HEROINE - 12 BY APUII TLAU

Episode kal lai dah luhna

Moderator: writers

Apuii Tlau
Posts: 210
Joined: January 30th, 2021, 2:54 pm

HEROINE - 12 BY APUII TLAU

Unread post by Apuii Tlau » January 27th, 2022, 10:17 pm

Chapter - 12


An mitmeng atanga chuan an mak tih zia a hmuh thiam theih viau mai. Kawngka bulah chuan an la ding reng a, kan lo awmdan nen nuam ka ti chiah bik hran lo, Rinsangi pawh chu ani ve tho aniang, a in siam rem a a tho ta vat reng a.



"Lo lut ta che u, kawngka in rawn hawn tawh ber te chuan" Rinsangi chuan a rawn ti fiah kak a, a hmel ka en vat. A mitmeng atangin engmah chhiar theih loh mah nise a lawm teh chiam lo tih ahriat.



Thantluangi te țhian ho pawh chu harh chhuak thut awm hian an insiam țha vat a, meng rum deuh al in a țhiante pahnih chu rawn lutin Thantluangi'n a rawn zui ve bawk.



"Ka rin aiin i dam!" Chhani chuan a rawn ti nghal zat a, boruak ngam chi ani bawk a enliam tawp ngai chi ang kha hetiang hi chu.




"Enkawl tu a nei țha em a" Rinsangi'n Tv off paha a rawn tih zat chuan ngeiawm zet hian alo nui a. Tawii pawh kha alo men lian ve em em ringawt.
"Zar buaitu ani zawk lo maw!" te chu a rawn ti ve tak deuh deuh a.




"I ngaihdan dan!" Rinsangi chuan rawn phei pahin a ti nghat a. "Țhu ta che u" tiin ka lo in rawlh a, sofa ah chuan an țhu ve mai a. Rinsangi erawh ka khum bulah rawn kal in a pheikhawk a phelh sawk sawk a, ka chapal chu an inthawlh ve ringawt a, a size ani hlawl silo mahse a bun lui tho eng nge maw tih leh a tum ni.



"Kan insil lawk ange, i țhiante hi lo kawm rawh" tiin reilo te min melh zawk in bathroom lam a pan nghal a, ka chungah zawk a thinrim leh ringawt emaw ni?




"A zahtheih loh zia kha!" Bathroom a aluh rual rual a Chhani bawkin alo tih leh chuan ka chhang hman teuh kher mai. Mahse ka țawng hma a Thantluangi'n min lo țawng khalh hlauh lo se chu.




"Chhan, i ho emai!"



"Jo, enge i an? i ke chu a țha zel em?" Thantluangi chuan a rawn tih zawm zat a. A hmel hi inthlahrung reng hmel a pu ka ti mai, huat loh theih siloh hian a awm ve leh tlat zel bawk sia a buaithlak.



"A țha tawh viau mai" ka lo ti ve mai a. A țhiannu ka ngei deuh bawk nen chhan hmuk ka tum nangin ka khawngaih ve leh deuh tlat.



"A lawmawm chu, taka hei kan lo ken ve che" tiin energy drink leh thei eng eng emaw hi ka khum bul dawhkanah chuan a rawn dah a,a kal leh mai dawn emaw tih laiin ka khumah chuan a rawn la țhu kang ta deuh deuh. Lo țhu suh han intih ngawt chi lah ani bik bawk silo, ka en liam ta tawp mai.



"Kar leh tawp lamah team chaw ei khawm a awm dawn kha, Champion lo mahila 2 na kan la ni tala alawm awm" tiin sport lamah a pakai ta daih a, ka lawm ru viau.



"Ka lo hre ve hleinem" ka lo ti liam ve mai a.



"Ahh....nia official notice kan la chhuah lo a la hre lo ang, team hrang hrang leh individual ho hmun 3 ah kan țhen a, SU leh lecture'r ho nen insem zai in kan ti dawn a" alo ti ve mai a.



"Engah mah ka chhuak ve silo a, ka tel ve dawn lo ani maw" Tawii'n a rawn tih chuan "A nawl pui anga buatsaih kha chuan sum kan indaih lo deuh dawn a, kan hrut rual tawp" alo ti ve mai a. Sawi leh sawi hnu Thantluangi hi kan college ah SU member ni lai mek ani.



Bathroom kawngka lam a rawn ri rak a, hmai leh a ke lam huh deuh hliam a Rinsangpuii rawn chhuak chu kan melh rual țhawt a. "Enge!" a rawn tih hmuk chuan Chhani leh Tawii chu an hawi sawn vat a, kei erawh in ka ngaipawimawh hran lo, a tih dan țhan ani miau a.



"Khalai luguage dum ah khan towel a awm" ka lo ti vat a, ngawi reng a pan in a hawng ve mai a, ka thil miin min khawihpui emaw hman țawm duh lo viau mahila ani hi zawng a boruak adang tlat zel.




"Chaw ei khawm chu min lo hruai la, ka țhiante tumah an kal ve dawn silo a" Thantluangi chuan a rawn ti leh a, ka melh ve leh chiah bawk.Rilru thianghlim tak pu a chu thu chu a kà atanga chhuak anilo tlat a ka hriat leh ni. Zep loh chuan țhiante chu nei tak ani ringawt, SU lamah te pawh a kawp țhin te an awm alawm.



"Ka hre lo le" ti bakin ka chhang lo. Ka hre lo miau a, bakah khi laia tum bur te reuh khian ngaihdan kawi lutuk alo nei kual leh palh ang, a duhdan pawr hlar a a sawi leh hma chu.



"Thla leh in anniversary ani leh der tawh ania" Tawii'n a rawn tih chuan ka lo rum nghut a. Enge maw an hriat teh hrep ni.



"Engtin nge kan lawm ang, Surprise game a changtupa in a khel leh zawk dawn em ni" Nui ar ar paha Chhani'n alo tih chuan Thantluangi zawk chuan alo khak ka ring ania, a ngawi leh hmak lawi sia henu hi enge maw a hriat reuh ni.



"Ințhen tawh hnu ah anniversary an lawm ngai em ni?" Rinsangpuii zawk in alo ti khauh a, a chapal lian zet leh eng emaw no ah hian kengin a rawn phei ve leh hnek hnek a. Khum a Thantluangi rawn țhu melh zauh chuan anui tawi tak a, single sofa lian zet ah chuan a țhu thla nghat bawk.



"An renew  leh daih tawh" Tawii'n alo tih chuan ka inrin hma in ka nui chhuak. Ka lam an rawn hawi deuh țhap chuan kan insum leh deuh. Khawi lama Renew?



"I hre sual ani lo maw?" tia ka va melh chuan meng deuh zak zak hian a akun deuh chhal a, thawk a phit a dawt sawi ringawt.



"Joel i ti tau rei tawh mah mah, Tluangtei pawh a insawifiah a ngaihdam a dil tawh che kha, khatia awm kher angai lo i la duh reng tih kan hria lawm" Chhani'n alo tih chuan ka lo ner sawk a. Lemchang thiam thar.



"Min hrethiam ula thil hlui rawn sawi chhuah emaw rawn tih thar emaw in tum anih chuan tilo zawk lo mai rawh aw, ka kalsan tawh lamah ka hawi let ngai lo bakah ka bialnu awm ve lai lehnghal phei chuan khatiang lam sawi ka duh vak lo !" ka lo ti nghut a. Mak tih hmel zet a min rawn melh chuan ka lo nui suk a. Thantluangi erawh in mittui tling pama min en chuan nuam lo ka ti ve deuh tho, mahse an mahni cho chhuah alawm tiin ka in fuih thung.



"I va tenawm ve, in ințhen atangin thla aliam dek dek chauh ania, awiii...nang hian ilo kawp reng ani zawk lo maw? Hah? Ani chiang ani tiraw.....Chuan Tluangtei chetsual palhna chu rem chang ah la in i țhen ta hmak a, rapthlak hian TENAWMPA LEH!" thinrim awki sang vaha Chhani'n a rawn tih chuan che thei ngat ila chuan kut ka thlak hial mai thei ani.




"I zeldin thu mai mai kha dah bo rawh, min chhuahsan nghal bawk rawh u" ka tih hmuk chuan rum zet hian Rinsangpuii sofa a ngeng zet leh luhlul tih hriat zet a lo țhu nen chuan min melh tawn a.



"Nang ang mihring tenawm lutuk hi khan i nihna sawi chhuahsak chu i la nà ve hle mai maw" Tawii'n a rawn tih ve hlar chuan rum zet hian ka lo melh a.




"Min chhuahsan vat mai teh u" ka tih leh hmuk chuan Tawii chuan tum zet a min rawn melh leh in Thantluangi chu a rawn kai sawn a. Lalchhanhimi chu a kal ve mai dawn emaw tih laiin thleng silna lamah chuan pheiin thinrim zet a no nen a rawn let phei leh chuan rum zet hian ka lo melh a, mahse ka hmai a tui a rawn theh tak țhawt ah chuan ka phu ve zawk mai. Hmeichhia leh!



Ka hmai huh tuai thla pawk in thinrim zet a ka che tur chu ka thil hmuh avang chuan ka tawp chawt a, ka melh reng tawp. Rinsangpuii chuan a coffee nge thingpui chuan Lalchhanhim chu alo theh țhawt a, Chhani zawk chu a au tuar mai.



"I duh tawk a ka bialpa i an khum kha chuan ka en liam thei che, kut i thawh kher erawh kha chu i ti sual ta nih kha" ngeiawm zet a nuih paha Rinsangi'n a tih chuan ka lo melh tawp. Ka thinrimna te chu an dai diak a, henu hi ka duh ani, ka duh tak zet.



"Zawngi leh!" tih tuar paha Chhani'n Rinsangi samah a kut khing hnih a ava keh chawt chuan thinrim zet hian ka țhu chhuak nghal zawk a, khum atang a chhuk vat a pan ka tum lai tak chuan Rinsangi sam kek paha Chhanhimi țe tuar tuar chu Rinsangpuii chuan a sam ah chuan lehlam lehlama țham tawn ve in a hmai ah tak a khup in an do chho mai chu, ka dinna ngaia ding in ka melh tawp.



Chhanhimi chu dak awrh in hnunglamah a tlu thla dawt a, a țhiante pahnih chuan au chul in an buaipui nghal sawk sawk bawk, a hnar rawn thi in a kà atangin thisen a rawn chhuak nghal bawk. Rinsangi sam thur zet a ding chu bai saih saih chuan pan hnai in ka va kuah chawt a. Rang zet hian min lo kuah let vat bawk.



"A phu tawk ka pe nih kha" ka beng bula a rawn la tih hram chuan thinrim viau e tilo chuan ka nui teuh kher mai. Ka phone chu ka ipte atanga phawrh in ka nu ka text a.



Chhanhimi a țhiante pahnih in sofa a hlang chho a an buaipui mawlh mawlh lai chuan ka nu leh nurse pahnih an rawn lut a, doctor pakhat a rawn tel ve bawk.



"Buaipui rawh u!" ti nghut in ka nu chuan kei leh Rinsangi sam thur deuh bama ding chu min rawn melh hrawk a, a mitmeng chu a no teh chiam lo.




"A hnar ruh hi a dik lo a, a lei a seh kak bawk hei hi țhui angai ang, a tlukna ah alu hi ala hai niin alang ala harh peih loh danah" Doctor - a chuan rawn ti zung zungin ka nu chu a rawn melh a.



"A nawrna tur va la ula, a lei chu ka țhui rawh u!" ka nu in a tih hmuk chuan "A hmui pawh kha țhui ping thei ula alawmawm viau ang" Rinsangpuii chuan a rawn ti nghat a. Ka nu leh midang zawngin an rawn melh țhup chu ngatan mah ngailo tih hriat zet hian Chhanhimi mu reng chu rum al hian ala melh reng thung.



Nurse pahnih chuan a nawrna chu va la in an nawr chhuak ta nghal a, ka nu leh Rinsangpuii tih loh midang zawng chuan an zui chhuak nghal bawk.



An chhuah fel hnu chuan ka nu chuan min rawn melh dun leh vang vang a, kan ding zum zut ringawt. "I khumah chho rawh, i kè kha la hmang tur ini lo" a rawn ti nghat pah chuan chhuat a no tla pahnih chu chhar in tui khawihna lamah chuan a chhohpui a, keipawh Rinsangi chuan min rawn puiin khumah chuan engtin tin emaw kan in dah chho leh a.




"Eng nge thleng han sawi teh u!" Ka nu in rawn let paha a tih chuan Rinsangi ka melh zauh a, min lo en ve chiah bawk.



"Nu, nakinah keimah ka hrilhfiah ang che" ka tih chuan min en tawn leh te te in a bu ve nghat a.
"A serious angem?" ka lo tih leh nghut chuan "Serious lo ang, a lei erawh a hmang țha hleithei vak rih dawn lo anih kha țawng lam a harsat dawn tihna nih bawk chu" ti paha Rinsangpuii a rawn melh kher chuan Rinsangi zu alo nui ve sak a.




Ka bag chu va zen rak rak in ka shirt thlakna tur ava phawrh a, ka huh tih pawh ka lo theihnghilh țep alawm, ka nu erawh balcony lamah phone a hmang rih thung. Chhuat huh pawh chu amah chuan a hru ro leh vek a,a mood erawh a fuh hleithei lo nge a nui sak țalh mai.Ka nu awm ve run bawk nen rei vak lo a țhut leh hnu chuan min hawn san ta a.




"Enge thleng sawi tawh ta che" ka nu in a rawn tih leh chuan ka nuih te lam aza zawk, thil thlen dan abul atanga ka sawi chhuah parh hnu ah chuan a chek deuh tlak a.Mahse thinrim hmel aiin nui hmel ka hmu zawk.




"Nangmah vangin nula pahnih an insual ania" nui paha a rawn tih chuan rum zet hian ka lo melh a. Sawi awm ang lo thei."A țha hrim hrim e, mahse i sawidan hmangah tu emaw chu i ngam lo dawn tlat in ka hria" a rawn tih leh chuan ka lo rum nghut a. Fiamthu ah min laksak emaw tih turin ala nui zui rah rah bawk.




Dar 4 velah ka țhiante 3 an rawn thleng a, ka nu ka hrilh sa avangin ani erawh tlaiah inlamah a haw thla ve thung ang. Thawveng zet chuan an rawn ri leh nghal rum rum a, keipawh boruak dang an rawn keng tel leh tlat tawh nen ka nui ve leh vur vur tawh. Chhanhimi erawh engtin nge a awm tak zel tih pawh ka ngaihtuah buai peih tawh lo, ka nu khan alo buaipui ve leh mai ang chu maw.




"Awi....hmanzan chu e i hriat loh hi ka hlau asin" ti paha Rinsanga'n rang zet a min rawn bawh nghal thuak thuak chuan "A mak cheng chung" ka lo ti nghut a.




"Hmela! ngawi hmak rawh" Dawnga'n alo ti ve hlur bawk. An bag rawn ken vel Dawnga leh faka'n an dah phei lai chuan "Kan Dingdonga hian nula chicks tawk a chhar a, tleirawl te kawlh zet mai" Nui paha Rinkima'n a tih chuan ka lo melh deuh haw a.



"Hmanzan khan kan dineout a, party lamah kan tlang bawk sia tah chuan ania, te reuh te khal nalh zet mai" tia a sawi lai te chuan anui hui a, Dawnga te pahnih erawh an bag atangin eng eng emaw phawrh in min ngaihsak lem lo.



"Zu kha chu rui lo ila chuan ka ta tur mawle, mahse ka lo rui bawk sia min hma khalh a, an inbia te kha an insual lo chauh emaw tih laiin car lam thei ah an chuang leh daih sia" nui țhaw a a tih leh chuan "I va mawl tak" tiin ka lo nuih puia a sawi uar thiam nasa si Dawnga te rawn pheiin a thil sawi an rawn hre thawi hman nge an ri zui nghal țawk țawk mai.




"Kan rawn chhoh dawn khan Tawii leh Thantluangi kan tawk tak asin, an rawn kan ve che mi!" Faka'n a rawn tih chuan vawiin thil thleng vel chu a bo abang awm lo in ka hrilh ve a, an mak ti chu an kà ho lo chauh.



"Chuvang anih chiah chu Tawitiptepi kha min melh rum ve em em ni, khu nu khu chu indah sang ve ai induh ve bawk ai, a hang thil thel te khu a sexy lawm te tia chhe uih" Rinkima'n duhthawh zet a ala tih chuan kan han nui leh rih. Rinsangi nen kan chungchang pawh zep theih tawh hek loh an hre ta vek chu nia, mak an ti si a chanchin a chet dan a awm dan min zawt sek mai, hrilh kher erawh ka tum hran lo.



Tlai chaw chu En-a'n min rawn pe a, kan 4 ta tur lawih an rawn keng. Ka țhiante chuan an ta tur order mai an tum kha nia mahse chutia an rawn kep ta ah chuan hlim zet in kan ei ho. Mipa awm khawm e ti lo chuan kan ri ve leh lung lung zel a, kan ti ti erawh ala puitling teh chiam lo.



Chaw kan ei kham hnu lawkah nurse rawn kal in damdawi ei tur ho min rawn pe a, Rinkima'n alo melh leh nasa pek. A chhuah leh hnu ah an sawi leh chiam kha, a sawi dan hmangah lah Pathiannu emaw te pawh a ang! Rubber air bed an rawn ken chu an pump sap sap a, sofa a mut dul ai chuan a nuam daih zawk tak ang.



Ka nu leh pa in min rawn be zawk a, vawiin lam kan chanchin ka pa alo hrilh leh tawh aniang min chhaih zuk zuk pek! Tv chu on in phone nen connect in Rinkima leh Faka'n an khum puar ani tawh mai ang chu haha...a mu pah in games an khel a, sofa sei a Dawnga erawh mu thluang duai in a phone a sik ve neuh neuh mai. Bialnu thar a nei tak tak emaw ni?



Rinsangpuii ka text ve lah chu min la chhang lawk thei lo zui, tih tur avang phian bawk.



*Vawiin a Chhani chet dan avang khan min hrethiam dawn nia* Thantluangi hnen atanga ka dawn.Seen erawh ka tum lem lo.
*Ani nen khan in ni tak tak lo tiraw?* a rawn thleng leh zat a, seen sak erawh ka tum lem lo. Ngawihsan tawp ila buaina kan pum pelh ani mai.



*Enge i an? Chaw kan ei kham chiah* Rinsangi hnen atangin a rawn thleng ve zat a. Mi status țha deuh ka en laklawh bawk nen ka la seen lawk hman lo.



*Tunge i biak? Ramnunpui* Ka seen rang teh asin.



*Ele....ka lo nghak che!*


*Ka message pawh i seen har em kha* Minute khat pawh a tling awm tawp silo a.



*Minute khat pawh a tling lo*


*Kha mi chhung khan nula engzat nge i biak hman?* Tei vet hian. A thikthu chu pe chhe ve tak ani.



*1*


*Hmela*


*Hmela bialnu*


*Va be leh rawh, keipawh midang ka be dawn*


*Rinsangpui*


*Aih*


*Baby*


*Shut up!*


*Aih*


*Midang be pa*


*No...I room ah i awm em?*


*Aih, sitting roomah kan țhu țhup*


*Ka lo leng dawn ami?*


*Awii, i ngam lul lo* ka nuih a za kher mai. Mahse cho na pakhat erawh a tling leh tlat tawh. Ka la leng dawn tih ka hre ru leh rauh rauh tawh bawk.


*Ka țhiante ho an lo riak ve thung dawn a*


*Tute? Mawldeuh te kha mi* a rawn tih chuan ka nui suk a. Teh tawp hian


"Single kan va chep ve" Fakzuala'n a rawn tih chuan throw pillow chuan Dawnga'n a vawm nghal pawp a, alo la bum zauh zui.Chimawma te pahnih chu an rawn nui kì vun mai bawk nen ngeiawm ve rem rem tak an ni.



*I ex best friend chu enge a an a?* a sawi duh dan reuh chu. I ex! Ani ve miau bawk sia.


*Zanin chu hetah a awm ve ang, luhai ala nei deuh a....* ka ti țha ve mai a. A chet dan te kha ka mitthla hian ka la nui suk suk thei, a thluak hi chu a țha ve chiang alawm.



*Sailo nula kut thlak te chu kha kha ni mai* zam map lo hian alo ti leh a.Ka nu in i ngam dawn lo in ka hria a rawn tih kha ka hre chhuak rauh ruah,a awm ve tho e.



*Sailo suak in ni lo maw?* ka va ti leh hram a. Sawi tur avang ve thei em a.



*I zak lo! Hmar lam lal hmingthang Saithangpuia thlah kal zel kan la nih hi* a rawn ti leh pek.Tlawm a hreh viau pawh hi alo awm lo hran lo.Sailo thisen kai alo ni kher bawk sia.



*Naktuk ah lo kal leh rawh* tiin thudangah ka pakai pui leh daih a.


*Insual angai leh palh ang, ka peih tawh lo* a rawn tih chuan ka run tawk a tling leh viau. Henu zit zet hi chu!



*Ka dam hunah i hre viau ang* kan ti thla ve ringawt a. Abak tih theih ka nei der silo a.



*___________________*___________________*


A tuk nileng chu ka țhiante pawn min la awmpui a, therapy ka lakna tur lamah min hruai kual dawr dawr țhin bawk.Rinsangpuii rawn lan miah lo vang nge ni te chu a rei riau a kan hriat ni.



Chawhnu lama ka nu rawn kal in Chhani te chanchin a sawi chuan ka lo nui suk a. "Harsatna nasa em em a nei lo bawk a, damdawiin bill kan siamsak loh bakah zangna dawmna tlem azawng ipa nen kan pe a, an lungawi ve mai kha" ati liam puat a.



"Ril ațam dar 3 chauh ala ni bawk si, eng emaw canteen ah emaw zu lei teh u" Tiin Dawnga chuan Rinkima leh Faka chu an tir ve ngial a. Dawnga pawisa vek an ken sak bawk a phur zel chuan an chhuah ve mai kha.



"Nizan khan Thantluangi'n min lo bia a" Dawnga'n a rawn tih chuan "Sawi lo teh!" ka lo ti nghal hmuk a. An chanchin kha ka hre chak lem lo.



"Hmeichhe sual tak chu ani bik lo asin, a che fuh thei lo laklawh mai mai zawk niin ka hria" ala tih hram chuan ka melh deuh hrawk a, a ngawi zui ve ta hram. An ni vanga buai emaw an chanchin hriat ringawt pawh ka kham rih ngawih ngawih.




Meizial zu turin balcony a pan ta daih a, kei erawh ka phone ka thai kual vel mai mai. Rinsangpuii lah chu thehmeh tak mai chuan a reh vang vang bawk si, ka in sang mar țun tawh. Min ngaihtuah leh miah lo khan thawveng zet in a vak leh dawk dawk hial ania ka rin ni.



Rei fe hnuah Rinkima te țhiandun pawh an rawn let ta hram a, an thil khai atang chuan an rei chhan ka hre nghal mai bawk. Canteen nilo in pizza lam daih an lo zu lak vang anih lek hi.



"Taka intur kan la lam chho miah lo" Faka chuan an ti leh hnu hnawh a. Nawi dun mai sia.



"Fridge ah khan a awm in ka hria eng emaw ber kha rawn la chhuak mai rawh" ka tih chuan akal nghal vat a. Sprite a rawn la chhuak nghal.



Țhet darh in kan kil țhap a kan ril alo țam hlawm aniang a kam nghal duak duak mai.



"Taka, i bialnu i be tawh em?" Faka'n min rawn melh haw paha a tih chuan ka lo bo deuh hman.



"Timaw?" ka lo ti ve mai a.



"Alo lang miah silo a, bakah khu tah kan thil zu lakna ah khan mipa pakhat nen an lo chawl ve a" tiin Rinkima nen chuan min melh ran a. Ka hawihai lek lek alawm le.



"A țhian aniang" ka lo ti nghut a. Mahse mipa nen an chhuak dun tih ka hriat khan ka taksa ati sa nghal pup pup thei, ka text zo zai a chhang lo a mipa nen an lo fawr vang mai mai alo nih dawn nek hi.



"Taka an thla kan lo lak ruk sak alawm" tiin Rinkima chuan a phone rawn phawrh in a hmet zauh zauh a, chumi hnuah ka lama a rawn lek chuan ka lo ban vat a. Chiang zet a phone kan en chuan ka in seh ruh nghal ti tih.



Rinsangpuii leh mipa pakhat inhnaih fe in an țhu dun a, an hmelah an in haw lo tih a hriat ngawih ngawih bawk, an hma lamah an dawhkan kil in mipa leh hmeichhia tho an țhu bawk. Min vilh ngut ngut a ka thil ei chakna pawh a bo vek.



Mahse ka țhiante hmuh ah erawh engtin tin emaw ka la phat pui hram hram a, ka nui lui bawk chhunglamah erawh ka alh pup pup maiin ka hria.



Tlai ah ka țhiante haw dawn chuan min rawn reply ta chauh a, ka seen a ka chhang lem lo. Ka țhiante hma a ka mualpho teuh zia ka hria a, min ti tlawm hluah hluah bawk.



Rinkima leh Faka an haw a, Dawnga erawh ala riak thei dawn hlauh alawmawm.Tlaiah kan chaw tur ka pa leh Nautei'n an rawn dah chho a, an awm ve deuh vang vang hnu ah min chhuk san ve leh.



Dawnga nen chuan eng eng emaw ho zet zet sawiin kan ti ti ve mai mai a, lehkhabu chungchang sawi hnu lawkah football lam ah te kan pakai leh daih, ahnu ah Movie.



Ka phone rawn ri ral ral chu a vawi 3 na chiah ani. Dawnga chu meizu turin balcony lamah a phei ta daih bawk nen ka pick up ve hram a. Ka ngawi reng thung.



"Hello, i pick ve te chuan țawng ve la" a rawn ti nghal lar lar a. Ka thaw hawk ringawt.



"Ka message i seen reng sia min chhang lo, min hne leh tawh em ni?" A rawn tih chuan ka rum nghut a.



"Vawiinah khawiah nge i kal?" ka tih hmuk. Ka inbengdai hlei thei lo. Ka țhiante hma a mipa nep ber ang maia a awmdan ka sawi mawi sak lai ka ngaihtuah hian ka sa leh pup pup tawh. Ka zak! Ni e ka zak tak zet!




"Ah, kha kha maw....kan buai deuh alawm chhungkaw lam thil ania ka lo be hman lo che..." a tih lai chuan ka in seh ruh hle tawh. Ka dah san lohna chhan ka hre miah lo bawk.



"A tawk, phone hi dah lo la, thil ka lo thawn ang che lo en rawh" ti hmuk in whatsapp ah ka lut a, Rinkima thlalak sak kha ka thawn nghal hmiah a, a seen ve nghal bawk. Minutes 2 chhung vel chu a tu a mah mah kan țawng tawh lo bawk.



"Min en thla em ni?!" Chang lam maha a rawn tih chuan ka rum leh nghut a.



"Chutiang ti tur khawp a mipa nep ka ni lo!" ka ti hmuk a, a thawk la hawk ri ka hre zawm zat bawk.




"Ka sawifiah thei.." a tih lai chu ka lo pawt chat vat a "In chhungkaw buaina chu chingfel hmasa phawt la" ngeiawm zet hian ka lo ti ve a. Min palzam lua deuh tlat tawh ani.




"Chutiang in ti nghal bur ringawt suh, engmah i hriat loh kha" a rawn ti ve nghat a. A awki a nem bik lem lo.



"Hre lo e, engtin nge ka hriat reng ang! Ka hriat zawng chu maw ka țhiante hma a mahni bialnu te awmna pawh hre miah lo a ka awm laia kha thlalak min pek lai te, ka zahna leh ka tlawm zia te chuti chung pawh a ka la sawi mawi sak lai che kha ka la hria!Nang hian mi dah zero chu ilo thiam hrep hi" Ka țhinrim lutuk chu ka aw a a chang khel khawl viau, a ring lam mah bawk. Dawnga hmai pawh ka zah hlei thei tawh meuh lo.




"Chutiang ani lo...hmaichhanah sawi ang, ka sawifiah thei..." a rawn tih lai pawh chuan ka chhungril pik lutuk avang chuan phone chu ka hmet tawp hmiah a. Ka hmeh tawp rual in ka theih pa tawp ana in ka hma lam ah chuan ka vawm viam a, bangah tak a fuh bawk nen a darh chiang hle bawk.




Ka thaw hawk hawk a, awm ngaihna pawh min ti hre nek lo e. Ka taksa te chu an sa pup pup a, ka mualpho teuh zia mawlh in min la luah. Inti thei taka a chanchin ka sawi lai te, a tuk lawkah midang nen ka hriat miah lo a dawr a an lo chawl leh daih te, ka zah zia hi in hrethiam kher lo ang.



Dawnga rawn lut pawh chuan engmah min zawt zui lem lo. Ka phone darh nuai pawh a awm ang ang chuan kan en liam tawp.




Insehruh țeuh in ka mu meng kar a, thawk ka la leh chiam țhin. Dar 10 ari chho mai tawh bawk.



Dawnga kawngka va kalha a rawn let phei leh chu thui pawh a kal hma in kawngka chu an rawn kik koh koh a, min rawn melh zawk a, kawngka lam panin a phei leh nghal mai bawk. Tun ang huna rawn kal an awm ngai lo bawk nen eng emaw emergency a awm anih ka lo ring ve tawp a, thawh chhuah erawh ka tum hran lem lo.




Rei lo te ah kan khum awmna lama pen thawm ka hria a. Ka la mu lui reng thung ka ban chuan ka mit ka hliah tlat bawk a, thaw pik sa nen ka ning.



"Țhiana hei an be duh che ani awm e" Dawnga'n a rawn tih chuan ka thaw hawk a. Mood chhiat lai lai in. Ka ban chu zawi muanga dah sawn in ka țhu chhuak a. Mahse...ka hma zawn chiah a lo ding nen chuan kan in melh chiang khawp mai.



A mitmeng chu abuai hle a, a chal lam chi a thlan dap bawk. Pajamas leh sliper chauh a bun danah a rawn hmanhmawh hle te pawh aniang.



Eng chu nge maw i hriat hrep le RINSANGPUI?!!




*_____________________*_____________________*


A thui bawk a comment vek tur😁 anih loh chuan a tawi leh ang (te kha ti vel ila) Muttui vek ulee.......💙💙💙💙



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)