TRAITOR CHAPTER 21

Episode kal lai dah luhna

Moderator: writers

Krystal Vanchhawng
Posts: 127
Joined: October 5th, 2021, 4:42 pm

TRAITOR CHAPTER 21

Unread post by Krystal Vanchhawng » December 1st, 2021, 10:51 pm

TRAITOR
CHAPTER 21

☆☆☆☆☆☆☆

NÛPUII POV:

Buaina han tih tham em em neilo chuan kan awm ve a,mahse buaina chu kan la nei ngei dawn tih ka hre kiau si.

Ka nu lah,ani têlin a tawrhhlelhawm a,mahse naupai ka nih vang hian chutin min ti vak ngam chuanglo. 'A awm awm hian lo awm ve mai teh se' tiin ka enliam tawp. Gordon pawh hian thil awmzia chu a man ve ta deuh nge. Ka nu nen chauh kan awm ai chuan a kalna piangah min hruai thin.


"Naute pian hnu ah chuan ka pu inah kan insawn ang" Chawei laia Gordon-a'n atih chuan kan vaiin kan meng phâwk nasa.

"Eng nge maw i sawi awmzia le?" Tih pahin ka nu chuan min han melh kher a.
"Nupui nei ka ni tawh a,ka nupui leh kan naute tana nuam zawk tur ka ngaihtuah" ati sup a. Keipawhin hei kher hi chu ka hre bik hauhlo.

"Innu chuan nuam a tilo em ni?" Mei nei tak chuan ka nu in a han ti leh a.
"Nuamlo tih thu ka sawilo. A aia nuam zawk ka duh mai a ni" tih pahin a tho daih a.

"I pasal kha engtin nge i kar a?" Gordon thawh veleh ka nu chuan a ti rêng bawk a.
"Engmah ka hre hauhlo" ka tih chuan a'n âwihloh hmel khawp a.

"Nangni in awmloh te chuan in luahlumtu an awm nang" pangngai tak chuan atih zawm leh a. Gordon hi diktak chuan a thlahlel ve tih ka hria. A fapa neihchhun a ni a,a âwm ve reng.

"Eng nge i sawi kha awmzia?" Pindana ka luh chuan ka ti vat a.
"Ka sawi ang kha nimai" ati ringawt a.
"Sawi chiang la" tih pahin a hmaah chuan ka va ding a.

"Tunlai in boruak hi ka hrethiam ve ania,chuvangin ka pu inah kan insawn dawn nia" tih pahin ka biang chu a rawn khuap a.
"Chutiang engmah a awmlo. Hmeichhia te chuan buaina neuh neuh kan nei vek alawm. Heta awm hi ka duh,bakah naute te nei ila,ka nu in min buaipui loh te chuan" ka tih chuan min en chiang ngang mai.


"Chu chu i duhdan a ni tak tak maw?" Atih chuan ka lo bu nghat nghat a.
"Hrehawm ti deuha ilo awm ka hlau deuh maw le,ka arsi tê nen hian nilengin ka bulah in awm thei si lova" tih pah chuan ka dul chu a rawn chûl a.

"Ka lama i țan tlat chhung chuan khawi hmunah pawh ka awm thei" ka tih chuan min lo fâwp zauh a.

"Indîm la,i chauh chuan office lamah lo kal nai rawh aw" tih pah chuan hnathawk turin kan ințhen hrang ta a.

Nuni chu duty pah chuan a tîti mawlh mawlh a. Keichuan damdawi en fel pahin ka chhungte ka be mai mai a.

"I duh duh hunah ilo kal thei bik tihna mi?" Nurse pakhat inhnawih beh fahran chuan min zawt hlawl a.
"Aaa,thei bik nang" ka ti țha mai.
"I duh duh hunah hian ilo kal maiin ka hria" tih pah chuan a țhiante chu melhin an nui hak a.


Nuni țawng tum chu ka va khap vat a. Khawvel chankân tawh nen khatiang lo inla Gunda pawl kha anlo la awm ve anih hi.

"Coffee in ava chakawm ve tiraw?" Nuni'n atih chuan a vawt bawk nen ka pawm zawng tak a ni.
"Va la ila" tih pah chuan kan kal nghal a.

"Awi,ka phone ka theihghilh. Lo va kal mai teh,ka lo ûm ang che" tih pah chuan a lêt leh hlawk hlawk a.

"Awi,ka tihpalh lutuk" tih pah chuan ka hmaa hmeichhia chu ngaihdam ka dil vat . Nuni lo lêt har nen kan pahnih ta tur ka lo la khanglanga,ka chetsual phah.

"Kawng en ta che" tih pah chuan min la melh rum hrâm.
"Ka tihpalh a ni. Khawi ka lo tifai ang" tih pah chuan ka va ban a.
"I kut bawlhhlawh khan lo khawih suh" tih pahin a vin tuarh a. A chuti teh vak vak a han vin. Vawikhat inhmuh na chauh ah lehnghal.

"Kal rawh. Dawr atang tawhin min zui reng mai" te chu ala ti lehnghal.
"Aw le,min hrethiam dawn nia" tih pah chuan ka kal a.
"Khawnge maw ka purse hi le,hey,lo ding teh" tih pahin min rawn pawt ding leh a.
"Eng nge ni ta?" Tih pah chuan ka en hâ a.

"Ka purse ila em?" Ati anih chu,nuih hak pahin
"Keihian i purse ka la aw-kawnglo" tih pahin a kut chu ka thing thla a. Mahni lo maha thinchhiat hunlai lo ni ve nen.

"Ka âwihlo,khawimaw" tih pahin min rawn dap rawk rawk a. Ka uniform ipte atang chuan eng emaw hi a lachhuak a.
"Aw,hei ngei hi a ni. Ka purse chu ila lo. Mahse,ka pawisa ila" ati ta mai.
"Ka pi,i hresual anih chu. I pawisa ka la hauhlo" ka tih chuan ka thin a rim ve tawh hle.
Thil ru a han inpuh te chu.

"Chuti si,ka 500 hi engtin nge i ipte ah alo awm?" Atih chuan keipawh in a awmzia ka hre hauhlo.

"Ka hre nang,i dah aniang chu" ka ti chiah chu a sa teh e. Nuni nen kan coffee man daih chauh ka keng tih ka hria. Mahse,henu pawisa hi engtin nge ka ipte ah alo awm tih ka hre lo.

"Ka dah ang maw. I huai hle mai,police ka phone anga a dik vek mai ang" atih chuan
"I duh chuan a lêt ka rul mai ang che,tibuai duh suh" ka tih chuan
"I zaklo mang e,ka phone tho tho ang. Nangni ang hi chu zirtirna pêk hlak in ngai" tih pah chuan a phone chu a hmet neuh neuh a.

"Tisuh ka tih kha,ka rul leh ang che" tih pah chuan ka pan hnai a.
"Min rawn hnaih suh,ka report dawn tho tho che" atih chuan kei,raino hlim thinchhe ve ta chuan a phone chu ka va chhuh thut a.

"Min pe rawh" tih paha min rawn pan chu a ke a rap lek a,min pawt dâwrh pahin step ah chuan a lum thla nghal mai. Keipawh chu ka pai dâwrh a.

"Lalpa ka duh theilo" tih pah chuan thei leh theilovin ka tho a.
"Awiha,eng nge ni?" Tih pahin Nuni leh Rinnungi chu anlo lang thut a.

"Thisen a chhuak anih hi" tih pahin an pan nghal a. A step lumna hi step 10 pawh a tlinglo.

"I nem ami?" Rinnungi'n atih chuan rum fê a melh pah hian
"Ka nem i ring ami?" Ka ti ram hmak a.

"Security anlo kal dawn,ana vak lovang" tih pah chuan Nuni chuan min lo hnêm a. Keichuan engah vak ka ngailo,a chhan chu ana dawnlo tih ka chiang.

"Eng nge thleng?" Tih pahin Emergency room kawtah chuan Gordon chu alo kal a.
"Kan chesual deuh alawm maw le" Nuni chuan alo ti vat a. Gordon chuan bûk nghut pahin min lo pan vat a,min kai hrangin mi tlemna lai deuhah chuan min hruai a.

"Le,eng nge thleng sawi teh le" zaidam tak chuan a ti a.
"Ka tum a ni hauhlo. Amah kha a chesual a,min pawt zawk a" ka ti bah niah a.
"Pawilo,ka buaipui dawn nia aw" tih pahin min kuah a,ka hnungah a beng thek thek bawk a.

"A kimchang deuhin han sawi teh le" atih chuan Coffee la tura kan kal atang khan ka hrilh vek a,ka sawilai chuan ngun takin alo ngaithla a.
"Hlauthawng lo la,a pem satliah mai alawm" atih chuan ka thla a muang ve deuh.

Kan duty naah chuan kan lêt leh a,rilru hah sa nen ka chau nghulh thei. Vawiin kan buai ni alo ni kher bawk nen.

"Step ah hmeichhe pakhat iva nem thla a ni maw" nichina nurse bawk kha a ni.
"Ngawi mai mai rawh" Nuni chuan alo ti vat a. Keichuan hetiang hmeichhia hi chhân en ah ka en ngailo hrim hrim,anmahni hian in âng thinrim vel mai mai se ka duh tawk.

"A ni alawm,enge,a duh duh hunah duty turin alo kal a. Duty chhungin bo daih a chîng bawk si. Kan pu bulah ka la report ang,hmelhriat neihțhat vang mai a" atih chuan ka thiltih lai țhulh meuhin ka en,a nasa ve thawkhat a ni. Jennie cousin ani tih ka hrereng,chumi vang chu aniang min huat em em. Lalțanpuia nen pawh khan an inbe nasa tih ka hria,nge Lalțanpuia kha alo ngaizawng ve zawk pawh ka hrelo.


"Eng maw tuna in sawi kha?" U Sarah leh Rinnungi chu anlo lang hlawl a.
"Madam,henu hi maw le kan lo sawi. A duh duh hunah alo kal a,duty laiin a bo ziah lehnghal. Chutah mi pakhat step ah ava tina ngawt lehnghal" pakhati chuan alo ti zat zat a.

"Chutah chuan buaina i nei a mi?" U Sarah-in atih chuan chunu chu ala zâm țhak lo.
"Ka nei chu ka tilo,mahse a fair lo alawm" ala ti țalh a.

"A neitute monu leh hnathawk satliah chu engtin nge in dinhmun a inan theih reng ang?" Rinnungi'n alo tih chuan
"Eng maw?" Anlo ti rual țhup a,midang awm ve ho pawh anlo hawi nasa.

"Aw,fair lo tia inlo sawisel hi in thawhna damdawiin neitute monu anih hi,chuvangin in dinhmun inang tur chuan lo ngai suh u" Rinnungi chuan ati leh a. Min chhanna chu ni tho mah se hetia sawi hi a țul ka ti lo.

"Kan tihpalh a ni,Madam min hrethiam r'u" tih pah chuan pakhat chuan alo kai hrang nghal a.
"An nasa hle mai,tiangte kha chu zilh erh tur" tih pahin U Sarah chuan min melh a.
"I țha em,in che phelh deuh tih ka lo hria a?" Atih chuan ka țhat thu ka lo hrilh vat a.

Tlaiah chuan step a lum kha va kan turin Gordon nen kan kal a,kan va luh chuan min lo melh no lo teh e.
"Kha i țha maw?" Gordon-a'n atih chuan
"Țha vak hmel ka put loh hi" alo ti ram hmak a.

Gordon chuan eng eng emaw zawt in inrem pui a tum a,mahse ani lah chuan buaina a zawng emaw tih mai turin engmah kan sawi a ngaithla duh lo.

"Lo va chhuak la,keiman ka'n bia ang e" Gordon-an atih chuan ka lo va chhuak a. An inrem theih ngei ka beisei.

Minute 15 vel ka nghah hnu chuan alo chhuak ta a.
"Eng nge a an?" Ka lo tih chuan nuih suk pah hian
"I pasal hian tih theihloh ka nei hleinem" intihtheih hmel taka atih takah chuan a hlawhtling anih ka ring ta.

"Ava lawmawm,ka lawm e aw" ka tih chuan ka biangah alo piai vak a.
"Ka bulah lawmthu sawilo turin ka hrilh ngun tawh che kha" atih chuan ka lo nuih tlawn leh vel.

Ina kan haw chuan ka nu in alo hre leh hman ang tih ka hlau lutuk.
"Vawiin ah in chesual ami?" Alo ti ta chiah bawk a.
"Chesual chiah pawh a nilo,kan țha e" ka tih chuan ani leh ni lo ang takin
"Naupai lai chuan fimkhur lehzual angai ania,indîm tawh rawh" ati ta hlauh zawk a.

"Aw le" tih pahin ka kalsan a. Ka rilru chu a hlim veng veng.

"Engtin nge in sawifel mai theih a?" Tiin Gordon chu ka zâwt leh a. Amak ka ti a ni,khati khawpa hmeichhe nasa kha,ava be fuh thei mai a.

"Amah kha ka hriat hnu alawm. Remsanga ka phone khan 'khanu kha chu pawisa a duh lutuk,pawisa pe ula a ngawi hmak mai ang. A eizawnna ve anih kha' alo ti mai a,ka han vo deuh anih kha" nuih suk suk paha atih chuan a vo lai tur vel ka ngaihtuah a,keipawh ka nuih a za riau.

"Mate,Vawiin chu inhmu lawk ila" U Ruatfela message ka hmuh chuan rilru hahna bawk alo thleng leh tawh. Theihghilh theih a ni bawk si lo. Tinge maw ka hlim rei theih reng reng loh ni.

Ka hman hun leh kan inhmuhna hmun tur te chu kan sawi a,"tlaiah Gordon ka hrilh mai ang" tih pahin damlo bp en sak turin ka kal ta a.

Min sawi peih deuh deuh ho pawh khan min sawi ngam vak tawhlo,an lo star ruk ve em em nupui ka ni tih an hriat tak vang a ni. Ka thleng te hi chibai min lo bûk lo chauh zel,nuihzatthlak hlawm hian a.

"Haw hma chu i duh ami?" Gordon-an atih chuan Driver min thlah tir mai turin ka ti a.
Driver chu Chanmari lamah ka kaltir ta zawk a.

Ka u nghak pah chuan naute thil vel Net ah ka en mai mai a,a châng chuan ka rai tih ka lo theihghilh a,railo awm hmiah hmiah hian ka lo awm leh thin. Lehlam ah chuan a lawmawm zawk phian,rai huat an tih ang te kha ka nei lutuk lova.

"Kan chanchin te kha ilo hre ve tawh anga?" Ka u in atih chuan ka lo bûk khum ringawt a.
"Naute a pai ve ta si a,nghah pawh kan duh viau na chu,a chhungte an zahawm em a" atih chuan a rilru hah tur zia ka ngaihtuah thiam mai. Mapuii te chhungkua lah milian chhungkua an nia,thil tih mai mai an duh dawn si lo.

"Ka hrethiam alawm" ka tih chuan ka kut alo chelh vang vang a.
"Mate,i u hi min haw suh aw" atih chuan ka khawngaih reuh hle. Inchhunga buaina a siam peih em vang hian a inthiamlo ve nasa thei lutuk a,țhian kawm em em a nei si lo. Ka mu tawh emaw tiin ka khum bulah alo kal a,a rilru hah thu leh fel a tum thu te hi alo sawi ve nuap nuap zel. Khata tang khan ka kawm nasa sawt a,ka nu leh midang in hau nasa thin mah se ka hau duh ngailo hrim hrim.

"I haw tlang emaw tia,Khawnge i kal a?" Ina ka haw chuan Gordon chuan alo ti vat a.
"Nia,kan in lamah ka va pêng lawk maw le" ka tih chuan a aw ve mai a.

"Thawhțanni hian Champhai lamah zin lawk ka ngai a" atih chuan ka lo hnual nghal rawih rawih.

"Tinge" ka lo tih vat chuan nui hawk pah hian min lo pan a,khumah chuan țhu in amah hmachhawn zawng chuan min pawm a.
"Ka pa hi a chak vak tawh si lova,a ai ka awh zel angai tawh a. Nihnih chauh a ni dawn alawm" atih pawh chuan ka la huphurh tho tho.

A zin hian thil duhawmlo a thleng duh riau a,chuvang chuan zin lo tawp mah se pawi ka ti hauhlo.
"Ka awm thei ang. Mahse,engkim min rawn hrilh ziah ang che" ka tih chuan
"Hrilh dawn e. Ka lo thlen veleh min lo thinrim khum leh te pawh ka hlau ve tawh tho alawm" atih chuan "nghal lutuk" tih pahin a dulah chuan ka lo piai vak a.


Gordon chu a zin ta a,ka nu pawh a hma ang kha chu ni chiah tawhlo mah se a sual lutuk tawhlo.

Ka pasal zin min rawn be thin rawh ka ti ve chu darkar tin deuh thaw min rawn bia a. Duty puite lakah pawh a inthlahrun awm duh lutuk, anni lah chuan ka phone a rîk hlek tawh chuan
"Khawi dah rawh,keiman ka lo ti ang" tih sawk sawk pahin ka phone min lo pe vat zel. A zahthlak zawk,a nupui ka ni tih an hriat tawh vang hian min en dan an thlak leh lutuk a.


U Ruatfel nen pawh kan inhmu zeuh zeuh a,an inkutsuih tur chungchang vel te min hrilh a. Zingah biakin hall ah an insuih mai anga,ka pa pension lawmna ni pah fâwm in tlai lamah ruai țheh chu an ti a ni âwm e.

Keichuan kan dinhmun ka la chianloh em vangin engmah ka la sawichiang duh lova. Mak tak a ni,Gordon ka hrilh dawn apiangin eng emaw hian min lo dang ziah.

Mut hmuna hrilh ka tum lah in a phone alo rîk loh leh amah alo muhil daih zel a. Motor chuan paha ka hrilh dawn leh eng emaw hian min lo tibuai ziah bawk. Ala remlo ania nge ka ti tawp zel.

Mahse U Ruatfela pawh khan 'thil hi a landan ang vek hi a nilo ania' kha a ti a,eng nge awmzia ni ang le. Amah tak pawh hi ka khawngaih lutuk. Chhungte lawm zawng anga awm lutuk lo kha,tunah loh theihloh vangin ka pasal nupui hlui nen an han innei dawn chu a ni sia.

A rilru hah hrehawm ti,chhungte laka inthiamlo bawk. Mapuii chhungten anlo kar ve chhen bawk nen a rilru buai lutuk khan vawikhat chu min kuah chawt pahin a inthiamloh thu te min hrilh ve nasa. Khata tang phei chuan engkim hi ama thiamloh angah ka dah duhlo lehzual.

Gordon chuan a thlen tirh chuan min lo be reng a. Nihnih chauh châm tur ang khan a insawi sia,vawiin ah anlo haw ngei ang. Kan pindan te chu ka lo tifai a,a zin lo haw hi chuan țha thei ang bera lo hmuah hi ka duh tawh. U Sarah thusawi
'Mapui angin thinrim hmaisen nen a zin lo hmuak ve suh aw' atih kha ka la hre reng.

A chauh ve thin dawn nen,annu pawh chu a mawl ka tia. Hetiang khawpa pasal tha ka u Ruatfela te ang vang mai maia a han kalsan phal hi chu amak ka ti a ni. Ka tan lah vanneihna alo ni hlauh zawk a.

Vawiin hi alo haw ni tur chu ania,zing atangin engmah ala rawn sawi lova. Hna lamah ka kal phawt a,U Sarah ka hmuh chuan ka zawt vat a
"Anlo haw turah chuan ka ngai,tuna an zinna lam hi ka buaipui lam a ni ve vak lova" tiin min chhâng a.

Tlaiah pawh chuan engmah alo la sawi si lo,ka phone lah in ala thei lova,ka text a en thei bawk si lo. Ani hi tawhsual alo tawk leh anih te ka ring rum rum.

Rilru nuam zânlo chuan inah ka haw a.
"Inpa in alo bia che em?" Ka pa in atih chuan thil awmdan leh ka hlauhthawn thu te chu ka hrilh a. Mahse,ka nu chuan
"Tun lawk khan ipa alo bia alawm. An hna a laklawh deuh a,alo haw dawnlo anih chu. Lo lungngai suh" atih chuan ka rilru a hahdam ve deuh.


Mahse,pindana ka awm hnu chuan ka ngaihtuah a. Keiin nilengin biak ka tum a,ka text pawh lo chhâng theilo khan ka pa alo be leh tho sia. Mahse,a buai lutuk anga a hman lo aniang tiin ka inhnêm leh ta a.

Alo haw hun tur a sawi atangin nithum ngawt a liam leh tawh a,engmah thâwm la rawn nei bawk si lo. Midang ka zawh lah chuan engah vak anlo ngai si lova. Keimah ber hi naupai nen ka rilru a hah hma bawk si.

"Ilo call vat loh chuan Zarkawt lamah ka lo va haw phei daih ang" tih te
"Nupui thar i zu hmu ami?" Fiamthu te chuan ka zu ti a. Mahse,chhân tik ni reng a nei si lo.

"Min chhâng ve la,naute nen hian apa kan ngai tawh ania" tih zinga ka thawn chu a seen ngei a. Mahse,min la chhâng chuanglo. Ava mak chen chen awm ve aw. Alo haw chuan zilh deuh hlak angai dawm anih hi.

Pakhat ah chuan an chhungkaw zia leh kan chhungkaw zia hi a inanglo leh lutuk a. Hei pawh hi a buaithlak ve hret a ni. Keini chuan in namnûl mai mai te kan duh lova,thil kan ti thlip thlep a. Hetah te chuan engkim hi an namnûl ni maiin ka hria,engmah hi an ti ve thlip thlep lo. An tâl vel nawk nawk a ni ber.

"Inpa chuan alo la be lo che mi?" Duty paha Nuni'n atih chuan kan chungchang vel chu ka hrilh a.
"Alo haw ve țep ang,lungngai lo la. Bakah hetiang lama zin hi chu an buai dan hriatthiam a har thin ania" atih chuan ka awm a nawm tawh thu ka lo hrilh mai a.

Tlaia ina ka haw pawh chuan ka phûrlo hle. Kan pindan ka lût chu alo thim țhiap a,a reh bawk sia. Ka hlau deuh,light ka on chu ka phu zawk thei.

Karkhat dawn lai ka hmuh tawhloh ka pasal chu khumah bawkkhup zawngin alo mu pharh duai a. Ka lawm bawk si,min tihphu nasa si chuan ka han en vang vang ringawt a. A chauh hmel lutuk ringawt.

"Gordon hi engtikah nge alo thlen a?" Kan nula te bula ka zawh chuan
"Alo thlenna pawh ala reilo" an ti mai a.
"Pasal te zin chu lo hmuah hi a tha ania kha,a chauh hmel ropui si" ka nu chuan alo ti vat a.

"Nia,ka lo hrelo alawm maw le" tih pah chuan Gordon in tur khawizu tui chu ka chawi chhova. Alo tho tawh a ni ngei ang,bathroom lamah chuan a ri ruk ruk a.

"Ilo va haw har ve" tih pah chuan inla pangchang deuhin ka va kuah a. Mahse....
Engmah sawilo chuan min nawr sawn a,a thawmhnaw dahna lam chu a pan daih.

"Kan țha vek em?" Ka tih chuan alo hawi a,mahse min en reilo,lehlam a hawi leh nghal daih.
"I țhat chuan kan țha. Ka chau deuh a ni" a ti a. Keipawh chuan hrethiam takin engmah ka zawt ta lova. A intur te chu ka pe a,a in zawh chuan a mu leh ta daih a.

Chaw kan ei pawh chuan ka kaitho duh ta lo. A chau deuh anih ringin kan mut tir tawp.
"I chau aniang kan tia,chaw kan lo ei san tawp che" tih pahin a mutna bulah chuan ka va kal a.
"Ka zu ei mai ang" tih pah chuan a tho thurh a.

Eng nge maw a awmzia le,min pehêl kual char char nimaiin ka hria.
"Min lo biak tur thu i sawi sia,i reh leh daih a" mu tura insiam pah chuan ka ti a.
"Ka be lo che mi,ka lo biak che kha" tih chauhin min chhang.

"A tirah chauh anih kha,ka rilru iti hah thei lutuk alawm" țha tak chuan ka han ti leh a.
"Engkim sawi kual duah hi ka peih ve lo,a țul chin chu ka hrilh che" ati hmuk a. A awmdan vel chuan min ti lungngai nge min ti thinrim pawh ka hrelo. Engmah sawilo chuan ka awm ta reng a.

"Khawnge ikal dawn?" A chhuak tur chu ka au vat a.
"Chhuah lawk ka ngai,lo mu rawh. Ka lo lêt har lovang" tih pahin ka chal ah alo fâwp zawk a. Engmah zawh zui hmanloh in a chhuak daih.


Kan va mak sâwt hlawm ve aw. Pawilo,intih thawven ve te pawh a duh aniang. Keimah in ka mu lum zo em ang chu maw. Christmas a hnai tawh a,khaw vawt ka tuar theilo telh telh mai.

Gordon chu a zia danglam kha a chauh vang mai mai ah ka lo ngai a,mahse karkhat a liam hnu pawh chuan a zia ala mak reng. Englai pawhin min hêl reng a. Khum khatah kan mut fun pawhin kan inbe ngai lova,ka mut hmaa alo mut chuan alo muhil daih a. Ka mut hnua alo mut lahin ka mutthilh nghak niawm fahran hian ka mut hnuah chauh alo mu ve a.

Ka biak lahin a rûl tawk lek lek chuan min chhâng a. Ka han thinrim ve dawn lahin amah zawk chu a dam leh thlup lawi sia. A awmzi pawh ka hre lo. Ka nu takngial pawhin kan nupa inkar that leh thaloh min zawt a. Midang pawh hian anlo man thiam ve a ni ngei ang.

Vawikhat pawh Gordon chu a awmdan mak lutuk U Sarah chuan a khak a,engmah a sawi lova. A hnial bawk hek lova. Kan nupa chungchang vanga a u in a khak chu min huat ka hlauh laiin ani lah chuan kan haw pawhin angai rengin dam thlup hian min be reng thova. A awmdan hi ka hrethiam hlawllo.

"Harsatna i nei ami?" Mutnaah chuan ka zawt a. Tunah te hian lo muhil derlo ila chuan alo la mu duh tawp lovang.
"Neilo" a ti a.
"I zia hi amak e,hman ami ang kha ini tawhlo" ka tih chuan ka lam alo hawi ve chauh.

"Engtin nge ka danglam vak a?" Atih chuan ka en lét kal a.
"Min thlâkhlelhna nei tawhlo i ang?" Ka ti ringawt. Kmchang taka sawina hun a ni si lova.

"Ka ngai reng alawm. Tunlai chu ka hah deuha" tih pah chuan min lo kuah a,keipawh ka hlim ve leh deuh. Zankhua chuan amah si chung chuan ka mu leh a. Ka mu pawh vawt tih vangin ka harh ta lo.

Mahse,khua alo var a. Angaitê bawkin a ze ngai bawk a pu leh a. Biak pawhin min chhâng țawk țawk chauh a ni. Hna pana kan kal te hi ngawi rengin motor a khalh a,biak a huphurhawm ngawih ngawih.

"Enteh,min hne tawh anih chuan sawi mai la" ka insum thei tawhlo chuan a hmaah tak ding chung chuan ka ti ta tawp a. A mitko alo sân ûk ringawt,hei pawh ka huat tawk a tling em em.

"Hetia chhan hriat si lova intih thiamlohva,inhêl kual reng te. A chhan sawi tur awm leh em em chuang si lova in biak țhat a,intih nuih a,hlim awm taka midang hmaa han awm leh ngawt te hi ka thiamlo. Kan thinrim anih chuan chhan țha tak a awm tur a ni a,kan hlim anih pawhin chhan a awm tur a ni ve tho ania" inkuangkuah ât chuan ka ti a. Ka chhoh en hâ bawk.


"Chhan maw itih?" Tih pah chuan a ner deuh nawk a.
"Aw,engkim hian chhan a neih angai" ka tih chuan ngeiawm lutuk hian a khi suk a. Chutah a file awmna lam chu panin eng emaw hi a dap ruk ruk a. Envelope ah hian thlalak ang deuh hi a rawn lachhuak a.

'En la' ti ni awm hrim in a melh zeuh a. Tu emaw nena kan thlalak alo ringhlel leh anih ngat chuan ka thinrim tawh ngawt ang,a chhan a ho thei si,ka rilru a tih mawlh mawlh pah chuan thlalak chu ka en a.

Mahse,ka thlauh leh rang hle.
"Kha kha a chhan chu anih ka ring" ngeiawm atak tih pah chuan thlalak chu a rawn chhar a.

Engtin nge,a hrechhuak tihna em ni.
"En leh la" tih pah chuan U Ruatfela nen kan inhmuhna thlalak chu ka hmaah a rawn tipharh a.

"Engtin" ka ti sap ringawt.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)