KA PASAL CHAPTER 14 By Betty Liz

Episode kal lai dah luhna

Moderator: writers

Abbra Reo Ririni
Posts: 1237
Joined: November 10th, 2016, 8:57 pm

KA PASAL CHAPTER 14 By Betty Liz

Unread post by Abbra Reo Ririni » May 11th, 2022, 6:20 am

KA PASAL CHAPTER 14


Ziaktu: Betty Liz









Ka rin ang ngeiin ka rai lo. U Rinpuia chu hmachhawn ka huphurh thar tak zet bawk, 'result chu eng pawh lo nise a țhat tur thu' khan min hnem mah se ka rai a beisei lutuk mawlh khan ka result chu hrilh min huphurh zual tir lo theilo.




"Tawinu?" lo tidut a bathroom kawngka a lo kik lehlek phei chuan ka țah a lo chhuak țeuh mai.




"Ka zo ţep" ka tilet a. Thawk a la huai ri chu kawngka chhan aţang pawn ka hre phak tho.




Thawk lak hap hap pahin darthlalang hmaah chuan ka han ding vang vang phawt a, u Tesanga'n 'i raino a ni lo maw?' min tihlaia a mitmeng lo inthlak danglam hlawk kha chiang takin ka mitthla let a, lu ka thing nghal nak bawk.





Bathroom aţang ka chhuah leh chuan a lo tei kual thuak thuak chu tawp chutin min pan nghal thuai a, a hmel pawh hmu țha ngam loin "ka rai lo" zawite in ka tia, a mit ah pawh en ngam lo in kit chu ka pe a, khum lam pan sanin khum tlangah ka țhu thla dawt a.





A mit note ațanga beiseina tham ral riai riai tur lai kha ka hmuh sak ngam lo.




"A pawi hleinem, a hun ah chuan i pai mai ang" thum dutin a lo tihlai pawh chuan ka va melh eih lo. Kit chu bawlhhlawhbawm ah a thlak ri rak thawm ka hria a.






Ka țhutna lam a lo pan ve leh lai pawn melh ngai melh in ka lo țhu veng veng a, ka hma chhuat ah chuan lo țhu in ka kut a rawn hum a. Hnuai lam ka melh lui tlat chu, "Tawinu" min ngaihtuah hmel takin a rawn tithum dut, ka en ve ta nge nge bawk.





Kan mit a intawn rualin min lo nuih suk a," hreawm timah ta che" a lo tizui bawk.





"I phur si mah se i beisei angin ka lo rai bawk silo a.. ka khawngaih che alawm" ka rilru dik tak ka sawi chhuah vang a ni mai thei, u Rinpuia hmel chu ka hmu phe nghal riai a.





Thawk lak huai pahin "Tawinu" lo tihniam ruih a, ka kut chu thlahin ka biang a lo dawm ta a, "ka rai ka ring lo ka tih lai khan pawm thiam ve mai la.. ngatinge dawr ah te i han kal a.. i phur si.. ka rai bawk silo" ke ngat a kit lei tur a a kal chhuak lai te kha ka mitthla let lo thei lo, "nangmah indem phah suh" tihnghut pahin a darah min kuah bet a,"u Tesanga te pawh khan..." ka tihleh chuan, "chutiang ngaihtuah suh, a hunah chuan i rai mai ang" a lo tidut dut a, ka insut hlawp hlawp hnungah min chul pah hauh hauh bawk. Ka lungchhiat em em chhan chu nimin lam a ka hun tawn vanga ipikna keimah a inmung nasa vangte pawh a nih tel ka ring.






Kit zawrhna pan a kê a pen rual khan suangtuahna thar tam tak a nei dawn si a, fa neih... Nie, pa nih inring rilru takin phur lutuk in a kal chhuak a nih kha... eng chanchin lawmawm mah hrilh tur ka nei ta silo a, Hriatzeli te nen kan chungchang a hrezui leh a nih chuan a rilru a buai ve map tho ang, nau tal lo pai ila chuan... ngaihtuah thui ngam lo a ka tawm chawih chu min kuah nghet sauh sauh a. He min ngaihsak em em tu hi chan leh chu ka hlau tak zet tawh.





"Ţap tawh suh, ka pa in ka vel che emaw a tipalh ang e" nui deuh suk paha min lo tih leh chuan ka nui ve hak tho, reife hnu ah inlahrang in ka mittui chu ka tuai hul mial mial a, "fa i awt viau em?" la țah aw țiau a ka zawh laiin ka khabe a ka mittui luang thla chu min lo tuai hul sak ve paha.






"Nangmah ang mai a fanu hmelțha deuh neih chu a chak awm tawh khawp mai" tia hnai takah min en chuan mak tideuh in ka en let a, "ka hmelțha ami?" ka tilet phawng bawk.





U Rinpuia chu a lo nui deuh suk a, "collage first year a collage miss ni nghal ngat thei hi tu chuan nge hmelțha tilo ang a" la khi suk suk chunga a han tih chuan lai deuh in ka ner ta nang a.





"Ka chanchin i chhui ru tih sawi miah suh" tia a kut ka dahthlak sak chuan a nui ta hawk a. Khawi ațang nge kan collage miss ka lo ni tawh tih chu a lo hriat reng reng ni.





Inhnuai ah ka chhuk thlak leh dawn chuan thutak deuhin min fuih thar sauh sauh a, kei thung chuan mak titak a en in ka lo ngaithla veng veng thung.





Kan inneih tuk la la a chhuah san leh nghal tur a min hrilhtu nen khan fa neih chungchang te hial kan sawi dun ta mai chu a nia. Duhthusam hmang pawn he thil kher hi chu ka lo la sam thleng ngai miah lo.






Pindan aţang kan inzui chhuah rualin, "chaw hnu lamah dawr ah chuan ka lo kal ang aw" ka tisep a, Hriatzeli leh ka pu lo kal tur thu erawh ka sawi lang lo.






Thil thleng vang khan min ngaihtuah hmel deuh in min en deuh vung vung a, "nangmah a lo awm chu a fuh dawn ami?" a han tia, "keipawh vawiin chu ka kal lo mai ang" tihzawm leh lahin ka darah min lo kual a, "aih, kal rawh, keipawh chawhnu ah ka lo kal dawn alawm" tia ka en chuan mit ko a tihniam deuh khu khu a, "u Na-i'n lunch ei chhuah te a rawt kha.." ka tileh nghal a.






"I chak loh chuan a ngai miah lo a nia" a lo tidut. Kei erawh ka nui hak thung. Min ngaihtuah.. Nie, min ngaihtuah tawh tak zet. U Na-i te in ah zanriah kan ei dawn țum te kha chuan ka thuthlukna ngaipawhmawh lekloin dar chutizatah chuan lo inpeih rawh tiin thu min pe thawr a. Engtik lai aţang khan nge kan duh dan inzahtawn sak a, kan rilru put hmang tur kan lo in care sak tawn tak em em tak mai le?





"Hreh lo e, dar 1 velah ka lo thleng chho ang" tia ka en chhoh chuan a lo bu ve ta nghut bawk.





Tukțhuan eikham hnu reilote ah u Rinpuia a kal chhuak a, Rampui chu a room ah ngawt a tawm leh tlat avangin ka va luhchilh bik lo, ka pa nen ka pu te lo thlen hun chu kan nghak dun a, engthil chiah nge Hriatzeli'n a tih duh dawn ka hrethiam rih miau silo a, ka rilru chu hmanhmawh tet tet in a hah tut tut reng a, an lo thleng ta erawh ka thaw huai mai.






Nutei kha a lo tel ve a, Hriatzeli pawh lo kal tel tho mah se ka pu ho chuan kan titi laih laih reng a, amah chu ka ngaihsak lo lui hi a ni deuh ber zawk.





Ka pu mawlh chu aw, a kum tam tawh vangin a rilru a fim tawk tawh lo a, inthiam lohna nasa lutuk te nen min han țah khum leh ringawt țhin, 'ka tunu', 'Kimtei fanu' tiite in min au mawlh mawlh reng a, a vun a chuar tawh in a landan te zawng zawng nen chuan amah chu ka lo lainat let ve bawk nen mittui a tla a tla mai.





Ka pa pawh khan ka pu inchhir mittui tla hi hmu ve se chuan a hnungchhawn reng thei bikin ka ring lo.






"Pu, ngaihdam indil chu duhtawk tawh ang, ţap tawh suh" tiin ka han hnem let ve țhin tak nanga, "nunrawng min lo tingawt țhin ang, ka chapona vangin ka tunu pawisawi lo leh zel pawh ngaihsak duh lo che in kan awm zui a. Mahse, ka inchhirna in min eichhiat meuh kha chuan hmeichhe naupang engkim hrethiam rual i lo ni ve tawh a, nausen mai i nihlaia nu i chan lai pawha kan lo ngaihsak zui loh cheu avang khan min huat ka ring miau a, ka rawn zawng chhuak ngam ta lo che a ni, min ngaidam rawh aw... Ka tunu, i pu hi min ngaidam ang che aw" a timawlh mawlh a, chuthu chu nimin lam pawn a sawi tam ber a ni bawk. A kum a tam ve tawh si a, a rilru a fim zawh tawk tawh loh avangin ngaihdam min dil tawhna te pawh hre zui lo in a thar bawkin min dil țha leh mawlh mawlh a ni ber mai.







Ka nutei pawn ka pu awm dan chu a rukin min hrilh ta reng a, "kum 97 lai ani ve tawh a, a ngaihtuahna te pawh a fim lutuk tawh lo a, hrethiam hram hram rawh, ka u laka a chet dan vang khan kum30 dawn chu inchhirna te nen hun a hmang tawh sia..." a tive mial mial a.





Ka nu leh pa in min la dampui ve se ka tihna chu a lo lian thar a, a chhan ber pawh an boral dawn thlenga an mahni haw em em tu ang a an ngaihin mittui tla chung meuh a ngaihdam a dilna te hi han hmu ve thei se. A bik takin ka nu khan apa ngaihdam dilna hi hre ve hman se ka tingawih ngawih, thihna te nen an insual lai pawn a nu leh pa te ngai em em chungin an hming a lam mawlh mawlh kha a ni sia.






Ka pu chu ka nutei sawi ang tak tak a ni a, ka kut chu a thlah phal meuh lo, a mitmeng â deuh riai a min han en chungin, "Zokim.." te min han tileh nawlh a, ka nutei'n "ka pa, ani chu u Kimteii fanu Rempuii zawk" a han tihlet changin thawk lak huai pahin, "ka tunu" min han tinawn leh a, kan in chhang let mawlh mawlh hi a ni ber mai awm e.





"Tukin te pawn 'ka tunu kan hmu dawn,' tiin a phur em em a, i nu nen in inang lutuk bawk nen i pu kum lo tam ve tawh bawk si hian a hai fo che in a nia ka rin" ka nuteii'n a tih mial mial lai te chuan ka pu chu ka han en ţhin a, ani erawh ka kut chu hum in lungawi hmel takin a bu nghat nghat reng a. Hetiang tak hian min lo hmangaih dawn tih hre ngat ila chuan ka pa in an in min kawhhmuh ni la la khan ka tlawh chhuak duh hial ang chu.






Phai lam ah inentir a kal mek ka putea te nupa pawh kan inah an awm lai chuan an video call a, min han hmu chu an phur ve hmel khawp mai.






Thingpui te kan han inzo ti ti khawchang tur a van lai takin Hriatzeli chuan, "in inneih thlalak te pawh en a chakawm alawm, album in inkawl em?" a lo tia, ka va en chuan nui hmel lo pu mah se a mitmeng erawh a danglam daih thung





"A ni teh tak e a, Rempui, in inneih thlalak chu en mai theih in inkawl tawh em?" nutei pawn a lo tive ta hliai a, phur lo deuh hian kan kawl thu chu ka hrilh a.




Ka pa pawn, "Tawinu, han la tak teh, i pu te pawh hian an kawl ve duh ang chu" a lo tive thuai a.





"Ka han la ang e" tia ka tho chu Hriatzeli pawh a lo ding ve nghal a, "pawi i tih loh chuan ka lo zui ve ang che" a tizui zat bawk.





Hnial ka tum zet naa ka pu leh nutei te ngaih ah chuan unau kan ni a, kan nupa room min hmuh pui tur a hruai te pawh thil awm tak tur zawk a ni dawn tih hrethiam in ka buk khum ta nghat a.





Inchungah kan inzui chhoh lai chuan, "i hlim em?" min han tia, eng rilru pu a min zawt nge ka hriat miau loh avangin amah chu ka melh deuh vang vang a.





A nui hmel phen a min huatna chu hmu mahila, "hlim khawp mai" tiin ka chhang let ve ngat.





Nui deuh hak pahin a sam buang nalh zet chu a hui sawn a, kan nupa room kawngka hma ah kan din rualin, "a room ngai a la hmang a nimaw?" a tisap a. U Rinpuia nen an inzuilai a sawina tih ka hriat avangin ka chhang let duh lo.




Pindan chhung kan luh rual chuan ban pharin thawk a la hap a, "a chhung lam chu a lo danglam ve tawh thung a nih hi. A hma chuan hetah zawk hian a khum a inhung țhin a..." nuam tihhmel takin u Rinpuia pindan chhung lo awm tawh dan te chu a sawi zui a.





Ngaihven duh lo in album ka dahna lam ka pan phei a, album chhah pui pahnih ngawt chu ka la chhuak a, ka han inher leh chuan ka closet chhung lam a lo en kual ve mek bawk.




"Chhuk ang" tia ka va auh chuan nui chung bawk in closet kawngka biang chu a ngheng a, a han khawsak vel dan chu min thamlo hluah hluah nimai hian ka hria.




"Pa Chhawna khan Tawinu a tichein ka hria" min en ran a, hahthlak tife in ka thaw hak thung, "Hlim awm reng chu i lo nih hi, ka chan ai min chhuahsak vek miau a" a lo tihleh chuan ka ning ve ta deuh tlat a.





"Enteh, engmah hrelo tawp chu ka ni bik lo a nia, u Rinpuia nen in lo inngaizawng tawh tih pawh ka hria. Mahse, Mizoram ah a haw san hlan che in mipa dang nen in lo hmingchhia a, chuvang a țhen che a ni bawk, tah chuan thiam lohna pakhatmah ka neilo" ka tive ta hmawk hmawk a. A thinrim ka rin tehlul vei nen vanvadak hian a nui zui har har a.





Chutah muangchang a min lo pan phei pahin, "kan inkar tawp lailawk lai thleng chiah i hria a nih hmel. A pawimawh lai ber ka hrilh ang che.. i duh em?" a la nuih ver ver avang chuan keimah zawk ka awm a nuamlo leh vek tawh.





"Rinpuia haw laia ka hmingchhiatpui mipa kha tunge a nih i rin?" tia min zawh lai chuan ka bul a lo thleng der tawh. Bangbo deuh hian ka lo en let ran a.





"I hre tawp nang tiraw? Pa Chhawna thawhpui pa fapa a nih kha.. a awmzia i hria em? Ka ruih lai kha remchang ah hmangin min kiss a, in-kiss lai mai mai kha engtin nge video a viral chiam theih, han ngaihtuah ve teh" a ngaihna hrelo zet a ka en laiin, "Rinpuia pa tih tir a nih i ring thiam ve mai lo ami?" a han tileh a.




"Pa Chhawna'n in inkawp zui tih a hrelo" ka tivena chu min nuih khum hak chungin, " ani ang pa fing leh mi hlawhtling lutuk hian a fapa nun hman dan a hriatpui loh tih chu i ring tak tak lo ang tiraw?" â tih hmel fahrana min en pah hian a lo tileh kher bawk.





"Nge nia a mo nihloh i hlauh luat ah i hmu thiam duh lo zawk?" min tihleh ngatin ka album pawm lai chu a rawn la thut a, min din hnaih sauh pah hian "i nu pasal kha a țhian țha ber a ni a, a țhian țha ber tan phubalak nan kei hi min hmang tih hrerawh, i nu in i pa kha um lui tlat lo se Rinpuia nen kan inkawp a rem tihlohna tur a awm lo. Chuan, in inneih hnu thleng a Rinpuia nen kan la inzui pawh hi min dem theihna i neilo. I nu pawn a mipa hmangaih tan chuan a chhungte tuithlar nih pawh a hreh lo tih hria la, keipawn i nu ang chiahin ka chhungte aiin ka mipa hmangaih ka thlang ve tihna a ni mai, unau kan nihna hi ka indal tir dawn hlek lo a nia" min tihkhum salh salh hnuah album chu a keu vel a, u Rinpuia nen kan thlalak lo lang hmasa ber chu nuihpui hak pahin, "in inneih hnu a kan inhmuh leh hmasak ber țum khan a hlim lo ka titawh reng a" tia min lo en chuan ka kawchhung chu a lo tawt leh tut tut tawh, " in inneih ni ah pawh a lo hlim chuang miah lo a nih hi" a han tizui leh salh a.






"Zan ah a riah chhuah san fo che pawh thil nih dan tur reng a nih hmel zawk hi a" tipaha min nuih ver verin kawngka lam panin a kal nghal daih bawk.





Chechang leklo a ka dinna ngaia ka ding reng chu "i lo chhuk dawn em?" min lo tileh kher a, kawngka chu pawt hawng tawhin ngeiawm fahranin kawngka lamah chuan a thle phei nghal bawk.





Ngawi reng a ka va phei chu, "khum khat ah in mudun em?" zawite hian a lo tileh a, rum deuh hian ka melh vak ringawt, lo nui kar karin, "ka bulah a riah chang chuan chet a la duhthawh țhin teh asin, i bulah pawh a duhthawh ve tho em?" a han tileh a, ka chhungril lo tawt tup tup chuan ka luak a tichhuak hlui thei.



Duh lo teh mah ila ka ngaihtuahna ah chuan thil chiang tak lo lang a awm. U Rinpuia zan riak chhuak țhin 'riak chhuak lo a lo haw tur a' ka ngen hmasak ber zan kha, khami zan khan ruah sur hnuai ah a lo inkhalh let ta reng bawk a.





Mahse, kan mut hmunah 'zan ah i riah chhuah hian khawi ah nge i riah țhin' tia ka zawh lai khan 'Ka nunah ilo luh hma khan chin țhan ka nei, chu erawh i hriat chak zawng a nih ka ring hauh lo' tiin min chhang let thung a nih bawk kha.





Khami zan khan nasa takin call girl a lo kawp ve țhin em ni ang? tihna rilru ka pu hial a. A chhan pawh Hriatzeli hi ka la hmelhriat ve tlat silo a. Tunhnu ah Hriatzeli a lo lan ve tak aţang hian khang zan tam tak kha an lo hman dun theihna chance san zia ka hriat thar phah a. Ka awm chhung chu phu dut dut siin a na kual riai riai thei mai.








Inhnuai ah ka zuk chhuk leh chuan Nutei nen kan inneih thlalak kha an lo en dun mek a, nutei chuan ka mo-kawr hak chu nalh a tih thu leh ka inhmeh thu te chu a sawi mawlh mawlh a, u Rinpuia nen pawh 'innei tur reng a duan lawk in nih hi, in inhmeh lutuk' a ti sek a, chutia nutei'n a tih lai chuan nui tet tet chungin a fanu chuan min lo melh ralh ralh zel thung.






Thlalak chu sawm vel lai hi ka hawn tir ve a, an haw tur a hreh lutuk chu ka pu mawlh chu a lainatawm.





"Ka tunu, naktuk ah ka lo leng leh ang aw" tiin naupangchhe thil dil tak hian min dil mawlh mawlh mai.




"Pu, i tan lo kal vel a buaithlak emai, keiman ka lo tlawh zawk ang che" ka han tihchuan a lo pawm mah mah lutuk a, "motor a chuan luh te hi ka ning a nia, min lo tlawh ziah tak tak rawh" a han tia, kan han nuileh ham ham karah chuan, "i pasal pawh a la hmu ve hleinem, naktuk ah i lo kal chuan inpa pawh lo hruai ve la" Hriatzeli bawk in a lo tileh a.




Han tihlet ngaihna vak hi ka hre țhin silo nen ka nuih let tawi hleh ringawt.





Dawr ka han thlen ve meuh chuan u Tesanga te nen an pathum in an lo awm tlang tawh reng a. Rei rial loin thil ei tur chuan kan inzui chhuak leh nghal a.





U Tesanga chuan min fiam zuk zuk naa a țhianpa in tukin a kan test result vel a lo hrilh ve tawh nge ni, 'nau pai' kaihhawih lam chuan min fiam ta miah lo.




Kan eitur order kan nghah laiin an țhian dun chu eng emaw sawiin an țawng ve dut dut reng a, u Na-i'n a phone a mi a bialpa nen an thlalak min hmuh tir a, a bialpa chu sap leh vai thlahpawlh hi a lo nia, a hmelțha in a pa tawp a ni mai.





"A van pa roh tak" ka han tihsak hliai chu u Rinpuia'n a lo hre phak pek a. Rum fahran hian min lo melh khu khu a. "U Na-i bialpa hi alawm ka sawi" rang deuh a ka tilet pawn chal a tichuar nung a, kan nupa chu min nuih dun chiamin u Na-i chuan, "Zorinpui, zahpuiawm viau lo mai teh" tiin u Rinpuia chu a hau hlak hlak a.






Kan dawhkan ah eitur vel an lo dah mek laiin, "ka țhen dawn a" u Na-i chuan a lo tita mai a. Mak tilutuk a ka han en chuan, "ka nu leh pa te'n ka neih a rem tichuang silo a, kan kum a lo tlem tawh bik bawk silo nen ka țhen tawp mai ang. Amah pawn nun bul țan țha leh se..." nui chung deuhin a sawi tak nanga a mitmeng a lungngaihna nasa tak lo lang chhuak tel ve chu ka hmuh hmaih thei lo.






"U Na, ințhen kher a ngai dawn ami?" ka tive sep a, u Rinpuia te ka va en chuan an țhiannu thuthlukna chu an lo hriatpui vek tawh tih hriat takin a rilru tur hriatthiam hmel deuhin u Na-i chu an lo en ve reng tawh.





"Kan inzui rei alawm, collage kan kal lai ațang kan inzui ve tawh a. Ka chhungte lamin an pawm thei miau bawk silo a. Hei, keimah vangin kum 10 țha tur zet chu a khawhral tawh" a tihleh lai chuan a darah ka vawn sak ringawt a, hmeichhe hmelțha leh mahni inrintawkna a khat țhin hmel ah khan țah chhuak ipik țeuhna ka hmu tel ve miau a ni.





"I nu leh pa te rilru hneh tum in reilote tal chu han bei leh la" zawite a ka tih chuan lu thing nak pahin thawk a han la hap a.





"Armand-a pawh a zahawm zozai tawh lutuk, kal tir tawh ila a tan pawh a hahdam thlak zawk ang" fiah fel taka tiin dak deuh chungin thawk a han la leh ham ham a, a mittui lo tla mai tur chu dan kir a tum ve hle mai.






Chutah min lo en in lainat deuh a ka lo en ngawih ngawih chu tawite hian min lo nuih a, " 'Pangpar pawh tu enkawl nge' tih ai chuan a enkawl tu chuan tui nen a chawm țha em tih a pawimawh zawk. Armand-a pawh hmangaih viau mah ila ka chhungte berin an pawm thei miau silo a, mawi taka a par theihna tur kiangah awm tawh zawk rawh se, ka chhungte țawngkam hriam tak tak vanga a chul ngailohna tur hmun ah par chhuah rawh se" a lo tileh a, a dinhmun khirh lutuk leh a rilru na pawh lan chhuah tir duh lo a a insum hmel chuan ka mittui a titla lo thei lo.





Hlim luih tum tak hian ka darah min lo kuah a, "Mizoram ah a lo kal dawn alawm kan chhuak ho dawn nia" lo tiin amah chuan thawk a la hap hap a.




"Engtikah?" ka lo tihchuan, "kar tawp chawlh a rawn hmang dawn a" a lo tilet a, tah chuan a ni maw an pahnih inkar tawpna chu siam an tum ni.






Kan mipa te pahnih pawn sawi vak tur an hrelo a ni ang, an ngawi run run a, thil kan ei lai pawn u Na-i leh a bialpa te inkar ngawt chu ka ngaihtuah zui a, inhmangaih dun em em si a an hlim zawk nan inkalsan tur a thuthlukna siam chu an tan pawh a harsa ngawt ang. Mi puitling tak te tan lo chuan thil tih theih a ni pawh in ka ring lo.






Thil kan ei zawh hnu reilo te ah dawr chu kan chhuah san a, hna a let ngai te an nih avangin u Tesanga te pahnih chu an inkhalh let nghal mai a.


IMG-20220511-WA0000.jpg
IMG-20220511-WA0000.jpg (9.35 KiB) Viewed 38009 times
Kan motor hunna ațang an tlan liam ka thlir veng veng laiin u Rinpuia chuan ka hnunglam ațang min lo kuah a, motor hma ah chuan min țhutpuiin amah chuan min pawm a ni mah zawk.





Zial a zuk tel avangin a khu chu rimchhia tideuh hian ka lo vai kiang nghal zel a, a tawpah chuan nui huk huk in zial chu a paih ve ta mai bawk.





"I u Na-i chu i khawngaih viau em ni?" lo tisup in min kuah nghet sauh sauh a, keipawn a darah lu nghat pahin thawk ka la hap bawk.





"Immmm, ințhen kher lo se ka ti, a mipa pawh khan a hmangaih hmel si" zawite hian ka tilet a, "ngatinge u Tesanga nen pawh khan engmah insawi loh a, u Na-i nu leh pa te rilru hneh sak turin biak sak ve ta cheu" ka han tileh deuh ringawt a.





"An ințhen a țha zawk" bul tektawk tak mai hian a lo tinghut a. Hrethiam lo zetin ka en let ha mai.




"Ngatingawt maw? U Na-i pawn a hmangaih em kha, a rilru nat zia te kha.." tia hau titih a ka vin kha kha lai chuan lu thingin a lo rum nghut a.




"Hnam dang neih te zawng thil țha a ni miah hleinem" a lo tive dut dut bawk.



"An inhmangaih te chuan..." ka tihlet laiin,"Hmeichhe ho lah hi hmangaihna a tel tawh chuan engkim in lem duak duak mai a" min lo tilet leh hluk a, ka na deuh zawk mai hian ka hria.






Chhang let tawh loin hmalam ka en ta daih a, u Rinpuia chuan, "a tirah pawh 'hnam dang chu ngaizawng suh' kan tifo a lawm, kan thu a zawm lo a, a hetita a nih hi" a tileh bul bul a, collage an kal hun lai chanchin a sawi tih hria in ngawi rengin ka lo ngaithla a.







"Hmeichhia in pasal ah hnam dang in neih tawh chuan Mizo in ni tawh lo. Engang pawh a sawi mawina lo awm mah se Mizo a nihna a bo vek tawh. Hmeichhia in pasal ah hnam dang in nei a nih chuan nangni chang in hmingchhe tawh lo a, nu leh pa te leh chhungkhat laina hnai zawng zawng hmingchhiat vek theihna a ni bawk. Na-i pa lah Mizo te'n a pa hlawhtling tia kan chhal te zinga mi chal lang ber a ni bawk a. An fanu in pasal ah hnam dang han nei ngat se an hmingchhe zual viau ang. 'A inhmangaih a te ber an inhmangaih phawt chuan' tia sawi mawina ngawt in an hmingchhiatna a khuhbo zo dawn lo" a han ticharh charh a, u Tesanga'n hmeichhia leh mipa te hi kan danglam viau a nia, kan landan mai nilo in kan rilru put hmang thlengin a hrang hlawk a tih kha ka hrechhuak rauh rauh bawk.






"A pa hi mi hriat hlawh tak lo nilo ta se an inneih hi an remtihpui tho ang em?" tia ka zawh chuan lu a lo thing leh nghut a.






"Kei leh Tesanga te kan awm chhung chuan kan Natalia hian pasal ah hnam dang a nei hauh lo ang" a tita bur mai a, "in mak lutuk" ka tilet deuh ringawt chu nui chungin min pawm nghet sauh sauh a.






"I la hrethiam chho ve mai ang.. hmangaihna a tel vanga pawmzam theih loh thil tam tak a awm alawm" tia thawk la huaiin ka nghawng ah a lo fawp a, za tia ka lo tawm chaih chu "ka thil chah min han lampui lawk rawh" a tita hlut a.






Kan han din mar takah chuan driver side pan mai a tum zet a, "lei ngai i nei em?" a lo tia, pantie vel lei ka ngai tih inhria in sawi chhuah hreh ru tak hian ka lei ngai ho chu ka sawi ve a. Chimawm ru fe a min melh pahin a han kiai suk chu lei ka va chhuah khum deuh ringawt bawk.






Lei ngai ka nei chuan ka kual deuh te kan ngai dawn a kê in kal zawk ang a tita vut a, ka hnial lem lo, ka mamawh ho chu kan inlei hmasa a, pantie leh bra hi thla thum dan ah ka thlak vek țhin avangin helam ah hian sum ka hmang nasa ve ber bawk.





Ka mamawh te kan inlei fel chu aman a khai deuh tlat roh a, ka nuih leh rah rah țhin chu chimawm ru tak a min lo melh letin, "ka thlan sak che kha i hak hun ka nghakhlel viau a nia" ka beng bulah a lo tisu su a, na deuh hian ka nam nghek a, nui huah huah pahin ka darah min lo kuah leh mai a. Bazar a lo awm te chuan ka nupa chu hmuhnawm tideuh hian min thlir zui reng tihpawh ka hria.






Ka bula kal pa lah chuan min ngaihsakin ka nuihna tur tawk lek a fiamthu nen min dawr a thiam si, tleirawl lam inkheuh ru nak nak te chu hmu ve lo ni mai awm hian mi dawr kawt a lo inpho te thil zawrh te chu a han bih kual ve duk duk a, nakin deuh ah phei chuan keychain hmeh rik theih hi hmet riraih pahin, "hei ka lei ang che" min han tipek a. A lo zuartunu nuih chu a za ngang mai.





"Khatiang te chu naupang lawm a nih kha" ka tideuh tlat nang a hmet hram raih raih pahin ka bag ah chuan a lo tar ta tho a, cute erawh ka tihru hle thung.





Ama țul thilah kan inzui chhuak ve leh a, dawr ah kan kal dawn emaw ka tih laiin tute emaw in ah hian min luhpui a.







Inchhunga lo awm a te'n u Rinpuia an lo hmuh chuan an lo dawngsawng țha khawp mai, an han inbiak vel dan ațang chuan homeshop an ni tih ka hrethiam ve ta a. Paris te new york lam a mi Perfume man to tak tak chu chah thlengin an lo decants leh țhin hi a lo nia.







"In thil tur hi decants min dil ngat ngat hlawm a" tiin a lo nui har har a, u Rinpuia perfume hman hming pawh ka hre ve ta, rim tui ru em em mah se la mipa rim hrak bawk si kha Dior brand SAUVAGE a lo nireng a, a man lah to pawh a to, sing hnih man a kai thuak mai.





Chutah in neitunu in bawm pakhat min han pek tel ve chuan hrethiam lo deuh in u Rinpuia chu ka va en a, a zuartunu zawkin, "in pa in a chah kep che a nih hi. Nimin pawn a bur tawp a lei thei lo ho in țhen hran min lo dil nasa lutuk a, kan lo indang thei hram a nih hi" a han tihleh chuan thawk la hap pahin ka ban ve ta a. CHANEL Perfum ngat a lo nive bawk nen a man chu a to ngawt ang.






Kan motor hunna kan zuk thlenh leh meuh chu kê a lo vah chhuah khat tawh bawk nen ka chau reuh khawp mai a. Motor hnungah a indah lut zung zung a, a lo țhu lut ve chuan ka awm dan chu a lo hrethiam nghal a ni ang, "dawr thleng ila sofa ah i mu dawn nia" a lo tia, ka lo nuih let ringawt.





Kawng tluan chuan kan titi dun a, kan music ngainat zawng ațangin kan ei duh zawng thlengin kan sawi dun a. A bula awm hi a khamawm loh ngawih ngawih a ni deuh tawp mai a ni, a bak han sawifiah ngaihna ka hre biklo. A hriatnate a zau a, sawitur a ngah awm tehlul nen ka titi te chu hrechak ber niawm tak hian min ngaichang thiam tlat roh a, a mizia chu a ngaihawm tiila a fiah ber ang.





Tlai lama in pana kan inkhalh let lai chuan message ka dawng a, ka han en chu Hriatzeli bawk a lo nia. Ka ipik leh vek tawh.




"Naktuk chu Rinpuia a lo tel ve dawn em? Tlai ah chaw ei nghal turin ka pu in a beisei cheu a" tih te mai hi nimah se chhan let ngaihna hrelo deuh in phone chu ka hmet thim leh daih a.




U Rinpuia ka han en chhoh chuan min lo en run tawh a, Hriatzeli nen kan inlaichinna hi zep hlen ka tum pawh a nilo, hrilh țan dan tur hlawl ka hre rih lo mai zawk a ni.




"Tunge a?" a lo tihchuan "lalhriati" ka tisap ringawt a.



"Ka lo ngaihtuah a" tih nghut pahin gate ah a tlan lut a, "naktuk chawhnu ah huan chu kan kal dawn a nia" a tih takah chuan ka bu ve nghat a.



Mahse, dawr hi engtin nge ni dawn?


"Naktuk chu a chi dawn ami?" ka tileh thuai a. "Chilohna a awm lo, hnathawk te an fel a, an rintlak a lawm" a lo tileh mai a. Ka hnial zui ta lem lo.




Kan pahnih chauh a kan awm dun theih hunah engkim ka hrilh vek ang.




Zan ah chuan inchung ah a cho hmasa a, naktuk kha ka pu in min lo beisei ngei dawn tih hriain chanchin chu hrilh hriat ve ka duh a, Nutei number ka neih tawh tho avangin Nutei zawk ka call ta a.





Kan chanchin te ka han hrilh chuan min lo hrethiam khawp mai, ka pu pawh aman a lo hrilhfiah tur thu a sawi a.



"Rempui, zan lamah te hian min lo tlawh țhin rawh u aw" min han tileh a, min ngai ve tak zet tih han hriat chu a lawmawm tak zet.




"Nia, kar leh lam aţang chuan zan ah te pawh kan lo leng thei tawh ang" ka tilet ve tak naa u Rinpuia'n engkim a hriat ve hun ah a dawnsawn dan tur ka hrethiam miau rih silo a, ka tawt ru em em tho.





Zirtawp ni a lo thlen chuan dawr ah kan buai chawhma țhak a, chawhnu lamah erawh dawr chu kan chhuah san hma a, frozen food lam kan inlei hnem khawp mai, chips leh drinks pawh kan la nual a, thingtlang lama kan ram riak tur ration lak dan nen a inang lo lutuk bawk si a, mamawh lakkhawm khawngah chuan ka lak tlak loh khawp leh nghal.




Bawngsa ti țha lai vur a dah khal te chu a la tel nual a, kan pahnih lek ei tur a tan chuan a tam mah mah hian ka hria a. Ka han zawh chuan "Sunday ah i u Na-i te'n min lo fin ve dawn alawm" a tita a.




Dawr ațang in ah kan inkhalh let leh phawt a, motor ka la hmuh ngai loh hi garage aţangin a lo khalh chuak a, chutah chuan kan eitur lei zawng zawng kha a suan lut leh vek a.





"Tawinu, bed cover siam tel rawh aw" min han tia, "huan enkawl tu lamin enkawl uluk viau mah se thak kai palh te a hlauhawm" a han tileh dut dut a, ngaihtuah kim tideuh in ka buk khum ve nghat nghat bawk.





Ni tlak fel hma deuh in huan peng chu kan thleng a, motor chu kawng lo peng ah chuan a khalh lut a, thui lo te kan tlan hnu ah in lian tawk tak pakhat hi a lo awm a, kawtzawl ah motor a han din fel tir lai in huan enkawl tu te ni ngei tur chu an lo chhuak ve thuai a.




U Rinpuia chu zah hmel tak hian an lo bia a, keipawh chu, "hei hi maw i nupui chu" tiin min han chibai lawp lawp a.




U Rinpuia chuan, "hei hi riah nan an hmang a, keini riah ve na ka tur erawh kê a chhuk thlak leh deuh a la ngai" lo tiin kan riahna tur chu min kawhhmuh a.




Thing hmun karah chuan in te pahnih hi a lo ding a, kawt zawl zau diai te chu chiang deuh hian a hmuh theih a, inbul vel erawh ramngaw vek niin pool niawm tak hi a lo lang paw fiah kak bawk.




"A nuam dawn lutuk" ka tisap chu min nuih suk in motor hnung lam chu a hawng nghal a.



Kei erawh thawk la ham ham pahin ka dinna ngaiah chuan ka ding reng a, rilru ipik hluah hluah a ka awm changin ramngaw thing hmun ngawt ka mitthla țhin a nih kha.. tunah chuan mitthla mai a hmu tawh loin thawk ka lak rualin thing hring rim te ka hip lut tel veng veng thei a. A nuam ka titak zet.





Huan enkawltu te țhian dun chuan kan mamawh ho chu min thiar thlak pui zung zung a, vawk sa leh ar sa hring chu an ei turin a pe ţhen țeuh a, kan in te hman tur ah min indah luh fel pui hnu chuan an ni pahnih chu an chho leh nghal mai a.





A chhung chu a lo te fel hle naa pindan pahnih hi a lo nei ve thlap a, choka leh bathroom pawh thianghlim deuh a enkawl a lo ni a, hnang a siam țhut thleng dup nuam deuh a inhung a, movie an en țhin tih hriat takin bangah chuan TV hlai pui bakah DVD vel a lo awm thlap bawk a.





"Cd hi a la en theih vek ami?" tia u Rinpuia ka zawh chuan kan sa lei ho kha deep freezer ah inrem lut mawlh mawlh pahin min lo chhang ve dut dut a. Bati rimtui ang te kha a lo awm thlap bawk nen țhut khawmna area bik chu romantic deuh a hun hman duh pawn a remchang vel vek mai.





Han khawih pui ve mai tur ka hriat siloh avangin choka ah ka va lut ve chu ka ding zum deuh zat a, a nilah in kan thlai hnah lei te kha la chhuak in a en vut vut a, a țhen chu fridge ah a dah lut a, lettuce leh asparagus te erawh dawhkan ah a dah thung a. Bawngsa ti hring tlem te chu sil hmunah a dah leh a, a che vel chu a hmuhnawm in inchhungkhur enkawl zo deuh pasal hi ka chan ber.




"Enge ka lo tihpui ve ang che" tim deuh hian ka tia, min lo thlek vutin mit tizim meuh hian min en vung vung a.



"I duh chuan lo inbual rawh, zanin tlai chu ka ei siam i ei dawn nia" thum dut a tipahin mit min lo siai suk a, han tih let vak ngaihna ka hre țhin silo lai hmel chu min han nuih leh ruh ruh a.




"Thlai hnah tal kha ka lo sil hmasa dawn mi?" ka han tileh ţalh a, a ner deuh suk ringawt a, "i tihțal chuan ka ei siam laiin hnung lam aţang min lo kuah mai dawn nia" hniam ruih a lo tisupin dawhkan chu a kut pahnih in a rawn nam run a.





"I ninawm, min chhaihlaih tum phet zel suh" tih khum hlak hlak in pindan ah chuan ka luh san ta daih a. Nui huk huk pah hian, "a tlai hma in inbual rawh Tawinu" min lo tizui a.





Ka inbual hmasa ta a, u Rinpuia chuan fai fuk rut rut chungin ei a siam a. Bathroom ațang pawn a eisiam rimtui tak chu a hriat theih a, tshirt leh kekawr bul inbel a ka chhuak leh a amah pawh a tshirt hak kha a lo hlip ve tawh a, "kan va ei tui dawn ve" tipaha a bulah ka va ding chu min lo nuih suk ringawt.



Gas ah chuan bawngsa ti lian pui pui a chan hi a lo ur cher cher a.



Lettuce te pawh a lo sil fai vek tawh a, plate var thinghlim deuh ah tomato te chi te nen a lo rem a, "i rilțam tawh em?" a lo tihdut a, "țam hran lo. Mahse, ka ei hnem ngawt ang" ka tizauh a, a nui ruh ruh chu a hnungzanga ka ben sak thlawp a. A lo thlan ve hluam tho tih hria in "Tihdan tur min hrilh la, ka lo vil ang, va inbual ve tawh rawh" ka han tia. Mahse, a hmin țep tih sup pahin bawngsa chu a let kual a.




"engtin nge eisiam te i thiam a? engmah i ti ngai awm silo" a pa lian in eisiam a chet vel chu a inhmeh ru viau a, chutih rual in eisiam a thiam lutuk chuan min țhawng tak zet bawk.




"Ka zir alawm... collage kan kal laiin mahni in in ka luah a, ka ei siam tunu lah khan vai rim nam rum rum bakin min siam sak ngai silo a" nui hawk pahin a tia, gas chu off in plate ah bawngsa ti chu a thur chhuak a.



"U Na-i te nen in inluah ho lo ami?"


"Yeap.. Na-i te chu chhungkua in an khawsa a, Tesanga erawh Mizo Pg ah a awm thung a" a tive leh mai a.



A nih chuan a in luah ah Hriatzeli pawh a riak lut ve ţhin ngei ngei ang.



"Mahni a in luah chu i free țhin ngawt ang" ka tileh hram a, en pawh min en chuang lo hian bawngsa chu a thur chhuak pah zel a, "free e, PG ah midang thuhnuai a awm ka duh loh vangin a lawm in ka luah" a lo tidut dut a, ka pumpui chu engtin maw ni hian a lo awm chuaih, chimbuai tu awm miah lo in Hriatzeli nen pawh an awm thei bawk ang a, Mipa ah pawh pa tak mai hian an hun thawl chu a bawhpelh miah lo ang tih lah a chiang.





Ka ngawi ta reng a, a collage kal lai chanchin chu engmah ka hriat belh chak tawh lo.




"A zo ta e, ka intleuh thuak ang a, kan ei dawn nia" a tia, a mitmeng dap thlup a min ngaihsak hmel taka min enna chu tawite hian ka nuih let a.




Bathroom a hman laiin gas bal vel chu ka lo hru fai a, khua pawh a lo thim ţan thet thet a, sil hmun ah thil hrukna puan bal ka suk laiin message tone hi a lo ri keuh a.



Phone awmna zawng paha ka hawi kual chuan dawhkan tlangah u Rinpuia'n a phone a lo kal san tawp tih ka hmu thuai a. Ka kut huh hru hul mawlh mawlh pahin ka pan chho a.



Phone screen chu a lo la thim hman lo a, Hriatzeli message chu chiang tak hian a lo lang thei bawk " Zanin kha i lo kal dawn em?" tih ngawt mah nise ka nat pui zawk tho.




Awm nuam lo ru tak hian pawn ah ka kal chhuak a, thli thaw in min lo chhem heuh heuh a, tual zawl ah chhuk thla in ramngaw panna kawng te lo awm raih chu ngawi rengin ka zawh phei zel a.




Ka thlen chin chu a ramngaw tulh tulh a, ka chhungril tawt ipik lutuk pawn puah darh chak lutuk in ka awm ah min lo hnawh tut tut a. A tawpah phulrai zau diai lo awm ah chuan țhu thla hnawk in thawk ka la vang vang a.





"Pa.. min hrethei em?" zawite a tisep in van lam chu ka hawi chho a.



"Engtin nge ka tih ang pa, u Rinpuia leh ka nutei fanu te hi kan inneih hnu thleng khan lo la mudun ta si se engtin nge ka tih ang?" ka hriat tham lek a phun sep sep in thawk ka la hap hap a. "Pathian ngaihin thil tenawm tak a nih i ring ve em? Pa... nupa kan nih dan chu i hriat ve tho kha, kan inkarah inhmangaihna a awm lo a, zan tam tak min hmuh duh loh vangin a riak chhuak ziah bawk... zan a riah chhuah changa a hun hmanpui țhin hmeichhia kha nutei fanu hi a lo nih ngat chuan engtin nge ka tihzui zel dawn, min chhang hram rawh pa' ka kut pahnih in hmai ka hup thawk a, ka thinlung chhung chu natna te leh hlauhthawnna nasa lutuk vang hian a na in a lo phu hlawp hlawp tawh.



"Tawinu?" u Rinpuia aw thum dut ri ka hriat chuan chet pawh ka tum chuang lo.



Min ngaihtuah hmel tak a min au mawlh mawlh chungin a thawm chu a lo hnai zel a, a tawpah ka lo țhutna hmun chu lo thleng hlawl in min han hmuh rual chuan a thaw ta huai a.




Thim thet thet tawh mah se hahdam huai hmel pu chunga min pan tu mitah chuan ka lo en ngut ngut tho.




"Ngawi rengin i lo kal chhuak daih a, i țha em?" tisup paha ka hma ah a lo țhutthlak lai chuan "u Rinpui, ka pu te ka zawng chhuak asin" ka lo tisep a.




A ngaihna hriat loh hmel tak hian ka darah a lo hmer deuh ringawt a. "Ka nu leh pa te an inneih khan ka nu chhungte lam in ka nu an tuithlar a" ka tileh a, u Rinpuia chuan ngun fahran hian min en run run a.




"Ka zuk tlawh chhuak chu maw ka beisei loh deuh in min lo dawngsawng țha lutuk a, ka pu pawn min ngai lutuk" nui chung deuhin sawi mah ila ka mittui a lo tla ringawt a, thawk lak huai phain, "a tunu hi a hmelţha em a, duat pawh a lo duat ngawt ang che" lo tive dut dut in ka mittui chu a lo tuai hul a.




"U Rinpui 'Ka nunah ilo luh hma khan chin țhan ka nei, chu erawh i hriat chak zawng a nih ka ring hauh lo' i tih kha... kha thu i sawi awmzia kha.. englo.. Hriatzeli nen inchanchin chu ka hre vek tawh. Ihmaw, kan inneih hnu a i zan riak chhuak țhin kha Hriatzeli bulah i kal ţhin em?" mumal lo zet hiah ka tichhuak nawk nawk a, Hriatzeli hming ka lam chhuak chiah chu u Rinpuia hmel lan dan a danglam nghal vek bawk.




"In mu dun leh em?" tia ka zawh lai chuan thawk pawh ka thaw chhuak tawh lo, ngawi run in mak tih hmel lutuk hian min en ngut ngut a, "kan inneih hnu ah ka nutei fanu nen khan in mu dun leh em ka tih chu?" aw ki ring zawk a ka han tileh chiah chu ding mar ruai ruai in min en ta tlawk tlawk mai.



Link:
BBcode:
HTML:
Hide post links
Show post links

Abbra Reo Ririni
Posts: 1237
Joined: November 10th, 2016, 8:57 pm

Unread post by Abbra Reo Ririni » May 12th, 2022, 6:11 pm

Thawk pawh la ngam lo a ka awm kha thaw chhuak hapin u Rinpuia chu ka en chho ngat ngat a, a hmel lan dan chuan a hma zawng aiin min tihlauthawng zual a, manganna te chuan min rawn hnawh tawt up up! Ka lungphu lo phu rang lutuk vang chuan lungphu chawl in ka thi tawh mai dawn amaw ka ti rum rum bawk.




Chhanna beisei lutuk hian "In mu dun leh ami?" ka tinawn leh a, ka aw chu a ri chang chang ani pawh lungpui ang maiin a ngawi ngul a, "u Rinpui Hriatzeli kha ka first cousin a lo ni a sin, kan inneih hnu ah i pan leh em?" mittui tling piau a ka en chho chu sawi tur neih țeuh chung si a sawi ber tur hrelo hmel pu chung hian min lo en let a, ka awm mekna hmun chu a vir muai muai nimai hian ka hria.





"Aw Lalpa" kut tha khur hlawk hlawk in ka hmai chu ka hup leh thawk a, Ka awm chhung rawn tawt sa pup pup avang chuan ka thawk a buai vek a. U Rinpuia ngawi reng leh sawi tur hlawl hrelo hmel chu hmai ka hup lai reng pawn ka hmu let zut zut a. "Engtin nge ka tih ang, engtin nge ka tih ang" zawite te in ka tisep sep a, rinhlehna rilru ka put mai mai lai ai daih khan ka manganna chu a lo nasa lutuk a, ka ngaihtuahna te thlengin a buai nuaih mai.





"Han sawi chiang deuh teh" a rawn tidut, a aw chu a zawi hle a, rilru tawt ipik lutuk hian thawk ka la vak a, chutah ka hma ah bawk lo țhu thla ve lehin ka ban rek ve ve ah a lo vuan a, ka tha khur nasa lutuk chu a hre ve vek thei a, ka hmai hupna chu min pawh sawn sakin nghet tak hian ka kut chu a hum kawp nghal bawk.






"Tawinu, han sawi chiang deuh teh" a lo tihleh chuan beidawn luat vangin ka nui ringawt. Amah pawh chu a lo thaw chhuak ham ham a, "in mu dun leh em?" zawite bawk in ka tileh hram, a lan dan hamhaih leh sawi tur hlawl hre bawk silo ațang hian engkim chu ring thiam nghal vek tur ka nih laiin a kâ ngeia chhanna min pe turin ka duh.





"Ka nutei fanu upa ber a lo nia, keipawn ka hriatna a la reilo. Mahse, in lo...." amah chu en ngawih ngawih chungin thawchham țep chungin ka riat nawi nak a.




"Min en dan ațang chuan engtin pawn chhang let che ila ngaihdan i nei sa vek tawh a nih hmel" zawi ruih a lo tinghut pahin thawk a la hawk a. Ka thinphu rang lutuk vanga ka thawk lak thleng a rang hlawp hlawp chu, "hahdam phawt teh" min han tileh rihin ka hnungah a lo beng dat dat a, ka pa ngai a ka țah changa ka thawk lak thlengin a buai vek țhin ang chiah a ka awm ta mai chuan ka nun ah u Rinpuia'n hmun a lo chan thuk hman tawh zia chu a tichiang ber ang, ka bulah a lo țhuin ka darah nghet deuh a min lo kuah chuan ka lo en ngat ngat a, eng zawhna mah zawt leh tawh lo mah ila a chhanna ka nghak tih chu a hrethiam ve vek tho ang.





"Khatikhan min en lo teh" tihdeuh hluk pahin thawk a han la leh ringawt a, "kan inneih hnu ah hmeichhe dang ka mutpui leh tawh miah lo" lo tithum dutin ka taksa hahdam lo lutuk chu min kuah nghet zual sauh bawk. A thusawi chuan min thawng viau nanga ka tha ţang khur nasa lutuk chu a reh țhen phah chuang lo.





"Dawt min hrilh suh" ka tisep laiin a lo rum hawk a, thinrim in ka be bik lo a, amah pawn țawngkam vin min hman khum bik chuang lo, thinrim tur pawn tha ka neilo a ni mah zawk ang chu.




"Hriatzeli'n engkim a sawi vek alawm, kan inneih hnu a i riak chhuak ţhin tih pawh a hre ve vek" rilru na tak hian ka tia, "in inbia amaw?" lungawiloh hmel fahran hian a lo tibul bul a, ka zawhnate min chhang lo a thil dang min zawt let daih chu ngaipawimawh duh biklo hian, " zan a i riak chhuak țhin pawh i sim chho ve țan a. Mahse, Bike a in inphurh chhuah ni ațang khan zantin min chhuahsan leh ziah bawk kha.. " tiin ka hmai bawk hup pahin thawk ka la hap hap a. Ka pumpui chu engtin emaw ni hian a lo awm riai riai a, a changin a lo na phut phut nimai hian ka hria.






"Hmeichhe dang..." ka tihleh lai chuan ka ţap chhuak mai dawn a inhria in ka insehruh leh rih a, "kan inneihna ah hian hmangaihna a tello tih ka hria, lawiţhat zan a i chet dan ațang phei kha chuan zan riah chhuah te.. hmeichhe dang kawp kual te thlengin i tivek duh dawn tih pawh ka hria, chumi chu tuar hram hram tur pawn ka infuih a, a chhan pawh kan inneihna khan a tithinur em che a min runluihin natna min thlen ngei kha i tum ka rin lawk sa vang a ni. Mahse, ka nutei fanu... " rapthlak ka tih em avangin sawi zawm duh loin ka ngawi leh a, ka hrawk chhung lo na tut tut reng vang chuan rawl chhuah meuh a țah chhuah erawh ka mamawh tak zet.




"Titeh, inchhung ah lut phawt teh ang, hetite chuan i damlo palh mai ang" lo tibul bul in ka darah min kuah chung chuan min thawhpui mai hi a tum a.




Ka chhungril nat lutuk vang a nita ber ang, "naupangchhia engmah hrethiam lo ang maiin min tikual vel suh" tinghek pahin a ban chu ka nam per sak nawlh, thinrim lutuk a ka en ran laiin min lo nuih mai lehnghal.





"Ka nupui hi tu chuan nge naupangchhia ang a lo ngai a" a han tideuh hluk a, ka ngei bawk si nen rum deuh hian ka la melh let tlat a, "kal phawt ang" a han tileh dut chu ka hawi tauh san hmak, ka thinrimna ngaipawimawh lo lutuk a fiamthu a min la tikual vel chu a rapthlak a ni tawp mai.




"Tawinu, hetah nilo inchhungah kan sawifel dawn a nia" dam dap a rawn tilehin ka banrek pahnih chu a rawn chelh a, "tho phawt teh, i inha bul bawk si i damlo mai ang" tia min thlem dut dut pahin min han pawt deuh a, a aw ri-ah chuan min ngaihtuah tak zetna ka hre thei tho naa ka rilru erawh a buai nuaih thung.





Ani mipa tha te chu hneh bik hek lo î, min pawt tho nawlhin ka țang tlat chu min kai kal ta dat dat a, kawng chu a zim em avangin a kal hmasa zel a, "i lo kal thui hman hrep bawk siah" tih hluk hluk pahin, ramhnuai ah chuan rannung mi seh thei te an tam a, rul tur pai te pawhin a lo chuk palh che i hlau lo em ni? a tibul bul reng a, min sawi țhaih nge min fiam leh tawh zawk pawh ka hrethiam lo.






Inchhung ah min han kai lut chu choka ah min luh tlangpui nghal a, "țhu la han in ei puar phawt teh" tihdut pahin chair ah min nam țhu nghal a, kei erawh rilruna bawk si leh thinur țeuh chungin ka ngawi tlat a, ka hrawk chhung lo na tut tut te chu chhanna țha min pek duh loh vang a ni tih pawh ka hria.




Danglamna nei zui lo tak hian thleng khuhna chu a hawng a, ka hma ah min lo dah sak lai te chuan ka che duh map biklo a, ka ep ah lo țhu thla ve thurhin, "ei phawt rawh, i rilru kha han fim deuh se kan sawi dun leh dawn a nia" min han tia. Hriatzeli nen an chanchin hriat belh tur pawn ka chak tawk zo loin min hmu a ni hial ang.





A bawngsa siam pawh kha a lo dai tawh a, amah chuan zai thla in a ei zung zung a, thlai hnah hring te pawh tui tideuh hian a hmawm hmawk hmawk a, bawngsa chu han ei luih ngial ka tum pawn ka pumpui lam chu a ni deuh nghul a, ka lem hleithei meuh lo.




U Rinpuia chuan a thleng ami chu a ei zo thuai a, ngawi rengin min thawh san vut a, sil hmun lian vak lo ah chuan a thleng ruak chu a dah tawp a, "ei zo ve vat rawh" lo tidutin milim ang mai a melh ngai melh a ka țhu ngawi reng bekah chuan min lo fawp zauh bawk.




Choka ațang chuan min chhuah san daih a, veranda ah zial a zu zui ni ngei tur a ni lighter in talh thawm ka hre zawm a, a han chet vel dan chu min ngaipawimawh miah lo nge; insawifiahna tur dap chawp a duh vangin che buai lo turin a inthunun hram hram ka tizawk dawn, a cool ruih a, a dawhthei mah mah lutuk bawk.





Ei luih ka tum ngial pawn ka luak a chhuak nghal zel si a, thleng chu thawh puiin bawlhhlawhbawm ah sa chu ka paih a, thleng ka sil zui nghal mai tur chu, "nakinah tizawk mai ta che" a rawn tileh dut a, țah chhuak țeuh in ka insehruh hmasa vak a, ka va hawi phei chuan choka luhna thingzai ding chho chu nghengin min lo en reng tawh.




Hah ru țun chung hian nawhfe chu ka vawm tau deuh nghat a, dam dap siin thu min pe kual chhen lawi si te chuan min tina zual tet tet.




Ka kut huh ka hruk lai in kawngka pui chu a lo khar ve mek a, chung lamah kalh zui hmiahin choka aţang ka chhuah hun chu 'ka nghak che' tiniawm tak hian ngun fahran in min lo en lehrun a.




Hmel hlim lo deuh a ka pan phei chu min lo la nuih suk zui a, a bul ka thlen rualin ka darah min lo kuah chu "i ninawm" ka tihlur tawh. A nui hawk lehnghal.




Hruipui vial țhutthleng ah chuan min țhutpui a, khum ang a hmah theih nghal ang kha a lo nireng a, a han siam rem fel hnu chuan hahdam hmel deuhin a mu awn duai a, "eitur tal kha ei zo la chuan i ziaawm phah dawn asin le" tibul bulin ka darah min lo kuahin a mut ang a mu ve tur chuan min kuai mu hnawk bawk.




"Enteh, thinrim a inhau chiam loin țha tak a kan sawi fel thei a ka rin vangin i thu ka la awi zel a. Mahse, min tham loh phah nan chuan hmang miah suh" rilru tawt leh țah insum takin ka tita hmawk hmawk a, ka țhu mar leh nghal tur chu chet hluk chungin min lo kuah bet a, ka hah tak zet a ni tawp mai.






"Hmar rilru sak lutuk" min tizui hluk a, hnial let te chu ka chak lutuk. Mahse, tha hlawl ka nei silo a, ka chhungril chu a hah hluah hluah a ni tawp mai.





"Ka riah chhuah san țhin che in i ngai tiraw?" tiin ka tal chhuah hlau niawm takin min kuah nghet zual sauh a, "zan khat lek pawh ka riak chhuak ngai hleinem" a lo tileh ta dut a, mak ka tih em avangin ka zawi hnawk nimai hian ka hria.




"Inchung a pindan dangah khan ka riak țhin alawm.. ka riah chhuah san țhin che a i ngaih kha ka duh ber a.. i ngai tareng bawk a nih hi" a han tihleh chuan a awm ah nam in ka hawi chhuak a, hnai deuh ah kan in en ta siah bawk.





"Dawt min hrilh suh" ka han tileh țalh chu "dawt a tel hauh lo" a lo tive nghut, "riak chhuak țhin nita ila ka pa in a hriat loh i ring em ni? " tiin min han zawt let a.





Chhan mai ngaihna hrelo deuh hian ka en let ngat ngat a, "Mami te pawn engmah an sawi ngailoh kha" a lo tizawi sup. A sawi chu a dik. A zan riak chhuak lo haw leh țhin hi tuin nge gate lo hawn sak țhin ang le? tih te ka ngaihtuah kual chiam chiam zel a nih kha. Mami te'n engmah an sawi ngai miah lo te kha nuam lo ka tih an hlauh vangin an ngawihbo pui mai mai angin ka ngai hial bawk.





"Hman ațang tawhin ka haw tlai changa gate lo hawng tu ber an ni a, ka pa in a tukzing ah engkim a hre leh vek zel. Dar engzat ah nge ka haw tih thlengin ka pa hnenah an hrilh chhawng leh a.. an hlawh hmuh chhan pakhat pawh a ni tel a" a tithum bul bul a, "riak chhuak țhin nita ila gate pui lo kha lo luh lehna tur kua hlek pawh a awm loh kha... gate an hawn hnu ah pawn lam ațang ka lo lut a nih chuan ka pa in engkim a hre nghal vek ang" a tihlai chuan, "ngatinge 'ka riak chhuak tih ka pa i hrilh thei ang' tiin zingah khan min vau ziah a?" ka tive ta nge nge a.





"Min hek la. Mahse, min hek ang khan ka lo awm silo tih fiah a talbuai tir che kha ka chak țhin" fan deuh ruiha lo tiin a nui tel huk bawk.




A rilru naupangchhia leh suak sual lutuk bawk si chu han nuih ve nachhan tur ka neilo reng reng. Min vau țhin ang tak khan ka pa bulah lo sawi chhawng țhin ta ila, ka pa in han hau chiah se in a riah chhuah san ngailo tih min lo fiah khum leh si ang a. Ka pa ngaiha chuan mi dawthei deuh chan ka chang mai dawn tihna a ni sia.





"I va â ve... aih, i suak sual tak zet, i infiamna ang lek ah min ngai tak tak hian ka hria" ka han tihkhum barh barh chu, "ka haw thut țhin che alawm" a lo tileh dut a. Chutiang teh tawlh min sawi khum chu ka beisei loh em avangin ka en phawk deuh kawk a.




"Ka duh tluk zet che in ka haw țhin che" a lo tinawn leh ngat chu engtia han chhan let tur nge pawh ka hre tawh lo.





Thawk lehkhatah ka tukhum samah min lo țham thut pahin min kuai dak chung hian a hmai bul chet ah min hnuk hnai a, a mitmeng thim zual sauh vang chuan a thinrim thar leh ta mai em niang tih ngaihtuahin ka hlauthawng thut a, "ka pa thuawi a min neih i han rem tinghal tawp khan engtiang takin nge min tihthinrim i hrethiam phak hauh lo ang" zawi lutuk a lo tibul bul in a hmaiin ka hmai chu a lo nul tel thuak bawk.





"Kei hi ka pa fapa lo nita lo ila.. mipa dang tu emaw... tupawh ka pa fapa lo nita zawk se a ni chu i neih tur tho tih ka han ngaihtuah chhuah thut hian ka haw thut zel che" tihnghut nghut pahin ka chal a lo nawr si a, ka tukhum sam a ţhamna pawh a thlah ta a.





"Kum tam tak hnuah ka hmuh leh che khan 'a lo nula ve tawh bawk a, ka ngaihzawng a ni dawn khawp' tiin ka inhrilh nghal a. Mahse, i ngaihzawng ni tur a chance min pe miah lo a min neih i remtinghal ngawt khan min tihlauthawng asin" a lo tileh ta mai a.





A aw chu a zawiin a thusawi chuan mumal pakhat mah a neilo hial te in ka hria, kum tam tak hnuah min hmu leh amaw? A hmain kan inhmuh tawh awm ka la hre ve lo reng reng.




"A hriatchian loh mipa neih kha engvang a hnial miah lo nge a nih? Ka pa in sum pek a lo tiam em ni? A duhthusam ang sum a hmuh hnu ah min tlanbo san daih mai ang em? Zawhna hlir... Lalrempui... ka duhna che lanchhuah tir hman lek lo a min neih chhan hi sum vang a nih ka hlau țhin a sin, i duh i hmu ang a hla takah i tlanbo leh si ang a, engtin nge i kal bo hnu ah ka lo awm ang" mumallo taka phun bul bul in hnai takah min en run a,







"I thil sawi awmzia hi ka hrethiam miah lo a nia" tihap in ka che thut a, amah pawn min dang bik lo, țhutthleng ah chuan mu lo in ka țhu chhuak hlawl a, "ka zawhna che kha min la chhang lo, Hriatzeli nen inmu dun leh em? U Rinpui hethil hi ngaithah chi a ni miah lo a nia, kan inneih hnuah in lo mu dun leh a nih chuan..." ka tihmawk hmawk chu tawp datin a mit ah chuan chiang tak hian ka en a, "ințhen ang... ka laizawnnu nen a mipa thuhmun lo ...." ka tihleh lai mekin "Vanlalhriatzeli kha vawi khat pawh ka mutpui leh tawh lo" a rawn titawlh mai a.




"A nih chuan engtin nge i zan riak chhuak țhin kha a lo hriat?" ka tihlet hlar chu rum tak hian min lo melh khu khu a, "i riak chhuak lo pawh a ni mai thei. Mahse, engtin nge i riak chhuak țhin tia a sawi theih. Kei ngei pawn riak chhuak lo tur a lo hrilh che in ka lo call tawh che kha" ka tive zel a.




Zan khat kha chu chiang takin zing lam dar 2 thleng a leng chhuak miau tlat a ni.





"Ka lenna ah a lo awm ve alawm" a lo tita nghut a. Beidawn thlak tilutuk in ka thaw hap ringawt.




"Khawi ah nge i len? I lenna ah a lo awm vangin engtin nge amah i pan țhin angin a sawi theih?" Ka tileh zel chu ning tih hriat deuh hian, "in inbiak chuan a hrilh lo che em ni?" a lo tive ta hmuk. A dawhtheihna in a tlin bik tawh hlawl lo te pawh a ni ang.





Kei lahin a chin chhuak a engkim ka hriat hma chu ngaihțha tak a awm ka tum bik der bawk silo. Nilo, ngaihțha tak a awm theihna chi pawh a nilo.





"Min hrilh nise ka zawt miah lo ang che" tih hmak pahin ka tho chhuak a, min dan pawh a tum zuilo, choka ah va lut leh in kan eina hnawk ka kal san tawp chu ka khawih nghal zung zung a.




Thleng ka sil lai chuan ka tawt a lo zual leh țeuh tawh. Bum kual mai mai theih ka nih chu ka hlau a, chutih rual chuan thudik tam tak hi pawm mai a harsat țhin avangin thu dik aiin kan thinlung a lian zawk kha pawm mai duhna a lo awm țhin tih pawh ka hre ve tho. A lo harsa deuh a nih pawn thu dik chu rin luih ngamna ka nei a ngai tih in-hrereng chungin thuthlukna ka siam a ngai tih pawh ka hria.





Thleng ka sil zawh hnu ah pawh choka ațang chuan ka chhuak duh miah lo a, khua chu a thim hle tawh. Inchhung a light engin a chhun phak loh chin phei chu a thim chhah mup a, rannung hram chiah chiah ri leh a khat tawk a u Rinpuia zial si lut leh ham ham bak thawm dang a vang khawp mai.





Ka pasal thusawi nge Hriatzeli thilsawi zawk chu ka rin ang? tiin ka rilru chu a insual kual bat bat reng a.






U Rinpuia insawifiahna ka ring nghal mai a nih chuan min lo bum reng ve thei tho tite in ka ngaihtuah thul, u Rinpuia thusawi ring duh loin Hriatzeli thil sawi kha a dik vek ah ngai tlat ta ila, u Rinpuia hian thudik lo sawi reng si se bum ka ni dawn tho bawk si. Ka rilru chu a buai tak zet.





Nakin deuh ah chuan choka ah a lo lut ve leh a. Mahse, min lo pan loin dawhkan ah chuan eng emaw hi dah in bathroom ah a lut nghal a. A luh bo hnu ah chiah a thil lo dah en tur pawn ka hawi chhuak.




Facewash vel ka dahna bag te kha min lo chhawp chhuah sak tih ka hriat chuan tawite in ka nui ringawt.




A lo chhuah leh rual in ka bag chu banin ka lut ve nghal a, ha ka nawh mawlh mawlh laiin kawngka chu lo nam hawngin a lo lut ve leh nulh a.




Ka beisei loh dan deuh in ka hnung lam ațang min lo kuah a, ka darah khabe lo nghat pahin, "ka tihpalh" a lo tisup bawk. Kam ka țhuah lai pawn min kuah reng chungin thatchhe deuh hian a lo kun hniam ve a.




Ka han din mar leh chuan darthlalang ațangin kan in en ta ran a, "khami zan khan kan țhian te party ah ka kal a. Zeli pawh a lo kal ve alawm" nichina chhanna min pek țhat duh loh kha a sawifiah tih ka hriat tak ah chuan thaw hapin ka ngheng a.




"Engtin chiah nge i bulah thil a sawi chu ka hre hauh lo. Mahse, naupangchhia a ni tawh lo a, khatihlai khan i lakah ka thinrim bawk, ka hmel ațang kan inkar ah diklo a awm tih hrethiam tur khawp in a â lo bawk. Nanglah tleirawl mai i la ni sia, i rilru tibuai tawk lek a thil sawi tur chu a neih phah nual ang. Hei erawh hrereng rawh, kan inneih hnu ah Hriatzeli mai nilo hmeichhe dang hrim hrim ka mut pui lo, kan inneih hma a thil thleng te erawh siam țhat leh ngaihna ka hre biklo, hun kal tawh a nihna ang a i liam tir ve mai pawh a ngai ang" a tidut dut a.




"A nih leh min duh chhan hi Hriatzeli nen kan in an vang ami?" ka lo pai reng tawh zawhna chu ka zawt ta phawng a.




"Aih.. nangmah a an vang zawk che in ani kha chu ka duh" tipaha a hmaia ka nghawng lo nul chungin darthlalang ațang min lo en chuan mak titak hian ka meng deuh kawk a. Nichin pawh khan min lo hmu tawh țhin ang hrimin a țawng tawh bawk tak kha.





"Min hmu tawh ami?" ka tihu ringawt a. "I naupanlai ațang daih tawh" a lo tilet dut.


"Ka van hrethiam lo" bangbo deuh a ka tihlaiin ka nghawng chu a lo fawp zeuh a, chutah min kuahna chu phelhin "helai bathroom chep zet hi chhuah san phawt teh ang" tih hluk pahin min kai chhuak a.





Khum ah kan mut dun hnu chuan hetihian min hrilh ta a, "i la naupang lutuk, kum 4 pawh ila tling lo ang. I pa in kan inah a lo hruai che a, keini chu inleng kan neih changa kan tih dan ang bawk in inchhungah awm loin kawtzawl ah Tesanga nen ball kan lo pet a, in haw tur kha ka rawn hmu ta chiah che a" hun kal tawh ngaihtuah let niawm tak hian a nui che dawt bawk.




"Veranda ah i pa leh ka pa te an inbiak khawmuan lai khan tual ah i lo chhuk thla a.. i thuamhnaw inbel pawh chiang takin ka la hria. Kawrfual var i ha a, stocking var ha lehin kawrfual chunga i jacket puk deuh laih hak rawng ang pheikhawk orange rawng i bun bawk. I sam kha hnawk deuh in a inphiar kak a" a tih leh chuan ka lo nui ve tho.




Ka pa khan thiam leh thiam lo in ka sam kha a buaipui rei țhin lutuk, ka school kal tur te kha sam țawn kak ka duh ve țhin sia, ding lam leh vei lam sawi bui te khan min țawn sak a, nu Khumi hian nui kar kar chungin min lo țhawn țhat sak leh țhin.




"Ka han hmuh che khan hmeichhe naupang mai nimah la i hmelțha ka ti asin, kum 12 dawn ka ni ve tawh chung khan kan ball pet na lam pana i lo kal ka hmuh khan ka lo lai tlat pek a" nui hawk chung hian a lo tileh a, a hmel ka han en chuan a hmai chu a lo sen țeuh mai. "Kum 4 pawh la tling lo hmeichhe naupang hma ah i lai amaw?" ka han tihchu, "a niber ang chu... i hmelțha reuh bawk em alawm" a lo tileh mai a, intithei deuh te hian ka han meng kual vel a, chet hluk in a awm ah min kuah bet pahin, "tunah chuan ka nupui i ni tawh miau a, intithei vak duh suh" a tizui a. Ka nui ve kar kar tho.





"Ball pet zui nachang hrelo khawp in ka lo en char char che a, nanglah khan Tesanga ball thai kual vel ngawt kha i thlir deuh deuh a, Veranda ațang i pa lo chhuk thla in a lo kai ta che a, gate pan a in kal kha i hmel hmuh nawn leh hram ka duh vangin Tesanga ball thai kual lai kha chuh sakin in lamah ball chu ka lo pet ta ringawt a. Ka tum loh dan deuhin i tukhum ah a lo fuh ta sia, i pen lai tak a nih vangin i lo din nghet lo leh zel nge ni i țhingțhi ta hnak a, i țap zui ta mai bawk a i pa in min lo hauh ka hlau leh ta thut a inchhung ah ka tlan lut nghal daih alawm" a tidut dut a, chutia a han sawi takah chuan chiang lo riai in ka hre let ve thei.






U Rinpuia leh u Tesanga tak hi chu a rei tawh bak ah ka la naupang bawk nen ka hrechhuak zo tawh lo. Mahse, kan lenna in kawt ah ka tlu a, ka țap bai bai kha ka pa in min pawm tho in min thlem mawlh mawlh tih kha chu ka la hria, dawr kawn ah ice cream cheng nga man ang chi kha min lei sak nghe nghe bawk.




"Star nei rual ka ni ve tawh a, ka vei zui ta em em che a, mut hmunah pawh i lu ah ball ka pet per vanga i tlu tep kha ka mitthla let fo a. Mahse, ka pa bulah erawh engmah zawt ngam lo, ka zak pakhat bawk a. High school kan han zo a, shillong lamah zirna te kan chhunzawm a, zawi zawi in ka mitthla ațang pawn i fiah lo tial tial a. Hriatzeli ka han hmuh chiah khan nang tereuh bawk hi ka hrechhuak leh ta che a, in inang fai vek chu a nilo, in anna lai tak innei. Chuvang pawh chu a ni ang amah ah khan rilru ka pe zui ta reng a... kan chanchin chu i hria tih i sawi kha... kha zawng kha a ni mai" ka dar tuai hauh hauh pahin thawk a la huai a.




"Kum tir lamah khan ka hmu leh che a"


"In inah ka pa nen chaw kan lo ei țum khan ami?" ka lo tive a. "Ummm" lo timuang ruih in a kut lehlam chu lukham pahin min kuah nghet sauh bawk.




"gate a ka lo inkhalh lut mek leh in haw tur kha gate ah kan inpel a, tah khan hman a hmeichhe naupang a pa nen a kan gate aţang kal chhuak ta kha i ni tih ka hre nghal a, ka pa bulah 'chaw lo ei an awm elaw?' ka tih khan i chanchin hi min hrilh daih tawh. Mahse, ngaihven deuh ang a awm kha ka hreh ve avangin biak pawhna tur che pawh ka dil duh ta lo a. Tikhan thla tlemte ral hnu ah i a boral tih ka pa i lo hrilh a. Khami țum khan driver nen zawk a lo kal tum a ni a. Mahse, ka rawn zui ta zawk a nih kha" ngaihnawm tideuh hian ka lo ngaithla veng veng a, kei chuan kum tir lam pawh khan ka lo hmu ve leh miah lo.





A mipa zawk mahin thup țhen neilo in engkim min hrilh vek a, chhelo ka lo tițhin tih han hrilh ngawt chu a sualna a awm pawh ring bik lo hian, "ka pa boral hlimchhawna makpa chet ngaihna tur zawng zawng ah i chet vek khan hriatchian che ka chak țhin lutuk" zawite hian ka tive sep a.




Ka khabe ah lo dawnin chiang lutukin ka mitah min lo en a,"sawi nawn leh teh" a rawn tisup bawk. "hriatchian che kha ka chak țhin, Aizawl tlangval nisia chet na tur i hre lutuk te, kawng engkim ah ka pa kha makpa nei hmah lo a nihna i hliah bo hneh lutuk te kha a mak ka tia. Nangmah hi.. ka hrelo, ka thlamuanpui che a. Mahse, nikhat thil thu lekah min haw leh thut sia" ka thingpui pek tak ngial pawh a in duh loh lai kha ka mitthla let rauh rauh bawk.





"A hma zan khan ka pa in 'Rempuii hi nei ang che, a pa hnen ah ka dil vek tawh a, hetiangte a nih takah phei chuan a rang thei ang berin innei ang cheu' a tita ngawt sia. Ka suangtuahna ve zawng zawng min tihchhiat sak vek kha ka thinrim alawm" a han tihchuan rinhlelhna ka neilo. U Tesanga khan min hrilh tawh miau tlat a.




"Ka ngaihzawng tur a chhai hmasak che kha ka duh.. chu chu i phu bawk, text a inbiak te, phone call a rei tak tak inbiak te... inngaizawng dangte ang bawk a inngai leh inthlahlel tak a insiam lunglen te pawh nang nen hian ka chak ve, khawi ah emaw len chhuah pui che a inkham lo tak chungin thlah let leh che pawh ka chak.. zan rei tak tak thleng rim che pawh" zawi sup a lo tiin a nui pah suk suk bawk.




Office ka bang chiah hi ka u te fate zawng zawng ka bulah lehkha zir turin an lo lut khawm a, zan lamah lah office hna khawih zawm a ngaih changte a awm ve zel a. Thawnthu ziah hian rin aiin hun a lo duh daih bawk nen a hma ang khan ka active thei tawh lo a, min lo hrethiam hram hram rawh u.




Keiphei chuan tihtawp daih mai ka duh a. Mahse, Abbra-i hian, 'ho lam deuh a i liam tir puat chuan lo ziah leh duh hun te ila nei ang a, chhiartu lam i hip thei tawh lo ang, i ziak ta rau rau kimchang deuh in zo ngei ngei rawh' min tibur a.



A te na vang vangin a hmathlir hi a thuiin ngaihtuahna min control hneh tlat zel a.😂 Amah vang liau liau in kimchang takin ka la tive tlauh tlauh pakhat bawk a. Kan ziak zo ve ţep tur ah ngai ang u.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)