AMANTE (Ch - 24) Last Chapter

Episode kal lai dah luhna

Moderator: writers

Irene H muankimi
Posts: 101
Joined: April 22nd, 2021, 7:12 pm

AMANTE (Ch - 24) Last Chapter

Unread post by Irene H muankimi » May 20th, 2022, 10:22 am

Chapter 23 (Last Chapter)





Damdawiin atanga kan haw chuan khua pawh alo chawhnu ruih tawh. "Ipa chu engtik atang chiah maw a dam loh" ka inluah kan thlen chuan ka ti tha leh. Office ah khan Amit-a khan sawi ve nual mahse,ka hre Chiang mang tlat lo.





"A rei ve leh tawh,a inkhawm kal tur a tlu suala,a nerve a sawh khawlo deuh a nih kha. A hnuah a kal a function tha lo tih kan hre leh a" tiin a pa nat dan vel chu a sawi.





"Nangmah nilo midang a kal milh in awmlo em ni?" Ka tih chuan ka ngaihtuahna hrethiam ni awm takin ka kut chu rawn vuanin lungngai lo turin min hrilh pah zeuh.





Mahse,tu nge ka dinhmuna ding lungngailo awm ang ni? Kei phei chu lungngaihna mai nilo hlauhna nasa lutukin min luhkhung mek a ni si a. Thil ka hriat fuh loh avangin kum tamtak ka hmuh tawh loh hnuah ka hmu leh in kan inkar pawn ngai a awh ve chauh a ni a. Mahse,ni reilo te hnuah ka mipa hmangaih chu ka zai a ngai dawnin a nunna chu ka kutah a awm dawn a ni si a. Thil pakhat lek pawh lo tisual palh ta ila...nilo,nunna hi awlsam taka hlauh theih a nih zia hepa hian a hre lo a ni.





Ka ina zanriah a ei zawh hnuah an thlenna Hotel lamah min let san a. Naktukah Hospital ah an rawn lut a nga,a pa dinhmun a zirin a tukah inzaina chu kan tan nghal mai dawn a ni. A nerve lam a chiangkuang theih loh avangin a kal thlak pawh an lo ti lawk ngamlo alo ni a. Tunah erawh a hlauhawm lutuk tawh lo ni tur a ni. Inzai an duh dan a.




Atukah chuan Mesak-a te chu an chhungkua in Hospital ah an rawn kal a. Kha hmeichhia a bialnu emaw ka tih Nurse pawh kha a rawn tel ve. Nu Biaki ka hmuh chuan hmana thil thlengte kha hrechhuak thar lehin ka zah deuh riau a,a mitah ka melh tha ngamlo.





"Dr. Amit-a pui tu tur i ni tih ka lo hria a." Tia min rawn biakte chuan inthlahrung tak hian ka lo chhang a. " I chunga mawilo taka ka lo khawsak thinna te kha i vei renglo ang chu tiraw?" A rawn tih chuan hawi a deuh hu in Mesak-a ka en a,alo nui huk.





"Ka nu chu i chunga a thinrimna te inzai laiin ka chungah a hringthlak i hlau deuh a niawm?" Nui huah huaha tiin ka darah a rawn kuaha a nu chu a fapa in a fiamna avang chuan a meng nur nang a.





"Chutiang pawn ka tih loh kha,min ngaihdam tawh leh tawh loh ka hre duh a ni ve mai a" a tih hmuk chuan hmanlai hun te chu ka theihnghilh vek tawh thu in ka lo chhang.





Tichuan inzaina chu kan tan a. Mesak-a pa chu Senior Amit-a'n a khawih dawna kei chu Mesak-a zai tu tur ka ni. Ti hian han ngaihtuah teh u in mi hmangaih em em taksa chemte hriam tak maia in zai lai leh a taksa atanga a thisen chhuakte leh a taksa pek in la chhuak tur lai nen. Ka mitthla ah "ka hmangaih che" tia Mesak-a'n a mit a chhin hma chiaha a sawi lai kha a cham renga rilru tawngtaina nen chu inzai chu ka hmachhawn tak meuh meuh a ni.





Tluang takin inzai kan zo ti mah ila Mesak-a chu a harh har ka tiin,thil chu a nihdan pangngailo ang tlata kal hian ka hria a. Hnimhlum te chuan a thawk rei ka tiin ka thu mai mai theilo chu ka tel kual sek.





Mawitei chuan "a harh ala hunlo hrim hrim alawm,i hlauthawng lutuk a nih kha" tiin min hnem ve ngial a tum thin mahse,ka hlauhna chuan min kiansan thei chuanglo.





Chutianga a harh hun chang reng ta na na chu tlailam 6:30 pm velah Mesak-a chu a rawn harha ka lawm lutuk chuan ka zaina lam reng reng ngaihtuah tawh lovin ka lo kuah pek a nih kha,a te thata a nu in ka hnungah min chum dawp.





"I a em ni?" Min tih chuan zak chem chem tak ka ni.Zawite in 'ka tihpalh' ka ti sup a, Mesak-a leh Mawitei an lo nui ruh ruh.





"Puitling ve uai tawh si,chutah Doctor ila ni zui" a tih chhunzawm leh phei chuan khuka khuk ral daih ania ka duh.





"A pawilo, nu na ka nei hleinem" ka thlavang hauh tum taka Mesak-a rawn tawng pawh chu , "na i tih vangin i te that kha lo ngawi mai mai rawh" alo ti let zek a. Chutah uluk zet hian min rawn en a, " ka fapa hi duat lovin a rilru han tih nat sak na teh ka mo i nih ka phal leh tawh ngailo ang" a rawn ti charh charha kei ka lo meng kawk.





"Ma..maw i ..i mo maw?" Ka ti bah nak a.




"Tikhan lo awm teh u,i pa ka va ngaihven a nge" tiin ka zawhna pawh chhang tawh lemlo hian a chhuak zui daiha a hnungah Mawitei khan a zui ve nghal. Khuma Mesak-a lo nui ruh ruh chu rum zet hian ka va melh a.





"I nu hi a heti reng thin em ni?" Ka tih chuan a kut hum a hmuia chuktuah chunga nuih in sum chung hian lu a thing mat mat. "Kan inneih hunah in dang daih mai ila,i nu kha nitin ka hmuh reng chuan ka thih vat theih ka ring" zawi zeta thutna a thut thlak paha ka tih chuan alo nui chhuak haka a pum chu na ati leh si nge a then leh chak chaka rang zetin ka pan.




"Fapa mal ka nih hi kan in dan daih ten" a tih chuan dik ka ti ve tho bawk si. Mahse,a nu kha nitin ka hmu hreh e,nakinah ka la sawi pui tha leh tho ang.

.........


"Amak e,ka rin loh berin Dan khatna in pasal i nei dawn ania" Lalruatpuia'n a rawn tih chuan ka melh nghek a. Mahse, tu in nge kei Vanramneihsangi hian Biakin hawng ngeiin pasal ka nei dawn tih hi tu nge awlsam taka pawm thei reng reng ang ni?




Vawitamtak khawtlang hruaitu te zilh tawk tawh ka ni a. Chutah mahni makpa te pawh zak maplo khan ka kawp duh ania. Keipawh hian ka nun dan thin ka ngaihtuah letin 'eng tin nge ka lo ngam?' ka in ti ve hial thin.





"I mawi takzet" ka bulah rawn dingin darthlalanga ka thla chu a en a hmela lunglenna lo lang chu thup tum viau mah se,a theilo chu a ni e.





"I ngai a ni tiraw?" Ka ti sup chuan a nui mai a,sawilo mahse Sangkimi kha a ngai takzet tih ka hria. "Keipawn ka ngai lutuk vawiin hian amah tluka min dinpui tu tura duh ka neilo" tiin ka mittui lo hnam chu ka kut tangin ka hru zeuh.





"Ani pawn van atang alo lawmpui viau che in ka ring" ti supin ka khumah ava thu a. " Nangpawh a chhuang ngawt ang che" a dara vuanin a bulah ka va thu a,a mittui far chunga min rawn en in..




"Ti nge ka kianga a awm lai khan tun ang hian ka nun ka lo hman tawh loh le" inchhirna mitmenga min en ngawt ngawtin a in sehruh tung a,ka kuah bet vat.




"Kal tawh ang u" ring zeta rawn tiin Puitei chu kawngka bulah keini thian dun lo in kuah min hmuh chuan a ding nghal chawt a.





" A chak ber chu Biakin hawng ngeia kei nena inneih kha a ni thin asin" a tih phei chuan ka kuah nghet tawh lutuk. Hmun hrang ve ve ah awmin kan nun sual kalsan tumin harsatna mahni in kan paltlang a. Kei aiin ka thianpa hian a tuar nasa tih ka hria.




Ani phei chu kha fa paitu hmeichhia khan OD in a boral san a. Tin a fapa kha nikum mai khan a enkawl turin a hnenah a awm tira,ka thianpa mahni pawh in enkawl zolo ka lo tih thin khan kum naupangte atang pa dinhmun a chelha tunah phei chuan a fapa nen a rawngbawlna kawngah an in zui ve rak rak zel a.




ATC atang a zir chhuah hnuah rawngbawlna a neih chhunzawm zela nakin lawkah a tum ber Pastor pawh ala nih theih ngei ka beisei pui hle a ni.




Dar a rik tak rang rangah chuan Lalruatpuia'n car a khala Biakin lam chu kan pan ve ta. Ka beisei ai tam kan inneih min lawmpui turin mi an rawn kal tama,khawtlang tana mi hnawksak ka nih laite kha an theihnghilh ta vek emaw tih turin a tu pawh mai chuan hmel hlim min hmuhin min lawmpui thu an sawi siam siam hlawm a.




Kan inneih thutiam kan chham lai te chuan thu mal tin mai chu uluk leh fimkhur takin ka chhama,he ka thutiam hi kumkhua a ka pasal laka ka vawn nun reng tawh tur anih avangin engkim mai chu Chiang taka hriat vek ka duh a ni.





Ka bulah chuan hmuh theih loh eng emaw min uap tlattu awmin ka hria a, ka bengah 'ka lawmpui lutuk che' ti ri hre tlatin ka in hre bawk . Ka nui nghal ver ver a,chutia ka nui chu ka pasal Mesak Lalrambuatsaiha chuan min nuihin ka chalah a rawn fawp zeuh a.


..........


Pathian malsawmna kan ti dawn nge kan inneih atanga thla hnihna ah ka ruaklo tih kan hre nghal a. Ka hna ka la zawmlo bawk nen chutia ka rai leh nghal si avang chuan Amit-a te Hospital atang chuan ka bang ta ringawt mai a.





Mizoram lamah ka pum a len hma tal ka thawk ang ka tih lahin ka nu(Mesak-a nu) leh amah Mesak-a chuan an phal ta tlat lova. Nitin ka nu nen chuan kan in awm ta chawta mah se,kan inneih hmaa a mizia ka lo rin loh ang deuh mize dang alo nei a.




Keipawn ka duh ai hmain ka nel,tawngkam nem a nei tlem hle a. A thil vei leh sawi duh te chu thup buai sise lovin a sawi mai zel a,han vin khur khur thin mahse a thinrim vang erawh a ni leh hauhlo thung. Chu a mizia ka hriatchian tawh em avang chuan kei pawn a hma ang em em khan ka hlau ta lova thinrim si lova kan han in chhang tak tak thin phei hi chu ka pa(Mesak-a pa) pawn 'Grace-i hi kan mo zawk ni awm a ni,nang leh Kuri hi chu nufa diktak in ang' ka nu bulah a tih phah hial thin.






"Kuri" a vawithum nana ka nu min kohna pawh chu hrelo derin ka pasal ka bula mu chu ka tlawh pawpa a rum tiah tiah. Chutih rual chiahin ka nu a rawn au leh a,ka va han ning tak. Zingtin tawngtai tura a kal apiangin min hruai tel ve a tum ziaha kei zing thawh harsa ti em em hian ka tlin nganglo a ni.




"Me..sak.." fan ruiha ka tih chuan a che sat sata a hnuah kan room pawnlamah chhuakin a nu nen chuan eng nge an sawi hre pha chiah silo in an tawng ri chu ka hria a. Mut that leh ka tum lai takin "Lo tho rawh i pasal sawi vang hian ka hruai loh phah dawn lo che" a aw atang chuan kan khum bul chiahah a ding tih ka hre thei.





Muangchangin ka menga ka nu chuan min lo melh run mai. Nuih tlawn vakin "khatin ti ziah suh zing tawngtai kher kher hi chu i thulh ka phallo" a ti khauh far a.





"Nu tukin chauh" tia ka ngen pawn kan khum bulah dingin min nghak ran a. Kan room kawngka a ding ka pasal chu rum zet hian ka va melh, a beng pawtin hmui phun hian 'sorry' a rawn ti a,ka va han ngei mai mai tak. Vawikhat chauh pawh chhuanlam min siam sak theilo ania.





Ka nu in min phut tlat takah chuan mut khamlo leh zawi zetin Biakin lamah kan in zui a. Thalai tumah zing tawngtai inkhawm ah an kal ngai tawp silo,pitar leh putar deuh vek an kal thin a. Ti nge maw ka nu hian min hruai ve ziah mai ni.





Grace-i pawh hruai a tum thin a,ani erawh a sawm chhuak zo tha manglo. Mo ka nih avangin khatia min sawm khan ka lo hnial ngamlo a mahse,hetiang hian min hruai reng dawn tih lo hria ila chuan a tir atang khan ka lo hnial tur hi ania.





Ka tawngtai chuan ka pasal leh ka fa pai mek tan ka dil leh hmasa ber a. Mak tak maiin tawngtai tura kal hi peihlo viau thin mah ila hetia ka han tawngtaia Pathian hnena ka in kawl tir chiah erawh hi chuan ka hahdam huaia ka nu ka zui hi inchhirna ka nei ngailo. Mahse,a tuk zingah a ngai te in zingthawh ka peih loh vang bawkin ka hreh leh thin tho😂





Kan haw kawngah vaipa'n paratha kawng sir, a dawrte a alo kang sar sar lai ka hmuh chuan ka nu bulah lei ka ngena 'inah thingpui leh cake kan nei reng alawm' tia min chhan pawn ka ngen tlat a. Naupangchhia ang mai tih pahin vaipa thingpui leh Paratha chu min lei leh ta tho a.




"A tui em? Ei muang deuh rawh" tiin kal paha ka thil ei chu min nuih leh hak hak thin.





In kan thlen chuan a tih dan ngaite in ka pasal chuan ka tuilum in tur leh ka nu in turin thingpui alo siam peih diam tawh a. Nau ka pai hnu hian ka nu nen hian min duat zuala ka ei leh in tur min en fel pui vekin exercise pawh min lak pui taima khawp mai.





"Vaipa thingpui lum ka lo in tawha ka in peih tawh lo" ka tih chuan lawmlo tak hian min melh run a. Tuna a men ang chiah hian ka pregnancy test kit a ka rai tih line pahnih in rin, a nau in a hrilhfiah khan min melh tawh.





Ani chuan khatia line pahnih in rin kha ka puma naute awm zat an ni emaw tiin alo lawm ve em em a. Mahse,a nau in line pahnih awmzia a hrilhfiah chiah khan lawm loh hmel lutukin min en a. A hnuah erawh 'phir an ni dawn emaw ka tia,mahse pakhat chauh pawh hi ka thinlung zawng zawngin ka hmangaih tho' a rawn ti leh ta tho a.





Phir a awh chhan lah chu nau neih a nat zia a thawhpui ten an lo sawi thin avangin phir paia vawikhat chauh hreawm tawrha fa pahnih neih nghal alo duh vang kha a nia. Tullo ah a ngaihtuahna hi a seng tam mah mah a thin chu a ni.





"Tun hnuah chutiangin hriat chian loh thil siam in in ei mai mai tawh suh ang che" a ti nghuta ngei zetin ka melh let.





"Zing kara i nu lak atanga min chhanhim zawh dawn chuan i thu ka la awi ve mahna" ka ti a,kan thusawi alo hre ve bawka ka nu pawh alo nui ar ar. Ka pum pawh a lian ve tawhin chet vel ka harsat tawh hle.





Midang puihna tello phei chuan inchung leh inhnuai in kal pawhna ah pawh ka kal hleithei tawh lo. Chuvang chuan Mesak-a chu a chauh zual phah em em a,zanah ka zung ngunin bathroom ah min hruai reng zela a chang chuan ka in thiam loh ve thin.





"Mesak...Mesak" ka koh ka koh hnuah pawh min la chhang theilo. Chuta ka pum rawn na leh ka thinrim tawh lutuk chuan au tuarin ka pasal chu ka tlawh pawpa khum atang a tla thum dawp.





"Nga..nga ti nge? Eng nge thleng? Ka tha em,i tha em kan naute eng nge a an?" A tho â nghal emaw tih turin rak deuh nawk nawkin a hawi kuala ka hmel a rawn hmuh chian chuan ka bulah a rawn thu thla vat a.





"Naute in rawn chhuah a tum a mi?" Rum zeta ka melh chuan ka bul atanga tawlh hla tial tialin 'ka..ka nu ka'n ko ang' tiin room pawnah va chhuakin a nu te chu ava ko lang langa ka nu rawn lut ka hmuh chuan ka biangah mittui a luang nghal.





"Mesak khatia ding renglo khan motor zuk la chhuak rawh,nau a vei a nih hi" ka nu chuan ti hlukin a fapa chu a melh vut a. Mesak-a pawh pawn lamah a tlan chhuak nghal.





Ka pa chuan Damdawiin lama kan luh huna kan ken tura kan dah lawk ho chu ak in ka nu leh Grace-i min kuahin kan room chu min chhuahsan puia Mesak-a rawn lang leh chiah chuan zo zeta min rawn pawmin a motor lamah min kalpui hlawk hlawk.





Damdawiin kan thlenga nau neihna ward ah kan in nawr lut nghal. In lam atanga lo vei tawh ka nih vang nge exercise ka lak that vang zawk pawh ka hrelo,a pahnih in belhbawm aniang naute chu reilo te ah hliam em em neilo in ka hring a, Hmeichhia a ni bawk.





A hmingah Vamrammawii tiin ka pa(keima pa) chuan a sa a. Vamrammawii chu a pi leh pu te pahnihin an at chilh bawka ka chang manglo. Nau ka neih atanga karkhat vel ka chhungte an rawn zin a. An haw leh hnuah pawh video call hmangin an tunu chu an rawn be ve fo.





Mahse,Vanrammawii chu maw ka naute hriat tawh zawng zawngah ala sual ber ang. Zanah te hian pangtilum a hre lutuk hi pawm emaw puak loh chuan a muhil duh lova. A tahbelhin a harhvang em em a,thawm awm hlekah pawh a muhil lai hi a rawn tap chhuak leh chiam zel.





"Hetiang em em hian alo hahthlak dawn tih hria ila ka rai thawt thawt lo tur" a pa in a awih dur dur laia ka tih chuan a fanu pawm chungin rum zet hian min rawn melh chutih rual chiahin a fanu chu a rawn tapa rang zetin min rawn pe. A naupang lawm thiam zawk pawn a tah meuh chuan tih ngaihna a hre bik lova a tah hlek chuan 'i hnute hnek tir mai rawh' a ti leh ngawt zela tunah pawh ka kutah a rawn dah fel leh der tawh.





Ka fanu chu alo Lian zela thla 5 a tlin meuh chuan tuman min lak chhawk thei ta manglo. A pa in reilo te a pawm ve thei e tih lohah chuan ka pawm leh puak chauh a duha, amah ngaihsak loh hlek hi a hre theiin a nuar peih em em mai leh ta nghala,a chhang phei chuan ka chau hah bawksi thinchhia leh rilru chhia a chhuah chang chuan kan fanu a nih ka han ringlo leh ngawt zel a.





Mahse,ka nu(keima nu) chuan ka fanu chuan min chhun thu min hrilh. Ti chuan hun a kal ve zela Vr-i'n kum hnih a tlinna kum turah kan fa pahnihna tur ka pai leha ka rai leh lawk tawh lovang ka tih ve teh lul nen ka Damdawi ka lo ei theihnghilh khang langa ka tawngtaina ah a u Vr-i anga sual a nih tawh loh nan erawh ka dil uluk khawp mai.





Tichuan kan fa pahnihna Lalremruata pawh Pathian zarah tluang takin ka hring leh a. Tun tum erawh a u anglo takin Remruata chu mut a duhin min tibuai ta mang lo. A u leh apa in an lawmin an kal hlat san phallo a,a muthilh laia a bula an lo infiam changa an tih harh leh a riltam chiauhiar tih lohah chuan a tap ve vak vak ngai lo.
...........



"Vamrammawi khatin i nau toy lo laksak zel suh,i u Isaac-a bulah lo va kal rawh" tiin ka puan bih tur ka siam tha mawlh mawlh. Christmas hmangin kan khua ah kan chhungkua in kan zin a,dar a ri tem tawh kei erawh ka fate pahnih leh an pa ber ka siam zawhah chauh inkhawm turin ka insiam ve hmana hetiangin chhangchhe nu ka ni dawn tih lo hriata nula senior lo nih mai mai zawk tur a nia.




"Lalrambuatsaih i fate kha lo en ve ta che" ka tih chuan 'anih nu hei kal a hun dah phawt mai ang' tiin phone a off a,a fate pahnih khuma lo in chheih rak ve chhen lamah chuan a kal.





Ka inpeih meuh chuan dar hmasa a ri tawh,Remruata ka pua a inhnuai lama kan chhuk chu a pi in Vanrammawii alo hau leh hman. Nichin khan a u bula lo va kal tura ka tih avangin a chhuaka eng pawi nge maw alo va khawih leh hman ni.





"I nu ang mai hawi lohna lam apiangah buaina i thlen" alo ti hluk hluka a pa a hmuh veleh rang zetin a rawn tlana "chhantu tur che lah hi i hre mai sia" ka lo ti ve vat.A pa in a duat zia a in hria a,kan hauh hlek chuan a pa a pan vat zel.




Biakin pana kan kalna ah chuan ka pheikhawk bun hnunglam an cheina vel chuan ka puanbih hmawr a bat a bat leh thin a. " Ka ning i pa pheikhawk min lei ve hi ka bun tawh lo Chiang ngawt ang" ka din apiang chuan ka ti a.




"Ti nge maw a man a to teh reng nen Aizawla kan let hunah va thleng leh tur a ni" a fanu pawm chungin alo ti ve nang nang, Mas present tiin pheikhawk sang min lei ve ngei a,kei erawh chhangchhe nu tih takah eng thil pek mah ka lo ngaihtuah ve lova engmah ka pe lo.





Biakin kan luh hnu lawkah a pa in Remruata a pawma a muhil leh nghal mai. Kan in karah Vr-i kan thut tira,a nau muhil chu en in 'a par leh tawh' ring zet hian a rawn ti thin a. A zahthlak thin ania,vawitam tak Biakin chhunga awmdan tur kan hrilh fo va a zawm lam erawh kan zawm tha lo khawp mai.





Remruata hian a muthilha thawk a lak nat deuh apiangin a hnar hi a parh deuh hak zela chu chu a u hmuh duh zawng tak alo ni bawk nen,a khat tawkin 'a nu a par leh tawh' a ti thin a. Biakin chhung ami te pawn kan lam an lo hawi leh thum thum zel.





A pa in zawi te te hian bengchhenglo turin a hrilha a nau hnar a hmuh tawh loh nan a han hup deuh thin. Vanrammawii lah naupang nghal tih takah a pa kut chu a vai sawn zela kan va han hahthlak bik thin tak em.





"Naupangte chu lo bengchheng mai mai rawh se,kan lal Isua pawn naupangte hnar lovin a hnena kal turin a tih zawk kha" pulpit tlang atanga ka thianpa in a rawn tih chuan ka nui ngawr dat. Kan lam alo hawi kher bawk nen ka thianpa Lalruatpuia kha ala danglam hauhlo.





Tunah chuan pastor a ni ve tawha Pulpit tlangah alo huat leh a awm tak taklo tia a chanchin alo sawi thin ngei Pathian rawng bawlin a thuchah ropui tak takte chu thahnem ngai takin midangte hnena puanchhuah hna a thawk ta si a. Hringnun mak zia leh ropui zia ti chiangtu a niin ka hria.





Pathian hmangaihna a bul tanin Bethlehem a kan sual tlan tura LalIsua lo pianna ah a lut chho a.a thutawpah 'Hmangaihtu diktak chu Pathian' a nih thu a sawi bawk.Hringnunah hian thil tamtak a thlenga hmangaihte aiin hmangaihtu in a let tamtakin hreawm an tuara mahse,mi tuman hmangaihtu tuarna chu an hmuh sak ngai silo.





Ka pasal leh ka fate ka en a,keipawh tunah chuan hmangaihtu leh hmangaih ka ni tih ka in hria,chutiang chiahin hmangaihtu dinhmunah ka dinga ka hmangaih ka chhungkua ka hmangaihna hian Pathian hmangaihna chu tluk pha kher dawnlo mah se,kei aia ka chhungkua hmangaihtu hi an awm bikin ka ringlo.





Buai chang leh hah changin ka fanu harh em em leh tahbelh deuh hi hauhin a pa nen han in hnial ve bap bap thin mah ila,ka hmangaihna a daih phah Chuang lova daih a hnekin a zual ting si. Ka fapa Lalremruata phei chu a nu min hrethiam ber tu ni mai awma mawiin a riltam chang tih lohah chuan min ti buai ngai lova,nakin zelah engtin nge alo than len chho dawn ka hrelo mahse hei erawh ka chiang ka fa te an nih na ang hian an awm ang leh an nihna ang angin ka hmangaiha an pa in ka chunga a tih ang chiah khan an ni pawh hi hmangaihna nen enkawl puitlin ka tum a ni.



( A TAWP TA)



(Thiamlo tak chunga ka ziah 'AMANTE' min lo chhiar saktu te zawng zawng leh like leh comment min pe thin tu te zawng zawng chungah thinlung takin lawmthu ka sawi a.Tin, ka mimal harsatna avanga story kal lai ka tih khaihlak thin avangin ngaihdam ka dil che u a, Pathian zara kan dam chuan story thar hmanga bul kan tan leh hmain nikum lama ka ziah harsatna neuh neuh avanga ka chawlhsan tak 'KA DAKTAWR' tih kha rawn zawm leh hmasak ka tum dawna min lo chhiar sak leh theuh turin ka ngen nghal bawk a che u.)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)