CALL GIRL CHAPTER-19

Episode kal lai dah luhna

Moderator: writers

Tomtomputara
Posts: 69
Joined: December 3rd, 2021, 1:17 am

CALL GIRL CHAPTER-19

Unread post by Tomtomputara » January 14th, 2022, 11:47 pm

CALL GIRL
Chap~19


By : Tom Tom Putara





Dawr ka thlen phei hma hretin ka phone a rawn ri a, rang takin ka phawrh nghal a. Kawngsir thawl laiah chuan ka ding zui nghal a. "Aw hello" Aldrin-a phone call chu ka chhâng zui nghal a.





"Duat...dawr i thleng tawh em?" a rawn ti nghal vat a.




"Thleng ṭep..." ka ti ve nghal vat bawk a.




"Ka rawn kal hman dawn lo ania. Kan dawr bungraw phur motor kha Kolasib bulah an Accident a..ka kal nghal angai...ka chhuak ṭep.." a rawn ti nghal zung zung a.




"Anih chu maw le aw...ava zialo ve aw..an na em?" ka ti ve nghal sawk sawk bawk a.




"Engmah chiangkuang ka la hre lo...ka kal ange" a rawn ti leh nghal vat a.




"Awle..awle...tlânchak suh aw? I chesual hlauh ange" ka tih rual chuan ka ngaihtuah zia hrethiam phalo tih hriat zet hian, "Aw..aw..." a rawn ti liam puat a. "Bye..." a rawn tizui leh thuai a.







Hmanhmawh zetin ka kalzui nghal a. 'Maduhi nen hun thawl kan nei a ni mai a' ti rilru neuh neuh chung chuan ka pên zui sawk sawk a.







Dawr ka luh rual chuan ka hawikual nghal a. Maduhi hmel reng reng ka hmu lo, Maduhi ka hmuh loh mai bakah Dawr chhung chu a reh ṭhiap a. Ka hawikual vel ngail pawhin tumah ka hmu lo. Maduhi chu ṭhenawm dawr velah a kal leh zawk anih ring chungin ka ṭhu hahchawl zui nghal a.








"E....i rawn thleng tawh maw?" tih pahin Pu Marina chu a rawn lut zui nghal a. En pawh ka en lova, ka phone chu ka hmet mawlh mawlh a. "Umm..." ti chiahin ka chhâng a. Hmuh ka duh tawh lova, biak pawh ka duh hek lo.








"I rawn thlenna a rei tawh em? Ṭhenawm ah sawn Kuhva an nei tui deuh a, ka va lei lawk maw le..."tih pahin ka bulah a rawn ṭhu tak deuh deuh leh nghal a.








"Ka rawn thleng fel chiah..." ka ti deuh hmak a. Ka ṭhutna a thawh pahin ka phone chu ka hmet mawlh mawlh a. Maduhi lahin phone a la leh lawk thei tawh lo. Vawi thum ka tihnawn hnu chuan a rawn chhâng ta hram e.





"Khawnge i awm a?" ka ti nghal deuh fak a.





"Awii ṭhiannu....ka rawn kal hman dawn lo. Ka rawn hrilh tawh kha...ka nau a dam ṭha lova" a rawn ti nghal zung zung a.





"Anih chu...a va zialo ve aw...lo dam leh thuai rawh se" ka ti vel ta ngawt a.






"Nia...a dam leh vat mai ang" a rawn ti ve leh thuai a.







"Ka hman leh ka rawn tlawh dawn che u nia...in awmna lai tak felfai deuhin min rawn hrilh la...?" ka ti zui leh a.







"Awiii ṭhiannu....a ngai lo...rawn tibuai duh suh. Kan tibuai mai mai che" a rawn ti nghal zung zung a.







"Tihbuaina a awm lo...rawn kal ka tum dawn nia..." ka tih hnu chuan kan inbiakna chu kan titawp zui ta nghal a.







Ka ngaihtuahna ah thil a nilo zawngin a rawn lut leh chat a. Aldrin-a khan dâwt min hrilhin Maduhi nen an awmdun em ni ang? Ka rilru a na nghal ngawih ngawih a. Ka thîk nghal ngawih ngawih bawk. Ka ngaihtuahna hrisel lo zet ang chuan thil kal ta se engtinnge ka hmachhawn ang? Ka beiseina neih ve zawng zawng a thâmral a ni mai dawn si...







Pu Marina chuan zâwi tê a zâi rât rât pahin min rawn hnaih sauh a. "Tunge maw i biak mawlh mawlh le?" a rawn ti sap a.







Aldrin-a putea ania, ka hnathawhna ah hian mi pawimawh tak, ka hmangaih Aldrin-a tan pawh mi pawimawh anih ka hriat avangin zah taka biak ka duh. Mahse, a harsa ka ti viau bawk si. Ka hun kal tawhin min rawn dêng nawn awn awn bawk si. "Ka ṭhiannu..." ti chauh chuan ka chhâng ta hram a.








"Khawnge Aldrin-a hi?" ka ti zui leh vat a. Vawikhat pawh ka la melh chhin aih lo bawk.








Pu Marina chuan nui hak hak chungin, "Kolasib ah kal lawk angai a..." a rawn ti zui leh a. A nuih dan ah chuan min ringhlel ni mai te hian ka hre zawk hial bawk.







"Anih chu....vawiin dawr ka nghak hman dawn lova..ka hrilh duh maw le.." tih pahin ka melh ta zauh a. Ka melh zauh chhung hun reilo tê ah pawh chuan amah ka huatna mitmeng chu a hmuthiam duh anih ngat zawngin a hai hauh lovang le.








Pu Marina chuan engmah a sawi lova. Ngawi rengin a ṭhutna lamah chuan a phei zui nghal daih a. A duh ang leh a thu anga min dah a tum chu a hlawhchham chiang ve hle turah ka ngai.








Ka phone ka phawrh a...ka hmet mawlh mawlh a. "Maduh....in awmna lai chu chiang deuhin lo sawi rawh....whatsapp ah khan min rawn hrilh mai rawh. Ka rawn kal dawn chiah e" tih mawlh mawlh pahin ka chhuak zui nghal hmak a.








"Awiiii...a....awwww....ka lo thawn ang che" Maduhi'n a rawn tih hnu chuan kan dahzui ta nghal a. Taxi ruak rawn tlan chu lo phar in ka chuang zui nghal a.








Phone ka en lai chuan Taxi driver, pa upa ve tawh lam chuan, "Khawilamah nge le?" a rawn ti vat a.









"Ka hre lo...tlan phawt rawh" ka ti ringawt a. Mak min ti ru viau ve mai thei bawk e. Message rawn ri ṭang chu ka bih nghal vat a. "Ka pu.... Mission Vengthlang ah aw..." ka ti zui sap a. "Aw le..." a rawn tih hnu chuan vawikhatmah kan inbe zui ta lem lo.








Maduhi nen chuan kan inbe pah zel a...harsa lutuk lovin kan inhmu thei ta nge nge e. "Aldrin-a i hrilh em? Vawiin zingah kan inbia a, Kolasib lama a kal tur thu a sawi a. Ka kal theih loh chhan te ka va hrilh luam aaa..." tih pahin Step chhuk zetah chuan min bir pui zui thla nghal a.








"Hrilh lo...." ti ringawtin ka chhâng a. Engmah dang a sawi bik tawh lo, kan inzui thla hnak hnak a.








In lian ve pangngai tak, a chhûng pawh nuam leh changkang takah min hruai lut ta tlat... A mak ka ti rilru nghal hle a, a nau te lehkhazir a chawm bawk a. A thawh hlawh lah eng teh ual a ni bik dawn lo tih pawh ka hrechiang viau bawk. Chuti chunga hetiang anga In ṭha leh nuam a luah thei hi a mak ka ti viau a, "Maduh...hei in va luah nuam em em....a kal thlakna a hahthlak deuh tih loh ah chuan a nuam hle mai" ka ti ta tawp rêng a.








"Nia....a nuam ani ve mai ang chu..." a lo ti liam puat a. "Thingpui in nghal ang...rilṭam a hun tawh" tih pahin a che zui nghal sawk sawk a.








"Cindy.....engmah i hrilhlo tak tak maw?" a rawn ti leh a.







"Engnge maw i buaipui em em le? Hrilh lo...hrilh lo..." tih hmak pahin ka nui hak hak a.







"Aaa....dawr hi a ngai pawimawh ve sia...han kal loh ngawt ka ti maw le" nui hul hak chuan a rawn ti ve leh a.








Ka phone rawn ri chu ka phawrh nghal vat a. Aldrin-a ngei a ni ta chiah e. "Aw..hello" ka ti nghal vat a.





"Dawr ah i awm lo em ni?" bung deuh
nghatin a rawn ti ta vat mai le..




"Aw...awm lo" ka ti lêt deuh nghat bawk a.




"Engmah min hrilh lawk si lova.." nui hul hak in a rawn ti zui a. A tira a rawn ṭawng bung deuh nghat ai chuan a aw ki a thlak leh hma phian lawi a.





"Ka peihlo a ni mai alawm..." ka aw ki ka ti nem duh bik ṭhak hrihlo. Hlauhthawn hmel zetin Maduhi chuan min lo melh hrak hrak a.





"Putea'n min rawn hrilh a..." a rawn ti nem diai a. Aldrin-a bawk chuan, "I ho em mai" min rawn tizui leh nghal a.





"Engnge a ni pawh chuan rawn call che a ngaihna? Amahin a duh leh nghak sela a ni mai alawm" ka ti zui leh hmak a.




"Thinrim kher angailo ania..ka rawn zawt ve hrim hrim che anih chu...ka rawn haw hunah kan sawi ṭha dawn nia" a ti leh mawlh mawlh a.




"Sawi ṭhat tur thil a awm ka hre love" tih nghat pah chuan ka tûm tiau a. Min rawn chhân hma chuan, "I duh leh i putea chu sawiṭhat pui rawh" ka ti zui leh hram a. Maduhi chuan a kut chuan min lo zâp a...a hmel ah chuan hlauhthawnna a khat ni berin ka hre nghe nghe.




Nuih hak pahin Aldrin-a chuan, "Anih phawt le....kei ai aiin ilo thinrim ta mah zawk sia..." a rawn ti deuh kher a. Ka ngaihtuah chian chuan a dik viau in ka hre bawk a. Ka nuih te a za hnuhnawh ang reng viau bawk.




"I rawn haw dawn tawh em? Engnge chanchin ni reng reng?" ka ti ta daih a.




"Rawn haw hman ṭep e...nakinah kan sawi dawn nia..ka dah phawt ange" a rawn tih hnu chuan kan inbiakna kan titawp zui a.








"Awi Lalcindy...i va han mawl tak...i hlau miahlo em ni?" min thlêk hâ chungin Maduhi chuan zawhna min lo pe vat a.







"Engnge? A ho e...a putea kha dawr ka ngahpui peih lo a ni ve mai a...ka thiamloh anih pawh ka hre nek love" ka ti zui nghal hmak a. "A ho lutuk...thil dang sawi ang?" ka tihzui nghal avang chuan a âng deuh zuau pawh chu a ṭhulh leh nghal a.







"Enteh ṭhiannu, chhûngte bula hetia han awm tawp ringawt chu a nawm lohna tam tak a awm ve a...inthlahrunna tur tam tak a awm bawk a. In luah hran ve mai te ka duh deuh rum rum asin" ka ti zui zat a.








Maduhi chuan thingpui min rawn pek pahin, "Nia...i sawi chu a dik khawp mai. Mahse, In luah hi a hautak ve khawp asin" a rawn ti zui a. Thingpui hmeh tur a rawn dahzui a, ka bula ṭhut pahin, "Keini hi kan vannei a, ka Patea te an nia..hetia hian luah man awm manglo in min luahtir theih hlauh a. Midangin luah sela chuan heng ang te chu chêng tam man a ni ngei anga" a rawn tizui siam siam a.








"Nia..." ka lo ti ringawt a. Ni e, kan luh tirh aṭang khan a mak ka ti ta reng a. Amah chiah thawkchhuaktu an awm a. A naute pahnih zirlai an ni bawk si. An In luah lah a man a tlawm zawk zawk dawn lo tih ka hmuthiam nghal mai a. Ka rilru chhe ru zet leh thikthu chhe lutuk dah lal lui in Aldrin-a nen hian an lo inkawp ru reng anga, heng In luah man te hi a tum sak vek anih ka ring kha ania.. Ka inthiamlo ru zui ang reng viau bawk a.








"Engkim lei ngai, In luah man ngai bawk, mamawh neuh neuh, kan chhût tel miahlo a lo awm ve reng bawk a. In luah hi a namai lo viau ania" a rawn ti leh mawlh mawlh a.








Thingpui chu ka lem khalh a, "A dik viau ang. Mahse, ngun taka ka ngaihtuah hian In luah hran ve mai a ṭha ka tia..." ka ti lui ve leh tlat bawk a.








"Nia...i dinhmun chu ka hrethiam alawm. Engpawh nise, kan zawng chhin dawn nia" Maduhi'n a rawn tih takah chuan ka thaw deuh huai in ka hria.








Thil hrang hrang kan sawi hnu chuan sana ka en zauh a. "Ṭhiannu...ka haw phawt ange. Hei, ka hre tawh alawm....ka rawn leng ziah dawn nia" nui sen sen chung chuan ka ti sap a.









Min nuih var var pahin Maduhi chuan, "Engnge maw i hmanhmawh le a? A la hma alawm.." a ti tak na a, a rûk takin min hne ru tawh ang tih chu ka hrethiam ve tho.








"Remchang hmasa berah ka rawn lêng leh dawn nia.." tih pahin ka tho zui nghal vat a, kawngka lam pan chuan ka kalzui nghal a.








"Anih...i tih tlat chuan le..." tih pahin min zui ve nghal zat bawk a. Maduhi te In chu ka chhuahsan zui ta nghal a.








In ka thlen chuan room lamah ka lut zui nghal a. Ka Khumah chuan ka ṭhu hnawk a, phone chu ka enkual nghal zung zung a. Putea call-a rawn thleng chiah e. Rang takin ka la nghal vat a. A ṭhianpa te In a chaw a ei tur thu a rawn sawi ka lawm bawk a, ka nui var var reng a. Kan inbiak tawp hnu pawhin ka khi sak sak reng a.









Zan Dar 8 a ri ṭep tihin Putea chu a rawn haw thleng a. A rui deuh tih chu a hmelah chuan a lang a, theihtawpin inthup a tum na a, a ṭawngkam a ṭang ringawt pawhin ka hai hauh si lo.









"Mate...vawiin lam i chau em?" tih pahin min rawn nuih sak a. TV melh zauh chung chuan, "Chau hran love.." tih zawngin ka chhâng a.









"I pitei pawh naktuka rawn haw chu a tum a. Rokhawlhna dang a awm lo turah ngai ila...." Putea chuan a tizui leh siam siam a.









"Ka mu dawn teh ang...ka hnung a kham riau mai" tih pahin ka tho zui nghal a. Rang takin Putea chuan, "Sertui kha i duh ve leh dawn em?" a rawn ti nghal vat a. Nui lui sak chungin, "Ka duhlo mai ange" tih pahin ka lut zui nghal a.









Khumah chuan ka mu nghal thlawp a. Aldrin-a chu biak ka duh..ka ngai tawh takzet bawk a. Ka phone chu ka hmet mawlh mawlh a, ka bengah ka ngaithla nghal vang vang bawk a. Vawi nga lai ka tihnawn hnu pawha min chhân theih loh avang chuan thinrim ru zetin ka phone chu ka hmet leh mawlh mawlh a. Maduhi pawhin ka beih ngial pawhin a la thei chuang lo. Lungawilo zetin ka phone chu ka thlêk vang vang a. Sana ka en leh a, an mut ka la ring ther tê lo bawk si.









Ka naupan lai chuan ka nu hian 'I pa i va chhûn fuh tak..i pa ang mai rilru lian leh lutuk mai' min ti ṭhin a. Ka tih tawh lohna lamah chuan suttlang harsa ve fat ka ni ṭhin. Tunah pawh engkim hi palzam mai duhlohna lian tak ka nei bawk a. Ka hmaa harsatna rawn thleng thei te ka ngaihtuah kual a, kil tin aṭangin thil thleng thei zawng zawng ka ngaihtuah kual hnu pawhin harsatna ka tawh tawh te ngaihtuah chuan eng hasatna lian tham mah thleng thei leh chuangin ka hre hek lo.









Room kawngkhar rawn kik dat dat pahin Putea chuan, "Mate...lo hawng lawk mai teh. Thil han zawh lawk che ka va duh em..." a rawn ti dât dât a.








Ka tho vat a, room kawngkhar hawn pahin, "Eng thil nge ni?" ka ti nghal vat a.








"Chutia sawi nghal puat theih pawh a nilo..." tih pahin min kalpel zui nghal a. Ka khumah chuan ṭhut pahin, "Englo ania...ka Whatsapp group pakhatah hian min removed daih mai a. Engtinnge ka luh leh theih ang? Ka group luh tamna ber a ni bawk sia..." a ti nghal mawlh mawlh a. A phone chu a thai kual mawlh mawlh a.







A bula ṭhut pah chuan, "Ka va hre mai lo e...chumi group ami te chu hmelhriat, an number neih i neih chuan in Add ṭhat tir turin ti la...? Mahse, ka risk..." tih pah chuan ka nui sak a.








"Englo ania...group nuam deuh maw le. A hma chuan Kohhran chungchang sawi nan te kan hmang ṭhin a. Hman deuh lawk khan an rawn thlak a. Nupa nun chungchang te, Sex kaihhnawih thil, inzirtirna ṭha chungchang kan sawiho ṭhin a. Zanin khan Chaltlang lama Video leakout chungchang kha kan sawiho a...ka lo ṭawng na deuh nge ni min removed daih alawm" a ti leh mawlh mawlh a. Engtinmah ka chhâng lo...ngawi rengin a phone hmehkual kawi vel chu ka en ngar thung a.








Putea bawk chuan, "A ho em alawm... ngaihdan ka sawi ve a ni mai a. Englo ania, Chaltlang rawlthar pakhat leh a Nutei an tia...Sex pawh an hmang chuang lo. An in play ringawt maw le.. Chumi chu an rawn zawhna thupui ah chuan 'Sual a ni em?' tih zawng ania...rindan an sawi a, keipawhin ka sawi ve a ni mai a..." lungawi loh hmel zetin a sawi zui nuah nuah a.








Putea bawk chuan, "Nang engnge i ngaihdan ve hrim hrim?" tih pahin min rawn melh zauh a. "Ngaihdan ka neih pawh ka hrelo e a..."ka ti ringawt a.









Putea bawk chuan aw zângkhai vah hian, "Englo ania...a awmzia berah chuan..." a ti leh nghut a, a ngawi zui dat a. Chil lem rîk khulh pahin, "Nang leh kei hi kan lo awmdun ta a... Kan in kiss a, kan inkhâl vel a... Mahse, Sex chu kan hmang ta miahlo a ni. Chu chu sual niin i ngai em?" a rawn ti zui leh a.









Ka ngawi vang vang a. "Mipat hmeichhiatna an hman loh ber te chuan Sual a ni ngawt dawn em ni?" ka ti ve sap a.








Rang takin Putea chuan, "Chu chu alawm..
Keipawh sual a nihna ka hre lova. Mahse, an ṭan lohna lamah ka ṭan nat em vang nge min removed hmak a..." a rawn ti leh vat a. Min rawn hnaih hrat pahin ka dârah a rawn kuah a, "I thiamlo tak tak maw?" a rawn ti leh vat a.








"Khawi maw..." tih pahin ka tho zui nghal a. Kalsawn ka tum chu ka bânah min rawn man chat a. "Mate...lo ṭhu leh lawk teh" tih pahin min pawt a, kei lah ka lo inring lutuk silo chu min pawt ṭhu hnawk a.









Rang taka min rawn kuah pahin, "Mate...tumahin an hre dawn hlei nem...in play ringawt te chu a sual hran lo eeee..." a rawn ti ta chat e. A tir aṭang khan chhuanlam fahrah siamin min rawn hawntir tih ka hrethiam chiang ta hle mai.








Thawh tumin ṭan ka la a, ani lahin min kuah nghet salh bawk a. "Mate....ṭang ṭung bik lo la.... Sex hmanpui che ka tum miahlo ania.." a rawn ti su su a...a lam hnaihah min pawm nghet salh bawk a.








Ka tha tawpin ka nem a, "Pute...i va zak theilo tak...eng angah nge min ngaih a? Chubakah....i thisen zawmpui tak tak ka nih hi..." ṭah aw lek lekin ka ti mawlh mawlh bawk a.








Ka biangah chuan a biangin a rawn nâwk a. "Mate...zanin chiah...ka mamawh takzet che..." a rawn ti leh su su chu ka insiamrem hrat a. A hmaiah chuan ka ṭham a, ka sik nawk nawk bawk a. A tha a thlah lai chu remchangah la in a hmaiah chuan ka bêng ta sawk a, ka mittui a rawn luang nghal zawih zawih bawk a. Room aṭanga tlanchhuah tum chuan ka tho zui nghal a.









Chutah min rawn man in min phih lêt sawk a. Khum bulah chuan ka tlu phei thlawrh a. Rang takin ka tho leh nghal a. Mahse, engtinmah min rawn tizui lo...a hmai ka hamna vel chu a thi ser ser hlawm a. Sî hlap hlap chungin a khawih kual den den a. Chhuat aṭang chuan Khum lamah ka ṭhu kai nghal a. Ka taksa khûr hlawk hlawk chuan ṭanpuitu ka mamawh zia a pholang chiang ber awm e.









A hmai pilh lai dap neuh neuh chung chuan min rawn melh kal a. Thinrim tih hriat zeta aw khûr deuh hlak hlak chung chuan, "Nangma zirloh hmasak anih hi... Nizanah pawh i rûm sî hlawrh hlawrh a. I thâwm hre pha reng tan chuan beisei mai che awl deuh asin" a rawn ti hmawrh hmawrh a. Chu a ṭawngkam dêngkhâwng lutuk chuan min ti na zual sauh bawk a.









A phone a hmet nuap nuap a...min rawn kal hnaih a. "Hei...enrawh...nizana i khawsak dan anih hi" tih pahin ka hmai zawnah chuan a phone chu a rawn lek a. Karei...keimah ngei ka ni si.. Saruak ngal ngatin ka mu a...ka mu dawrh em em leh nghal a. Ka kut veilamin ka hnute ka hûm a, ka kut dinglamin ka serh ka khawih mek bawk a... Karei...ka duh theilo...









"Khawi...delete rawh..." tih pahin ka ban a. Rang takin a tawlhsawn nghal a. "Khawngaih takin...." ka va mangang tak em... Mahse, min khawngaihna mitmeng aiin mihur mitmeng in min la chhâwn reng a. Min it tih hriat zetin min melhkual zuk zuk bawk a.








"Thawm i chhuah nasa sia...ka rawn au harh mai ang che ka tia...room i lo khar bawk silo...ka rawn lut a.." tih a sawi mek lai chuan, "Khawngaihin duhtawk rawh...khawngaih takin Thlalak kha delete teh.." ka ti mawlh mawlh a.









Ka bulah a rawn kal hnai a..."Duhtawka nuamin ka siam ang che Mateeee.... Mahni a inkhalh ngai lovin..chuan, chumi zawhah nangmah ngeiin i delete dawn nia..." a rawn ti su su a.








Ka ngawi reng a...ka rilru hian vawikhat pawh ka ṭawngṭai chhin ngai tawhlo. Mahse, engmah beisei dang ka nei tawh silo. "Lalpa...min ṭanpui hram rawh..." ka ti mawlh mawlh a.









Putea phone chu a rawn ri a. Rang takin a en vat a..."I pitei anih hi...lo bengchheng suh ang che..." tih pahin "Hello" a ti nghal vat a. Ka mittui hru hul nghal sawk sawk chu min en reng a. Thawm ka neih mai a hlau ru deuh nge, a chhuak nghal vat a. An room lamah hmanhmawh zetin a lut zui nghal a.








"Hmanhmawh rawh..." min ti awm mai hian ka hria a. Hmanhmawh zetin ka Bag ka la a, ka hak thlak ka khung mawp mawp a. Thawm dim ngai si...hmanhmawhthlak bawk si...ka rilru a hmanhmawh ang aiin ka che zung zung thei bawk silo. Ka thin a phu dup dup bawk a. Thawm dim leh hmanhmawh ru deuh siin ka room chu ka chhuahsan nghal a.








Putea chu an room lamah a la ṭawng lûng lûng a. Ka ke pen ri a hria ang tih hlau zetin ka pên ṭhâm ṭhâm a. Dim zetin kawngka kalhna chu ka hawng a. Hmanhmawh si, thawm dîm ta siin ka chhuak a. Pan tur ber pawh hre hrih chuang lovin ka kal zui nghal hlawk hlawk a.







(to be continue.......)




(A hnuaia milem khu min lo click sak ve hram la aw...ka lawm veng veng viau ang..👇🏻👇🏻👇🏻)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)