THLASIK LALPA CH - 8

Episode kal lai dah luhna

Moderator: writers

ilefi imoz
Posts: 130
Joined: January 1st, 2021, 12:32 pm

THLASIK LALPA CH - 8

Unread post by ilefi imoz » January 21st, 2022, 6:35 pm

*Thlasik Lalpa*

Chapter - 8

Ziaktu : ilefi imoz💜



(Recap : "Min zawt ta che!" Zaidam zeta professor in a tih leh tâkah chuan ka sir a mi chu a ding hluai a, chutah, "thih hnu piahlam ram hi enge i ngaihdan?" A rawn ti ta daih mai anih chu! "Saidinglian thu rawh" kan pahniha kan hriattham lek turin ka ti sep a, a tum loh hmel nasa mai!)



A tu amah mah tawng lova kan ngawih thap tâkah chuan professor chuan, "a eng ti zâwngin?" A rawn ti sup a, chiang zetin Saidingliana chu a melh ngur bawk, chil ka lo lem khawlh a, kan zirlai leh a thil zawh inmillo lutuk vang chuan Professor chu a thinrim anga, thil pawi tak a thleng ang tih ka lo hlau takzet a ni!



"Ka sawi awmzia chu maw Sir, literature zirtirtu i ni a, literature ka tui chhan pakhat i ni, i class hi nuam ka ti lutuk tih ka'n sawi phawt teh ang" inrintawk hmel zet hian Saidingliana chuan a ti leh tê tê a, "ka lawm e" Professor in a rawn tih leh sup chuan awih lo zetin ka thaw hak a, Saidingliana hian mî tih thinrim a thiam ang tluk zetin mî tihlawm pawh a lo thiam zêk a nih hi a!



"Ka zawh duh tak che chu Sir, Mizote zinga Christianna-in hmun a chan hmaa thih hnu khawvel an suangtuahna kha nge ni a? Christianna a lo awm hnu a thlan piahlam ram kan ngaihdan hi pawm awm zawk a, thlanawm i tih zawk?" Confi zet hian arawn tichhuak hlawl a, ka âng phiau ringawt tawh! A zawhna chu ka lo ngaihtuah ngai reng reng lova, a han sawichhuah tâkah chuan ngaihtuahzui tham tak niin ka hre lawi si! Professor chu a ngawi vang vang a, chumi chhúng chuan a zawhna chhânna chu kei ni ta ila eng angin nge ka pék ang? Tih ka lo ngaihtuah ru rauh rauh a, ka hre tlat lo!



"I zawhna chu ka ngainat chi tak a ni! Literature lam i tuichilh a ni maw? Khawnge chhân i'n tum chhin ang hmiang! Mizote zinga Christianna a rawn lan hmaa thih hnu piahlam an suangtuah dan kha chu Mitthi khua leh pialral a ni mai a, mihausa leh neinung deuhte chanpual chu pialral niin, faisa ringa khawsak kha an châk ber thin a, chutih laiin a rethei berhchep deuhte tan chuan mitthi khua kha a ni leh tawp a, tichuan, Christianna kan ramah a lo lut a, tun thlenga kan rindan chu heihi a ni, Pathian fa te chuan Vanram kan rochung anga, kan Pathian fakin chatuanin amah kan fak tawh ang.. Chutah chuan enge pawm awm i tih zawk a? Enge nawm hmel i tih zawk chu ni ta?" Muang ban charha tiin professor chuan Saidingliana chu a rawn melh a, pakhatpa lahin, "i zawhna tak chu ania ka zawh che Sir!" A lo ti nghat ringawt.



"Sakhaw mumal tak vawn an neih loh lai kha chuan Thinglubulte, lung te, huai leh an thil hlauh zawngte kha an be mai a, tuna 'ramthim' kan tihte nen hian thuhmun an ni ti ila kan sawi sual kher lovang, an nun kha a holam em em a, miretheite inhnemna ber chu, 'thihna chuan mi hausa pawh a thliar bik lova, thihna hmaah chuan ang khat vek kan ni, mitthi khuaah hausa leh rethei kan awm hrang tawh dawn lo' tih kha a ni a, nichina ka sawi tâk ang khan kawng lehlamah pialral leh mitthi khua awm angin an sawi a, kawng lehlamah vethung chuan pialral leh mitthi khua chu ang khatin an sawi thung a, chu chuan an rinna in fiahna felfai tak a neih loh zia a hril chiang viau niin a lang i ti ve lo maw? Tunah chuan Christian kan ni tawh a, kan ngaihdan pawh a tunlai telh telh a, mumal taka Krista kan rin chinah, kan thlenna tur chu Vanram emaw, Hremhmun a ni tih chiang takin kan hre ta a, hriatchian loh kawng zawha kalthelh pheng phung ai chuan, fiah taka kan hriat ngei, Christianna kawng zawh chu kan tan chuan a thlanawmin, a dik hmel zawk i ti ve em?" Tiin a tarmit phên atang chuan kan lam a rawn melh leh a, a sawi dik fuk fuk em avang chuan ka ngaisang thar kher mai!



Ka bul ami chuan kutbeng thuk thuk chung hian, "a tha ka ti hle mai Sir! Miril dik tak chu i lo ni ngei e, amaherawh chu, ka ngaihdan ka sawi ve min phalsak thei angem khawngaihin?" A lo ti thuai a, professor lahin phúr hmel zet mai hian, "i sawi ve loh ten a dik nang le!" A lo ti leh hluai bawk si, kan zavai mai chuan Professor leh Saidingliana chu kan melh tawn zak zak a ni ber e!



"Ka lawm e.. Nichina i sawi, mitthi khua leh pialral an sawi hran leh hran loh chungchang kha ka lo ngaihtuah a, i sawi dik khawp mai Sir, mahse.. Ka'n ti teh ang, Bible ah ngei pawh khan, Paradise leh Vanram kha a sawi hrang ve tho va, Isua a thih dawn khan a dinglam ami hnenah khan, a kiangah, paradise a a chawlh ve tur thu a hrilh tih kan hmu a,



Chutah rinna a kal chho zel a, thenkhatin 'Vanram chu Paradise hi a ni e' an ti a, a thenin a nih loh thu an sawi ve bawk a, tin, Paradise chu Vanram lo ni ta se, Isua a thih chhung khan mitthi khuaah rawngbawlna a neih thu bible ah bawk kan hmu leh si a, mitthi khua chu paradise lo ni ta zawk se? Vanram chu Paradise kan tih hi a lo ni lehsi dawn lo tihna emni? a eng ber nge dik bik? Kan pi leh pu, mawl tak tak te ai khan kan hriat ril a, kan hriatthuk bikna lai a awm emni? An hriatlohna hnawk laiah ve tho khan kan táng ve tho lo maw?



Tin, Pathian hi a awm tak tak em? Chu chu he khawvelah hian fiahna nen thlapa chhâng theitu an awm bik lo tiraw? Tumahin a ngial a nganin Pathian an la hmu bik lova, Sakhaw hrang hrang te'n Pathian hran an nei vek! Muslim ho chuan Muhamed an ring a, Christian ho chuan Isua, chutiang zelin Buddhist ho chuan buddha an bia a, sakhaw hrang hrangte rindan leh ngaihdan a in an loh nuaih lai hian engati nge i sakhaw vawn anih bik vang ngawtin Christianna chu dik ber turah i ngaih ngawt bik?




Thlarau chetna tiin mihlim tam tak lamtualah an lâm a, taksa chêtna changin Pathian fak hla an sa suau suau a, chuvang ngawt chuan Christian sakhua kha a dik ber bik tihna a ni lo, Muslim ho pawhin an Pathian biakna hun an hman lai chuan taksa chêtna te pawh an chang nasa ve thin lutuk tlat! Budhism phei chuan thilmak pui pui an ti thei hial nia! Chutih lai kara Christianna ringawt lo lâk vâwng vak kha a bik ber bik lovange!



Ka sawi thui dawn, ka point ah ka'n let leh tawh ange, mahni kalna tur pawh hrechiang hlei lova mitdel kala kal ve ngawt kan pi leh pu te ngaihdan ai kha chuan, Christianna sakhua vuan chunga, vanram tinzâwna kal kha a thlanawm zawkin nang chuan i hria a tiraw? kan ngaihdan a in ang lo a a pawi ka ti hle mai! I rinna kha nghet viau mahse, rin loh tur thil ringin i inhrêng vel mai mai ang tih ka hlauhthawnpui che a ni.. Pathian zawng zawng zinga khawngaihna ngah ber Pathian, Christiante pathian hian hremna rapthlak ber, hremhmun a siam tih chu hrilhnawn ngai lovin kan hre vek.



Vai ho chuan piannawn lehna te an sawi a, keini erawhin vanram leh hremhmun tawp kan tinzâwn! Bible ah lah mi tlemte chauhin vanram an chan tur thu a inziak kuau a, anih leh Christiante Pathian chu Pathian dik ber lo ni ta se, ama siam vek mihringte hi engvangin nge sakhaw hrang hrang nei tura a duan kher? Amah ring vek turin min siam thei tho si a, ama siam theuh theuh, sakhaw dang vuan ho hi an thih hnuah hremhmunah an kal vek dawn tihna a ni a, a fair lo i ti ve lo maw? Ka sawi awmzia ah chuan keini ang, in sakhuana in a ngaihdana hremhmun chang turte tan chuan, pi leh pute rindan, mitthi khua emaw, pialral emaw zawk pawh chu a thlanawm zawk tlat a ni!" A ti ta duah a, a sawi zawh chuan mak ti lutuk hian ka lo thlir dauh dauh ringawt tawh!



"A.. Tunge maw i hming ni reng reng le?" A tarmit kâr atanga chík zeta Saidingliana rawn melh chungin Professor chuan a rawn ti fak a, chutah rang lutuka Saidingliana pawt thu dawtin, "Sir, Saidingliana ania" ka lo ti zung zung zung a, a kâ hup sak ka tum mêk lai chuan min lo dangin, "Sailo fapa neihchhun, fapa duatsual theih loh leh King of winter tih a sawi tel lo va Sir!" Arawn ti leh hrâm anih chu! Chu thil a sawi ka hlauh vanga lo chhân khalh zung zung kha ka nia, awmzia a awm lo teh e maw!



"Saitluanga fapa i ni em?" Phâwk lam maha arawn tih leh chuan pakhatpa chuan lu a lo bu nghut nghut a, a pa, political science professor kha a hming Saitluanga a ni tih ka hre ve ta chiah! "I ti lawmawm e, i ngaihdan kha a dik na lai a tam khawpin ka hria, engtikah emaw kan chhunzawm leh dawn nia" tiin a thochhuak a, sana kan en chuan minute 10 zetin class tawp hun a lo pêl fel der tawh a, kan tui tlâng bawka dar rik lai reng reng kan lo hre hauh lo mai!



"Class i la nei em?" Tiin ka lehkhabu min khungsak zung zung a, "chawhnu last ah Pol.science ka la nei, mahse ka tlanbo mai ang ka haw duh" ti a thawh ka tum chuan min pawt thu hnawk a, chutah, "naupang sual lutuk" a ti sup anih chu! "I sual fe zawk" tih leh din ka rual a, amah vanga ka thinrimna te kha ka hrechhuak leh a, engati nge maw ka lo theihnghilh khanglan ni?



"A mak, ding teh ka thlah ang che" ti a min rawn um chuan kawngkhar ka thleng fel der tawh a, ka hmaa mi ka sut deuh chawrh rualin no fahrana, "a na!" Ti that thawm ka hre zawm zat a, Emma-i! Min hmuh vang chuan a lawm fahran bik lo tih ka hrechiang.. "Tihpalh" tiin ka kalpel a, hawilet duh thak lovin ka haw san ta nal nal a, an duh dan danin rawn khawsa ve tawh rawh se ka buaina tur an ni lo..




(Skip leh duai ang)



Kar a liam a, thla a thar a, november thla kan chuankaina pawh a rei leh ta, semester exam kan nei a, tunah hian ka paper hnuhnung ber Mizo ka exam mêk a ni! Subject dang ka tihthat ve hlawm avangin ka thla a muang tawh hle a, tunah pawh ka zir ho a chhuak hnem hle nghe nghe..



"Ka zo ta!" Ti sepin pen ka dahthla a, paper ka submit lai te chuan ka pheichheh a zâng vah vah kher mai! Library kawt, kan innghah fo naah Muanzuala'n min nghâk mek tih ka hria a, tlemin ka hmanhmawh ve deuh tih mai a ni! Kha'ng hun chhung zawng khan Saidingliana nen kan inbe mumal ngai lova, kan inbiak ve chhun pawhin kan in bakkaih reng zel! In lamah pawh nise keiin dawr ka nghah chuan a rawn lang ngai lova, ka nu awm lai erawh chuan a kal fo tih ka hre thung.



Muanzuala nen pawh eng inkar mah kan nei ta chuang lo! Chutih rualin kan inzui ve dat dat thin a, a nau ang maiin min en a ni ber e, engpawh ni se min haw lova ka lawm tho mai! Mahse chutih rualin kan inzui tam tâk vang nge mawni? Hmana amaha ka feelings nung hluai kha chu a dâi deuh tawh a, chuti tehlua in ka star tawh lo, marawhchu a dai hlen hmak e phei chu ka ti ngam bik chuang miah lo ania!




"Rin aiin i chhang rei, i thiam a ni maw?" Nui var vara lo ti tu lam chu ka pan thuai a, a kianga awm hi chu a hahdamthlak thin ania! Kan nui reng a, eng buaina mah kan hmachhawn ve ngai lo bawk, zu a in lova, chu mai nilovin ruihtheihthil lamah a fihlim viau bawk si! Avahan perfect ve chiang tak! "Vawiin chu, hmun nuam deuhah kal ila, Christmas hmaa kan inhmuh tâwp berna tur a ni lovang tih pawh kan hriat loh hi.. Kan in date dawn emni ang?" Ka bengbula arawn tih chuan ka mengphar awn awn a, 'in date' tih kha a sawi tel in ka hria!




"Hetah a ni maw i lo awm ka duat, ka zawng che a, engpawh nise kan kal a hun tawh thâlin ka hria, vawiin tlai chu chaw rawn ei rawh ka nu in a monu hual hmel a hmu châk a nia" tih paha min kuai her sawktu chu tudang a ni lo! Saidingliana! Thinrim lutuka tawngchhuah ka tum mêk laiin min nuih khum suk a, stepah min kaithla dawt dawt anih chu! "Saidinglian, min thlah nghal rawh engvangin nge dawt i rawn sawi ve ringawt? I zak miahlo emni a? Saidinglian min thlah rawh tunah" ka ti thla tuar tuar a, step sira lo awm te leh kan thawm hre phâk chin ho chuan min lo en duh nasa mai!




Ka kut a vawnna chu thin thláksak ka tum a, a theih hlawl loh! A hmer na zual sauh zela a na em em mai lehnghal! Building pawnah min kaichhuakin veilamah min kai zel a, amah lah hian tawng a tum hmel loh nasa mai lehnghal! "Saidinglian min thlah teh ka lawm miah lo ania, Muanzuala hnenah khan min kaltir leh rawh" ka tih leh tâk tuar ah chuan a hmalamah min phih láwpin bangah min nawrbet nghal run a.



"Titeh, thawnthu ziak dun ang" min melh ngur chung hian a rawn ti hlawl anih chu!, "eng thawnthu maw? Thawnthu ziakmi ka niin i hria emni?" Ka lo ti vîn hlar thung a, tun maia boruak nuam lutuk ka hîp zawng zawng kha a rawn ti bam vek!


Chutah ka hmâi bul sêt sawta min melh paha, "ka sawi awmzia chu, chutianga thawnthu ziah tak tak lam ka sawilo, engtin nge ka sawi ang têber, ih e, i ni deuh thut teh ang!" arawn tih chuan phu nghek chungin, "Saidinglian!" Ka ti ţhat a! Anî lahin, "duh leh enge?" A lo ti ve leh hluk zui! Mihring zaktheilo lutuk mai, hepa zet hi chu aw..


"Ka tihdan zir khanglang suh" melh râm râm pah hian ka ti vîn leh hlar a, anî lahin, "ti teh, têber, kan inngaizawng lova tunlai chu ka mut a tui thei dêr lo ania" a lo ti leh hrâm a! Khawiah nge maw zahna hi a dah ang ni he mihring hian?



"Min kaltir teh, kan boruak i ti chhe vek tih i hria em? Zaktheilo lutuk!" Ti hlakin min vawnna chu thinthláksak ka tum a, Lalpa leh! A vuan nghet mah mah a ni! "Thil pakhat hre turin ka duh che têber, kan pahniha thawnthuah a changtupa ka ni thei lo anih chuan, in pahniha in thawnthu ah tal chuan misualpa ka rawn ni hrâm thovang!" Mitmeng nelawmlo zeta a min melh dur khuih chungin a ti leh sup a, a nelawmna te kha an bo zovin ania ka hriat ni!



"Eng thawnthu nge i sawi pawh ka hre hrep lo ve, i duh dan danin awm rawh hmela, Muanzuala bulah khan min kaltir leh la a tawk a ni mai" tiin tâlchhuah ka tum leh a, min la thlah duh ta chuang hlek lo! "Haw ang, exam kan zo tawh" tih paha min pawh leh lawp chuan a hmaah ka invawrhvir ni berin ka hre tawh! Theihpatawpa ka tang ve chung pawhin, hnehsawh zet hian a bike lianpuiah min hlângkai nulh a, ka che sawn thei lo reng reng.



"Bike hi tiding teh Saidinglian ka thin a rim tak tak ania aw" tiin ka au chúl a, ani lahin, "a rim ve tho" a lo ti duh lek chauh mai si! A thin a rim ve ngawt chhan tur lah ka hre lo nasa mai sia, Muanzuala ka ngaihtuah chhuak a ka thin a rim ut ut, hepa hian enge a hriat a a duh dan dana min awm tir a tum ve ngawt mai le?



"Nu Zonun, i fanu hi veng tha teh mipa nena lenchhuahte an tum ania" dawr chhunga min kailut dawt dawt chung hian a ti hluk a, tawng pawh ka tawng peih tawh lo, ka thinrim dan chu pui tak hi a ni ringawt! "Haw rawh hmela" tih paha chhoh ka tum chuan, "haw dawn e, tlaiah dawr lo nghak la, mi ka hmelhriattir ang che" tiin min chhuahsan zui a, thinrim lutukin ka melh râm râm ringawt tawh.. Hepa hian eng rilru nge maw a put dawn ni??..



"I chhang tha em?" Ka nu in a tih pawh chuan, "chhang tha e, ka rilru erawh tunah tak chuan tha lo tak a ni" ka lo ti nghat a, inah ka chho tlang nghal bâr bâr bawk.. Saidingliana vanga ka thil chân uiawm lutuk mai kha ka ngaihtuah chhuak a, ka thin a tawt up up mai! Muanzuala khan in date puiah min sawm anih kha!



Tlaiah eirawngbawl turin ka nu a rawn chho a, ka peih emaw peih lo emaw, dawr chu ka nghah tho tho a ngaih hmel khawp mai! Saidingliana chu lo kal pawh ni se ka be lo nasa khawp ang! Ka biak loh dan tur chu pui tak hi a ni ringawt! Biakpui kum pawh thleng se ka be lul lovang.



"Khawimawi bawihi, silkcut kha pahnihin min lo pe aw" tih thawmah chuan ka kuhva thel lai chu ka chawl dat a, ka hawichhuah nâk chuan Saidinga pa, kan political science teacher kha lo ni rengin! College tih loh ah kan vawikhat inhmuhna a ni a, tlemin ka zak ve det!



"Ka hmu tawh tlat che in ka hria, Zonuni fanu emni i nih?" Chal chuar nang nang a a tih chuan, "aw ni e, Hrangbana College ah ka lut a, nang chu ka hre lutuk che asin, Political science class ah ka hmu ziah che a" polite ve hmel tak hian ka lo ti a, ani pawh chuan, "ni dawn tak maw.. Enge i hming kha?" A lo ti ve thuai a, ka hming te hrilhin ka insawi zung zung a, chutah, "i hming hi chu kan hre zing malh malh alawm, Saidinga kâ atang hian a chhuak ngun ve a, engpawh nise kan inhnaih chu a tihzia hle mai, i zirlaiah buaina i nei anih chuan, engtiklai pawhin zawh theih reng ka nia aw" tiin min chhuahsan a, an chhungkaw mize dam dup hlawm mai chu mak ka ti a, Saidingliana mize hrang bik lutuk lah mak ka ti zual deuh deuh bawk si!



"Enge i tih dawn?" Pa Saitluanga chuan dawr kawtah a ti sup a, "dawrah ka kal dawn anih hi, min hmu reng emaw tia" ti a lo chhangtu chu tudang a ni lo! Amah Saidingliana ngei a ni! Engtin nge ama pa ngei chutiang chuan a chhân theih? Engtin nge a ngam zawk le? Zaktheilo ka tiin sual hi ka ti ngawih ngawih a, amah ka huatna a zual sauh sauh bawk.



"Rawn haw tlai suh aw chaw ei hma ang u" dam dup hian Pa Saitluanga chuan a ti leh a, a chhâng zui tawh lo, dawr lampana ke pen thawm arawn hnai zel a, ngawi renga lo lutin ka sirah a rawn thu a, biak ka tum lo nasa mai! Ka kuhva thel lai chhunzawm mial mialin ring zet hian phone ah hla ka play a, beidawnga a haw leh mai ka ring ania, ka ringsual chiang ngei mai! A phone phawrhin a khawih mual mual a, haw vat a tum hmel loh..



"I rawn thleng tep em?" Tiin a phone chu a beng bulah a dah a, chutah, "dawr kawtah khan ka lo ding" tih leh pawna chhuah a rual zat bawk a, enge a hriat ni? Ni tak e, mí min hmelhriattir tur thu a sawi tak kha mawle! A tu chu ni maw? "Sorry, vawiin tlai chu motor a tam riau a" hmeichhe aw tliang ralin a tih ri ah chuan ka ding deuh uk uk a, tunge tih hriattuma ka melh dék dék rualin an rawn lang chawpchilh nghal hi a ni mai!



"Heihi ka thiannu, teberi anih hi, teber heihi ka cousin Mampuii" Saidinga chuan a ti sup a, engvanga a cousin nena min inhmelhriattir ve ngawt nge anih tih ka la hre chuang hauh lo.. Amah chu eng ang pawhin haw mahila, a cousin nen lama huat vek mai chu nuam ka ti lova, chuvangin tha tak chuan ka chibai ve mai a, amah Saidinga erawh ka la be ta chuanglo.



"Mampui, inpa call la, rawn leng ve se la" Saidinga bawk chuan a ti leh sup a, "a, ngawi rawh vawiin chu, a pa te office ah a kal dawn a, a buai tur thu a sawi" ti a Mampuiin a lo chhan pawh chuan tu chanchin nge an sawi ang tih ka la man pha ta chuang hauh lo! "A buai ka ring chiah lo, han call hrim hrim la" Saidingliana'n a tih leh pawh chuan Mampuii chuan a duh lo va, chutah dingchhuak hluaiin, "keiman ka'n call ang e" a ti a, pawnah a chhuak zui nulh bawk a.



"Helai hi in dawr emni a ih.. Teber?" Mampuiin inthlahrunhmel taka a tih chuan ka meng â deuh riai hman a, 'teber' ti a min koh vang a ni! Ni e ani hian ka hming dik tak a hre hauh lovang, Saidingliana'n hrilh hek lo! "Aw anih hi" tih zawngin ka chhâng a, kuhva ka thel san leh mial mial a, reilote hnuah Saidinga pawh a rawn lut ve mai a, biak phei chu ka la be ta chuang lo.



"Ngatan nge kanpa chu i koh kher a?" Mampuiin a lo tih chuan, "ngati vak mah, chaw lo ei ve se la ka duh a, chutin teberi nena kan exam zawh lawm nan zanah kan party nghal bawk anga, couple goals a ni mai" a lo ti lêt duh lek chauh nia! "Chuvang mai mai chuan maw? Saiding, vawiinah a pa te office ah tihtur pawimawh a neih thu min hrilh a, chutiang vang mai maia koh buai te chu, ka tan a inthlahrunawm asin!" Mampuiin a lo ti ve leh hluai a, nin hmel zeta, "a buai lo, a lo kal dawn Hmangaihmawi" ti hlukin Saidinga chu a tho hluai a, pawnah a chhuak leh nul nul bawk.



"Hepa mawl zia hi chu aw, engtin nge hmeichhiate hian an duh theih zawk le?" Ti nang nangin a phone a melh a, chutah min hrechhuak thut aniang, "nangmah ka sawichhan miahlo che ania aw" inthlahhrun hmel tak hian a rawn ti leh sep a, chhang lovin ka lo nui hak ringawt, a duh dan danin Saidingliana chu a rel thiang alawm, a bialnu pawh ka ni lova ka laka a inthlahrung chu ka khawngaih zawk!




Reilote hnuah dawr kawtah chuan bike thâwm a rawn awm a, a thi chawpchilh nghal bawk a. "Rin aiin i lo thleng hma" Saidingliana'n a lo ti sup a, chutah, "i sawi hmanhmawhthlak hmel sia ka rawn tlan chak alawm!" Ti a chhangtu chu ka hriat than tak mipa a ni! "Muanzual!" A hmel ka hmuh rualin ka lo ti hluai a, chutah ka sira thu Mampuii pawhin, "duat, i lo van thleng hma!" A lo ti ve thuai bawk a.. A tawngkam khat lek vanga ka thinphu ran dawt dawt dan chu a mak zawk hial a ni!




"Eng thil nge i tih hi?" Lawm loh hmel lutuka Saidingliana melh vut chungin Muanzuala chuan a ti nghal khur khur a, Saidinga lahin, "zanin chu couple goal ang u hmiang!" Ngaihsam hmel fe hian a lo ti lêt mai a, Muanzuala chu amah ka hriattirh atanga a hmel hmuh hrehawm ka la tih ber tum a ni ngei ang! Mampuii leh kei chu min entawn zak zak a, a thlan a tla deuh hluam bawk a, ka inthlahrung zawk! Thil awmdan pawh ka hrethiam kuar in ka hria!



(Thunawi nei leh zuai ang, sawi tawh angin ka phone chian loh vang khan ka type sa zawng zawng kha an bo ta vek a, ka down vek hman, mahse tukin zingah vanneihthlâk lutuk tak maiin ka hmuchhuak leh vek a, zantinin dah kan tum leh dawn nia, min lawmpui zia tihlan nan han comment ve leh hrim hrim teh aw🤗 ka lawm e💜)


End of chapter - 8



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)