HOPE CHAPTER-14

Episode kal lai dah luhna

Moderator: writers

Winter bear
Posts: 29
Joined: April 21st, 2022, 11:05 pm

HOPE CHAPTER-14

Unread post by Winter bear » May 24th, 2022, 11:18 pm

Hringnun hi amawia, a kiangah rei tak chhûng hun la hmanglo mah ila ka nunah hlimna tam tak min thlen tawh a,ka kianga awm reng tur atan chuan ani aia thlan tur dang ka nei lo.






"Kanlo haw tawha,ka nu hian angaih thu che a sawi fo ṭhin a,chaw eiah sâwm leh rawh ati reng maia ,hun remchang i insiam thei angem le"tiin Jacob chuan an zinna chanchin leh Anu chungchang te chu phone aṭang chuan min rawn hrilh luama.Keipawhin Nu Mali chu tlawh ve ngei ngaiin ka hria a,a mi duhsakna leh min ngaih der ve na te chu ka phulo viau zawk ani.Hun remchang hmasa bera an ina chaw ei tur chuan ka in tiam a,ani pawh a phur ve viau in ka hria.








Nu Mali hrisel na ṭhat vakloh vangin hun enge maw chen Phai lama in enkawla an awm hnu in nimin lam khan an lo haw thei hram anih hmela.Phone ah kan in be fo a,Nu Mali ngei pawhin a nawm deuh lai chuan min lo be ve fo ṭhin. Rinsangpuia nena kan chanchin engmah ka la hrilh loa,a ṭhian te hnên aṭangin ahretawh angem tih tak ngial pawh ka hrelo a,kan in biak changa a sawi lan ngai loh vang hian a hrelo ni turah ka ngai hmiah a.Diktak chuan alakah inthiamloh rukna ka nei a,min duh thu a sawi pawha hnarin ṭhian nih ka duh thu in ka chhang ngeia,chutiang chiah chuan kan awm ta reng bawka.







A ṭhian kawmngeih emem nên kan inkar hi hre ta se min huat mai ka hlau a,midang rilru tih nat hi ka thil duhloh ber te zing ami ni mahse ka thinlung hian duhzawng anei ve miau sia,chu ka thinlung duhzawng chu Rinsangpuia ngei hi ani bawk.









Ani nen pawh kan in zuina karhnih alo ni ve ta reng a,buaina ho lam tête hi chu awm ve ṭhin mahse kan in kar sawi nghing thei khawp buaina kan la nei lem lo.Ala reilo lulai ve em bawka!!








Nidang ang bawkin phûr sar in ka in siam malh malha,ka zai pah rat rat bawk.Darthlalang hma a uluk zeta in en lehin ka Bag ka khaia College lam pan tur in ka room chu ka chhuahsan veleh ta a.







Room in hnaih tea awm e ti lo chuan Hruaii nen kan in hmu khat em em a,min be ngailo a keipawn biak enah ka en biklo.Ka ṭhiante tan ṭhian nihna a neih ve miau vang chuan College ah erawh kan la in zui ho renga,min tibuai zawng erawh in a khawsa ngailo thung.A ṭawngkam na ve tak leh chet phung ngeiawm zet zet erawh ala ngai renga,ka engah teh vak erawh athawk tawhlo thung.








Nidang ang tho in fai sar hian Hostel bul lawkah chuan Rinsangpuia'n minlo nghak leh reng tawha,ka thlen phei rual chuan min nuih sak in ka bânah a kai chat.A tihziah danin a Bike chu Garage ah adah hmasa tê tê a,chumi hnuah min nghâk tûrin alo kal leh ṭhin.








"Jacob te lo haw kha I hria em?"satliah deuh taka ka tih chuan lu bu nghut in a hriat thu asawi ve maia,ngun zeta min en hian"In la in be ṭhin elaw"ati heu.A hmelah lawmlohna ka hmu hranloa,a ṭhianpa hian ahre tawh nge thik enah a en lo zawk erawh ka hriatpui hauhlo thung.








"Be ve zeuh zeuh tho,Nu Mali pawn min lo be ṭhin,chuan chaw eiah min sâwma"kal phei pah chuan ka ti a.A ngawih zui vang vang hnuah chuan"ṭha lawm a fel ania Nu Mali chu,keipawn ka lo eive ang kan hman deuh hunah kan kal dawn nia"ṭha tak chuan ati ve a,a lungawi loh viau mai kha ka hlau hman ania,mahse chuti taka rilru tê anih loh zia lantîr in min phûr pui hial zawk a ang.








Kan Classroom kawt thleng min thlah in min lêt san a,diklo deuha min ngaih emaw a lawmloh viau ka rin laia ka rin loh dan deiha a awm vang chuan ka thawveng huaia,ka tluklo viau zawkin ka hre bawk.








Sir Hminga rawn lut chu aphur hmel viau maia,zirlai pawh zir rei lo in kar thar maia College Week kan hman tur chungchang chu asawi a,kan zavai mai chuan kan phur tlang bawk aniang kan thawm pawh aṭha ham ham viau.









Min khap dai thei hramin chiang deuh zawkin asawi fiaha,House in ṭhen dan tûr ruahmanna siam angaih thu leh eng eng nge tel tur tih te.Class CR leh Assistant CR chu Class bana amah hmu tûrin a chah zui bawka.







Kum dang zawng aiin kumin hian College Week kan hmang tlai ani awm a,achhan pawh College Building thar sak vanga buaina neuh neuh a awm vang ani.Nileng chuan lehkha zir pawh ngaihsak mumal lo in Week hman dan tûr mawlh chu kan ngaihtuah tlâng a,kan vai mai chuan phûr vet vet tak kan ni.








Ka ṭhiante chuan Sports lampang an theih loh zia leh kotlang A team atân erawh an ṭhat viau thu an sawi uar khawp a.Kei erawh in eng vak ka sawi lo thung,thingtlâng lam mi ka nih vang nge têt te aṭanga harh ṭha zet,in fiamna pawh ti thei deuh zul hi ka ni ve a,a harh chi ka lo ni vei bawk nen tih theih loh hi ka nei mang meuhlo.








Chutih rual erawh in in bah tân vak ka tum hranlo a,kan in daihlo viau anih hran loh chuan engah mah tel ve loh pawh chu ka pawi ti hranlo viau.








Tesi sawi hmang ah Rinsangpuia chu Basketball thiam tak ani awma,Guitar a ngainat thu leh zai thleng a thiam tak anih thu chu asawi a.Ka bulah erawh chutiang thil vel chu ala sawi hauhlo a,kei hi mi biang biak thiam tak ka lo ni lo bawk nen a ngainat zawng leh duhzawng zawhna chang pawh ka lo la hre hauh lo hi ania.








Atukah chuan Jacob pawhin Class arawn kal leh thei tawha,kan ṭhianho chuan rin loh takin tlereuh mawi zet zet hi min lo hâwn ṭheuh a,kan beisei loh em vang chuan han lâk mai pawh chu anuam lo hial zawk.








Kan vai mai chuan mawipui viau hian kan in hre hlawma,hmeichhia tih takah kan lawmna atling tham hle.Chhun chawlhah pawh kan vai mai chuan kan in zui dul dul a,Puipuii leh Lawmzuala pawh ahmaah kalin an in chhaih nui leh ar ar tawh a.Ka rinai takin Lawmzuala hian fiamthu alo duh a,kan ṭhian ho pawh hi min ti nui tam ṭhin viau.









Zopara aw rawl hi aring fâl in a thawm hi ana ve hrim hrim,Canteen ah pawh chuan a au zui lâng lâng a,kan lut deuh huk bawk nen thawm tam zawk chu kan ken luh ni mai awm ani.A hnung ber kil lam bawk chu pan in dawhkan an dawh zawm leh tawha,Senior an ni tawh bawk nen an in ti thu ve viau hlawm tawh.









Ka bula Rinsangpuia lo ṭhu chu nui var var hian ka lo en a,a rawn ṭhut thlâk rualin ka kut ahum nghal chat.Ka bengbulah rawn kûn hniam in "Ka ngai tawh che"ti in aphun sup a,kan bul vela mi te chu an thawm ana bawk a,tumah chuan kan awmdan chu ngaihven awm pawhin an awm lemlo.Lehlamah kan chungchang hre sa vek te an ni bawka,hrechhuak zawkin Jacob ṭhut na lam ka hawi zuia,a hmel ka hmuh chiah chuan min lo en ve reng tih ka hmu zuia.Kan awm dân chu a hriat thiam hmel chiahlo bawk.











Kan eitur chah alo thlen chuan tui ti takin kan ei tlâng a,kan vai mai chuan ṭhian hun rei tak aṭanga lo in kawm tawh ang mai hi kan ni hlawm a.An fiamthu a sâng in hnehsawh deuh deuha mi fiam te hi an hrat a,tuman haw bik lo in kan nui liam thei zel ṭhin.









Canteen aṭanga kan chhuah chuan Jacob an min kheuh zeuhin min biak lawk aduh thu asawi a,midangin Rinsangpuia an lo pawh pen bawk vang chuan a kalna lam chu ka pan ve thuaia.Tlema hmun reh deuhah chuan inhmachhawnin kan ding ta ran a,tlêm chuan ka zâm ve deuh,inzawmna neih pui hranlo mah ila ka chunga a rilru lo put tawh te ka hriat ve vek tawh vangin nuam lo tihna ka nei.










A hmaah chuan dingin ka kut ka tuai pah neuh neuh a, ṭawng chhuak hmasa ah ṭang in "Thudik ani em?" Tih zawng hi asawi a.A sawi tum chu man tho mah ila "Eng chu"ti in ka chhâng ta tho a.A mit ti zim sun a min melh in "Sangpuia nên hian in inngaizawng taktak em ni"ati leh nghat a, ṭawng kaa chhang lo chuan ka bu nghut ringawta.









A thaw chhuak hawk ri ka hriat chuan ka melh chho ran a,chutah nui sak in"Amah hi chuan a duh che tih ka hre tawh a,nangmah zawk hian eng rilru nge I put ka lo hre ve lo a"tiin asawi zawm leha,chhan mai dan tûr hre lo chuan ka ding renga,ka awmdan chu lai tak ani.








Kan ngawih reng takah chuan"Nia,ala reilo"tih zawngin ka chhang let,zat loh hmel zeta nui in minla en ran a,thil tih sual nei tu emaw hmaa in sawi fiah tur te pawh ka ang rum rum in ka hre tawh."Ka lawmpui cheu ka tih chuan dawt sawi ka ni dâwn sia, engpawh chu nise ṭha tak zêl in aw"tiin ka dar ah a beng thak a.










"Ka duh che tih I hriat kha,ka duhthu a ka tihtawp ngawt theih ani silo a min hrethiam ania'ng chu.Mahse in in karah erawh eng buaina mah ka siam lo ang,chuanin ṭhian kan nih kha aw"ahma aia pangngai zawk chuan ati leha,a thil sawi te vang chuan ka hahdam huai pawn ka hre chuanglo.Nuamlo tihna ka la nei renga,an ṭhian dun inkar tichhe tu ka ni ang tih te hlei hlei chu ka hlau.









Nui tawi takin ka ngawi ran a,amah bawk chuan "Kal tawh ang,minlo ngai diklo palh ange ,saw pa ve sawn tumah duh ala nei ngai siloa atawrh hlelhawm viau in nia ka rin ni"nui suk suk hian ati luam a.









Chhang tawh lem lo chuan a kal na lamah chuan ka kal zui ve zela.Tual zawla lo ding reng chuan nur nang hian min lo en reng tih ka va hmu nghala,ahmel aṭang chuan alâwm hmel viau loh.Jacob chu thleng hmasa zawkah ṭang in a ṭhianpa darah chuan hmer salh in a kal tlang zui mai a.








A bul ka thlen phei chuan a kekawr ipte zen in ngawi reng chuan alo ding a,nur nanga min en reng vang chuan nuamlo ka ti deuh.Nuih var var in" minlo nghak rei tawh em" tiin ka zawt zuia,min chhang mai lo chuan a din ngaiin ala ding ta renga,chik zeta min melh run run hian."Enge in sawi?"ati bung nghut,"eng emem sawi lo e"ka tih lai chuan hmui pet sawi nâng in min chhuk en leh run tawh a,kan in san hleih ve ang reng sia dâk vah hian ka melh chho ve ran bawk.









"I ngaihdan ang kha engmah awmlo"kan ti ta ngawt a,chek hlakin "Enge ka ngaihdan chu "ati vei hmak a.Chhan leh mai dan tûr ka ngaihtuah lai chuan ka kut rawn ban in a hum lum vung vung a,amah bawk chuan"ka ring che lawm"ati leh ang daih a."Eng mah a awmlo tak tak,kan pahnih inkar ala hre veloa min zâwt a chu chu nimai"tiin ka la in sawi fiah ṭalh.










"Ka hria e,lût tawh rawh i tlai ṭêp"tiin ka kut a vawn mek chu ahmui ah nawr si in a fawp vang vang a,ahmelah lawmlohna ka hmu loa,asawi ang takin min ring thlapin ka hre bawk.Lehlam takah chuan a ṭhianpa chu ahua in ka ring loa,hun reitak lo in kawm tawh an ni bawk nen an zia chu an in hrechiang thawkhat viau turah ka ngai bawk.









Saturday zana kan in biak chuan atuka Nu Mali te ina chaw ei tura ka kal hman leh hman loh chu min lo zawt a, Weekend ah hi chuan tih tur pawimawh emem ka nei ngai lemlo bawka, ṭha tak chuan ka lo rem ti ve mai bawk a.Jacob bulah khan Rinsangpuia'n alo eive dâwn tih kha ka sawi ta miahloa ,an in be turah ka ngai mai.









Atukah chuan kan chaw ei tur chu hrilhin ka phone a,ka ruala Rinsangpuia kal ve tûr thu ahriat chuan engmah sawi lem lo in thleng har lutuk lo turin min chah a.Chawhma in khawm in ban velah ka room tifai in ka in bual leh a,tlêma mawi hnai ve deuha in chei in min lo nghak reng tu awmna lam pan chuan ka chhuak zui nghala.








"Ivan mawi ve"a bul ka thlen rual chuan alo ti var a,a Bike nghenga dingin ani pawh chu hmuh anuam tak zet.A vun rawng nena in chawih tak Jacket pan lam a ha a,a Jeans hak rawng nen pawh chuan in rem tak ani.Chutia ka thlek vang vang lai chuan a sawi ziah dan in"ka hmelṭha viau em ni"nuih insum tak hian alo ti a,ner nang in ka lo melh rum ul thung.









Ding khawmuang tawh lo in a Bike ah a lawn zuia,ti nung zui vut vut in a Bike chu ka lawm awlsam theih nân arawn ti âwn deuha,lo lâwn kai ve nghalin a kawngah chuan ka kut pahnih chu suih in a hnungah chuan ka bei thlawp a.Ka awm dân vang chuan nge tlanchhuak mai lo chuan a nui nghawr dat a,"zei sawt ve"ti sup in a tlan chhuak zui a.A thusawi vang chuan ka ṭhen sak ringawt a,a kawr chhanah chuan ka piai sak bawk,ani lah chuan engah mah ngailo takin chet pawh a che rihlo.









Chawlhni anih vang te pawh ani ang nidang aiin Motor veivak atlem a,a awmchhun te erawh an Speed a sâng lam hret emaw chu aw tih theih tur an ni hlawm.Ka hmaa mi pawh chu a muang hranlo viau mai,Bike khalh thiam tak ani tih ka hriat tawh vangin atlan chak deuh pawh chuan hlauhna ka nei hran lo a,anuam zawk mahin ka hria.









Ka kuahna kut chu ataksa lum ther ther chuan a ur titih der a,chumi ka hriat rual chuan ka awmdan chu a diklo riau leh ta nghala,a khat tawkin ka kut chu arawn vawn hnan leh ṭhin a,che châng lo in ka kuah ngaiin ka kuah reng thung.








Lawmkima nena kan in ngaihzawn lai khan a Bike ah min phûr ve fo a,chumai bâkah in ngaizawng te tih ṭhin danin kan in fawp ve fo bawk.A zei leh zeiloh lam ka ngaihtuah ngai hranloa,a mi fawh-na emaw khawihna avangin chuti taka ka taksa a danglam ka hre ngailo bawk.Mahse,tuna ka kuah mek pa bula ka awm ve thung hi chuan boruak dang daih awm tel ang mai hian enge maw hian min zem ṭhin a,min khawihna leh fawh na te vanga phûrna leh keimaha danglam awm te hi chiang takin ka hre thei ṭhin .









Mi sawi ka hriat fo dan in mihring tehi Pathianin in hip tawnna neiin min siama,chung zingah chuan in hip tawn bik riau an awm thu an sawi te ka lo hre tawh ṭhin a.Chutiang chiah chu Rinsangpuia nena kan awm dan hi niin ka hre ṭhin.










Kawng tluanin ka rilru ka kawm a,eng eng emaw ngaihtuahin keimah te chuan ka nui leh var var ṭhin.Mi in chiang takin minlo hmu chu ni ngatse mi pangngai zân lo anga min ngaih mai te ka ring rum rum hial ani.











Gate ah chuan tlan lut in Garage lam min pan pui a,a Bike chu hung felin inchhung lam kan pan zui nghala.Kan luh rual chuan rinloh daihin Hruaii leh Nu Mali Sofa a lo ṭhu dun chu ka va hmu a,min hmuh veleh Nu Mali chuan nui sâng hian min lo lawm a,ala dam ṭhat lutuk loh vang ani ngei ang ahmel chu atla dawk a,ka hmuh hnuhnun ber ai khan a cher fe zawk bawk.









"In lo thleng thei maw,in van ti ṭha em ve aw"tiin min lo be vat a,nuih var var in ka pan hnai ve thuai bawk.Ka hnunga lo lût ahmuh chuan abeisei lawk lo tih ahmelah ahriat a, inchung lama Jacob awm thu hrilhin kei chu a ṭhut na kiangah chuan ka ṭhu thla zui nghal a.








"Min lo tlawh har lutuk a ka lo lungawi lo hman ṭêp asin"Nu Malin atih chuan thupha chawiin hun ka neih apianga ka tlawh ziah tûr thu ka sawi zuia.Inchung lama chho mai lo chuan Rinsangpuia pawh chu kan ṭhut na piah chiahah chuan ṭhu in a Jacket Iptea a phone dah chu la chhuak in a tuai neuh neuh a.









"Bawiha chaw I ei ve nghal ang chu tiraw?"tiin ka bula mi chuan a bia,"Chumi tur chuan lawm kan lo kal"awlsam zetin alo ti thung a,in nel sa an ni bawk nen a biak ṭhin dan nimaiah ka ngai.Nui har har in ka bula mi pawh chuan tlawh fo tur in achah zui a,chhang tawh lem lo chuan "In chungah ka lo han awm ange aw"tiin keimah chu min rawn ena,engmah sawi zui lo in atho nulha kailawn lam pan chuan a kal zui a.










Hruaii lo awm ve reng vang chuan nuamlo te kan ti dâwn dâwn a,mahse enge ni vei an in pawh aniloa nuamlo tih vak chhan tur ka nei in ka hre lo.Nui sâng in ka bula ṭhu chu a be siam siam renga,kei erawh sawi tur emem hrelo in ka ṭhu ngawi ran thung.








A sam tuai thuak thuak paha Jacob lo chhuk chu kan lam panin arawn pen zui a. "Daphne,ei rawng bâwl tûr tlêm ala awm a min pui lawk peih em?"alo thlen rual chuan ati a,hnial lem lo in ka tho chhuaka Choka lam pan chuan kan in zui phei nghala.









"Hruaii saw I sâwm ve mi"kan luh fel rual chuan ka zawt nghal a,"A...sâwm chiah pawh nilo alo leng mai mai,mahse eive nghal tûrin ka Nu in asawm a"tiin min chhang ve mai a."In in hmuthiam meuh nange"nui suk chunga atih chuan kan inkar chungchâng vel chu sawi tumna ka nei lem lo.










"Chutiang engmah awm lo ka zawt mai mai che"ka ti ve bawk tak na in a awih hmel tehchîam lo."Ala tawrhhlelhawm viau mai thei"nui pat pat chunga tiin Fridge a hâwng zuia,engtin mah ka chhang duh ta lem lo.









Chawhmeh chi hrang hrang phawrh chhuak in ka duh dan dana siam mai turin min ti a."Sa chu ka siam tawha ,thlai hi ka siam thiam vakloa i duh duh hi siam mai la"tiin a phawrh zui mawlh mawlh a.Amah chauha alo chhuk chu a chhan zawh ka duh viau nangin ka hreh deuh tlat pêk a,a chawhmeh rawn phawrh ho chu en kual in siam tûr ho chu ka lo dah hrang zung zung a.









Ka bulah dingin ka chawhmeh siam lai chu min lo vil deuh chawt a,min puih dan em em hre chuang lo chuan min lo thlir reng ringawta.Living Room lama ka phone ri ral ral ka hriat vang chuan ka chawhmeh siam lai chu lo chawk lawk tûra tiin choka chu ka chhuah san zuia.




End of Chapter 14



(Zan dang aiin zanin chu atawi hret dawn a,min lo hrethiam hrâm dâwn nia.Next ah chuan thui deuhin kan ti dâwn nia.Harsatna neuh neuh ka neih leh ṭhin vang hian duh angin ka dah regular thei lo thin a,min lo hrethiam hrâm ula leh min lo chhiar sak zêl dâwn nia.Chuan atheih hram chuan Comment lamah in duhkhawp loh lai emaw te a awm chuan lo sawi zêl ula, ṭawngkam emaw engah pawh tihdik loh lai ka neih in siam ṭhat ngai lai te min lo hrilh theih chuan ka lawm viau ang.Comment hrim hrim a awm hian ahlimawm in a phur awm zual sauh zel ania aw🥰)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)