THLASIK LALPA CH - 13

Episode kal lai dah luhna

Moderator: writers

ilefi imoz
Posts: 130
Joined: January 1st, 2021, 12:32 pm

THLASIK LALPA CH - 13

Unread post by ilefi imoz » January 27th, 2022, 7:45 pm

*Thlasik Lalpa*

Chapter - 13

Ziaktu : ilefi imoz💜



(Recap : "Sportsman kha i la ngaisang reng em?" Tiin min rawn melh leh zawk a, "aw" tiin ka chhâng, ka ngaihdan diktak ka sawi bawk.. "Kan haw hunah aw" phur hmel zeta atih chuan, "eng maw?" Ka lo ti lêt he haw a, a hmela hlimna langchhuak vang chuan mak ka ti! "I hre mai ang" tiin ka kut a hmer na salh a, ka zawt zui duh ta bik lem lo, ka hre vat tho turah ka ngai ta tawp mai..)



"Hei kan thleng mai alawm!" Ti vut chungin hmalam melh a, kan hma chiaha college bus lo ding rún chu ka hmu ve zat bawk.. Vaphai khawchhungah kan lo awm der tawh a, kan titi na lamah ka lo hrechang tawh lo niin a lang.. "Helai ngei hi anih hi Vaphai chu!" Ti el deuh taka ka tih chuan a nui vur vur a, a châng hi chuan a nui mawi thei ve vur vur ania aw.


"Lo kal khawm ula, kan awm zel dan tur kan sawi dawn nia" bus atanga Sir Hmangaiha rawn chhukthla chuan a rawn ti a, Bus a chuang ho chu an chhuk sap sap a, keini pawh kan che ve thuai bawk.. Aizawl ngaihtuah chuan vawt ver vawr tak a ni! Pakhatpa meuh pawhin motor hnunglama a jacket vâr dah chu la in, a inthawlh ve hlún a, a ha khât bawk a a lang thar sur thei hial mai!



"King of winter meuh pawhin Vaphai khaw vawt chu i tuar thei bik meuh nange?" A kawrlum zipper pawt chawt chawt chunga min rawn pan chuan ka lo ti a, "engvangin nge Thlasikah kher kher kalo pian hrep ni?" Tiin a zipper zip thei lo chu a túm búr a, ka lo nuih hak hak vang chuan a lawm hmel tehchiam lo!



"Vaphaiah chuan piang ila May thlaah ka pian ka ring, December te zawng, a vawt emai ka piang peih teuh lo!" A ti leh bul bul a, a car kawngkhar a lock theihnghilh tih hria in a let leh nulh roh a, a rawn phei lehlamah chuan thlâ ka lo laksak zauh a, a kawrlum a inhmeh êm vang a ni pakhat! A lei thar ve ngei emawni a inhmeh roh lutuk a, thlâ laksak loh phal chi ni ta nghal lo chuan..



"Lungngai suh ka pianthla phei chu hei ai hian a la vawt zawk dawn ania aw" tiin a banah ka lo vuan a, min melh vut vang chuan ka túm nghâl bâr mai! "Min zawt suh!" A tawng hma hma chuan ka lo tih khalh hlak hlak a, a nui ve tawp! Kei erawh ka túm lian khawp mai! Ka birthday takngial pawh a hre thei lo ania, chuti chung chuan ka bialpa chu a ni ve tho va!



"Hmanah ka zawt tawh tlat che in ka hria i birthday kha!" Tih paha min melh tlawn deuh hâ chuan, "vawithum min zawt a, vawithum ka chhâng tawh che!" Ka lo ti bak hlar a, a inthiam lo hmel chuan ka nuih a tiza ve tlat! "Teber, Sailo fapa duatsual theih loh leh king of winter ni bawk Saidingliana Sailo bialnu duhlai ngat i nih kha, a vawi li na atan leh a tawp berna atan vawikhat chauh i birthday chu min hrilh leh thei angem?" A beng pawt zauh chung hian a ti a, "thei lo" ka lo ti nghat chu a la na ngang mai!



"Saidingliana bialnu ni áwm tâwk lek i lo nih tak hi! Luhlul dún si, in ngaizawng hlum thak ru!" A ti hluk a, min kalsan zui nal nal bawk! Tuna a thusawi awmzia kha amah ngei pawh saw'n a hrethiam chai lovang! Saidingliana tak hi chu aw! "February ni 14, theihnghilh tawh suh ang che Zorinpuii bialpa luhlul em em pa!" Tiin ka kalpel sawk a, a nui hawk ri chu ka hre reng! "Min lo nghak lawk!" Hnunglam atanga atih vang chuan ding datin ka inher a, a phone a lo bih mual mual mai.


"Enge a?" Tiin ka lēt leh rih a, a phone kenlai chu dingdihlip ák ákin ka melh zauh bawk, notepad-ah hian, "Têberi birthday, February ni 14, valentines day ni bawk, ka theihnghilh tawh loh tur ni bawk! Heiha(patling aw phawiin)" Tih hi alo ziak a, ka nui hawk hawk mai! Hepa han chêt over theih em em zia hi chu aw! "Patling pawh i la ni lo aw!" A dara beng dat dat chung hian ka ti a, kiai ve suk chungin min lo kuah vat a, Sir Hmangaiha te awmna lamah chuan kan inkuahphei dat dat a..thu a lo sawi nasa mai!




"Kha Saidinga te pahnih kha, khawiah nge in lo awm a? Ka thusawi te kha in hre hman ve lo em? Mualah kan tlanphei anga hotelah chaw kan ei ang, ei zawh velah kawnah hian kan lêt leh anga, kha, in piah kawng pêngah khan kan tlân ang, kan tlân chho zel anga hmanlai hmunhlui, 'Thlangtlakmual' kan thleng ang, chutah chuan kan riak dawn anih chu aw, a chiang em?" Tiin keini pahnih chu min rawn melh a, "a chiang viau lawmni?" Pakhatpa in awlsam zeta alo tih vang chuan a ke ah ka rap nek a, "a na!" A la ti hluk zui! Manner a hre lo lutuk hi ka zahpui ziah!



"Kal ang aw, hotel pawh kan be fel tawh a, inthlahrunna tur a awm lo ania" tiin bus ah a lut zui ta daih a, Saidingliana erawh ka la melh khai khai thung.. "Sir Hmangaiha nge i duh keimah?" Min melh ve vut chung hian a rawn ti a! "Eng a?" Vin taka ka tih chuan, "pehhel kual duah a ngai lo, tu nge i duh zawk sawi rawh!" A ti leh nghut a, hmela mai mai chu.. "Nangmah ka duh zawk che tih i hre reng!" Ti deuh nghata inher ka tum chuan ka ban alo vuan hman tlat!



"Keimah min duh zawk te chuan engah nge Sir Hmangaiha i tan zawk ziah?" Thutak fe mai hian a ti leh hluk nia! "Saidinglian i mawl emai, kal ang ka ril a tam tawh ania!" Tiin car lama pawh phei ka tum a, a ding nghet churh tawh mai sia! Khawiah mah ka pawt kal lul lovang! "Vawikhatmah Hmangaiha thlâwp zâwngin tawng tawh suh ang che, ka duh lo!" Tiin amah zawk chuan min pawt kal leh ta dawt dawt a, a thik ve khanglang emawni? Mawla tak hi chu!



Puar pengpawnga kan in ei hnu chuan ka thin butut lutuk te pawh a reh ve ta deuh a, Saidinga pawh a puar khawp aniang a ngawi hlu hlu tawh mai! Nge ni a a mut a chhuak zawk ni dawn? "I mut a chhuak tawh emni i va ngawi rei thei ve!" Car lam pana kan kal lai chuan ka ti ta nge nge a, "i tawng si lova biak tur ka nei hleinem" a lo ti sup nia! Ka zawh hma kha ka ngai rum rum mai..



"I mut a chhuak anih ka ring a" ka ti leh a, "chhuak ve reng mai" tih pahin a hâm nghal bui bui a, a va naupangchhia thei tak! "A hmeichhia zawk pawh ka mut a la chhuak lo aw" tih harh tum taka a dára beng dat dat chunga ka tih leh chuan, "titeh teber, nilengin motor i khalh ve hleinem" tiin kawngkhar a hawng a, min nem lut dawt dawt mai! A chhuak tak tak a nih dawn hi..


"A hla tawh lovin ka hria, a hmun kan thlen ve leh i muhil nghal dawn nia" tiin ka thu rem sauh sauh a, a rawn thutluh ve rualin, "ka mutthilh chhungin enge i lo tih ang?" A rawn ti lut sawt sawt a, motor a tinung nghal bawk.. "Ka lo lerh vel mai mai ang chu" ti a ka chhânna chu a la na leh ngang mai! "Ka tlaivar dawn!" A ti bul hmuk a, ka nui huk teuh asin! "Saiding, naupangchhia tlat zel suh!" Nui deuh pat pat chunga ka tih chuan, "i fapa ang ah min ngai la min mutthilh pui rawh, a tawk a ni mai" a lo ti leh hrâm a, a tihngaihna tak pawh ka hre tawh lo ve a..



Thlangtlakmual kan thlen chuan an lo chhuak darh sang sang tawh hlawm a, hmanlai in(house) an lo sa nial nual bawk nen a nuam angreng khawp mai! Kawngpêng awmin a hnuailam zawk chuan swimming pool leh tourist lodge angreng deuh hi a pawh a, kawng chung zawk erawh Fiaratui kawng niin, a kawngah chuan Zawlbuk te, Lal in te, khawnbawl upa in tiang reng a awm ve thung a, a tu amah mah chuan kawnghnuai lam chu "pan ta'nge" an ti lo, a chung zawkah chuan an kal suau hlawm a, keini pawh kan kal ve leh ta nge nge e..



Zawlbuk chhungah chuan meipui an lo chhep hluah a, an kil bial thap hlawm bawk a, a chhuat lah dâp hnúm hlarh a ni bawk nen han chét vel a nuam kher mai! A then in a zân a zânin Lal in te chu an lo han fang vel a, kan hlim tlâng viau e.. "Sir, êm chhungah hian Pawndum a tam mai, engatan nge an dah ang le?" Lal in a kal mi thenkhat chuan an rawn ti lawng lawng a, Sir Hmangaiha lahin phur zet mai hian, "Ém a ni lo, thúl anih kha, rawn keng thla teh tak u!" A lo ti ve mai bawk a... Engatan tak chuan hmang ang maw?




Meilum chu kíl ve in Saidinga chuan min pawm leh hlún tawh a, a lum nuam ar ar hle mai, a mut a chhuak tawh khan ka hria a, in ái lum deuh hlek ila mut rawt mai pawh a pawi lovang chu... "E , in lo keng maw? Engzat chiah nge awm a?" Sir Hmangaiha'n atih tâk hluaiah chuan Zawlbuka rawn lut tharte chu kan lo melh thap hlawm a, Pawndum thahnem tak an rawn khâibawr lúk bawk..


"Sir, engatan nge kan hman dawn?" 2nd year zirlai Rammawia chuan a lo ti khauh a, a chhanna nghakhlel takin kan thlir thap hlawm bawk.. "Ele, tu nge chak ber kan en ang chu!" Sir Hmangaiha chuan a lo ti sam êt a, a ngaihna kan hre lo hlawm kher mai! "Kan inbuan dawn tihna emni?" U Mawizuala'n a lo ti khauh a, kan ri nghal hluai a.. "Ni e le, tun ang thlasik khawvawt kara inphelhsek ngam in awm em? Rawn chhuak ula!" Phur hmel fe mai hian Sir Hmangaiha bawk chuan a lo ti leh hluai a, tumahin an peih ka rin loh tehlul nen mipa ho chu an rawn ding suau hlawm a, an rík nghal luai luai laiin ka hnunga mi chuan, "Hmangaiha bawl theiha han awm!" Ngaisang lo tih hriat zet hian a lo ti hluk a, ka lo nuihsan tawp! Mipa ho chuan an kawr an phelh a, an kekawr nen, boxer an hâk vek hlawm avangin hmeichhe tan pawha en ngam loh tur a awm bik lo, Pawndum chu an veng hlún hlawm mai a, rin ai takin an taksa pawh a inphut mawiin an sek tul hlawm mai!



"Le, Maruata leh Ringzela te kha han inchai tak tak se la, kei vâl upa!" Nui huah huah chungin Sir Hmangaiha chuan a ti leh lauh lauh a, sir lam kan hawi thap ta maw tih ah Sir Hmangaiha bawk chu thochhuak hluaiin, in hmachhawna ding Maruata leh Ringzela te inkarah chuan ava ding ang ren rawn a, "a in phâwikâng thei hmasa sa kha a chak zawk in ni mai dawn a, round thum a awm ang aw, inring ru le" tiin amah zawk chu a han insiamrem sauh sauh a, Ringzela leh Maruata te chu an puan ven káwng ve ve a inchelhin an inmelh ta rân a, an rorum hmel dun ngei mai! chutah Sir Hmangaiha chuan, "Le!" A han ti tuar a, tlangval pahnihte chuan a phawi kângtu zawk nih inchuhin an thapui an han chhuah ta tak tak anih kha! Kei, hmeichhe âwm nêm tak pawh hi ka lo vahan tang si em!



"Tang rawh tang rawh!" Tiin a tu fans te lam lam pawh chu kan au tuar tuar hlawm a, a tawp a tawpah Ringzela zawk chuan a phawi kâng vaw vaw mai! An au dur dur a, keipawhin kut ka beng ve nasa! A hlimawm phian! Second round an tan leh a, Maruata'n a cháwi káng ve ta thung a, third round ah Ringzela a chak ta bawk.. Mi hrang hrang an inbuan a, kan tang na hlawm bawk nen tháwm a tha ham ham hle a, ka hnunga miin ka dula min kuahna kut pawh a pilh nian nuanin ania ka rin tawh ni!



"Tunah Muanzuala leh Jacoba ve thung, hemite pahnih inchai hi ka hmu chák tawh lutuk tlat!" Sir Hmangaiha chuan a thlan luang hru mawlh mawlh chungin a ti leh ta a, phur hmel fahrana Muanzuala a rawn chhuah tâk thauh thauh ah chuan melh loh theih ni ta bik hek lo le! A pian mawi zet leh a sa, tha nulh mai chu ka hmu ve ta a, College week lai vela ka star theih zia kha! Tunah pawh han inbuan chiah mahse tumahin an hneh chaiin ka ring lo! Chutih rualin nizan thilthleng leh hmana thilthleng vang khan ka ngei deuh rún thung!



"Melh suh!" Ti hluk chunga ka mit a rawn hup hmak vang chuan, "Saidinglian!" Ka ti that a, engahmah a ngaih loh hmel ngang thung! "A mak, tu nge chak zawk tih ka hre duh mai alawm!" A hriattham lek turin ka ti leh a, "ka hrilh ang che" a lo ti leh bur nia! A vahan thikthuchhe tak! Thâwm a ri hluai a, rei pawh an ri hman lo tih ah, "a va chiang ve kha chu! Jacob, tang rawh i thangtlâwm mai dawn!" Sir Hmangaiha chuan a ti lawng lawng a, hmu ve lem lo mahila a chak zawk chu ka hrethiam nghal mai! Second round an tan atanga reiloteah, "Jacob-a chu a che hleithei der lo!" Sir Hmangaiha bawk chuan nui huah huah chungin a ti leh a, ka mit a hupna a thlah ve chiah bawk.



"Thikthu pe chhe over pa!" Vanvadâk meuha melhin ka ti sap a, "i la lawm zawk ang" nui suk chunga tiin a in lahrang hlawk a, ka hamhaih lek lek mai! "E Saiding, i telve duh emni?" Chhuat laia a vei phei tâk thauh thauh ah chuan Sir Hmangaiha chuan a lo chiau au thuai a, ka âng phiau ringawt! "Thlasik Lalpa ve meuh, ka telve loh ten a famkim nâng le!" Tiin pakhatpa chuan a lo chhâng a, ka zak leh dawn mange! Mipa dang awm thep thawp laia, "tel suh!" Va tih lah thil ni thei a ni tawh bik chai si lo!



"A tha nasa e, Michaela nen hian inchai ula a tha ang, in sa a tha dun thelh thulh bawk a" tiin Sir Hmangaiha chu a nui huah huah a, chutah kan Saidingliana pui chuan min rawn pan vutin, a kawr chu a hlip zung zung a, min rawn pêk pah chuan a la siai zuk zuk leh ta nghal! Pawndum an ven tir a, Emma-i a lo phur ngang mai! Ka la ei lo ve khanglang zui! "In sa a chhah tha dun tep tup bawk a in inchai thei fê dawn anih hi!" Senior Mawizuala'n a ti lawng lawng a, midang ho an lo haw haw hluah hluah bawk nen za lo zetin ka nui ve suk suk ringawt tawh..



Chutah, mei êng ah an rawn ding dun ta alawm! Michaela chu ka lo la hre ngai miah lova, mahse an sawi ang tak takin a sa a chhah tup mai a, a sek phiar fuat mai bawk! Saidinga nen an intiat tawk viau in ka ring, a vun a ngo hran lova, han hâng chhe lua erawh a ni lo, a taksa chu gym kal thang tih hriat zetin a hnúm hlarh leh ta nghal! Saidingliana ka va en ve nâk alai chuan awi, ka zak hi a ni tawp mai! Uangthuang fê mai hian a taksa chu a lo pho suah suah a, khawilama six pack nei ber âwm ang ziazangin a lo in show kual thauh thauh a, a hnungzáng, a dul tih vel te chu a var hiang a, a dul a la kiar zui!



Nitina gym kal ka hriat tawh zawng zawngah a la thâu ber ang chu! Six pack te chu sawi loh one pack pawh a nei ngút dawn emni? Saidingliana hian ka rin a la ang lo tluang zel anih hi! "Lo kal rawh u le" Sir Hmangaiha'n atih chuan Michaela nen an kal phei thauh thauh a, taksa lenzâwng in ang theuh theuh, an in fit hleih hmel lutuk te chuan zakin min khurh chhiattir mai dawn alawm mawle!


"Rules kha in hrechiang maw? In châwi kán ringawt tur, a phawi hmasatu zawk zawk kha in chak a ni mai!" Tiin a'n hrilh ve ngial nâ a, Saidingliana bengkawrawngah erawh a luh loh hmel ngang mai! "One, two three, le!" Ti a Sir Hmangaiha a au rualin an inchai ve ta tak tak a, fans te tháwm a ring tha ngei mai! "Saidinglian min dék suh!" Nuihza aw lek lek chunga Michael-an arawn tih chuan an nui dur dur a, pakhatpa lah chuan a tawng hre âwm pawhin a lang lo!



"A mak, ka nâk nêm kha zen ruk ruk suh Saidinglian!" Michael-a bawkin a ti leh lawng lawng a, an kún dún ngur bawk si a, an pahnih chuan phone camera in an tin thup a, an nui uar uar bawk, kei erawh zah vangin ka sen vek thei hialin ka ring! "Khai le aw!" Aw rawl tawpa au chungin Michaela chuan Saidingliana chu a pu vu vu a! Kutbeng thawm a ring teh e!



"Kha chu! A va chiang vawk vawk ve.. Saiding, phakar awih tawh loh" nui hawk hawk chung hian Sir Hmangaiha'n a lo ti a, second round an tan leh ta! Rei pawh an la inpawm lo tih ah an puan ven a tla ve ve a, boxer nen an in pawm ta thial thial mai! Awi awi awi, hmeichhe insual hi an ni ringawt! An samah an in thâm sak ve ve a, "i phakar lutuk!" Tiin an inmawhpuh tawn char char bawk... A phakar hmasa zawk erawh ka hre rân thung! Saidingliana pui roh khan Michaela puanven a thám thlaksak hmasa anih kha!



"A tawk e a tawk e!" Tiin Mawizuala a lo inrawlh thuai a, inthlah an hreh dun hle a ni chêk ang, an sam ah an la in vuan nghet dun em mai! "Amak, inthlah ru, hmeichhe insual nghal lo!" Mawizuala bawk chuan a ti leh hluk hluk a, a nui huk huk pah bawk! A tawp a tawpah a pawt hrang thei hrâm a, ka lam pana Saidingliana a rawn phei boh boh lai chuan ka lo melhrum leh nasa tawh mai! Zahna bak min thlen ngai lo ka tih tawh rêng kha!



"Ka chak em?" Te chu a la rawn ti ta deuh deuh! "In ha rawh, mu ang" tiin a thuamhnaw ka lo pe sawk sawk a, nui suk suk chungin a inbel ve mawlh mawlh a, a thaw hlawi hlawi bawk.. "Khawiah tak hian nge puan in (tent) kan kaih ang?" Thildang ngaihven zui tawh hlek lo hian a ti sup a, "i duh duhna ah" ti a ka lo chhan vang chuan tho vutin min pawttho ve nghal a, midang ri nuaih nuaih karah chuan kan inzuichhuak leh ta nge nge e!



"Hetah hian aw" tiin thlanglam, khâm chhetê awmna bulah chuan a kaih mawlh mawlh a, a thim angreng bawk nen han puih vak ngaihna pawh a awm lo, phone light a lo ên tawp bak te chu! "Ka zo e, lo lut rawh" a tih chuan rang takin ka lut thuai a, páwn khawvawta din reng kha chu a nuam lem lo.. "I muhil nghal duh em?" Tiin puan min pe thuai a, lu ka buk nghat vang chuan insiamrem sawt sawtin a bán chu lukhamah min hman tir a, ani chu a lum thur thur bik mai!



"Muhil rawh, a hlauhawm lo ania, ka veng ang che" te chu a ti ve tak nâ in, hlauhawm pawh lo thleng se kei aiin a nawi zawk fe ang tih erawh ka ring bur thung! Saidingliana Sailo kha a ni miau a! Mutthilh ka tum a, ka thei lo, ka tâl sek vang chuan, "Teber?" A rawn ti sup a, "um" tih zawngin ka chhang, "zanin khan i nui ve tho em?" Ka rin loh tak zawhna min zawh vang chuan inlet thakin a mitah ka melh ngar a, zawlbuk chhunga an mei êng hlap hlap vang chuan fiah lo ruaiin a hmel chu ka hmu thei..


"Tinge min zawh a?"


"I nuih leh nuih loh ka hriat duh vangin!"


"Ka nui pawhin ka hre lo, ka zak viau a chu zawng chu" tiin ka lo chhang leh a, ka ngaihdan dik tak sawina hun min pek thin vang hian ka lawm angreng thin... "A va pawi, i nui dawn lo tih lo hre lâwk ila chuan ka tel hauh lovang mawle" chal chuar nang nang chung hian a ti nuah nuah a, "ngati nge?" Ka tih lah chuan, "engmah a ni lo, muhil tawh rawh thawh i hai ange" a ti sam leh êt thung a, a hmelah chuan engemaw, thil dik lo a awm tlatin ka hria! Enge tih phei chu ka hre lem lo thung..



"Muttui" tiin a káwngah ka kuah tha salh salh a, nghet zetin min lo pawmbet ve tlat bawk, zána a mize vawt raih thin ang hian awm reng se ka ti! Ania sin, mut dawnah meuh hi chuan mipa cool tak angin a ngawi hle hle thin a, chezia in min duatzia a tilang mai thin, khua a lo var hian mi hrang hlak ang maiin a harh leh em em thin lawi a, a zia hi ka hrethiam ngai dawn lo niin a lang e!


"Muttui le Teber, Saidinga bialnu duh em em nu" ka chala fawp zauh chungin a ti a, chu chuan thlamuanna ka hriatthiam chiah si loh min neihtir a, amahah rinna nghat pumhlum turin min duh niin ka hre bawk.. Amahah hian ka la hriat ngai miah loh mize tam tak a la awm niin min hriattir bawk a, engtikah emaw ka la hre fiah ve mahna, tun atan chuan a tawngkam khat lek vang khan ka hlim a, mi vannei tak niin ka inhre bawk!


Ka taksa a vawh tak riai riai vang chuan ka harh che che a, nghet lehzuala Saidinga kuah tumin ka bán ka ti che a, ka dap fuh tlat lo! Thil che deuh sat sat thawm ka hriat avangin ka meng deuh kawk a, kan puan in kawngkhar bula thu chung hian Saidinga chuan bottle a lo thlék vung vung a, khua lah a la var chiang lo niin ka hria!



Meng kâwk e ti lovin ka harh chiang hlek lo thung! "Thawh a hun tawh emni a?" Ka mit nuai niah niah chunga ka tih chuan rawn hawi vutin a kut lehlama a thil ken chu a hmawm a, tui a in leh khawlh bawk! "Ka tiharh che a ni maw? Sorry, ka zung lawk a, khua a la var chiang lo, muhil leh rawh kan vâk chau leh dawn ania" tiin ka sirah a rawn inthawlh leh nghal thuai a, ngaihtuahna a tawi tup bawk nen rang zet mai hian ka lo kuah leh nghal chial a, a lum leh nghal thur thur mai.. "Muttui" tiin ka phun sep a, ka muhil chhunzawm leh nghal chu a ni mai e!


(Like leh comments mawlh kha aw, kan sawi zing ta malh malh bawk a😂)


End of chapter - 13



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)