MARRIED TO MR. NIGHTMARE - 21

Episode kal lai dah luhna

Moderator: writers

Lal Rin Awmi KC
Posts: 48
Joined: October 27th, 2016, 2:27 pm
Location: Upper Republic
Contact:

MARRIED TO MR. NIGHTMARE - 21

Unread post by Lal Rin Awmi KC » March 14th, 2017, 10:43 pm

"HREP TAK CHUAN KA RING DAIH TAWH CHE MAHSE KEIMAH HI KA INRING LO A NI"

A thusawi chu ka bengah a ri nawn tluk tluk a. A ti tak tak nge tak tak lo chu ka hre lo mahse min rinna tlem tal a nei chu ka hlim hle mai.

Ka mit chu ka khap fek fek a, amah chu ka en ngam lo ani. A hmelah chuan thinrimna leh natna bak a awm lo. Mahse a hmel awm dan leh tuna a thusawi zawh chiah kha a inmil lo hle mai.

A inhumruh a, a phelh leh a chuan ka lam chu muangchangin a rawn pan a. A mitmeng hlauhawm tak vang chuan ka tawlh hnung a. Ka kut chu a khur a, ka chil ka lem khalh a.

A rawn kal rang telh telh a, bang chu ka si tawh si. Thawk ka la vak a, ka awmna ngaiah chuan ka ding khawng reng ringawt a.

Ka hlat lo te a a rawn ding chuan amah chu en ka tum a mahse a rimtui tak mai chuan min dal tlat si. Ka inrin loh lai chuan a kut chu a rawn leh a ka nghawng hnung lampang chu dim lo tak hian a rawn vuan a. A nat em vang chuan ka mit chu ka chhing vat a, ka nghawng delh sualna lai chu nghet takin a vuan a.

A na tihzia nan ka lu chu ka ti sawn a mahse a na zual zawk a. A aia nghet in min vuan a. Anat em vang chuan ka mittui a rawn tling a.

"Chuan i hria em, ngatan mah ka ti phiangsen lo" rawn kun hnai pah chuan a ti se se a. Ka mit chu ka meng a amah chu ka va en nghal a, a mitah chuan thinrimna thlipui ang mai hi ka hmu a ni.

Ka mittui chu ka biangah a rawn luang a, chumi vang chuan a khi suk a.

"Eng atan mah ka ti lo a chhan chu a tawpah chuan heng inngaihtuahna, inrinna, inhriatthiamna, hlimna...Avai hian dawt vek a ni. Dawt nangin min rin tir chu. A dik em?" ngeiawm deuha nui suk pah chuan a ti a. A aia nghetin min rawn vuan a, tawrh zawh rual loh a ni.

Ka mittui chu a luang zawih zawih a, tun tum a danglamna chu keima thiamloh a ni tih ka hria a ni. Rehan-a chu a hma anga a nihna ah khan a let leh a ni. Engkim chu ka kut ngei atang hian a tal pit a ni mahse engmah tih theih ka nei silo.

Ka nghawng na chu ka thinlung na ai chuan a na lo zawk.

"Khawngaih..in..tun tum chauh...min ring rawh" aw khur chung chuan zawi te in ka ti a.

Ka ka chhung chu ka seh a, rilru inpawlh nuaihin ka awm a, ka hlau a, ka zam a, ka zak a, ka na bawk a ni.

"Inrin a?"

A rawn thaw vak a, a mitko chu a rawn san a.

"INRIN A?" a rawn vin thut a. Ka phu zawk a, ka thin phu nasa lutuk ti ziaawm nan ka mit chu ka chhing a.

A dawt lehah chuan, a hmui chuan ka hmui chu a rawn si a, tihluihna tak meuh hian min rawn fawp a. Thawk chu ka la kawk a ka theihna zawng zawnga nam sawn chu ka tin a mahse ka nghawng chu a aia nasa in a vuan na a. Ka sam chu muangchangin a rawn nuai a, ka hmui hnuai lampang chu dim lo zet mai hian a rawn nuai bawk a.

Engmah muanna a awm lo, tun tum min fawp chu engtin mah ka awm lo. Min ti hamhaihin, min in thiam lo tirin min ti zak hle mai. Ka thiam loh vek a ni. Tuna thil thleng zawng zawng hi ka thiam loh vek a ni.

Inrinna hi thil lian tak a ni, tih chhiat a nih tawh chuan siamthat leh mai mai theih a ni tawh lo.

Ka kut chuan a dar chu ka vuan a. A lei chuan a rawn hawl nasa mai a mahse chu chuan min ti tek chhuai tawh lo, amah ka tihnat zia min hrilh na a ni.

A hnu deuhah chuan thawk ka tla chham tan a. Ka mittui chuan ka hmui chu a rawn si a, a hmui pawh a si ve a. Ka mittui al chu ka lei chuan a hrethei a, thudik tak ka hrilh loh avang chuan ka inten hle a.

"I pasalin a fawh chein i tap a mahse hmelhriat loh ina zankhuaa awm chu ia hreh leh tawp si lo. E..ni dawn tak, ka theihnghilh alawm, i tan chuan hmelhriatloh a ni tawh lo tiraw? Nizan zankhuaa in awmdun khan enge in tih tuman kan hre si lo.." ngeiawm swuh chuan a rawn ti a, ka nghawng a vawnna chu a thlah a, bangah chuan min nam sawk a.

Ka kut chuan ka nghawng na tihzia nan chuan ka tuai a, ka mit chu ka chhing a. A thusawi na tak tak te chuan ka thinlung hi a vit sawk sawk ni mai hian ka hria, kha huatna leh intenna a aw a awm kha.

Hetiang em em hian ka la inthiamlo ngai lo.

A pen ri chu a zawi telh telh a hnu ah chuan a hriat theih tawn loh a, kawngka inkhar thuai ri chu ka hria a.

Ka mit chu ka meng a, kawngka inkhar chu ka hmu a mahse amah chu ka hmu tawh si lo.

Chhuatah ka thu a, bang chu ka ngheng a, ka khabe chu ka khupah ka nghat a. Ka mittui ka dan zawng zawng kha ka dang seng tawh lo.

Ka tap a.
Ka inthiam loh avangin ka tap a.
Ka nat avangin ka tap a.
Ka zak avangin ka tap a.
Amah avangin ka tap a.
Ka mittui tlak tawp hma chu ka tan a ni.

Tuna nunrawng leh ngeiawm tak hi ka Rehan-a a hma ni kalta ami kha a ni a, ka hlauh zawk kha a ni. A nun a tichhia ang tih ka hlauh zawk kha. Rehan-a ka tawn hmasak zawk kha a ni. Mahse amah tak tak a ni lo tih ka hria a ni.

Ka phone chu ka la a, wallpaper ah chuan a mutthilh laia a bianga ka chuk lai chu ka hmang a. Chumi ka hmuh chuan ka nui nghal a, khang hun lai kha ka ngai khawp mai. Chutih lai tak chuan thil ka hre chhuak thut a.

Min ring tih a sawi kha chumi awmzia chu engkim siamthat theihna hun ka la nei a ni chuan a tih dan chu ka hre chiang khawp mai.

Inhnuai ah chuan ka tlan thla nghal a, amah chu ka zawng nghal a. Ka nghawng chu a nawm dan ber chuan ka ti a. Tukverh atang a pawn lam a en chu ka va hmu a, min hnungchhawn a. A kawr tight var hak chuan a sa tha tak chu a ti lang a, a lam chu ka pan a. Engmah pawh ngaihtuah lo chuan a hma ah chuan ka va ding a, a mitah chuan ka en a,thinrimna hlir a awm.

Ka nui saih a, chuan ka va fawp a. Mak chu a tih hmel hle mai mahse ka ngaihthah a, a nghawng ah ka kuah a ka va awm hnai a. Thil awmzia hre lo deuh chuan a awm a mahse keichuan ka fawh chu ka tawp chuang lo. Ka nui leh a chutah chuan min rawn fawp let ve ta a.

Tun tum chu a dan a dang tawh, ka kawngah chuan a rawn vuan a. Zu rim leh mint rim chu ka hre thei a. Ka mit chu ka chhing a, kan lei chu a insi a, ka thinlung chu a alh mai hian ka hria.

Thaw hluam hluam chung chuan kan inhlat thei hram a, a mitah chuan ka en a ka nuih a.

"Nang chauh hian keimahah dikna i nei tih kha theihnghilh suh ang che. Ka fawh emaw ka rinna pawh ni se. I rilru a i ngaihtuah ni lo in i thinlung a sawi kha ring zawk rawh. Min ring telh telh ang a chhan chu nang pawhin i chhungril takah chuan min rinna hi ka tichhe dawn lo tih i hria mahse hei hi hre reng rawh Rehan ka ngaihtuahna che hi dawt a ni lo, a ni ngai bawk hek lovang"

Kan room ah chuan amah pawh en lo in ka kal nghal a, a chhan chu a mita ka en chuan ka chak lohna lantir in ka mittui ka tihtlak leh mai ka hlauh vang a ni.

Khum sirah chuan ka thu a, a nui lai hmel chu ka mitthla ah a rawng lang a.

Amah fawp tur a ka ngam ringawt pawh kha mak ka ti, engtin nge i tih theih zawk, Myra? Ka hmai te chu a sa vekin ka hria. Ka sam chu ka bengah ka zep a, na chhawkna chu ka zawng a. Ka hmuh chuan balcony ah ka kal a, thuthlengah chuan ka thu a. Kawngka inkhar leh inhawng ri ka hria a, bedroom ah chuan a rawn lut tih ka hre nghal a. Heta a rawn kal a, min rawn biak chu ka beisei em em a.

Ka bulah a rawn kal tih ka hriat chuan ka thin chu a phu dup dup a, ka hma takah chuan a rawn ding a. A kekawr ipte chu a zen a. Enge maw sawi chu ka tum a mahse ka sawi tum lai tak chuan lehlam a hawi daih a. A mit atang chuan a chauh hmel hle mai.

Ani nen a titi dun chu ka duh hle a mahse ka hmui chu a inchar bet tlat in ka hria. Keimah atang chuan hawi pawh a hawisawn lo, min en char char ringawt a. Kei lah ka zam em em mai si, ka en ve reng thei lo ka hawisawn daih a.

"Min en rawh" thu a rawn pe a.

Thinphu dup dup chung chuan ka va en a, a hmel chu a inthlak eih lo reng reng a. Ka hmui chu ka liak a, ka hawisawn leh daih a.

"Kei hian nangmahah hian dikna ka nei tak tak em?" dam deuh chuan min zawt a, ka lu chu ka bu a.

"A NIHCHUAN ENGVANGIN NGE MIN EN LOH MIN EN TURIN KA TIH CHE KHA?" a rawn vin vak a, a inhumruh chu ka hmu thei a.

A inthlak thut vang chuan min thawng hle a, amah chu ka en nghal vat a.

Ka nghawng na a rawn chhuah chuan ka hmui chu ka seh a, ka kut chuan ka vuan a mahse a na chu a tizual mai mai zawk.

Ka mit chu ka chhing a, thuthleng chu ka ngheng a, min rawn pan hnai tih ka hriat chuan ka mit chu ka meng lehnghal a. Ka lo insehruh a, a mitah chuan enge a ngaihtuah tih hre turin ka en a mahse engmah ka hmu thei lo.

"Inher rawh"

"Engmaw?"

"Inher rawh ka ti" a ti leh a mahse ka hriatthiam hma chuan ka bulah rawn thu in amah hnung chhawn zawng chuan min awmtir a.

Enge maw tih a tum le?

Min pawh hnaih chuan rem lo deuhin ka tawlh phei a, ka sam chu ka dar sirah a dah tah chiah chuan a tih tur ka hre ta a.

Ka nui nghal a , ka thin chu a phu rang telh telh leh mai. Amah a ka hriat ngai loh hriat tur ka la ngah hle mai. Ka nghawng chu a rawn vuan a, muangchang chuan a na lai chu a rawn hmet a, gel hmang chuan a massage, hetiang a nuam leh hahdam hi a awm tawh chuang lo ang.

Ana chu ala awm nge awm lo pawh ka hre tawh lo, tuna ka hriat awmchhun chu a khawihna lum nuam tak chu a ni.

Ka lai lutuk chu ka hmui ka pet a, ka nui reng bawk a mahse a khawihna vang chuan nuih loh chu a har em a ni.

"Hall a i tih tih leh sawi kha enge a awmzia?" min rawn zawt a.

"Thudik" hlim deuh chuan ka chhang a.

"Tawp teh, Myra heng zawng zawng hi titawp rawh. I thusawi thlum tak tak ho hi ka hne tawh..niminah ka zawhna i chhang duh lo a vawiinah ve lem nangmahah dikna ka nei tih i sawi leh bawk si. Mi hmel zir chiangin thil hrethiam turin nang angin ka fing lo, ring tur chuan thu ka mamawh a ni. Tun chiah min chhang rawh, engmah ka neih loh hunah ka bulah i awm duh tho a ngem? Lo tina ta che ila ka bulah i la awm duh tho a ngem? I duh a ngem, Myra?" aw chauh hmel deuh chuan a rawn ti a.

Engkim chu a reh vek mai hian ka hria, ruah sur ri chauh chu hriat tur a awm a.

"Nimina i zawhna ka chhan loh chhan chu ka hlau a ni" tiin ka chhang daih a.

"Hlau a? Enge i hlauh?"

"Nang hian min addict ka hlau a ni"



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)