THLASIK LALPA CH - 9

Episode kal lai dah luhna

Moderator: writers

ilefi imoz
Posts: 131
Joined: January 1st, 2021, 12:32 pm

THLASIK LALPA CH - 9

Unread post by ilefi imoz » January 22nd, 2022, 6:04 pm

*Thlasik Lalpa*

Chapter - 9

Ziaktu : ilefi imoz💜



(Recap : "Eng thil nge i tih hi?" Lawm loh hmel lutuka Saidingliana melh vut chungin Muanzuala chuan a ti nghal khur khur a, Saidinga lahin, "zanin chu couple goals ang u hmiang!" Ngaihsam hmel fe hian a lo ti lêt mai a, Muanzuala chu amah ka hriattirh atanga a hmel hmuh hrehawm ka la tih ber tum a ni ngei ang! Mampuii leh kei chu min entawn zak zak a, a thlan a tla deuh hluam bawk a, ka inthlahrung zawk! Thil awmdan pawh ka hrethiam kuar in ka hria!)



"Kal ang" tih leh Muanzuala chuan Mampuii bana kaih a rual a, engmah pawh kan sawi hman hma in pawnah a kaichhuak dawr dawr a, thil awmdan hriatchian tuma ka dinchhuah ve rualin Saidingliana'n min lo pawt thu ve thung bawk si! Bike ri a awm hlut a, reilote hnuah a zawi tial tial a, kan hre pha ta lo!



"Tikhan thil awmdan i hrethiam uar em?" Tak zeta min melh ngur chung hian a rawn ti a, ka heh ka pet ngar ngar ringawt! Ka na ve detin ka hria, ni e ka hrethiam alawm, ka hrethiam lutuk mah mah a ka hah zo vek zawk anih hi! "Teber!" A rawn tih leh sup tâkah chuan ka insum zo tawh bik lo, vin zet hian, "ka hrethiam alawm ka hrethiam chiang khawp mai! Chuan nangpawh hian engvanga khatiang thil kha min hrilh nge i nih ka hre lo, beisei neia khatiang thil ti inih chuan bansan ang che, min chhuahsan rawh!" Ka ti tuar a, ka thin a tawt tawh bawk a ka au ring kher mai!



"Beisei chu ka nei ngeiin ka ring!" Tih zawng a sawi a, a chhuak zui nghal bawk! Ka thin dawmin ka thawchhuak ham ham a, ka hrawk thip lutuk chu tawrh a har lam mah a ni! Muanzuala kha! Kha chen kan inkawm a, kan inzui a, ngaihzawng nei lo ang maiin a awm thin anih kha! Nge ni a, kei hian zak theilo takin ka lo phûtsâng lutuk zawk? Ni e ngaihzawng a nei emaw, nei lo emaw pawh ni se, a nuna inrawlh theihna dán pakhatmah ka nei lova, kei hi ka lo kalthui lutuk mah mah zawk pawh a ni thei ve tho!




Mahse vawiinah khan, in date puiah khan min sawm a! Ahh, ka hrethiam tawh teh nuaih lo, ka hriatchian em em thung chu tunah hian, ka zak a ni tih hi! Mí inngaizawng tha hle hle lai kara inrawlh riakah ka inchan a, ka natna ai mah pawhin ka zahna chuan hrehawmna min pe hnem zawk! Muanzuala ka mitthlaah a lang a, ka zak nawn awn awn a, ani khan khatih chhung zawng khan min lo hmusit thin ngawt ang! Ni e, a duh duha a pawhkawi theih hmeichhiaah min ngai ngei anga, kei lah kha ka lo mawl si! Mahse mak ka tih chu, chuti tehluain ka na miah lo! Ka zak hle a chu zawng chu..



Dawr thil lei tura lo kal neuh neuh an awm avangin chhungril kimki chawih chawih chung pawha nuih luih reng a ngai a, tunah tak hi chuan dawr nghaktu nih tluka thil hrehawm ka hre lo! Za miah lo pawha nuih a ngai a, thinrim teuh chunga nêm taka tawng a ngai! Na tak tuar chung pawhin mi tuarchhel ber awm ang fahrana dawhtheih a ngai fo va, thil nuam a lo va ni lo tak em!




Dar 5:30pm ah inkharin ka chho sawk sawk a, inkhawm ka duh tlat! Thalai inkhawm zan a ni a, dik tak chuan ka phur hlawl lo! Mahse ka phur loh vang ngawta inkhawm loh emaw, Muanzuala vang mai maia inkhawm thulh ringawt chu ka tum bik bau lo! Ani khan vanramah min hruai dawn lova, ka ai hremhmunah a tla dawn hek lo, chuvang chuan chhel takin ka awm anga, ka tuarchhuak em em ang!



"Inkhawm i tum emni?" Ka nu in a lo ti vat a, tawngka in ka chhâng peih lo, bu nghatin room ah ka lut zui a, ka insiam nghal mawlh mawlh a, tha erawh a tho lo chiang kher asin! Chokaah chhuak pheiin pawna chhuah mai ka tum a, "au Te, chaw i ei dawn lo emni?" Simon-an a lo ti khauh a, lu thin khum nar nar pahin ka penchhuak ta tho va, thla a sik tawh bawka pâwn pawh a vawh dan a dang zar tawh mai!



Overcoat ha in puan ka bih a, pheikhawi flat bunin sam ka thlah mawl tawp a, inchei viau turin ka peihna in a tlin tlat lo zanin zet zawng! Ka down ve chiang em a ni! "I inkhawm dawn emni?" Thim tham atanga Saidingliana'n arawn tih phut chuan ka phu zawk a, chhâng lovin ka kalsan hmak a, ka be chak hlawl lo, amah anih vang hrim hrim pawh ni tawh kher lovin, tun dinhmunah hi chuan tumah ka be châk hlawl lo a ni!


"Teber!" A rawn tih leh chuan, "haw rawh" ka lo ti fak a, engmah a sawi zui tawh bik lo, a kalsawn ta aniang a thawm a reh zui nghal hmak a, ngaihsak turin thâ ka nei lo, kal chhet chhet pahin rilru tawngtaina ka nei mawlh mawlh a, Pathian hnenah ka rilru natna te min lak kiansak turin ka dil mawlh mawlh a, chhanna erawh ka hmu lo chiang kher mai!



A tír ai mahin ka na zual a, ka hnuk a ulh a, ka tâwt telh telh zawk! "Lalpa khawngaih takin min lakbo sak rawh, tihtakzetin ka ngen che anih chu! Lalpa, min lâk kiansak lul rawh" ka tichhuak sep a, chutih rual chiah chuan, "tunah!" Ti sup thawm ka hria a, ka hnunglam atangin tu emaw hian ka hmui a rawn hup bet a, midangin min rawn bawh zui nghal huk bawk!



Mipathum an niin ka hria a, an hmel erawh ka hmu thei lo thung! Auchhuah ka tum a, ka kâ an hup beh tlat avang chuan ka au thei der mai silo! "I mawl hle mai mami, i nu leh pa ten zana mahni a khawlaia vâk lo turin an hrilh ngai lo che a ni ngei ang, i nu leh pa te mawl rah i seng dawn anih hi" pakhat chuan a ti sup a, ka hlau lutuk chu ka khur hlawk hlawk hial a ni!



"Khawiah nge kan hruai ang John, in farm ah khan hruai ang u, tumahin thâwm an hre lo ber ang, zanin chu a nuam dawn hle mai!" Ka hmui hup bettu chuan a ti ve thung a, ka tâl nasat lutukna lamah ka chau vek tawh! "A tal nasa ania, hnek mai teh ang u" pakhatin a tih ve rualin thil ri chawrh ka hria a, "tunge?" Tiin thawm a ri nghal hluai bawk! "John, au ring suh zan reh lai anih hi!" Pakhatin a lo ti ve thung a, chumi rual chiahin a ri leh nghal chawrh bawk! Ka taksaah engmah ná a awm lova, min hnek lo tihna!



"Lo kal rawh!" Tih pahin tu emaw hian min kai lawp a, kei lah thlabâr, awmngaihna hre tawh lo chuan min kaihna ang ang chuan ka kal mawl ve tawp a, kan tlân a ni mah zawk! "A aia chakin aw, vengchhung kan thleng tep ania" tiin min tlanchak zual pui sauh a, "man ngei ngei ang che u!" Kan hnunglam hnaitê atanga an ti lawng lawng thâwm lah a hnai ve tulh tulh mai bawk si!



"A aia chakin vawikhat chauh! Hah khat chiah a ngai tawh aw" min kai tupa chuan a ti leh a, a chauh hmel ve tawh ngei mai! Ka thinphu dawt dawt vang chuan ka thaw tha thei tawh lova, min kai kal mai mai tawh ni berin ka hria! "Kan him! Kan him e!" In pakhat kil thim laia min pawtlut rawk rawk pah hian a ti sup a, tawngchhuah ka tum mêk laiin ka kâ a rawn hup thuai a, chumi rual chiah chuan kan chhaklam kawngpui atanga, "an tlanbo hman anih hi! Tu phiangsen maw anih le?" Tih thâwm chu ka hre viai viai bawk, chutah pakhat chuan, "let leh tawh mai ang u, inkhâwm bâng mal tlat an awm leh tho vang!" A ti sar sar a, kan inhnaih bawk nen thâwk pawh ka thaw tha ngam tawh lo.



An ke pên tháwm a reh thleng chuan ka insangmar teuh a, nichin maia ka dinhmun derthawnzia kha ka ngaihtuah lêt a, hlauhna in min man thar leh awn awn a ni ber! "I tha em?" Ka beng bula rawn ti suptu vang chuan ka phu nghek a, hepa hi! Tunge? An zing ami kha a ni em? Tunah hian ka dinhmun hi ala him reng reng lo!



Inher thutin kawngpuiah ka tlán vak a, mahse rang lutuka pawhlêt leh nghal ka ni tlat! "Min thlah rawh!" Ka ti that a, chutah rang lutuka ka hmui rawn hupin, "Teber!" A rawn ti sup a! "Saidinglian!" Phâwk zeta tiin amah chu ka enchiang nghal thuai a, street ligh êng de ve ve hnuaiah chuan fiah lo zetin Saidingliana hmel chu a lang riai chauh a, chauh hmel lutukin alo thaw hlawi hlawi anih chu!



"I.. I tha em?" Hlauthawng zet hian ka ti ruai a, ka tawng ring ngam dér si lo! "Aw" tih zawngin min chhâng a, a thâwk dan a dik lo, a thaw ri hrawih hrawih a, ka mangang takzet a ni! "Kâwi khat chauh kal kan ngai ania Saidinglian, in kan thleng a ni mai, kal vat ang!" Tiin a zakah ka dawm a, a che hrut a bangah min nawrbet nghal rawk bawk!



"Enge maw i hriat le?" Hlauthawng lutuk hian ka ti that a, ani lah a la thaw ri hrâwk hrâwk mai si! Thei leh thei lova ka dâra a lu rawn nghatin, "nichin khan i hlau hman viau em?" A ti sup a, ka rilru no a chhuak leh tlat pek tawh! "Hlau e!" Ti sepin ka tapchhuak hawk a, ni e, ka hlau a ni! Ka hlauh zia kha! Hlau tak ka ni! Ka damchhungin khatiang hun kha ka la tawng ngai lo! Nichin maia pawngsual ka nih teuh zia kha!



"Tihpalh tihpalh, tap tawh suh, téber, engtinmah an ti hleinem che, ka awm chhung chuan tuman engtinmah an ti ngai lovang che, hlau tawh suh i kiangah ka awm hi!" Tiin nghet zet hian min pawmbet a, hnêmtu aw ka hriat vang te pawh a ni mahna ka lungchhe zual sawt a, ka tap uar sauh bawk.. "Lo kallo ta la engtin nge ka awm ang? Ka â thei mai ang! Khawvel êng hi hmuh pawh ka hmu ngam tawh nang Saidinglian, nangmah vangin ka him hrâm hrâm anih hi!" Tiin a jacket-ah ka hmer ngar ngar a, ka tap uar sauh sauh a.



"Hmana i thusawi kha i la hria em? 'Pathian chuan keimahni a kan theihlohzia kan hriat hnu ah amah beisei turin min duh' i tih kha, beiseitur i neih loh hunah ka hming lam la, ka lo lang zel ang, i hlatah ka awm ngai dawn hleinem, i Pathian nih ka hreh hauh lo.. Eng buaina pawh i nei anih chuan, i lam rik kher pawh a ngai lo, ka hmingin i ngaihtuahna laimu a thlen rualin ka rawn lang fo thin ang teber" buchilh nuaiha tiin min kuah nghet ve sauh a, chú a tawngkam vang chauh pawh chuan ka thlamuang a ni!



"I.. An khawih ve che em?" Harhchhuak zawka tiin ka tál fat fat a, a tháwkdan a la pangngai lo bawk nen amah zawk hi buaipui ngai a ni tih ka hre thar leh a, ka inthiamlo kher mai! "Ka tha min ngaihtuah suh, mahse, haw chi ka ni lo, ka chhungte ka ti mangang dawn tlat, hmun pakhatah min hruai thei angem? Heta tangin a hla teh chiam lova!" Harsa tih hmel zet hian a ti chhuak tawk tawk a, tawng a harsat lutuk chu ka khawngaih takzet.



"Tehreng mai, khawilamah nge?" Tiin a zakah ka dár ka nghat a, a kawhna lam pan chuan kan inkuah kal ta dat dat a, an khawih ve hman deuh a ni ngei ang, a thin a dawm vawng vawng a, a then chak chak reng bawk, streetlight êng hnuaia a taksa chiang zawka ka en chuan hliam a nei lo tih erawh ka hria a, mahse a dam si lo a ni!



"A hla deuh a, ka kal theih hram erawh ka beisei" tiin kawng biboh deuh takah hian min chhukthlakpui a, thui deuh fê kan kal hnuah kawngpui, tlawhpawh vak ngai loh hmel tak maiah hian kan chhuakthla hlawl a, "kan thleng tep" ti supin veilamah min kawipui a, in hmuh tur a awm tawh lo, a awmchhun chu kan hmalam piah deuha in mal ding pakhat zawng chu a ni mai! "Tah sawn emni kan kal dawn? Tute in nge?" Hamhaih taka ka tih chuan, "aw tah sawn!" Tih zawng a sawi a, ka be zui ngam tawh lo, tawng a harsat tih ka hria a, nawrluih chi a ni tlat lo a ni!



In kawt chu kan thleng a, a reh ruih bawk si a ka hlau ru viau! Eng buaina emaw pawh lo tawk ila, ka kalpuipa ber hian min chhan thei dawn hauhlo tih ka hria a, chhan te chu sawi loh, amah leh amah takngial pawh a in saseng thei dawn hlek lo! Mahse a duhdan anga ka awm a ngai tlat thung a, min chhanhimtu anih avangin!



"Letter box kha zen la!" Thei leh thei lova a tih chuan rang takin kawngkhar sira letter box chhung chu ka zen rawk a, chabi bawr lian tha nelh nawlh tak hi ka khaichhuak hlawl mai! "I in emni?" Hawihai deuh taka ka tih leh tâkah chuan lu min lo buk khum nghut a, tlemin ka thla chu a muang ve ta deuh! Kawngkhar chu hawngin muangchang hian ka kuah lut a, min dinpui datin kawngkhar sir lam chu a dap rak rak a, reilote hnuah inchhung chu a rawn êng ta pap a!



A ên tâkah chuan inchhung chu ka rin angin ka hmu ta hauh lo! A tê fel ren rawn hle a, sofa leh eng eng emaw chu dik zaih hian a inhung ve far hlawm a, tê reuh viau e ti lovin choka, sitting room leh bedroom te chu a awm hrang ve thlap reuh va, bungrua lah a awm chikimin a simple hlawm reuh em em mai leh ta nghal! "Heihi i in a ni tak tak maw?" Ring ngam chiah lo chunga ka tih leh chuan, "tu in nge maw ni se i tih le?" Tiin a kiai suk a, a nâk a dawm nghal vawng vawng bawk!



"Tihpalh, roomah ka hruai ang che" tiin room kawngkhar tur ni âwm tak chu ka hawng rak a, ka kuahlut nghal thuai bawk a, switch a on leh chiah chu, ka thil hmuhte chuan min thâwng leh chiang hle mai! Khum lian tak a inhung a, almirah hlirin room bang chu a khat a, dressing table, darthlalang, a tam mai! Êng lah chu a nalh mai sia! Hepa hian hetiang in hi engatan nge a neih le?



"Khumah hian min nghat la!" Atih chuan rang takin khum lamah chuan ka kuah phei a, a pheikhawk phelh sakin ka muttir sauh sauh a, puan ka sin tir bawk a, a che tha peih lo, vawt a ti nge mawni a khur deuh hlak hlak a, awmdan tur min ti hrilhhai lek lek a ni! "Tikhan lo mu la, chokaah saw'n tui ka va lum ange, tuilumin ka dep dawn che nia" tiin ka chhuahsan a, chokaa ka luh chuan a thim khup a, switch awmna tur awm ang ka hre der lo lehnghal! Bangkil ka dap rak rak a, vanneihthlak takin ka dap fuh hlauh mai, ka on chiah chuan ka nui leh heu ringawt!




"Home sweet home" ti a phun sepin gas lamah chuan ka kalphei nghal ruak a, he in hi chhia leh tha ka hriat tirh atanga ka awh em em thin ang kha a ni! A tê fel em em a, chutih rualin bungrua a chikim em em a, ka tet deuh laia ka suangtuah thin kha ka hrechhuak lo thei lo, 'ka len hunah chuan hna tha tak ka nei anga, pasal nei lovin keimahin ka khawsa anga, in tê fel takah, nuamsa takin mahni in ka cheng anga!' Tiin duhthu ka sâm fo thin anih kha!



Gas on in tui ka chhuang thuai a, chhuar vel ka hawngkual rak rak a, rinai takin nuam ka ti phian mai! Drower ka pawtdawk leh chiah chu lawm zetin damdawibur ni áwm tak hi ka la chhuak a, vanneihthlak lutukin diclowin plus (nachhawkna mûm hring) ka haichhuak nawlh a, ka tui chhuan pawh a so dawn tan bawk nen lawm takin gas bulah chuan ka ding vang vang a, a khua a sik ngeia ka hriat avangin nachhawkna chu pek ngei ka duh, lo sik lo ta pawh ni se a sil awng lutuk kha a chhawk zangkhai dawn a, pek hrim hrim a ngai!



Ketli (kettle) atangin tuihû (vapour) a rawn chhuak chiai chiai a, ka hmanhmawh ve tawh bawk nen rei pawh nghak lovin ka suan thuai a, chawhtawlhah thlichhuakin room ah ka chawilut sawk sawk a, ka thlit bâng no a ka thlit chhuah chu tui vawt nen pawlh dalin ka keng lut ve nghal bawk a, Saidinga chu khumah muttirin ka kalsan kha ania, room a ka luh leh chuan chhuatah a lo vial ngawih ngawih anih chu!



"Saidinglian!" Ti tuarin ka panphei dawt dawt a, thingthi dawtin ka sawi deuh nawk nawk bawk, "ka.. Ka thaw tha thei lo" harsa tih hmel taka thâwk tum chung hian a ti tawk tawk a, a thin dawmin a vial leh ngalh ngalh bawk, tihngaihna ka hre lo! "I chhungte ka call dawn!" Ti a thawhchhuah ka tum chuan rang lutuk hian ka banah a lo vuan chawt chawt a, lu a thing sawk sawk chu ka hrethiam lo takzet a ni!



"Khumah aw" tiin a zakah ka dâwm a, thei leh thei lovin khumah chuan ka muttir thei hram a, "zangthal la, hahdam deuhin awm rawh, i tha mai ang Saiding" tiin ka hnêm mawlh mawlh a, chhân pawh min chhâng peih tawh lo, a thaw hrawk hrawk ringawt a, khum bul drower chu pawt hawngin puan a awm leh awm loh ka dap rawk rawk a, vanneihthlak lutukin face towel pahnih hi a lo inthlep fel thân a, pakhat zawk chu la in ka tuilum ken luh ah chuan ka chiah huh a, thlan sa pup pup khawpa leng bat bat Saidingliana chu panin, a chalah chuan ka dep vat vat a, a zia deuhin ka hria!



"I tha mai ang, i zia deuh hunah nachhawkna i ei dawn nia" tiin ka dep zawm mawlh mawlh a, a zal riai riai mai, vawikhat na zeta rawn thawchhuak hawkin a zawi hnawk a, a thi ta mai emaw ka ti hman tawh, mahse a la thaw a, ka thaw ve huai ta thung! "Damdawi hi ei la, i muhil dawn nia" tiin Diclowin plus chu ka kheh sawk sawk a, no a ka tui dah chu ka pe zat bawk a, rawn thutchhuah pawh harsa a ti ngang mai! A khawilai tak nge nâ tih lah ka hrethei dêr lo lehnghal!



"Ka lawm e!" Ti supin a mu tha sawt sawt a, lehlam a hawi ták daih vang chuan mutthilh a tum anih ka ring a, ka lawm hle mai! A mutthilh theih chuan a nâ a zia dawn tihna a ni a, chu chu alawm mawle ka duh ber le! "Thawnthu ziah chu i duh lo tak tak emni?" Rawn hawilet tawh chuang lo hian a ti sup a, a ngaihna hre lo zetin ka mengphâwk em em ringawt!



"Nun thar, bung thar, hun thar leh hmun thar nen, kan pahniha kan nun thawnthu kan ziahdun chu i la remti lo tho maw?" Tiin a nui ro hak a, a nuih zawng chuan a thin a nâ nge mawni? A thaw deuh hraih mai, "mutthilh tum rawh, zinglamah kan sawi tha leh dawn nia" tiin ka lo chhâng mai a, ngaihtuahna erawh a kalthui ve kher mai! Muanzuala vanga ka natna pawh ka lo hre chang tawh hauh lova, buaina in min al hneh ve bawk ém a ni! Lehlam kawng zawng tak chuan a lawmawm ka tiin, ka thawveng zawk daih!



Mahse chutih rualin Saidingliana ka ngaihtuah a, ani hian a ngaihzawng ni turin min duh! Ni e, ka hre lo a ni bik lo, ka hrechiang lutuk a, hrethiamlo angin ka awm der mai chauh zawk a ni! Ani hi ka duh lo! Chu thil chu sawi ila dawtsawi ka ni maithei! Ka hre bik lo le, khatih hun chhung zawng khan, ni e, min biak duh loh a, ka laka a hel char char chhung zawng khan hrehawm ka ti hle anih kha! Emma-i nena an inzui hlekin ka thinrim em em thin a, chhan sawitur hre mumal hauh si lo khan ka na ngawih ngawih zel anih kha! Ka pha hauh lo..



Mahse ani hi ka mipa duhzawng a ni ngai lova, ka dream thin ang mipa nen khan chhete mahin an in ang lo hulhual tih theih a ni! 'Mipa ngawichawi, tawng tlem tak, mahse a thusawi chhun hnial ngam ni miah lo' chuti ang mipa chu ka zawng fo thin a, Saidingliana erawh mipa azawnga tawngthei fâl nalh! A hun leh hmun a zira inla fêkfawn thiam em em roh si! Hnial loh theih loha khawsa tlat thin mipa a ni thung a..



'Hna tha tak nei, min chawmzo ngeitu leh min care a, min hmangaih hliau hliau tu, sport lam pawh ti thei ve tak! In fit ve deuh tak ni se!' Tiin duhthu ka sam fo va, ka duhthusam chhanna chu Saidingliana, college kal lai, lehkhazir thatchhe zet, min care ngai reng reng lova ama khawsak dan dana khawsa phut phut thin, football takngial pawh khel thiam map lo hi a ni thei dawn emni? Mahse amahah hian thlamuanna mak tak ka hmu tlat a, ka ring miau mai bawk si!



Rei ngial ka ngaihtuahna kawma khum tláng ka bawh hnuin ka lo muhil a ni ve ngei ang! Zinga ka thanharh ve meuh chuan ní a lo chhuak iar tawh a, khum tlâng bawh khan ka muhil si a, mit ka men chuan khumah ka lo mu daih thung a, Saidingliana hmel reng reng ka hmu hauh lo! Reilote chhung chu ka thluak a fim lova, mahse a rei deuh a, a fím tan tual tual a, thuchhuak hlawlin ka indap rawk rawk a, ka phone reng reng ka dap fuh zo hauh lo!



Nizanah ka haw lova, ka chhungte an lo mangang tawh khawp ang! Hmeichhia ka ni a, ka bo daih chuan tawhsual ka tawk emaw an lo ti thei, a nih loh vêk pawhin pasal ka úm emaw an lo ti anga, Aw Lalpa leh! Zialo lutuk zia lo lutuk! "Saidinglian!" Ti a au tuarin room kawngkhar ka pawt hawng rawk rawk a, choka atanga thil rimtui zet rawn nam chek chek vang chuan ka ding leh dat thung a, mahse ka ding rei lo! Rang lutuka tlanlutin, "khawnge ka phone?" Ka ti lut bawl mai..



A kuta frying pan keng lâk lâk chung hian min lo nuih var var a, ka zawhna min chhân mai loh avang chuan thinrim zet hian ka melhrum vak a, a nuih hawk chhan lah chu ka hre der lo lehnghal! "Thophang hmel pe chhe nu! I nu nen kan inbe tawh e Teber, hlauthawng suh chaw eikhamah kan haw dawn nia" tiin a lama kal turin min hui zauh a, ka thaw hawk! Ka thawl huai huai bawk a, an lo inbe kher kher chu ka lawm ngang mai!



A lam panin a eirawngbawlna bulah chuan ka thu ta reng a, enge a siam pawh ka hre lo, ka pum a rík raih raih danah a siamtui hle ang tih erawh a hriat! Chil a ti put thei mai dawn alawm mawle! "I ril a tam tawh em?" A lama min pawh hnaih thut rualin a ti sup a, a taksaah ka bei chian em avangin ka hamhaih zo a, ka thinphu dawt dawt, in thum rawn tlut tlut chu ngaithla in ka ngawi reng a, chutah, "zing lama kan sawi that tur chu, hei, zing a ni tawh ania, sawi tawh ang!" A ti leh sup a..



(En teh u han inngaihzawn tan tir dan hi ka hre tlat lo mai a, a holam deuh in tih pawhin ka dem lo che u aw😅 comments kha aw)


End of chapter - 9



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)