TRAITOR CHAPTER 51

Episode kal lai dah luhna

Moderator: writers

Emery B.Vanchhawng
Posts: 72
Joined: October 5th, 2021, 4:42 pm

TRAITOR CHAPTER 51

Unread post by Emery B.Vanchhawng » January 14th, 2022, 11:59 pm

TRAITOR
CHAPTER 51

☆☆☆☆☆☆☆

****ZÊPLOH CHUAN NIZAN KHAN A MOOD AH KA CHENG THLAWT LOVA,RAWN DAHLOH MAI KA TUM HIAL A,KA RAWN SAWI HMAN TEP. MAHSE,COMMENTS KA EN KHAN INLO NGHAKHLEL VE BAWK NEN,A LAWMAWM EM A. KHATIA HAN DAHLOH NGAWT CHU TIIN KA RAWN DAH LEH RÂWIH MAI ANIH KHA😂😂😂 ZANIN CHU TLEMIN A MOOD AH KA AWM VE TA,THANKS TO YOU😘😘😘****

SARAH POV:

"Duhtawk teh u,eng nge in inhnial ve vak?" Tiin ka nu leh Lalrinnungi te inkhak reng chu ka vîn țhat a.

"Nutei hian min pui lo se chuan khatiang rilru kha ka pu bik lovang" tih pahin Lalrinnungi chuan ka nu chu a melh râwm râwm a.
"I zaklo ka ti emai,aia upate zahna pawh i neilo,i chhungte tuithlâr inih pawh hi âwm ka ti ta" ka nu chuan ati ve salh bawk.

Eng nge an buaina chiah ka hrelo,ka nu hmu tura ka kal chuan anlo inhau vak vak a,kut anlo inthlak lo chauh.

Lalmawizuala lah chu annu te inah ava bet reng a,a zah pawh hi a zaklo em maw ni. Khati khawp khan a nupui a tina a,vawitam hun pe a,inchhîr ngawih ngawih a nung ve phawt turin ka hrilh ngun lutuk. Mahse,a luhlul em em lutuk vang hian kan thusawi engmah a ngaithla tawhlo.

A nupui rilru lian turu lutuk saw ava chhaih kawlh mai mai a ni. Nû-i rilru ang te saw chu keimah ang chiah ania,keipawh amah ang chiah sawn ka luhlul ve tho. Ka nu pawh hian min khak ngamloh chang a nei reng,mahse chumi avanga chhungte'n an hauh ngamloh an tih ang kha ka ni chuanglo. A hunah chuan min hau ve thin tho.

Lalmawizuala'n a nupui atih ang hian ka pasal hian min han ti ve nâ se chuan Nû-i ai hian ka nasa fe ang,Naute a hmuh ala phal te hi ka fak thlawt. Keichu ni ila ka neih tirh khan ka tlânbo pui vang vang duh ang.

Kan Lalmawizuala em em hi chu a hahthlak anih hi,kallo tura ka tih pawhin a kal lui țalh a,heti khawpa ngai leh tur si chuan ka vau ka vau lai khan ngaihthlak tur ania.

Thudik kan hriat hma deuh khan Mapuii nen bazarah kan inhmu fuh a,a tîr chuan biak pawh ka be tui vaklo. Mahse,Lalrinnungi chungchang a sawi thuak khan rinhlelhna ka nei țan a,ka zawhchian lah khan a sawi țha duh si lo.

Lalmawizuala pawh vawitam ka hrilh a,a ngen in ka ngên hial bawk. Lalrinnungi ring vaklo turin ka hrilh thin a. Mahse le,a khertu nu hi tudang a nilo,amah,Lalmawizuala chaklohna leh a chakna thuruk hrechiangtu ani tlat. Ka nau chaklohna chu remchangah la in a ngên ah tak a chhun fuh a,a rei telh telh a,a hliam tuam damtu awm ta lo chu henu hian a tihnat belh zel anih hi.

Lalmawizuala lah ka nu in alo fuih ve ting tang thin bawk nen,engkim kha a buai kual vel vek anih hi.

"Lalrinnung,haw teh,rawn kal sek pawh angai tawhlo. Nangmah vanga chhungkua kan kehdarh nasat zia en hi chuan i hmel ka hmuh ngawt te hian ben hrep che ka châk ania" tih paha ka va pawh chuan alo țang ve nasa.

"Ka nu" inchhung khâwk rum rum khawpa rawn titu chu kan melh nghal dâwrh a.
"Mawizual,i rui ami?" Tih paha ka va pan chuan min su her sawk pahin ka nu te lam chu ava pan a.

"Nangmah vang hian maw,nangni vang vek hian kumkhua atan ka chân tawh asin" tiin ka nu chu a aukhum vak a.
"Bawiha,min ngaidam rawh" ka nu in alo tih chuan Lalmawizuala chuan kut thlak mai a châk hmel tawh lutuk.

"Eng nge ani khan tihsual a neih. Vawitam nangni pahnih hian tihnat in tum a,ka dang zel che u a. Mahse,ka hnunglam atanga min beiin ka nun in tichhe vek anih hi" tih pahin bang chu a hnek țhuai a.

"Gordon,duhtawk rawh" Lalrinnungi'n alo tih chuan ka pawt lawp a.
"Lo ngawi hmak rawh" ka tih chuan Gordon chu a melh zeuh zeuh a,a hlau deuh tawh tih ka hre mai.

"In hria em,ka theihtawp chhuaha neih lêt ka tum chung pawhin min la hnungchhawn sin. Kei mipa tan hian a harsa ve tho. Nangni awmngaihna hrelo thiltih vangin maw ka nupui leh ka fanu kha ka chân a,ka nei lêt lehlo anih chuan ka that ang che u" tih paha ka nu a nem sawk chuan ka lo inrawlh vat a.

"Khatin nu te anti ngailo,inbeng dai rawh" ka lo tih chuan rum lutuk in min melh a.
"I hria a ni law'm ni,nangpawhin hemi te ringlo tura min tih kha,mahse,ka lo â em a ni. Min pe lêt leh rawh u,ka fanu leh ka nupui kha" tih pahin ka nu chu ava pan leh a.

"I hria em ka nu,lung Doctor ka zirlai khan tiang hi ka tawng dawn tih hria ila chuan kan hotute kha thinlung hliam damdawi ka zawt ngei ang. Mahse,tunah chuan eng ang pawhin thiam mah ila ka theilo. Anâ asin,helai hi ana ngut ngut,ka nupui nui hmel phena lungngaihna ka hmuh apiang sawn helai hi ana asin" tih pahin bangah chuan a kut a nghat a.

"Gordon,ka thiltih te kha i tana ka tih asin. Keichuan ka țhen ve ngailo ang che,khawngaihin" tih paha Lalrinnungi'n ava pan chuan Lalmawizuala thinrim lehzual hlauvin ka pan vat a. Mahse,ka tlai hret.

"Ngawi hmak rawh" tih hrâwk pahin Lalrinnungi hrawkah chuan a rêk chawt a. Bang a nawr bet nghal chawt bawk.

"Nanghi ka nei ang che maw? Sawi rawh" tih pahin a aia na chuan a nawr bet leh chawt a.
"Thlah rawh,a thaw theilo ania" tih paha kan lo pawh chuan ala thlah duh chuanglo.

"Min thlah rawh" tih pahin Lalrinnungi chuan thei leh thei lovin alo ban ve bawk.
"Nangni Ramhuai vang hian kan tuar a maw?" Tih tuarh pahin Lalrinnungi a thlah hnawk a,chhuatah chuan a paih țhuai bawk.

"Kal rawh,haw la va mu rawh" tih paha ka nawr chuan alo țang deuh țung a.
"Ka sawi lo vem ni,innu hi hmeichhia a zawnga luhlul ber ka tih kha. A thinrimna iva belhchhan mai mai,nghak rawh ka tih ka tih kha" tih pahin ka nawr chawt chawt a.

"Ka theilo anih hi" ati hrâwk a.
"Thei mai rawh,engmah tihtheih i neilo" ka tih chuan Lalrinnungi chu ava melh leh run a.

"Henu hi ka nunah rawn lang ve lo se chuan" tih pahin a ding dat a.
"I hmel ka hmu leh anih chuan ka that duh tawh ang che" tih hluk pahin a inher a.

"Khawnge kal ila tum?" Tih pahin a chahbi chu ka va chhuh.
"Min pe rawh" tih pahin a rawn ban leh
"Khawnge kal i tum sawi phawt rawh" tih pahin chahbi chu ka hnunglamah ka keng daih a.

"Ka nupui te inah" atih hluk chuan beidawng deuhin ka lo en a.
"Harhchhuak teh,nawr tawh suh ka tih che kha. Innu saw a dawhthei ka ti zawk ngawt mai,ka pasal chu ni la min hmu tawh lo chai chai ang chu" ka tih lai chuan ka nu leh Lalrinnungi an rawn chhuak ve a. Lalrinnungi chu a mittui ala tla phung a,a insût feih feih bawk.

"Bawiha chhuak tawh suh" ka nu in alo tih ve leh chuan ava melh hrâwk a.
"Engmah lo sawi ve suh u" tih pahin Lalrinnungi țawng tum zuau chu ka va khap vat a,Gordon hian a khawih leh anih ngat chuan ka chhan tawhlo ang.

"Va haw phei rawh,mut i mamawh,khawiah mah kal tawh suh" ka tih chuan ka kuta chahbi chu a rawn phih thla thut a.
"Lalmawizual" ka tih tuarh chuan a hmui tuai thuak pahin a motor lam chu a pan leh a.

"Eng emaw ti teh,a chesual mai ang" ka nu in mangan hmel deuha alo tih chuan ka melh kual hlawm tawp a,tihngaina pawh hi ka hre sêng tawh love.

"Gordon,chhuak tawh suh" Lalrinnungi'n alo tih ve leh chuan rum lutuk in ka melh hrâwk a,henu țawng theih dan hi chu
"Lo țawng ve suh ka tih che kha" ka tih chuan Gordon lam ala pan phei țalh a.

"Kal suh" tih paha Lalmawizuala ava pawh chuan Lalrinnungi mawl zia ka hrechhuak nawn awn awn mai.

"Min zui duh tiraw,ka kalna apiangah kal i duh em?" Lalmawizuala'n alo tih chuan ka pan phei vat a.
"A țullo lutuk,haw r'u" ka tih vak chuan Lalmawizuala chuan Lalrinnungi bânah chuan a pawt lawp a.

"I awmna hmun tur i hrelo anih hi,ka hruai khawp ang che" atih chuan Lalrinnungi chuan a hlauh hmel tawh deuh.
"Khaw khawnge min kalpui i tum?" Atih bah nawk chuan Lalmawizuala chuan seat ah a țhuttir chawrh a,
"Hremhmunah" tih pahin kawngka a khar nghal țhuai bawk.

"Kal suh,a țullo emai. In chesual palh ang" tih paha ka lo pawh chuan ka kut vai thuak pahin
"Misual 2 hremhmunah kan kal anga,a dik mai ang" tih hluk pahin Car ah a lût ve nghal.

Lalrinnungi chuan glass rawn ben pahin mittui tla purin min ko lawm lawm a.
"Min pui rawh" atih chu a hmui phun atangin ka hre thei. Abak chu engmah ka hre thei tawhlo.

Lalmawizuala chuan Car chu chak lutuk mai hian a ving chhuah pui zawk a.
"Va zui vat rawh,an chesual palh ang" tia ka nu in min rawn ben chuan ka harhchhuak zawk a.

Ngawi teh,Lalmawizuala kha,eng nge a sawi kha? Hremhmun maw,chu chu,nilo. Ani khan Lalrinnungi nen thih a tum tih a sawina a ni mai ang em.

Hmanhmawh lutuk in ka nu te garage lam ka pan a. Remsanga ka be nghal bawk.
"Emergency,Lalmawizuala'n Lalrinnungi a phur chhuak a" tih pahin ka inkhalh chhuak ve a.

"An inphur ziah alawm,an leng dawn niang" alo tih ham ham chuan
"Mawla,i țhianpa kha a rui deuha,a thinrim bawk. Lalrinnungi hnenah khan hremhmuna an kal duh tur thu a sawi bawk a. Ka ngaih a țhalo ania" tih pahin keipawh chak deuhin ka tlan chhuak a.

"Ehe,ava țhalo ve. Kawnge an pan?" Tih pahin a ri nghal rawk rawk a.
"An la thleng thui lovang,Durtlang lamah lokal la,nangin anlo chhuk lam ilo dan theih chuan a țha a nimai,a Car kha lo enchiang la" tih pahin ka hmaa Car ho chu horn ka pe tuarh tuarh a.

"Aw le,ka rawn kal nghal. Lo mangang lo la" tih pahin a dah nghal a. Nû-i biak ka tum a,ala thei bawk silo. A Upuia ka call ta ngawt a.

Buaina an neih leh neihloh ka zawh chuan engmah a hriatpui loh thu alo sawi bawk si. Ka nu a vin hrep thu leh Lalrinnungi kut a rawn thlak thu ka hrilh chuan alo zawh fiah tur thu a sawi nghal a.

Kawng fâl deuh ka thlen chuan Lalmawizuala Car chu ka nang ta a,a tlân chak em em mai bawk si. Horn pe tuarh tuarh in ka au vak vak a.

Lalrinnungi țe vak vak thâwm ka hre thei bawk.
"Gordon,motor tiding rawh" tia ka au vak vak pawh chuan an tlân dan ngaiin anla tlân char char tho.

Kawng pêng chhaklam atang chuan Truck lian tak mai hi alo chhuk ri ruai ruai a,a thil phurh a rit tih hriat takin a ke pawh a chîk țhawt țhawt thei. Truck hi a len tham vangin zan lamah bungrua an thiar mai thin. Mahse,tunah hian Lalmawizuala sawn Truck a hmulo nge,a tlân tlang char char.

'Lalmawizual,ding rawh' tih sep pahin ka speed chu ka sân zual sauh a. Chutah,Lalmawizuala Car leh Truck chu an rawn lang rual ta chiah,kawng kâwiah chuan ka ding ta tawp a.

Lalmawizuala chuan Truck chu en chhovin a nui suk a,Lalrinnungi'n alo ban vak vak tih pawh ka hmu thei riai ruai. Lalmawizuala saw duh chuan a tlân tlang thei a,mahse Truck lo thleng tur hmu thut ang maiin a dawk zawk a,
"Nilo" ka tih tuarh chuan khâmah an tlân liam ta vawng vawng mai.

"Gordon" tih vak vak pahin kawng thlang lam pan chuan ka tlan thla hlawk hlawk a. Truck lo chhuk leh motor dang kan thawm hre pha ho pawh anlo ding nghal bawk.

"Nilo,ka nau te annih khu,chhan vat rawh u" tih paha kal ka tum chuan min lo pawt ber vat a.
"Ka pi,a nâl lutuk,i chesual ang. Police leh Ambulance phone vat ta che u" antih chuan chhuatah ka țhu hnawk a.

"Aw,Durtlang khâmah Car pakhat a tlan liam a,lokal vat rawh u" antih te chu ka hre riai ruai a.. Mihring țawng ri leh motor ri chuan ka beng a luah khat vek a.

"An dam zo lo maithei a ni,an tlakna a sâng emai" tihte
"A tlan tlang nghal dawn emaw kan tia,khâm lamah khan a kual zuk a" Truck khalhtu in atih te chuan mi â ang maiin ka nau te tlan liamna lam chu ka thlîr ngawih ngawih a,kha ai khan tlanchak deuh ila chuan ka nang hman ang. Mahse,ka pum chhunga naute insiam mek hi ka hlauhthawn pui bawk si khan ka duh aiin ka khalh chak ngamlo a ni.

Engtin nge ka tih ang,ka pa bulah ka nau țha taka enkawl turin ka intiam a,an nupa an inneih leh ngei theih nan ka tiam bawk asin. Lalmawizuala kha a thi theilo,nilo,a thi tur a nilo.

"Sarah" anlo tih ri ah chuan ka hawichhuak vat a.
"An rawn khâi chhuak țep ang,lungngai suh" tih pahin Remsanga chuan puan pantê hi min rawn pe a.

"Engtin nge kan tih ang,Lalmawizuala kha,a duh vang rengin a tlân liam asin" ka tih lai chuan ka pasal leh kan chhungte anlo thleng chawp chilh mai a.

"I țha em?" Tih pahin ka pasal chuan min rawn kuah vat a.
"Țha lo,ka hmuh laiin an tlanliam ania" ka tih chuan ka mittui alo luang zawih zawih a.

"Le,tho phawt la. A țha leh vek mai ang" tih pahin min pawm thova.


"An rawn pawt chho thei e" antih ri ah chuan ka tho zawk a. Ka pasal chuan min lo kuah vat bawk.

"An țha em,mipa kha eng nge a an?" Tih paha ka va bawh deuh rawk rawk chuan min lo dang vat a.

"A mar kan hmulo" tia an rawn au lâwng lâwng chuan ka tlan phei pawp pawp a.
"Khawnge ka nau kha. A mar in hmulo maw?" Tih pahin ka țhu hnawk a.

"Tu zawk hi nge i nau kan hrelo,an marphu ala awm che che a,damdawiin kan thlenpui vat angai" antih chuan ka tho leh vat a.

"Gordon" tih pahin puana mihring an tuam hnan chu ka va tawk bawrh bawrh a.
"Ka pi,lo awmsawn deuh rawh" antih pawh chuan Gordon kut chu ka chelh tlat tho.

"I thi theilo ania aw,i nupui leh i fanu tan ilo harh leh angai" tih pahin ka nau,mithi ang maia mu reng chu ka sâwi nawk nawk a. A hmai te chu thisen in a bual khat vek bawk,hrechiang hle lo ila chuan tunge anih pawh ka hre lovang.


NÛPUII POV:

"I țha em?" Damdawiin kan thlen chuan anlo ti vat a.
"Țha e" tih sap pahin ka lût nghal a,ka hnungah Sawmtei leh Upuia chuan min lo zui ve bawk.

"USarah" ka va tih chuan mittui tla phungin min rawn pan phei a.
"Nû-i,engtin nge kan tih ang?" Atih chuan tuna thilthleng te hi intihderna mai a ni tawhlo tih ka hrechiang ve chiah.

"Kawnge an awm a?" Aw khûr der der a ka tih chuan
"In zaina pindan ah" tih pahin a kâwk vâ a, a kut ah te chuan thinsen a kai nuaih bawk.

Lalrinnungi chhungte leh Gordon te lam pawh anlo țhu țhap a,ka nu chu shawl sin in alo țap feih feih bawk.

"Engtin nge an chesual thei zawk,tinge Lalrinnungi nen an chhuah?" Ka tih chuan a mittui a hru leh phawt a.

"A rawn haw kha kan inhau hlawm a,rawn pan leh a tum lai che khan Lalrinnungi alo țawng ve bawk nen 'Hremhmunah kan kal dun ang. Misual 2 awmlo inla a dik a nimai' atia,ka ûm zui vat a. Mahse,ka hmuh lai rengin a tlânliam ta anih kha" atih chuan ka la thaw em pawh ka hre tawhlo.

"Anih chuan" tih pahin ka tawlh hnung dat a.
Kan thusawi te kha ka ngaihtuah chhuak zawk a.
'Thi rawh intihna tlukah ka ngai' atih lai ka ngaihtuah phei chuan ka â thei mai dawn in ka hria.

"Nanghi" tih pahin tu emaw hian min rawn pawt lawp a. Ka en chuan Lalremsanga alo ni.
"Thlah nghal rawh" UPuia'n alo tih hrâwk chuan min vawnna chu a thlah nawk a.

"Nangmah vanga ka țhianpa in a tuar anih chuan i châklo ang" atih khur khur chuan rum lutuk in ka melh a.
"A tihsual zêp pui reng lo ula chuan tun dinhmun hi kan thleng lovang" ka tih ve hmak chuan a meng buai nak a.

Engmah sawi tawhlo chuan a kal leh ta daih. Lalmawizuala te chu darkhat vel zet kan nghak țhap a. USarah chu min kuah pahin a țap deuh reng bawk.

Doctor ho anlo chhuah chuan kan lo ding suau a.
"Doctor, ka fapa te chu eng nge an an?" Ka nu in alo tih vat chuan Doctor chhanna tur chu kan nghak țhap a.

"Pu Gordon zawk kha chuan a lu a sawh deuh a,mahse hlauhawm lutuk a awmlo. Mahse,a rawn harhchhuah hunah biak dan in thiam dawn nia" ati sup a.

"Anih,hmeichhia zawk kha" Lalrinnungi pa in alo tih chuan Doctor chu a kun lap a.
"Inlo thlen khan an mar a phu țha tawhlo hrim hrim a. Mahse,Pathian vang liau liau in an 2 in kan chhan thei a,an tlakna ngaihtuah chuan an țha zawk khawp e. Pu Gordon phei kha chu thil mak a ni tawp" a han ti leh duah a.

"Hmeichhia zawk kha sawi vat ta che" Lalrinnungi nu chuan alo ti hlar a,tuithlâr tawh mah se a fanu ala ni ve tlat a. Eng ang pawhin sual mah se nunna chan hlauhawm a a awm chiah chuan an mangang leh hle a ni.

"Kha kha maw" tih pahin Nurse ho chuan min melh kual hrek hrek a.
"Kha pawh kha a țha a. Mahse,motor khan a delh a,chutah chuan a ke kha a chhilh na deuh nge,alo harh hunah pawh a ke a hman theihloh kan hlauh pui khawp mai che u" antih leh chuan Lalrinnungi nu chu a mittui alo baw zawih a.

"Naktukah chuan anlo harh hman kan ring e,hlauthawng lo ula" tih pahin Doctor te chu an kal ta a. An liam chiah tihah Ka nu leh Lalrinnungi nu chu ri meuh hian an țap vak vak a. Midangin anlo hnem vat bawk.

Keini chuan tihtheih kan neih chuanloh vangin min haw luihtir hlawm a. Rilru lo hah ve viau mah se in lama lo țawngtai chauh tihtheih kan nei hrih.

In kan thlen chuan tumah be tawh lovin pindan ka pan tlang nghal tawp a. Bawihtei chu ka nu te pindan lamah a awm hrih,zanin chuan riak tlang mah se a pawi tawhlo ang.


Ka intihfai zawh chuan khumah ka bawk thlawp a. Vawiin khan ka hriatchhuah tak chu,Gordon hi haw hle mah ila,chân tur anga kan inchan meuh chuan ka theihloh tur zia a ni. Mahse,chumi avang chuan ka rilr2i zawng zawng ka thlak tihna pawh a ni chuanglo.

Ka mut hma chuan ka thinlung zawng zawngin Gordon tan ka țawngtai a,ka sual em vang hi nge Lalrinnungi tan chuan ka la dil thei țhaklo. Ka naute min thah sak a,kan chhungkua min tih kehdarh saktu anih vang hian a lakah rilru țha ka la pu theilo.
.
.
A tukah chuan Bawihtei paw chungin damdawiin lam kan pan leh a. Kan thlen pawh chuan alo la harh chuanglo. USarah te nen chuan inbia in eng eng emaw kan sawi a.
Midang pawh an awm ve nual,mahse han biak kual vak mood ah pawh ka chêng lova,anni pawh biak an chakawm em em loh.

"Kan haw phawt mai ang,alo harh hunah min lo hrilh ula" tih pahin Gordon mutna lam chu ka melh zeuh a,Bawihtei ka paw bawk.

Diktak chuan hetia a awm te hi ka khawngaih lutuk,alo harh leh theih nan engkim tih pawh ka inhuam ang. Mahse,chumi vanga engkim theihghilh nghal rum rum chu ka tan pawh hian a harsa ve thova. Amah hi rawn harh phawt se,thil awmdan te en ila,kan boruak a zir in ka ngaihsak in ka ngaihsak lovang. Engmah hrelova a mu hmel te hi ka en țha duhlo,ka lainat vang hian ka țahkhum vak mai ka hlau a. Chuvang chuan midang awmlai pawhin ka ngaihsak vak ngamloh phah a ni.

"Thlah in ngai em?" Anlo tih sap sap chuan a ngaihloh thu ka sawi vat a. Kan chhuak tur kawngkhar kan hawng chiah
"Bawihte" rawn tih sup ri vang chuan ka ding dat a.

"Bawiha,ilo harh tawh maw. Ka lawm lutuk,awi ka va lawm ve" ka nu te chuan anlo ti nghal chûl a. Ka hnunga ka puak mek ka fanu hian apa ava hmu fuh nge.
"Pa" tih pahin a tâl hret a.

"Kal suh u" a rawn tih leh vang chuan kawngkhar chu ka pawt phui leh a. Gordon lam ka va en chuan mit meng dul lapin min lo melh reng a.

Va pan chhat chhat in Bawihtei chu ka hma thlak vat a.
Chulai chuan Doctor ho anlo lût bawk. Doctor ten an han en vel vang chuan kan lo kal kiang deuh a. An hriatloh hlana chhuah mai ka tum chuan
"Kal suh" Lalmawizuala bawk chuan a rawn ti leh sup a.

"La kallo mai rawh" USarah-i pawh chuan alo ti ve bawk.
Doctor ho an chhuak a,chhungte ho chuan hauh mawlh mawlh pahin an lawmzia an sawi châm chî bawk a. Mahse,midangin an biak lai pawh chuan Lalmawizuala chuan kan nufa chauh chu a ni min en ngar ngar.

"Va inbe rawh u" tih pahin USarah chu a chhuak daih a,midang pawh chuan an zui chhuak ve nghal diak a.

Lalmawizuala lam ka va en chuan a nghâwng an charna nen thei leh theilovin min melh țawk țawk a.
"I țha tawh maw?" Tih paha ka va kal hnaih chuan thaw ham ham pahin a mit alo chhîng duar duar a.

"Kum 1 hnuah min ngaihtuah ka hriat lehna hmasa ber" tih pahin min melh ngur a,awmdan ka thiamloh em vang chuan Bawihtei chu pawm in apa chu ka en tir a.
A fanu chu en in eng eng emaw ni a sawi sup sup a.

La tho chhuak theilo mah se a bulah Bawihtei chu ka țhuttir ve a,ani pawh chuan apa chu a damlo tih a hre ve reuh emaw ni,a che vak vak lova,thuawih deuh chuan a țhu ve hle hle.

Bawihtei bula a awm chhung zawng pawhin Lalmawizuala chuan ka lak atangin a mit a lasawn eih lo.

"Haw mai kan duh tawh" ka tih chuan a kut alo phar thut a,na ati deuh nge țhen sawk pahin a dah leh rih a.
"Indîm rawh,i rawn harh chauh kha" ka tih chuan mitmeng danglam zet hian min melh a.

"Naktukah ilo kal leh dawn em?" Atih sup chuan ka melh zawk a,mahse en rei lovin ka hawisawn leh vat.
"Ka hrelo,i duh leh Bawihtei chu UPuia ten anlo hruai ang" ka tih chuan a thaw hawk a.

"Engmah ala danglam chuanglo" ati ringawt a.
"Ila ngai reng anih hi,tiang a ni dawn tih hriat a,kha aia na khan kan lo insawh lova" atih chuan thinrim takin
"Nunna hi infiamna chi a nihloh hi. I nun kha a hlu lutuk asin,Pathian in duh taka a siam chu mihring 1 vang maia tihtawp tum tur a ni hleinem" ka ti a. Amah ka ngei lam pawh a ni chiah tawhlo,a awmdan hian ka thin a tirim zawk.

"Ka nun chhan chu ka thih ka châk chhan lo ni ta si se" atih sup chuan lehlam hawi zawngin ka ding daih a. Bawihtei chu ka pawm lawk a,ka hma thlak nghal hmiah.

"Thinrim suh" atih leh chuan
"Thinrim chhan tur a awmlo" ka ti sep a.
"Naktukah lokal leh rawh aw" tih pahin a kut chu a rawn chêt deuh a,a chal vela a sawhna hnu hma pawh ala lang kalh thei.

"Ka lokal dawn nia" ka tih hap chuan a nui suk a.
"Lokal ngei ngei rawh aw" atih leh chuan ka țah khum vak mai zawk dawn em maw ni.

"In zo tawh maw?" Ka chhuak chiah USarah chuan alo ti vat a,min tiphu dâwrh lehnghal.
"Aw,zo e" ka ti sep a. Min melh dan hi a danglam riau mai tunlai chu.

"Naktukah lokal leh turin ati che em?" Atih chuan ka melh hâ a,anni unau hian midang rilru hriat theihna an nei anih ka ring ta.
"Aw" ka tih chuan a thaw hak a.
"I duhloh chuan lokal angailo ania,i thu thu" tih pahin a phone ri chu ala a,a kal nghal daih.


A tukah pawh chuan ka kal ang nge kal lovang tih ka hre hlei thei lova. Ka kal anih chuan engkim a țha vek tawh angah anlo ngai ang tih ka hlau vek deuh bawk si. Mahse,a han damlo chiah chu huatna lam a lang lutuk thei tawh lova. Nizanah ka chhungte'n min zilh hlak bawk nen,eng emaw tak ngaihtuah chu angai a ni. Heti ringawt a awm pawh hi a țha ber lovang.

"I kal chuan kha kha keng rawh" tih pahin ka nu chuan eng emaw hi a rawn chhawp a.
"Eng nge a?" Ka tih chuan
"A ei theih takin" ati leh ringawt a.

Damdawiina ka kal chuan anlo vei suau suau a,min hretu țhenkhat chuan chutia ka va lawr sek chu mak anlo tih hmel lutuk.

Kawngkhar ka hawng tur chiah an thusawi ri ka hriat vang chuan ka tawp chat a.
"Inkawp lo tawp tur anlo inkawp hi chu a buaithlak anih hi" USarah ngeiin atih chuan ka ding khawng reng a.
"Chhungkaw khawsak phu tawk te hi an awm ve ania,inmillo leh lutuk hi chu" pakhat chuan alo ti ve leh,a aw atang chuan tunge anih ka hre mai theilo.

"Tihian tawp hlen se adik a nimai. Hetia a hmeichhia zâwk pawh mumallo deuha a awm reng chuan an buai leh tho ang" USarah bawkin atih leh chuan ka rilru thlak in ka kîr leh a.

Tunlai USarah awmdan mak ka ti thei reng a. A nau chunga thilthleng vangin min haw hle anih dawn kha. Ni e,a awm lutuk. Inzawm leh thei kan ni tawhlo. Keini chu inzawm leh pawh ni ila kan inkarah khi thui tak a awm reng tawh dawn a,tuna kan dinhmun ah hian lawm ila a tawk chiah.

Tunah chuan USarah takngial pawhin thiamloh min chantir a. Eng ber hi nge ka tihsual. Lalmawizuala ka lo tih thinrim vang khan a accident tih chu ka hria,mahse,eng nge tihtheih ka neih chuan.

Vawitam ka vau a,hun min pe tur pawhin ka hrilh ngun bawk. Mahse,hun min pek chu sawiloh,kan inah min rawn luhkhung hial anih kha.

A tawpah chuan engkim ka thiamloh a ni leh ta vek e. Tuma'n Lalmawizuala leh Lalrinnungi te nen kan buaina tak tak an hre lova. Tuma'n a langlo ruama ka țah nasat zia an hrelo bawk,ka chhungte ngei pawhin. Mahse,a tawpah chuan engkim kha keima thiamlo alo ni leh vek tho si.

Ni e,thiamlohna ka nei tih ka pawm thlap e. Lalmawizuala bula ka sawi ang deuh khan ka ngaidam anih pawhin ka chapona vang tal pawhin ka kir tawh dawnloh thu ka sawi a. Tunah hian a thu chuan ka ngaidam vek,ni e,tunge mahni fa te pa, na tuar lai chu hlim taka hmu reng thei ang. Mahse,ka sawi tawh ang khan,ka rilru ah hian mipa chapona ang hi a awm ve tlat a,'ka tilo ang' ka tih tawh hi chu ka thi dawn te anihloh chuan ka ti duh tawh biklo.

Tunah pawh Lalmawizuala hi ngaidam ngawt pawh ni ila,a chhungte pawhin mo atan min duh tawhlo tih a chiang reng a,chaw țhing her lum leh an sawi ang maiin kan inher lum chawp reng anga,buaina ngaiah bawk kan lêt kan lêt ang.

*****HAPPY WEEKEND💃,MONDAY ZANAH CHUAN KA MUMAL VE DEUH TAWH ANG. A THUI TAWH ANGA,A MUMAL VIAU TAWH BAWK ANG😁 TUNAH CHUAN KHAW VAWT NEN/MUTTHLUK ZEUH ZEUH NEN KA THLUAK KA HMANG ȚHA THEI MEUHLO A NI E,EXECUTIVE ME😉😉😉****

SINUS LEH RUH SEH NEI VE CHUAN IN HRETHIAM UAR UAR MAI ANG🤭🤭🤭🤗🤗🤗



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)