ZAWLAIDI Chapter #25 By Floria Laldansangi

Episode kal lai dah luhna

Moderator: writers

Floria
Posts: 522
Joined: August 28th, 2017, 12:07 pm

ZAWLAIDI Chapter #25 By Floria Laldansangi

Unread post by Floria » December 1st, 2021, 8:26 pm

ZAWLAIDI

By

Floria Laldansangi



Chapter < 25 >


{ MC-A.....POV.}



"Nizan Rintei te In thlirin i han tlaivar leh em ni?"


Ka lo rum nghut a, "i chhuak thawm ka hria alawm. Boruak daih hun nghak rawh ka han ti ve tak nâ-in nangmah ber hi i dâi hlei thei bawk si lo," ka Nu chu a nui zui tuh tuh.


"Ruk ka duh a ni," ka ti ta nghut.


"Apa, thilruk chu a ṭha lo i tih kha," Gabrielle-in a lo ti vat. Kanu a lo nui vur vur a.


A sam a chul zauhin, "i Nu alawm ka ruk dawn."


"Anî maw?"


Ka thaw hawk, "chaw ei kham ula school kal rawh u," Mathew-a rawn ṭhu chu ka lo ti zui sup.


"Dik lo a awm em ni? Chutia i hmanhmawh leh si ni?"


Chaw chu barin, nizana Siakmawii awmdan ka mitthla ah a rawn lang, a muhil kha ka thlir reng a, a ṭap muhil tih hriat takin a mit a huh hnawm chap a, chhuatah a mu kawm ngiaih bawk.

A phun ri ah khan eng nge a sawi hre vek lem lo mah ila, ka hming (Putara) a lam erawh ka hre leh nawk nawk ṭhin. Khang zan 3 chhung khan khatiang hlir khan em ni zan hun a hmanral tih min ngaihtuah tir rum rum mai.


"I fapa in a biak che kha...." Ka nu chu ka en.


"Engtia tunlai chu thil i ngaihtuah vung vung zel le?"



"Tinge i Nupui kha a haw daih a?" Mathew-a ṭawngkam ṭhin hi chu!



"Nu ti mai rawh u," ka lo ti sup.


"A Nu te in ah a riak lawk a nih khi. A rawn haw hunah Zokhawthar ah kan haw ang," ka ti takah chuan an unau in a nui zui vur vur.


"Au Rinrin chu keiman ka han ko haw mai ang, kan khuaah haw vat vat ka duh," Gabrielle-in a lo ti ve bawk.


"Gabrielle-i hi hruai tir i tum lo tak tam em ni?" Naupang chhuah tawh hnu ah, ka hna kal tur insiam chu ka Nu ka sirah a rawn ding a.


Ip pui la in, Pu Chhuma min rawn auhna chu ka chhanglet a, ka nu melhin, "Gabrielle-i duhthlan naah a awm ang chu." Tih leh pensawn ka rual, ka hauh bur thei tlat lo, an fanu a ni a, Puia sawi danin, ka farnu aiawhin ka lo enkawl mai chauh a ni!

.
.
.
.
Nilengin a Pu Chhuma te huanah ka thawk ve leh. Hna dang nei mah ila, kan in luahna Pu Chhuma'n min chhawr a lo duh ve tlat nen hnadang erawh ka kalsan reng ta mai!


"E khai! Duh aiin kan ban tlaipui leh ta che."


"Tlai hran lo ve," ka hmaah Zela car a rawn ding dat.



"Pu Chhum, kalna tur dang ka nei a, ka chho tlang lo ang," haw hmasa ta lo chuan ka hnathawh thawmhnaw nen Zela car ah chuan ka ṭhu lut a.


"Aizawl a awmlai tak a nia, i vannei khawp mai," Zela'n a rawn ti sup.


"I hmelhriat a ni tih awih a la har alawm le," min rawn melhin a nui zui ruh ruh .


Ka hmelhriat tak pawh a ni law. Ka pa ṭhian hlui a ni zawk mah!



"A hnuai bera lehkha kha, ram chungchang aw, sum inhlan hun tur chu inkutah a awm," lehkha chu ka en dan dan a, bu nghatin lawmthu ka sawi zui sup bawk!
.
.



"Lo ṭhu rawh, lo ṭhu rawh," naupan deuh laia ka hmuh bak kha tun hi a ni leh mai a, danglamna em em a neih phei chu ka hre hran law.

Freddy Pa a ni tih hriat erawh mak ka ti ve reng!



"Ka hai mai dâwn che alawm Mc."

Ka nui suk a, "hnathawh thawmhnaw nen ka la ni si a, pawnah sawn kan inkawm zawk dâwn em niang?"


"Ṭhu rawh, ṭhu rawh, a pawi reng reng lo. I nu a dam maw?"


Ka bu nghut, "Aizawlah in awm tih hria ila chuan, rawn tlawh zawk tur che u ka ni maw le," a ti leh deuh vung vung.


"Thil dang alai chuan, engmaw min rawn hmuh chhan tur chu?"


"I fapa nupui tura intih chungchangah zawk a nia." Ka ngawih deuh vung vung hnuah ka ti sup. Annu ni ngei tur rawn ṭhu thla ve in, "Rintei chungchang i tihna em ni?" A rawn ti vat.


"Han sawi chiang teh Mc. Hriatthiam a va har ve."



Thu han khuhmawi ngaihna ka hre lo bawk nen an nupa a en run chung chuan, "pasal nei tawh a ni tih in hre lo niin alang."


"Engthu nge maw i sawi le? Pasal nei tawh nise kan fapa a neih tur chhan a awm lo," a nupui zawkin a lo ti leh vat. A lawm hmel viau loh. Ni e, a fapa nupui atana a thlan hi ka nupui a ni tawh tlat a tin ni.


Freddy Pa, Pa Roa chu ngawi vung vungin, "nimin ka lên naah an sawi lo tawh tlat mai, an fiamthu ah ka lo ngai a ," min rawn en,"i nupui i tihna em ni?" A rawn ti ta chat.



"A dik alawm."


"I Pa ang chiah i ni, midang rilru tur dâwn rânin i ṭawng chhuak a. Engvanga heng thu te hi min rawn hrilh nge i nih le?" Pa fing tak a ni a, ka kal chhan pawh hel buai lovin min zawt ta chat bawk.


Mizo Pa ip pui ngei aṭang chuan, ṭhianpa Zela lehkha minpek ho chu ka phawrh a, "Doctor lehkha annih hi. Pakhat hi report diktak a ni a, pakhat case an file na report zawk," la kângin a en dan dan.



"Engtin nge tise min tih?"


"Eng case nge ka Nupui Pa hian a neih ka hre hauh lo; ka hriat thiam phak lah a ni hek law ; Mahse, kum liamta aṭangin case buaipui erawh i nei tih ka hria," a lo nui suk a.


"I hrethiam tih ka hria e. In pafa hi mi â inni lo tih ka hria lawm," a ti leh, ka hmelah ka Pa ka an thu ansawi fo, ka mizia ah erawh ka an ka hre hran lo, ka Pa erawh Pa zaidam tawp khawka sawi a ni tlat.


Ka ṭhutna aṭangin ka ding chhuak a, "i nupui vanga rawn kal i ni tih sawi lo mahla, i rawn kal chhan ka hria in, ka bawhzui ang e. Remchang hmasa berah i Nu pawh ka rawn tlawh ve ang," rawn tiin kan in thlah fel ta a.


Buaina tamtak siam ka tum hran lo; Mahse , ka nupui Pa thiltih ti tawp a, ka nupui hruai let tur chuan in venna ṭha tak ka mamawh hle tih ka hre thung!


Ani angin thil ka ti thei lo tih ka hria mah se pasal, a nupui venghim duh leh la let duhtu kha ka ni ve tlat!



<><>~>


RINTEI.....POV


"Au Rinrin...." Gabby aw ka hriat rualin ka hawi vat.


Ka room-ah Mathew-a nen anrawn lut chu phawk fe hian ka lo en a. An hnunglam chu beiseina nei miah si lovin ka'n bih zui hrâm a.

Eng nge hmuh tel ka beisei erawh ka hre lo; Mahse, an hnungah zuitu palian tak anneih kha chu ka beisei ru ve reng alawm!

"I room ami, avan lian em em..." Gabrielle-i chu a hawi kual dauh dauh.


"Anî pasalin chaw ei turin min lo hruai a," Mathew-a chuan a ti sep. Ani leh ni lo ang maiin sofa ah chuan a ṭhu fel zui at bawk a.


Mathew-a bula ṭhu thla ve in, min lo en kar chu, "eng nge? Ka room en kual i duh ve lo em ni?"


A ner deuh nung nung, eng emaw ngaihtuah ve ni âwm tak hian a ngawi deuh vang vang a, "tinge kan in ah i awm tawh loh a," a tawp dat, "keimah vang ami?" A ti zawi leh sep a.



Ka chal ka lo ti chuar nung, "engah nge chutianga i ngaihtuah a?"


Lungngai hmel pu ve ni âwm taka min rawn en in, "rukru ka ti che a," a ti leh sep chu nui var varin, "nangmah vang a ni lo a nia," a hmela inthiam lohna ninawm tak lang chu ka khawngaih reuh.


A pa chanchin zawh ka chak rualin, ka hläu ru deuh bawk si. Ka tel lova a hlim tih hriat ka hläu a ni mah zawk


"Engtik nge i lo haw dawn Au Rinrin?"




"Min ngai em ni?" A sam hnawk niah chu ka chulmam sak a.


"I lo haw loh chuan apa in kan khuaah kan haw thei lo a tia..." Ka lungphu zawn hi a rawn sa zak nia maw le!



"Eng nge a sawi?"


"I Nu lo haw hunah kan vaiin kan haw ang a ti," ka nui hak. Ka lakah beiseina a la nei tak tak tih sawi lul tehse!


"I pa....."


"Eng nge hetah intih? I U Rinrini kha tibuai suh u," ka sawi zawh hma in, Mami kawngkharah a rawn dak.

"Min tibuaiin i hmu em ni?" Ka lo ti deuh nghat.


"Rinrin chaw rawn ei rawh u, zan a tlai dâwn, naupang kha haw hmat an ngai si," Nu Hmai'n a rawn ti lang lang.


"Chhuk ang u," ka ṭhutna aṭangin ka ding chhuak.



Gabrielle-i tho peih lo ner nung nung chu ka en thla. Min rawn melh chho kiau in, "Au Rinrin, i Pa khu misualpa a ang e. Ka duh lo," a rawn ti reuh chu ka inrin hma in ka nui hak.



"Gabrielle...." Mami'in a lo khap zung zung chu ka duh dêr lo.



"Vai film-a misualpa a ang, min melh vak vak bawk si," Mathew-an a rawn ti zat, ka dul dawm chuan ka nui tak ang bawk bawk a. An ṭawngkam thiam lo lutuk, thiam dan dana an sawi chu a âwm ang phian bawk si!


Nui tlawk tlawk chung chuan, "koyla kha in en tawh em? Changtupa chu ṭawngthei lo kha? Kha ta mi kha a nia," nui khur hlawk hlawk chuan ka ti chhuak. An unau chuan min en kiau, Mami pawh chu a lo nui ve ta sun sun.




"aw ka hria, a hming chu Raja saab," Mathew-an ring tawkin a rawn ti, ri chhuak meuhin ka nui chhuak uar uar a, ka nuihna avanga mittui tla hru hul pahin, "kha kha a nia," ka ti leh.



Mathew-a pawh nui vur vur chuan, "mahse i Pa hmelchhia ka ti zawk," a la ti leh hrâm chu vuak thluk tawp ang ka ni, thlan tla phung chuan ka nui ta nghek a, Mami pawh chu a lo nui ve kur kur tho.



Inhnuaia kan inzui thla te chu ka nui leh ṭhin. Ka Pa ṭhut khawmna aṭanga choka lam a pan kailawn aṭanga ding meuha en thla in ka nui leh kur kur bawk a.


Ka â ta emaw a ti a ni ngei ang min rawn en rawm rawm, a chhan hria se a haw âwm ropui sia!


Chaw ei lai te chuan ka tum miah lohin ka Pa ṭhu ngawi ngul mai chu melhin ka nui leh ṭhin. Ka mitthla ah Amrish Puri a lo lang ve chhen bawk nen.


An in anzia chu! Phir anni ti ila naupang hian an awih tho ang.


"Eng nge maw i Pa chu i nuih i nuih le?" Ka Nu pawh chu a rawn nui zui ve ṭhu. Mami lo nui ve sen sen zel chu a melh ve bawk a.



"Naupang ho rawn kal chu Rinrin pawh mihring a ang ta deuh alawm," Nu Hmai'n a lo ti ve zat.


Ni e, kei pawhin mihring ka ang ta deuh chuan ka in hria.


"Karleh thlathar a ni tawh bawk a, Freddy pawhin palai rawn tirh a duh tawh kha. Thla laihawl ah inneihna hun pawh ruat a ni ang," ka pa in a rawn ti nghut nghut.



Ka nui hmel chawpin a reh, ka thleng chu ka nawrsawn hret a.


"Chaw ei laia sawi chi pawh a nih loh chu," ka Nu in a lo ti hlak.


Ka pa in min rawn melh zawk a, "chaw ei lai bakin a hmel hmuh tur a awm si lo alawm. Pasal nei sela naupai vat se a dik a ni mai," a ti leh nghut.



Za vak lo chuan ka nui a, ka dul chu zawitea dawmin, "ka rai thei lo," ka ti chhuak.



"Eng maw?" Min rawn en ṭhap hlawm. Mami phei chu hmuh thiang lo hmu ang mai a ni.


Ka pa lam chu hawiin, "ka sawi chu, nau ka pai thei lo," a mitah tak en chung chuan ka ti fak fak.



"Eng nge a chhan ka tia lawm?" A rawn ti chak ta khur khur mai.


"Nau keng thei lo turin ka in siam tir. Ka sawi awmzia chu ka dam chhungin nau ka pai thei ngai dâwn lo...." Ka sawi zawh rualin ri bur leh ka chal a ri zui fawk a, ka lu a hai nghal mur mur bawk.



"Thih i duh em ni?" Dawhkan chum ri bur chuan a ding zui zawt


"U Biak..." Ka Nu-in a lo ti ve ṭhat. Kut ṭang sai hlawk hlawka min rawn kawk in, "naktukah inzai tir ang che. Zaninah damdawiin ka be fel zawk ang," a ti leh khur khur.


Naupang chu ka melh zawk, an hlau hmel chu an kimki dek a, an mit an khap fak fak, Gabrielle-i phei chuan a U a lo vuanbet ṭai mai


"Nu Hma, naupang hi thlah haw rawh," Mittui tla ṭeu chuan ka ti chhuak sap.



"Mathew, i Pi Hmai'n a thlah ang cheu," naupang hmaa mittui tih tlak ka duh loh ang bawkin, ka Pa hmaa mittui tih tlak ka tum miah lo bawk!


An unaua min en zui dauh dauh chuan choka chu an chhuahsan a.



"Sawi rawh, engvanga naupai thei lova insiam maw inih a?" Ka Pa chuan a rawn ti leh khur khur.



Ka biang a rawn lum thla pup, rang taka hru tawkin ka Pa dinna lam chu ka hawi a, min lo en khur khur bawk.


"A chhan chu, meidil tla tur hrin ka sak che ka tum lo..."



"LALRINMAWI....."


Dawhkan plate leh thildang chu a hai thla rum rum, ka Nu te ho an rak ṭhawt.

U Puia'n annu a kuah tho a, "room-ah chho rawh," ti zuiin a choka aṭangin a nawr chhuak nawk nawk.


Mami hlau lutuk chu a dang sawp sawp thei tih ka hmu ru reng bawk!


"I pa ka nih hi i hria em?"


"A tawk, Lalrinmawi i room-ah chho rawh," ka Nu in a rawn ti ṭhat, ka Pa chu a chelhbet ran.


"Engthil nge thleng a?" U Ruata a rawn lut. Ka hmel a hmuh rualin a phun hluk a, "chhuak ang, boruak thianghlim ka hîp pui ang che," tih leh min pawt kal dawr dawr.


Ka Pa in min auhna leh, inzai tura min tihna chu mittui luang ngiai ngiaiin ka ngaithla a, pawn ka chhuah thleng pawha a thusawi ka hriat chu, "i duh emaw duh lo emaw Freddy fa i hring dawn," mintih khum na chu a ni.



"Buainaralliani leh Liana te hi inni ringawt," U Ruata'n a ti nung nung.


Car ah chuan min hnawh lut nawk nawk a, "ka car ah ṭap hlek suh, hnap i ngah thei si," a tih zui zat. Mittui nen chuan ka melh chho vak. Ka chal lah chu a na reuh em em zui a.


"Khawnge min kalpui i tum?" Ṭah aw ṭuau chuan ka ti chhuak.


"Nuam kan tawl ang," a nui vur vur.


Khawnge min hruai dâwn pawh ka hre lo, ngawi reng chuan ka ṭhu ve ta hle hle a.


Kan tlan deuh vang vang hnuah car a ding dat, ka hawi chhuak, "Vanlalruat....." Ka melh nghal vak.


Nui vur vurin, "Hyde Inn pum pui hi zanin chu Lalṭanpuia'n a book tih i hre lo em ni? A birthday zan a nih hi," ani birthday ah ka buai lo.



"Car chahbi minpe rawh," a chhuak zui daih a. Ka awmna lam kawngkhar rawn hawngin, "rawn chhuak la," ka bânah a rawn chelh. Ka peih lo tak tak.


"Ka peih lo tak tak a nia...."


"Yo.. Hei chu nuthlawi tharlam a nih hi," Lalṭanpuia'n, U Ruata hnung aṭangin min rawn bih, rum deuhin ka lo melh let khai khai.. mood off nak alaiin.


Car aṭanga ka chhuah rualin, "ka piancham min la hriatpui tih sawi miah suh," ka beng sawk dâwn maw ni le.


"Inbe rawh u, Siaki rawn lut rawh aw," tih leh a pensawn daih lehnghal! Hepa hi chu a chang hi chuan ka ngei ṭhin lutuk!


"Keiai a i thlan thingtlang pathlawi chu engvanga ṭhen maw i nih a? Kei aiin a nei lian leh si lo em ni?" Car ngheng datin a rawn ding.


A aw ah chuan elhsen na a khat, ve mai mai a, anni neih ai let a nei.



Lo ner khum sawkin, "i z**ng, baibing tiat lek kha em ni i sawi?" Kha zeta ka tih chhuah rualin a ding khawng at.


"Lalrinmawi..." A ti nghal khur khur.


A lam hawiin ka ding rem a, melh chho ralhin, "nang aia ka thlan sawi loh, nang ang thlir sawm 70 ai pawhin ka thlang zawk. I neih i sawi a nih phei chuan..." A kap ka melh thla ralh a, ngeiawm lutuk a ner khum leh nawkin, "i khâi aia let 3 a lian a khai..." Ka Pa laka ka thinrimna Lalṭanpuia chungah ka hrithla ni maiin ka hria, ka thaw zui kawk. Ka thawl hawk tak takin nia ka hriat ni!



"Zawngi...." Tih leh min rawn din hnaih tuma a che hrut chu, thlipui ang maia rangin kan inkarah taksa lian zet mai hi a rawn ding zui vuk, ka lo ip chawih, ka rim hriat ṭhan tak, pa hrak mai, engtikah mah ka hai ngai loh tur chu ka hîp zui kawk a, hnar leh thluak thlenga a verh chhoh danah tunge a nih tih ka hre chiang lutuk mah mah.



"Putar..." Ka phun chhuak sep.


"Tunge i nih a?"


"A pasal, thingtlang pathlawi chu!" A ti thum sup.


Ka lo ṭah nuih hak a, Lalṭanpuia hmel erawh ka hmu thei tawh lo, ka hmaa ding, he palian tak mai, mi uap na tak leh rim pa tak hian min hliah hneh lutuk mah mah!


Lalṭanpuia pensawn ri chu ka hria, kei erawh ka hmaa palian tak mai, min hnung chhawn zawng a ding, dar pharh hlai ṭha tak mai, taksa invuah dik thlap chu mittui hnam ṭiam ṭiamin ka en vawng vawng a, kuah mai ka nap mah se ka huaisenna ka la nei let si lo.

Hetiang hian, hetianga hnai hian ka hmu leh ang tih ka ring pha lo hrim hrim!



Ka thlanfim a rawn bawl ṭiam ṭiam a, ka mumang a ni em tih ka inzawt ru mawlh mawlh bawk.


"Putar...." Ka lam a rawn hawi a, a mitmeng thim khum mai chuan minti tîm leh deuh na chu, ka haider lui ta zawk a.



Mittui kar aṭangin ka en chho, a ngawi ngal, ka kut chu khur dar dara la kângin a hmai, ka dawm leh chul fo ṭhin chu deh tumin ka ban da da. A lo tawlh hnung hrut.


Ka âwm zawn hi chhun sawk ang mai a ni a na thîp vawng vawng.


Ka kut la letin, a kutah chuan ka chelh zui vat a, ka mittui rawn tla zawih zawihin, "min hruai haw tawh rawh...." Ka ti chhuak ṭuak bawk.



Haw let ka duh tawh lo takzet a ni, "ka tihpalh Putar. Ka tihpalh... Min hruai haw tawh rawh, haw ka duh tawh..." Mittui tla zawih zawih chuan ka ngên a, ka en chho kiau bawk.


"Thlah rawh..." Ka ṭap insut ri chu chawpchilhin a tawp.



Mittui nen chuan ka pasal hmel vawt ruih mai chu ka en a, "Eng maw?" Ka ti chhuak sap. Ka hresual ah ka ngai zawk.


"Min thlah rawh....." Vawt ruih mai hian a rawn ti nawn.


Ka lu thing nawk nawk chuan, "ka tihpalh, ka tihpalh tak tak..." Ka inhnit hlawp hlawp.


"Mahse, lo let ka duh, i bulah.. Ka nau..." Ka tawp dat.


Ka hmaa ding mipa khawngaihna nei lo taka min entu chu melh chho in, "ka naute nen hian kan mamawh che Putar..." Mittui tla zawih zawih chuan ka ti chuai raih raih a.


Ni e, ka naute, ka hmatheh ngai loh tur ka tih kha, ka mipa hmangaih neih letnan hmanrua ah ka hmang a ni. Mahse, eng nge tih theih ka neih chuan?



Beiseina a khatin ka melh chho ngawt ngawt a, min chhang dâwn lo emaw ka tih hnuah, "i duh thlanna a ni tih theihnghilh suh, ka buaina a nih loh chu! I kalbo thei tawh ang," vawt ruih maiin chu chu a sawi a nih chu!


Ka nghing dawt a ni ber, "i fa a nih tih i hria em?" A ngawi ngal.


Mangan lutuk avangin ka thaw a chham mai dâwn.


Hrawk na leh kham lutuk chuan min ṭawng tir mai thei lo.


'Hmanraw tel lovin min that' ti ila ka sawi dik ber ang, "ka buaina a nih loh chu" a ti ri chuan vawi sang tamtak min vit nawn a, ka beng chhungah hian a ri nawn tluk tluk bawk!!!


Natna a khatin ka mipa hmangaih, ka fa lo piang tur Pa ngei mai chu en ngawih ngawihin, ka ṭah nuih ta hak hak a.


"Engmah lo ata kha engkim i ni a. Ka inrin hmain ka hmangaih che a. Hmangaih neih hlut zia leh hmangaihtu nih ropui zia min hriat tir hnuah engtin nge i nun ata kalbo tura mintih theih," mittui luang ngiai ngiai chuan ka ti chhuak nawk nawk


"I duhthlannaa min kalsan ini," a ti bul leh nghut. Mangang lutuk chuan ka nui chhuak, a sawi dik, a sawi dik chiah!



"A nih i fa hi le?" Ka mittui chu ka hru hul tawk tawk, a tla hnem tawk tawh alawm le!


Ka hriat tirha mipa vawt tak ang mai khan a ngawi leh tlat a, a mitmu dum fiah kalh mai leh a mi enna thiltithei tak ṭhinah chuan engmah hmuh tur a awm lo, a ruak ngawih ngawih a ni ber.



"Mipa pawh i ni lo LALDUHAWM," ka'n ti thla ngawt a, ka thiam loh a ni reng tih ka hria mah se chutiang ṭawngkam chu ka dawn ka inring lo êm a sin.


"Hetianga mahni fa pawh kalsan a, kawng zatvea min hnutchhiah leh tur si chuan engvanga beiseina säng taka min dintir nge i nih? Sazu ang maia tlân chhe leh tur si chuan ka kut hi chelh ve lo tur i ni," au nghek ka duh a, au turin chakna ka nei tawh lo, naupang thu hrilh ang maiin ka hrilh mial mial. Ninlo, keimah leh keimah chu ka inbia a ni zawk mah, min ngaihsak lo tih hriat taka ka hnunglam a melh leh zuk ṭhin te chuan minti na zual vawng vawng.


Min hne emaw tih mai tur niin alang zawk alawm!

Ka mittui lah chu tih tlak ka duh tawh dêr si lova, farkhat pawh tih tlak ka tum tawh lo bur !


Ka mipa hmangaih hian ka mittui hi a phu miau lo a, ka mittui manto zia a hre lo a tin ni. A phu te tan chauh a ni ka tih tlak ṭhin ni!


Thil ka tisual tih ka hria mah se ka pumchhung a naute hi pawisawi lo a sin a nih!


Ka mittui bawk duh lo viau mah ila a rawn lum thla leh pup, bek pawng ṭawlh ṭawlh hian ka lamah a rawn pen hnai, lo tawlh sawn ka tum chu ka bânrekah rang taka chelhin a lamah min pawt hrawk a, ka beng bula rawn kûn hiamin, "che suh...." Chu chiah chu a sawi hman, "Rinmawi..." Freddy aw kan hriat rualin min thlah dat a.


Freddy-a ka bulah rawn dingin ka darah a rawn chelh zat. Ka bânrekah Putara'n ala chelh reng, a hmer na tulh tulh a, a bek pawng ṭawlh ṭawlh leh khabe ruh pawng lian tulh tulhah chuan Freddy chu thah mai a pawisak loh hmel takzet bawk.


Ka bân a hmer pawh a tliak mai dâwn emaw tih mai turin a hit mur mur. Ka lo ner sawk sawk.


"Thlah rawh," Freddy-an tih leh ka bân chu a phih a, "ka hruai haw ang che," tih leh Putara laka beisei la nei ru em em chunga ka melhna ata chu min inher pui riai riai.


Ka kawchhung a chauh lutuk luatah Freddy min kuahna pawh paih sawn duh mah ila, ka che thei lo.


"Keiman ka haw pui thei," U Ruata ka hmaa rawn ding ka lawm zia chu ka sawi seng lo.

Ka U ka hmuh rualin ka mittui bawk a rawn luang leh ngiai ngiai, "ka hruai haw ang che," kan hnunga Putara la ding reng leh min la en reng tih hriat tak. Ni lo, ka taksa in ala hriat leh kalsan theih loh, feel veng veng chu U Ruata'n en in, ka bânah a rawn chelh a.


Ka U chu ka nek deuh rawk rawm, ka dara kuah chuan, "i hmuh ang leh hriat ang hi, thil nihdan tur a ni lo a nia," a ti sup. Ni e, hetiang tur hi a ni lo a sin.


Ka pasal kha lo kalsan lo ila, hetiang hian ka fa thlengin duh loh kan ni âwm si lova.


"Freddy, keimahin ka hruai haw thei," tih leh car kawngkhar pawt hawngin min ṭhut luh tir a, Freddy-an min en run reng pawh chu ka hmu, ka melh peih lo hrim hrim.


Putara erawh side-glass aṭangin ka melh leh hrâm, a kut a hum ruh ngar a, min rawn en ngur ngur bawk.


Boruak tamtak hîp ka duh;Mahse, boruak hîp tur ka nei lo, mit chhingin muangchang chuan inbengdaih tumin ka thaw chhuak ham ham ta a, ka bekah ka mittui a rawn luang ngiai ngiai bawk.


Car a tlân chhuah a, ka Putara dinna kan hlat poh leh, ka âwm zawn hi a na tulh tulhin, boruak ka tlachham tulh tulh ni maiin ka hre bawk si!!!


Ka rinlawk leh rindan mah nise, Putara kâ aṭang ngeia min mamawh tawh loh thu leh, a fa a pawm loh thu hriat chuan min chhun ngut ngut a, kan inbuatsaih hman mawlh lo a ni ber.


Ka pum chu dekin, ka rilru in ngaihdam ka dil ru mawlh mawlh bawk. Keimah vang ni lose chuan a Pa a chan bik awm tawp si lo va! Keihi buaina bulpui chu ka ni. Keimah ngei hi!


<><><><><>



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)