WOMEN WHO CAN KILL YOU CH-1

[Atei-i]

WOMEN WHO CAN KILL YOU

#Mafia #Action #Inphiarrukna #Romance #Inbumna #Thriller


Prologue.


Mizoram a pa hausa tak pakhat chuan fanu pali a nei a, an hmeltha in an tê ber tih loh chu nulian tak hleitling tak an ni hlawm, an pa chu kawng engkim ah an ring tawk em em thin, mahse apa chuan bialpa neih a phal miah lo mai achhan chu sumdawng pa hausa tak chuan a phen ah thil tenawm tak leh an chhungkaw tân pawha hlauhawm khawp in damdawi hmanga sumdawnna a kalpui meka, chu mai pawh ni lo bungrua leh silai te a tawlh ruk theih ang ang chu tawlh ru in a hnuaiah mi tam tak an thawk bawka, India ram ah in zar pharh zel in China thleng in a sumdawnna chu a thleng thui tawha.



Chu tih lai mêk chuan a fanu te pali chu lo seilian zel in tlangval an lo ngaina chho ve tran mêk bawka, achang chuan a fanu te chu an thil tihsual ah hrem na nasa tak a pe fo thin, tih nat pawh a pawi ti ngai lo, chuvang chuan apa duh loh zawng tih chu an hlauh ber ani. Vawikhat chu China lama a hna a buai deuh avang leh leiba rulh ngai tam lutuk chu a fanu te zing a pakhat chu chingfel tur in a ti a, tah chuan hmangaihna khur ah a tal buai chho tran ta a, midang pathum te pawh chuan apa phen ah thil tih ruk an ching chho tran ta a, engtin zel nge an in hmachhawn chhoh dawn i lo chhiar zel dawn nia.





CHAPTER-1




"Dorothy engvang in nge branded bag i lei ziah a tunge i nih kha in hrechiang ve rawh college naupang in thil manto in bel loh tur ka tih ziah thin kha" ka u Emily chuan alo ti bak hlarha.


"Helai ah hian bag manto chungchang sawi tur in ka rawn kal lo kan unaupa vui na ah i mi zilh na kha ka ngaithla peih hek lo"


"Kha tin min ti reng reng suh aw, i u ka nih hi min zah ve ta che"

"Zah tur in i khawsa vak bik lo e mai nangte chuan tumah mil i nei hleinem"

"Ka chungchang thu kha tin sawi hlek suh aw, kum khat chhung khum bet in ka siam maiang che"

"Min siam la ka nu pawh i nih loh kha"

"A tawk ngawi tawh rawh u i pa thusawi lai in tumah lo trawng suh ang che u, anih loh chuan ram dang ah ka thawn bo vek ang che u" ka nu chuan a rawn ti vin hlur a. A thawmhnaw chu rawn pawt mar sawk sawk in a kawrfual chhing ve tak nutling hak a mawi lo khawp tur chu arawn in bel a, a kut te chu a tar tawh vang ni lo in a zu in chak lutuk avang in a khur hlawk hlawk a, chu chu hrethiam ni awm tak hian ka pa hnuai ami mipa in khai thli thlerh thlawrh sa tha tak mai chuan whisky arawn pe vata. A damdawi in hmiah hmiah bawk.


An ni pahnih pawh chu rum fe a in melh chung chuan in hnuailam an pan thla ve nghala. Ka pa leh a bodyguard te pawh an lo thru fel thrap tawh a, keimah ni chiah min lo nghak tawh.


"Ka lu lah chu namen lo in ana nizan lam zu ka in hnem deuh bawk nen"

Ka pa in thu a sawi lai te chuan ka lo meng hleithei lo ka in dawm kun ngawih ngawih renga. Ka u Emily chuan thusawi a rawt ve tlat mai, a thusawi chu a rorum leh hle tur ah ka ngai.


"Khai le, hun rei tak chhung kan unaupa anga kan lo en thin ka pa thachhang dawl tu kan mi rin rawl ber hetia a boral mai hi kan ui takzet a ka ui zia ka sawi fiah thiam lo ani ber, ani ai chuan kan u Hrang-i hi han boral thut mai sela tih te chu ka ngaihtuah rûm rûm a"

"Engnga nang nu kha khatin min ti reng reng suh aw, i vun kha ka hlep ral vek mai ang"

"Nang a bible zir zo thusawi kha engah mah ka ngai lo ve"

"Ka pa in ti tur a min tih vang chauha ti ka nih hi aw, nang a zirtirtu A for Apple tih vel mai mai ah khan fel viau ah i in ngai ami? I hna kha tha tak khan thawk la ka midang nun ah lo buai lo mai rawh pitar"


"Ka thusawi lai chuan lo ngawi la nula fel i ni mai, kan unaupa ka ui zia tehkhin nan a ka sawi chauh mai alawm ka ti tak tak pawh ani lo a, kha i la dam sen lawl kha i thi chuang hleinem"


"Ka thin tih rim hi i chak ve hrim hrim in ka hria lo kal teh kan khawi hlak teh ang che" tih pah in dawh sân a ading lai chu a phih thla lawpa, ka u Emily lah alo chak in insual a thiam zawk bawk nen a ban lehlam ah a lo kuai her sawka, hnung zawng in a bin thlal thruai a, an pahnih chuan chhuat laiah an tlu thum trawk a, ka u Hrang-i chuan a ban lehlam chu a kap karah kuai her in theih tawp in a herh a, chu veleh ka u Emily chu a vir vuta, chhuata tui bottle chu la in a lu ah ahan chhu leh chawrha, an kawr ah nasa fe hian an in pawt dun ngar ngara.


Ka pa veng tute zing a pahnih chuan an rawn thelh vata. An la in cho dun khawp mai, an in ankhum bawrh bawrha. Heihi ania kan chhungkua in hmuhkhawm a thil thleng ziah thin chu pakhat tal hi kan insual ngei ngei tih theih ani. Keichu ka nawm sam loh deuh avang in kil khatah ngawi reng in ka lo en mai maia.


"Ka fapa thih ni ah in la in sual zui a min ti lungawi lo takzet in unaupa ang tluk zet a ka hmangaih ani asin tumah mipa in awm lo chung pawn heti hi in nia, fapa ka lo nei lo kha chu a pawi khawp mai i nu lah in a hring chhung thei der si loa"


"Eeee.....chutin ka duh duh ka sang chhuak thei bik hleinem i hmêi te ho khan an thei ta ve ang, rai treuh la ti nia, simeikhu ang lek in i rawn in lana hetia min trawngkhum ziah tur pawh hi ka ni lo, fanu pali enkawl hautak zia hi kan nihna kan in thleng mai dawn em ni?"


"Hmmm hm naktuk ah veng chhung ah kan vui dawn a, chumi hma kan chhungkaw ho a vui ka rawt ve pawh egmah ani lo e, haw darh vek rawh u pastor in a hre reu reu ang che u vawiin atan chuan tawk phawt teh se ka hna ah ka kal dawn in hahthlak hlawm emai" ka pa chu thinrim deuh in a in seh ruh trun a, a coat suite chu a ha tha sawk sawka kan zavai mai chuan min rawn en leh a, keilah tlu lek lek in ka lo thu hnur bawk nen beidawn hmel tak chuan min kal san leh ta vek a. A tuk zing dar 5 velah veng chhung ah a boral thu an puang ta chauha tichuan threnawm vel te pawh an lo leng lut ve chauha keini erawh kan awm tawh lo thung.


Kan unau hmeichhia hlir pali kan nih avang in ka pa pawh in kan buaina chu chinfel harsa a ti hle thin, ka nu erawh in rawlh buai a tum ngai lo a min ngawih bo san thei mai a, ka pa erawh a hnung zui vek kan nih avang in min kaihhruai chu a mawhphurh na ah a ngai nghet tlat thung a. Ka pa hnathawh te chu Mizoram chhung ah mai pawh ni lo ram pawn lam thleng in a sumdawn na a zauh zel a, chutih rual in ka pa in ka nu leh kan unau a min venhim a duh avang in kan in chhungkhat na hi tuman an hre ngai lo, ka pa ngei pawh in ka nu hi a nupui a nih thu a puang zar ngai lova, keini pawh unau ang in midang te bulah kan khawsa ngai lem lo.



Kan mi chhawr te chauh in chhungkua kan nih thu hi an hria a, chu chu tuman an sawi chhuak tur ani lo bawk, a chhan chu hna chi hrang hrang kan thawk vek a chumi phen ah chuan ka pa hna kan thawk tel theuh avang in thuruk zep tlat nei ang mai hian kan nih na dik tak hi kan tilang ngai lo, kan naupang ber Dorothy erawh chu ka pa ka ngen nasat em avang in kan thil tih tenawm tak atrang kan thiar fihlim thei hrama, kan thil tih ah in hnamhnawih na a nei ve lem lo, lehkha tha tak in zir se hna sang tak chelh se tih chu ka duh pui ber ani, a chhan chu eng chen nge tiang hian kan kal reng dawn tih a hriat si loha, ka pa hian zan khat mit chhin te lo tawk palh ta se keini chu kan chhe vek thei tlat ani.


Kan sumdawn na lian ber chu khehpuam sem chhuah te damdawi chi hrang hrang ruih theih chi tawh phawt chu tawlh ruk leh siam chhuah ani ber a, China ram lamah kan unaupa hian kan sumdawnna a enkawl ve thung a, mahse a boral tak ah chuan ka pa in midang buaipui tur in thu a pe nghala, he thil hi kan duh reng vanga ti pawh kan ni lo, ka pu hna nghet tak alo nih tawh avang in a thih hnu ah ka pa in a chhunzawm a, ka pa pawh hian a nu pawh a hmu hman bik lo tunge anih pawh a hre lo, tichuan ka pu hian mal tak in a enkawl seilian chho a, a nu chungchang engmah a sawi ngai lo bawk.




Tichuan ka pu hna chu kan in hlan chhawng zel a, ka pa pawh hian kan unau zing ah tunge thu neih na a hlan chhawng dawn ala sawi thei bik lo, kan unaupa ang a kan en Rosang-a lah chu tu tih ber nge hriat loh in an that daih bawk si, hei pawh hi ka pa in a chhui zui ngei in ka ring bawka kan hmelma lam Pu Simon-a te thil tih anih kan ring nghet tlat bawk.




Kan upa ber ka u Hrang-i hi ka pa in bible zir tur a atirh hnu ah zir zo in Missionary hna thawk zui tur leh chumi hmun ah a remchan dan ang zel a kan bungrua thawn te lo en thli tlai tur in a tir a, ka u chiah Emily chu mi tawrawt ve tak pawisak nei lo ani na chung in ka pa in private school ah thawk tur in a tir ta tlat mai chu pawh nursery atrang a zirtir tran ala ngai zui bawka chuti chung chuan zing kar ah leh zan lamah kan bungrua a thawn chhuak ve reng bawka, a hna hi a hautak deuh hlek avang in a phun nasa thei hle a keipawn ka thiam loh em em lo, keimah ber hi file vel chingfel tur leh pawisa ba thring kual tur in min ti ve thunga, kan naupang ber leh ka nu nen kan pathum in kan khawsa ve thunga, keipawh mahni a in luah tur in min ti viau na a min ti lui thei bik lo, a awmsa rin chu ka thiam zawng tak alo ni bawk nen.




Tichuan leiba thring kual leh mi pawisa a pung awm a puk tir chuan nitin ka tei chhuak ve reng thin a, ka nu chuan tlangval naupang lam hi arawn hruai a nileng leng hian a khawsak puia, ka pa pawh chu ti tho chu nula a duh duh zantin deuh thaw a khawsak pui a, ka nu nen awm dun reng thei bik hek lo, an inhmuh hi chuan in hmangaih ber ang mai hian an in ngai leh em em tho si ani.




Ka pa sumdawn na lian ber chu Hotel lian tak pakhat The House chu ani deuh bera, adang erawh silai leh damdawi leh a rem rem tawlh ruk nana kan hman te ani hlawm, mahse chu chu mi te ngaiha lian ber chauh ani, chumi phen ah chuan nikhat a nuai 10 atrang a nuai 20 hu vel pawisa a chelek kual char char renga. Kan sawrkar te pawh in a pawisa an puk sak hial thin leh an mi tlawn rawn ani tel bawk ani.




EMILY POV.



"Zan in a tân chuan Zuangtui lamah kan bungrua kan thawn chhuak dawna nangni ho kha pangnga in kal ang, kal tur ka thlan chhuah ho khan min rawn zui rawh u" ka bike chuan ka tlan liam zui nghala, helmet full face ka khum ziah avang in tunge tih tuman min hre ngai lo a, thawveng tak in ka tlan mai thin, chumi zan chuan ka rin aiin mi veivak an lo la tam phian lehnghala, thui fe kan tlan hnu chuan in awm loh na lai kawng hmin deuh lai ah chuan motor dum hi alo ding a, ka helmet full face khum chung chuan kan damdawi hralh tur chu ka khai phei a, ka hnung lamah min veng tute chu car chhung ah an lo in ring reng bawka.




"A vaiin nuai 2 man anih hi"



"Tinge zanin chu ava tlem ve pek chhuah tham vak a awm dawn nange?" Mipa upa lam tawh tih hriat tak aw puam deuh mai tun hma pawha min dawr nasa thin ber tu black car tih a, a hming ka vuah chuan ngaih nep hmel zet hian ka damdawi ken chu a han thlek kual vel a.



"Pu a, nang lo pawh hi mi tam tak pek chhuah kan nei tih hria la mahni chanpual chu lawm tak a dawn mai tur aw" ka han ti let hlaka.



"Mmhh nang hi chu i kawlhrawng ve khawp mai, hmeichhia ka hriat tawh ah ila huaisen ber bawk, mahse a lehpek ah chuan nuai 5 man a ni ngei tawh tur ani, ti lo chu Pu Simon-a te kan dawr kum khua tawh zawk ang"



"Huh .....Ani chuan va partner la, eng ang mi nge tih i hre thei mai dawn alawm, min trawngkhum ang hian han ti vaih teh, ramsa ang maiin alo thlung phawt che angnga mi rinawm lo tih takah mi rin na nei miah lo ania, i kâ ah he damdawi pack khat hi a han barh lut phawt che angnga, i nih na zawng zawng i hming tak tak nen lam i sawi thei lo anih chuan i chhung te thleng in thah ah a vau che nga chuan a nep ber ah i mawngah ui ang maiin a duat hlak bawk ang che ka thusawi chu i hrethiam ang tiraw" chutia ka tih lai chuan ngawi reng in mi en reng a, a hmai tuam na chu a han pawt mar sawk sawka, a aw a thian kharh kharha a phone chu a han en leh a.




"Duh sak bik in nei tih hi ka chiang ani, engpawh chu nise kha... pawisa hi la phawt teh i thusawi kha ka awih vek pawh ring suh thil thleng thei pawh ani lo hrim hrim"




"I awih loh chuan video i en duh em ka hmuh ang che" ka phone chu ka lek kang nghala. Mahse arawn hui thla vata, "Min hmuh kher angai lo ang zankhua in hun ka nei lo tawk phawt teh se, kan in dawr chhunzawm zel ang in sawi thraih na hi ka ngaina vak lo ania" ala ti hrama, keipawh haw vat a in lamah hahdam taka awm mai mai ka chak tawh avang in ka chhuah san ta nghala.




A tuk zing ah chuan hma takah ka tho a, ka sam lem buang thar mai chu ka khuih hliau hliau a, ka rilru in tukin chu Sir. Hlimpuia alo kal ve tawh awm sia chawlh ala rei tawh si nalh deuh in kan in chei ve teh ang ka ti a, ka nui leh suk a darthlalang hma ah chuan ka in en reng a, ka nui rei lo kher mai engtik ah mah pasal ka neih theih pawh ka in ring si lo, bialpa nei thei pawh ka ni bawk hek lo. Ka pa fanu ka ni hi chu khawvel ah ka vanduai ber ang, Sir Hlimpuia chuan min duh ve nge ve lo pawh ka la hre chuang lo a, ka lo lungngai lawk nasa maia, kum 25 ka ni tawha hmangaih na par han tlân vel chu ka chak ve tawh kher mai, nula pian mawi tak ka lo ni ve bawk nen min duh ru tu tam tak ka lo hnar fi thla thak thak zel bawk si keimah ang bawka smuglar han ngaihzawn lah ka tum lo bur bawk si.



School kal nana ka hman thin ka scooty zawk chu ka khalh chhuak a. School kawta ka ding chu "Miss Emily vawiin chu i va nalh ve a, nizan lam te kha i va tlan chak vel ve a" Miss Maria-i chuan nui ver ver chung chuan mi lo ti a, henu hi chu hman atrang tawh khan ka ngaina hlawl lo, ka nihna dik tak nen lang chhuak thei ngat ila chuan a trawngtheih na a khabe ah sawn ka pawt bal tawh ang mawle, a lei te saw ka pawt chhuak angnga, ring ruh ri rawp khawp in a nghawng ah ka hreh pawp tawh ang, "Hehe, nizan ah ka chhuak lo reng reng min hai aniang"



"Ka hmu reng che alawm bike i khalh lai te pawh"



"Ka ni lo hrim hrim bike pawh ka la khalh chhin lo reng reng" angai te bawk in min lo hmu fuh leh pek tawh aniang a ruk a thil tih pawh hian mi lo hmu fuh thei zel maia. Min enthla ru reng tih ka hai lo, hei aia a kal thui leh anih vaih chuan atan a pawithui viau ta ve ang.



KIMI POV




"Pawisa puk chuan a hunah pek leh ngei ngei tur dân fel fai tak in kan siama ka sawi nawn kher pawh a ngai tawh lo, khawi pawisa chu rawn la vat rawh"



"Miss, khawngaih tak in min ngaidam rawh ka fanu a dam lo a na tak in a dam lo a chuvang in ka pawisa khawl sa zawng zawng pawh ka hmang zo a tunah chuan engmah pek tur che ka la nei lo thla thum tal hun min pe leh hram rawh" ka hma ah chuan bawkkhup meuh in khawngaih na min dila, kum khat chhung a pek min tiam a tunah kum hnih a ral leh trep tawha, thla thum chhung pawh sei sak leh tur in min ti anih chu! ka ring tawh hlawl lo hepa hi ka ring lo reng reng.


"Khawi maw i fanu thlalak chu"

"Kha hei hi ania kum 9 lai ani ve tawha an school building atrang a tla palha a taksa hmun ruk laiah a ruh a tliak a tunah pawh ala harh chhuak thei lo a nu a boral tawh si a, keimah chauh lo chu neih a nei si lo khawngaih tak in min zuah la i duh eng pawh ka ti ang" aw khur zawih zawih chung chuan a ti a, a hmel ah hrehawm tih na leh hlauthawn na in a khat tih ka hre thei a thlan fim in a bual hneh hle bawk.



"Kei chuan engmah tih theih ka nei lo pawisa khawn tu mai ka ni, thu thluk na chu kan pu kut ah ani zawk engtin nge a nin a tih dawn ka hre bawk si lo. Kal phawt ang u khawngaih na lan tir che pawn dân chu i hriat vek kha i chung a pik hle ang engpawh tawk tur in lo in ring ang che" motor ah chuan ka luh san a, ka sunglass chu phelh thla in ka thaw halha mi tu pawh hian buaina kan tawk vek a, tu nge in tranpui thei bik awm chuang ang le! A fanu lah chu a hmeltha em em mai lehnghal a.



"Khawiah nge kan kal leh dawn?" Kan driver bulah chuan ka ti a, "Miss Kim, tunah chuan meeting na ah kal kan ngai a"



"Anih chuan kha pa chungchang thu pawh kha kan rel fel nghal dawn nia, vawiin chu nidang ai mah in a zia phian ba pawh min pe tha hlawm e" Ka phone chu arawn ri zeuha message ka han en chuan, Durtlang lama kan Grape wine siam na Firm ah zawk kal tur anih thu ka dawng leh a. Buaina a awm ani ngei ang, Aizawl ah Firm lian tak tak pathum kan nei a chu mi ah chuan meeting kan nei thin kar hmasa kan sawi lawk tawh dan chuan Phunchawng a kan pangpar huan zawk ah ani si a.



Kan Firm neih na hi mi tlawh pawh mai mai theih loh leh, mobile network service that loh na hmun mi naran in an kal tlang theih loh leh awlsam taka hmuh mai mai theih loh hmun fianrial leh zau tak a ni vek a, motor atrang ka chhuak chu kan thawhpui te ho pawh an lo thleng khawm ve mek a. Building chhawng chung ber ah lut chho in pindan paruk lo awm zing a a tawp ber na ah chuan ka Driver nen kan lut dun a. Ka pa leh a thurual pui te ho an lo awm kim thrap tawh, thlakhat chhung a kan hnathawh theuh chu kimchang tak in report kan pe vek a, ka pa chuan politics leh sumdawng hausa tak tak te ho hmelhriat a in thlun zawm zel tur in min ti bawka, midang chuan an damdawi supply te a luh that zel theih nan leh ramdang a tun aia nasa zawka thawn chhuah zel dan tur te an sawi ho a, vawiin lamah kan pawisa ba pe thei lo pawh report ah ka pe tel vek a, ka sawi loh chuan sum lut zat kha an chhut chhuak leh vek dawn si avang in rilru a hreh tak chung chuan ka sawia. Ka pa in a hnuai ami te chingfel mai tur a atih chuan ka lo hlauthawng ru kher mai.



"Ka fapa that tu leh hemi a in hnamhnawih zawng zawng te chu hriat vek ka duh chu mi in chhui fel hma loh chuan chawl lo in in zawng char char tur a ni ang, Simon a pawl te thil tih a nih hi ka ring nghet tlat bawk chumi en thla tur chuan ka fanu Kimi hi ka tir ang"



"Maw pa keimah maw?!"


"Um nang lo chu hetiang ti thei an awm ka hre lo, i nihna zawng zawng hi dah bo la Simon a te hnuai a thawk tur in i va kal ang,engkim ka ruahman lawk sa vek tawh. Kha file hi en la i tih tur chu tah hian a awm vek, midang zawng in Lunglei lama kan damdawi thawn chhuah ho kawng laka lo lambun in a bo a bang awm lo a la fai vek tu te hi in chhui chhuak ngei bawk tur ani" ka pa chuan thu pe âw tak hian a ti chher chher a, a thu chu kan zawm lo ngam ngai lo engkim a thunun hneh in sumdawnna chungchang ni se a ni aia thiam leh fing hi an awm chuang lo a hnuaia thawk te lah hneh tak in a chawm a, building lian pui ah floor tin ah a luah tir vek a, ei leh in an mamawh tin reng hniang hnar tak in a pe vek bawk, sawrkar mi challang leh kan milar te chen in thawhpui a nei treuha, Police department lamah pawh an bang bik lo chuvangin ka pa hi chu man theih loh tluk hial ah ka ngai.




Zanah chuan file chu ka han en kual vel a ka naupan tet atrang thil chik mi leh mi ti thlip thlap ni tur a train vek ka ni chung pawh in thil han chhiar zung zung hi ka peih lem lo phek hma lam chu ka chhiar thuaka ka sign ve maia, ka rin aiin a khirhkhan dawn khawp mai, personal trainer ang in ka va kal dawn a, thiam thil bik neih a ngai phawt ka naupan lai atrang tawha Karate thiam black belt ngat ni tawh ka nih vang in he hna hi ka pa in min thlan sak ani ngei ang. Pu Simon a fanu naupang ber training tur in ka va kal dawn a tah chuan an thuruk kimchang leh engkim an thil tih ruk dan ka va hre chiang vek tur ani. An chanchin kan hriat theih zawng chu Firm Furniture lianpui an nei tih leh sumdawn na dang keini ang bawka khawih tel an ni tih chu ani mai, mahse a phen ah hian til tihruk tam tak an neiin kan ring tlat ani. Keimah in in ka luah ngei a ngai dawn zui bawk ka nu eirawngbawl sa ka ei thei tawh dawn lo chu ka phur teh chiam lo.




Zan a ka muhil lai chu ka phone arawn ri ral ral a rang tak in ka la a, "Hello, Miss Kim, karhmasa lama kan leiba khawn na putar kha a in awkhlum a, i lo hre ve tawh em? Ni hnih vel a liam tawh ang i pa in hrilh suh min ti a mahse a fanu ka ngaihtuah em a ka lo hrilh che" Chu thu ka hriat chuan min thawng takzet hmeichhe sual ve tak ni mah ila kha putar pa fanu dam lo kha ka rilru ah alo lang nghal a.



"Engtin nge a fanu kha a awm?"

"Damdawiin a la awm a engmah ala hre lo"


"A chhungte an awm leh awm loh lo en ang che tuman an ngaihsak loh chuan min lo hrilh leh ang che engkim lo hre vek rawh" ka ti a, chumi zan zankhua chuan ka muhil thei reng reng lo mai, ka hna ah hian hun rei tak chhung chu ka lo tluang ve viau tawha, midang line ah hi chuan an buai in jail tang te an tam thei hle, athen lah an in that thul chhungte nei mumal lo an nih avang in ramhnuai a an phum bo tak an tam hle a, hre ve vek mah ila keima tih anih loh avang hian engah teh vak ka ngai lo, mahse zanin a thil thleng kha chu keima line ami ngei anih avang in ka awm a nuam lo ngei mai, a fanu damlo chuan ka rilru a luah hneh vang te pawh ani ang.




Atuk zing ah chuan chanchin min rawn hrilh leh vata, chhungte chu a nei ngei mai apa chhungte an ni, mahse an khawsak a harsat em avang in damdawiin bill zawng zawng pe thei an ni lo a, engmah an tih sak theih loh avang in an lo kalsan tawp tih thu ka hria a, ka pa in vawiin lamah Pu Simon a te in ah ka hna tran tur in min ti tawh bawk si, kal thei ka ni bawk si lo, ka u Hrang-i chu ka phone ta ringawta.



"Ka u civil damdawiin ah va kal la General ward ah khan khum no.23 na a hmeichhe naupang kha lo va la chhuak rawh lo enkawl ang che"



"Eng a nauvi Delhi lamah ka chhuk thla tawh dawna naupang enkawl tur chuan ka buai lutuk tlat anih phawt"


"Lawk in ka u lo la dah lo teh heihi a pawimawh lutuk ania, tunah min va kal sak hram teh ka pa hrilh miah suh ang che"


"Enteh keimah leh keimah pawh ka in buai pui trawk trawk laia, naupang damlo la chhuak tur a min tih nachhan hi ka thih hun tur ka hriat loh tluk zet in ka hre lo han sawifiah teh"


"Apa kha ka leiba khawn na ania, mahse pawisa a nei si lo a, a in awkhlum a chuan a fanu damlo kha min va ngaihven sak teh, keimah vanga hetia naupang pawisawi lo in alo tawrh hi ka duh lo reng reng"


"Engnge nangmah vang anih na? I damlo chu ani êm lo maw? Hetiang a mi i ngaihven ve hi ka vawikhat hriat na ani hial ang. Apa vang zawk anih chu apa thil tih sual ah keini kan lo buai ve a trul lo, thih a duh a athi ani mai, a fanu pawh ngaihtuah lo mihring chu dam a phu lo reng reng"


"Engpawh nise min va ngaihven sak phawt teh"


"Ka pa in a hriat chhuah chuan kan buai vek ani mai, ka hna ka tran angai tawh alawm i buaina ah min hnuk lut ve suh, home te pawh a tam alawm alo awm ve tawh maiang chu, bakah ka hnathawh na ah naupang hlir in min bawh buaia, ka nin mah nak alaia, hetah lah nau awm tur in min lo ti bawk ka peih teuh lo mai, nau awm tu pawh ka nih loh hi, chutiang ti tur chuan min nawr lui suh ka dah dawn anih phawt"



"La dah lo teh lawk in lawk in ih umm i duh duh ka tih sak ang che"

"Engnge min tih sak ve ang?"


"Engpawh ani mai"


"I car sen kha min pe rawh"


"Ni lo ni lo, Trovit car kha chu ni lo e ka duat ber asin" insiam sawk sawk pah chuan ner sâwng chung in ka ti a. Ka thil neih zingah chuan ka ui ber leh ka duh ber ani.


"Anih chuan hetah car ka nei hleinem engtin nge naupang damlo chu ka hruai kual theih ang?"


"Arghhhhh ka ui asinnnnn ummmm anih leh ti râng miah suh ang che nitin lo sil bawk la"


"Okeyyyyy" a nui ri hawr hawr ka hriat chuan rang lutuk in ka phone ka off nghala.




Engpawh nise ka buai chhe tur ani lo, hetah ka pa in min hmu vek thei lo, a buai lutuk engmah a hre lo ang, engmah a hre tur ani lo bawk, chuan ka hna tha tak in ka thawk thei zel ang, ka buai tur ani lo, keimah leh keimah chu darthlalang hma ah ka in en a ka han in be vel a, ka rilru tak chuan kan unaupa ang maia kan en ve Rosang-a thih na chhui tur ka ni alawm huai tak in ka bei zel ang, ani nen khan kan in kawm ngaih in ka ring ve hle thin, hetia a boral thut hi sawisak leh thah ngei ani tih pawh kan chiang chuvang in ka chhui chhuak ngei ang, Pu Simon a te thil tih anih vaih chuan ka that fai vek ang ka ti a, mahse mi pakhat in awkhlum ah pawh ka buai chhe der chu ani si a, keima kut a mi an thih ai chuan midang kuta an thih chu a zia awm deuh mah na ka hnuai ami te ka thah tir khawp ang.




Scooty trawng deuh mai kan in kawta lo ding chahbi lo in vuah sa thlap hi ka hmu a, ka nu chuan pawn a pangpar tui pek pah chuan, "kha i scooty thar tur anih kha vawiin chu tha deuh in va thawk ang che"

"Khawnge ka bike a awm? Hetiang ka khalh ngai lo"

"Hmeichhe pangngai tak ang in i lan angai bike i khalh ten mi hausa lutuk ang ah an ngai ang che scooty secondhand kha va khalh la a tawk chauh"

"Tu ruamhman na nge ni ngaia!?"

"Agreement ah a inziah vek kha i sign vek tawh chhiar chiang ve ta che"

"Ka pa tak hi chu aw thil chhiar ka peih loh zia a hre vek sia, anih chuan ka kal phawt maiang"


"Tinge engmah i keng dawn lo ami?"

"Engmaw ka ken ang?"

"Huiii haamm tiang em em a in chhiar zau lo si hi i fing ve tho bawk sia, tumah kha va ngaizawng lo la chu chu thupek i zawm ngei ngei tur ani tih hria ang che, an in ah i khawsa ve nghal dawn alawm, i thawmhnaw tlem pack la i kal thei ang"


"Tumah ngaihzawn tur an awm lovang nge, in ka luah dawn emaw ka ti ve sia"

"I chhiar sual pek aniang, han insiam vat rawh"


"Ka thawmhnaw pathum bak ka keng lo ang ka lei chawp maiang keimah chauh in ka in khai bawr peih teuh lo"


"Tlangval pathum an awm dawn ania tumah va ngaizawng suh ang che" cigarette zu khu hlat hlat chung chuan mi rawn ti zui leh a.


"Awle ka nu Zirtluang ka ngaizawng lo ang ka tar thleng in ka virgin dawn alawm" ka au lawng lawnga in chhungah lut in ka insiam leh sawk sawka, phur fahran lo chuan ka chhuak ve ta a.





EMILY POV


"Good morning Miss Emily in lo dam maw?" Miss Maria-i nen kan in biak lai tak chuan Sir Hlimpuia chuan min lo bia a.


"Ehee.....Good morning kan chawlh hmang rei pa chu i lo let leh tawh ani maw? Kan dam e nang zawk i lo dam em?" Miss Maria-i chuan mi lo trawng khalh zung zung peka.


"Um dam ani mai, in ngaihawm tawh hlawm khawp mai, vawiin chu thil te ei chhuak ila school banah"


"Aww.....tehreng mai lutuk tlat kan pahnih in ami?" Miss Maria-i bawk chuan alo ti leh a.


"Ummm ka hre nang, Miss Emily i hman angem?" Ka dâr ah rawn vuan pah chuan a rawn ti nui saka.


"Ka hman lo tlat in pahnih in lo ei mai rawh u" tih pah in a kut chu ka thing thla hmaka, ka kalsan nghal nal nal mahni tawk ah mi in duh ve tak mai ka lo ni bawk nen Miss Maria-i te nen a thil ei chhuah kha a trul na ka hre hlawl lo.


Mipa pian nalh ve tak ngal sei tak mawng chhing mawi tawk chiah, in khai thli tak mai, sam bu tha tak nei mit hmul sei tak nei hmeltha ve tak a ni a, kan staff te zing ah chuan a luck ber pawl ani, kum thum kan thawk ho tawha in sawi luh pawh ka tum ngai lo mahse tun trum chu hmangaih na par tlan vel chu han tem chhin ve ka chak ta tlat pek a, engtia hmalak tur nge pawh ka hre hek lo Miss Maria-i leh Miss Dingpuii te chuan nasa tak in an hel reng tih bak hriat ka nei hran lo.



"Tinge i thinrim ami?" Ka hnung ah mi rawn umzui pah chuan a ti a.

"Engvang chuan maw?"

"I lungawi loh hmel em a?"

"Lungawi loh na tur ka nei in mi hria em ni?"

"Chulam pawh ani lo, ka zin na atrang ka rawn haw ve chiaha hun hman ho te pawh a chakawm alawm vawiin tlai chu lo kal ve ngei ngei ang che"

"Hmeichhia lep lerh lutuk tur ah min ngai em ni chu ti maia awlsam chuan min sawm chhuak lo ang"


"Maw? Engnge i sawi awmzia hetah hna kan thawk ho a thian kan ni a, ka thian i nih na ang in ka sawm ve che ani maia, Miss Maria-i leh Miss di ......"

A sawizawh hma hma chuan ka lo pawt chat a, "Thian kawm hi ka thiam ve vak lo a, chulam zawk chu ani Mihring people hrim hrim hi ka ngaina lo i duh leh an ni ho nen sawn va leng chhuak rawh u" ka ti deuh hmaka, dik tak chuan mimal ang taka min sawm chhuah ka phut vang zawk ani. Chu erawh a hrethiam thei der lo a hmel en aiin a zei dawn lo daih mai.


"Anih chuan i thu thu le, i thin ka tirim ta emaw ka lo ti a, midang zar buai i duh loh chuan ka ti lui lo che ania, anih phawt le" khi vur vur chung chuan a ti a keipawh chuan ka ngaihsak zui ta lem lo, ka rilru a ka lo phut ve deuh pawh chu thil atthlak tak ni in ka hre ta zawk a. Class ka lak pawh chuan naupang ho chu ka vin ta deuh hrep maia, mahse rei lo te ah ka in bêng dai leh thei hram a.



Zanah chuan angai te bawk in motor a thil thawn tur chu ka buaipui leh ngat ngata, ka phone pakhat zawk hnathawh nana ka hman thin chu arawn ri zeuha message ka dawng ani tih ka hre nghal, keimah ngeiin Lunglei lamah kan damdawi tawlh ruk tur chu ka phurh a ngai tih leh midang ringhlelh na tur awm thei zawng zawng chu thup bo vek tur in min ti a, ka va in ring lo si em mahse ka tih ngei angai bawk si. Ka driver nen chuan kan chhungte tlawh tur a kal ang a lan angai a, chawhmeh thlai chi hrang tam tak kan phurh tel tur an lo dah sa vek tawh chu kan phur tel bawk tur ani, check gate paltlang ngai hmun thum ah kan neih avang in fimkhur hle angai. Sana ka en a dar 7 alo ri vel chiah chiaha, dar 8 ah kan chhuah nghal angai bawk. Ka thawmhnaw chu a tak ang thei ber tur in ka han pack ve nel nuala, chaw ka bar sawk sawk angnga ka chhuak ang tih a ka rilru ka lo sen kual vel lai tak chuan door bell a rawn ri ral rala. Tun ang hunah tu chu nge mawni le, ka sam lem chu hmanhmawh deuh in ka pawtthla sawka ka vuah tha nghala.



Kawngka ka hawn hma chuan vawithum lai door bell a rawn hmet hman kawngka ka hawng chiah chu Sir. Hlimpuia huh zawr hnuang alo ding chu ka va hmu hlawla, ruah tui tam hunlai tak anih avang in kua a chêng deuh reng a, chhuah vah pawh a nuam lo viau. Chutia Sir. Hlimpuia lo ding reng la hmuh chuan ka hamhaih lutuk chu ka en reng ringawta.


"Ka lo lut thei angem?"


"Maw...!? E aw lo lo lut rawh tinge i va huh nasa ve ruah i do ami? Engtin nge ka in i hriat a?"


"Ruah ka do chu ani maiang chu ka huh vek alawm heheh" a nui tawi tupa, in thlahrun hmel zet hian a rawn lut far tlawk tlawka.


"Bathroom ah i va in thlak mai dawn ami?"


"Eng nge ka hak ang!"


"Ka hre bik lo ka mut kawr i hak tawk chauh ang ka ring"


"I mut kawr lo hak daih pawh chu a zia lo deuh lo maw!"


"Anih ka t-shirt i ha mai dawn em ni? Mut kawr te chu mipa hak bik leh hmeichhe hak bik a awm hran lo zawk asin"

"Um pawi lo i tih dan dan ani mai ka rawn kal vawikhat na ah ka tibuai hle mai che a zia lo khawp mai"


"Ni lo e, a pawi lo i tan te chuan engkim a awm mai zel alawm" ui engnge maw ka sawi tak chu le, pawi lo ka hnar haw vat angai ti lo chu khawvar hma in ka tih tur ka zo hman lo ang.


Bathroom lamah a lut chiah chu ka buai chhe vek mai, engtin nge ka tih takah Lunglei ah ka kal tur thu hi tuman an hre tur ani si lo a, ka ril a tram tawh bawk si chaw ei chi pawh ka ni lo ka ei chuan chaw ei ah sawm ve angai angnga rei lo teah dar 8 a ri mai ang ka in ti dam lo der mai dawn em ni? nge ka zin dawn ka tih chuan ka kal dan tur min zawt leh chiam emaw kha ania nga a dil chhut thei nasa ropui mai si. Chhungte an lo nei leh duah angnga chu mi chu i hria em a tih leh angnga tumah hriat ka nei si lo. Duh viau che mah ila zanin chu i hnawksak khawp mai Sir. Hlimpui bathroom lam melh rulh pah chuan ka ti a.



"Hui ham ka khua asik ngei ngei ang tum loh deuh in ruah arawn sur thut sia ka bike in ka in khalh chhuak a, ka huh nasa tawh si a, ka rawn lut tawp mai a pawi em lo ang chu tiraw?"


"Pawi lo e, mahse engtin nge ka in hi i hriata?"


"Ka hre ve tawp haha"

"Ka fiamthu miah lo ania" ka zaidam lo bawk nen ka hmanhmawh tawh si chu ka trawng nelawm loh zet chuan ka be ta alawm.


"Tak tak ah Miss Maria-i te nen thil kan ei chhuak kha in in awm na lai te ka zawt a hei hi lo pek ve che ka duh a midang awm lai a thil lo in pek bik hi a nuam chiah si lo a" tih pah chuan a polythene dum khai lai ami chu a han phawrh dawna ka ringhlel thut mai, ka dawh-kan hnuaia pistol ka dah thuhruk chu ka vuan vata. Miss Maria-i nen kan in hnim hnaih loh zia chu amah ngei pawn a hre chiang ang engtin nge ka in a hriat theih zawk a trawngtam lutuk zarah kei hian thil pakhat hriat chhuah ka neih phah min lo en thla ru reng tih leh min lo chhui nasa ani tih hi ani.


"Hei hi ania ho te mai, kan khua a ka zin na ah ka nu in min pe a i duh ber i pe dawn nia atia" tih pah chuan bakilh gold rawng ngei mai, a tak tak emaw ka tih hman mahse Nepal gold an tih mai thin a rawng khawk ve thei lo hi arawn phawrha.


"Tunah khan eng maw i sawi a! I duh ber pe rawh min ti a i tia mi?" Mit khap fuk fuk chung chuan ka han ti a.


"Aw umm ka tih awmzia chu i phal ber hnehah pe rawh atih na zawk ania, in vaiin ka nei daih dawn si lo a staff hmeichhia te zawng zawng zing a ka duh sak ber i nih na ang in ka pe che anih chu thildang engmah a awm hran lo ania" ka mut kawr a hak te lah chu kei aiin a inhmeh pui zawk daih lehnghala, han nuih chiam ka tum vai nen hepa han that chung chuan bik zia hi chu aw engkim a nalh pui vek mai.


"Ka va lawm ve thil pek hlu tak anih dawn chu ka lawm lutuk"


"Khawi ka lo kilh tir ang che aw?"

"A pawi miah lo" ka bulah chuan arawn kal hnaia min kilh tir lai chuan ka lo en renga, vai film a changtupa leh changtunu te in chhai dan te pawh ka in chan rûm rûm mai.

"I sam chu ava rimtui ve"

"I ti lawmawm lutuk e" sana ka han melh zeuh dar 7:30 alo ri der tawh hun han kal chak zia mai chu rapthlak tak ani.


"Ka thi" tih pah in ka thu deuh hnap a, ani lah chuan a thil pek ka lawm lutuk vanga ti ah min ngai aniang chu, "Hei hi chu thil pek hlu tak pawh ani hran lo pawisa ka neih hunah gold tak tak ka la lei ngei ngei ang che" a ti leh a, chutiang zawng pawn ka ngaihtuah lo duh ila chuan min lei na tur pawisa ka pe zawk hial ang pa5 pawh lei na tur ka nei reng mahse gold tih vel leh thil hlu hi ka lawm hran lo ka hna ah ka tui hle tih chauh ani, lawm in duh viau ta pawh lo ni mah ila ka duh hun hun ah ka in bel thei chuang si lo ka nin deuh chang a chawlh lak a New York khawpui ka fan vel nan bak ka pawisa hi ka hmang meuh lo.


"Aih hei hi a tawk chauh ka inhmeh tawk chiah thil manto chu ka phu lo alawm" ka phone arawn ri leh a, rang lutuk in ka switch off hmak.


"Engnga tinge i phone kha i off daiha?"

"Company vai ho hian min rawn call peih lutuk a"

"A tih tawp dan ka hria asin khawi lo la rawh"

"Aih a ngai lo tihian a ni mai pawilo"

"Hlauh nei i va ang ve"


"Vawiin ah pawh ka thinrim emaw i tia tunah hlauh nei ang ah min ngai leh bawka eng chiah nge ka lakah hian hriat duh i neih a?"


"A....engmah ni lo e ka ngaihtuah vang mai mai che ania"


"Anih chuan ka tha e ka tha lutuk tih tur pawimawh deuh ka nei a" a haw ngei ngei theih na tur in trawngkam tha pawh ka hmang thei tawh lo.


"Anih chuan ka haw phawt maiang ruah pawh a sur tawh lo e, mahse kawr hi chu ka"

"Ha haw rawh school ah min pe leh mai dawn nia" a sawi zawh hma hma chuan ka lo ti a.


"Ka kal phawt mai nge ka lawm lutuk e"


Kawngka thleng chu ka thlaha a bike chuan a haw leh ta a, a vawikhat rawn kal na ni mahse thingpui lum thei pawh ka ni si lo, ka rilru tak chuan hrehawm ka ti ve deuh.


Chaw pawh ei lo chuan hmanhmawh lutuk in ka phone ka on a, motor lo kal tur chuan ka ti vata. Rei lo te ah arawn thleng nghal a, dar 8 rik chiah chiah ah kan chhuak hman hrama.