*MANGRAM* ch~10 by~Natasha Hrahsel

Episode kal lai dah luhna

Moderator: writers

Natasha Hrahsel
Posts: 193
Joined: January 14th, 2021, 11:50 pm

*MANGRAM* ch~10 by~Natasha Hrahsel

Unread post by Natasha Hrahsel » December 1st, 2021, 8:37 pm

*MANGRAM* ch~10
by~Natasha Hrahsel






" Big boy ,a u kha ahah tawh ang chhuk tawh rawh " min veng thawng zeta Jo an a tih chuan apawiloh thu in ka chhang vat a ,ka pawmna atang rawn la thla in a thutna tur bik chair sang ah chuan athut tir zui nghal zat .Ke then leuh leuh in dawhkan an cheimawina te chu akhal chhunzawm a ,a duhawm lutuk chu ka mit kala sawn hlei thei meuhlo .Fa neih hial minti châk ve dawn nia ! Nu nih lam ka ngaihtuah chhin ngailoh nen ,a putea ang chiaha zûn nei anih ve reuh dawn hi .
"Ramases pawh hi mipa tho ania " mitko san ûk a ka hma zawna a rawn tih sup chuan ka ner nghal nang nang ,"naupang anih hi " ka ti zui hlut chu ka sawi rualin ahmui alo ti sawi ve zat lehnghal ! Fiamthu na chi pawh anilo ,naupang lehzel athik tlat chua miin an ngai diklo zo ang tih pawh ahlauhawm . "Ramases bula kan kal atang min ngaihthah hmak a " ka hnung lama kal tum ni awm taka langin ka beng bulah a rawn ti thawp leh sup a ,ka hnungah dingin ka darah akhabe nghatin min kuah nghal hlun ."Jo mi an tam em hi" ka ti chu "ka ngaipawimawh lo e " alo ti hmak!



"Chupawh nise keiman ka ngaipawimawh alawm ,awmtha teh " ti sepin ka dar ka sep zeuh a ,phun nang nangin a awmtha ve mai mahse ka sirah rawn dingin ka darah akut ala nghat hram ! Hepa hi chu hauh sim theih anilo anih hi. "Abengchheng viau mai ,inhnuai lamah kan chhuk mai dawn ami" mitmeng awmze nei zet a min melh pah chuan ati leh kher ! Hetia min melh apiang hian ka lai tut zel lehnghal .Min chhaih laih nan tak ala hmang ziah a ,ka hmai sa hut hut in a sen tan tan zel .
"Mikhual te hi ibe ve hlawm dawn lo em ni?"
"Ka mikhualte an nilo " ner nawk chung chuan ati a ,a hriat miahloh a anu mi sawm te chu a lawm hmel viau loh.Kal turin ka nawrlui duh ta em biklo .Ramases kianga lo din ve rik ngawt reng pawh ka tan anuamlo ang.




"Hey Ramases , heihi ka lo ken che sin " tiin present box lian lam mah kengin Dr.Tluangi a rawn inlan leh hlawl a ,kalo inhum ruh leh nghal at tawh .Abulah hi chuan thlamuangin ka awm theilo reng reng ! "Heihi maw original anih hi ,ato teh mai nia " tiin box lian zet intuamna chu amah zawkin aphelh leh ang sawt sawt a ! Ramases thlengin ngawirengin kan melh thup.Box lianzet chhungah chuan mipa sana manto hmel zet alo awm anih chu! Tlangval te pe zawk se chuan an lawm viau anga ,naupang tan erawh awmzia anei thui viau kherlo ang. .
"Hetiang sana hi chu dawrah pawh leitur a awm mai mai lo ania " phur zetin ati deuh hluai a ,aman to hle dawn mahse thiltha hi chu fak chawp vak hi angailo asin .Ramases phei hi chuan ahlutna ahrethiam pha hrih dawnlo lutuk.




"Enge I kensak ve a " thamloh hmel zeta min melh chung chuan ati kher ."Tluangi "Jo an alo tih deuh nghut chuan zam maplo in min nuih deuh sawng a "engemaw tal kensak ve tur alawm "pawisawiloh hmel zeta Jo en chung chuan ati leh kher ! A hahthlak mang e aw ,hrelawk a kal ni ila thilpek tur te chu ka keng ve awm reng sia ."E taka Zo patea damdawi khai ahun tawh a ,in doctor alo la thleng silo nen keiman kalo khaisak mai ania .Pawi iti em loang chu ti raw? "

"Ilo awm hlauh chu atihzia anih chu" ti hmuka chhangtu banah chuan avuan nghal zat a ,aban ah chuan lawnkai atum emaw tih mai tur khawpin a chelh nghet! A vawnna lai ringawt chu kalo melh ngur "ipa ka enkawl hi phal ve mai mai la tha tur ania ,cancer doctor bik nilo mah ila thil harsa engmah a awm dawn tawp silo " inla no zeta a ti hluai chu ngei zetin ka melh hrep ringawt .Jo chuan avawnna chu adah thlak sak a "tuna kan doctor hi kan ring tawk viau mai " tia a chhan chuan azak ve chem chemin ania ka rin ni .




Birthday cake an zai hnu lawkah birthday boy ber amuhil ta daih a ,anu in inhnuai lamah achhukthlak pui nghal bawk nen puitling rual thah chauh kan awm tawh.Kil khatah Jo leh mipakhat inbe lai chu ka lo en reng ringawt a ,birthday lawmna a kal e tilo chuan an awmpui ten wine ni awm tak an rawn keng a ,an dawm deuh fur hlawm.Jo pawn a dawm ve nangin vawikhat vel bak a lem zeuh lai ka hmulo .Kei erawh in wine mah nise a rim ka ti thei thaklo thung .Chuvang tak chuan an kianga ding velo in kilkhatah kalo thu ngawi reng ringawt. Ka pocket a ph in nghawr dar dar chu la chhuak in caller id ka en a Rc-a call hi alo ni a ,vawi riat zet minlo call tawh nghe nghe ! Chanchin engmah ka hrilh leh silo nen anlo mangang viau maithei ani .
Ka zaizirin pawn lama ka chhuah lawk tur thu Jo ka hrilh a ,lu min buk khum nghutin room pawnah ka chhuak nghal thuai.Inhnuai chhukthlak na step zawnah dingin railing ka vuan a,ka chhuanlam tur ka inngaihtuah deuh vang vang.Birthday lawmna ah ka kal ti dawn ila min ngei viau loh pawn group project ngaipawimawh tawklo ah min chhuah ka hlau bawk si.Jo vang vek ,Hetah min hruai daih lo se chu tunah hian project khawihin chhuanlam tur ka ngaihtuah tang tang angailo tur.

"Hello RC " call a rawn luh leh rual chuan chhangin ka ti nghal sep "bella tinge ilo kal loh " lehlam ami chuan a rawn ti ta chiah .Chhuanlam tur thlawt ka ngaihtuah chhuak zolo chu "ka buai deuh thut alawm mawle " ti sepin ka chhang a ,ka awm anuamlo zui nghal .Ngialngan zetin dawt ka sawi chu ania ! Ka awm anawmloh phah vek .
"Apawilo e ,mahse question 5 na hi kan chhang thei hlawmlo a .Tihngaihna tak pawh kan hre tawhlo " a rawn tih chuan ka thiam bik ka ring hauhlo.Ka vannei ka ti dawn nge group a ka awmpui te hi college an kal lai atang tawha athiam ber ber ni thin ngat an nia ,an bawn bakah keiin ka hriatloh tamtak hriat an ngah mai.Entirnan kan professor te hnialdang thei khawp leh zawhna chhan hleihtheihloh zawt thei khawpa thluak tha te an ni hlawm ,an turu lutuk tlat .Chutiang pawn an hriatloh chuan ka tan hriat ngaihna a awm in ka ringlo."Rc ka thiam bik pawh ka ringlo e " ka rilru a awm ang chuan ka ti ta tawp.

"Awmlang chuan I thiam ang mawle , Shakespeare qoutes tawite kimchang deuha hrilhfiah ania ,a awmzia chauh nilo angaihtuah tur ang words zathum vel tala ziah chhawn tur mawle .Hetiang lam hi chu I thiam tih ka hria alawm.Keini chuan confi takin 'chu chu ani e ' kan ti dawt ngam hlawmlo a" a tih chuan ka inthiamloh zual sauh .Question dang har uchuak zet anmahni in an ti vek a ,inlama lo tih ve ngawt chi ani bawk silo nen an hah dawn lutuk . "Angaihtuah.."
"Hmeli " ka sawizawh hma a rawn ti vak tu lam chu ka hawi vat a ,thinrim mitmwng sen ram chungin min rawn pan hnai mawp mawpin ka samah a rawn kek nghal bawrh bawrh.Ka lo inringlo lutuk nen ka pai deuh chawt chawt .Zu rim anam huam bawk si nen a rui sual deuh ani ngei ang .
"Enge maw itih le ,ana ania min thlah teh tluangi " ti mawlh mawlh chungin asama han ban ve mai ka tum a ,ka ban pha ve bawk silo.Ka lulei chu ana thip hlur tawh .




"Nang...nang hi lo awmlo tawp la tha tur ,Zo nen kan inkar ah lo inrawlh lo lang chuan thil engkim kan duhdan in akal fel vek tawh ang " ti phiar phiar in ka sam chu atham ngawt ngawt a ,a kuttin lem sei zet hmangin ka sam to na bul deuh ka chal chu a ham tel a ,a thip lutuk leh ka lulei thip hlur bawk si nen ka mittui atling pam thei.
"Min thlah rawh" ti chulin a kawr awmah ka tham a, ka hnehlo lutuk thinrim bawk si chu ka thaw deuh kawk kawk. Keiai daih a a san vangin asan a ban ve ka tum pawn min kek kun tlat nen akawr awm ah bak ka tham theilo nia !
Thawklehkhatah min thlah thut a ,ka tlu lo chauh a kawrawmah ka vawn vangin ka tlu tur ka in ham tang tawk tawk ani ber. A kawrawm ka vawnna thlah mai ka tum chu amah zawkin a rawn vawn hnan a ! Laksawn ka tum pawh chuan avuang tlat ! "Enge maw I hriat le ?" Ka ti sep chu "ka tihpalh anih kha min thlah teh " a ti let zek ! "Ka tihpalh tak tak anih kha ,ka ruideuh a ka inthunun hmanlo anih kha " Mangan hmel zeta tiin ka kut vawnhnan chung chuan a inthing vak vak a ! A â deuhah ka ngai tawp tawh . "Ka kut .."
"Khawngaihin .." ti tuau in amah zawkin ka vawnna a phelh a ,a hnunga step chhukthla ah chuan a lum thla zui nghal ! God! Ka nem..ka nem miah silo a ,amah zawk khan min vuan bet reng zawk a.


.
"Isabella" rawn ti hrawk ri ka hriat rualin min kalpelin Jona leh anu bakah dr.Tluangi nu in min rawn tlanpel nghal zat. Ka hamhaih lutuk chu railing vuanin ka ding khur zawih zawih .Khatiang khan tinge atih? Alu atanga thisen chhuak ka zuk hmufuh phei chu ka tha te hial akhir thei !
"Awi bawihte ,harh teh " tiin Dr .Tluangi nu a au chel chul a ,Jo an pawm tho nawlhin inhnuai lamah a pawmthla nghal zat bawk .Jo nu chuan min kalpel in room lamah atlan leh hlawk hlawk a ,chanchin ava hrilh ani ngei ang an rawn tlanchhuak nghal sap sap hlawm .A lumthlakna step chu step ruk vel bak ani lo mahse nikhawhrelo in a awm bawk si .Harhchhuak thutin inhnuai lamah ka chhukthla ve nghal thuai .




Kawt ka thlenchhuah ve meuh chuan Jo motor chhungah alo lut hman chiah.Dr.Tluangi chu ahnung lamah an dah ani ngei ang ,anu thulut turin kalo ding ve reng tih min hmuh chuan thinrim hmel zetin min rawn pan thuai.
"Nang...nangnu hi ,ka fanu in angen lawm lawm chung che pawn tinge I namthlak kher " ti phiar phiar in min khawih chak hmel zetin min melh ngur . "Ka..ka tih anilo " ka ti sep chu ka hmai a ri nghal thlawrh! "Dawheh nu ,kan mit ngeiin kan hmu cheu .Dawt ila sawi ngam amaw " ti vak a min ankhum chiam chuan mipakhat hian a rawn pawt hrang a ,ka biang dawmin ka mittui afar mai loh nan ka insum hram hram .
"Mambawihi hospital thlenpui vat angai zawk" tia pawtsawn in motor dangah an lut a ,ala awm ve te ho chuan min en hrek hrek hlawm nimai hian ka hria .An tlanliam hnu lawkah min lo bo san ta vek a ! Ka awmdan hi ahrehawm takzet .Chiang takin ka nemthla lo tih ka hria ,tinge khatia achet thut kha ka hrethiam biklo asin . Chuan Jo kha ! Jo kha vawikhat pawh motor atang a rawn chhuak leh lo ! Dr.Tluangi nu in min Ben lai khan a rawn chhuah ve mai ka ring a ,mahse...mahse rawn chhuah chu sawiloh motor tinungin a tlanchhuak nghal daih a !





Ka tan inchhung luh leh a remloh em vangin ka hoodie pawh la lo chuan gate pawnah ka kal chhuak a ,ka ph bak engmah ken ka neilo ka bag lah Jo motor ah khan a awm daih sia . An in lah hi a fal angreng bawk nen ti deuhin kawngpui street light dim zetin a chhun ah chuan ka kal hnak hnak a,ka mittui lo luang leh zeuh thin chu ning zetin ka hru leh tawk zel.Khatiang thil kha vawikhatmah kala tawng ngailo.Ka nu leh pa takngial pawn ka hriattirh ata kut minla thlak ngailo ,chhantu neilo beihvai zeta ka awm kha ka inkhawngaih takzet.Ka tan tal Jona kha lo ding ve se tha tur .Nge ni a ka beisei sang mah mah zawk ?
Kawngkawi thim zual lai ka thlen dawn chuan mipa pahnih kawngsir a lo thu ka tawk a ,an landanah phei chuan zu an in ni ngei tur ani .Hlaulo anga lan tum zetin ka ke pen erawh ka ti chak zual sauh.
"Hey..bawihi khawnge I kal dawn " pakhat zawkin a rawn tih rual chuan atlanin ka tlan tawh ,tunang zan reh lai tak lehnghalin ka mangang takzet."lo ding rawh " an rawn tih leh vak rual chuan min rawn nang chawpchilh nghal der ! "Min kaltir ru" ti vakin ka theihtawpin min vuatbet tu chu ka sual let a ,ka ke leng vak vak in min tanpuitu theitu an awm takin tiin ka au nghal tuarh .Pakhat zawkin ka ka a rawn hup nghal vat a "bengchheng suh" ti vin hlukin zu rim an nam thur thur bawk nen ka khur titih tawh.Jo nau laka thil thleng ang kha ka chunga thleng ve turin ka duhlo ,ka hlau .



Ka ka huptu kut chu ka theih anga na in ka seh vak a ,"zawngi" ti vin thawtin ka hmaiah a rawn hnek nghal thuaih . Ka kawchhung lum pup leh ka hmai sa hut hut chu tawrh hrehawm tak ani . "Min seh ngam amaw " thinrim zeta ti leh hlukin ka tshirt hak hmalam chu a rawn pawtthler nghal hrawk . "Min pui ru " ti tham chhelin ka tal nasat vangin ka chau takzet tawh .Hmeichhe tawn thin rapthlak zet mai pawngsualna ka tawng ve ngei dawn a ka inhriat laiin ka hnung lam atanga min kuahbet tu chu a tu emaw hian a rawn pawt hrang hlawk a ,ka hma lama mi pawh chuan min thlahin ka hnung lamah a tlan ve nghal thuai . Leiah thuthla hnawpin ka kawr chu ka hmalamah ka pawtkhawm nawk nawk "ka that dawn cheu " ti a rum chhuak hrawih ri ka hriat chuan ka hnunglam ka hawi a "jo" tiin ka phun sep. Ramsa kawlh ang maiin min man tute kha a sawisa a ,athinrim rumri chu a rapthlak zawk.
Ka khupah ka chal nghatin ka tap khur nghal hlawk hlawk .Tunah hian Jo hi awmlo tase ....nilo ...awmlo tase chu ka chungah engthil nge thleng ang .Nu leh pa ten an fanu te chunga thleng tura an dah chhin ngailoh ka chungah a thleng ve ngei awm si a !




"Bawihi ...Duatte " ti sup ri ka hriat chuan ka hawichhuak riai riai a ,Jo thinrim insum hmel ka hmu nghal zat . "An..anni khan.." sawi zawm theilo in ka insut nghal hlawp hlawp chu a awmah min kuahbet nghal chawt. " Shh hahdam rawh le ,ka awm tawh hi " ti supin ka sam ah achul zui heuh heuh a ,ka thakhur la reh bawk silo nen a kawrah ka tham chawt . Min pawm tho nawlhin a motor hunna lam min panpui a , ka mangang lutuk khan amotor ri pawh kalo hrelo chu nia .Seat a min hlân luh rual chuan a jacket hak phelin min khuh nghal hlun bawk. Ka biangah nul heuh heuh chunga ka hmui kak lai a tawh chuan ka lo then sak . " Hmel ho chu " ti nghuta kalsawn mai atum chu phallo in kalo vuan bet nghal tung .

" Duati " hrehawm tih hmel ngawih ngawih chung chuan ati sup a , a mitmenga min ngaihtuahna te chu min ti zuau tu mai ani ."min hruai haw rawh " ka tih sep chuan ka chhipah fawp zeuhin motor kawngkhar a khar a ,driver seat lamah motor kal hual in a rawn thu ve nghal zat .Seat nghenchhan nghengin ka mit ka chhing vang vang ,Aizawl ah hian chhuk lo ilang chuan ka hun hrehawm paltlang tam tak hi ka paltlang angai lo anga, ka mittui tam zawk pawh hi a luang kherlo ang .

"Ka lo let leh hun lo nghah kha thil harsa ani em ni " ti sup a a rawn tih chuan ka meng nghal vut . Amah ka va en chuan thil ngaihtuah bing zet tih hriat takin hma lam alo melh ngur . " Bawihi ,zanah lehnghal " ti a a rawn sawi leh zeuh chuan ka kut ka hum ruh nghal vak " nghah che maw ? Khang pawikhawihtu melh a min melh tute kiangah khan lo nghak tur che in min duh amaw ?" Ka ti hrep .Hetiang reng reng a thinrim hian kala awm ngailo ! Nghah maw ? Inchhung a ka kawrlum la tur takngial pawha ka pen luh ngamloh laiin engtin nge chutiang thute a sawi theih zawk .




"Bawihi thinrim lo teh ,ka chau ania . I lakah Tluangi nu khan FIR thehluh atum tih I hria em ? " Ka awih theilo ! Ka thiamlohna ni miah lo lehnghal ah engvang ngawtin nge FIR chu thehluh an tum ? Ka nemthlak anilo tih ka hming ka chian tluk zetin ka chiang. "Ka nemthlak anih I ring em ?" a ngaihdan hriat ka duh " apawimawh lo " ti ringawts min chhan chuan ka tliak hnawp ani ber . Min ringlo ! Jo hian min ringlo anih chu !
" Min lo ring miahlo anih hi tiraw ?" Ti sep in ka nui hak a ,ka nuih chhan ber pawh ka hre chuanglo !




" Bawihi chutiangin ka sawi loh kha "

" Aih nang pawh hian min ring miahlo anih kha ,Dr.Tluangi kha ka nem thlakah I ngai ve tho a midang ang tho in ! Nang tal chu ka thusawi ngaithla in min rin kalo beisei asin " ti sepin ka mit ka chhing zui vang vang . Keihian ka beisei sang lutuk mah mah ani mahna. Achangchuan beisei kan neihsan lutuk na lamah kan nat phah thin a ,mahse beiseina kan neihsanna te hi kan nunna mi pawimawh ber ber te anni thin si .Jo hian ka nunah hmun pawimawh tak achan tawh vang nge a thukam khat lek pawn vih ngut ngut ang maia na a min siam thin ?
Angaihsakna leh duatna ten mihlim berah min chantir a ,a pangtilum hian mai in thlamuanna min pek hnu lawkah ka chhungril na vawng vawng tur khawpa na in min siam leh a ! Hnaih zui zel ila thokang leh thei tawhlo tur khawp in ka tlusawp hlen mai angem ? Ka tana khuanu ruatloh chelhin ka beng ka chhu ngawng lui tlat tihna nge tinge midangte anga thlamuang leh hrehawm tello a kan inkar hi abuaichuar bik em em le ?




"Duati " a tih sup chuan ka mit ka meng riai riai a ,kan inluah kawt kanlo thleng der tawh . "Mangtha le " ti sepin kawngka namhawn ka tum a , ka banah rawn chelh nghal thuaiin "ka lo lut ve ang " atih chuan "aih ...keimah chiaha awm ka mamawh " ti a chhangin ka chhukthla nghal vat.Min auh zuina pawh ngaihven zawmlo in step ah ka chhuk thla a .Inchhung ka luh chuan ka nutei alo la meng nangin ," nute ka mu nghal ania " ti thuaiin room ah ka lut tlang nghal thuai.Zawhna chhan leh ka peih hrihlo ,chhum chhah zet in a adelh ang mai iin ka ipik churh a ! Tah vak vak a ka ipikna zawng zawng au chhuah pui vek ka chak takzet. Min delhtu rit zet hi laksawn a,a hma a ka nundan mawlmang ve tak anga nun leh ka duh. Ka rilru peng pakhat erawh chuan Jo taksa kuahbeh chunga hahdam achak takzet thung ! Amah a ka Rinna ka nghah nasat ang chiah hian min ring ve nise tha tur . Keichuan kawng engkim ah athusawi ka ring hmasa phawt thin a ,ka thusawi pakhat chauh atan rin harsa ani thung si .





Darthlalang hmaa ka hmai ka en chu ka nernawk ,ka chal zawn inrin riak chu alang chianglo na in ka hmui zawn pilh erawh alang chiang ngang mai ,ka hmuibul vel pawh tlem chuan avûng ve deuh .Ka ban leh ngawng vel a duk cher chur a ,accident te pawh ka ang zawk mah .Hetiang chuan University pawh ka kalthei kherlo ang .


..............




Ka ph vibrate dar dar chu dan ngaite bawkin ka hmet thim leh hmak a ,nidanga ka awmdan ngai bawkin ka awm zawm leh zat.Karkhat zet chu ka room ah hian tawmin ka kal hlat ber pawh bathroom ani deuh mai.Ka chunga thilthlen dam zawng zawng ka nutei ka hrilh hnuah lainat zetin min enkawl zawm a ,University pawh professor te phalna in chawlh ka dil hrih tawp. Nitin zantin Jo a rawn kal awllo a ,mahse ka room a ka inkalhnan tlat thin vangin ka nute'in a tir haw leh mai zel .Whatsapp leh call thlengin min rawn be awllo, achangleh ka ph ka switchoff phah hial . Nute'in ka ngaihdan min tawmpui a ,Jo hi kalsan hlen turin ka rilru ka siam fel tawh . Tuna ka kalsan lo anih chuan kalsan ka ngaih hun ala awm dawn tho tho . Pawn ka chhuah ngailoh vangin Dr.Tluangi chanchin ka hre lo a FIR an thehlut talo nge police lam pawh an la rawn inlan miahlo . Nileng zankhua in ka khum chu ka hun hmanral na thin ani ta ber .



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)