THINCHHE LALNU CHAPTER -9

Episode kal lai dah luhna

Moderator: writers

Lalnunmawii manuntei
Posts: 109
Joined: November 26th, 2020, 10:46 pm

THINCHHE LALNU CHAPTER -9

Unread post by Lalnunmawii manuntei » January 27th, 2022, 10:22 pm

THINCHHE LALNU


BY


Lalnunmawii Manuntei

3 years Later



Lalhmangaihsangi pov.


Ka nu leh pa te thusawi chu ka hre vek a, ka bengkhawn duh lo lui ve ngat.




Kal mai ka tum chu min ko dingin a ngai te bawk chu an sawi leh a, huiha... ka van ngaithla nawn peih lo tak..





"Alberta hi mi ṭha tak a ni a, a zaidamin a nun a ngil em em a, nei la ṭha kan ti, i tan a ṭha lo tur chu kan duh bik lo, i nawmsak na tur leh nakin zel a i hma hun tur kan ngaihtuah vang chauh a sawi kan ni" ka nuin a tih chuan chhan tinah pawh ka tin lo.




" I duh zawngte a ni ve reng reng em? I duh ngang lo chuan a chhan tal sawi la" a tih leh chuan , " ka ngaihzawnghlui a nih hi, enganga mi ṭha pawh nise ka nei duh teuh lo mai" tih ka duh viau nain em a ka tia, " kum 23 chauh ka la nia, nulat ka la kham lo" ka ti ta zawk a.





Dik tak chuan nula tia sawi theih chu ni ve tho mahila ka kum hian pasal neih hi a la pha chiah lo chuan ka hre deuh a ni.





"Nang ang rual chu sawi loh nang aia naupang leh chhawngte pawn pasal fanau an nei duah tawh a lawm le, bakah i lerh vang ni loin nu leh pa te thu i awih vang a nei tur i nia, tumah hian an dem bik lo ang che" min hrilhfiah eng ang mahse ka pawm thei lo..




"Ka ṭhiante nen puanṭhui zir kan tum a, kan insawm vek tawh, bakah ngaihzawng sawi tham em pawh ka la nei lo, nula senior nih ve te pawh ka duh" ka tih chuan a beidawng deuh nge min chhang ta mai lo chuan a thaw hawk ringawt.





Alberta lam ka thlir chuanba ṭhat lohna lai sawi tur pakhatmah ka hre lo,a ṭhatna lai erawh an hriat ai nasa in ka hre tam zawk; mahse, ka bialpa hlui a nih vang pawh hian ka nei duh lo, min hrethiamtu hi pakhat tal awmse ka ti.





" In en chiang rawh, i pian leh hmelah hian ṭha tih ngawih ngawih tur i ni bik lo nachungin heti khawp hian an duh che nia, i vanneihna hi i hai palh hlauh ange, in ngaihtuah chiang rawh" chhan pawh ka chhang buai peih tawh lo, ka room lam panin ka kalsan daih.





Beng sik meuh a ka inngaihtuah hnu pawn ka duh lohna em em chu ka hre lo, ka bialpa hlui a nihna hian min iai tir a ni.




"Inngaihtuah ngun hle rawh, i duh lo viau a nih chuan an nawr lui bik lo ang che, i duh loh chung neih luih tir phet che an tum chuan ka kâ ka lo ang ve ang" ka u ṭhin hi chu aw... min ngaihtuah leh a nia, ka tan hian a van hlu tak.





Mi pakhat vanga rilru natak a ka awm tawh hnu in he thu ka hriat leh hnu lek phei hi chuan ka thluak a chawl dup a, engtia han awm tur nge ka hrethiam thei bik lo, duh ka thlan tawh na lamah chuan ka thlang sual ngei ngei ṭhin sia, nu leh pa thu ka awih loh ngat phei chuan ka vanduaina a kaltluang zel a nih kha.




Ka inngaihtuah fe hnuah pawh ka duh em tih ka ngaihtuah chhuak zo chuang lo, ka dinhmunah hian tu te pawh ding se thuthlukna siam harsa an ti ve tho in ka ring.




"Rilru hahdam takin awm phawt mai teh, i ngaihtuah nasa leh lutuk a i buai zo a nih kha, lungkham engmah nei loin thlamuang takin awm tawp rawh, nakinah i duh chu i la thlang dawn nia" ka u in a tih leh takah chuan ngaihtuah tawh loh chu ka tum lui ve ngar ngar a, a va har si em!





"Ka duh ve tho chuan ka hria; mahse, ka duh lo leh deuh, a chhan dik tak ka hrilh ang che aw; mahse, tumah hrilh lo la" ka chawl dat a, ka thusawi tur chu nghakhlel takin abeng a chhi kar.




"Ka bialpa hlui a nia, tunge ngaihzawng hlui te pasalah nei ngai bakah amah in engtin nge min ngaih ang, ka duh em em na ka hre lo a, ka duh lohna nise sawitur ka hre chuang lo" ka tih meuh chuan a ngaihtuahna a buai ve hle in ka hria.





"In lo inngaizawng tawh maw? Ka pi thih a a lo kal khan unau inkawm ngeih tak ang maiin lawm kan hmuh che u, tinge a tir khan min hrilh loh" vui hmui pu zeta a tih ve meuh chuan sawi tur ka van ta raih mai.




" Ka nu leh pa te hnenah i neih duh loh chhan engkim hi hrilh ila, an hrethiam lutuk ang che"



" Ka duh teuh lo mai, an hriat ka hlau, eng ngaihin nge min ngaih ang?"




" I nei duh chuang si lo a, an hriat vek kha a ṭha a lawm"



"Ka bialpa hlui a ni tih chu hria se chuan an sawi tawp lo ang, tihngaihna pawh ka hre tawh nek lo e"ka tih chuan a rilru a buai ve hmel hle.




Ka unaunu nen hian kan kum inthlau viau mahse kan inkawm ngeih em em a, ka tan chuan ka ṭhian ṭha ber ang mai a ni, tuna ka la dam chhan pawh hi amah vang a ni.





"Lungngai lutuk suh, i tan a ṭha tur a nih chuan i nei em em ang, anih loh chuan i nei bik tawp nang" min hnem ve nasa, mi hnem dan erawh a hre lo, heti chung pawh hian ka thlamuan pui ve em em tho.





Zanriah ei lai chuan tlai lama kan thu khel bawk chu min khel pui leh tawh, ka ning lutuk leh ka insum zo ngang lo a,"Ka duh loh vanga ka ṭhen hnu chu pasalah ka nei ang maw? Engtin nge in theih zawk? Ka ngaihzawng hlui nei tur hian vawikhat pawh ka la inngaihtuah chhin ngai lo, duh leh thlahlel tak chunga ka ṭhen tak chu lo ni se awlsam takin ka nei nghal ang, bakah hmanlai hun ang mai, fate nupui pasal tur lo hual lawk hi a ṭhing lutuk" ka thinrim em avang chuan ka nu leh pa hmai pawh ka zah zo lo, ani khan eng ngaihin nge min ngaih tehreng ang, nitin zantin min biak hun ka nghak reng ṭhin a, biak tik ni reng a nei ngai lo, thereng vuak thlak ang maiin a reh hmak a nih kha, ani pasal a ka neih ai chuan len tar ṭhak pawh ka thlang zawk.




Ka chaw bar lai chu lem a harsa ta ṭalh mai, ngam ik ilang chuan ka nu leh pa mit hmuhah ka chhakchhuak leh vek duh ang.




"I chaw kha ei leh rawh" thawh mai ka tum chu ka pa thusawi vang chuan ka ṭhulh fel der.





" I tan a ṭha tur kan ngaihtuah a lawm, engtin nge kan hrilhfiah ang che, han in en mahla, nangmah i inchawm zo lo a, thiam thil pakhat pawh i nei hek lo, heti chung pawh a an duh che hi lawm hle zawk ta che, nakinah chuan maw i ṭhiante ho hian an la awt hle ang che" chhan pawh ka chhang ṭha thei tawh lo.




" Mi rilru tluang tak an ni a, i tan hrawn hrehawm tur tumah an awm hek lo, i nawmsakna tur a ni tih hrethiam hram rawh, ngaihzawng hlui tih vel mai mai te chu theihnghilj daih rawh, ani pawn i he lo in an vawikhat sawinaah a duh nghal hmak che nia" Ka nuin a lo tih ve leh pawh chuan ka lung a dam thei lo, tunah tak hi chuan pian ve loh ka chak.




" Miin engtin nge min ngaih ang, a U pasal ka neoh khalh, a chuti khati min ti leh dawn a sin" ṭap ṭuau chung chuan ka ti leh hram.


"Mi sawiah buai suh, miten engtin pawn lo saei che se engah mah ngai duh suh, nu leh pa thu zawm a pasal nei tur i nia lawm, i kumah nise naupang chhia zawk zawk i ji bik lo, tih lemah chuan nang aia naupang zawk pawn fa pahnih pathum an nei nual tawh, mi sawiah i buai chhung chuan nun dan i thiam thei nang" An thu sawi chu dik viau mahse ka la pawm thei chuang lo, ka nun hi a harsa ka ti.





"Nu leh pa thu i zawm phawt chuan i lei Pathian hmuhtheihte hnen aṭang hian malsawmna leh vanneihna in a hmuak em em ang che, kan lungdum loh pasalah i neih erawh chuan nu leh pa anchhia i dawng ngei ang" rapthlak ka ti, chutih rualin a dik ka ti bawk si, nu leh pa te thuawih chu dam rei na te a nia, harsatna te pawh hian min hel daih ṭhin.





Ka nu ang nu zaidam lem lo tak pawn a awki zângkhai tak a thu min han hrilh meuh chuan tlemin ka hrethian ve ta deuh, ka duh tak a nei tur ang ka ni lo erawh pawi ka ti hle.




" Pasal ka nei dawn a nih chuan Biak In hawng ngeiin ka nei ang; mahse, ka hmangaih a ni ve thung ang" tia ka chhungte bul a ka lo sawi fo ṭhin thleng dik ta lo tur chu a pawi ka ti dawn nge a zia lo zawk pawh ka hrethiam lo.




Mi tu emaw ka hmangaih vangin tu emaw kha ka hnawl a ngai a, ka ṭawngkam thiamna zawng zawngin mawihnai tak a ka hnawl hnuah pasal ka nei dawn tih a hriatin engtiang takin nge a awm ang? Keimahah ka inchan hian na ka ti, U Mama pawh ka khawngaih hle, kha ti khawp khan min duhin min hmangaih ve kha nia, min ngaidam mai a niang chu(h).




He thil hi ka hre lawk bik lo, chung lam hian hetiang zawng hian ka chungah ro a rel dawn tih ka hre bik si lo a,




Ka ngaihtuahna ka hman nasat lutuk na lamab ka phone ri pawh ka lo hre lawk lo, number lawng tawp a nia, "ka call back dawn nge dawn lo " tih ka ngaihtuah mek lai chuan call a lo lut nghal zat.




"Aw hello" ka awki chu duh aiin a nem lo.


" I dam maw? Hmangaih kalta" a aw aṭang chuan tunge a nih hrilh hranpa ka ngai lo, engtin nge ni zel ang le?



"Aw... dam e" ka ti mawl tawp.



" Min ngai em?" Teh tawp chuan a, "engvang ngawtin nge ka ngaih ang che, i engmah ka ni lo a, ka engmah i ni bawk hek lo" ka awki chu a chang leh fak tawh.




"Bawihte... min ngai tih ka hria lawm, kei pawn ka ngai lutuk che" zahna hi chu a dahnil ve chiang a sin.




"Zak ve deuh teh" ka ti vak a, awmzia erawh a awm hran lo, hepa hian ka mizia duh aiin a hrechiang mah mah.




"Ka hmangaih vang che hian zah pawh ka hre zo tawh lo" nasa ka ti lutuk chu tihtheih dang nei hek lo, ka kut ka hum ruh vak ringawt tawh.




Thil hrechhuak thutin " engvanga inṭhen nge kan nih i la hria em? Kum a liam meuh chuan ka hrechhuak zo tawh lo" thu tak deuh zawk a ka tih chuan ani pawn pangngai takin min chhang.




" Ngaihzawng dang i lo nei khang lang anih kha" ka rin loh lam daih a ni. " Ngaihzawngdang ka lo nei maw? Awi.... tunah ka hre ve chiah" za vak lo chuan ka nui a, ka thinrim vang a ni mah zawk ang.





" Ka rawn call che a phone call i la duh lo vel a nih kha, kha tih lai khan ka bulah chuan awm la ka kuk lawlh ang che" ta deuh deuh chuan, enge a hriat le? Rinawm takin a tan tiin mipa dang engzat nge ka hnar pawh a hre tawp nang.




" Min va puh chhe ve, mipa dang kawp kual mai mai ching hmeichhe lepler tak ka nih lo, ngaihzawng ka nei a ni tih pawh tun mai khan ka hre ve chiah" ka thinrim em vang chuan hmaichhan a inhmachhawn lo e ti lo chuan a au in ka au tawn tawn.




" Kan inṭhen chhan pawh ka hre tawh lo e a, kan inbe lo tawp a niang" a tih leh takah chuan ka thinrim lutuk pawh a zia awm ta deuh.




" Chuti kumkhua leh chatuan atan ka lo ṭhen vang vang lo che chu pawi ka ti" innei chungchang ri engang mahse ka induh tawkna hian a pawm ve thei si lo a, sawi hmasa tu nih lah ka tum lo bur.





" Deuh ngei che chuan, innei tawh mai ang " a thu tak hle in ka hria, engtia han chhan chi nge maw ni...




"Palai lo tir rawh"


"Awlsam leh si ve"


" Kan rem dawn chuang lo a, bakah ka nun a nia ka thu ber, tumah hian ka pasla tur chungchangah an inrawlh ngai lo ang" ka tih leh pawh chuan a hmui themthiamna in min hnial kalh leh ta tho.






" Rem lohna tur a awm in ka hre lo, i nu leh pa ten makpa fel tak an mamawh a lawm" rawn ti ngei a, ka huat tawk a lo tling leh em em tawh.






Chhan dan vak hre si lo, thinrim bawk si chuan ka phone screen ka melh vak ringawt.


( Tunlai signal a chian loh avangin ka duh ang pawn ka regu thei lo , dam chuan naktuk zanah pawh dah leh ka tum ang)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)