YOU AND I - 3

Episode kal lai dah luhna

Moderator: writers

SumMer Ralte
Posts: 104
Joined: September 6th, 2021, 11:35 pm

YOU AND I - 3

Unread post by SumMer Ralte » January 22nd, 2022, 6:17 pm

CHAPTER-3






Ka phone khuma ka dah chu la kangin ka rilru a lang hmasa ber Zama number chu ka hmetchhuak a, ka call zui nghal zat bawk, "I zinna chu nuam i ti hle mai maw" call a chhan rual chuan a ti a, a nui zui hawk bawk, "Zam" sawi tur dang ka hre lova engvanga ka rilru a rawn lang thut nge a nih pawh ka hrethiam chuang lo








"Aw engnge ni ta? I tha em?" A aw atang chuan ka tha chiah lo tih a hrethiam ve a ni ngei ang min zawt nghal a mahse ka chhang thei lo, "Zualte i tha em min chhang teh" a rawn ti leh a, ka la chhang ta chuang lo; sawi tur hi ka hre thlawt lo a ni. Engkim chuan min thawng vel vek ni ber hian ka hria a, ka ham haih vek bawk







"Ka tha e engmah a ni lo" eng emaw chen ka ngawih hnuah chuan ka tichhuak ve thei ta hram a, Zama hrilh chu thil tha ber a ka hriat loh avangin ngawih ka chuh leh ta zawk kha a ni bawk a; "Khawnge i awm, lo sawi la ka lo kal ang" a tih chuan ka nui chhuak hak a, harsatna emaw keimaha danglam hlek a hriat chuan min ngaihtuah thei em em a; engtik lai pawhin ka bula awm a inpeih reng thin







"Ka lung a leng thut a" ka tih chuan leh lama mi chu a nui ta hawk hawk a, "Min ti hlauthawng hman alawm, i tha hrim hrim em?" A tih zawm leh nghal zat a, ka that thua ka chhan hnuah ka hun hman dan te chu min zawtin nuam ka tih leh tih loh thu te chu min zawt a; nuam ka tih zia te chu ka hrilh ve bawk, rei vak lo kan inbiak leh hnuah kan inbiakna chu ka ti tawp a, phone khuma ka dah thlak leh rualin thawk ka la zui nghal hak bawk







A eng ber khan nge ka tah tichhuak a hetianga min siamna chhan ka hre lova, ka ngaihtuah let phei chuan ka nuih te pawh a zawk; kum tam tak a liam tawh a khang hunlai ang maia tleirawl mawlmang tak leh nep tak kha ka ni tawh lo tih ka lantir ve angai tawh, hun a liam tawh ka theihnghilh tawh a ni tih leh hma lam ka pan tawh a ni tih hi hria se ka duh








Pangngai takin hun ka hmang ve zel a tunah chuan thla khat lai ka awm tling leh ta reng mai, naktuk maia haw ka tum tawh avangin vawiin chu insiam nan hun hman ka tum a insiam tur em em phei chu awm lo mah se kal lam aiin haw lamah hi chuan kan lo bawr veleh tawh thin bawk nen eng emaw chen chu insiam ka ngai ve tho mai; "Haw lo mai teh" Tluangzeli'n a tih chuan ka nui hak a








"Timaw?" Ka tih chuan, "Kan inhmu leh mai mai tawh awm si lova, i ngaihawm dawn em a mawle" a tih chuan ka nui a, keipawhin ka ngai viau ang ka thiannu mai bakah a pasal leh fate pawh hi ka ngai dawn lutuk; awm rei em em lo mah ila ka tan an theih tawp an chhuah a, ka awm chhungin nuamsa thei ang bera min siam bakah min duat thiam hle bawk a








"Hun awm leh veleh Ahmingi nen pawh lo kal kan tum ang a, keimah hi ka buai thei lutuk a hun hi ka nei lo zawk thin em a" thupha chawi paha ka tih chuan a bu nghat a, "Ka dem lo mai ang che, i nih dan ve hrim hrim a nia" nui hak hak pahin a ti a, hei tak hi ni Tluangzeli rilru thatna chu. Han lungawi lo ve thin bawk mah se a rei ngai lova, mi hi a hrethiam nghal zel thin bawk a








Zama'n min lo hruai leh a tum tlat avangin ka hnial lui thei ta bik lova, eng ang a nasa pawhin han hnial ve thin mah ila ka hnial tlang thei lo chu a ni ber; a chang chuan min ngaihsak thin lutuk hi ka inthlahrun phah zawk thin a mahse a ni chuan inthlahrung lo tura min tih bakah nuam a tih vanga hetiang thil ti a nih thu min hrilh thin a, thian fel tak tak ka neih rualin ka thiante tana ka tling lo lutuk hi ka inthlahrun phah tho mai








Thim hlimah Zama pawh a rawn thleng a, Tluangzeli te nen pawha in hre sa an lo ni bawk nen an tlang nel hma phian a; zanriah eikham atangin an titi nghal bawrh bawrh a, Tluangzeli pasal pawhin a ngainat hmel kher mai, "Zama hian a duh che in ka hria" ka beng bulah chuan a rawn ti sa sa a, phawk fe a lo en pahin, "I ti awm ang lo lutuk" ti niah niah pah chuan a nakah ka nghawk pah zeuh a







"I hrethiam duh lo zawk ni maiin ka hria" a tih leh chuan, "Hriatthiam tur a awm pawhin ka lo hre hleinem, a ni te chu ka thiantha lutuk a ni tih i hriat kha" ka lo ti tha veleh mai a, lu thin mat mat pahin, "A hma atang tawh khan a ngaihsak thei riau che a, tlem tal chuan a duh dawn hrim hrim che; nangpawh hian i hun kal tawhte theihnghilhin Zama hi duh la ka tihpui khawp mai che" a ti leh a, a fiamthu emaw ti a ka en chuan a lo fiamthu hauh lo a ni tih a hmel awmdan atang chuan ka hrethiam mai a








A tir atang Zama hi ngaihzawng en a ka en loh mai bakah a ni chu ka tana thiantha lutuk a nihna bak hriat ka nei lo bawk, "Sama i la hmangaih reng a ni tiraw?" A rawn tih chuan amah chu ka en nghal vat a, Tluangzeli pawhin chik zetin min lo en ve reng bawk, "Aih...teuh lo, a ni te chu ka theihnghilhna a rei tawh alawm" thenkhum sak paha ka tih chuan a awih hmel viau lo leh nghal a








"Theihnghilh tawh ni la chuan hma lam i pan ngei ang" a ti leh a, eng nge maw a hriat a chutiang thute a sawi tak chiam ni, chhan dan tur mai ka hre lova a nihna takah chuan Sam chu ka theihnghilh tawh chiah em tih pawh ka hre chuang lo; ka theihnghilh tawh ti ve bawk thin mah ila a hming leh a chanchin an sawi apiang hian engtin emaw riau hian keimahah hnathawh a la nei thin a, ka awmdan pawh chu a danglam nghal vek thin tih ka hria









Chutianga ka awmna chhan lah ka hre der ngai bawk si lo, ka mipa hmangaih hmasak ber kha a ni ve tlat a; eng emaw chenah a hming leh a chanchin ka hriat thin hian min la khawih tih chu ka pha lo, theihnghilh ka duh a mahse theihnghilh hlen tur em chuan ka thinlung hian a phal chuang bawk si lo, "Theihnghilh turin ka ti lui lo che mahse amah avanga tumah ngaihsak i tum lo leh i nun ho taka i hmang ka hmuh hian ka rilru i ti na em a ni" a ti leh a








Hetiang zawng hian kan inkawm atangin ka thiannu hian vawikhat mah a la sawi ngai lova, a sawi chhuak ve tawh a nih chuan min ngaihtuah ve hle ni turah ka ngai bawk; "Ka nun ho takin ka hmang hleinem ka hmang tha lutuk zawk a nia" nuih sak paha ka tih chuan min en reng a, min en dan chu ka duh lo khawp mai hetianga min khawngaih hmel zeta min en hian min ti na zawk daih, "Tikhan min en suh" ka ti leh ringawt a, ka awmdan chu thup hram hram ka tum bawk








"Nangni thian dun chu eng thu lungchhiat thlak nge in lo in fah leh tak" fiamthua Tluangzeli pasal in a rawn tih chuan Zama pawh chuan min rawn en ve nghal vat a, ka mittui tling pam mai a hmuh rual chuan ka that leh that loh min zawt leh nghal chat bawk; "A haw dawn sia ka ngaih tur thu vel ka lo hrilh mawle" nuih sak paha ka bula miin a tih chuan kan mipa te pahnih pawh chu an nui ve a







"Hmeichhia hi chu an heti tlat zel, mittui te hi ho teah an ngah thin viau a nia" nuih hawk hawk paha Zama'n a tih chuan ka melhrum nghal hra a, sawi ve tur phei chu ka hre lo nain ho teah chuan ka mittui hi ka ti tla ngai bik lo tih amah tluka hrechiang an awm ka ring lo; hmeichhe der dep tak leh chak lo tak ang a lan ka duh tawh lova, hmeichhe chak tak ang a lan ka tum zawk hram hram thin








Hma taka chhuak tur kan nih avangin rei pawh meng tawh lovin mut zai kan rel ta zawk a, helai hmun ka kal hi ka hlawkpui ta chiah em tih pawh ka hre lo; in ti thawveng tur leh hahdam tura kal ka nih laiin ka tum loh dan deuhin thil a thlen mai bakah ka nun tibuai zo vek tu ka tawng ni ta berin ka hria a, ka thil hriat tak zawng zawngte kha ka tan tangkaina an nei chiah em tih pawh ka hrechuang lo








"Nuam i ti em?" Min rawn en zawk pahin a ti a, hma lam chu a hawi leh nghal a, "Nuam tak a ni" nuih sen sen paha ka tih chuan a bu nghut a, "A ni ngei ang, i thlen hlim atangin min theihnghilh nghal der a nia" fiamthu ti tak si a a tih chuan ka nui hak hak a, hun chu ka hmang nuam ngei mai a mahse kha thu kha chu hre lo ta ila chuan ka hman nawm leh zual pawh ka ring a ni







"Tikha chuan hlim reng tawh la, boring viau tum tawh loh tur aw" nuih suk pahin a rawn hawi a, a kut pakhat chuan ka chhip chu a rawn tuai pah zeuh bawk; "Lalzamlian over viau thin teh suh, naupang chhe treat hian min treat reng mai" ka ti nang nang a, a ngai haw hran lo bawk a a nui leh hawk hawk tawh; "Ka hmingpum lah hian min ko lawl lawl zel leh nghal a" a ti a, ka nuichhuak nghal hak mai








Engati tehreng nge maw ni a hmingpum ngat hian ka ko thin a, a duh lo tih hre reng mah ila ka lo ko leh thin a mahse a ni pawh hian ngaiah a neih phah tawh ni berin ka hria; a tir kha chuan a lungawi lo viau thin kha a nia a hmingpum a ko tawh lo tur hian min ti ziah a, ka sim phah lem chuang lova amah pawhin a sawi peih tawh lo bawk, "I duh chuan muhil la, thil ei dawnah ka lo kai tho mai ang che" a ti a, motor chuan tawh hi chuan ka meng hleithei lo hi a ni ber e








Ka mut a chhuak nghal em em thin a, thui deuh hlek tlan tawh hi chuan ka lo bu leh lawp lawp thin a tunah pawh ka lo bu leh nasa tawh viau a ni ngei ang; ka awmdan siam rem sat sat pah chuan mit ka chhing zui hmiah a, ka lo muhil ta a ni ngei ang min sawi nawk nawktu an awm avang chuan ka harh zawk a, "I ril a tam em? Saw laiah sawn thil kan va ei lawk dawn mi niang" a tih chuan pawn lam chu ka hawi kual nghal ruai a







Ka rin aiin kan lo thleng thui hman viau mai, ka pun ri rawk rawk chu ka dawm nghal vat a, "A tam ve a nih dawn hi" then khum sak paha ka tih chuan a nui hawk hawk a, a fakawm ka tih thinna em em chu engtik lai mai pawha a nui hmel hmuh tur awm thin hi a ni; ka hlim lo deuh a a hriat pawhin min tih hlim dan ngawt zawngin thiam lo mah se fiamthu te min thawh sak thin a, keimaha awm a phal ngai lo ka tih tawh kha chuvang chuan ka bulah pawh a awm reng thin a








Kan inngaizawng a maw ti tu pawh kan tawn phah nual thin reng bawk a, kan ngai haw hran lem lova kan nuih liam san mai thin bawk a; a phur thut chang phei hi chuan thawhpuitute hmuh tur leh hriattur kher hian min duat vel thin a, tul hi ka ti lo nasa thin viau a amah lah hi nuam ti ber berah a tang a maw tih mai tur hian a khawsa vei thin bawk nen ka ngei lek lek thin







"I puar em" a tih chuan lu buk nghat nghat pahin, "Puar tak ka ni, kal lamah khan khami te dawrah khan kan lo chawl zawk lo a ni" ka tih zawm nghal zat a, a ni reng bawk a a awm tih ka hre lova puar lo deuhin ka awm phah kha a nia; "Tinge hmundangah in chawl a mi" a tih chuan, "Chawl e, an siam tui lo lutuk a puar lo deuhin ka awm phah alawm" ka ti nang nang chu kawng dawm pah meuhin min nuih a








"Engnge?" Ka lo ti ha chu lu thin nawk pahin, "Naupang chhia ang mai alawm mawle i nih le, khatiang ang a i awm lohna chin pawh a rei lutuk a i inhmeh tawh lo tep a ni" a tih chuan lu thak lo pui hiah nauh nauh pah chuan ka nuih ta ringawt a, ka chhungte leh ka thiante tluka min hrechiang hi an awm ka ring lo; ka nun inthlak danglam nasat zia hretu pawh an ni reng a








Ka nui ngai meuh tawh lova, ka hna bak ngaihtuah ka nei lo bawk; dam reng chung si a thi ang mai ka niin ka inhria, mipa min ngaizawnga min rawn be tawk pawh an awm ve thin mahse ka ngaihsak ngai loh chu thuhran min be tawh lo turin tha takin ka lo hrilh thin bawk a; a hma pawhin ka hnaih ngai lova mahse ka hnaih ve chhun leh rilru zawng zawng ka pek ve hmasa berin na takin min hliam a, min kalsan leh si a nih kha







Chuvang chuan mipa hnaih leh hi ka duh tawh ngai lova Zama tak ngial pawh, mahse a ni chuan min hnaih tang tang a ka biak chhiat ber lai pawhin ka bulah a awm tlat thin; ka nat leh a hlauh avangin ka bulah a awm reng thin a, min tih hlim dan mawlh a zawng reng thin bawk. Hemi a nih avang hian keipawhin ka ngaina lo thei lova, ka thian a nih piah lamah u ang tak takin ka en bawk; a bulah chuan ka pangchan mai bakah ka harsatna ka thlenna ber a ni bawk








"Zualte kan thleng tawh aw" tih riah chuan ka harh a, khua a lo thim fel vek tawh, "Kan thlenna a rei tawh em?" Ti a ka zawh chuan ngeiawm zeta a bana a bun a sana en pah chuan, "Kan thlen hnu atangin darkar chanve chu i mu tling tawh" a ti a, ka lo ner khum nang nang thung, "Kan thlen tawh te chuan min kaihthawh nghal mai tur che alawm" ka tih chuan, "I mutui em a, ka kaitho hreh che a nih kha" a ti a, heipawh hi a tih dan ziah a nih avangin ka sawi buai peih ta lo mai








"A nih chuan ka lut nghal mai dawn asin" ka ti a, lu min buk khum zeuh a, "Min rawn hruai vang vang a, ka lawm lutuk a nia aw" ka tih leh chuan a nui hawk hawk a, "I tana ka tih ve theih tawk a nih kha" tih te in min chhang thung. Motor atanga ka chhuk hnuah kal ta mai lo chuan, "Ka lawm lutuk a nia" ka ti leh hram a, "I lawm zawh leh theih loh hma khan lut vat la a that ka ring" ngeiawm zetin a ti a, a nui zui suk bawk








In chhung ka luhin ka nu chuan min lo buaipui nghal vat a, ka nau te pawhin ka bungrua vel chu room ah min thiar chhohpui bawk a; "A nuam em i han zinna chu" ka pa in a tih chuan, "Nuam tak a ni" nuih ver ver pahin ka ti a, "A tha e, han intifai nghal la chaw te i rawn ei dawn nia" a ti a, ka ril pawh a la tam lo khawp mai; restaurant a kan chawlh khan ka ei hnem bawk a min la puar viauin ka hria







"Thil ka rawn ei teuh a ka ril pawh a la tam lo khawp mai" ka ti a, inthlak tura chho ta mai lo chuan an bulah te chuan thuin ka zinna chanchin leh ka hun hman dan vel te chu ka hrilh a; ka nu chuan a kal ve chak thu hlir a lo sawi thung, "I nu i rawn awhfik a ni ringawt alawm mawle" ka pa in a tih chuan ka nui hak hak a, ka nu chuan hetiang lam hi a ngaina bawk a a chak kha ka rin sa a ni reng bawk a








"Engpawh chu nise, han intifai la nakinah kan sawi zawm leh dawn nia" ka nuin a tih takah chuan intifai turin inchungah ka chhoh san a, room a luh rualin khumah chuan ka let thla nghal tawp a; tunah chuan chhungkaw pangngai tak ni tawhin in leh lo tha tak kan neih bakah kum hmasa lamah kan in hi kan sa tha bawk a, ka pa pawh damdawi tha tak hmanga enkawl a ni tawh bawk a, hna lian tham chu la thawk thei chiah lo mah se a hma ang em em kha chu a ni tawh bik lova







Kan vanneih zia ka ngaihtuah hian ka lawm a, hetiang dinhmuh thleng thei tura hma min laksak tu leh kawng engkima min pui reng thintu, kan pu ber leh Zama pa chungah hian ka dam chhung zawngin lawmthu ka sawi zawh theih pawh ka ring lo; Nonoi erawhin BA a pass chhuah hnuah zir zawm peih tawh lovin a tuina lam zirin tunah chuan mi kut te chei sakin hlawh a nei ve tawh a, Tetei erawh college a kal mek thung








Kan hlawhte chu mahni a hmang ral mai lovin chhungkaw hman atan kan chhung khawm thin a, ka nu leh pa ten a tul dan ang a lo sem darhin chuta tang chuan kan hman tur min pe leh mai thin bawk a; nula pangngai tak ni tawh mah ila kan khawsak thin danin a zir vang ka ti zawk dawn nge ngaiah kan nei tawh a, tunah chuan engtin nge kan hman ang a, khawi atangin nge pawisa kan hmuh ang tihah pawh kan buai tawh lem lo khawp mai








Rei pawh mu lovin inbual turin bathroom lam ka pan ta nghal a, tuilum a han inbual tawh hi chuan hah te hi a dam sawng sawng thin ni maiin ka hria; ka chhuah leh hnuah inhnuaiah chuan ka chuan ka chhuk thla leh nghal a, an tih dan ngai tein ka nu leh pate chuan tv an lo en leh tawh a, an bulah chuan ka thu ve nghal zat bawk. "U thil chu min lo hawn ta em?" Choka lam atanga lo phei pahin Noi chuan a ti a







"I ti tak tak a mi?" Ka tih chuan a ner nghal nang a, "Ti tak tak lo ila min lo hawn turin ka ti nang che" lungawi hmel loh zet chuan a ti nang nang a, ka lo nui hak thung, "I tih tak tak ka ring lova bakah ka lo theihnghilh leh daih tawh alawm" ka tih chuan, "Nula senior i nihna hi a lang leh thin" thawk lak hak pah chuan a ti a, ka va han ngei mai mai thin tak. Ka nau te hi ka bulah chuan an pangchan bakah min ring em em bawk a, an naupang chhia viau thin bawk







"Nula senior chu ka la ni bik chiah lo a nia" ka tih chuan hmui min tih pawrh khum tarh pah chuan, "Nang te chu i tleirawl chhuah hlim atangin i senior nghal" a ti leh zel a, a lungawi loh deuh hlek lah hian nula senior tih hian min chhaih ziah leh nghal a; ka duh loh zia a hria a chuvang chuan min chhaih pawh nuam a tih phah em em bawk a, "Ka kal leh hunah ka lo hawn tawh dawn che nia" ka tih chuan, "I kal leh hunah chuan ka duh tawh lo mai thei asin" ngeiawm zetin a ti leh kher a








"Nu ka û hi a pasal tur zawn sak teh u, pasal a neih vat loh chuan haihawtin a thi thak thei ang" a tih chuan ka melhrum nghal hra a, ka nu leh pa te erawh an lo nui dun hak hak thung; he nau hi chu a ngeiawm leh chimawm a chhuah tawh hi chuan a ngaihna a awm lo ka ti dawn nge, inhnialpuiah pawh hian ka hneh mang thin lo, a chang hi chuan han inngeih dun ve viau thin mah ila a rei lo thin khawp mai







Eng emaw chen ka thut hnuah ka chau ve deuh avangin mu turin ka chhohsan a, khuma ka mut rualin ka muhil nghal a ni ngei ang ka harh leh chuan khua a lo eng leh uar tawh a; la thochhuak nghal mai lovin khumah chuan ka thu reng a, ka nui nghal sak bawk, chhuak tak leh tui taka ka mut tawh lohna chin pawh ka hre lo, ka mutthilh theih lawk ngai loh avangin mu tawh reng chung hian darkar eng emaw zah hi chu ka meng thleng ngei ngei thin a








Ka mut a chhuah viau laia ka mut ve pawhin ka mumang vangin ka harh leh ziah thin bawk tihte ka ngaihtuah chuan nizan ang renga ka muttui kha kum tam tak hnuah ka vawikhat hriat lehna a ni ngei ang, tui taka mut lo nawm zia ka hriatchhuah thar leh phah ni maiin ka hria a; khatiang khan mu reng thei ila ka ti khawp mai. Hna ka la kal nghal mai dawn loh avangin vawiin chu Ahmingi hmuh ka tum a, tukthuan eikham atangin ka insiam nghal mawlh mawlh a








"Vawiin chu hna i chawl dawn a maw ka tia, i ka leh si dawn a law" ka nu in a tih chuan, "Kal dawn love vawiin chu Ahmingi va hmuh ka tum deuh a, kan inhmuh lohna a rei ve tawh bawk sia" ka tih chuan a bu nghat a, "Ni e, i thiante pawh hi i tlawh khat lutuk a an lo lungawi lo ru reng tawh mai thei a ni" ka nu chuan a lo ti ve bawk, Ahmingi nen pawh hian kan inhmu khat khawp a, a ni a dawr a zauh belh ve zel bawk nen a buai ve a keilah nise ka hna ringawt ka buaipui nen kan inhmu khat dun viau reng a ni








"Ka kal a nia, ka lo haw har lovang" ka nu bulah ka tih chuan, "Nuam tak khan hun in hmang dawn nia" tiin duhsakna min hlan a, ke a kal ka duh zawk avangin ke chuan ka kal a; tih tur pawimawh ka nei lo bawk a amah hmu tur chauh a kal tum ka ni bawk nen ka hmanhmawh lo viau bawk. Ka hrilh lawk lem lova a awm chu ka ring nghal tawp a, a dawr bul ka thlen chuan a lo awm reng bawk a; pawn lam atanga en pawhin a buai hmel khawp mai








"Awi nang hi i la dam ve alaw" min hmuh rual chuan a ti a, ka lo nuih hak hak thung, "Ka la dam ve chu a nih hi" ka tih zawh rual deuh thaw chuan min rawn kuah nghal chung chung a, "Awi ka ngaih zia che hi i hria em, induh leh lutuk mai" min kuahna atanga inlak hran pahin ka ban puama min ben pah chuan a ti a, "Tluangzeli te khuaah ka zin a" ka tih chuan, "Ka hria lawm min rawn hrilh a" a lo ti ve nghal zat bawk








A thutna lamah chuan min kai phei nghal dawr dawrin min thut tir ve nghal a, "A nuam em an khua chu, ka kal ve chak asin aw....i kal dawn te chuan mi pawh rawn hrilh ve tur che hi a nia" a tih zawm leh nghal zat a, chutiang lam reng ka lo ngaihtuah miah lova; hahdam a in ti thawveng tur ringawt a kal tum kha ka ni bawk a, Ahmingi pawh ka lo hre chang tawh lo tih ka hriatchhuah chuan ka inthiam lo ru ang reng khawp mai








"Nia, ka buai lutuk bawk nen ka kal thut bawk sia i kal ve duh ang tih rin ngaihna pawh ka lo hre lova" thupha chawi pah chuan ka ti a, "A pawi lo, i kal vangin ka kal chak thu ka sawi ve mai mai a nih kha...hrim hrimin i dam reng reng em, kan inbe khat lutuk a, chanchin pawh kan inhre pawh tlang hlawm tawh meuh lo a nih hi" a ti a, thian ngaina tak leh kan inkawm ho lai pawha a nu damloh chungchangah pawh min ko khawma amah awmpui tura ti thin kha a ni bawk a; a khawhar theih thin tur zia te chu ka ngaihtuah chhuak a









"Dam ve tawk tawk chu a nih hi" tih ringawtin ka chhang a, "Engnge tunlai i tih ber, i hnaah bak i buai leh pek lovang a" a tih chuan lu buk khum nghat pahin, "Ni deuh tawp mai, hna ngawr ngawr hi nimai" tiin ka lo chhang let ve vat a, eng eng emaw te sawi pahin thingpui te chu kan in a; a buai ve tawh zia leh a nu buaipui ngai bawk nen min biak hman loh thu te chu sawiin a inthiam loh thin zia te chu a sawi a








Kum hnih kal ta khan Ahmingi nu hi cancer a ni tih hriatchhuah a ni a, a neihchhun a ni bawk a a nu tan chuan insen a ui loh zia pawh a hrechiang bertu te zinga mi ka ni pha ve hial ang; tihian a theih ang angin a enkawl a, awmpui a lak thu leh a dawr kal chhunga a nu a lo enkawl thin thute chu a sawi bawk a, "Pasal neih vat i mamawh a nih kha, nangmah chauha engkim buaipui chu a hautak dawn emai" ka tih chuan, "Nih chu a ni viau a mahse pasal tur pawh kan la hmu zo ve meuh lo chu a nih hi" nuih uar uar pahin a ti a








"Tluangzeli angin in ruk tir ve hmiah mai tur che lawm" ka tih chuan a nui hak hak a, "Min ru tu tur chu hmu ngat ila, ka nu chhawm telin ka inruk tir duh a nia ka rin ni" a ti veleh a, thildang te sawiin kan titi dun barh barh a, kan inhmuh lohna leh kan inbiak lohna pawh a rei ve tawh a sawi tur ngah teuh chung siin sawi ber tur pawh kan hre lova; kan sawi zo hlei thei lo chu a ni ber mai, a tlai tak em avangin keipawh ka haw ve ta nge nge a








Ka tum aiin ka rei daih leh nghal, thiante lo hlut zia pawh ka theihnghilh hman tep a ni; ka inthlak danglam nasa lutuk a khawvel mai pawh ni lo ka thiante lak atang pawha ka inlak hran tlat avang hian hlimna zawng zawng te pawh a bo hman tep niin ka hre hial. Hna ringawt atchilh tih takah ka thiante chanchin pawh ka lo hre mang lova, hman leh veleh Ahmingi nu pawh chu kan ve tha in ka hre bawk








In ka thlen chuan ka nu in rawng a lo bawl mek a, inthlak nghalin ka nu rawngbawl pui tur chuan ka chhuk thla nghal vat a, "Vawiin i chhuahna te chu nuam i ti em?" Ti a min zawh chuan nuam ka tih thu leh ka thil hriat ang ang te chu ka nu ka hrilh ve bawk a, "A zia lo thin emai, mahse a natna hriatchhuah theih lova awm reng ai chuan a tha hrim hrim alawm, enkawl dan tur te pawh a hriat theih tawh ang a" a ti ve niah niah a







"Nia pawi ka tihpui rualin a natna an hrechhuak ta pawh chu a zia ka tihpui khawp mai, nakinah hman veleh la tlawh ve tur a ni" ka tih chuan ka nu chu a lo bu nghat nghat a, "Ni e, nangpawh han awm awl leh deuh la kan la kal dun dawn nia" a ti a, ka nu hia a ngaihtuah ve zia pawh ka hria a, kan a tum lai khan kan chhungkua kan buai ta nuai nen rilru mangang takin kan awm a; thildang kha rilruah a awm thei meuh lo kha a nia








Tunah chuan kan pangngai chho tan tawh bawk a, a zia khawp mai; ka nu lah nise pangpar ngaina tih takah kan in leh a chheh velah te chuan pangpar a vul chuk reng a, a nuam tih ber kan kawtah chuan thlai lem a zawng a ching tel bawk a, nawmsak tum hmasak ai chuan hrehawm lo tawrh hmasak a a hnua nawmsak lo hlut zia leh lo nawm zawk zia te pawh ka hriatchhuah hialin ka hria








Zanriah eikhamah thawhpuiten hna tlem a zawng tih tur min lo thawn chu ti turin room lamah ka chhohsan ta daih a, hna atchilhin nuam ti thin pawh ni mah ila awl hun ka nei lo lutuk leh in lamah tak ngial pawh a chang a chhungte bula awm hman lo khawpa tih tur a tam thin erawh ka ning thei thin hle a; han sawisel vak ngaihna lah a awm lo bawk si lova, ka hna a nia ka tih tur a nih chuan tha taka tih hlawhtlin tum mai kha ka tih tur niin ka hria








[Khawngaihin min lo chhiar sak zel ula min lo chhiar thintu te zawng zawng bulah pawh lawmthu ka sawi bawk a, chuan in chhiar apiangin ads click, like leh comment kha min lo tihsak leh hram hram dawn nia🤗]



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)