Hello Ryan! Chapter-5 By Lalrinsangi Bee

Episode kal lai dah luhna

Moderator: writers

Lal Rinsangi Bee
Posts: 59
Joined: October 30th, 2020, 11:16 am

Hello Ryan! Chapter-5 By Lalrinsangi Bee

Unread post by Lal Rinsangi Bee » May 24th, 2022, 11:45 pm

Hello Ryan!
Chapter-5
By: Lalrinsangi Bee






Tukthuan te kan han ei puar a,hmun kan tih fel hnu chuan ka'n han thu hahdam leh vang vang a.

Ryan lah chuan "I hman tawh em?" Ala ti sek zui.
Chhan pawh ka chhang tha peih lo.

"Ryantea chu eng ati nge maw ni a hmanhmawh em em le?" A tih lah chuan min rawn melhin "Pu what" ti hian a hmui a rawn phun ang sup a.

A tawp a tawpah chuan ka thawmhnaw te ka khung mawlh mawlh a.

Thawmhnaw ka keng tam lo bawk a rei lo teah ka inkhung zo der.

Kan haw tur pawn kan chhuah hnu chuan ka chhungte chuan min ui hmel hle a.
Ryan lah chuan min lo tur sek lehnghal.

"Ryante lo leng fo rawh aw" ka piin a tih chuan "Ka lo len dawn chuan chaw ka ei zel dawn ania" a tih chuan ka chhungte ho an nui thaw mai.

Ka ni phei chuan a rukin "Ricky mizia nen a dang hlak,Ricky chu a puitling thlup a,Ryan erawh mi tak hmel deuh si hi a naupang chhia in a mawlmuk ve riau" tiin min hrilh nghe nghe.

A mize aa hû te hi ka chhungte hian an lawm phian lehnghal.

"Kal ila" a tih chuan ka hawi phei a.
Bike reng reng ka hmu lo.

"Khaw nge i bike?" Mak tih hmel deuhin ka han en.

"I bungrua ka phur dawn sia ka tia car ka lo keng mai asin." Min chhuk en ve rûn lehnghal.
Ka sang ka inti ve viau thin ania,a dar ka chen vel tawk tawk lek chauh a ni.

"A pawi lonem" ka ti sap.
"Lonem" alo ti ve nghal.

"Mamte,la haw lo mai la ka va ti e aw...Ryantea lah chuan hruai haw che a tumruh mai si a" ka pi chuan a rawn ti boh boh.

"Ka lo len pui ziah ang ka tih kha...Lalapi chu aw...Mamtei ka ngai ve tho alawm" hepa hi ngati nge vawiin hian a naupangchhia in a zahtheihloh em em mai le.
Ka chhungte lah chuan an la nuih ang dar dar a.

Ruih a nei em ni le?ka tia,ka va fiah pawn nei awm angin a awm si lo.

"Anih leh i lo lenpui loh vaih aw Vanlalryan" ka nutei ve thung.

"Tehreng tehreng,kan kal mai dawn aw,thlahna thuchah kengte in la awm em?" Ala ti ang lauh lauh a.

Ka ni Hruaii lah chu ka pu hnung atangin ala nui dir ang bawk bawk a.

"Nei lo nei lo kal ang" ka ti hluk a.

A ni pawh rawn pen chhuak vatin ka zui dat dat.

A car rawn ken chu eng car nge hre lo mahila a nalh thlawt a ni.
Chuan pawh a inthlahrunawm rum rum mai.
Car dum tliang hlarh mai pian mawi zet hi a ni a,a nei tupa ang mai a chhelo lutuk mai.

Front seat kawngkhar chu a hawng vat.
Ngawi rengin ka thu lut a,ka thawmhnaw chu hnung lam seat-ah a dah a.
Driver seat lamah a rawn thu lut ve nghal thak bawk.

"I lungawi lo em ni Thanpui" a awki chu nichin a mi nen chuan in ang lo tak a ni.Dam deuh siin a pa ru riau mai.

"Nei" ka ti tawi tap.
Phawk hra a,a rawn hawi phei chu "I motor khalh chiah ngaihtuah rawh" ka lo ti vin hlak.

Hma lam hawi leh vatin "Ngati nge?" A ti sup.

"I rui em ni?" A hma aia dam deuh zawk chuan ka ti ve thei hram e.

"Ruihtheihthil ti hmel ka pu em ni Thanpui" ka hming a'n han lam tel kher a.

"I mizia kha a dang em a ni Vanlalfak" ti ve deuh chawrh.

"Inhau lo ang ka hau phallo che nia" a ti leh daih.

"Ka hau phal che alawm" a rawn hawi phawk leh hra tawh.

"I motor khalh chauh kha ngaihtuah rawh ka tih kha" ka ti vin leh that.
Ka period dawn vang emaw ni ka vin hluk hluk reng mai.

"Ti nge min hauh phalloh te ka lo ring ve a" ala ti niah niah zui.

"Kan mi hmangaih tak te chu an dik lohna laiah te leh an that lohna laiah te kan hau ve ang chu" tukverh lamah ka dak vang vang a.

"Eng nge ka dik lohna?" A tih chuan.
"I over" ka ti tawi tak.

"Eng nge ka diklohna ka zawh che chu ka over na" ka thusawi a man lo a ni maw.

"Ka chhungte bulah i over aw Vanlalfak" ngati nge a hming pum te hian ka koh reng aaa...

"Anih leh eng nge ka thatlohna?" A ti leh.
Chhan dan tur ka hre tawh lo lutuk chuan "I hmelchhia" ka ti ringawt.

Chu chu a zawhna ka chhanna emaw a ti nge car darthlalangah chuan car ti ding meuh a in enin min rawn en leh a.
"Khawi lai ber hi nge chhia?" A thutak hmel em em lehnghal.

"That lohna i nei lo,ka mit a mipa hmeltha ber alawm i nih" a biangah ka va fawp zeuh a.

"I hmelchhia min tih zawh chiah kha" a la lungawi loh hmel lutuk.

"I zawhna kha chhan dan tur che ka hriat loh vangin ka ti mai mai anih kha" ka ti leh hluk.
Ka dawhtheihna a pan ta lutuk hi keipawn hrehawm ka ti.

Chung lam hian hmeichhia te hi thla tin hun bi pe lo a min hrem dan dang zawk te hi siam se ka ti.

Car ti ding leh dat a min en vang vangin "Hopie,ngati nge min hua em ni?" A ti dam dap reuh a.

"Ka in hrethiam bik lo Ryan,ka period dawn vang nge ka tum loh deuhin ka vin reng mai" kut kuangkuah atin ka thaw hak a.

Min rawn kuah thutin "Min vin vak vak mai rawh inthlahrung miah suh" a tih chuan ka nuih a za leh bawk sia.

Hmeichhe hovin a thla tin a 'mood swing' kan neih thin chu ka nei leh mek chu a nih hi.

"Kal vat teh ang ka mu duh" ka tih chuan a in siam rem leh vat.

Thil ho te te min sawi pui a,ka vin leh that chuan "tihpalh" a ti leh nghut thin.

In control harsat chi ka lo ni nen,keimah zawk hian nuam lo ka ti.

Khaw chhungah min tlan luh pui dawn emaw tih laiin ramhnuai lam a luhna pengah chuan a tlan daih a,hlauthawng deuhin ka va en vat a,a hrethiam a ni ngei ang.
"Hlauthawng suh,i nawm loh hmel sia hmun nuam deuhah ka hruai ang che" a tih chuan ka seat nghenchhan ngheng chung chuan hmalam ka en ngu ngur.

Ramhnuai lam panna ni si a,a kawng metal vek mai chu a mak ka ti rilru khawp.
An hausa hle anih dawn hi ka ti tawp.

Gate lian lampang lo inhawng duaiah chuan kan tlan lut a.

Thing atang a in sak mawi deuh mai hi alo awm a,a bul velah chuan zamzo tih angreng te leh Mizo pangpar chi hrang hrang,a hming ka hriat loh te lo par vul chûk chûk chuan min ti hahdam sawng sawngin ka hria.

"Aw...Afaka chu,i lo kal teh thut a" pa pakhat pa tawi lampang,hnathawh thuam a lo inthuam chu nui huah huah hian kan lam a rawn pan a.

"Nia...hei kan lo kal mai mai anih hi" ka thutna lam kawngkhar chu a rawn hawng a,ka chhuk vat.

"Ehe!!Afak,in lo kal elaw,i bialnu em ni?" Nu pakhat hnathawh thuam a inthuam ve tho chu an pa bul a rawn din pah chuan a rawn ti ve nghal bawk.

Fakte,Ryante,Faka,Lalryan,tih loh hming dang 'Afak' tih pawh alo nei tho a nih hi maw le.

"Hopie,hei hi Pa Ruata ania hei hi Nu Sawmi an pahnih hian kan huan hi min enkawl sak thin a,chuan Nu Sawm hei hi ka bialnu Hope-i anih hi" ka bialnu a tih lai tak chuan ka zak lutuk a ka biang a sa hat hat mai.

"Aw...bialnu i va nei hmeltha ve" tih pahin nu Sawmi chuan min chibai tumin a kut a rawn phar chhuak a,an pa pawh chuan a rawn phar ve vat.

Kan in chibai a,an titi luam hnu chuan,kalna tur an neih thu sawiin an nupa chuan bike t(r)awng ve lampang tawh chuan an in phur chhuak boh boh a.

"Lut ila Thanpui" a ti leh tawh.
"Ram in va nei nuam ve Afak" melh duh miah lovin ka hawi kual vel vak vak a,mak tih hmel takin min en tih chu ka hre reng tho.

"Chutia mi lut ang" ti nghutin ka banah a rawn vuan a,thlam ti dawn ila thlam ka ti phallo.
Thing atang a an sak inah chuan min luh pui a.

A chhung lah chu a nuam zek a,a zau reuh bawk sia a nuam reuh lutuk.
Choka,bed room,bath room a awm hrang ve thlap zui a.

"I mu duh em?" Min ngaihsak ta lutuk chu ka ngaih a tha lo zawk.

"Duh lo e,he lai velah hian lui a awm em ni?" Car atang a kan chhuah khan thlang lam a lui luang ri her her ka hria,ka kal chak lutuk kha a ri khan min ko ka ti mai.

"Aw,thlang lamah khuan a awm,i kal duh em ni?" Ka darah min rawn kuah a.
Lu ka buk nghat chuan min chhuah pui leh vat.

Lui lam chu kan pan dun a,a kawng lah chu an siam tha reuh zek a,kal a hahthlak em em lo.

A hmun ka zu thleng chu nichin a ka mood fu lo zawng zawng kha a bo vekin ka hria,a nuam ka ti lutuk chu ka insum thei lo ka khi vur reng mai.

"Awiii...a nawm dan hi,kan ram chu nise kei chu ka riak ziah ang" ka thil sawi lai chuan ka hnung lam atangin min rawn kuah a.

"Kan inneih hunah honeymoon hman nan kan hmang dawn em ni?" Ka beng bulah a rawn ti sur sur a.

"Thla khat em pawh kan la in ngaihzawn loh hi" ka vin lo ve khanglang,ka hlim em a tin ni.

"Tun a inneih nghal rum rum mai hi ka duh" a hmui a ka nghawng leh ka beng vel nul thuak thuaka a tih chuan ka lo nuih hak a.

Lung in dawh rem zet,thut vang vang pah a ke chiahna atan a rem bawk si chu kawk va va pahin "Tah sawn thu ang" ka ti a.

Chu lam chu muangchangin ka kut a min vuan reng chu si chuan min pan pui a.

Tuiah chuan ka ke ka chiah vang vang a,a malpui pahnih inkarah min thut tirin ka hnung lam atangin min rawn kuahin ka darah a lu a nghat a.

"Afak" ka tih chuan a rum deuh nghut a.

A ngawih reng avang chuan "Ka phu lo che" ka ti ta thlawt.

Ka nghawng a rawn fawp zeuhin "Eng vang chuan?" A ti sup.

"In hausa a,i hmeltha a,Mizo mipa mai ni lo ram dang mipa zingah pawh awm la,a zahpuiawm loh tur khawpin i chhelo ka ti,chhungkaw tha tak i nei a,ruihtheihthilah i fihlim a,i fel em em bawk a" ka sawi zawh hma in ka sir lam a rawn tawlh pheiin ka lu chu a kuai her a ka hmuiah chuan a fawp zeuh a,"A tawk tawh" tih pahin min fawp vawng vawng.

"Kei hian asin phu lo zawk che chu Thanpui" nui suk mahse a hmel erawh a thutak fu si.

Kan hma lam ral lehlam a tlang hring dup awmna lam chu a thlir vung vung a.

"Hmeichhia mahni lu zo tak,mahni mawhphurhna hre bawk,mi ngainatawm leh mi pawisawi hlau zet,hmeltha vur ti a sawi tur ni si lo a vei zui loh harsa tak ni si,model piannalh tak te pian ang nei ve lo mahse mipa te'n a an en zui vawng vawng" min rawn en a nui sukin "chu hmeichhia chu alawm i nih,i pawnlam mawina chu thuhran ni se,i chhungril nun in ngaitlawm tak leh no ru zet,a hun a paukhauh leh em em si te hian asin min duh tir em em thin che" ka lai lutuk chu a awmah ka va bei thlawp.

Min lo kuah vat a.
"Afak" ka ti leh.'Afak' tih hi lam nuam ka ti ta riau mai.

"Imm"
"I chhungte hian min duh lo em?" Ka tih chuan a nui nghawr dat a.

"Ka chhungten an nei dawn hleinem che" a ti duh lek chauh.

"Uang lo teh" ka aw chu theih tawp chuan ka ti dam ve alawm.

"Min duhpui loh che chhan tur ka hre lo,ka nu phei chuan in chhungah a fak ru thin khawp zawk che asin.Ka nu ai aiin Rae hian alawm i chanchin sawi nuam ti" a tih chuan ka nui ver ver a.

"Kan in ngaihzawn hma in maw" a awmah chuan ka la bei hle hle a.

"I dawr nghak te leh i hna kal lam leh haw lam te hi a hmu fo che a,i nu leh i nau te i ngaihsak mai bakah i mawhphurhna i hlen chhuak thei zel te hi kan thenawmnu nen khan ropui an tih thu an sawi chamchi zel" ka nui huk a.

"Ka thatlohna lai an la hre lo anih chu" aw lawi ratin ka ti a.

"Kei chu i that lohna ka hria" in la hrang vatin ka han en vat.

"Eng?"

"I period tur i thinchhia tih mai loh chu a tha vek" a tih chuan nuih vur vurin ka han fawp thut.

Ka in la hrang leh vat chu ka lu a min rawn dawmin uar zetin min fawp a,keipawhin ka thiam dan ang ang chuan ka lo chhanglet ve bawk.

Lui a rei tawk tak kan thut hnu chuan thing inah chuan kan lut dun leh a.

Nu Sawmi te nupa chu an lo let har nek lehnghal.

Pindan pakhatah chuan min luh pui a,khum dup nawm hmel zet,bed sheet var a intuamah chuan ka thu tharh.

Harh chhuak zawkin rum mangkhengin ka va melh a.
A ngaihna a hriat loh hmel hle thung.

"Eng nge?" A rawn ti ang he haw a.

"A ni lo zawng a chet tum hlek suh ang che" ka lo ti hluk.

Nui var varin "I mut duh ka ring a chutiang pawh ka ngaihtuah lonem" lonem a tawn ti ve leh tawh.

A ni pawh ka pu te inah a inthlahrung bik hleinem ti rilru in ka pheikhawk ka phelh sawk sawk a,khumah chuan ka mu tharh a.

Rawn lawn kai ve vatin min rawn kuah nghal hlu hlu a.

"Ka love bite siam hi a fuh ti raw?" Mawl hmel zetin ala nui zui.

"Thinga,ka zah zia kha ka nutei'n a hmu lehnghal" ka lo ti bak hlar.

"Mi zawng zawngin hmu rawh se,ka ta i ni tih chhinchhiahna a nih kha,i nat hlau lo phei ila chuan i taksa pumpuiah hian siam ka duh zawk a" ati leh duah.

Ka chhan leh chuan ka thinrim ka hlau a ka maimitchhin san daih a.

Ka lo mutthilh san daih zui.






#End_Of_Episode_5






Zantin rokhawlhna a awm loh chuan dah ka'n tum ve chhin ang e aw😅Tum te chu a thiang alawm le😂


Min Lo Chhiar Sak Ve Avangin Ka Lawm Lutuk E🖤


Kha kha kha ads i click theihnghilh dawn ringawt ania,click vat rawh🙊🤍



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)