IBRAHIM ZOTHANPUIA - 11

Episode kal lai dah luhna

Moderator: writers

Pek Hirha-i
Posts: 69
Joined: November 23rd, 2021, 3:13 pm

IBRAHIM ZOTHANPUIA - 11

Unread post by Pek Hirha-i » May 19th, 2022, 6:08 pm

IBRAHIM ZOTHANPUIA CHAPTER - 11 by Pek Hirha-i






Chaw an lo ei dawn chiah a, "Lo ei ve nghal mai rawh" ka pa'n a tih vangin ka ei ve nghal a. Thangtei ka zawh chuan, "Mak an ti. 'Ani kha i u tak tak pawh a ni l lo ang, in inang lo emai' an ti" a tih chuan ka nui sak. "An va huaisar reuh ve, an hausa mi?" A bu nghat nghat, "Uniky nangmah betu zawk che kha apa chu veng khat pa hausa leh mi zah kai a nia. A ṭhiannu kha chu modern family, mahse intichangkang ve si ang chi kha" ka hrethiam mai.




"Tidaih ila, nu U Bawiha nen in inbe ngai em tunlai?" tiin ka nu lam ka hawi a, "Be ngai nang. In inbe ziah tho a ni lo'm ni?" "Be tho e, mahse nimin piah aṭang khan min rawn la be miah lo" "A hna lamah a buai ve deuh aniang" ka pa'n a lo ti hlauh a. U Rina thih hnu kar khatah a hna vangin a chhuk lehnghal a, a tihdan ziahin min be ziah a. Nidang aiin min be ngun zawk. Mahse sawi tawh angin nimin piah aṭang min la rawn be miah lo. Chaw eina tihfel chu Thangtei kutah ka dah tawp. Pawi a ti em lo'ng chu.




Ka inbual hnuah varandaah chhuakin ka u chu ka call a, rei fe a ring hnuah a rawn la hram a. "Hello" a rawn tihsup chuan ka thaw huai, "U i dam em? Min va rawn be ngai lo ve" ka tinghal a. "Tihpalh aw naute, hna lamah ka buai deuh a" a tisup a. Chau deuh aw a ni.



"A nih chu, inenkawl ṭha rawh aw. Bialnu te kha zu nei lo la, i neih paw'n ka interview hmasak phawt loh chuan an qualify lo a nia" tiin ka fiam zauh a. A nui hawk. "Aw le aw le, ka neih veleh i interview turin ka lo call nghal ang che" a ti a. "Tu nge i biak? Ka tihpalh ka tih kha Mal" hmeichhe aw hian a rawn ti a. Ka meng phawk teh e.



"Ehe! U hmeichhia i tawmpui mi?" "Aih nakinah ka rawn be leh ang che aw" tiin a hang up nghal hmiah. A va mak ngai ve. Ka phone chu ka melh a, ka mit ka khap fak fak ringawt. Lut leh tawh lem loin room varandaah chuan ka ṭhu reng a. Van chu ka thlir a, thla chu a eng a. Chhum dum a lo kal bawk, thla a awmna a thlen hunah chuan thla êng mawi tak khi a khuh bo dawn. Mahse a khuh reng dawn lo, kal kian hun a nei leh ang. Chu mi hunah chuan thla êng mawi tak kha a rawn êng leh ang.


Hetiang deuh chiah hi hringnun hi a ni, kan rin loh lam aṭang emaw kan rin sa na lam aṭang paw'n buaina hi a lo kal thei. Mahse kha buaina khan min chenchil reng dawn lo, rei deuh mahse kal kian hun a nei leh ang. A kal kian hunah chuan kan êng leh mai ang. Dawhtheih ve a ngai tih mai a ni. Kha chhum dum chhem kian dan kha kan zawn ve a, kan nghah ve hlek a ngai. Ka phone ri chuan ka ngaihtuahna aṭang min kai harh zawk a.




"Hello" "Awi Chloe" nuih za tih hriat zet hian Fiona-i chuan a rawn ti a, a tlan a ang bawk. "Hey i ṭha em?" Ka tih chuan, "Um um ṭha thil pawimawh lutuk hrilh tur che ka nei" a ti a. A nuih a za hle aniang a nui bawk bawk a. "Ih maw.." a ti a, a sawi leh hlei thei lo. "Ramnuntluang phone kha dah rawh, sawi a ngai lo" Thanpuia aw hian a ti ram hmak a.



"Blehh i thu lo best ka hrilh dawn chiang lutuk" "Dah rawh" phone chu an inchuh nge mawni a ri deuh nuai nuai a, an va han naupang chhia9 tak e aw. "Chloe, a lo tibuai che a a pawi hle mai. Muttui aw, a thusawi kha chu engah mah ngai suh" a rawn ti hmawk hmawk a. "Aw le, muttui le" a hang up nghal. He mite pahnih hi an chhungte aṭanga lo inkawm ṭhin lek an lo nia. An va han ho tak! Ka hre ve lo.





Dar 5 velah ka phone vibrate-in min tiharh leh a, U Bawiha a lo ni. "U, enge tun ang zing zingah te min lo call? Pawimawh a awm em ni?" "Naute, thil hrilh che ka duh a" a thaw deuh hak a. "Um, a hmanhmawh thlak viau mi?" "Hmanhmawh thlak a ni deuh mai, i duh chuan inphin harh hmasa la" a ti leh a. "Nih chuan ka'n inphih harh hmasa lawk nge" tiin ka tho nghal a.




Coffee ka insiam leh te te hnuah varandaah chhuakin ka call leh ta a. A pick vat, "Sawi tawh la" tihpahin coffee chu ka tem hlek a. Nuam deuhin ka ṭhu ar ar bawk. A la vawt deuh suk mai, a thaw hak phawt a. "Ka sawi nghal tawp mai ang. Ka rawn haw hma deuh khan ks pakhat ka dawr a, chu mi hnuah hnathawhna lamah te ka hmu leh ṭhin a. Mizo tho a ni a, mak ka ti vak lo. Ka hmuh dan kha a hniam phah lo a, a san phah lo bawk a. Engtin nge ka number a neih ka hre lo, nikhat chu min rawn be hlawl a. Kan inhmu ta a, a chanchin min hrilh ta a. 'Kan chhungkua hi chhungkaw awm thei kan ni lo a, khawsak harsa tak kan ni lo bawk. Ka nu leh pate hian zu an zuar a, an chatthla reng zel. Class 12 ka pass hnuah ka zir zawm lo a. Zan khat chu ka pa costomer pakhat hian min sual luih a tum a, theih tawpin ka ṭang a. Pangpar khawinain a lu-ah ka vua a, ka him thei chauh a ni. Chumi hnuah ka nu leh pa ka hrilh a, i thiam loh aniang chu mi hur herh nu min tilet hrep a. Ka rilru na lutuk khan ka nu leh pa pawisa ru chhuakin he lai hmun hi ka pan ta a ni. Mahse khawsak a harsa em em a, thingpui dawr pakhatah ka thawk a. Thingpui dawr neitu nu chuan he eizawnna bawlhhlawh zetah hian min hruai lut ta a ni. Ka thiam loh pawh a awm tih ka hai lo, he eizawnnaah hian kum 2 ka tang tawh. Tal chhuah ka duh, tlanchhuah ka tuma mahse min mana min sawisa hrep a. Talchhuah dan kawng awmchhun ni a, ka hriat keima nunna lak ka tum lai takin nang hi ka tawng che a. Mizo i nih vang khan mak ka ti hran lo, chhan chu Mizo tam takin an pan nasa lutuk. I mitmeng ka hmuh khan ka ring nghal che a. Ka rawn pan tawp mai che a ni. Min pui rawh' a ti a." Tiin a chawl dat a. Ka lo ngaichang thung, "Tih dan tur kan zawng a. Police hnena kal chu a awmzia loh thu min hrilh tawh a, chuan evidence a theih ang angin aman a la khawm a. A ṭhiante an duh vang pawh ni loa chunuin a tihluih vanga inzuar ho chu a be bawk a, anni paw'n a support a. Social media lamah kan sawi ta a ni. Mipui support na kan dawng ṭha a. CID lamin chhui chian an tum ta bawk a." A ti a, nia hmanni deuh khan issue lar tak tuna ka u sawi hi a awma mahse ka u tih a ni ang tih rin ngaihna ka hre lo. Ka u hi computer thiam tak, network lam tuitak a ni a. A tan fake account siam a harsa lo. Tunah pawh hian networking lam a thawk a ni.





"Chuan?" Ka lo ti leh a, "Karlehah ka rawn haw dawn. Ka nu te ka hrilh ang, ani hi ka duh. Nupui atan pawh ka duh, a sumdawnna kha kalsan a duh. A nunhlui chu eng pawh nirawh se, a nihna ang ang hian ka pawm." "Aw le, kha chu i duhthlanna a ni. Lo haw phawt la hmaichhanah te pawh kan la sawi leh zawk dawn nia, ka nute pawh hrilh la" "Ni e, mahse Mama thihnaah pawh an la dam fel loh tehlul nen tuna hetiang thu hrilh leh hi ka ngam ngang lo a ni." "In inzui tihna mi?" Ka ti hu a, a nui huk. "Niang chu maw le" kei pawh ka nui a. "Aw le, lo haw phawt rawh. A pic min lo send rawh aw. Ka dah phawt ang ni pawh a lo lang ṭan" kan dah hnuah chuan ral leh lam tlang chu ka en reng a.







Tunlaia kan thil tawn hi a awmzia pawh ka hre nek lo ve. Message a lo thleng a, ka en nghal. An pahnih pic chu a lo ni a. An selfie na, camera kengtu chu hmeichhia zawk a ni. A hmelṭha phian, nula pawisawi lo zet a ang. Tih nat awlsam hmel tak a ni. An inhmeh vei phian.



Office-ah pawh ka lo pending leh vung vung ṭhin. Chawhnuah Fioan-in, "Shooting nei turin Singapore lamah kan kal dawn" a ti a. An phur hlawm viau. Kei pawh ka u te hmuh theihna remchang tak a nih vangin ka phur. Mahse Mizoramah hian Mizo thuam vel kan shoot phawt dawn a ni.



Lianchhiari lunglen tlangah shoot kan duh si a, naktukah kan kal dawn. Zan lamah Thangtein min insiam pui a, "Chuan in school lam chu eng nge chanchin?" "An zia an paih lo, mahse Zolawmi a lo haw tawha chu loah ka confi ve ema an duh ang diak diak chuan ka awm tawh bik lo." A biangah ka piai zauh a, "Mahni kan inrintawka kan confi lah hi chuan mi hian min hnuichhiah ngawt ngam lo a nia. A hma ai khan inringtawk sawt rawh" ka ti a. A nui sen sen. "Bialpa te hi i nei ve em? Duh emaw star emaw i neih chuan min hrilh vat rawh aw. Zah tur a awm lo" a laih hmel tak zet.




"I lo nei reng tawh zawk em ni?" Lai zetin a bu nghat a. Mitko ka san ak, "Tu nge ni a? Min hrilh ve dawn em?" "Mahse ani te i hrilh ang tih ka hlau lawm" "Hlauh tur a awm lo. An hau dawn lo che, i zirlai tihchhiat phah lo turin an hrilh che nga a nimai. In ngaihzawnna lamah hi chuan ka nu hi hrilh vat zel rawh, lo experience tawhtu a nia. Thurawn ṭha tak tak leh zilhhauna ṭha tak tak a hnen aṭang i dawng thei zawk ang." Ka tiduah a. A nui mai.




"Ih maw.... ka duh chu eng lo ih," "Umm sawi rawh ka seh lo ang che" "Zolawmi u khi nia" a zak aniang hnuai lam a bih nghal daih. "Um.. ka nu hrilh la, kei ai thil a hrilh thei zawk ang che." Ka ti a, a beng bulah, "I rin aiin i nî(aunt) khu a tunlai ang" ka ti zauh bawk. A nui hak.






Chaw ei loin zingah kan chhuak nghal a, mut a chhuak duh tlek tlek khawp mai. Ka car ka keng ve a. Mahse Fiona-in a khalh daih. Kei erawh Thanpuia car-ah ka chuang thung. A car zawk a rawn keng a nih hi, che common lo ve khawp mai. Nidangah amaha a kal dawnin Bolero a keng ziah a. Thanpuia motor-ah Juteii, Fela, Haryani leh kei kan chuang. Ka car khalh ka tum paw'n Ramnuntluangin a phal tlat lo a. Thanpuia motor-ah a nawrin min nawr lut a ni ber mai.




A hmaah ka ṭhu a, mut ka kham chiah lo nen ka lo muthlu leh ṭhin. Motor ding datah ka harh a, Thanpuia chauh a lo awm a. "Kan thleng tawh mi?" Ka ti hu a, "Aih kan chawl lawk" "Nih chu, nizanah ka mu tlai bawk si a. Mut ka kham lo" ka ti niah niah a. "Nia, i kham lo niang i intauh bawp bawp pawn i harh thei lo" ka melh vat a, nuih za insum tih hriat zet hian min lo melh a. Ka ner khum sak.





"Thil ka'n lei ve te'ng, ei mai mai tur pawh" tiin ka chhuk a. A lo chhuk ve tih pawh ka hre lo, dawr pakhatah ka lut a. Chips vel ka en kual dun dun laiin, "Drinks pawh la rawh" a rawn tithut a. Ka phu zawk. "An nei ngawt dawn mi? Zawt la" ka ti ṭha mai. Motor lam kan pan laiin Juteii leh Fela an rawn kal a, “Chloe lo ding lawk teh” an tih vangin ka ding leh rih. “Nge i din ve zel? Lo va lut rawh” a kal ve mai.





“Thanpuia nen khan in ingaizawng mi?” Fela'n a rawn ti a, ka nui hak. “Kan in ngaizawngin inhria mi” ka tilet hlauh a. “Aw” an la tirual zui. “In ngaih dan dan khan lo ngai te'u ka hne” car lam pan ka tum leh a. “Nichinah pawh dawrah te inkal dun vel. In inhmeh tawp thla pawh kan lo la hman vek asin” ka chek hlak a. “Paparazzi ho tak hi chu a” tiin ka kalsan a.








Kan tlan leh dawn thleng paw'n kan chuan puite kha an lo la lut thei lo a. “Han zawt teh” a tih vangin ka call a. “I car-ah kan chuang daih. Fiona-i chuan pui te kha an bialpate ho motor-ah an kal vek a tikhan inpahnih khan lo kal mai rawh u” a nui kar kar a. “Aw nih chu” ka off nghal hmak. Biak rei leh sawi tur a tam.





“Motor dangah an chuang a nih chu” a bu nghut a. Engmah sawi tawh loin motor a start a. Kan inbe lo ve khawp mai, sawi tur ka hre lo. Ani lahin min be bawk si lo. Lays chu khehin ka ei a, “I duh ve em?” “Duh ve e” tih leh rawn ban a rual a. “Designing lam hi i tuina hrim hrim a ni em?”
“Ni e,” ka chhang tawi tek tawk viau.




“I talent dawnna pawh a nih chiah hi” a ti a. A lam ka hawi chuan min lo melh run, “Kawng lam en rawh accident ka duh miah lo nia” a nui suk.

“I u thihna vang khan pawi ka ti takzet”
”Tih theih a awm tawh chuang hleinem, rawn thar thawh suh” eng nge a chhan pawh ka hre lo. He pa chungah hian ka thinrim ve ringawt.




Phone ka en a, “Phone khawih suh i rui ang” “I sawi tur awm lo” a thaw hawk. Mahse ka dah ta tho. Phone khawih loh paw'n motor te chu ka rui ziah. Tukverh lam chu ka hawi a, Mizoram tlang ram lo mawi zia hi ka hrechhuak. Kan thlen chuan ka chhuk nghal a. Ka lu na deuh bur mai. Motor hi a lo inchuan chauh theih hle mai a.




Ramhnuai deuh hlekah ka lut a, hmun nuam leh zawl deuh hi a lo awm hlawl a. A hmawr deuhah chuan ka ding vang vang, thlifim lo thaw chu a nuam em a ni. “A va nuam awm dauh dauh ve koh pawh i hriat theih loh” a rawn ti thut a. Ka phu zawk chu ka ke chheh a sual a, ka rap pial ta mai! Ka tla tur chu hneh zetin min pawt let lawp a. A awmah ka bei rawk rawk. Ka thinphu te chu a la su dup dup mai. Nghet zetin min kuah a. “Tihpalh” a ti zawi sup a.


To be cont..


A tawi rawh titawh miah s'u, ka type chhung reizia hria ula chuan a tawi inti bik miah lo ang. 🥲 Type khawl sa pawh ka nei tawh si lo a, ka chawl leh lawk dawn aw. Min lo nghak leh hram hram turin ka ngen a che'u. 😊



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)