IBRAHIM ZOTHANPUI - 6

Episode kal lai dah luhna

Moderator: writers

Pek Hirha-i
Posts: 69
Joined: November 23rd, 2021, 3:13 pm

IBRAHIM ZOTHANPUI - 6

Unread post by Pek Hirha-i » May 11th, 2022, 5:55 pm

Ziaktu: Pek Hirha-i








CHAPTER - 6🤓










“Khawiah nge pen i ngaih a?” A ti sup a, “Lalnui sumo counter-ah” tiin ka nu call chu ka la a. "Mate i hman tawh em? I nau chu a lo thleng tawh ania" a ti a, "Office aṭang ka chhuak chiah" "Hmanhmawh deuh rawh aw, a la naupang si" a ti leh a. "Aw le."


"Eng nge sumo counter-ah chuan i tih dawn a?" A tih chuan ka phu deuh zawk. "Ka nau a lo zina, chu chu mawle" ka ti mai a.
Thangtei hi class IX(9) kal tur chiah a ni ve a, eng a ti nge amah chiaha an rawn kal tir inti mai thei a. Ka nu te unau hi pathum an ni a, ka nu hian Aizawlah pasal a nei a, ka nu nau chiah hian Aizawlah nupui a nei ve bawk a. A nupui te bõih a ni zui a kan inbe ngai tawh lo. Ka nu nu leh pate hi an boral ve ve tawh a. Kan khuaah ka putea te hi an awm a, ka putea hi mi'n driver-ah an hmang ve zeuh zeuh a. Lo an nei vea chu chu an eizawnna a ni ve mai. Kan inhlat si a, inpuih tak tak theih pawh a ni thin lo. Tunah pawh hian ka putea hi bungraw phurin khaw thenawmah a kal a, Thangtei naute hi an la te ve a, ka pitein a lo awm thin a. Thangtei rawn thlah hman an awm ngang lo a. An rawn kaltir tawp a ni, Thangtei hi unau zinga upa ber tihtakah a kum ang aiin a puitling reuh a. A nu te pawn an ngaihtuah viau a ni.



Khua a tlai tawh si a, addict vel a lo tawn ka hlau tak zet. "Kan thleng e" tiin motor a ding dat a. Ka chhuk nghal vat, "Ka lawm lutuk e aw. Ka tikhawtlai ta si che a, a pawi hle mai" ka ti sawk sawk a. Thangtei zawngin ka hawi kual nghal ruai.




Thingkung hnuaiah a lo ding ka va hmu a, ka pan phei vat. "Thangte min lo nghak rei tawh em? Ka motor ken chhuah loh ni berkher a nia a pawi hle mai" ka ti sawk sawk a. "Nghak rei lo e" a ti var a. "Taxi kan la anga kan haw nghal dawn nia, heng ho chauh hi em ni i bungrua?" Ka ti a. "Ka mamawh tam hleinem" a ti sep. "Inthlahrung suh aw, inthlahrunna tur a awm lo a nia" ka ti a. A bu nghat. Suitcase lian vak lo pakhat leh rucksack pakhat a ni mai.





Taxi phar mai tur a vang khawp mai, addict pakhat hian, "Thiannu tu nge inzawn a?" A rawn ti a. A mitmeng chu a dava riai bawk. "Tu mah zawng lo e" tiin Thangtei chu ka mitmei a. Kan kalsan ta nghal a, khatiang kha a nia ka hlauh chu. Taxi lah chu a vang hrep lehnghal.



"Ka lo thlah ang cheu lo chuang rawh u" Thanpuia bawk chuan a rawn ti leh a, lu ka lo thing vat. "Ka tibuai tawh che emai" nui sangin ka ti a. A mitko a san uk. "A ho lutuk, khua a tlai zel a nia" a ti sup a. Kan chuang leh ta nge nge e. A nui suk chu ka hmu hman.




A phone a ri a, motor-ah a connect si avangin an inbiakna kan hre ve vek a. A lak rualin hmeichhe nutling aw hian, "Bawiha khaw nge i awm? I rawn haw pahin Melody te inah chawhmeh rawn la kawi ang che" a ti hlak hlak a. Mak ti zetin ka hawi hu.


"Naa nu ka hria" a ti nghut a, a lawm hmel vak loh. "Rapper te kha min ti tawh reng reng suh ang che" a ti leh hlak a. Thanpuia chuan phone a off hmak. Min rawn melh zeuh a, a aw a thian kharh bawk. Keipawh nuih insum deuhin ka chuang zui ta zel. In kan thlen chuan ka nu leh Madini pawnah an ṭhu a. Min hmuh veleh ka nu a ding vat.



Ka nu chuan Thangtei chu a be nghal siam siam a, Madini pawh ka nu bulah a lo ding ve reng. "A zia lo hle mai kan tibuai hrep che sia, petrol man tur tal ka lo pe ang che" tiin ka purse phawrh ka tum a. "A ngai lo, ni hman nuam le" ti supin a tlan chhuak daih a. Ka chhang hman lo chhan pawh.





"Chloe, kha kha tu nge i bialpa mi?" Madini chu ka bulah dingin a rawn ti nghal a, a tlan liamna lam chu a bih duk duk bawk. "Ni nang, kan boss a nih kha" ka ti ṭha mai. "A van chhe lo em em, bialnu a nei em?" A ti leh a. Ka melh tawp. A pasal nau bulah mipa dangin bialnu a neih leh neih loh a zawt ngam chu a nia. A va han huai tak.


"Nei ang" tiin inchhungah ka luhsan a. "Thangte indah fel la chaw kan ei dawn nia" ka nu'n a ti a. A room tur chu ka room bul chiaha room awlah a ni. Inchungah ka u te nupa room leh ka room a awm bawk a, inhnuaiah ka nu te room bul chiahah room awl ala awm bawk. Keipawh chhoin ka intifai nghal a. Ka chhuk leh chuan chawhmeh an lo chhuang lum mek.




Thangtei lo chhuk rual chuan chaw kan ei ta nghal a, "Thangbawih naktuk lamah i u nen hian i admission vel chu inhan ti dawn nia." Ka pa'n a ti a, a bu nghat. "Inthlahrung reng reng suh aw, i in ang chiahin ngai rawh i in a ni reng bawk a" ka nu'n a ti ve bawk a. Madini lo ner nang nang chu ka mitsirin ka hmu. "Ni e, he in hi chu i in a nia i thu ber aw" mit ka siai zauh a. A nui ve hak.





Chaw eina ka tifela, Thangtein sil a tum a. "I chau ang nang chu lo va ṭhu rawh, Madinin a sil thei alawm nidangah i sil leh zawk dawn nia" ka ti a. Madini ka mitmei zeuh bawk. A hnar tum datin a tho ve mai.


"Nih leh Thangbawih, school han kal chakna deuh te i nei em?" Ka pa'n a ti a, "A, chutianga chakna bik pawh ka nei lo. Ka grade-in a phak na hmunah a ni mai" a ti a. A inthlahrung mah mah a ni. Hmeichhe ze zawi tak a niin ka hre ve a, a inthlahrung hle bawk. Lehkha a thiam thei a, English pawh a thiam fu. 1st Position a ni a. A duh duh naah a lut thei thei lo mai thei bawk. Kha chu ka hre tawh lo le. School ṭhenkhat hian an duh lo ṭhin a. "Govt-ah kan try dawn nia" ka ti a. "A hunte lo thleng phawt se" a ti sap a, Madini thleng sil zo lo chhuak chuan.


"Thangte, khawpuiah te i awm tawh sia i kawr hak ang chi kha chu a ṭhing em mai. I cousin hi designer lar tak a ni ve bawk a, a zahthlak. kawr thar lei rawh aw" a rawn ti zat zat a. Thangtei zak leh inthlahrung hmel chu ka hai lo, "Incheina hmanga tunlaia mi lo judge te chu a ṭhing emai. Thangbawih lungngai suh, naktukah ka lei ṭeuh ang che" ka ti a. Thangtei erawhin chhuat lam a bih ngar thung. "Ka chau deuha ka mu mai ang aw" a tizawi sap a. A ṭah chhuak aw chu hai theih a ni lo. Dang duh loin kan chhoh tir a. Madini chu nidang zawng zawng aiin ka ngei lehzual. Thangtei tana a hrehawm tur zia hi, a inthlahrun tawh sa nen a awm tinuam thei lo tur zawnga kam a lo cheh ve chhen dawn ai chuan insawn daih mahse pawi ka ti lo khawp ang.




Zingah chaw kan ei laiin ka nu'n a chhuah ve a ngaih thu a sawi a. Madini te pawh a nu te in lamah an phei dawn. Ka insiam a. T-shirt dum a hmaa eng painting emaw ni awm ka ha a, jeans nen sneakers ka bun leh tawp a. Kawr chung erawh ken a ngaih ka ring lo. A lum emai. Ka sam chu ka bawk khawm tawp a.


Ka nu rawn lutin sîngkhat (10000) min pe a, "Hei hi a thawmhnaw lei nan chauh hmang r'u a admission tihna vel tur kha chu i pa'n a pe tawh che tiraw?" A ti a. Ka bu nghat. Nizana Madini ṭawngkam kha a lak natpui ve deuh a nih hi.



“I hman tawh maw? Car-in kal ang aw” kan chhuak nghal a. Entrance exam te pek ve phawt a ngai a, Mount Carmel lam kan pan phawt a. Engtin tin emaw kan ti zo ve mai. “Bazar ang thil kan lei ṭeuh dawn nia” department store-ah kan lut a. “I duh duh thlang rawh” nuih var var pahin ka ti a. “A ngai lo asin, ka neih lai pawh a la ṭha lutuk alawm” a ti a. “Kan inah i awm tawh a, i mamawh ang chu kan pe vek tur che alawm mamawh leh duh i neih chuan inthlahrung loin sawi tawp rawh. I U Madini ṭawngkam te kha chu engah mah ngai suh a fiam ve che a nih kha” ka ti ngawt a. Thawmhnaw vel chu kan en kual a, kan lei hnem ngang mai. Kan inkhai bawr ṭun a.



“U ih ka sam hi tan ka duha min tan sak la” a ti a, "Salon-ah kan kal nghal dawn nia. Ka tan thiam reng reng lo" tiin motor-ah kan thil lei vel ka dah lut a. "A to awm e" a ti sep. "A to ve ang chu, ina kan tan ang ngawt khan an tan ve dawn lo a" ka ti a.





A sam chu a hnute thleng lo a dar aia sei hret siin kan tan tir a, chalsam a inhmeh dawn riaua ka hriat vangin a siamsak chhin a. A inhmeh zet mai, a sam a ngil bawk a. Kan haw lai chuan a lawmthu min hrilh mawlh mawlh a, "Lawmthu sawi a ngai hleinem" ka ti ve a. A mitmengah chuan a lawmzia a hriat hliah hliah. A nu te'n hmu se an hlim ve ngawt ang, "Phone i nei em kha(h)?" ka ti thut a.


"Um"
"Eng nge a model khaw maw?" Samsung a hlui ve lam tawh chi a ni a, ka nui sak. "Phone lei nghal ang aw" tiin phone dawrah kan kawi leh duh lo viau mahse nakinah hrehawm a ti dawn tih ka hriat vangin ka leisak tho a. Samsung F23 chu 15,000/- in ka leisak a. Hei hi chu keima hlawh liau liau aṭanga ka lei a ni. A lawm lutuk chu a mittui a tla tawp.





Bathtub-ah chuan ka inchiah vang vang a, ka hahdam sawng sawng mai. Tui thianghlimin ka inthleuh leh a, ka chhuah chuan Thangtei chu chaw ei dawhkan bulah a lo ding reng a. "Eng nge?" Ka tih chuan bathroom lam a kawk zauh ringawt, "Chaw hi no engzah nge ka chhum dawn?" "Chaw chhum chu hmanhmawh duh suh, Madini te lo haw phawt se kan chhum chauh dawn nia" "A lo haw tawh alawm bathroom-ah a awm" a ti a. Ka mitko ka san ak. "Bai i siam thiam em?" Ka tih chuan phur hmel zetin a bu nghat nghat, "A nih chuan bawkbawn hi lo bai rawh chuan chakawk (a spelling hi ka hre chiah lo a a dik zawk min lo hrilh mai r'u aw) ka lo kang (fry) ang" tiin fridge lam chu ka pan a. Chawhmeh siam tur chu ka la chhuak nghal a, bathroom kawngkhar chu rawn inhawngin Madini chu mitmeng phelh phang hian a rawn chhuak a. A rui emaw ni?



"He tah chaw in ei dawn em?" Ka ti a, a irh uk uk. A bu lak lak a. "Um..." tiin an room lam a pan a, a pai leh khat khat ṭhin. “Chaw chu chhum kep rawh no 5 chhum mai rawh" ka ti a ani pawn cooker a la nghal.





Ka u rawn haw chuan min melh ngur a, kan lo be loa ani pawn min be chuang lo. An room lam a pan a. An nu nen an inhau lo turah ngai ang. Bai a siam lai chuan an khaw chanchin te ka zawt a, nuam a tih thu leh a ngaih leh thut ṭhin thu a sawi a. An khaw chanchin sawi chu nuam a ti tih a hmela a phur sawt danah a hriat vek.




Eirawng kan bawl zawh hnuah tv kan en a, fiamthu te thawhin kan nui hak hak reng a. Nuih a duha, mi biangbiak pawh a thiam reuh zia ka hre chiah. Rilru hahna te kan neih hi chuan kan mizia tak tak pawh hi a langchhuak ṭhin lo. Min kap runtu a awm miau vangin rilru nuam deuha awm a har a ni e.





Ka nu te rawn haw hma deuhin ka u te room-ah inhau thawm kan hria a, kan hawi rual zawk. Min melh zauh a, kei erawhin thawm chu ka ngaichang ran. A reh leh deuh vang vang a, thil keh ri kan hre leh a. Kan hriat zawh rual deuh thawin thinrim zetin Madini a rawn chhuak a, kawngkhar a khar ri bur a. A kal pai deuh bawk si ka lo ding zawk a. Ka u chu thinrim mit sen rumin a rawn chhuak ve leh a. "U eng nge awmzia? Ti nge in inhauh?" Ka lo tih chuan min melh ngur a. "I thiam loh vek a nih hi" ti ṭhawtin a chhuak ve nghal a. Ka hrethiam lo tak zet.




Thangtei chu a hmelah mak tihna a lang a, hlau awmin a awm lo hrim hrim. "Lungngai suh an rui deuh mai mai a nih kha an fim hunah an zia ve mai ang" ka ti a. Min chhang lo, ka nu te an rawn haw ve nghal a. Ka u te kha an rawn hmu hman chiah bawk si thil awmzia min zawt nghal vat a, kan hriat bik loh thuin kan chhang.



"Chaw ei ang u ka ril a ṭam" ka ti ta a. Thangtei nen kan siam nghal mawlh mawlh, kan siam zawhah kan ei nghal a. Ka pa'n vawiin kan chhuahna lam chanchin min zawt a. "Entrance exam te chu ka'n pe ve a, ka tlin leh tlin loh a nimai" Thangtein a chhang a. "I tling turah ngai phawt ang, kawr te in lei em?" Ka nu'n a lo ti ve a. "Lei e kan lei hnem lutuk, O Chloe hian phone te min leisak a. Ka sam te kan tan tir a" a ti siam siam a. "I inhmeh zawk daih a nih kha" ka nu chuan a ti leh a. Thangtei a nui var var. Chaw eikhamah chaw eina tihfel ka tum chuan a phal tlat lo a, ka nu'n, "Thangbawih ani'n tifel se nangin i sil anga tiang chuan insem tal ula" a tih paw'n, "Keimahin ka ti vek thei" a ti tlat a ka room-ah ka chho ta ngawt.




A lawmthu sawi ve naah ka ngai mai, swing chair-ah ṭhuin reels vel ka en mai mai a. Team group velah an nawi nasa mai, weekend hi chuam an rak bengchheng ve thei khawp mai. Mahse mihring inpawhna a ni ve a, hetia inkawm te hi a nuam. YouTube-ah story ka ngaithla mai mai a. Story ziak ṭhinah chuan Toni Da Ralte leh Maengi Ralte hi ka hriat deuh chu an nimai a, an story hi Rca Chhangte Rûn hian a chhiar nasa bawk a.



An story te hian belhchian a dawlin a real thei khawp mai. Ka lo feel ve veng veng chang hi chuan ka hnuk te hi a lo ulh ve ṭun ṭhin. *Sulhnu rûnthlak* tih Toni Da Ralte ziah ka ngaithla a. Changtunu ka khawngaih lutuk hi ka rilru a lo na. Maimichhinga ngawi renga ka ṭhut laiin kawngka an rawn kik a. Lo lut tur a ka tih hnuah Thangtei a lo lut a.



"U ka phone hi min lo hrilhfiah teh ka khawih thiam tawh lo" nervous deuha nui chungin a rawn ti a. "Lo ṭhu la" tiin couch sofa chu ka kawk zauh a. A ṭhu ve mai. A hriatthiam loh lai vel kan inhrilh a, "Monday-ah i result a chhuah dawn kha i hria tiraw?" Ka ti a, "Hria e" tiin a tho a. "Muttui aw ka lawm lutuk e" tiin min kuah vang vang a. Keipawn lo kuah let vein kan inmangṭha a. Keipawh mu turin ka insiam zui a.






Ka chau ve deuh bawk nen ka muhil vat. A tuk zingah dar 6-ah ka tho a. Inhnuaia ka chhuk chuan Thangtei a lo tho tawh, thingpui a lo in a. "U thingpui ka lo in ve tawp ka ril a ṭam lutuk a" a ti a. "Aw, in tawp rawh i in alawm nthlahrun a ngai lo." Ka ti a. A nui sen sen, kum 14 tur a ni. "Thingpui ka lo siam ve ang che" tiin min thlit sak nghal a. "Vawiin chu kan kohhranah hming i ziak lut ve nghal ang chu tiraw?" Ka ti a, a bu nghat. "In khuaah khan eng kohhranah nge in lawi?" Ka ti a zawhna hi ka ngah reuh mang e.

"Presbyterian-ah"
"A nih chu, mahse hetah chuan UPC-ah kan lawia i lawi duh lo em? Pres-ah tho i awm duh paw'n a pawi miah lo a nia" ka ti a. "Aih, pawi hleinem kan Pathian biak a inang vek tho alawm Van a Pathian vek alawm kan biak" a ti a. Ka bu nghat nghat.

Hei hi ka ngaihdan chiah a ni, UPC an nih avanga hmusit zawng a ṭawngkhum te hi a ṭhing. Thangtei sawi ang deuh khan PATHIAN pakhat vek kan bia a inhnial reng te hi a ho lutuk. Mipa hi an dak thei hlerh hlerh khawp mai hetiang lamah hi chuan. Sawi thui lo mai ang he lam chu.






To be cont...



A la tawi em? Ka ziah sa chapter hnih kha chapter khatah ka rawn khung vek a nia aw. 🥲



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)