MUANSANGA *Habibi* CH-6 By MAY RENTHLEI

Episode kal lai dah luhna

Moderator: writers

lmi renthlei
Posts: 210
Joined: July 4th, 2017, 10:42 am

MUANSANGA *Habibi* CH-6 By MAY RENTHLEI

Unread post by lmi renthlei » January 27th, 2022, 7:11 pm

Muansanga * Habibi*
Chapter -6
May Renthlei
Thanthani tih a sawi lan zeuh chuan ka beng a lo verh zar. Tunah kan khuaah a awm ve mek. Hmmpp

"Hmeiche fel tak anih dawn chu. Muansanga chu a ṭha chho viau a sin mawle. A nuihmel tepawh kan hmu ṭan ania. Thil a kal pangngai chho dawn emaw tih laiin kha tiang thil kha a thleng leh ta thut sia, a pawi khawp mai."

"In chhungkaw chungah kan lawm tak meuh meuh. Ka nau in lo ngaihsak lutuk tih Pate Ṭhuama te chhungkaw ṭawngka a ṭang ten kan lo hria a. Awmawm kan lawm lutuk ania." Min rawn ti bik deuh kher a.
Eng emaw hriat a nei em mawni chu aw? Ka ti rilru.

"Kanin kawm mai alawm." Ka nui sek a.

Ka pa leh Û Hruaikima thingzai dah fel an rawn lut a. An lo in hre ṭha nasa bawk a an phul zui hlut. Kei erawh dawr lamah Û Mami a hnatlan dawn avangin thlak turin ka chhuk thung.

"Awmawm..." Min rawn ko na lamah ka hawi chho vat a. Ruatsangan nui sangin car kianga dingin kut mi lo vai khum lauh lauh a..

"Ti nge i lo luh ve loh?" Hruaisanga arawn hruai anih ka rin vang chuan ka ti a...

"Phone ka hmang lak lawh a. Dawr i nghak dawn a mi?"

"Nghak dawn e."

"I peih lo leh awm." A tih chuan hmui ti sawi nakin ka bu nghat a.

"Nangni ho pawh chu." Ruatsangan, Aizawl lama Muansanga ṭhiante rawn lang zui chu a lo be ding hlawm a. Thanthani ni ngei tur pawh arawn tel a. Muansanga erawh a tel ve lo.

Thanthani chu keiai chuan a sang ang. Kan vun ngo dan erawh a inrual vel hle ang. A hmel pawh aṭha. En mai chuan hmeiche ngawi chawi leh zahzum hmel tak angin ka hmu. Dik tak ang maw?
Mi hi ka ring chhe mawh ve hrim hrim bawk a. Fel em em turah hian ka ngai hmasa phawt vek zel.

"Awmawm dawrah lo kal kan tum a." Muansanga ṭhianpa, a hming pawh ka la hriat veloh chuan mi ko nalh thei.

"Wow....Ramdin leh.. He khuaah hian ni2 em pawh ila chamtling lo va nula hmelṭha tak hmelhriat i lo nei nghal der ania. Insum vedeuh rawh." Thanthanin nui chungin a fiam nghal bawrh bawrh a..

"Chu tianglam ani lo. Ani te hi chu kan Muansanga special girl ania a hriat loh theih nang tiraw? Bs." An ti nghal zauh a.

"A dik alawm, ani ber kan hriat loh vin aṭha nang. Nizan lamte i muttui loh phah em lo vang chu." Hawihhawm takin min zawt zui a. A fel khawp ang he pa zet hi chu. A puitling thlarh mai a.

"Mutui tehreng mai. Kal ila." Dawr lam ka melh pah zauh a. An pen zui nghal mai a.
Kei chu Ruatsangan la ding turin min signal ru zauh tlat.

"Thanthani khu Muansanga hmingpui, boral ta farnu anih khu." A tih chuan mak tih vangin ka meng phar ak. Rin ngaihna reng ka hre lo.

"Muansanga khan a ṭhianpa boral aṭangin va be pawp zui tawh lo niin min hrilh sia."

"A dik alawm. Mahse Thanthani khu chu a dang alawm. Muansanga hi..." Sawi zawm lohin angawi daih a.
"Kal tawh rawh." Min la ti zui. Ka ngei tawp.

"Sawi zo rawh." Ka melh tûr khai a.

"Ni dangah le."

"Muansanga eng nge a an?"

"A mah i zawt dawn nia." Chimawm lutuk. Ka tin zuai a, a lo nui duh lek a. Lungawi lo deuhin ka kalsan.

Muansanga ṭhiante ho pawh dawrah an lo la awm a. Û Mamin in lamah min chhohsan zui bawk..

"Muansanga ṭhian i lo ni ve tho a. Ka hmu thei che chu ka lawm hle mai." Thanthani chuan rinloh takin min ti a.

"Kei pawh le."

"Khua in nei nuam hle mai. Kan Muansanga pawn nuam lo ti hle awm anih hi."

"Nuam atih chhan te chu thildang daih." Dinsangan awm ze nei ril lutukin mit mi rawn san khum ak a.
Thanthani a nui hleithei meuh tawh lo. Ka rin ruk dan hi a dik angem?

"Vawin lamah Muansanga ho va haw nghal mai tum kan nia. Mahse nizan lam kan mu ṭha lo nen, vawin a Aizawl lam kal lehnghal tur chuan Muansangan min ngaihtuah tlat sia. Cham mai kan ngai dawn ta anih hi." Thanthani ṭawng chhuah dan aw ki chu Muansanga tana mi eng emaw tak a nih zia tih lan a tum tlatin ka lo hria.

"Cham a la chakawm alawm. Awmawmi kawm kan la kham lo." Bsa lah chuan a lo ti awlsam et a. Kanin kawm viau pawh ani si lo va. Min ngaina der thiam dun viau Dinsanga nen chuan.

"An ni hi chu hrethiam rawh hmeichhia an lawm ve hrim hrim a."Thanthani chuan a ti kha deuh fak a.
Min melh na mit chhunga eng emaw riau rawn lang chhuak sar sar chu hmuh hmaih a har. A ṭha lam chu ani lo phawt a.

"Muansang ei duh te i nei em? Eng nge ka lo lei dawn che?" Thanthani chuan Muansanga chu phone a ṭangin a bia tih hriat takin a ṭawng lang lang a..

"Awm e. Ruatsanga bialnu te dawrah kan awm." Ti a chhanna a pek chuan ka melh dawrh lo thei lo..

Ka vawikhat hmuhna hmeichhia hian eng nge a sawi zawh chiah kha. A ti mah mah deuh lo maw.

"Ruatsanga bialnu a?" Dinsangan a ti nghal ha. Bsa pawh a hawi buai nawk.

"Awmawm tih hi ka hrechhuak tawh alawm. Ruatsanga higher kal laia a duh theih deuh hmeichhia kha i ni tih ka hrechhuak zawk alawm. Min hrilh nasa ṭhin alawm. Khatih lai khan Muansanga te ho ai khan kanin kawm nasa ṭhin a. Kum tam a liam a, hmuh theih che pawh ka inrin loh hnuah ka hmu leh thei ta che ania." A ti ta duah a. Khawvel hi chu a lo zim teh e.

"Ruatsanga chu ka ṭhianṭha tak ania lawm. Engmah thil dang a awm lo." Ka lawm lohna chu ti lang lohin ṭha takin ka chhang mai a...

"In inneih dawn hial ka lo ring tawh a." A tih leh chuan nuih luih a harsa ṭalh tawh..

"Muansanga nen kan la inneih khalh khawp ang che u." Nghakhelh awm fe leh in la pawisawi lo zet lah chuan a la ti tak ang deuh deuh a.

"Thanthan.." BS an a tih deuh hrawk laiin Dinsangan a lo khap thung. Ka hrethiam teh nuai hlawm lo ve.

"Kan lei zawh chuan kal mai ang u." Bsa chuan a ti vut a.

"Remchang a awm veleh kan rawn leng leh ang." Ṭha tak leh nui sangin kei chu min be thung.

"Tehreng mai."

An thil lei ho ka chhutfel sak a. An chhuak dawn chiah tihah Û Hruaisanga arawn lang veleh thung a. Ruatsangan arawn zui bawk. Thanthani te erawh an chhuak tlang ta tho a. Ka lawm.

"I lo lian tawh hle mai Awmawm." Û Hruaisangan hlim hmel pu sangin arawn ti a. Ka lo theihngilh nasa tawh lutuk mawlh mai kha.. Vawikhat mah la hmu ngai lo pawh kani tawp si lo va

"Pasal neih a tum uai uai tawh. A hmu zo lo mai pawh a." Ruatsangan a lo ti hmanhmawh. Vawm ṭawk mai ka duh.
Thanthani thil hlui lutuk tawh rawn phawrh chhuah mawlh mai tekha. Muansangan eng tin tak lo ngai ang maw?

"Muansanga eng kawngah pawh i tlawm ṭhak ṭhak thei tih te ka lo hria a. Kuna chibai buk mai che ka duh." Fiamthu ang reng deuh bawk si chuan a ti a. Unau si hi a lo in an loh theih mang e. A nui hmel leh hriat nuam taka a ṭawng chiah hmuh tur a la awm char char. A ngainatawm.

"Kanin kawm satliah mai alawm."

"Ehh... ehem.." Ruatsanga kher kher ṭhin hi chu. Ṭul lo lutuk..

"Ka dang a rawn ro thut." Ka melh rum em avang chuan an ti kual vel a.

"Khawi maw tui chu Awmawm. Mi fel nu. Hmelṭha bawk si." Bahlah miah lo in a tih zawm zat..

Ka chak chu Ruatsanga hian bialnu nei ve se chhaih laih ve vak vak ka chak tawh lutuk. Ka chhuah chhe thei viau ang..

Û Hruaisanga chuan ka chanchin te min zawt nual a. Muansanga chu a vei na ngang aniang a chanchinah bawkah a lut leh ṭhin. Keimahah chuan beiseina an chhungkuain an neihsan thu pawh zep lo in min hrilh tlang rawng. Ka insit rawih rawih. Eng ka ni lul si lo.

"Min lo hrethiam lawk ru, ka pa ani tlat." A phone ri chu chhangin Û Hruaisanga chu dawr kawt lamah a chhuak a

"Thanthani te nen khan in inkawm ṭhin a?" No lo taka melh khaiin Ruatsanga chu ka zawt a.

"Kawm ṭhin e."

"A lo nih vel tak chu."

"Ti nge? Ka lo kawm ṭhin chu a pawi viau em ni?" Ka melh dan vanga ka hmai bula kut vai thuak chung chuan a ti a.

"Muansanga a duh tiraw? A dik em?"

"Hmeiche ho thil man chak dan em em hi. In hlauhawm." A tih vel avang chuan a ban puamah ka beng thawr a..A tuai zui hauh hauh a.

"A ṭawngkam aṭangin ka hrethiam alawm."

"I thik ta viau a? Nge ni a i hlauhthawng ta viau zawk? I dinhmun a derthawng ta viau te'n i hria em?"

"I ninawm Lalruatsang. I ṭawngthei leh lutuk. Eng tin mah ka awm phah lo."

"Nia, awm phah duh duh. Kha leh chen Thanthani leh Muansanga te hi an lo inhre tawha, eng rilru dang mah a pek loh zia ka hria alawm. Nau ang bakin a en lo."

"Chu tiang ngawt ani lo. Mipa leh hmeichhia te chu.."
Ka tih mek laiin Û Hruaisanga a rawn lan leh tak avangin ka sawi zawm tawh lo..

"Naktuk lamah kan haw lehnghal mai dawn sia. Aizawl lamah lo zinthla ve la, kan ruala i lo zin theih phei chuan a lawmawm ngawt ang." Tiin Û Hruaisanga chuan min sawm a.

"A chakawm tho na chu kan khuaah hian tih tur leh hna ka ngah zawk a. Eng thil pawimawh te ah lo chuan Aizawl chu ka zin mai mai ngai lo."

"I lo puitling vetawh hle mai. Muansanga pawn a lo ngaina viau che hi a awm lutuk e." Nui var varin min ti a. A nelawm thlawt.

"I number min pe thei angem?"

"Tehreng mai."
Iphone 12 chu min pe in ka number ka type lut a..
A ze nelawm leh puitling thlap te, Muansanga a ngaihtuah em em dan te leh a nuihmel pu sang reng tehian a ti ngainatawm.. Muansanga a tluk chiah lo na chu a chhelo ve viau tho.

"Kan kal phawt mai ang. Hawn hmain lo len leh hram kan tum dawn nia." Dawr aṭanga an chhuah dawn chuan a ti a.

"Lutuk. Lo leng leh ngei ngei ru." Ka tih chuan lawmawm min tih hmel takin kut min vai khum a, an tlan liam thlengin ka en zui.

Ka phone ka en a. Muansanga text engmah ka dawng lo. Ka la hmu ve lo bawk a. Ka dik zan thei lo.
He tiang thil a thlen ka hlauh vang hian alawm min duh thu kha min hrilh lo tura ka duh chhan. A hma a kan awm dan ang khan awm reng ka duh tawk viau.
##### May Renthlei #####.
"Muansanga te chu Aizawl lamah chuan an chhuk thla ta em ni?" Ka nu chuan kan chawei laiin zawh bik pawh nei chuang lo in a ti a.

"Chhuk ta anih kha. A ngaihawm dawn khawp mai." Ka pa chuan a lo ti ban churh a.

Min hmu miah lo leh vawikhat mah min be lo in min chhuk san. Ka be hmasa dawn bik teuh lo. A tlawm hmasa zawk kani duh lo. Min lo biak leh hun hun kanin biak leh hun tur. Min lo biak har leh kanin be har deuh dawn ani mai.

Kar a liam a, Muansanga nen pawh kar1 chuang kanin be tawh lo. Status a neih ve pawhin a hman awm chhun chu keimah mintih chhan na hlir a ni mai. Ka hriatthiam dan tur ngeiin, mi dang chuan an hrethiam ve teuh lo.

Keimah ang bawka ho te te status a hmang zut chi ani bik lo va.. A chang zauh a kan neih hi ani mai.

"Aizawl lamah tu emaw ber chhuk kan ngai dawn ava ang ve." Ka pa phone hmang rawn lut chuan arawn ti a.. Kan lo hawi phawk hra.

"Eng vangin?" Ka lo ti a.

"I û Malin nau a vei thut ani awm e. Thla 7 in naute an nei dawn a ang khawp mai. Tluang takin nei thei tak ang maw." Rilru nuam lo tak chuan a ti a.

"A va mak teh thut ve mawle. Thla 7 a piang nau an tam tawh a, eng em kan ti bik lo vang. Lockdown phelh ani tawh bawk a Mami emaw Nobawihi emaw zawk in chhuk ngei ngei angai dawn anih chu. An khawngaih thlak e mai. Zanin tehian an buai dawn lutuk. Bawiha lah a la nausen bawk. In lama lo awmpui tepawh angai ang. Ka ngaihtuah mang e aw." Ka nu in a lo ti ve hlah hlah bawk a. Kan ngaihtuah tlang hle a ni.

"Nobawih i inhuam mai em? Kei chu dawr nen ka va buai awm ve. KṬP lamin tih tur kan lo nei vedeuh reng bawk sia. Delhi lamah lah i la chhuk mai theih hmel bawk si lo va." Û Mamin min ti a.

"In in siam rem dan dan kha ani mai." Ka nu leh pa lahin an lo ti a.

Keimah ah a tla ta ber anih chu. Aizawl lamah chhuk ngei ka ngai dawn a ang takhawp mai. Ka huphurh ngei mai. Aizawlah hian kum9 vel teh meuh lehkhazirin ka awm na chu ka ngaina thei meuh lo. Nu leh pate awmna, kan khua hi nuam kati hlur a. Delhi kha nuam kati em em bawk.
******** AIZAWL *********
"I motor rui chu i zia deuh tawh em?" Ka inbual zo ka ṭhu ngui bam chu Û Kiman theihai zailep min pek pahin a rawn ti a.

"Aw ka zia tawh. Ka rui nasa vak lo."

Naute pawh tluang takin kan nei thei a. Mipa niin thla kim lo va piang tih takah kg 2 pawh a tling lo va. Damdawi in lamah an awm a la ngai rih dawn.


"Damdawi in lamah a inriahpui thei bawk si lo va, Bawihtea awm leh in lama min chetpui kha ani deuh mai.. Keilah hna ka lo zawm ṭan chiah bawk nen.. Chawlh ka la rei thei bawk si lo. I lo buai nawk nawk mai angai dawn anih hi. Damdawi in lamah eng tia rei nge awm ngai dawn tih lah kan hre mang si lo va."

"Bawihtea awm harsa ani tawh lo va a zia ang."

"Nia, in chhung sek rek khawih leh ei siam lamah i ngaihtuah awm lo bawk a thla i ti muang huai. Tlailam a ṭangin damdawi in a chaw han pek tur kha i lo siam tel bawk dawn nia. Keiin a pek lam ka hna ang a." Mipa zaidam tih takah a ṭawng deuh chuar chuar a. Û Hruaikima ai mahin a hmelṭha. A te deuh zawk mai pawh a.

"A ni, hei ka ei duh. Min lo kheh." Bawihtea chuan a chocolate ken lai ka kheh tura min pek pahin arawn ti a.

"I lo lian leh tawh hle mai. Û i ni tawh dawn bawk si, fel deuha awm tur aw. Kha le. Ka kheh zo tawh." A sam buk laih a tuai thur pahin kati a.

A nu leh pa an hmelṭha bawk a. Bawihtea pawh hi khawlai chhuah pui vel anuam ṭhin. Hmelṭha tih leh lawm a hlawh a. Kan naute thar hi eng nge arawn an ve dawn ni. Pathian zarah kan unau leh ka pa lama kan chhungte hrim hrim hi hmelṭha thlah ti a hriat an ni ve a. A rawn zia ve tho turah ngai phawt ang.

"Bawihte naktuk aṭang a ni Awmawmi nen in in lo nghak ṭhin dawn a. Chu vangin a ni thu lo awih tur aw. Thu i lo awih phawt chuan ei tur tui deuh deuh ka lo hawn ṭhin ang che."

"A pa thu ka awih alawm." Duhawm taka ner nangin a lo tinghal a.

"Aw le. A ṭha anih chu." Tih pahin Bawihtea chu a pawm nawlh a. An inchhaih zui a. An bengcheng dun nasa.

"Hello Felpui." Ka ṭhuṭna hmun thawhsanin ka phone ri chu ka chhang a.

"Aizawlah i lo kal tih pawh min hrilh lo. A awm alawm." A rawn ti hmuk hmuk a.

"Niminah ka rawn thleng ve chiah alawm."

"Chu pawh nise min hrilh lawk ve tal tur che." La lungawi thei chuang lo in a ti leh a.

"Tihpalh. Tum lawk lohin ka rawn kal thuta."

"Ahhh. Aw le. Ka hrethiam mai ang che. In hmu vat ang. Lockdown an phelh tawh bawk a, lo leng la." Ka rindan tawk.

"Nau awm ka ngai. Chhuak thei ka ni lo. Lo leng zawk rawh."

"Ka lo ngaihtuah ang. Ka chhungten an phal chuan naktukah ka rawn leng ang."

"Lo leng ngei ngei rawh."

"Ka lo be ṭha leh dawn che nia. Hrilh tur che ka ngah tawh lutuk. Bakah ka ngai che." Ka ṭawng veleh hman hma hma in phone a la off zui. A mak puat puat ṭhin.

Delhi ka awm laia ka kawm ber, ṭhian piah lamah unau ang tak takin kanin en. Kan khua a ka haw chhoh aṭangin kan la in hmu leh lo. Min hrilh tur a ngah u chhuak leh tawh ngawt ang. Chu bakah Muansanga nena kan chungchang ka hrilh thawi tawh a. Hriat belh chakin a chiri lo chauh tawh ang.

Room khata awm dun, zia pawh in hrechiang dun tak kan ni a. Bialpa a nei deuh reng a, kei erawhin mipa lam ka ngaihven lo hle thung. Chu vangin mipa chungchang tlem ka sawi ve hlek tawh chuan a phur thak u chuak thei hle.


"Fel deuhin Ani Awmawmi bulah lo awm rawh aw."

"Aw le, a pa. Lo haw vat vat rawh aw." U Kima leh Bawihtea inthlah chu nuisangin ka lo en a.

A pa chu kut vai lauh lauhin a thlah liam a. Fel reuh lutuk mai. A nu lah damdawi in ah hri vel vanga tlawh phal loh in a awm daih bawk si. Ka lainat reuh. Kan naute thar pawh hmuh ka chak tawh tak zet.

"Awmawm." Rawn au thla ruai chu tu nge tih a hai theih loh.

"I va ngaihawm tak." In chhung arawn luh rual rualin min rawn kuah nawk nawk a. Kei tak pawh hian ka ngai tawh. Ze in ang lo tak pawh hi a lo inkawm theih khawp mai.


"I va lo thleng hma ve. I chau em?" A rawn kang lang viuana chu kei erawh in ka lo be dam thlup.

"Chau lo ve. Ih maw. Kan veng ka rawn chhuahsan dawn lai vel khan Muansanga ka rawn hmu." A tih zawng ringawt pawn ka lung a ti phu nghal dup dup.

"Chuan eng tin?"

"Hmeichhia nen." A sawi tim dûi a. Ka hnual ruih. Chu tianga awm chu ka duh lo. Theihngilh vek ka duh. Mahse a awlsam vak dawn in ka hre ta lo.

"Thanthani an tia hmeichhia chu. Ka bula awm ho sawi ania ka hriat. An ngaihven hlawm tawp a. Muansanga duhtu te an ni hlawmin ka hria. Chu bakah Thanthani te nen veng khatah kan lo awm reng a lawm. Muansanga nau a lo ni reng a. Muansanga kha chu ka hria ka tih tawh kha maw. Thanthani hi ka lo hre tel ve lo va."

"Ni tak. A hma khan kei pawn lo ngaihtuah chhuah awm tak. Muansanga boral vel lai khan i sawi tawh tak kha."

"Nia. Ka hriat belh danin Muansanga maw. I Muansanga zawk." Mit ko min san khum pah ak a. Ka lo ner khum zauh.

"I Muansanga kha a hmingpui Muansanga thihna a mawh phurhtu ah kan vengho chuan an ngai fur tak tak a sin. Mahse Muansanga chhungte saw mifel chhungkua an nia, an mawhpuh ve duh lo. An inṭhian ṭhaṭna kha an hrechiang a. A boralsan chhungte berin an puh duh miau si loh ah chuan mite pawn an ngai dik lo zui vak tawh bik lo."

"A lo nih tak chu."

"Chuan Thanthani hian Muansanga hi a atchilh lutuk bawk an ti. Muansanga hian a ṭhianpa boralna ah khan mawhphurhtu a a inngaih miau avangin Thanthani hi... Ahh. Eng lo. I hrethiam mai em? A duh emaw duh lo pawh nise a thlahthlam thei lo. Thanthani hian chu chu chance ah a la an tia kan veng hmeiche ho chuan. Thanthani zawk hi an ei vak lo. Muansanga an lo star hlawm bawk nen." Taksa ti che na na pah chuan a sawi buai nawk nawk a.


"I va hre hnem hman ve, Pi Reporter. Mi bon i lo ni." Ka dar a va nek nakin nui chung chuan kati a. Pawnlamah chuan ka ngaih ho hmel viau nangin ka chhunglam erawh Felpuii thil sawi vang chuan a su dulh dulh.

"Hriat loh theih pawh ani lo. An sawi peih em alawm . Hriat tum loh pawn ka hre zel. Muansanga vang vek a lawm. Hmelṭha lar hek." A la ti ham ham zui a. Ka lo nui suk suk.

"Le. I chanchin sawi ve hun."

"Hmm. Thingpui lum phawt rawh. In pah in sawi ang."

"A ṭha lawm." Ka tho zui ve mai a. Bawihtea erawh toys a khalh ri ve rak rak a. A tui lutuk a, biak buai inthlahrun awm khawp zawk a ni.

"Kha le." Ka thingpui lum zo chu Felpuii bulah thingpui pek pahin ka ṭhu thla zui leh a.
Ṭhuṭ hmun rem ṭha sauh sauhin kan han ṭawng zui dun tak tak mai chu darkar khat te chu kan dawlh liam zo zung zung.

"Ka tlai lutuk dawn min thlah tawh rawh." A vawi thum nan a ti leh tawh. Hawn a tum ngun tawh zia hi. Tun ṭum chu ka thlah haw tak tak tawh aniang chu.

"Bawihte i chapal bun rawh le. Ka ṭhiannu hi a scooty hunna thleng han thlah ang. Noodles kan lei haw pah dawn nia." Ka tih chuan a phur ngang mai. Chhuah sawi tawh hrim hrim hi chuan a inpeih at zel.

"Kanin hmu leh vat dawn nia. Muansanga kha chhuah lo bawk la. Hmun dang chu sawi loh, kan veng tleirawl ka ngei tak tak ho sawn an atchilh hlawm si. Chu vangin chhuah thei i ni lo. Bakah kum 30 i tlin hma tal hian ngaihzawng pakhat tal te chu nei ve teh aw. Muansanga te ang a vawikhat nan i nei thei anih phei chuan lo single ṭang ṭang manah i tel ṭha awk awk dawn asin. Ka van awh dawn tak che em. Ka ṭhiannu phei chu ni lo la aw..."

"Kal vat vat mai teh a." Keiin ka lo ti thung. A ṭawng tui nasa hman leh tawh lutuk tlat.

"Aw. Ka kal dawn. Bawihte bye bye."

"Bye." A lo ti let ve.

"Lo leng leh vat la." Tiin ka au zui a. A tlan liam tak tak tur thlir chuan ka ngai nghal. A reh vek.

"Noodles lei tawh ang le."

"A ni min kai. Motor tehian min su mai palh ang tih te ka hlau." Bawihtea ṭawngkam hman duh dan ṭhin hi chu aw. Nuih a ti za.

Noodles kan lei zo, kan let tur chu kan hma takah Bike arawn ding su zalh a.

"Bs ka hmuh teh thut che chu. I dam em?" A helmet a lak thlak hnu chuan ka lo ti thuai a.
Kan khua an chhuahsan aṭang khan thla 2 dawn a liam tawh.

"Dam e. Aizawlah i awm tih ka lo hre miah lo va. Muansanga pawh hi min hrilh tur ania. Ngawi reng ringawt." A tih chuan ka nui ringawt. Muansangan Aizawlah ka awm mek tih a hre bik tlat lo. Min lo be lo bawk a, ka hrilh peih lo.

"Tlangval i va duhawm ve." Bawihtea lu a khawih pahin a ti a.

"I bike hi a va pa em em. Ka awt ve e." Bawihtea lah chuan a lo ti a. Nuih a ti za ṭhin.

"Ka lo pe daih dawn che em ni?" Bsa chuan a ti fiamthu a.

"Aih. A pa in a dang min lei dawn."

"A pa hi chu a ngaihsang ṭhin ania." Ka lo tih zawm vat a.

"Naupang dan alawm. Eng tikah nge kan chhuah ho theih ang? Zanriah ei ho emaw. Khawi hmunah emaw a intihlim tura zin chhuah. Kan tih ngei chu angai ang."
Bsa sawi zawh chiah ho chu an lo tih ṭhan tawh ani ngei ang. Kei erawh in mipa ho nen phei chuan vawikhat mah ka la tih ngai loh vek a ni.

"Ka hman chuan aw. Kan buai rih lutuk a." Pangngai tak chuan ka lo ti ṭha ve mai a. Kal erawh ka tum lo nasa.

"I hman hun hunah kanti ang." A ti deuh hmiah a.

"In in kan hresa tawh bawk a remchangah kan lo la leng dawn nia. Tun atan chuan ka kalsan phawt mai ang che u." A bike ti nung zui vung vungin a ti a

"Eng tin chuan nge kan in te chu an lo hriat hman le aw." Ka ti rilru rauh rauh.

Bsa min hmu chu a zia lo ngei mai. Aizawlah ka awm tih an hriat phah vek dawn ta chu ania. A pawi.

"I lo va haw hma ve." Û Kima rawn lut chu ka lo be thuai a.

"Nia. Hna a tam vak lo va.." A ṭawng lak lawh lai lai chuan Bawihtean ngai em em in a lo bawh chang chang a. Hah pawh sawi thei lo in an inchai zui a. An hmuhnawm phian.

Zanriah kan ei zo, thei kan ei mek laiin ka phone a rawn ri a. Muansanga hming ka hmuh chuan phone ka thlauh dawrh ṭep a ni. Lak mai nachang pawh ka hre lo. Bsa an min hmuh thu a hrilh tawh ani ngei ang. A rang mah mah.

"A tawp hman." Ka la har lutuk chu a tawp hman a. Ka lak hreh rual khan ka la hman lo erawh pawi kati leh lawi a. Hringnun tak hi chu aw.

"In in bulah ka awm." Tih message ka dawng zawm a. Ka meng phar ak.

"Lo chhuak teh. Hmuh che ka duh."
"Aizawlah i awm tih min hrilh lo."

"Hmuh che ka duh ka tih chu." Ka chhan mai loh avangin dawhthei lo lutukin arawn ti leh a.

"Ka buai. Ka lo chhuak hman lo." Tih ka thawn a. A duh hun huna a ko chhuah tur pawh ka ni lo. Pawimawh bik thil te chu thu hran..

"I buai lo. Ka nghak che." Ka chhang let tawh lo. Ka rilru erawh a mu mal thei tawh lo. Min ti phawk lek.

Min rawn phone leh a. Ka la ta nge nge.
"Kawngkhar rawn hawng rawh." Pa takin a rawn ti a. Kan kawngkhar a rawn ri zui.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)