ADDICTED_TO_YOU S2 Chapter : 7 By : Msi (Hmeichhe naupang tereuhte)

Episode kal lai dah luhna

Moderator: writers

Msi Miluhlulnui
Posts: 274
Joined: October 18th, 2019, 7:46 pm

ADDICTED_TO_YOU S2 Chapter : 7 By : Msi (Hmeichhe naupang tereuhte)

Unread post by Msi Miluhlulnui » May 19th, 2022, 9:27 pm

ADDICTED_TO_YOU S2 CHAPTER - 7

By : Msi, Hmeichhe naupang tereuhte


rps20220519_212045.jpg
rps20220519_212045.jpg (29.51 KiB) Viewed 4458 times


● THINKING OF YOU ●



"I duh chuan, zingkara thawh ai chuan nileng hna ka pe zawk ang che," ka nui hak. Hriatthiam loh hmel deuh taka min en lai chuan a zak hnuaiah chuan kun in ka kalsawn daih a.



"A ngailo, ka lawm e," tiin chhuat nawhna chu ka chhar a tui ah chuan chiahin ka sil fai nawk nawk.



"I nau te....,"



"I lo buaina tur a awm lo," a sawi zawh hma hauh a lo ti fiah fak in bucket chu ka chawi nawlh a. Trolley hnuaia dah luh pah chuan trolley chu ka nawr kal a.



"I duh lo takzet tih i chiang maw...? A bak a awm tawh dawn hauh lova nia," a rawn tih leh takah chuan ka ding dat, ka sam ka bek a rawn uai thla chu ka sam a zeh pah chuan ka hawi let a.



"I thil min offer chu a chen tu nih a chakawm hle mai mahse ka hnawl ni rawh se. I duh chuan 'inngaitlawm chapo' tiin min sawi zui emaw min țawngkhum leh thei ang ka pawm vek," ka ti zâwi sap a, a hre phak kher pawn ka ring tawh lo.



Trolley chu nawr chhuak in lift lam pan chuan ka nawr phei zela. A thil sawi kha chak te chu ka chak lutuk mahse a bak bak chuan ka in phahhniam thei tawh bik lo. Tunge hun lo kal zel tura thil thleng turah ka natna tur a ni lovang tih sawi thei...?



Duh viau mah ila min vaw let thei tu atan a hmang leh lovang tih a sawi theih lova. Kan dinhmun leh nihna chu ka hria a ni min hriattir nawn sek pawh hi a ngai lova, tuna morning routine pawh hi ka ti thei em em bawk ang.



Thil thleng turah ka buai peih pawh in ti maithei mahse keini ang tan chuan a sang in lawmna tur a nih rualin phel phawk khawp a min sah nan a hman leh theihna a ni a ka in veng lawk mai a ni. Kan dinhmunah hian ka pha lova sawisel pawh ka tum hran lo, mahse sawiselna dawn erawh kan tan tawrh zawh a har țhin êm vang a ni.



Ka trolley hnuaia bucket chu la chhuak in bathroom ah chuan ka sil zung zung a, ka board ken a ka ziah luh chu counter-ah ka submit thlap hnuah chuan ka hming sign leh te te in changing room lam chu ka pan phei hnak hnak a.



Ka thawh ngai miah lo a ni na chungin ka rin aiin ka ti thei phian ka ti zawk, ka khawr țut ka in ring kha ania mahse mi tihdan te ka en in Fibby khan min tihpui nasa bawk a tunah chuan a hma zawng aiin ka zei ve tawh lutuk ringawt.



"Hey... Mira," min ko ri ka hriat tlat avang chuan ka ding dat a, ka hawi let chu hnathawk pahnih chu ka lam pan hian chak zet in an lo kal a.



"Sawtah... Counter-ah an mamawh che Mizo mikhual an lo thleng a," pakhat chuan a rawn ti sawk sawk a kei erawh ka ka hau ringawt a, "enge chu nen chuan inzawmna kan neih...?" Ka ti hû mai.



"Nangman i buaipui dawn, chuvang chuan kan rawn ko che alawm va kal vat vat rawh," pakhat chuan ka ban bulah a rawn vuan a min nawr kal ti tih. Mahse ka țang ve tlat a ka tal chhuak vat.



"Midang ti tur an awm reng alawm kei te chu," sawi zo lo chuan ka ngaihtuahnaa thil rawn lang avang chuan ka ngawi zui daih.



"Boss in a sawi kha i hre tawh lo em ni..? Mizo khual kan neih chuan nangman i buaipui dawn a tih kha, va kal vat rawh an nghak reng che ania," ti a pakhatin min nawr leh nawk rual chuan hmanhmawh zetin an kalsawn nghal daih a.



"A khawngaihthlak hle mai, tinge boss khan khatiang khan a tih bik le," ti a an phun phei sap sap pawh chu ka hre reng a. Tuman an sawi zui lem loh avang khan an theihnghilh tawh amaw tiin ka lo ngaih țha awm ve hmiah a.



Mahse a hun alo thlen meuh chuan an lo la theihnghilh loh zia leh min tihdanah khan min en dan chu a hriat ngawih ngawih in ka hre bawk.



'A ni hi chu Mizo țawngin bia ula, Mizo khual kan neih chuan amah in buaipui tir dawn nia,' ti a a saw kha ka bengah a khawk rum rum a. Duh lo zeta ka beng chu hup in ka maimichhing vang vang, mahse a rawn chiang tawlh tawlh zawk ni mai hian ka hria.



Counter lam chu ka pan phei a Counter hmaah chuan pitar leh putar mahse an kum bih la tlem chhe lutuk chuang lo tih hriat zet chu an lo ding a, Counter a duty nu in min hmuh ruala a kut a rawn hui zawk zawk rual chuan chak zet hian ka pan phei a.



"Mira... an ni hi an room turah lo han hruai ta che, an hriat duh te pawh i hrilh ang a," lehkha min pek pah a rawn ti tu chu ka melh ve zawk a a hmelah chuan min nuihzatna a lang chhuak ni hian ka hria.



"Aw le," ti sap in lehkha chu ka ban a.



"An ni hi Pi Marina-i nu leh pa an nih ang in zah takin i be dawn nia aw, an kum a tam ve tawh a kal chak pui lo la nang angin an chak tawh si lova," a tih lai mek a pitar leh putar ka lam hawi zawnga an rawn inher an hmel ka hmu chiah chu ka meng deuh kâwk.



Ka lehkha ken chu ka thlauh nghal bal a, "hey...," sehchilh nak a rawn ti a min rawn sawi nawk pawh chu ka ngaihsak theilo. Ka hmaa pitar leh putar ding chu ka melh reng ringawt a an ni erawh chuan min hre tawh lo tih hriat zetin ka awmdan chu mak tih hmel zet hian min en a.



"Ka pi, ka pu lo hrethiam hram hram rawh u. A thawhna ala re lova a la zei vak lova," lehkha min rawn hmehbel nawk nawk pawh chu nghet vak lo hian ka lo hûm a ka chil ka lem khalh.



"I țha maw Nula...?" Chu aw ri chu ka la theihnghilh hauh lo, ka pi, a tunu pawh a min pawm theilo tu kha a ni. Vawitam ka nu bula kan unau kalsan tura hrilh fo tu pitar ngei kha a ni.



"Nula, i dang vek a nih kha mawle," putar rawn țawng chu ka en leh, a ni hi chu ka pu min duat em em a ka piin min hauh chang pawh a min chhan țhin tu ka pu kha a ni.



"Hey... enge i hriat a...?" Ti hlak a min rawn nek nawk rual chuan ka harh chhuak zawk, rang lutuk chuan ka in siam rem zung zung a, "ah ka tihpalh lutuk. Lo kal rawh u, khawi in bag kha ka lo khai ang," ti zung zung in an bag khai lai chu ka lak sak a.



"Heti lam ațang hian kal ang u aw... in tan a nuam zawk ang," tiin lift zau zet lam chu ka pan phei pui a an hmaah chuan kal in hmalam chu ka melh deuh ngar ngar a, "bawihi lo ding lawk," putar aw in a rawn tih chuan ka ding dat a.



Enge a sawi ang tih ngaihtuah ran chung chuan nui lui sang in ka hawi let a, "kan inhmu tawh mial em le..? Ka hmuh tawh hnu i ang ka ti riau, ka tunu nen in anna lai in nei in ka hria a ni," a rawn ti muang ban chap a, ka thin a phu rang nghal dut dut.



"Engtin nge maw an in an ang le... kan tunu kha hetiangin a hmelțhat ve loh kha. Bawihi hrethiam rawh a tar â ve deuh tawh a," a pasal ala control țhin tih hriat zetin a rawn ti nghal barh barh a. Ka pu ai hian ala țhalai zawk a fing zawk tlatah a in ngai țhin, alo la bansan lo a nih hi.



"Ka tunu i ang hle mai," ka pu chuan a rawn ti leh a, ka țah a chhuak takzet.



"Ngawi mai mai teh, hetiangin kan tunu kha a hmelțha dawn lo. Sawi tawh lo teh, ka hre peih lo ania. Bawihi, hrethiam hram rawh," a ning tih hriat zeta ner nak chung chuan a rawn ti leh nghal zung zung a za lo zeta nuih pah chuan an bag hrui chu ka hmer deuh ngawt ngawt a.



"Ka pu... min hai a ni ang, midang nen min hriatpawlh a ni ang. Kei chuan ka vawikhat hmuhna che ania," ka tih chuan a ni pawh a rawn nui ve ta hak hak a, "ni e, a ni tak ang. Kan upa ve tawh sia kan mit te pawh alo chak lo zo ta a nih hi, kal rawh le hma han hruai la," a kut nen chuan a țang kawp a.



Theih se vawn sak ka chak takzet, ka pi in min hauh lai chuan amah chiah hi chhantu ka nei țhin. Min duat thei em em a ka pi ang lo takin thil te min leiin ka ei chak te min zawt țhin. Ka pi, min ngaina miah lo tu bula awm ai chuan ka pu min duat a min ngaihsak em em tu hi ka thlahlel zawk fo țhin reng a nih kha.



Mittui tla țeuh chung chuan, "kal ang ule," ti sap in ka inher a hma chu ka hruai leh a lift-ah chuan luh puiin button chu ka hmet zui nawk nawk bawk.



Ka pi chuan a dan ngai te in mi chanchin a sawi leh mawlh mawlh a ka pu erawh chu a ngawi ngar thung mai. Ka nu leh a pasal ni ngei tur chungchang a sawi pah a a pasal a fak zia leh a ngaihsan zia a sawi mawlh mawlh te chu ka ngaithla ve reng a.



Ni e... ka pa kha ka pi hian a pawm ngai tlat lo, a hnathawh engah mah a fak ve ngai lova. Ka pa in a hlawh tlem a zawng a pek ve chang pawn hreh lo taka la in lawmthu a hrilh ngai lo, ka pi te tan thil țha tihsak mahse tuman a thil tih țhat an hre ve ngailo.



An ni nena kan inhmuh tawp berna chu kum 15 ka nih khan a ni, min hre tawh lo pawh hi a âwm takzet a min hriat reng pawh an lo duh lo maithei bawk. Ka la naupang na in ka pi in ka nu hnena a hrilh țhin te kha ka hrethiam ve vek țhin a ka pa kalsan tura a tih nasat zia pawh kha ka hai miah lo.



Lu thing nghat in lift a rawn inhawn rual chuan ka chhuak zui nghal a, an ni pawh rawn chhuak in an room lam pan tur chuan ka hruai phei zela.



Room pakhat kawt kan thleng chiah chu kawngka a rawn inhawng a chuta kan Boss rawn chhuak teh hlawl chu ka pi chuan alo chiau au nghal vat.



"In rawn thleng thei maw... in chau em..?" Kan boss chuan a zawt nghal zung zung a, kei erawh chuan hnunglam ka hawi ngar ngar thung a an titi chu ka ngaithla ve reng.



Ka pi țawngkam hman chu a thler mai ang a tihtur khawp in a nem a, 'hepa pawi hi ka sawi a nih chuan ka thi ang,' ti ni âwm ang zia zangin a țawngkam te chu an bei uluk em em mai khawp.



"Khawilai room ah nge in awm dawn...?"



"Helai hian hian," ti a lo chhang vat in a rawn chhuahna room bul chiah chu ka kâwk a, "a nih chu, lut rawh u zan lamah kan inkawm ho dawn nia tihtur ka nei a," ti a an inthlah hnu chuan kei pawh chu room-ah chuan ka luh pui vat a.



"Mamawh in neih chuan engtik lai pawhin kan biak reng theih ania aw... hun nuam tak in hmang dawn nia ka kal ang e," ti sap in ka chhuak zui nghal nal nal a lift lam pan chuan hmanhmawh zet in ka kal zui nghal hlawk hlawk bawk.



Lift inkhar tur ka hmuh rual rual chuan rang lutuk a tlan pheiin a kawngkharah chuan ka va inzep nawk nawk a. A inhawn zau leh takah chuan thaw hak in ka hawi chhuak a mahse ka mi hmuh avang chuan ka kâ chu ka chip zui hmak.



"A ni leh bawk maw...!!!" Tih chu ka rilru ah a rawn lang nghal zat.



A hmaah chuan ding ve rân in ngawi reng chuan lift kawngkhar chu ka melh ngawt ngawt a. Ka pi te kha helai hmunah an lo kal a nih chuan ka nu te an la haw lo tihna a ni a.



Helai hmun kan chhuahsan thei dawn lo tih hrechiang ber tu an ni dawn a kan in a lo kal emaw min rawn hmuh tum ta se engtin nge ka tih ang..? Ka nau te hi chuan ka pi leh ka pu hi an hre phak lutuk lova buaina an nei dawn lo tih ka hria mahse ka nu hi chu an hai dawn hauh lo.



Ka thaw zui leh hak țhin a. Ngatinge heng ho nena inzawmna an lo neih khanglang ni, kan nun a pangngai tawh loh sa nak alaiin kan hmaah an rawn in lan chuan engkim a buai ka hlau a Sawmtea hian ka nu bula kal a ngen mai ka hlau a ni.



Ka sana bun chu ka melh leh zawk țhin a ka haw a hun tawh lutuk avang chuan ka thaw leh hak țhin, lift lah chu kalmuang ka tiin ka en leh deuh sek țhin a.



A rawn inhawn takah chuan nui var var in ka chhuak a ka locker lam pan vat in ka inthlak zui sawk sawk a Fibby khan min lo nghak rawh ti mahse ka hmu zui tawh si lova haw tur chuan ka in puah chah ta ngawt.



Registration ah chuan ka haw hun dar zat leh ni leh ka hming chu ka ziak lut mawlh mawlh a Hotel step lam chu thlir leh zeuh vin ka bag ak țha mawlh mawlh chung chuan ka chhuak a kan veng lam pan in ka kal zui hnak hnak bawk.



Mikhual an tam a motor tlan a tam in a tlan apiang te lah an ri deuh chel chul hlawm a kan khua pawh tlem in a ti reh lo ve ta deuh a mahse an tlan khu lutuk erawh kawng a kal a hreawm zawk lek lek.



In kawt ka thlen chuan luh kawi ngai lovin Sawmtea leh Kimkima rawn in zui haw chu ka hmu nghal zat a, "ehe... nangni pahnih chu in bang ve chiah em ni...?" Ka ti nghal hliai, ka aw hriaiin an rawn hawi chhuak a Sawmtea'n min rawn hmuh chuan min au chul chung chuan a rawn tlan phei a ka ke ah chuan a rawn kuah nghal chawt.



"Au Kimkima ka lo nghak char char," ka mal ah khabe nghatin a rawn dak chho a, a sam ah chuan tuai zeuh in a bag ah chu ka lak sak sawk sawk a, "i van fel tawh ve a i hlau miah lo ami...?" A biangah chuan ka piai sak zeuh.



"Aih, sikul kawtah khan ka lo awm char char ka hlau lo hrim hrim," a rawn ti fel vat reuh va, nui hak a Kimkima ka en chu kan in lam chu alo en ngar ngar a.



"Bawihte ngatinge.... i thinrim em ni...?" Sawmtea banah kaiin a lam pan chuan ka kal a, a lu alo thing ringawt. "In zirtirtuten an hau che ami...?" Ka tih lah in a lu a thing leh ringawt bawk si.



"Anih chuan ngatinge i tum tlat a, ka chungah i thinrim ami...?" Ka ti leh, a ngawi vang vang a.



"Inah lut vat vat ang, ka mut a chhuak a," ti daih in lam pan chuan a kal nghal daih a, Sawmtea chu ka en a, "i u saw a thinrim ami...?" Tiin ka zawt a.



"Ka hrelo, kan lo haw pawn a țawng duh miah lo a min ngei aniang tiraw Mami...?" A rawn dak vah a, "ka hrelo," ka lo ti ringawt. Sawtiang sawn ala awm ngai miah lo biak a mi chhan duh loh te hi a ching ngailo hrim hrim, a chungah eng emaw tak a thleng a ni ngei ang.



In chhunga kan luh hnu chuan Kimkima chu inthlak sawk sawk in khumah chuan a mu nghal hmak a. Na a nei em tih ka zawh lah in min chhang hauh si lo, a beng hup in a maimichhing a zawhna ka zawt mawlh mawlh chung pawh a min chhan a tum lo chuan ka ngaih a ti țhalo takzet.



"Mami.... au Felfela'n min lo sawm a ka kal dawn ania aw," Sawmtea rawn au lung lung ah chuan room ațang chuan ka chhuak vat a, "khawiah nge i kal dawn...?" Kawngka ah dak in ka au zui lang lang.



"Kan inkhel dawn," rawn ti deuh lung lung in a u Felfela te lo nghahna lamah chuan chak zet hian a tlanchho a kawngka chu khar țha sawk sawk in room lam bawk chu ka pan leh.



Khum ah chuan țhu thla in lehlam hawi reng Kimkima banah chuan ka vuan a, "bawihte, i chung a thleng min hrilh dawn em...?" Ka ti sep, a țawng lova che lovin a mu ngawi reng ringawt a, a beng lah a hup bawk si min ti hrilhhai takzet.



"Bawihte," ti a kawih leh ka tum rual chuan amah zawk chu a rawn in let a mahse a hmel ka en chiah chu a biangah mittui a lo luang ngiai ngiai mai, "ngatinge bawihte, na i nei ami..? I khawilai nge na...?" Ka ti nghal zung zung, a lu a thing mat mat a.



"Sawi rawh le, ngatinge i țah..? Na i nei ami bawihte..?" A awmdan chuan min ti mangang takzet, a khawilai nge na ang ka hrethiam lo a hrisel țha viau amaw ka ti a mahse na alo nei reng em maw ni..?



"I pum ana ami...?" Ka tih lah in a lu a thing leh mat mat a, a biangah lah nise a mittui chu an rawn luang zung zung a ka hrukfai sak nghal vat vat, "bawihte na i neih chuan sawi la, a u hian damdawi ka lei sak vat vat ang che," a awmdan chuan min ti țap ve lek lek tawh.



"A u, anu ka hmu a ka ngai lutuk," a rawn ti țiau, a in sut zui nghal hlawp hlawp a. Kei erawh a thusawi avang chuan ka țhu khawng deuh awt mai, "engmaw i sawi bawihte..." ka zawt ban deuh chap.



"Lalrinkim engmaw i sawi ka tih chu...?" Min chhan loh avang chuan ka ti deuh țhat..!!



"Anu ka hmu a, ih... kan sikul bulah alo awm a Sawmtea chuan a hmu ve lo a hmuh ve ka phallo a," a insut zui nghal hlawp hlawp a, "enge a sawi bawihte han sawi teh enge a sawi...?" Ka hlauthawng a ni, a bula kal tura a sawm ka hlau takzet.



"Sawmtea nen a bula kal turin min ti a," a rawn ti leh riak a.



"Engtin nge i chhan bawihte...? Engtin nge i chhan han sawi teh, ka hau miah lo ang che," a mittui chu ka hru zawm mawlh mawlh a, ka kut te chu ka hlauhthawn luatah a khur a ka ngaihtuahna te chu a mang nghal vek hialin ka hria.



"Ka duh lo ka ti, thil tam tawk ka lei ang che u a ti a mahse ka duh lo ka ti tlat. Nangma bula ka awm duh zawk thu ka hrilh a min hau hrep a. A u, anu tak tak kha ala dam reng a ka ngai eee," rawn tho chhuak in min rawn kuah a kei erawh chuan kuah let nachang ka hrelo, a inhnit zui hlawp hlawp chu mittui tling ruak chungin ka ngaithla ve reng a.



"Enge a dang ala sawi...?" Ka ti țial ve nghal ruak mai, ka mit ka khap zawngin ka biangah a rawn luang thla a hruk buai pawh ka tum lo.



"Pawisa min pek a tum a mahse ka duh lo a. In lian leh mawi tawkah motor te, eitur tam tawk te awmnaah ka kal leh țep tawh a lo kal ve la, thil tam tawk ka lei ang che. Sawmtea nen lo kal ula i u chu keiman ka hrilh mai ang a ti a, mahse ka duh lo a," a rawn tih leh rual chuan nghet lutukin amah chu ka kuah nghal ngawih ngawih.



"A u... a nu bulah kha chuan ka kal duh lo a mahse ka ngai eee," ka nghawngah a hmai a rawn phum a a țap leh tih hriat zetin ka nghawng ațanga ka hnungzang chu chu a hit thla zui seng seng a keipawh chu ka bang bik lo. Maimichhing chungin ka kuah ngawih ngawih a ka țap chhuak leh hawk țhin.



Heihi an hmuh ka phalloh chhan a ni, keipawn khati taka ka ngai a nih chuan an ni phei chuan an ngai lehzual dawn lutuk ringawt. Sawmtea, Sawmtea'n hmu ve ngat phei se chuan a bulah kal a ngen in ka ring hial a ni, nu zak hnuaia la mu a la khawsa rual lek an ni, nu an mamawh dawn tih ka hai lo.



Mahse ka nau te hi ka hlat a an awm ka phal tlat lo a tin ni, mi neih ang neih a rual pawh an pawl ve theih na chu a ni ngei alawm mahse ka thisen zawmpui te hi ka lak ațanga an awm hran ka phallo.



"Bawihte, a nu bula kal chu i duh zawk tak tak em...?" Amah chu nawr hla hlek in a ban buk ve ve ah chuan ka dawm a, a lu a thing mat mat a.



"Ka duh lo, a nu chuan min kalsan zela nang chuan min kalsan ve ngai lova chuvang chuan i bulah ka awm duh zawk. Mahse a u, anu kha ka hmu leh chak eee vawikhat chauh," a men lehnghal par a khawngaih zetin ka en ta ringawt. Ka bulah awm a duh mahse nu ngai rual lek ala nihna ang in ka nu chu a ngaiin vawikhat chauh hmuh leh a chakna chuan ka awm chhung a ti na veng veng.



"Khavang kha ami ka biak che pawh a min chhan loh va khumah mu a ilo țah nachhan...?" Ti a ka zawh chuan a bu nghat nghat a, a mittui a biang a luang chu hruk sak zung zung in a chalah chuan ka fawh sak vang vang.



"Ka tihpalh bawihte, in mamawh ber ka pe thei silo che u a. Awt nei reng reng a in hringnun ka hman tir cheu avangin ka tihpalh takzet," a chal a hmui nghat reng chung chuan ka phun sap sap a. Ka nghawngah chuan nghet zet in min rawn kuah a a lu ah chuan ka tuai sak vang vang thung.



Tun ațang chuan an pahnih hian a hma ai zawngin ka duat ang a, ka hlawh lak hmasak ber hunah pawh a tam emaw a tlem emaw an awh em em ve ve ka lei sak ang. An mamawh 'nu' pe theilo mah ila, hlimna erawh ka pe thei a chu erawh chu ka thih dawn thleng pawn ka pe thei ngei ang.



Ka kalsan ve ngai lovang a, an kiangah an hlimna ni turin ka mawng ka hung ang a ka kut a chelh in ka kuangkuah ang a an nunna humhim tu ni thei lo mah ila theihtawpin ka veng ang a țha takin ka enkawl puitling ngei bawk ang.



A țap muhil ta tih chuan keipawh chu room ațang chhuak in choka lamah chuan ka phei a dar 4 a rik tawh avang chuan chawhchhum chu siam sawk sawk in alu ka lei thar chu kan turin ka la chhuak a.



Engtin nge a fate ngei pawh khatiang hmang khan a thlem theih zawk...? A rapthlak takzet a ni, ka nau ten an mamawh in an ngai em em a mahse a ni erawh chuan a thil neih hmang a an awt tih a hriat avangin chumi hmang chuan thlem in a bula hruai a tum ania.



Tu nu in nge fate a bula an awm theih nana an awh leh sum hma theh a thlem chhuak ngai..? Ka vawikhat hriatna a nih avangin mak ka tiin rapthlak ka ti takzet bawk. Ka hua in ka nau te chung a a thil lo tih avang chuan ka thinlung a ti na a ka hmu leh a nih ngat chuan ka țawngkam eng emaw tak chu a dawng mawlh ang.



Zanah chuan Kimkima chu Sawmtea tak ngial pawn a be țawng zo mang lova, ngawi rengin lehkha a zir mawlh mawlh a, a nau in a biak pawn a ngawi reng a a rilru tur ka hriatthiam êm avang chuan Sawmtea chu a u a nawm vak loh thu hrilh in sitting room lamah ka awm pui ta ngawt.



"Mamte, vawiina in inkhelh naah mi tu emaw in lo biak che an tum em..? I hmuh khat deuhin," ka nu in hmuh alo tum ve ka hlauh luat ah chuan ka zawt a, an ngawih ve deuh vang vang hnu chuan min rawn en a.



"Au Felfela khan miin an hmu duh che a lo ti a mahse ka kal miah lo, eee Mami, goal vengtu ka nia maw ka chhuah miah lo," a rawn tih zawm zat, a vei zui lo hle aniang thildang a rawn sawi zawm tak daih danah.



"Ummm, țha deuh deuh a ven zel tur. Chuan maw Mamte, miin hmuh che an lo tum chuan duh miah loh tur aw," ka tih chuan bu ve nghat nghat in a lehkha ziah lai chu a ziah zawm a, kei erawh ka thaw chhuak ham ham.



Sawmtea hian ka nu a hmu a nih ngat chuan a awmdan tur ka sawi mai thei lo ka chelh zawh loh ka hlau va tih luihna hmang a chelh a ngaih ka hlau takzet, ka lak ațanga an la hrang a nih chuan ka nung zo lovang.



Dar 8 rik dawnah chuan u Mza a rawn lang teh hlawl, "i van vang," ka lo ti nghal hlak a. Ka țhutna bula rawn țhutthlak pah chuan, "nia... office lamah kan in daih thei lova ka rawn lang theilo alawm mawle," a ti ve sup.



"A nih chu, i reh lutuk a ka lo sawi mai mai," ka ti hak a.



"Chu min lo ngai tawh a ni maw...?" Ka biangah a rawn piai zeuh, hmui zum pat in amah chu ka en a, "ngai lam che pawh a ni lo, ilo lan loh chuan a reh alawm," ka ti ve niah niah.



"Ka ngai che tih ve mai âwm che a harsat loh nen," a hnungzângah ka chûm zui țawk a, a nui zui hawk hawk.



"I hna enge a an...? Buaina te i nei em...?" A rawn ti sup a.



"Nei love ka rin ai ka thawk thei ve reuh lutuk, ka zei vak loh ka ring kha ania mahse ka rin ai ka lo ti thei. Thil chu tih tam poh leh kan lo thiam ve zel a nih hi," alo bu nghut nghut a, Sawmtea thil ziak mek chu a lu ah tuai sak zui zeuh vin, "Vawiin tlaiah i inkhel em le..?" Tiin a zawt nghal zat a.



"Ummm... ihmaw u Mz, goal ka veng amaw ka chhuah miah lo," thil a tih țhat hi chuan sawi nuam a tiin a zawt tu apiang hnenah sawi a tum mai țhin.



"Iva thiam tawh ve, nakinah min zirtir ve rawh aw kei chu ka chhuah zela ka thiam ve lo," u Mza chuan a ti leh a, "ummm.. nakinah ka zirtir ve ang che," pakhat lah in alo ti sam êt a. U Mza hian a mood tih on na tur sawi tur hi a hre thei riau va chuvang chuan Sawmtea pawh hian a ngaina viau zel țhin.



"Thingpui in rawh aw, kan chhuang ang," tiin ka tho chhuak zui nghal a, thingpui bel chu sil thuak thuak in ka chhuang zui a.



Ka nghah chhung chuan va țhu leh in u Mza hmel lo thutak deuh run chu ka en leh zawk țhin a, "tinge...? I rilru kap tu a awm em ni..?" Tiin ka zawt nghal vat.



"Awm love, aaaa... ti ila hrilh tur che a ni em ka hrelo ka huphurh khawp mai," a kut chu a hmer deuh ang nawk nawk a en pawh min en lo chuan hmalam a melh run a.



"Sawi la ka hriat ve chi te a nih chuan puih theihna che ka nei mial maithei asin," ka ti deuh var a, nui suk in min rawn en a.



"Ngaihthlak i inhuam chiah maw....? I hriat hunah min be duh tawh lo mai nga," a mit ko a rawn san ak a, ka nui hak, "i ho em mai ah, sawi mai mai rawh ka lo ngaithla ang sawi rawh le," tiin ka beng chu ka dawh hnai a.



"I tih tlat te chuan le, umm... englo ania i laka ka rilru put hmang....," a ti chiah thingpui a rawn so liam, "lawk aw thingpui a so ka va thli lawk ang," tiin ka tlan phei a, gas chu off sawk sawk in thingpui chu ka thli chhuak a.



"Bawihte i duh ve em..?" Kimkima chu ka zawt vat a mahse a lu a thing mai thung.



"Kha le, chuan sawi zawm rawh," thingpui pek pah chuan a bulah ka țhu thla a, a nui ri suk a, "ngailo mai rawh se nidangah ni mai a pawimawh vak chuang lova," a rawn tih chuan zawh buai ka tum hran lo.



"A nih pi Hminghluni number i nei em...?" Inthlahrung tak chuan ka zawt a, thingpui dawt khalh pah chuan alo bu nghat, "i phone ațangin ka lo be mai ka phone ah chuan a call na tur ka nei lova," ka ti leh sap a.



"Lutuk e, i awmdan kha i sim dawn chuan," a rawn ti hluk.



"Ka eng awmdan maw...?" Ka ti hû a.



"Inthlahrung vel taka awm kha a ngailo. Ka hnen ațanga duh ilo nei ve a min dil dawn a nih chuan inthlahrun kha a ngailo hre reng tawh rawh," a phone min rawn pek pah chuan a ti leh nghut a, nui var var bu nghat in pi Hminghluni number chu ka call nghal a.



A lak rual chuan Fibby ka biak theih leh theih loh ka zawt a, a pek rual chuan ka lo nghak ve ran bawk.



"Aw Mira, enge ni ta...? Vawiin khan min hawsan daih lehnghal a min lo nghak rawh ka tih kha," a rawn ti nghal hlak hlak.



"Nia, ka hmanhmawh lutuk a ka lo haw san tawp che a nih kha. A nih Fibby, naktuk hi ka lo kal theih loh hmel a Manager min lo hrilh sak thei ang em...?" Ka ti zâwi sap.



"Ehe tinge..? I damlo tak tak ami nang hi..?" A rawn au deuh tuarh a nui hak hak in ka lu ka thing nghat, "ka țha vek alawm na engmah ka neilo. Tihtur pawimawh ka neih vang zawk ania, ka thawhna la reilo viau mahse a pawimawh lutuk a min lo sawisak thei ang em...?" Ka ti leh sap, ka inthlahrung takzet bawk.



"Lutuk lutuk, Kima bulah chuan ka lo sawi sak ang che. Mahse Mira, enge i tih dawn min hrilh ve thei ang em..?" A inthlahrung tih a aw ațang chuan ka hre thei, ka mal chu chum deuh dat dat in ka nui deuh sak a.



"Ka lo kal leh hunah ka hrilh ang che, a nih Fibby mi phone ka hmang bawk sia ka dah ang aw ka lawm lutuk," ka tih chuan a ni pawn thildang sawi leh luam in phone chu a dah hmasa ta zawk a.



"Kha le," tiin phone chu ka pe a.



"Tinge i kal dawn loh a enge i tihtur chu..?" A phone rawn lak pah chuan a ti sup a.



"Hei, an sikulah hian kal ka ngai a chuvang mai mai chu mawle, ka va hrilh hman hmel si loh va," ka tih chuan a bu ve leh nghut nghut tho.



Naktukah ka nu in hmuh alo tum leh thei a chuvang chuan ven ka duh, a bikin Sawmtea a lakah hian. Sawmtea duhzawng a sawi fuh a nih vaih chuan i he lovin Sawmtea hian a zui duh ngei ngei dawn tih ka hria chutiang chu ka thlen tir thei lo.



An unau a an ban hma chuan an sikul kawtah ka nghak dawn a ni tawp, ka hruai anga an ban hun thleng ka nghak bawk ang.



Zingah chuan an sikul thleng ka thlah a, reilote inah haw leh lawk in dar 12 velah chuan ka chho leh a an sikul bulah țhutna awm ah chuan ka nghak rân a. An lo ban veleh pawh a ka awmna a lo kal nghal turin ka awmna pawh ka hrilh sa thlap tawh.



Sawmtea te an ban a hun țep tawh tih ah chuan ka hawikual deuh sek tawh a, mahse tumah ka hmu lo. An rawn ban chuan ka sawi ang ngeiin ka awmna lamah alo kal nghal a Kimkima kan nghah lawk a ngaih thu ka sawi chuan bu ve nghat in khawiah mah kal lo tur chuan ka hrilh nghal thlap bawk.



Vanneihthlak takin ka ti dawn nge ka hrelo Kimkima te an lo ban thleng chuan tumah an rawn lang lova, rilru hahdam ru huai chung chuan an pahnih chuan ka hruai haw a Kimkima pawh nizan ang em em chuan ni tawh lovin a țawng ve deuh barh barh tawh a chu chu ka hmuh chuan ka nui sak bawk.



Kan haw hma bawk a tiin ka len kual pui leh vela nuam an ti lutuk chu kal nawn leh an rawt deuh sek a an hlim lutuk tih hriat zeta an nui khêk tuarh tuarh chu hmuhnawm ti zetin ka en reng bawk.



A tuk zingah chuan an insiam ruala in siam peih ve thlap in an sikul kal tur ka thlah hnu chuan Hotel lam pan in ke in ka kal leh hnak hnak a.



Feh tur ho feh motor nghak ho in min hmuh chuan min lo be luam a kei a pawh chu ka han tawi khawmuang leh rih. Ka tellova feh an peih loh zia a der a an sawina chu ka nuih pui hak hak a, ka feh pui țhinte vek an nih avangin keipawh chuan an ruala feh ve leh chu ka chak kher mai.



Hotel ka thlen chuan thleng an lo la awm vak lo tih hriat zetin motor ding pawh alo la tlem a, Hotel chhunga ka luh hnu chuan registration-ah chuan ka thlen dar zat leh hming vel chu ka ziak leh nawk nawk a.



Ka locker awmna lam pan a kal in zai rat rat chung chuan ka inthlak sawk sawk a. Room kawngkhar rawn ri khep ah chuan midang an lo kal ni mai a ngaiin ka inthlak zawm mawlh mawlh a.



Mahse, "bawihte," ti a min ko tu an awm rual chuan ka kawr ka la tur chu ka tawp dat. Darthlalang a ka en chu ka hnungah ka nu hi alo ding reng a mahse awm lo ang hmak a ngaiin ka inthlak zawm mawlh mawlh.



"In be lawk ila," a rawn tih chuan ka chhang lo, ka name plate chu la in ka kawr hma ah chuan ka bel mawlh mawlh a, "bawihte ka thusawi hi ngaithla hram teh," ka la chhang chuang lo.



Ka locker chu khar in ka kalh sawk sawk a, chahbi ak a amah hmu lo ang hmak a kal ka tum chu ka banah chuan a rawn vuan chawt a thing thla nghal hnawk in amah hlat thei ang ber chuan ka ding a.



"Ka be peih lo che tih hi ka awmdan ațang hian i hmu thiam lovem ni..?" Ka ti fiah fak, a hmai a kut pahnih a tuai puat in min rawn en a, a hmel chu a mangan hmel ka sawi thiam lo a mit te chu a sen vek.



"Mahse ka thusawi tal chu i ngaithla ang tiraw...?" A ti leh a, chhang lo chuan amah ka en ran thung. Thaw hak a min rawn khawih leh a tum chu ka lo tawlh sawn a âwm sep dawrh khawpin a thaw chhuak hawk.



"I nau te pahnih hi ka bulah hruai ka..." ka sa nghal phat, "ka nau te pahnih chungchang hi sawi ve hlek suh...!" A sawi zawh hma chuan ka ti nghal țhat...!!!



"Ka nau te pahnih, ka nau te pahnih khawngaihthlak zet hi kha i kâ khan sawi ve hlek suh. Kan nu ini lova kan chungchang sawi thei ini lo," ka ti leh tawn tawn, "bawihte," ti a ka ban bul a rawn dawmna chu ka vai per nghal nawlh, amah pawh chu a inher sawk a.



"Khati pawh khan min ko tawh lo la, khawih pawh min khawih tawh suh. Ka hua che, ka haw ngawih ngawih che tih i hria em..? Niminah pawh Kimkima lo hmu in i sum hmang a lo thlem chhuah i tum a engtin nge i ngam zawk..? I sum kha kan mamawh lo. Nang hian ka nau mit ațang mittui i luan thlak tir asin, vawikhat mah ka nau te pahnih hi lo hmuh tum tawh suh," ka ti leh tawn tawn a, ka thinrim lutuk chu ka sa chhuak vek.



"Ka fa te in ni a, ka duh duh hunah ka hmu thei che u," a rawn ti ve țhat.



"A teuh lo...!! I fate kan ni lo kan ni lo. I hre tawh lovem ni..? I duh lova i kalsan hnu kan nih hi fate ai pawh a i thlan sum leh pai, nawmsakna chhungkaw puitling leh hausa i nei tawh a ni lawm ni keini, keini unau hnawm bawm a i paih tawh hi engvanga chhar leh a tuai fai leh tum nge inih..? I mamawh i neih kha ila duhtawk lo cheu em ni...?" Ka ti tuarh...!!!



"Duh lova i paih tawh te kan ni tih hi hre reng rawh, min duh lova min paih tu chu kan tan a thi tawh. Chuvang chuan ka nau te rawn hmuh tum tawh suh, zalen takin min awm tir rawh. Nangpawn, sum leh pai, chhungkaw țha tak i nei alawm hlim rawh, i nun chu chen ta che. Nangmah vanga ka nau mittui a tla leh a nih chuan ka ngaihdamna hi i tan a inhawng ve thei ngaiin ka ring lo," a mita en reng chunga ti fiah fak in ka kalsawn a.



"Ding rawh tah khan..," a rawn tih țhat rual chuan ka ding dat, nui sak a ka mit chu tuai thuak in ka hawi let a.



"Min hrelo ang in awm rawh chu chu ka duh. I fanu ka ni lova ka nu pawh ini bawk hek lo, i hmelhriat loh ang in min en la kei pawn ka en ang che. Chuti a nih loh chuan i pasal leh fanau te hnenah hian i fanu ka ni tih ka hrilh anga hmai fai veng in i mualpho dah ang e," ti sehchilh nak in kawngkhar chu ka hawng a trolley awmna lam chu ka pan phei nghal hlawk hlawk bawk.



Trolley-ah chuan ka mamawh tur khung khawm sawk sawk in ka board ken tur an lo peih fel sa thlap tawh chu check lem hlei lo chuan ka la lawk a lift lam pan chuan Trolley chu ka nawr nghal nawk nawk.



Ngawi rengin ka chuang chho mawp mawp a, ka room tihfai hmasak ber tur number chu en in chu lam pan chuan ka kal a, room kawt ka thlen chuan bell chu hmet nawk nawk in min chhang tu an awm loh avang chuan an chhuak a nih ring in ka lut risk nghal tawp.



Ka rin angin tumah an lo awm lova room erawh a hnawk takzet thung.



Chhuata thil kawr tla vel chu chhar sawk sawk in ka dustbin ken ah chuan ka khung sawk sawk a ka khung zo chiah tih a bathroom kawngka a rawn rik khep takah chuan rang zet hian ka inher a chutah kan Boss chu towel var chauh vengin kawr ha lovin alo chhuak teu mai.



"Oh ka tihpalh, bell ka hmet a tuman min chhang lova ka rawn lut tawp," ka kun nghal ngal a, ka ngaihtuahna kawm a ka lo kal nasa lutuk avangin nimina a room hman a ni tih reng ka lo ngaihtuah pha tawh lo.



"A pawilo, tih zawm rawh," a rawn tih sup takah chuan tawi khawmuang lo chuan ka tih zawm ve lehnghal mawlh mawlh a.



Khum ka thleh fel mawlh mawlh lai chuan ka phone chu a rawn ri ve teh mial a mahse chhang lo chuan khum chu ka nawt mar nghal nawk nawk.



"Tinge niminah ilo kal loh...?" Ka chhang lo, ka tih zawm mawlh mawlh ringawt a, țawng chakna ka nei hlawllo.



"Zawhna ka zawt che," a ti bul vut, thaw hawk in ka chawl dat a.



"Mimal harsatna," ka ti ringawt, a duh khawp lo nge ni a rum nghut a.



"Khatia Fibby kal tlang a inhrilh kha ka duh hauh lo, i kal lo dawn a nih chuan keimah min hrilh tur a ni. I attendance in a pawh hniam che chuan thleng tur i hriat tawh kha," a rawn ti nghut.



"Ka hria," ka lo ti ve nghat a, ka thinrim ala reh lo thinrim ka la chak ngawih ngawih, ka dawh theih loh thleng a min bia a nih chuan ka vin lovang tih pawh ka sawi theilo.



"Kha kha min chhan dan tur a ni hauh lo," ka mit ka chhing vak, ka insehru ngawt ngawt a ka khum tihfaina ata chu ding chhuak in, "ka tihpalh," ka ti sehchilh nak.



"Sairinmawi, zah lo taka min be tur ini hauh lo. Tunge ka nih i hria em..? I boss ka nih hi khatiang khan zah lo takin min be reng reng suh...!" A rawn ti deuh țhawt...!!!



"Țhingțhi a i ke vuan chung in ngaihdam ka dil a che. E nilo, bawkkhup chungin ngaihdam ka dil zawk a che," ti leh kher in chhuat nawhna tur chu ka siam nghal sawk sawk a.



"Nang hian min zahna pakhat mah i nei hauh lo. Naktuk ațang chuan ka hnuaiah i thawk ang hre rawh...!!! Ka office chhungah ngei i thawk dawn tih in hre tawp rawh...!!!" Min rawn kawih her sawk rual chuan ka lo thinrim sa tawh nen ka sa leh ta nghal phat.



"Ka chung a duh duh a thil tikual tur leh thu min pe reng te, ka awmdan leh dan lo sawi reng tur hian tunge inih...? Ka nun a thuneitu ini em ni..? Ka chunga roreltu i ni em ni..? Nilo, hna ka thawh loh pawn thu min pe reng a ka kham, ka hne lutuk. Ka thaw a ipik hluah hluah, engatinge..? Chutiang khatiang, ka țawng ngaithla rawh, ka thusawi min ngaihthlak sak rawh in tih reng hlawm a hahdam tak hian min awm tir ve teh u ka hah tawh, ka na tawk tawh a tawk tawh lutuk," a tawp lam chu ka au tawn tawn a ka biangah lah chuan ka mittui a rawn luang thla teivet lehnghal.



"Hey.... ngatinge..? I țha em..?" Ka biangah a rawn dawm vat, a mita ka en chu min ngaihtuahna ni awm tak rawn lang chu a der a ni tih ka chiang si.



"Ka țha, i ngaihtuah ka ngailo min kalsan rawh...!!!" A kut chu ka vai per nghal nawlh, chhuat nawhna chu ban in ka tawlh sawn a.



"I ngaihsakna der dawn kha ka mamawh lova min ngaihtuah ang te khan lang suh, nakin lawk a min hmuhsit lehna tur tho a ni, ka dinhmun hian i hmuhsit a zir êm si a," nui hak in chhuat chu ka nawt a. Ka hah a ni ka hah takzet.



Ka lam rawn pan a min rawn khawih a tum chu a kut chu vai per leh nawlh in amah chu ka en chho ran a, "min khawih suh, i ngaihtuah ka ngailo. Ka awm ang hian min en liam la ka hnathawh hi i duh khawp lo a nih chuan sawisel rawh, tuna ka tih danah che te khan i duh leh min ban la a pawi ka ti lo, kha nu nena in hnamhnawih mihring apiang hnaih ka duh lo tumah...!!!!!!!!... Hnaih ka duh lo..!!!!!" ka thinrim ka insum zo tawh lo chuan ka ti fak fak a, kum tam tak ka lo up tawh kha vawiinni ngei hian a puak chhuak ni hian ka hre mai.



Ka la duhtawk theilo, ka duh ang ka la sawi thei lova thinrimna hi ka kawchhungah hian a in hlum let tawp tawp in ka hria, a sa hut hut a alh tur ang mai ni hian ka hria.



"I ban ka phal hauh lo..!!! " a ti bul vut a, kei erawh ka lo nui hak thung.



"Hre rawh..!!! I bang hauh lovang, naktuk ațang ka bulah hna i thawk ang lo in puahchah ang che," a ti bul leh vut a, kei erawh mi â ang maiin ka lo nui heu a. A chhan pawh ka ât êm vang a ni. He hna thawk tura ka lo in barh luh ve avanga â ka in tih êm vang zawk a ni.



Mi hnuaiah, an sal ang maia awm turin leh an hmuhsitna tinreng dawng turin ka lo in tu lut reng a lo ni, ka â ka in ti takzet.

♡♡♡



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)