CALL GIRL CHAPTER-22

Episode kal lai dah luhna

Moderator: writers

Tomtomputara
Posts: 159
Joined: December 3rd, 2021, 1:17 am

CALL GIRL CHAPTER-22

Unread post by Tomtomputara » January 27th, 2022, 5:43 pm

CALL GIRL
Chap~22



By : Tom Tom Putara





Ka In luah ve tur chu ka hmuchâk tawh takzet a. Ka ke pên pawh a zâng deuh vahin ka hre nghe nghe. Maduhi pawhin ka awmdan leh chezia ah chuan a hrethiam a ni chêk ang chu...min nuih leh ringawt ṭhin a. "Tah khan chhuk tur..." a rawn tih rual chuan ka ding dat a. Step chhukna lam chu ka hawithla vat bawk a.








Maduhi bawk chuan, "Ngawi rawh lawk...an awm ange maw? Chahbi te kan lak loh te chuan...." tih mawlh mawlh pahin min kalsan zui nghal a. Rei vaklo hnu ah Nu thau ve lampang nen an rawn inbe chhuak mawlh mawlh a. "Hei hi ka ṭhiannu chu ania.." tih pahin min rawn pan phei dun zel a.








Min en duh hle a, ka ngaihtuahna zawng zawng nen hmuh vek a tum ni ber hian ka hre tawh. Ka lo nuih lui sak a, nu thau tem tum-i chuan, "Nakinah kan inbe chiang dawn nia..zuk en chhin teh u" tih pahin Maduhi chu Chahbi chu a pe a. A mit erawhin hmundang a hawi lo. Min melh ngar thung a, a nuamlo ru duh phian mai.








In chhung kan lut chu luahtu awmlo na na na chu a rimtui vak lem lova. Ka hawikual vel a, engkim mai chu a felfai thlep reuh a. Maduhi pawhin pindan lam te a lo melhkual ve reng bawk a.








"Ṭhiannu, ka va lawm tak em...hetiang anga In ṭha, ka tana luah zawh tawk lek tur min hmuhsak a. Ka lawm lutuk ania..." nui sen sen chungin ka hawikual pahin ka ti mawlh mawlh a.








"Tih theih ka nei lo em mai a...a ho lutuk. Lawmthu sawi angai reng reng lo" min rawn bêng thak thak a. Ṭhutna ah chuan a ṭhu zui nghal a. "Lo ṭhu teh..." a ti leh ringawt a. Kei pawh thuawih takin ka ṭhu nghal vat a. Min melh ralh pah chuan, "Engtinnge a tih?" a rawn tih zawm zat a. A zawhna min pek chu ka man thiam nghal chiang hle bawk a.








Ka thaw hak a, beidawnna mitmeng nen Maduhi chu ka melh ralh a. "Ka hrethiam lo..." ka ti ringawt a. Engmah dang sawi lo chuan kan ṭhu ngawi reng a. Nui lui sak chungin, "Ka mamawh hmasa zual pui min han chhûtpui teh. Naktuka ka luh phei hman chuan a ṭha dawn em a..." ka ti leh daih a.








"A mak thei rum rum ṭhin mange..." tih pahin min nuih sak a. "Engpawh nise...chhuak phei ila...kan Bazar kual phei dawn nia" Maduhi chuan a rawn tihzawm leh takah chuan ka thaw deuh huai a, kan inzui chhuak nghal a.









Chahbi a dahna ah chuan ka zui ve nghal a. Nu thau-i bawk chuan, "Engtik aṭangin nge rawn luah i tum a? Keini tan khutia a âwl reng khuan awmzia a awm lem lo ania" a lo ti hmuk a. Min melh rulh pahin, "Kan fapa hian a sawi ve nasa em a, ka tihsak mai mai che u ania. Ka u fate pawhin luah an duh tehreng nen...." a rawn tihzawm leh hmuar hmuar a.








"Ka pi...naktukah rawn luh hman ka tum ang.." inthlahrung zetin ka ti thâwp sat a. Rang takin Maduhi chuan, "Nia...naktukah rawn luh hman a duh a. Sangtea hi a awm nange?" min rawn tuihnih zat a.








"A ṭhat chu...aaaaa....khutia a ruak a awm reng ta chu mi hian min zawt ve sek mai a. In chhân reng hi a ninawm ve deuh maw le..." a rawn ti nêm ta deuh a. Chahbi kan pek khai ṭhat mawlh mawlh pahin, "Bawiha hi ka hre miahlo mai. A room lamah a awm nge a chhuak zawk ni?" a rawn tihzawm leh a.








Maduhi chuan min rawn nuih sak pahin, "Tirawh...kan chhuak phei phawt dawn em ni?" a rawn tih takah chuan kan inzui chhuak zui ta nghal a.








Ka In luah tur kan mitthla pah a, ka mamawh tur man tlawm si, a zualpui tak tak kan ngaihtuah a. Gas vel te erawh ka la nei remchang mai thei dawn lova. Inhnawhpuar dan ka zawn mai a ṭhat ka rin thu ka sawi mawlh mawlh reng a. Maduhi chuan a pawisa min hmantir a phal thu a sawi reng takah chuan Gas vel thleng chuan kan ngaihtuah ta zel a. Kan Bazar sâwt thei meuh lo.









Nilenga kan Bazar chhung pawhin ka phone hi vawikhat pawh a rawn ri lova. Aldrin-a chu biak hmasak ka tum hek lo. Ka induh lui ve tlat bawk a. Maduhi erawhin call a dawng ngun hle a. A bialpa chu a strict viau ni hmiang, an inbiak apiangin ka hriat a hlau em em ni mai hian ka hre bawk.









In kan thlen meuh chuan Tlai dar 4 a ri ṭep a. Kan in khai bâwr hle a, ka chau viau bawk. Ka luak a chhuak leh nghulh tawh a. Maduhi pawh a chau ve bawk aniang..ṭhutthleng ah chuan a mu zar a, phone a hmang pah mawlh mawlh bawk a.









Kan thil lei chu ka enkual dan dan a. Ka lawm in ka hlim ve viau tho mai. Keimaha inthlahrung miah lova khawsak thuai thuai ka châk ber bawk. Zanah erawh Aldrin-a chu engkim tlang taka sawipui ngei ka duh. Mahse, engmah hi ka hmalam hun sawi lawk a duanglawk ve thei ni pawhin ka inhre tawh lo.









Chaw kan eikham, kan han ṭhut mar zawh meuh chuan Zan dar 7 alo pel duai tawh a. Ka phone chu ka hmet mawlh mawlh a, 'In hmu lawk ang..thil pawimawh sawidun lawk angai' tih zawng Aldrin-a chu ka thawn a. Rei fe ka nghah hnu pawha a rawn rîk mai loh avang chuan ka lungawilo in ka thinrim takzet tawh.









"Ṭhiannu....i room ka hawh lawk" tih leh Maduhi room lama luh chu ka rual nghal a. Hmanhmawh zetin ka phone chu ka hmet sawk sawk hi a ni ber a. Ka ngaihthlak vang vang hnu chuan, "Hello..." thawm ri nuaih nuaih kar aṭangin a rawn ti ta hram a.





"Khawiahnge i awm a? A va bengchheng em em ve? I awmna sawn teh..." ka ti nghal mawlh mawlh a.





"Hello...eng maw?" a rawn ti lêt vak vak a. Ka chhâng awm lo...min ngai pawimawh nise a kalsawn ve mai ang chu. "Hello....hello....hello..." a rawn ti nawn ngheng ngheng tâkah chuan, "Engnge ni vak vak? Kalsawn la ka ṭawng i hre thei mai ang?" ka ti ta ngheng a. Maduhi te thâwm ri laih reng pawh an reh diak mai.





"Ti khan i hre thei tawh em?" thâwm ri bengchheng zet a hlat rual chuan ka ti nghal fak a.




"Aw...hre thei tawh e" a rawn ti hmuk a.





"Engnge i hriat a? Engang mipa nge i nih a?" ka thinrim takzet tawh bawk a. Ṭawngkam mawi hnai in a daih sêng hek lo.





"A va mak awm bawrh bawrh ve aw...??" a rawn ti nghut a. Min tih elsên mah zawk ni tho in ka hria...





"Engnge a mak vak na? Min hmuh a, engkim min sawipui i duh loh maw?" ka ti ve leh hmak bawk a. Ka thinrim lutuk hi ka sa deuh pup pup a. Ka lu a rawn hai chuai chuai bawk a. Ka hah nghal thut bawk a, ka hrawk ah hian hnawhtu awm nghal rûn ni mai hian ka hria...





Room uap churh leh ka thil tawn mek chu a inhmeh lem lo tih ka hrechiang bawk a. Rang takin ka tho vat a, "Mahse..i thu ni rawh se" ka ti chhuak mawlh mawlh a. Maduhi chuan min lo melh kar a, engahmah erawh a rawn inrawlh aih lo thung.





"Ka sawi fova, ka hrilh fo che kha... Hunawl ka neih loh lai chuan ka buai takzet ṭhin. Tunah pawh kan hna thilah Vai khual ṭha kan nei a. Kan la buai tehreng nen..." lungawi bik loh na ṭawngkam chu a rawn chhep khâwm zui chiam a.





"I hun pumpui min ngaihsak nan hmang rawh ka ti biklo che. Ka thil tawn mek...kan tawn mek ka hrilh vek che. Ka rilru hah dan tur hi vawikhat pawh i ngaihtuah chhin eih lo anih kha..." tih ngheng pahin ka phone chu ka hmet hlum nghal hmak a.









Maduhi bulah chuan ka ṭhu nghal sawk a. Ka kûn chal a, ka taksa pum hian a na ngawih ngawih ni ber hian ka hria. Maduhi chuan muangchangin a lamah min pawt phei a, min kuah âwn riai riai a. Maduhi chu ka kuah thlawp a, lungchhe zet chuan ka ṭap ta hawm hawm a.









Maduhi chuan min pawm a, ka hnungah a chûl hliau hliau a. "Ṭhiannu....lungngai ma ta che le...kawng a rawn inhawng anga. Engkim a fel leh vek mai ang" a ti siam siam a. Ka inhnît hlap hlap reng a, muangchangin ka ṭhu ṭha zui nghal a. Maduhi chuan min lo rawn chûl hliau hliau reng a. Eng emaw ti zawng tak hian ka thla a muang ru ve viau chuan ka hria. Maduhi bawk chuan, "Tirawh ṭhiannu, ka room lamah insawn lût teh ang" a rawn ti zui a, min pawt tho zui nghal bawk a. Maduhi chu ka zui lut ve nghal vat bawk a.








Khumah chuan kan ṭhu a, ka la in chûl mam mawlh mawlh reng a. Maduhi chuan, "Ṭhiannu....thil pakhat..." a rawn ti sap a. A ngawih zui reng avang chuan muangchangin ka melh ralh a. A ni lah chuan min lo melh kar reng a. "Ṭhiannu...ti tla rawh" a rawn tihzawm leh anih chu!!!









Engmah sawibelh tur leh chhânna mai tur ka nei lo. Chu thu chu ka bengah a rawn ri thleng ang tih rin ngaihna pawh ka hre lo. A mak ka ti takzet...hun harsa ka tawh pawha ka kianga awm tur, ka kianga ding tur nia ka lo ngaih ve pawhin chutiang anga thu rapthlak chu min hlui duh a ni si a.









Ka bula rawn tawlh hnaih hrat pahin Maduhi chuan, "Ṭhiannu...ka sawi awmzia i man thiam lovin kei ngei pawh min hmuhdan a dik dawn lovin ka hria..." a rawn ti leh sap a. "Englo ania...ngun takin ngaihtuah la....thil awmdan engkim i hrilh vek a. Vawikhat pawh ala rawn lang duhlo ania. Kan hna lamah kan pu ania, a chanchin chhe lam leh suangtuahna chhe lama lo ngaihruat vak pawh a nuam chiahlo na a..." a rawn tih zawm leh dap dap a.









Engmah ka la sawi lova, ka ngaihtuahna pawhin mumal a nei hek lo. Tunah tak phei chuan engang rilru pu nge ka nih pawh ka inhrethiam tawh hek lo. Ka ngawi reng a, ka hnuailam chu ka bih ngar reng a. Maduhi bawk chuan, "Ṭhiannu...a ṭha lo takzet tih chu ka hria... Mahse, engkim in dapchawp vekin i enkawl thei dawn em ni?" zawhna awmze nei leh nunrawng zet si chuan min chhilh zui leh a.









Maduhi chu a tho a, Khum mawng lama bâwm pakhat chu a hawng rak rak a. Pawisa a rawn phawrh a... "Ṭhiannu...hei hi eng emaw a ṭul thut huna hman atana ka khâwl ve ania. I duh chuan i hmang dawn nia..." tih pahin kan inkârah chuan a rawn thehthla thak a.









Pawisa chu ka en reng a, engmah phei chu ka sawi lo. Maduhi sawi chu ngun takin ka ngaihtuah a, eng emaw kawng zawng tak chuan a dik chiah mai. Engtinnge ka nun khawchhuahpui ang? Engang harsatna nge ka tawn pui dawn lah ka hre hek lo.








"Ṭhiannu...engpawh nise thutlukna ka siam nghal mai thei hrihlo. Aldrin-a pawhin rem a tih ka ring lo" ka la ti ta fan a. Ni e, Aldrin-a chu ka tur mah mah ni mai hian ka hria. A hna ah a buai em em a, ka lo nawr mah mah pawh a ni mai thei asin.









Maduhi chu za lo takin a nui hak a. Ngaihṭhalo zetin ka melh nghal ralh a. "Ṭhiannu...i rilru a ṭhat ang ngawtin khawvel hi a kal dawn si lova aw..." a ti ta ngawt a.








"Mu dawn hnai ang" tih pahin ka tho zui nghal a. A room aṭang chuan kan inzui chhuak ta nghal a.









Mutna ah chuan ka mu meng kar reng a. Ka pum chu ka chûl hliau hliau a. Nuih sak pahin, "Aldrin...enteh...i fa ka pai asin" ka ti sap a.









Ka suangtuahna Khawvel ah ka chêng zui vawng vawng a... In ah ka buai em em a, ka fa lo piang tur chu nghakhlel takin ka thlir a. Aldrin-a lahin duat chitinin min duatin eitur ṭha tinreng min hlui a. Nilengin hnathawkin min chhuahsan a. Khua a tlai ṭan tihin Kawngka thawm ri hlek ah chuan ka phi ru cheng ṭhin. A rawn lan hun nghakin ka lo thlir reng a. A rawn haw a, duat takin ka pum a chûl a. "Bawihte...kan va nghakhlel tawh che em....rawn chhuak thuai thuai rawh" tih mawlh mawlh pahin ka pumah a beng a dawh a...nui var var chungin a ngaithla ṭhin.









Ka ngaihtuahna mai mai mah nise ka nui ver ver reng tho a. Aldrin-a nena kan fa lo piang tur chuan hlimna min siamsak ve tho si. Chutih rualin ka ngaihtuahna lehlam erawh a pik thim mup thung a.








Aldrin-a chuan thinrim zetin, "Ka fa pawh a ni nek lo ange...i duh leh ti tla la, i thu thu a ni. Min rawn tibuai tawh suh" min tih lai chuan ka mittui a luang zawih zawih a. Min hnem tura ka bula awm chhun Maduhi lahin, "Ka sawi sa vek kha..." a ti hnual raih si. Chutiang lam ka ngaihtuah erawh chuan ka ni deuh nghulh ni mai hian ka hre thung.









Ka inlet thak a, ka mutchhuak a reh vek bawk si. Thâwm dîm zetin ka tho a, pawnlam boruak chhim tur chuan ka chhuak zui nghal a. Maduhi te kawtah chuan ka ṭhu a. Khaw hawina erawh a zîm viau thung a.









"Aldrin...min ngai ve miahlo maw? Min lo hmangaih ve tak tak lo zawk nge? Tunah hian engnge i tih ang?" ka phun sep sep a. Ka phone chu ka en a, zing dar 3 a pel fel deuh chiah a. Aizawl khawpui meuh pawh a reh ṭhuap tawh mai. Ralkhat hla deuha Ui bauh ri kharh kharh chu ka hre pha viai viai a. Ka ṭhutna aṭanga lang pha chinah chuan Kei anga ngaihtuahna beidawng kâwm mêk chu an awm ve angem?









"Ṭhiannu....i mu thei nange?" ka hnunglama Maduhi rawn ṭawng thut chuan min tiphu takzet, ka tho kâng dâwrh thei hial...








"Ka mut a chhuak lo lutuk a...ka va ṭhu chhuak mai mai ania" ka lo ti vat a.








Ka ṭhutna bulah chuan a rawn ṭhu ve a. "Thil ngaihtuah vak vak suh ka tih che kha...engmah sawtna a nei lo. Tirawh...naktukah kan buai nasa dawn si a. Mut kan mamawh ania" a rawn ti nghal sat sat a.







Ka lo nui sak a, "Nia...kan buai viau ang. Tirawh...mu dawn ang" ka lo ti vat a. Inchhûng lamah chuan kan inzui lut nghal a. Kei pawhin muthilh ngei tumin ka rilru ka siam sauh sauh bawk a.








Zan ka mengrei viau na a, ka harhvâng bakah thinthi thlap a mu ngailo tih takah Maduhi nau te thawm dim zet pawh chu ka hre ta tho a. Ka mutna aṭanga thochhuak tur erawh chuan ka taimakna in a tlin thlawt lo thung.








Ka phone rawn nghawr der der chu ka melh vat a. Ka putea call-ngei a ni. Chhân tur nge enliam mai mai chi tih ka ngaihtuah chhungin a tawp hman a. Mahse, a rawn tinawn leh rang hle.








"Aw...hello..." ka ti thâwp sat a.




"I bungrua la awm ang ang te, i nu thil hlui eng emaw ang ho hi i va rawn ngaihven lem lo ve?" a rawn ti nghal hmawrh hmawrh a. "Rawn la rang rawh...a hnawk...ti rawh..." lo ti tu chu Pitei ngei anih pawh ka hrechiang viau bawk. Ka rilru chu a na satliah a ni lo...chu thu ka hriat rual rual chuan ka tliak hnâwp a ni ber e.




"Rawn ngaihven rawh..." Putea'n a rawn tihzawh rual rual chuan, "Awle...vawiinah ka rawn la dawn nia" ka lo ti vat a. Phone chu ka dahzui nghal hmak bawk a.








Maduhi chu a rawn thochhuak chhar chhar a. "Morning..." hâm bâi bâi chungin a rawn ti chhuak pah a. Ka lo nuih sak a, "I va rawn tho hma ve? Mut i kham awm lo mange?" ka lo ti var a.








Thingpui thlit pahin Maduhi chuan, "Sir in min rawn Call harh alawm... Sir Aldrin-a" a rawn ti leh vat a. Min rawn melh pah ralh chungin ṭhutna ah chuan a ṭhu zui nghal a. Kei erawh ka dinna ngai ah ka ding reng a.








"Ṭhiannu...vawiin kha ka puih hman loh hmel khawp mai che. Sir khan 'kan buai dawn...chawlh a thiang lo' a rawn ti tlat sia.." a rawn ti zâwi sap a.








Ṭhutna ah chuan ka ṭhu hnawk a. Ka phone chu ka tuai kual nghal puat puat a. Ka bengah chuktuahin ka ngaithla a. Rei vaklo hnuah Aldrin-a ngei chuan min lo chhâng hlauh e.







"Engnge i hriat a? Ka buai em em a, Maduhi tel lovin engmah ka ti thei lo tih pawh i hria...vawiinah pawh..." ka ti nghal mawlh mawlh na a Aldrin-a chuan, "Chu zawng a thu thu ni teh se. Ani lo pawh midang rawih tur ka hmu ṭeuh..." tiin ka ân hla chu alo pawtchat thuai a. Aldrin-a bawk chuan, "Khawi maw Maduhi chu ka lo be lawk ange....i bul hnaiah a awm em?" a rawn tizui leh a. Ngawi rengin Maduhi chu phone ka pe zui nghal a.



"Aw...Sir.."


"Aw..."


"Awle..."


"Aih...Sir...ka lokal ang"


"Aw...awle..awle...."







Aldrin-a rawn sawi hrelo mahila Maduhi chhânna aṭang chuan ka rinzawn thiam mai bawk a. Maduhi chuan phone chu min pe leh a. Rang takin ka bih nghal vat a, a lo dah leh daih tawh. Lungawilo zetin ka ṭhu ngawi reng a.









Maduhi chuan, "Ṭhiannu...engpawh nise i theih ang angin lo che la...thil harsa lutuk a awm lo bawk a. Taxi i hmang mai anga, a harsa lo turah ngai ang. Kan bân veleh ka rawn kal nghal ang. Kan bân tlai tak viau leh zanah kan inhmu mai aniang chu.." a rawn ti mawlh mawlh a.








Maduhi bawk chuan, "E taka...zanah hetah kan inhmuh angai..." nui var var chungin a rawn ti leh a. Rang takin Maduhi chu ka en vat a, ka nui lui sak bawk a. "Engnge?" beisei aw rawl zetin ka ti nghal vat a. Mahse, engnge ka beisei ber erawh ka hre hauh thung silo.








Maduhi chuan min rawn melh nghalh a. "Vawiin ka Birthday..." a rawn ti sap a. Kan pahnih chuan kan nui var var a. "A ni maw?? Engnge ka lei ang che? I duh ber sawi rawh" ka hlim takzet tih chu ka awmdan ah pawh chuan a hrethiam ngei ang.








"Engmah a ngai lo ṭhiannu...hlim deuhin kan hmang anga a tawk a ni mai..." tih pahin min nuih sêih reng a.








"Tehreng ṭhiannu...nuam deuhin kan hmang dawn nia..." ka ti ve sawk sawk a. Maduhi naute pahnih chu Room aṭangin an rawn chhuak a. Chaw ei an siam nghal mawlh mawlh a. Maduhi Birthday hman dan tur hlim zeta sawi reng chungin Dawhkan chu kan kîl zui ve ta nghal





(to be continue..........)





(A hnuaia milem khu min lo click sak ve hram la aw...ka lawm veng veng viau ang..👇🏻👇🏻👇🏻)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)