Ka harh leh chuan ka khumah a vawikhat nan ka u sun nan nasa theih tawpin ka ṭap ta a. Ka thawk chham lek lek khawpa ka'n ṭap meuh chu ka thawl ve hawk mai. Ka thawh chhuah chuan ka ṭhiante an lo ṭhu ṭhap a. Min lo nuih var var hlawm a, ka ṭhen ve sak.
Ka ṭhu ve a, ka zawi nguai mai. Ni a kal ve zel a, in leng pawh kan nei ta vak lo. Kei pawh ka hna lamah ka kir leh tawh a, Madini chu room-ah a inkhung deuh chawt zel a. Anu te an rawn kal paw'n a be chuang lo, an in lama haw tih vel pawh engmah a la ngaihtuah theih rih loh.
Tlai khat chu ka haw hma deuh a, ka haw hma takah chuan tiin ka nu a chhuak a. Ka u te room-ah chu ka kik a, min chhang si lo ka lut tawp a. Tukverh bulah ral lehlama tlang chu thlirin a lo ṭhu a.
"Madin" ka tih chuan a rawn hawi zawk a, min chhang loin a hawina ngai bawk a hawi leh. "Madin, thil ei la thil i ei lohna a rei tawh emai" ka tih chuan a thawk hak a. Room chhung chu a melh kual a, khum mawng lama an inneih thlalak an tar chu a melh ta reng a. A mittui a hnam ṭiam ṭiam bawk.
Ṭhu thla vein, "I duh chuan ṭap bawrh bawrh rawh." a duh tawka a inṭah thawl hnuah a rawn hawi chhuak a. "Ka inthiam thei leh tawh pawhin ka ring lo, U Rina kha keimah vanga thi a ni asin. Kha mi ni khan ruih tur zawngin ka chhuak, chu chu min rawn umzui a. Zu in tawh lo turin min tia kan inhau a, kawng pawh a en lo a. Mipa naupang kawng rawn kan a hmuh khan a balance a hloh a, kopang kha a su ta mai a ni. Keimah hi ka inthiam thei lo. Ruih tur kha ti nge ka lo zawn kher le. In ngaih ang kha a ni lo, engkim a bulpui chu keimah vek ka ni. Ani chuan ka sim theih nan nasa takin hma a la zawk a ni. A hmangaih cheu a inthiam lo ve thei lutuk mahse keimah vang vekin heng thil hi a thleng a ni" thaw chham ṭah chhuak aw tak hian a ti a, a thusawi tawp lam phei chuan awmzia pawh a nei tawh lo. A buai nuaih mai.
Mental hospital lamah an dah ta ngawt a nih kha, thla a lo vei leh dawn ta reng mai. Ka khawhar hlauin ka thiante ka kiangah an awm reng a. An va hlu thin tak em. Tunlai chu Thangtei hi a nguai riau hian ka hria, a lehkha zir a chau deuh nimai turah ka ngai.
Ka tui halin min tiharh a, ka bottle-ah tui a lo awm si lo a. inhnuaiah chhukin ka zu in a. Bathroom atang chuan Thangtei a lo chhuak a, "Mu thei na nge?" Ka ti a. "Um" a ti ringawt, a mit chu bui deuh riauin ka hria a. "I tap em ni?" A lu a thing vat a, "I mit kha engtin nge i tih a?" "Ka thil chhiar lai ka tahpui a" a ti sap a. Ka bu nghat a, "Mu tawh rawh naktuk school kal i ngaih kha" ka ti a. A mitah chuan eng emaw kal lo tura ngentu ang deuh hi a lang zawk a. Mahse a bo lehnghal.
"Naktuk chu...." a ti zuau a. Mit ko ka lo san ak a, "Ah... ih muttui" tiin a room a pan nghal a. A awm dan chu mak ka ti.
Zingah school kal a hun dawn thleng pawha Thangtei lo la tho lo chu ka han kai tho dawn a, a room kawngka ka kik karh karh a. Min chhang lo, ka kik nawn leha aw tham deuh chhalin min chhang a, ka luh chuan min hnungchhawn zawngin khumah chuan a ṭhu tlat a. "Thangbawih i hman tawh em? I tlai dawn a nia" ka ti a. "Umm"
"I ṭha em? Tunlai hi i chauh hmel thei lutuk a, i damlo te a nih chuan sawi la damdawi te kan lei dawn nia" ka ti a. Ngawi rengin a tho a, "U school kal ka duh tawh lo" a ti sap.
"Eh.. eng..a.. ti maw?" Ka ti bah nuai a, a inhnit feih feih. Khumah chuan ka ṭhut tir a, "Ṭhu phawt teh" a inhnit faih faih a, "Um sawi tawh rawh le" ka tih chuan a rawn hawi chhuak a. “Ih.. Zolawmi kha a thin a ṭhat loh vangin in check-up turin phai lamah an kal a, kha ta ṭang school-a hmeichhe ṭhenkhat hoin min ti duhdah ṭan a. A.. u sawi vek pawh ka duh lo zawk, toilet-ah te min kalh khum a. Teacher te hnenah dawt te'n min hek a, teacher te'n an thusawi an awih zawk zel si a." A ti ta a. Ka chek hlak.
"Mai mai a, in ringtawk takin awm phawt rawh. Insiam phawt rawh le, chuan ka thlah ang che" tiin room aṭang ka chhuak a. Ka nu bulah ka sawi a, ka nu pawh a chek hlak. Engmah phei chu a sawi lo, min en vang vang a. "Ka ring tawk che ka fanu" tiin min nuih seih a. Tum dan ka nei lawk tih a hria te pawh a ni mahna.
Chaw eiin ka insiam a, kan chhuak nghal. An building kawtah chuan kan lo ṭhu a, mi lo kal te chuan min rawn melh leh hrek hrek zel. A ṭhente chuan min rawn be ve bawk a, ka kawr design te an lo hmu ve ṭhin a lo ni a. “Hi, ih Chloe i ni em?" Hnunglam aṭang hian an rawn ti thut a, ka hawi let vat.
Hmeichhe pahnih hi an lo ding a, "Ni e" nuih chungin ka ti a. Thangtei chu ka beng bulah a rawn phun sap a, "Saw mite saw alawm" ka khi sak. Chu mi te chuan ka bula Thangtei an hmuh chuan an ner sak a, "Ka ngaisang tawp che. I kawr design lo chu kan ha duh miah lo" an ti har har a.
"Ka va lawm em aw. Hei hi ka nau a nia, a lo lut thar ve chauh si a, a theih chin chinah in lo guide dawn nia aw. Class engzat nge in nih kha(h)?" "Class IX kan nia, chuan hei hi i nau maw?" Tiin an kawk va a. "Ni chiang e, blood related. Ka ring ang cheu aw. Bye bye bawihi hei an ni an awm bawka ka kalsan ang che aw" tiin a samah ka chul zeuh a. Ka kalsan nghal bawk, office lam ka pan nghal vat bawk a.
Vawiin chu kan awl letling phian mai, Fiona-i kan room-ah a rawn tal nileng a. Kan titi vel mai mai, "Mak deuh chu Thanpuia hi ka ex classmate a lo ni reng alawm, high school vela ka bestfriend mipa ni ve ṭhin kha a nia. Inhria em? Chuan a lan ang hi a ni lo, a fel lutuk mahse ṭawngkam hi a thiam lo ve a. A naupangchhia ve thei lutuk, chuan tunah hian tu emaw duh chu a nei" a tih chuan kan melh ṭhap. A nui hak a.
"Naaa ka van awih lo" ka lo tizauh a, "Ni lawm hmanniah album hlui ka hai chhuak hlawl a, a pic te pawh ka la nei. A rawn thawh tirh aṭanga kan innel danah te hian ngaihtuah ve ula" a tih chuan kan ngawi vang vang. "Nia, in innel chu ka ti. Mahse bestfriend kha chu ka ring pha lo hrim hrim" ka tih chuan a chewing gum chu ham puak a.
"A high school kal lai pic chu in en duh em?" A ti a, a nui kar kar bawk. "Nakinah banah" ka ti ta zawk a. Hnathawh tur ka hrechhuak thut a, chuvanga bana ti thut ka ni.
Banah chuan parking lot-ah kan ding ṭhap a, "Fio... thlalak chu..." ka ti a. "Eng thlalak maw?" Hnunglam aṭang chuan an rawn ti dut a, kei lah chu lo ngaihsam ve. "I high school kal lai thlalak min hmuh dawn a" ka ti mai a. Fiona-in a phone a phawrh mek bawk, "Hey Ramnuntluang" tih leh Fiona-i phone phih thlak sak chu a rual a.
"Va ho e aw" ka ti sap a. "Fio... ka kal dawn, in thlen vat vat ka duh" Thanpuia lam chu ka hawi a, "Bye bye" tiin ka car-ah ka luhsan a. Side view mirror aṭang ka va melh zauh a, min la en zui reng. Eng emaw ngaihtuah niawm takin a nui sak a. A nui hmel mawi zia kha!
To be cont..
Ka type khawl sa a zo ṭep a. A thui thei vak dawn lo a ang. Btw love you guys🤎🫶
chuan pic kha ka tibo daih🥲 nalh deuh min lo zawnsak te'u.