kan Mistiri hian hna a duh hmel ka ti riau, a ngaihzawng tana hun pawh pe hleithei lo a hna duh chi anih teh chuan ka zilh deuh ang ka ti rilru a, chumi tur chuan min chhan lehna tur ka lo ngaichang ran tawh.




"Neih mai theih a ni lo, inbuatsaih tur a tam lutuk" ka lo chek tlak a, "Awi a...Mistiri i nia, khum te pawh nangman i siam zung zung thei dawn alawm, kar khat lek chhungin engtham mah in hlawh chuang nang" min rawn en dan vang chuan ka tim leh hnuhnawh khawp mai, a hna sawinep sak angah min ngaihloh hram ka beisei.




"Engtin nge an koh che" a rawn ti ta daih a, "Saitluangpuii ka nia Mimite tiin min ko ṭhin.." ka lo ti var a, engtak rawn sawi leh ang maw ka tih laiin "I sap hming maw" a ti bauh a, min en tawh loin hna a thawk zui mawlh mawlh a, ka chhang ta bik lo.



"Nang tunge i hming?" ka sawi zawh rual rual chuan Samuela a ni tih ka hre leh hnu hnawh a; mahse, ka zawt zo tawh.




"Lalrambeiseia ka nia..Samuel tiin min ko ṭhin..." a mi rawn chhan dan vang chuan ka nuih a za ta tlat a, ka nui chhuak hak nghe nghe a, a rawn hawi phawk ngei mai, min chhan dan kha naupang hnena a hmingpum zawt hi ka ang em a ni.




"I sap hming maw?" a tih dan chiah a ka lo tih leh chuan a bu nghut a, "Mistiri tih kha ka vai hming" tih leh pah chuan rang deuhin min hnungchhawn a, a hnung lama ding chungin ka nui ka nui mai, hepa hi a duhawm reuh ka ti, a landan leh a mizia hi a inpersan lutuk a, ka rinloh deuhin ka nel chi tak a ni bawk, biak tama nelawm tawlh tawlh chi ang kha a ni chiang a lawm, biak loh chuan ṭawng ṭha duh miah lo, biak chuan ṭha deuha mi chhang ṭhin ang kha.




"Hna chu ṭul viau mah se nupui chu nei phawt rawh, hmeichhe tan chuan upat deuh hnua pasal neih chi a ni lo ania, i bialnu dinhmun tur te ngaihtuah ve zawk la, kum engzat nge a nih ve reng reng a...?" ka ṭhutna siamrem pahin ka ti zung zung a, "A..." a rawn ti uk tawh nain tlangval ho thawm vang chuan min chhang zui ta lo.




"U Samu, i sawi ang tak kha a awm lo a, a aia lian hret kan lo la mai" an rawn ti lang lang a, "A hman theih tho" Mistiri in a lo tih hnu chuan an che zui sang sang a, ka ṭhutna Chair kha an hman tak daih vangin ka ding reng a, an chetna ka dipdal ve deuh bawk nen inhnuai lamah ka chhuk san zui a, inhnuai lam pawh an lo buai ve lai tak a ni.




Rei vak lo ah Usangzuala lo thlengin inchunglam chu a han enpui a, kan dawr ṭhenawm chiah te dawr chhung zawka tuichhe Pipe chu tui put na lainen a inhnaih zawk a, chu chu zawm an va dil a, dawr nei tu chuan min lo phalsak hlauh mai.




An siam rei tak em vangin dar 5 pelh hnuah an haw thei chauh a, kan Mistiri chuan a ngaihna a lo hre khawp mai a, tuiput vanga buaina chu a kiang ta duak a ni ber e, dawr kil bang hrulah chuan Pipe an kal tira, ṭhenawm te nena kan indaidanna bang chu chhete verhin tuichhe pipe an zawm tir a, Storage room a tui chu put reng tho mah se Pipe a a luanluh tak vangin kan dawr chhungah a rawn lut thei tawh lo thung a, sum tam tak sen angaih ka rin laiin awlsam tein min tih fel sak vek mai a, sawi hmaih theih loh a kuthnu a mam em em bawk.




Zanah Msan min rawn Phone leh a, Usangzualan a sawi tawh vangin lo pehhel reng chu a mawi awm lo e, Phone chu ka chhang a, "Mimi, ka van inthlahrung ve, engmah hrilh nghal nachang che ka lo hre lo a" a rawn tih chuan ka inthiam lo ve reng mai.




"A pawi lo, inthlahrung suh" ka lo ti ve thuai a, "Ngawirawh, thupa chawi ka ngai, ka ti lungawi lo viau ang che" a tih leh zel a, kan inbiak tak zelah chuan ngaihdam dil nan kawr min lei sak a tum mauh mai a, kan inhnial ṭawng ṭawng a ni ber.




"Ka hman veleh ah ka rawn leng ang, kan la inkawm zel tho ang chu tiraw?" tiin min zawt a, 'Aw' ti lo a chhan chi ni hek lo, ṭha deuh chuan ka chhang a, ka awm erawh a nuam zan lo khawp mai, hnarna ṭawngkam a hriat loh vangin amah ah khan thil danglam tehchiam awm awmin ka hre lo a, min la beisei tih ka hre thiam mai bawk.




Umawipuiin min rawn puih hman tak loh vangin kartluanin ka buai a, inchung lam pawh ka ngaihven hman meuh lo, Usangzualan zingah leh tlaiah a rawn enpui a, an hna a sawt viau aniang chu an zo thuai reng a, ka rin aiin an Bill a lo sang hrep lehnghal a, ka rin ang a lo ni hauh lo, Mistiri hna hi a lo hlawk hle tih ka hre ve chiah a ni, hetiang anih chuan sawrkar hna thawk ṭhenkhat aiin an hlawhtam zawk fe dawn anih hi.




Tlaibanah Ufamkima a rawn peng kawi ṭhin a, Coffee in pahin a rawn ṭhu ve reng zel a, an zin haw hlim ai kha chuan a hmel pawh hmuh a nuam sawt khawp mai, Christ-a ei tur Burger leh theitui tih ang reng ka lo hawn tir ve a, a Coffee man lah chu min pe lui tlat zel a, a thlawnin a in duh ngai lo.




A lo kal ngun ta deuh aniang, a lo kal hun awmah hi chuan ka lo beisei ru ran zel, hriat loh karin ka lo thlek leh dak dak ṭhin, ka awmdan hi Umawiin hria sela chuan min kamkhat leh nek ang chu, UFamkima lo leng ṭhin tih takngial pawh ka hrilh duh lo, min hau leh ngawt dawn tih ka hre ve tlat.




Ṭhian kan ni tawh a, kan inlaichinna hi tunhma ang a lo ni tawh lo anih pawhin inbiak duh loh zui a, in mihran kher ṭul ka ti ve lo a ni, tuna kan awmdan hi Ufamkima duhdan tak pawh a ni vein ka hria.




Tlaikhat a lo kal chu Counterah kan ṭhu dun a, a Kamis senduk hak chu inhmeh ka ti kher mai, a nu chanchin kan sawi laimekin Ukimkimi a rawn lang hlawl a, keini pahnih min rawn hmuh chuan min chhaih zurh zurh a, chhang lem loin kan lo nuihsan mai mai thung.




Ufamkima haw hnu chuan ka bulah a rawn ṭhu sawk sawk a, engmah pawh ka sawi hma chuan ka hnung zângah min rawn beng thawr mai!




"I mawl em ni a, fimkhur ve ta che u, i u ka zawt ang ka tia, a lo la hriat ve loh takah nangmah zawt chiang tur chein ka rawn kal a" a ti mawlh mawlh a, eng thil nge a sawi ka hrethiam hauh lo.



"Eng thil chu maw?" Ka lo ti he haw a.



"Famkima nen in lo inngaizawng ṭha leh a ni maw?" a tih chuan ka ka hau ringawt.



"Ti awm ang lo e...." ka sawi laklawh lai lo pawtchat lehin "In inthup lo lutuka, miin an sawi sep sep tawh che u a nia, veng chhung mi te phei chuan tun hma a in chanchin engmah an hre si lo a, 'Famkiman ngaihzawng a nei' an ti ringawt a, nangmah an sawi na che tih pawh ka lo hre lawk lo a, ka ṭhian ten 'Dawr nei ania, tlaitin a birh tluk tluk' a tih vangin nangmah i ni tih ka hre chauh a lawm, an sawi ang tak takin ka rawn hmu leh nghal che u a, in thup lo dun ropui si, in hming chhe har lo ang, fimkhur ve deuh rawh u" a ti hlak hlak a, a thil sawi chuan min ti dang lek lek zawk a ni.



"I ngaih ang kan ni teuh lo emai, haw pahin Coffee a rawn in ringawt a lawm, kan inkawp ṭha leh tawh lo hrim hrim" ka lo ti ve vat a, a la awih loh hmel viau thung a.



"Pan loah tho a fu ngai lo, in awm dan ka rawn hmuh khan ka hrethiam vek, ka bula engmah zep a ngai lo, tihpui tu che u ka nia, in hming chhiat pawn ka mawhphurhna chen a awm ve a lawm" a ti leh zel a, hahthlak hian....min tihpui tawp si lo hi, a mi ngaihdan te lah chu a...




"I sawi awm ang lo emai, an nupain hria se an nuih a za ngawt ang" ka lo tih san a, mi te hian tinge thil hrechiang mang lo a mi chanchin sawi chhawn hi an peih viau le, engmah an mi ngaihdan a awm lo tih ka chian em vangin ka ngai thutak viau duh lem lo, mi chuan eng ang pawhin lo ngai sela Ufamkima te nupa leh keiin kan inkar chu kan chiang a lawm, keini pathum inkarah buaina a awm loh phawt a hnu chu an duh duhin lo sawi mah se, pawi tihna ka nei lo bawk.




Tlaia ka bang tur chu Scooty ka ken loh vangin dawr kawtah Taxi ka chang a, Taxi ruak phar mai tur ka hmuh loh vang chuan ka hmanhmawh ru tawh khawp mai, chutih laichuan ka hmaah Datsun Redigo silver rawng hi a rawn ding zawt a, a khalh tu chu hmeichhia a ni.




A Sunglass vuah la thla a a rawn hawi chhuah takah chuan kan innuih var var tawh. "Ka hai dawn che a lawm, kan van inhmu khat ve" ka lo ti thuai a, "He lamah kan awm lo reng a, thla hmasa khan kan lo haw leh chiah a lawm, ka chhuak tlem ve lutuk a, ka lo thlah ang che" a lo ti var a, sawitur a ngah hmel em vangin ka hnial duh ta lem lo.




"Tunlai inhralh a nuam chho tawh em?" ka chhan hma hma chuan "Eitur dawr chu englai pawn a lun ang a?" a tih leh a, nui sang chungin kei ka lo bu nghat nghat a, "A zia ve zel e, dawr tih len ka tuma, a chung kan siam zo tawh, kan la luah chho lo deuh a" ka tih chuan a lo phur hmel khawp mai.




"Khai a, i van taima bik tak e aw, hausak chiah i hmabak tawh anih chu, sum thawhchhuah na tur hi keipawh dap ve ka ngai a ni" a ti zung zung a, "Nang te chu in pain sawrkar hna a thawk a lawm" ka lo tih chuan a ner nasa mai.



"In nei lo kan nih hi, mi in a lawm kan luah, Ramkamdinga hian insakna tur a tuak a; kawr thar pawh min leisak lohna a rei tawh lutuk; mah se, vawiin chu ka nu nen kan bazara ka lei ṭeuh mai, a ṭhen phei chu ka dah thukru ṭhen ang, kan pa pui reuh hian a hlawma bazar hi a phal lo zel a" a ti niah niah a, Suzanne-i nen kan inhmuh tawh hi chuan a thlun pelh ang zar zar kan ni ṭhin; ti ila ṭawng na hun ka chang ve ngai meuh lo zawk.




"Nang chu nula man to i ni ringawt tawh, mo a tana it fe fe che an tam awm mange" a tih chuan ka nuih a za kher mai, "Pasal pawh ka hmuh zawh loh hi" ka lo ti ve zat a.




"Sawi teh suh, i ngaihsak lo anih zawk kha, nangmah ang nih ka chak a nia, ka lerh hma leh lutuk a, nulat ka kham lo keichuan, ṭhian te nena bazar pawh ka ti thei tawh lo, kan pa hi ka tawng hma leh lutuk a, a pawi zo vek" tih pahin a nui har har a, ka ṭhiannu Suzanne-i hi kei aiin a naupanga, kei aichuan a sang zawk thung.




Hmeichhe hmelṭha leh kawmnuam tak a ni, a hmel en mai hi chuan pasal fanau nei hi a ang lo ṭhin a, nula harhvang tak hi a ang mah zawk a, han hrisel ṭha deuh phei sela chuan a tho thang a ṭha viauin ka ring.



"Engtikah nge chaw i lo ei ang, ka sawm ngun tawh che nen i la rawn kal miah lo a" vui hmuipu zeta a tih chuan "Lo ei zawk rawh u, in chhungin lo kal ula" ka lo ti var a, min hnial leh ngei ang chu ka tih rilruk laiin "Keini chu kan chhangchhia a, chhuahvah kan harsat a lawm, kar leh inrinni hi kan pa piancham a nia, i lo eidawn nia, dawrah keimah ngeiin ka rawn hruai ang che" a ti leh a, hetiang hian kan inhmuh a piangin an ina lengah emaw chaw eiah hian min sawm ṭhin.




Kan veng kan thlen chuan kawi zau laiah ka din tir a, "Kar leh chu aw" a rawn tih chuan ka nuih liam mai a, ka kal tak tak pawh ring lo chungin ṭha deuh chuan ka aw ve ta tho a, a tlan liam tak hnuah muang changin inlam ka pan a, ka inbul dawr ka thleng phei ṭep tih ah Message ka dawnga ka en chuan Urosy-i a ni.




"Tlaiah Ukima a lo kal em?" tih zawng hi min lo thawn a.





(End of chapter - 2)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)