ADDICTED_TO_YOU S2 Chapter : 9 By : Msi (Hmeichhe naupang tereuhte)

Episode kal lai dah luhna

Moderator: writers

Msi Miluhlulnui
Posts: 274
Joined: October 18th, 2019, 7:46 pm

ADDICTED_TO_YOU S2 Chapter : 9 By : Msi (Hmeichhe naupang tereuhte)

Unread post by Msi Miluhlulnui » May 24th, 2022, 10:13 pm

ADDICTED TO YOU S2 CHAPTER - 9

By : Msi, Hmeichhe naupang tereuhte

● SEEING YOU SUCH MAKES ME FLUSH ●

InShot_20220524_220949367.jpg


"Naktukah, Chhanhima te lo va zui phei ve la, zanah Hriatkima nen kan rawn kal ve chauh ang," ka cigarettes bawm chu ka ipte ah ka thun lut mawlh mawlh a.



"Aaaa... in ruala kal ka duh zawk, midang ruala kal ka peih lo, Car in in kal leh dawn tho va ka leng ve tho vang," a ke a then zui nalh nalh a.



"Let tawh rawh," ka sawi zo chu min rawn en kher, "i va han over tak..! Min pehhel in tum ngei ah..!" A khabe dawm meuh in min en a, thaw hawk a ka kekawr ipte zen chung chuan ka kalsawn zui daih.



Min auh zuina pawh ngaihsak lo chuan Office lam ka pan zela, Office kawngkhar ka thleng chiah chu ka phone a rawn ri leh hnuhnawh, min rawn call tu ka en chuan pick nghal zat in kawngkhar chu hawng in ka lut zui a.



"I buai em ni...?" Ka pa chuan a rawn ti sup, ka țhutna lam ka pan phei a.



"Buai hman țep zawk, thil pawimawh a awm em ni..?" Ka ti let a, an ni chu ka nu hriselna a țhat vak loh avangin Hotel hawnni tuk ah khan an chhuk thla lehnghal tawh.



"Awm hran chuang love, meeting hi i kaihruai dawn lovem ni tih rawn zawh che ka tum a. Hotel in rel bawl dan leh kal hmang hriatfiah tawk loh emaw ala awm thei a, chutih rual in duhkhawp lohna lai leh building zauh lampang kha sawi ula ka duh khawp mai," a rawn ti dap dap a, ka țhutthlengah chuan țhu thla in Mira awmna lam chu ka melh zawk a.



"A vawikhatna te chu nangman i rawn kai hruai dawn lovem ni..?" Mira che vel chu ka en zui reng a, ka hna pek kha a thawk mawlh mawlh tih ka hre thei mai.



"I nu hi test dang tih leh a ngai a ka rawn kal hman hmel tlat lo. Mahse bawiha, i kum la naupang viau mahse Hotel enkawl kawngah hi chuan ka ring tawk che alawm i ti thei ngei ang tih ka ring, i u leh Bawihpuia'n an pui thei bawk che a," ka nu a rawn țawng zui ve lang lang avang chuan ka nui zui suk.



"Ka nu result chu enge a an..? Pa, a hma ang khan result dik lo in hrilh chu ka duh tawh miah lo ania," ka ti zui nghut chu ka nu in a hau zui nge ni a nui huk a.



"Aaaa a kal ah lungte alo awm a ni âwm e. Mahse Doctor khan a lung lam hi en țhat leh a duh tlat a chung chu naktukah kan va tih tir ang," dawhkan ka kutzungchal a khawng kauh kauh pah chuan ka bu nghut nghut a.



"Min lo hrilh leh dawn nia, a nih ka dah ang aw zanah ka rawn be dawn che u nia," ti sup in ka țhu țha a, "Hotel i enkawl danah fimkhur la, chuan ka sawi kha hre reng ang che. Ka ring tawk che a, a hmaa buaina thleng ang kha chu thleng tawh suh che," a ti zui leh dup dup.



Țha taka ka enkawl tur thu hrilh in kan inbiakna chu kan ti tawp a, Mira țhutna lam chu hawi leh zawk in thil a ziak mawlh mawlh lai chu ka en reng a. Ka pa te khan ka secretary atan ka la tih an la hre hauh lo, an hre thuai bawk in ka ring chuta an zawhna chhanna tur erawh ka in puahchah țha viau tawh chuan ka hria.



Thaw hawk in ka sira file lo inchhawp pakhat chu ka la lawk a, contract min sign pui duh ho leh kan mamawh chang a catering rawn tih dilna leh sponsor thil ang reng te an ni hlawm a. Mahse heng thil hi chu khu lam pang ațanga buaipui a nih vek dawn avangin helam tan inrawlh a ngai hran lo.



Ka pawm lo tih inziahna chungah chuan signature ka pe mawlh mawlh a, Mizoram-ah chuan khualzin tlawh tam ber pawl a ni a, engkim a ber vek ka duh avanga khulam ațanga ei leh in siam thiam chhawr pawh ka ni reng bawk.



"Sir," lehkha ka sign mawlh mawlh laia Mira țawng thawm avang chuan ka hawichhuak vat a, ka hmaah chuan alo ding rân a, "enge ni...?" En zui ta lem lo chuan ka thil tih lai chu ka tih zawm a, a thaw deuh halh ri chu ka hrechiang ngang mai.



"Englo ania.... pu Sanglawma nupui inti in hmuh che a duh a, ka rawn luh tir dawn em...?" Ka thil ziah lai chu ka tawp chawt. Ka pen chu dawhkanah chuan ka dah thla a, "ka hmuh duh loh thu hrilh la let tir rawh," ka ti zui nghut, pen chu ka la leh a.



"Mahse... a hmuh hma che chuan kal a tum loh thu a rawn sawi a," ka thaw chhuak hawk.



"Hrilh la, amah be tura hun ka neih loh thu hrilh rawh. A kal duh lo țalh a nih chuan Manager i be dawn nia i kal thei tawh ang," ti zui sup in ka ziah zawm mawlh mawlh a.



"Aw le, ka lo hrilh dawn nia. Chuan englo," a ngawi zui daih a, a thusawi leh tur ngaichang reng chuan ka beng ka chhi ru kar a, "sawi la," ka ti sup.



"Aaaa hun remchangah ni mai," a kalsawn zui daih.



"Ding teh..." ka tih nghut rual chuan a ding dat a, ka țhutna nghenchhan chu ka ngheng zui dawt a, "sawi zo rawh," ka ti zui hmuk.



"Aaaa hun remchangah ni mai... a pawimawh hran chuang....,"



"Sawi zawm rawh," a sawi zawh hma hauh chuan ka lo tih khalh hmuk a. A kut pahnih chu suihzawm in a hmer kawp vak tih pawh ka hmu chiang ngangt mai.



"Englo ania... ih," a hmui hnuai a pet zauh, "khatin i hmui hnuai kha pet lo khan sawi mai rawh," ka lo ti leh hluk a. A hmui hi a sexy ka tih tawh kha.



"Aw ah.. englo, ka inthlahrung viau nang in ka hlawh tur tlem a zawng chauh ka lo la lawk thei ang em...?" A zawhna chu ka rin loh lam daih a ni.



A dak chhuak tawh lova, a kun nghal ngal a, a kut pawh a ai nasa in a hmer a a hmer sen vek tawh tih pawh ka hmu chiang takzet.



Ni e... he hmeichhia hi duh ai ka en chiang leh țhin chu a ni e.



"Enga tan nge ka hriat ve a rem em...?" A laka ka dawhthei ru viau țhin pawh hi thil mak a ni a, ka țhianten an point out chat chhan pawh kha ka hrethiam niin ka hria.



"Aaaa sawi a nuam chiah chuang lo nang in ka nau te fee tur ania, tam a ni chuang lova pek a hun tawh sia," a rawn ti zâwi leh sap a. An chanchin hi tu mai pawh hian ka hriat loh an hlau amaw ni tih mai turin a hria apiang hian min hrilh thla zen zela ka hre hneh viau tawh.



"Chuan pawisa kawl lai i nei ta lova, i hlawh tur lak lawk i duh a...?" A bu zui nghat nghat a, a rawn hawi chhuak hmel chu chiang zet hian ka lo en a, a mitmengah chuan inthlahrunna leh zahna, a lang zut zut a chung chu a hmelah a rawn lang chhuak vek thei hial.



"Awww.... dik tak chuan, Hotel ațanga ka thawh hnu hian thildang a inhlawhna hran ka nei thei tawh lova, ka la thawk reilo tih chu ka hria a theih se chuan ka dil miah lovang che. Mahse pawisa kawl lai ka nei tam lova ka nau te fee tur hi a daih lova pek ngei ngei a ngai tawh si a," a rawn ti zui leh sap a.



Hmalam chu hawiin ka ngawi deuh rûn a. Fibby vang chauh va zirtir chawp ngai ka la lut tih chu ka rilru ah a rawn lut leh hnuhnawh. Ka țawngkam chhe tak tak a dawng fo tawh a mahse ka laka a awmdan erawh a ngai reng.



"Engzah nge i mamawh...?" Ti a amah ka en chu mak tihna avangin a rawn meng deuh kâwk. A kâ chu a âng ziau va, chu chu ka hmuh chuan ka nui suk mai.



"Ih.. englo.. nia, ka.. iti tak tak em...? A hmel a lawmna lo lang chhuak chu ka hmuh hmaih lova, chu thil bawk chuan min ti nui leh ta.



"Ti tak tak e, i mamawh zat chu sawi rawh," ka ti leh sup, nui hak in a hawi sawn a ka lo en reng. Chuta a rawn hawi leh a mit a mittui lo tling khat vek ka hmuh rual chuan ka tho chhuak deuh zawk a.



Mak tak maiin a mittui tla hi ka hmu thei miah lo, ka hmuh theih loh avanga hmanni a room chhunga a mittui hruk hul sak pawh ka ni reng bawk. Fibby a țah ka la hmuh ngai loh avangah ka puh mai a mahse a ni lo.



Hmanni a Hotel hnunglama a țap ka hmuh țum pawh a pan lo tura ka insum nasat zia kha.



"Țap suh," ka ti ringawt.



"Aw.. ah, ka lawm êm a chuvang ania," a rawn ti deuh nawk nawk a, a mittui a hru thuak thuak chu kekawr ipte zen chung chuan ka melh deuh run a, ka zep lo a a che vel hi a hmuhnawm ka ti ngawih ngawih.



"Engzah nge i mamawh sawi la,"



"3000 chauh a ni mai," a rawn ti zâwi sap.



"A tlem lovang maw...?" Engvanga zawhna ngah viau nge maw ka nih hrep le..!! Thlamuanpui, a duh a sawi tawh a pe mai la mawle..!!!



"Tlem love, a tawk lutuk,"



"A nih chuan i ban dawnah i rawn lam dawn nia. Ziah luh a ngaih dawn avangin receipts ka pek che i ti bo tur a ni lo, a chiang tiraw...?" Uar zet hian a bu zui nghat nghat a, ka nui leh tawh.



Amak țhin hle mai.



"Ka lawm lutuk e, țha takin ka thawk ang tih ka tiam bawk a che. Ka lawm lutuk," a rawn ti leh zung zung, nuih loh ka tum a mahse ka hmui hi alo sawi leh hman tho nia.



"Kal tawh rawh, chuan... tunkara ka hun hman dan tur hriat vat ka duh ang aw," ka tih chuan a peih țep tawh tur thu sawiin lawmthu a sawi nawn leh a, a kal sawn vat vat chu thlir zui in a țhut naa a țhu fel chiah a lawm lutuk a ban a phar kang ka hmuh chuan ka nui deuh hawk a.



Mahse ka sira glass a ka hmel ka hmuh chuan phun hluk pah in ka pen ken chu ka paih zui nawk a, "awm pangngai rawh," ka in ti zui hluk bawk.



Aizawl lama Manager-i'n min rawn biak chuan an chanchin ka lo zawt zung zung a, buaina an neih loh thu leh engkim a kal tluan thu an sawi chuan ka hahdam deuh huai a ka tlawh theih vat tur thu ka hrilh nghal sup bawk.



Hotel pahnih kar tawn chhen a buaithlak dawn viau nang in Aizawl lam erawh a ding rei tawh zawk a nih avangin ngaihtuahawm an ni hran lova ka tello pawn an kalpui ve thei lutuk tih ka hria a chuvang chuan helam ah hian rilru ka sawr bing a ngai tlat a ni.



File pawimawh ka en mawlh mawlh laia ka phone rawn ri chu ka ban zawk a, Amber-i hming ka hmuh rual chuan nui suk in ka thil en lai chu ka dah a, phone ka beng a ka nghah rual chuan ka țhutna nghenchhan chu ka ngheng zui dawt a.



"In la rawn let lovem ni...?" Ka ti nghal sup, ka țhiante nen khawchhung vel fang in an chhuak a chawhma a chhuak tawh kha an ni a tunah dar 2 a ri tawh dawn a an lo la let miah lo.



"Aw.. nuam an ti lutuk a let an la duh lova. Babe, naktuk chu i rualin ka kal ve duh...?" A aw a pangchang aw rawn ri chhuak ve chu ka nuih suk a, "in lo va kal hmasa ang a zanah kan rawn kal ve dawn alawm. A kawng an hre lova i hrilh a ngai a," tiin ka hrilh a.



"Chu pawh nise, map nen an kal thei lutuk ang. I tello a saw lama lo awm ve kha ka peih lo alawm," a ti leh deuh pang pang a.



"I peih hram a ngai, chhunlamah meeting ka neih a ngai dawn a. Duati, ka hna avangin kan awmdun tam hman lo tih ka hria hreawm ka ti, mahse a rei tawh lovang lo nghak hram rawh buai zualpui a reh țep," tiin ka hrilh leh dap dap a.



Mira-i lam ka hawi a rawn hawi ve chiah chu ka kut hmang in ka bula kal turin ka signal a.



"Ka chawlh hun a tawp țep tawh a chance pawh kan nei thei lova nia. Saw laia kan kal hunah chuan ka hlat ah awm miah suh ang che," a ti leh deuh nang nang a, Mira rawn thleng chu Amber-i hnenah ka biak leh tur thu a hrilh in ka ti tawp a.



"Ka zirtir ang che khan naktuk chhun dar 11 a meeting neih tur kha lo thawn chhuak hlawm la," ka ti nghal sup a, a meng deuh awk a mahse a in siam țha leh vat.



"Tinge...? I hre tawh lovem ni...? Engmah i sawi loh..?" Tiin ka zawt leh.



"Aaa chutiang lam chu a ni tho va thu ziah tur ber kha," a rawn ti nawi deuh nak a. Aw Lalpa leh..!!!! Fibby vang chu ni hauh lo sela chuan a thiam dang ka lakna a rei tawh khawp ang le.



"Ka print vek tawh kha, ka pek che hnuai berah khan a awm ang, uluk la tihsual neih ka duh miah lo," a thaw deuh hak a, a huphurh tih a hmelah chuan ka hmu thei. Thaw chhuak hawk in ka ding chhuak a.



"Lo kal rawh, ka hrilh leh ang che," tiin a țhutna lam ka pan phei a, heti ringawt a nih dawn chuan hnaah pawh hma kan sawn thei hauh lovang. Kan in zirtir hun chhung kha a uiawm lutuk tlat.



"Țhu la," tiin computer chu ka her rem a, a țhutfel rual chuan a kut la in mouse chu ka hûm tir a lehlam chuan a kut lehlam zung țang ho chu siam rem in keyboard-ah chuan ka tin sak deuh ran hlawm a.



A beng bulah chuan kut hniam in tih dan tur hrilh leh zung zung pah chuan a kut chu ka tih chet zui pui mawlh mawlh a. A hrethiam em tih a ka zawh chuan alo bu ve deuh nghat nghat.



"A nih chuan ka tihpui dawn lo che a nangmah in tunah khan han ti ve chhin teh," tiin ka kut chu ka la sawn a, a sirah chuan ding in computer chu ka melh a, mahse engmah a ti mai lo.



"Tinge...?" Tiin ka zawt nghal sup.



"I awm vang aniang," a rawn ti deuh sap a, a mouse humna kut ka en chu alo khur deuh dar dar a. Muangchanga zu vawn sak in a rawn hawi chho chu ka lo en deuh run a.



"Tum la, i ti thei em em ang. I thil tih turah chiah rilru pe la i kiang hnaih a awm te chu awm satliah ang maiin ngai rawh. Sa hlauhawm a ni lova, a seh dawn hauh lo che. Nangmah kha in ring tawk la, 'ka ti thei ang,' tiin in fuih rawh," tiin ka hrilh dap dap a.



Muangchangin computer chu a en thla a, âwm sep deuh dawrh chuan a thaw chhuak deuh ham ham a. Ka kut chu la let in ka ipte chu ka zen zui a, "nangmah kha in ring tawk la," ka ti leh.



"Ummm," a rawn ti ve sap a.



Muangchanga ka zirtir ang chuan ti chhawng ve leh zelin a tih dik loh lai te ho chu ka lo hrilhfiah leh zung zung a. A sira țhutthleng pakhat awm chu la in a bul hnaih chuan ka țhu ve a.



A chhut tur paper pakhat chu lak sak in in zir nan hmang tur chuan ka hrilh a computer hmaah chuan hung in chhiar deuh sap sap pah chuan muangchangin a type ve zela a kut erawh ala chak lutuk lo.



A chhut lai reng chuan a hmel chu ka en a, a rilru a pe tih hriat zetin Computer chu a melh deuh rân a. A mithmul chu a er ve tarh reuh va, a hnar ngul chu a nalh viau bawk. A hmai fang chu ka en thla zela a biang cher lam lek lek a khuavang awm leh zeuh țhin pawh chu ka hmu a, ka en phei zela a hmui mawlh chu en nin har ka tih leh a ni leh ta tlat.



A tawk chiahin a hnuailam chu a pawrh deuh tarh a, a laia phir thla chu ka awmna ațang a lang chiang viau bawk. A laia phir thla ai chuan a dinglam pang a ser awm khan a ti lang sexy zawk.



A hmaiah chuan engmah a inbel lo tih hriat zetin make up hmuh tur a awm lova, hnathawk țhang tih hriat zetin a ro deuh nawk bawk.



"Ka zo e," ka lu ka thing nghal nawk. Mak tih hmel zet hian min lo en deuh rân a zahzela chil lem khalh in computer chu ka en a. Bialnu chhelo tak leh hmelțha tak ka nei reng chung si a ka thlir leh fo țhin hi bansan ka ngai takzet.



"A țhat chu, tikhan theihnghilh tawh lo la a dang kha lo tih zawm mawlh mawlh rawh," tiin ka ding chhuak a, ka țhutna lam chu hmanhmawh ang reng tak chung chuan ka pan phei deuh vut a.



Hriatkima rawn lut ve chiah ka hmuh rual chuan ka ding chawt a, țhu ta mai lo chuan ka lo nghak a.



"I buai lai a ni lo tiraw...?" Ka hmaa a rawn tih rual chuan a rawn ti nghal sup a, ka lo bu nghut.



"A nih chuan," ti a a hmui che ka en chu nichina Mira hmui kha ka mitthlaah a rawn lang a, "i hmui kha," kan ti ringawt.



"Maw...?" A rawn ti deuh hû a.



"Engmah a ni lo, eng thil nge...?" Tiin ka insiam țha vat a, dawhkanah chuan țhu thla in ka kekawr ipte chu ka zen deuh rûn a Mira țhutna lang thei dek dek chu ka melh leh zawk țhin.



"Mason," Hriatkima chu ka en nghal zawk, "engemaw i hriat le...?" Alo ti bul zui hluk a.



"Engmah a ni lo, sawi zawm rawh," tiin ka in siam țha a. Ni e... eng chu maw ka hriat teh hrep ni tleirawl kum 18 mi vel lek angin alawm le ka khawsak le.



"Naktuk ațanga Sunday thleng a kan flat sang ber a reservation rawn siam tu te hi i ring chhin duh em...?" Kut kuangkuah in ka melh deuh rûn a, "rin ngaihna ka hrelo sawi mai rawh," ka lo ti deuh sup.



"Ni e... i ring thiam in ka ring lo reng a ni. Khu lampang Mumbai lama in dawr nena contract lo ziak tawh tu pu Sum a an tih mai țhin K. Vanlallawma kha a ni," a rawn tih rual chuan amah chu ka en nghal deuh run a.



"Eh..!" Ka lo ti ringawt, ka pa dik lo taka puh tu mihring ngei kha a ni.



"Room pek a ngailo," ka ti zui hmuk.



"Oh..!! I tlai hret, an book fel vek tawh a naktuk hian an lo thleng ang. I hmelma mah nise țha taka lo dawn sawn a ngai tlat a ni," ka thaw zui hrawih.



"Ngatinge engvanga engmah min hriattir lo nge an nih..? Khami te kha ka mikhual duh hauh lo," ka ti deuh nghut, thaw hawk in ka ding chhuak a.



"Tihsual an nei hran lo, flat sang ber hauh tu an nih ang in kan hmingțhat ve theihna a ni tih an hre ran a. An tihtur dik tak ni a an hriat an ti mai a ni thleng tur chu a thleng tawh a țha taka lo dawnsawn bak tih theih kan nei rih lo," ka sam chu ka tuai chho puat a ka țawnna pawh a phelh nghal hlawk.



"Hrep tak hian..!!! Engvanga helai hmun a rawn kal nge a nih..? Ka pa laka a chet dan duhtawk lovin keimah ah a rawn țuan ve dawn ta em ni...? A teuh lo, a thleng ngai lovang," ti deuh nghut nghut in ka tei kual sek a.



In hrethiam lo maithei a, Mumbai a kan dawr DELIM khu a hming khuan kawh tum a nei a, hawrawp hmasa ber hi ka pa hming a ni a, a dawt hi ka u a ni bawk. A lai hi ka nu a ni a, a dawt leh hi ka nau a mi veleh. Chuan kei a tawp berah ka awm thung.



Tuna kan mikhual tur pa hian ka pa dik lo taka puh in jail hial a tan phah țep tawh a, khang laia thil thleng kha ka la theihnghilh theilo. Ka pa in a thawh hah sa a a din a dawr pawh a chan lek lek hman hial a mahse a rawn ding chhuak leh.



Ka pa chung a a thil tih ang kha ka chunga tih ve a tum a nih chuan chutiang chu a thleng dawn hauh lo tih hre sa rawh se.



Tlaiah chuan haw tura ka inpeih fel rual chuan Mira pawh a rawn lang a, "ila haw na nge...?" Ka lo ti sup.



"Aw ila awm bawk sia," ka lo bu nghut ringawt a ka thu hriat khan ka mood a siam vak tlat lo.



Drawer-a pawh dawh chu pawt chhuak in emvelope var chu ka phawrh chhuak a, "heihi i mamawh zat chu ania i la thei ang," tiin a lamah chuan ka lek phei a.



"Aw.. aw aw le, ka lawm lutuk e. Ka lawm tak tak," ti deuh zung zung in envelope chu a rawn la deuh sawk sawk a, a khawsazia avang chuan ka nui deuh suk nghe nghe.



Ka bag la a ka kal chu min rawn zui ve vat a, zirtir chawp ngai tam viau mahse a hna hi a mawng a zâng in a tih chin ah chuan a hnehsawh ve tawh khawp chuan ka hria.



Hotel ațanga kan chhuak gate kawt kan thleng chiah chu, "Mami," ti a naupang rawn tlan ter ter chu Mira chuan a pan vat a, a țhu hniam chu naupang chuan a rawn kuah nghal chawt, uar zet hian a țap zui a.



A hnungah chuan a mipa lian zawk chu a rawn kal veleh a mahse mak ka tih zawk erawh chu an hnung a Amber-i nuhrawn rawn kal ve chu a ni.



"Bawihte tinge...? Tinge i ţah..?" Mira chuan a zawt nghal zung zung, pakhat lah chu uar fe hian a țap a.



"Mami... anu," tiin a țap zui leh tuarh tuarh a.



#ZAWMNA

Mira a hawi chhuak ve chiah chu rawn ding chhuak zawk in a nau pakhat chu a pawm lawk a, pakhat chu a hnung lama din tir in a tawlh hnung deuh dat dat a ka dinna bul an rawn thleng tawh.



"Bawihte," Amber-i nu chuan hah tih hriat zet hian a rawn ti thâm chel a.



"Kal rawh.... ka hrilh chian viau tawh che kha," Mira țawng chu a ring hauh lo nang in thinrim aw ri a ni tih erawh ka hre thei. Inrawlh tum hauh lovin ka lo en ve rân a, Hotel Lobby ațang kan lang thei tawh lo bawk a bang lian takin a hliah vek tawh.



"Tih hlauh ka tum lo, hmuh ka duh mai a ni," Amber-i nu bawk chuan ti leh a rawn ban a tum chu Mira chu a tawlh hnung hret a. Ka rin dan kha a dik ka ring sa reng a ni, Amber-i leh leh a ni hian inzawmna eng emaw tak chu an nei ngei a ni.



"Ka phallo ka tih kha. En ta che, i tih hlauh hi, ka nau te mittui vawikhat pawh i ti tla leh a nih chuan ka ngaihdamna hi i tan a in hawng ve ngai lovang tih ka hrilh tawh che kha," a ti sehchilh nak. A nau pawm erawh uar zet zet hian a țap a, ka beng a kiu mai dawnin ka hre hial.



"Tih hlauh ka tum lo, ka ngai a ka hmu chak a biak ka tum mai a ni. Tih hlauh ka tum lo bawihte," Mira chu a nui zui hak, ka en nghal zawk a. A mit a sen vek chutih rual chuan thinrim insum tih hriat zetin a hmui chu a chilh dun ran a.



"Khang kum 2 chhung khan keini ngai lovin i hringnun chu i chen thei a ni lawm ni. Min hmu ta cheng a, min kalsan avanga kan dinhmun avang hian min khawngaih leh si em ni...?" Țah chhuak tih hriat zet hian a ti leh hap a.



"Mahse nu...," a ngawi zui daih a kei erawh chuan rang lutuk hian ka en nghal dawrh. Tunah khan ka hre sual hauh lo.



"Min khawngaih suh, i khawngaihtlak pawh kan ni tawh lo. En la, heti mai hi kan ni tawh min khawngaih suh kan phu lo," a kut a hum ruh ngawt ngawt a. Pan hnaih ka tum rual chuan Amber-i nu lamah chuan a pen hnai a.



"Ka ngen a che nu... ka nau te mittui hi ti tla tawh suh. I nun chen la keini pawn kan chen ve ang. Kan tellova i awm thei a nih chuan keini pawn kan thei ve ang, ka nau te hi an mamawh ka pe theilo a nih pawn hlimna chu ka siamsak ve thei alawm ka kalsan ve lovang. Chuvang chuan khawvel hran kan zawh ve ve ah hian lawm tawk ang, aw....!" A nau kai a a kalsawn zui daih chu ka en zui reng.



Amber-i nu erawh a țap khur ngawt ngawt tih hriat zetin a taksa chu a che hlawk hlawk a. Mira te unau kal liam thleng chuan ka thlir ve reng.



"Thil awmzia min hrilhfiah tu tur ka duh hle mai," ka aw hriaiin a rawn hawi vat. Min hmu chu a meng deuh kâwk a hmuh thiang lo hmu ang mai a ni.



"Wow..!! Hmuh thiang lo min hmu em ni.. ? Nge ka hmaiah hian thil kai a awm zawk..?" Ka hmai chu ka khawih zawk a, ka kut phah chu en in ka ner suk.



"I awmna a rei tawh em..? Nilo, i hre vek em..?" A mittui a hru zung zung. Amber-i hian he chungchang hi a hriat ka la ring hauh lo.



"Naupang te i rawn ûm ațang khan sawi ta ila i zawhna ka chhang ang em..?" Ka mit ko ka sân ak. Ka duhlai bum tu mihring a nih ngat chuan ka en liam miah lovang. Amber-i hian a nu ang tak tak a ngaiin a ngaina țhin viau reng a ni.



"I..i... ilo hre vek amaw...?" A kut hnunglama a biang chul thuak thuak in a ti bah leh nawk nawk.



"Umm... kan ring chhin, Amber-i hian he chungchang hi hre ta se engtin nge a ngaih i rin. A nu ang chiah a a hmangaih em em hian pasal hmasa neiin chu nen chuan fa pathum hial an nei tawh tih hre ta se engtin nge a ngaih i rin...?" Muangchangin ka pan hnai a.



"I chanchin i sawi kha thudik lo vek chu a ni lo ang tiraw...?" Kunhniamin mit ko ka san zui ak a, "baw..baw.. bawiha, chutiang lam a ni lo. Thudik vek alawm ka u fa te an nih kha," a ti bah nawk nawk a.



Thle deuh bak in ka țhen deuh sak, "kan fiam vel che a nih kha, kha i dâng vek alawm va hahdam rawh i chauh hmel lutuk. Ka kalsan ang che," tiin ka bike ka dahna lam chu ka pan phei a, ka ngaihtuah erawh a dang chak viau.



Bike chu ti nung in in lam pan chuan ka inkhalh phei a, Amber-i nu awmdan leh thusawi vel ngaihtuah pah chuan chak zet hian ka tlan zel a. In ka thlen chuan enkawl tura kan dah nu chuan chhuat alo nawt mawlh mawlh.



"I rawn bang tawh a ni maw... coffee emaw i duh em..?" A lo ti nghal zung zung a.



"Vawiin tlai chu duh lo mai ang, hna tlem thawh tur ka nei a. Ka țhiante an lo kal chuan min lo hrilh mai dawn nia, e chuan nu Cht," a chhuat nawh lai dah meuh chuan ka lam a rawn pan a ka lo nui ringawt.



"Ka țhian ten chaw an lo ei dawn a, chaw kha chhum tam deuh rawh aw an vai lut hnem thei teh ania," ka ti chu a nui ve hak hak a. Kei pawh chu nui suk in inchung lamah ka chho a, inthlak lem lo chuan dawhkan lam ka pan nghal vut.



Laptop chu phawrh chhuak in Hotel a reservation rawn ti ho chu ka enkual thuak thuak a. Pu K. Vanlallawma tih chu check kual zung zung in a fapa hming ka hmuh avang chuan ka mouse khawih lai chu ka chawl dat.



"I fapa i rawn hruai a nih chuan thil eng emaw tak tih i tum dawn in ka hre tlat," ka kutah chuan khabe nghat in Laptop chu ka en deuh rûn a. Thil mak a ni, a fapa, Mizoram chhung tlawh duh miah lo hian engvangin nge tlawh a duh thut ang ni, thil mak tak a ni.



A fapa hi gamers niin online games ațanga in hria kan ni a. Tournament hrang hrang ah pawh tel dun in no pawh kan chawi dun tawh nghe nghe a. Misual a ni hran lo mahse hmeichhia hi a duh duh a thin theih rual in ran ang maia ngai tu a ni a. Bialnu hi thla khatah hian a kum zat ang vel hi a nei hman ang kan ti țhin.



A nung khawlo ve a, kan nun pawh kan in hrechiang dun viau bawk a game kan khel dun a nih ngat phei chuan in el țhin tak kan ni.



"Thil mak a ni," ka ti leh ringawt. Engti turin nge an rawn kal ang..? Rin dan tur ka thiam mai lova chutih rual erawh chuan buaina eng emaw tal chu siam a nih ka ring nghet hmiah bawk.



Mizoram aiawh a a team te nen tournament a an tel tur thu a interview hnuhnung ber a a sawi chu ka en nawn leh a. Thil danglam a sawi hran lo, amaherawhchu; 'phatsantu chuan dawn let a nei tur a ni,' ti a a tawp a kharna chuan kawh tum a nei tih hriat zetin ka beng a verh zar mai a.



A hma chuan team khat kan ni țhin, mahse ka pa sumdawnna enkawl ka ngaih avangin ka bansan a informtion pawh ka pe kimchang hek lo. Ka bang ve tawp a ni mai, ka hman chang chang hian ka khel ve leh zawk țhin a nuam ka ti a a hlimawm ka ti viau bawk.



Kawngka ri karh karh ah chuan ka hawi chhuak a, kawngkhar ngheng a in kuangkuah than chung a Amber-i lo ding ka hmuh chuan out zung zung in ka shut down a.



"I buai hmel hle mai," a rawn ti sap, ke lawngin a awm a a inthuam dan lah chu a inhmeh kher mai.



"Buai em em hran lo, lo kal teh," tiin ka lamah chuan ka hui a, nui sak a a rawn kal ka bula a rawn thleng chu lo pawt lawk in ka mal chungah chuan a țhu rân a.



"Ka tibuai ang che a.. inhnuaiah ka lo zu awm ang a," ka biang a rawn tuai rual chuan nui suk in ka lamah chuan ka pawt hnai deuh hrâwk a, "a ngai hran lo, i hmui hian min ti buai zawk," ti sup in a hmui hnuailam chu ka tuai zeuh a.



"Fawp la," a nui ri sak.



"Ka fawh chuan kan tawpna tur i hriat ka ring," ka ti sup.



"A pawi hleinem," ka nui zui hawk a.



"Umm.. a pawilo, mahse inhnuaiah midang an awm a thil mawi a ni lo alawm. Hun kan la ngah tho a," tiin a beng hnuaiah chuan fawp in a nghawngah chuan ka fawp thla zela a rim a tui in a vun hi deh a nuam takzet.



"Umm... vawiin kan kalna vel min zawt miah lova," titau aw ri ka hriat tel avang chuan nui suk in a nghawngah chuan na zet hian ka fawp zui chawk a. Ka dara a rawn ben dawt rual chuan thlah in a khabe hnuaiah chuan ka fawp leh.



"A nuam em...?" A hmui ti pawrh tarh in a bu nghat nghat a.



"Khang lai velah khan ka la kal ngai lo, Picnic na hmun tura kan sawi pawh kan thleng țep hial alawm. Chhanhima nuam ti lutuk kha a nuihzatthlak tak tak, tlang pawng ve il el anga awm mahse a hmun thlen a rem leh em em si lai hmun kha a nuam ber," tiin an kalna vel chu a sawi zui ve sap sap a.



Ka țhutna nghenchhan ngheng chuan a thusawi laia a nui ri mawi tak ri leh hak țhin leh a hmui che vel niap niap chu hmuhnawm ti zet hian ka lo thlir reng a. Ka vannei a ni, a ni ang hmeichhe hmelțha leh nalh lutuk ka nei thei hi.



"Ka thusawi i ngaithla lo reng reng," ka chalah a rawn nem zeuh va, "i hmuhnawm lutuk a," tiin a hmui hnuai pawrh deuh tarh chu fawp zui zeuh in ka thawh kan pui a.



"Lo zuk chhuk la, ka inthlak anga ka rawn chhuk ve nghal ang, ka reilo ang," a biangah chuan ka fawp zeuh va. Ka sam țawn tura min tih pah chuan ka kamisz kawrkilh pakhat chu hmet phelh in nui hak in a chhuak a kei pawh chu ka kamisz en chuan ka nui ve suk.



Thawmhnaw bawm lam pan in ka hak tur ka la chhuak a. Thawmhnaw hi a dum lo chu ka nei em em lova t-shirt lamah hian tlema rawng dang ka nei leh deuh va, a nih loh chuan awmhmun atan chuan a dum chiah ka duh.



Intifai zung zung in ka inthlak sawk sawk a, ka sam chu țawn a ka phone la in inhnuai lamah ka chhuk thla a. An inti hlim ni ngei tur a ni, an lo au leh dar dar țhin.



An lo țhutkhawmna ka thlen thlak rual chuan Danny bula țhutna âwl ah chuan țhu thla in ka phone chu ka phawrh chhuak a message awm chhan ngai chu ka chhang zui leh mawlh mawlh.



"Hey.... i secretary atana hmeichhia i la hi ka la âwih thei lo," Chhanhima chuan min rawn nghawk zauh.



"Chu ngawt chu em ni ilo la ngaihtuah a...?" Ti let sup in ka type mawlh mawlh a.



"Amak alawm.... vawikhat mah hmeichhia ila la ngai lova, lak pawh i duh lo kha ania. Awm a awm ami, min hrilh teh... khapui a hmelțha reuh si a hmui te kha," ka melh zui hrâwk..!!! Alo en chiang hman viau em ni..?



"Enge... khati vak a mi melh..? Ka hmuhdan ka sawi mai nih kha," ka hawisawn a, min rawn țhut hnaih sauh lehnghal, "ti teh țhiana. Kan chhuah hnu khan tu mai pawh hian kan sawi asin, kan tan chuan thil mak a ni tlat a ni, a chhan han sawi teh," zâwi te hian a rawn ti leh su su.



"Ava mak sek e aw... hmeichhia pawh la ila enge maw, an thiam a ka la a ni mai," ka ti zui hmuk, "ka âwih te hi i ring em maw ni chheih chhuih le. Hey... min hrilh țhat pawh chu enge a har viau na...? I țhianpa ka nih hi," ka beng bulah chuan a rawn zawi te tak hian a rawn ti deuh tawn tawn.



"Ini lo ngai a mi...?" Ti deuh sup in ka țhu chhuak a, "in hman chuan khel ang, ka khelh lohna a rei ang reng tawh," dawhkanah chuan kut ka zu nghat a.



Amber-i ka en chu rum zet hian min lo melh a, "vawikhat chiah," ka ti chiah chu tho nghal phat in choka lam chu a pan nghal nal nal a, "ngaipawimawh suh u, lut ru," ka țhiante min melh țhupna chu tih khum hmiah in keipawh chu ka țhu țha a.



Ka games khel tur hi tuman min dang theilo, Amber-i hian a haw lutuk a, thlem a harsa lo a ni chu. Mahse ka bansan phah chuang lova khel erawh ka khel tlem ta viau thung. Bansan ka duh lova ka bansan pawh ka ring hek lo, sual a nihna ka hre bawk hek lo.



Chaw ei dawn țep ah Hriatkima leh Fibby pawh an rawn thleng a, chaw ei zawh chuan kawtah mei chhem in kan titi deuh laih laih a naktuka kal dan tur leh hun hman dan tur te pawh kan sawi ve nual bawk.



"Midang zawng in lo va kal hmasa ang a. Tlaiah Hriatkima leh Fibby te nen kan lo kal ve leh ang," an phun deuh nak nak chu ka nuih suk a, "hna laklawh a awm loh chuan a ai hma pawn kan lo kal maithei, tui te lo chawi lawk a ngai dawn a lo va buaipui hmasa an awm a ngai bawk si a ni," ka ti leh dap dap.



"I fair lo hle mai," a rawn dak deuh vah a, a tum deuh pâk bawk.



"Ka rawn thleng ve vat dawn alawm, nangman ilo kaihhruai loh chuan tuman an hre si lova," tiin a hmuiah chuan fawp zeuh vin nghet zet hian ka kuah zui a.



"Duati, i nu te helamah an la awm nge an chhuk tawh," ka zawhna avang chuan min rawn en deuh zawk a, ka hriat ngei a ngai a tin ni.



"Ka pa chu a chhuk tawh, ka nu erawh chu tihtur pawimawh ala neih thu a sawi a ala awm rih. Taka, ka hrilh ang che ka tia, ka nu hi heng lai vel ami te hian an lo hre lutuk alawm amak ka ti nia ka vawikhat kalna tur a ti bawk sia," a ti zui leh barh barh a.



Ka thil chhui dawn hi a dik ka ring ta viau bawk.



"A nih chu, vawiin khan ka hmu a Hotel kawt ah," ka ti let a, Mira khan, 'nu' tiin a ko ngei a. Amber- u fate pawh nise khatianga a rawn tih nachhan tur kha a awm hauh lo.



"Zinga min hrilh dan chuan a țhiante thawhna sikula a kal tur thu min hrilh a chumi a rawn haw lam chu i hmu a nih ka ring. Ka pa lah hian a ngai hma sia a rawn call reng a ka nu lah nitin a chhuak ve thung a, ka pa pawh hi tleirawl ang mai," a nui zui hak hak.



"I ni tellova mut hreawm a ti a nih dawn chu. Kei pawh khu lama min awmsan chang a keimah chauh a mut hreawm ka tih ang khan," min rawn nghawk zui zeuh va, nui huk a kuah nghet sauh in a beng ah chuan ka fawp zui vang vang.



"Lo țhu la, in tur ka va la ang e," tiin ka tho chhuak a inchhung lam pan in cold drinks ka dah khawm lam chu ka pan phei nghal vat.



An induh țheuh ni a ka hriat chu ka la chhuak zung zung a, " Pu K. Vanlallawma kan mikhual dawn tih ka lo hria a," Fibby țawng ka hriat rual chuan ka bulah rawn țhu thla in ka lak chhuah sa ho chu sarang ah chuan alo khung mawlh mawlh a.



"Ni e... ka lo hre har erawh a pawi takzet. A fapa a rawn hruai tel lehnghal dawn a fimkhur thu hla ah hnathawk ho awmdan tur leh fimkhur ilo zirtir țha dawn nia," ka ti sup a, kan in ven ve loh chuan awlsam takin kan mualpho ve thei ang tih a hlauhawm tlat.



"Ka hria e ka hria e, buaina awm palh thei ah a inveng duh deuh tihna em ni...?"



"Umm... ka pa a huatna kha ala reh lo a nih ngat chuan eng emaw tak an tih duh ka ring mai mai. Ka pa kha dikna avangin a ding chang leh zawk si a la na tan chuan a na khawp ang, chuan khami ni court ni a a hmel ah khan a lang bawk in ka hria," alo bu nghat nghat.



"Heng mi te hi chuan remchang zawng zelin hun remchang an hmuh veleh chuan an tum hlah an tum ngailo tih a fapa ațang hian ka hre tawh alawm chuvang chuan duty pawh ti khauh deuh ula," ti a fridge chu khar in ka ding chhuak a.



"Ka hria e ka hria e, Hriatkima'n min hrilh deuh thuak tawh alawm naktuk lamah ka lo buaipui dawn nia," ka bu deuh nghut a, kal a tum chu ka rilru a thil rawn lang zawk avang chuan ka ko leh.



"I sawi dan khan Mira hian nu leh pa a nei tawh lo a ni lawm ni...?" Ka in her zui vut a, zanin chu enge maw awmzia ni, ka rilru ah hian min mawlh leh țhin.



"Amah chuan a nu a thih tawh thu min hrilh a. Mahse ka pi chuan kum hnih hmalam khan pasal a um san a ti a enge thudik zawk ka hrelo. Tinge min zawh thut a...?" A rawn ti deuh ha a.



"Eng ni love, vawiin a a profile ka en khan ka zawt chiang ang che ka ti hrim hrim a kal tawh rawh," ti a chhang ringawt in, sa ka lakchhuah nghal tur thu hrilh nghal in choka lam ka pan phei a.



Fridge a sa awm chu la chhuak in dawhkanah hung chung chuan ka innem khalh ren rawn a. A nih chuan a nu leh pa te an la thi hauh lova, a nu chu Amber-i nuhrawn ngei hi a ni bawk. An awmdun vawiin khan ka hmu ta a, an hmai fang engkim a in ang vek Amber-i nu nulat lai pawh a tih theih ngei ang.



Mahse engvanga Mira leh nu Marina-i pawh chuan dawt sawi reng reng nge an nih. Amak hle mai. Amber- i nu hian thil eng emaw tak thup a nei ni ngei tur a ni, a chanchin ka hriat tak leh Amber- hnen ațanga ka hriat a in ang ta tlat lo.



Thaw hawk in sa chu ka chawi chhuak a, hem zui vut vut in drinks nen chuan kan ei a an rui phur tawh hlawm bawk a an han in zai siak tak tak chu țhenawmte pawh an rawn chhuak ve leh nawlh țhin.



Zinga Hotel ka thlen meuh chuan dar 10 a pel duai tawh a. Office lam pan nghal in Office kawt a staff pahnih lo awm chu min hmuh rual chuana an lo ding nghal zawk a.



"Ka secretary a thleng tawh em...?" A sir zawk a țhu chu ka zawt zui sup.



"La thleng lo, kan thlen hma chuan a thlen ka hre si lova mahse kan awm hnu chuan alo la kal lo," pakhat zawk in a rawn tih rual chuan ka bu nghut. Ka mamawh viau rualin a rawn thleng ve mai ang ti rilru chuan luh ka tum a.



Mahse Fibby min au ri avang chuan ka tawp leh rih, "tun hi eng hun nge a nih i hria em...? Working hours ania ngatinge hnathawhna ah i awm loh Fibby," ka lo ti nghut.



"I laka sawi duh ka neih vang ania. Zingah khan Mira alo kal a, vawiin chu hna a kal theih loh tur thu lo hrilh mai tur che in min ti a leh lo hrethiam leh hram hram turin a duh che," ka rûm zui nghut.



"Min hrilh hmasa tur khan ka hrilh chiang viau si a," ka ti chang fak.



"Aaaa lungawi lo chuang lo la, hrilhna tur che a neih loh avang ania call na tur che pawn i number a neih loh bakah call na tur che a nei lova. Ka kal ang e, hnathawh nuam u aw," a kalsawn rual chuan kawngka chu hawng sawk in Office chungah chuan ka lut zui a.



Dawhkana ka bag khai theh thlak nawlh pah chuan vanvadak in ka thaw chhuak hawk. Hrep tak hian..!!! A rawn kal dawn lo a, min call theilo a nih pawh in ka chenna in ah emaw rawn kal in a chhan min hrilh se a pawi ka ti hauh lo.



Chiang deuh tak khan ka hrilh tawh in ka hre sia engvanga ka thusawi pakhat lek pawh zawm theilo nge maw a nih hrep le. Min rawn hrilh a ka hriatthiam theih nana rawn sawi tur a ni, mahse a ti hauh lo.



Naktukah rawn kal rawh se, a chak hauh lovang a duh aia tam hna in alo hmuak khawp ang. Chu pawh min hnial leh a nih ngat chuan a haw pawh phallovin tlaivara a thawh tur ka pe khawp ang.



Ka țhutna lam chu pan in ka țhu thla dawt a. Mira țhutna lam ka hawi phei alo ruak deuh huau ka hmuh rual chuan a thawhna la reilo mahse a kim ta tlat lo hian ka hre tlat pek.



A rawn kal leh hunah chuan chanchin in hrilh nan a phone number ka mamawh ang in a ni pawn ka phone number a mamawh a. Awlsam taka inziak la thei tho mah ila amah ngei ka dil khawp ang.



"Hrep tak a..!! Thlamuanpui, theihnghilh vat teh. Engvanga ngaihtuah ve sek nge maw inih le," ka phun deuh sup, a țhutna lam ka va hawi phei leh chu alo la ruak hiai a ngawi reng chuan ka en ngawih ngawih ringawt a, nimina ka thil zirtir lai ka mitthlaa rawn lang chu duh lo zetin lu ka thing zui nghut.



"Tu emaw chuan a thinlung in a thusawi a pawm ngam leh tawh lo a ni maw," ka u aw ka hriat rual chuan ka hmai chu ka tuai zui puat a, in tih pangngai luih tum hram hram pah chuan ka thaw chhuak deuh ham ham.



"Thinlungin sawi a nei lo hi kan buai zawk a nih hi," ka ti hluk chu a nui nghal hak hak.



"Enge ilo tih dawn a..?" Ka tih zawm a.



"I hnathawk ka rawn en thli tlai dawn che, i thawk țha em tih te ka en duh a, i rintlak tak tak dawn em tih te fiah ka duh a," ka nui zui huk.



"Fiah ka ngai love, Bawihpuia nen min rawn zui ve dawn em...?"



"Zui lovang, duh leh amah chu kal se helam ka lo buaipui loh chuan mikhual thlen palh ah a buaithlak palh ang, va in ti hlim ula ni mai in kal darh leh vat dawn a," Office chu enkual in a duhkhawp lohna lai te chu a sawi zui nak nak a.



"Ka nu chanchin kha i hre tawh em...?"



"Hre tawh e, ka pa in min hrilh alawm. Hei vang hi ania meeting kaihruai vat la ka tih ni, ka nu hetiang hi a ni sia a rang lama chhuk vat ka duh. Mumbai lamah pawh ka tei thla rih lo mai ang a an enkawl thei tho. Nangpawh rawn chhuk har lo la ka nu kan enkawl a ngai amia," ka bu deuh nghut a, titi mawlh mawlh chung chuan chunglam te lo hawl ve in kei pawh chuan hna ka thawk mawlh mawlh a.



Tlai dar 3 velah chuan kan tum ram lam pan in kan in khalh chhuak ve leh.



"A nuam dawn hle mai, tui chen a chakawm tawh tui a tam si," Fibby chuan a ti deuh lang lang.



"A țullo, i hleuh thiam loh kha," Hriatkima chuan alo ti hluk.



"Ka hleuh thiam reng a, nangman tih i phallo mai mai nih kha. Vawiin chu ka hleuh ve dawn, a bak a awm lo min dang miah suh min lo zawm ve zawk rawh," pakhat lah in a ti leh pang pang a, "hrilh ve teh," a rawn tih deuh nghut na chu ka lo nuih ringawt.



Ka phone rawn ri chu loudspeaker-ah dah in ka chhang zui a, "in lo thleng țep tawh em..?" Amber-i chuan a rang ti deuh lang lang a, a aw chu a ri hla viau mai bawk.



"Thleng țep tawh, km 5 vel ala ngai ang. Eirawngbawlna tur in peihfel tawh em...?" Tiin ka zawt let a, bel khawng ri te nen an ri chel chul a an bengcjheng lek lek



"Peihfel tawh e, an peih fel vek tawh rawn thleng vat ula ni mai, ka dah aw," ti leh deuh lung lung in a off zui hmak a, "a nawm hmel sa hle mai a," fibby bawk a ni.



"Nawm hmel ti mah la tui i cheng dawn hauh lo," pakhat lah in alo ti ve leh, "awi ka va han ning tak che. Bakah, ka va cheng âwm e awww i duh leh min veng la tui ah ka zuan thlak san che a ni mai," a ti vei leh zat zat a, a bialpa hi a hlau eih lo chu a ni e.



Rei ve deuh kan tlan hnu chuan kan tum ram chu kan thleng ve ta hram a, eirawngbawl in an lo buai luih luih a keini pawh chu inthlak in tihtur awm ang ang chu kan va ti ve sap sap a.



Zan a ni tawh, an ril ala țam hlawm loh avangin chaw ei an la ti lova. Hmeichhe ho pawh rak teng tung chung in tui ah in fiam bawrh bawrh hlawm a kei erawh bathlarah ding in beer chu ka lem leh zeuh țhin.



Ka ngaihtuahna erawh hmundangah awm in khanu bawk kha a ni ka ngaihtuah leh tawh ni. Vawiin a lo kalloh chhan tur âwm ang ka ngaihtuah ngial pawn ka hre thei lova, a dam lo ti dawn ila a khawsik a rehna a rei tawh in a țhat tawh hmel viau si.



Na a nei ti dawn ila a dam țhat hmel ver vawr si a han ngaihtuah tur ka hre mai lo, nge ni ang a a thawh peih tawh loh hrim hrim avangin a rawn kal lo a ni mai zawk. Oh God!!! Thlamuanpui, thil âwihawm loh tak a nih chu..!!



Mahse hmanni khan Amber-i nuhrawn kha ka nu ti a kovin țah insum zet hian a en zui ngar ngar a nih kha. An pahnih inkarah khan eng emaw tak chu a awm chu a ni ngei ang a, a nau te pahnih in an hlauh em em danah khan eng emaw an tawk a ni ngei ang.



Nge ni a Amber-i nu khan kei min hlatsan tura hrilh in alo vau zawk em ni..? Ka ngaihtuahna avang chuan beer chu dawhkanah nghat dawt in ka tho chhuak zawk a, ka thaw zui hawk.



Chhuatah chuan ka tei kual sek a, ni lo se ka duh a mahse ka ngaihtuahna hian kha thil bak kha a ngaihtuah thei meuh lo.



Alo ti tak tak a nih chuan a țawngkam a na si a, la na in alo țap kerh ker ang a ban te hi alo rilruk mai lo maw.



Hrep tak a...!!! Chutiang a thleng theilo, ka bula a rawn thawh ațang zawkin ti teh ang engtin mah ka awm khum lova ka țawngkhum ngai tawh lova ban duhna tura tih engmah ka nei hauh lo bawk.



"I ngaihtuah viau chuan kal la, va chian mai la," ka ngaihtuahna lehlama thu sawi avang chuan ka thaw vak. Kal thei ka ni lo, hetah ka țhiante awm in ka bialnu ngei pawh a awm a engtin nge hmeichhe dang ka ngaihtuah hheih zawk.



"Hrep tak chuan...!! Ka hrechiang anga ka let leh ngei ang," ti deuh nghut in room chhungah chuan lut in jacket leh chahbi chu ka la chhuak a, ka insum leh thei dawn chuang lo hmanhmawh zeta step a ka tlan thla chu ka kalna tur min zawt luai luai a.



"Khawchhungah emergency avanga let lawk ka ngai a, ka lo let har lovang chaw pawh min lo eisan dawn nia," ti a gate ațanga chhuak in ka Car lam ka pan a ka tih nun rual chuan chak zet hian ka dawk chhuak nghal zawk.



Ka tlan chak bawk a reilote ah khawchhung ka thleng thuai a, Mira te in lam pan chuan chak zet hian ka in khalh chhuak lehnghal a, an in piah deuh a ka din rual chuan seat belt hmet phelh sawk sawk in ka chhuak zui a.



An in lam chu tlan meuh va pan pheiin an kawt hungna pal bul ka thlen ruala inchhung luhna tur step a hmeiche indawm kun ka hmuh rual chuan ka pan hnai vat.



Ka hnaih zela țap ri ka hre hnai1 telh telh a ka hmanhmawh zual sauh. A bul ka thleng tih ah chuan a țap ngei a ni tih ka chian ta, Amber-i nu chuan a hriat ah atana hriat hreawm tur alo hrilh ngei a nih dawn hi.



Sala..!! Ka en liam mai mai hauh lovang. He hmeichhia hian Amber-i nena kan inkarah inrawlhna a nei hauh lo.



A indawm kum reng chu en vung vung in a lu ah chuan ka tuai sak a chuta a rawn hawi chhuak a mit sen vek chunga a biang a mittui luang ngiai ngiai chung a min rawn en chu a biangah chuan dawm sak vat in a mittui chu a rawn luang zung zung a.



Țhu hniam thla vat in ka hruk sak nghal zung zung a, a hmui khur deuh dar dar chu ka tuai sak a a țap khur zui ngar ngar.



"Hey.... i țha em...?" Kan ti ringawt, ngawi reng a maimichhing chungin a țap ri tawh lova mahse a biangah mittui erawh a luan hian a rawn luang zung zung.



"Hey... i țha em..? Nu Marina-i'n i lakah sawi a nei em...?" Inthlahrung tak chuan ka zawt leh.



"Engtin nge ka tih ang. Ka nau sawn ka nu bula kal a ngen nasa lutuk a tihdan ka thiam tawh lo, thlem dan pawh ka hre lova a bula sawi tur pawh ka hre tawh hek lo, a țap muhil a," a inhnit zui hlawp hlawp.



"He thil hi a thlen ka hlau reng a, ka nu a hmu a nih vaih chuan a zui hreh dawn hauh lo tih ka hriat vang a ni," a ti leh hlawk hlawk.



"Mahse, i nu chu a thi tawh iti emaw tia...?"



"Ala dam, a la dam a ka nau, ka nau Sawmtea saw a bula hruai a tum a mahse ka phallo, a tellova ka enkawl a ni a ka nau ka thisen zawmpui, ka enkawl chu a lak hran ka phallo ka hlat ah a awm ka phallo va a tello chuan ka nung zo lovang," a mittui a luang zung zung.



"Min kalsan chuan ka nung zo lovang, mahse ka nu kha a ngen nasa lutuk a a sawi bang thei silo," a insut zui hlawp hlawp chu a chal ah chuan ka fawh sak vang vang a hnem dan tur ka hrelo ka hrelo takzet.



"Mira," kan ti ringawt, a hmui khur dar dar chu ka khawih sak a. Hun lo viau mahse tunah hian he hmui sexy zet hi ka fawp chak takzet, ka fawp lo a nih chuan hei aia chance țha hi ka hmu tawh hauh lovang.

🦄🦄


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)