MY HANDSOME FARMER_chapter-11

Episode kal lai dah luhna

Moderator: writers

Ziki_nu
Posts: 254
Joined: May 23rd, 2021, 7:15 pm

MY HANDSOME FARMER_chapter-11

Unread post by Ziki_nu » May 25th, 2022, 12:01 am

MY HANDSOME FARMER



Chapter-11
By RuatiRenthlei



'THINLUNG IN A PAWM THEIH LOH HI PAWM THIAM A NGAI FO'


He thu hi John nen kan tawpa rilru na taka ka awm lai khan ka thiannu Kimi khan min hrilh...


Chakna ka nei lo va, mahse heng harsatna leh buaina zawng zawng hi paltlang tura ka beih chu a ngai si a ni.



Peka kha ka hmangaih ka ti lo mahse, kan han inhmuh zin tak deuh hnu khan ka vei a, a âwm lum vawi khat lek nghenga ka mutthilh vang khan kumkhuaa ka ta ni tur ah te ka lo ngaihruat a,.. A... Engkim kha a lem vek, thil thleng palh mai mai a nih kha, a bialnu a ni chiah em ka hrelo mahse kha veng thenawm nula nen kha chuan an in hnim hnai viau tih ka hria, a hmeichhia zawk khan a rawn kal chilh reng a, tlaia school kan ban apiangin an veranda ah an lo thu dun thin, nupa ang chiahin an awm ni berin ka hria... !



Thenzawl kan kal atang khan kar khat a liam leh tawh a, Peka nen kan boruak chuan ngai a awh thei tawh lo. Min biak a tum lo a, mahse chu chu kan pahnih tan a that zawk ringin pawi ka ti vak lo.



In be lo tawp ila, thian kan nih kher pawh a ngailo, tihian ka in luahna te fapa ani tih hria ila a tawk mai.




Mi thenkhatin 'thian tal ni ila' an tih ang kha keichuan ka duh ve lo, thian angin inkawm ila, keichuan ka feeling hi ka dah bo thei dawnlo, dah bo a hneh in a zual tulh tulh zawk mai thei! Chuvang chuan chapo taka amah hlat ka duh zawk.

.





"Zanin chu lo kal ve tak tak rawh aw, inkhawm zan a ni chuanglo a" school ban hnu thlengin Zuitei chuan min la sawm char char tho. Nileng in zanin an birthday party lawm na a kal ve tur in min sawm tawh.

Scooty ka ken loh avangin ke in kan haw a, kei leh Zuitei bakah Aldrina leh Sir Muankima te nen kan ni.

Sir Muankima hi history teacher a ni a, nupui neiin fate pawh an nei ve duah tawh.



"A birthday neitu ber pawh chu ka hre lo va, ka kal ve duh teuhlo" ka lo ti leh hlak a, ka hnial tang tang hnu pawha min sawm lui tlat thin hi a chang chuan ka ning thin.



"Aman a hria che alawm, hmu la chuan nangpawhin i hria ang, Sir Aldrina pawh a kal dawn a, tiraw?" a tih chuan Aldrina chu ka melh vat a, "Tetei a kal chuan ka kal ang" tiin a lo kiai suk, ka nuih pawh aza lo e a.




"Ka ti tak tak, in pahnih in va kal mai rawh u" ka tih chuan Sir Muankima chuan "Aw... An sawm nasat em che hi mawle, kal ve mai mai teh" a lo ti ve bul bul a, fiamthu duh leh kan hlimpui ber thin a ni a, a lo tawng ve tawh chuan uang miahlo mah se tawi te talin kan nui ngei ngei.




"Nichiah, weekend a nih hi, kan lo sawm ang che, lo insiam sa thlap la" Zuitei bawkin a tih leh hnu ah kan veng kan thleng chho a, kan sir te pahnih chuan min pen sanin Zuitei nen chauh chuan kan ni tawh.




"Hak tur pawh ka hrelo, eng lam nge i hak dawn?" tiin ka thaw hap a, kan in kawt kan thleng tawh tho na in thuamhnaw hak tur vel sawiin kan ding khawmuang leh rih a.




"Smart vak pawh a ngai lo, mahse rawngbawl naah te theih ang tawkin kan in hmang ve a, thehlep lutuk chu a chi chuang lo ang" a tih chuan ka lo bu nghauh nghauh a, ka bana rawn nghawk zeuhin ka beng bulah "Tunlai chu Thianghlimi hi a rawn tam viau a ni maw?" a rawn ti sep a, a hawina lam ka en ve rual chuan Peka leh Thiangite rawn inzui chhuak chu ka hmu ve chiah, en pawh en rei duh lovin ka hawi sawn vat a,


"Kartluan khan ka school ban apiang in ka hmu thin, I pi te in a I kawi thin vangin I nang hman lo thin mai mai aniang, a hman ve viau a nih hi" ka lo ti hap a, theih se chuan rel zui bawrh bawrh ka chak lutuk.




"Vawiin chu in va bang tlai ang reng ve Tete" a rawn tih lauh rual chuan thaw hakin min hmuh lohna tur lamah ka meng kual ralh a, ngainat loh sa nen min lo be ve fo hi ka hne hluah hluah.




"Nia vawiin chu ke in kan kal a" ka ti sep a, kan hma lawkah a lo ding reng tawh, a hnung lawkah Pekhlua chu a lo ding thim ve khup bawk a.



Keimah chauha anni pahnih hmachhawn ka chakloh tehlul nen Zuitei lah chuan chhuanlam siam in min kalsan daih leh nghal a, zeilo thei si...




"Weekend te ani sia, naktuk chu Peka leiletah hian kal kan tum asin, lo kal ve la" a tih chuan



"Engmaw?" ti hlutin Thiangi chu ka en haw a, pawisawilo hmel zetin a lo nui var var.


"Aldrina nen khan in inhnim hnai viau tih mi kâ atangin ka lo hria a, sawm ve la kan kal ho dawn nia" te chu a la ti tak deuh deuh a,


"Thiangi"
Pakhat chuan a lo ti nghut a, "Thil tangkai lo kha sawi sawi suh" ti leh hluk in min en run ringawt a, hahh.. kan kal ve chu a hlau hle ani maw, thingthi in min sawm ngawih ngawih pawh ni se an bulah kher hi chuan kal ka tum chai si lo.




Tak runa min en Tu chu nuih let sakin "Tihtur dang kan lo nei tawh a, kan lo kal ve lo zawk mai ang" ka ti ve sak a, "Anih chu... Zan in chu aw Pek, ka lo nghak ang che" tiin Thiangi chuan Peka chu a melh chho kar a, engah mah ngailo awm ang takin zai rat rat pahin ka kalsan daih.




An ni pahnih in ngaihzawnna lem lutuk kara thaw tha thei mang lova lo din ve reng te chu ka peih teuh hleinem, step ah chhuk thla hmawk hmawkin kawngkhar ka kalhna tala te chu ka phih deuh sawk sawk a,
tinge tiang hian ka awm reng? Kar a liam tawh, hmeichhe dang nen ka hmu dun ziah mahse tinge ka bul hnaia a awmin ka lungphu a la danglam fo? Ka hmuh lai ngeiin hmeichhe dang a hnaih a, mahse tinge ka theihnghilh theih miahloh le?





Thil dang ti kawi lovin bathroom ah ka lut tlang a, shower hnuaiah chuan eng nge ka ngaihtuah ber pawh hrelo in ka ding ngawi reng.




Naktukah an pahnih chauh khan leilet ah an kal ang maw? Hnathawk turin.... Nilo, hnathawk tur ngawt chuan a hruai teuhlo ang, tuma awm ve lohna hmunah an pahnih chauhin..

Ka thaw chhuak ham ham a, thik ve ngawt tur ka nilo tih in hrilh mawlh mawlh mah ila 'eng nge an tih dun ang?' tih ngawt ka ngaihtuah na chuan rilru hrehawm takin min awm tir tho.




Chuan.. Chuan zanin ah chhuah dun an tum bawk, Thiangi khan a lo nghah tur thu a sawi ngei alawm, party naah an kal ve dawn nge a falin an inhmu zawk dawn? A ri meuhin ka thaw chhuak hawlh a, tui chu herh tawpin bathroom atang chuan ka chhuak a, dressing table chunga ka phone chu la kangin Aldrina ka call a, a lo chhang rang khawp mai.





"Zanin chu i kal ve dawn em?" ka ti nghal thawr a, "Ka sawi kha, I kal leh kalloh" lehlam atanga a rawn tih chuan


"Kal ang, kal rual ang" ka ti a, min lo hruai tur thu sawiin kan inbiakna chu kan ti tawp nghal a, ka lung zawn chu dawmin ka thaw dep dep mai.





A tha e, Pekhlua hi ka theihnghilh theihna tur a nih phawt chuan mahni hma sial taka Aldrina hnaih luih pawh pawi ka ti tawhlo, beisei awm takin ka awm dawn tihna a ni kher lova, mahse Peka laka ka buaina hi ka tihreh theihnna leh engahmah ka ngialoh nan in phenna tur mipa ka mamawh!





Ka thil ngaihtuah chu a dik ber lo mai thei mahse tihdan tur dang ka hre thlawtlo a ni.



Ei rawng pawh bawl peihlo in dawr thil in ka in I hnawh puar a, dar 7 tan an tih avangin ka ei zawh chuan ka insiam nghal a, Mom jeans ha in White crop tank top ka ha a, ka dul chu lang deuh mah se pawi ka ti vaklo, inkhawm tur pawh kan nilo a, bakah Aizawlah phei chuan dul them lo lang hlek te chu tuman engah vak kan ngai tawh lo.




High heels ka bun a, ka sam chu sang deuh hlekah bâwk in make up pawh ka hmang ve nual




Ka rilru chuan duhlo mah ila Thianghlimi aia nalh chu ka tum chiang tih ka thinlungin ka hria!



Mahse ka itsik tihna erawh a ni hauhlo, Tu hmeichhia pawhin a tha ber, mawi leh nalh ber nih te chu kan duh vek alawm, chuan kha hmeichhe zaktheilo deuh kha kei aia a that bikna ka hre hauhlo bawk.



A.... Tinge khanu kha ka er ve viau, kan kalna a in ang dawn pawh ni hleilo, an ni pahnih te chu hmun falah an kal dun daih ang chu.... Urghhh anmahni vanga thil tulllo deuh deuh ngaihtuah hi ka bansan vat a ngai ani.





Zuitei chu a rawn hma leh pek viau a, Aldrina pawh a rawn thleng harlo, an rawn nalh dun viau bawk a, Zuitei chuan "An thleng hnem tawh ngawt ang, hma deuha kal nachang kan hre ve lova" a ti bai bai reng a, eng nge maw thlen hma pawh chu a chak viau ni.




Ka bag la in ka inzui chhuak a, ka thinnnu ve lah chuan ngaihtuah miah lo in front seat a thu turin min ti tlat leh nghal.



Aldrina awm ve reng laia hnial tang tang chu ka hreh ve deuh si a, bet lo deuh in ka thu lut a, party na tur hmun lah chu khaw daiah daih a ni leh nghal.



Minute 10 vel kan tlan hnu chuan music ri kan hre tan a, reilo te ah disco light nena lo de chuai chuai, hmun zawl nuam ve pangai deuh hi kan thleng hlawl a, mi lah chu an tamin music nen an ri bung bung a, thingtlangah hetiang tak hian birthday lawmin an che nasa ang tih rin ngaihna pawh ka hrelo hrim hrim.




Kan pathum chuan kan inzui phei ve a, Zuitei min hruaina lam lam ah Aldrina nen chuan kan zui kawi ani ber.




"Siamsiam" ti vakin Zuitei chuan min tlan pui dawr dawr a, hmeichhe pakhat bul kan thlen chuan thaw hliam hliam pah hian "Happy birthday Siam, thil tha deuh pawh ka lei hmanlo a" tiin eng emaw hi a pe a, Siamsiami a tih chu a hmel ka hmuh rualin Biate khaw VCP fanu kha a ni tih ka hre chiah bawk.



A hmeltha reuhin fel pawh a fel viau in ka hria, "Hei Tetei hi i hria tiraw?" tiin keimah min rawn kawk a, "Umm hria e, I lo kal ve thei a I fel hle mai" tiin min chibai a, Aldrina'n gift a pek ve hnu chuan midangin an rawn chim tak avangin kan kalsan a, mi awm tam lohna lai deuh kan thlen chuan an hnungzanagh ka beng ri thlawrh a, an 'aiah' thawt mai.




"In va han mawl dun tak, gift in keng dawn tih te min hrilh ve ta cheu, engmah pawh ka pek ve loh kha" tiin ka hau zui hlak hlak a, a tir atang khan ken tur tih sawi se thil tha ve deuh te ka ngaihtuah hman tur ania, mawl dun lutuk.




"A ho e, bakah birthday lawm turin kan kal tih i hre ve reng a" Zuitei chuan a lo ti nui nui a, ka beng leh zawk dawn em mawni le henu hi...



"Chupawh nise, hrim hrim in engtinnge lang miahlo a in ken thiam a?" tiin an pahnih chuan ka melh tawn ralh ralh a, "A... I buaina a ho, engahmah a ngaihloh kha, kartawp anih hi enjoy ang u" ngaihsam fahranin Zuitei bawk chuan a ti leh zat zat a, a thian dangte a hmu nge min kalsan zui ta daih leh nghal.




"Hrehawm I ti em?" ka bula rawn din pahin Aldrina chuan a Ti sup a, "Aih tilo e" tiin ka lo chhang vat.


A nui ri suk a, ka beng bulah rawn kun hniam in "I nalh takzet" a rawn ti sup a, ka melh chho haw a, kan mit a intawng chiang bawk nen lai deuhin ka zuzi kual vel mai mai.





"In tur ka la anga, thu ve daih ang aw" a tih chuan ka lo bu nghat a, hills ka bun bawk nen din reng chuan ka ke hi a na thuai ang.




Drinks la tura Aldrina a kal hlan chuan selfie tumin ka phone ka phawrh a, mi an tam in tute mah kan in ngaihven lem lova, ka zak hran lo.




Mawi deuha lak tumin ka in her kual a, chutia ka in her kual vel lai chuan ka phone screen atangin ka hnung lawk a Peka leh Thiangi te ding dun chu ka va hmu a, Peka zawk chuan min lo en ve run leh nghal.



Ka rin lawk deuh tho ni mah se ka hmu thut chuan min ti hamhaih ang reng leh viau tho a, ka phone chu la thla vatin tum lawk miahlo in an lam hawi chuan ka inher a, Peka chuan min lo la en reng, a kalpui nu erawh midang nen an inbe mawlh mawlh a, a thuamhnaw hak thlehlep lutuk chuan ka mit a la nghal chat bawk.




Kawrfual a khup pawh khuh lo, nghawng zau leh design maksak zet hi a inbel a, mawnglem a vuah tih hriat fahranin a mawng lai chu a pawng ul a, a sam rawng uk khuih chu a thlah a, pheikhawk sang zet bunin thup theih miahloh in a mizo nula chawn puar chu a pawng ve ul bawk a, hahhh a thing uih ultra tawp a ni mai.




Ka ngaihtuah na sual ang reng deuh vang chuan inthing harhin Peka bawk chu ka melh leh a,cotton kekawr dum leh shirt dum a ha a, incheina danglam tehchiam a hmang pawhin ka hrelo.


"Ka rei viau em?" Aldrina'n a rawn tih chuan tullo tawpin ka lo phu chiam a, Peka lak atang mit la sawnin Aldrina thil ken chu ka laksak a, thutna awlah chuan thu in kan indun a.



Kan thutna atang Pekate chu an lanchian em avangin melh loh harsa ka ti, nui iar iar pahin Thiangi chuan a mawng duplicate leh vun nalh lo zet chuan a va nawk leh thin a, ka lo chhing leh sawk thin....


Dik tak chuan ka mi huat leh ngei zawng hi ka pe na ve a, ka ngei tawp khawkah chuan an nihna bak bak in ka sawi chhe ve thin, an lakah rilru sual leh tha lo lutuk ka pu tihna ani bik chuanglo a, mahse ngei tawh miau chuan hmuh that an har lutuk, Thiangi pawh hi ka sawi thing viau na in chuti em em a thing chu a ni chuang law...





"I haw duh hunah sawi la, kan haw dawn nia" Aldrina chu ka melh zawk a, min lo en reng tih ka hriat chuan nui sak in "Umm" ka ti ringawt a, sawi thui vak tur ka hrelo, tha tak taka ka bia anih chuan ka lakah beiseina a nei ang tih ka hlau ve tho si a, awmdan tur thiam a har hrep mai.




Rei vak lo ah kan hmaa mi pahnih te chu an kalsawn ta daih a, ka hmuh phak chin chu en zui reng mah ila thim laiah chuan an bibo ta tho!


Eng nge an tih zel ang?
An pahnih chauhin midang awm ve lohna ah maw?
He mi te pahnih hi an in ngaizawng tak tak tih na em ni?
Zawhna hrang hrang ka inzawt a, a chhanna kawltu te lah chu ka hmuh phak lohna ah an kal daih tawh bawk si.





Ka thaw chhuak hawlh a, tinge anmahni vanga ka buai fo mai le? Hmeichhe dang a zui a, chuan keipawhin in phenna tur Aldrina ka nei.



"Dar 9 a ri tawh, khawiah nge Zuitei kha?" ti hapin ka hawi kual a, buhpawl zinga hriau zawn an sawi ang maiin Lalzuitei chu a vàng, a ni pui roh hi khawi lai emaw ah hian a lo tlu reng te hi a ni lo maw le?



"Ka hrelo, a thian dangte kha a zui a, a reh nghal hmak" Aldrina pawhin a lo ti ve a, kan han hawi kual viau na in ka hmu zo lo, a phone lah chu a switch off tlat reuh leh nghal a.




"A va buaithlak, ka haw duh tawh deuh a" ka ti leh sep a, "Ka thlah ang che" Pakhat chuan a lo ti vat, "A... Zuitei kha" ka tih chuan "Ka va hruai leh mai ang, ka thlah phawt che anga, biak dan ka ngaihtuah dawn nia" ati leh mai a, chutia min thlah a peih tho chuan tiin haw turin kan inzui phei a, motor dahna kan thlen chuan luh nghal mai ka tum a, Aldrina zawk chuan ka benrekah dawmin min lo pawt ding chawt.




"Aldrin" min din hnaih rual chuan ka ti sep a, pen hnung ve bawk mah ila motor chuan min dang chep nghal vat tho.



Car bang chu ka tauh dawt a, "Eng nge tih i tum?" tiin a mitah tak ka en.
Ka kut a vawn lai chu laksawn tumin ka tang deuha, mahse ka hlawhchham.
"A rei tawh lutuk Tete, khawngaihin, khawngaih takin min chhang ve tawh rawh" tiin min rawn hnaih chilh leh zual a, eng thil nge tih a tum hrethiam lo tur khawpa naupangchhia ka ni tawhlo.




Ka thle sawn chhen a, "Hetiang hian i ti ngawt theilo Aldrin, min thlah vat teh" hmeichhe chaklo tak anga lan duhlo mah ila ka aw chu a khur ru hlak tho, thaw chhuak hawkin ka kut chu a phih thla hlawk a, a hmai tuai puat chung chuan a tei kual vut vut ringawt.




"Eng nge i buaina Vansangpui? Tinge I tan tlat a?" ti hlukin ka dar tawn tawna man chung chuan min thing nawk a, a aw ri rapawm zet leh a chetdan rapthlak zet vang chuan mit ka chhing sawk.




"Min en rawh, min en rawh ka tih chu" ka mit la chhing reng chung chuan lu ka thing nawk nawk a,


"Karei leh! Min en lo ang maw? Nang hian min duh lo takzet maw?" a ti leh hluk hluk a,


"Aldrin" khur hlaka ka tih leh hnu pawh chuan


"A tha e, I laka beidawn ka tumloh zia chu ka sawi chiang viau tawh alawm tiraw" ka kut chu a rawn vawn hnan leh chawt a, hnai zetah min din chilh in chesawn ve thei miahlo turin min siam tawh.




A chet dan chu duhlo in talchhuah tum ve chiam mah ila tharumah ka hneh lo lutuk. Ka hmui chu a rawn dek leh thuak thin a, ka nghawng leh hmai vel nul kualin tenawm takin min chhaih kual a ni ber.




Kan bul hnaiah midang tumah hmuh tur an awm lova, ka kaihza khur ru dar dar leh lungphu rang dawt dawt chuan hlauhna min siam!



Ka hlau, he mihring hi ka hlau takzet.



"Aldrin khawngaihin" ka tawng chu a ri chhuak chang chang tawh

"Eng thil phiangsen nge i tih kha" ti hluk ri ka hriat rualin Aldrina hmaiah chuan Tu emaw hian a rawn hnek chawrh a, min vawn behna kut a thlah rual chuan ka hmui hupin mit ka chhing a, rei tak chhung ka lo up beh tawh mittui chu ka biangah a rawn baw nghal zawih.


"Vawi khat pawh he hmeichhia hi hnaih leh teh, che sawn thei miah lovin ka siam tawh ang che" ti leh hluk in ka darah hian min rawn kuah a, mit ka meng ve ta chauh bawk.



Peka ka hmuh rual chuan ka meng zau kawk a, thaw ham ham pah hian "Keiman ka thlah ang che" a lo ti sup a, ka hniallo!




Min kuah phei a, Aldrina lam chu vawi khat pawh ka hawi let lo, khatiang taka ràwng khan ka laka a chet duh ka ring ngailo, chuan a chetdan vang khan vawi khat pawh ka ring leh tawh ngailo ang.




Ka mittui chu ka tuai hul leh tawk thin a, mahse a rawn luang zel tho, "Lut rawh" ti supin car kawngkhar chu a hawng a, Thenzawl kan kala kan chuanna tho kha a ni tih ka hre bawk.



Driver seat a a rawn thut luh ve hnu ah engine ti nung in a tlan chhuak nghal a, mahse khawchhung ah lut lovin pengah min tlan pui a, thui pawh tlan lovin a ding leh thuai tho.




"Tinge hetah hian min hruai?" ka tih chuan ka awki ang chiahin


"Tinge khapa kha i zui?" a lo ti ve a,


"Peka" ka ti hman tawk tih ah

"Ka zawh che chu, tinge khapa kha i zui?" ti leh hluk in min rawn en a,
"GOD, ka hmuh laiin tap lo turin ka ti che"
Seat nghenchhan a tauh zui dawt a, ka biang huh tuai hul tawk pah chuan "Ka tap lo" ka ti a,


"Ka zawhna chu min chhang rawh, tinge kha minring kha helai thleng thleng hian i rawn zui?" nem deuh zawk hian a ti leh a, eng chiah hi nge maw a buaina le?



"Ka thawhpui a nia, kan lo kal dun" ka tih chuan rum nghut in a hawi sawn vut a, "Khapa kha hnaih lo turin ka duh che" a tih chuan


"Engmaw?" tiin ka nui chhuak hak a, "Thuneihna i neilo" ka ti let hmak.


Aldrina laka min lo puih avang khan ka lawm lutuk mahse, hetianga min hau ve ngawt tur hian dikna engmah a neilo.




"Thuneihna chungchang ka sawi reng reng lo, tinge khapa kher kha i hnaih? Midang an tam, a ni kha chu hnaih suh" a tih leh chuan



"Heyy Pekhlu, tinge hetianga i awm? Tunge i nih? Nangpawn hmeichhia i duh duh I bia in I chhuahpui thei a, tinge ka theihloh bik ang, huhhh?"


Ka au khum tawn tawn ni ber hian ka hria, "A tawk, hmeichhe dang sawi tel suh, khapa kha hnaih lo la ka duh, chuzawng chu"



Vanvadakin ka nui chhuak hak a, ka mittui rawn hnám tiam tiam chu khap let sak sak in ka thaw chhuak hawlh, "Ka nunah inrawlh turin ka tan tumah i ni lo" ka ti sep a, dan tum viau mah ila ka mittui chu ka biangah bawk a rawn luang leh.




"Tete" ti hawlhin min rawn hnaih a, a âwma min kuah beh(bet) a tum chuan ka tang ve tlat, a duh duha a tih kawi turin nautelem ka nilo, tihian a áwm nghengin min pawm anga, nakin lawkah hmeichhe dang a pan leh tho ang.



"Min khawih miah suh aw" tiin ka tal chiam a, "Ka hria, I Thik tiraw, hmeichhe dang kianga ka awmin I thik" a thu sawi vang chuan ka zawi hnawk a, tang leh tur awm lovin a áwmah chuan ka bei hle hle.



"Sawi rawh, I Thik em?" dam thlup in a ti nawn leh a,

Ka lungphu rang lutuk chu a na hial in ka hria, ka tap chhuak hawk a, "Aw, aw ka thik lutuk, khanu kha I bul hnaia a awm apiangin ka àwm chhung hi a na thin, mahse I hre duhlo a, ka hmuh laiin khanu kha.... "

. "A tawk e" ti supin ka sam chu a chul hliau hliau a, "Ka hria e, tap tawh suh aw" tiin a hmui lum thar thar chuan ka chhip a rawn nawr vang vang a, tinge tiang hian a awm? Kan awmdan chu hrethiam miahlo mah ila awmsawn turin emaw, ka hlata awm turin ka nawr lui theilo,KA THEILO, he a áwm lum vung vung hi ka hnar thei thlawt lo a ni.





End of chapter11
Tawp laklawh lutuk, typing mistake a awm zeuh zeuh mai thei aw, muthlu lek lek chungin ka type a😅


NOTE:
Naktuk hian kan school hi khaw dangah camp turin kan kal dawn a, tun kar chhung kan cham dawn bakah kan camp naah hian phone a ken theih dawn loh lehzel a, thawnthu lam chu engmah ka buaipui thei dawn lo hmel a, tun kar chu ka àwl tawp a ngai dawn a ni.


Khawngaihin ka readers fel tak tak te in nih kha, min lo hrethiam hram hram ula, kar thar atang pangai taka tan leh kan tum dawn nia aw, min hau suh u ka thu lo ve sia maw🥺ka inthlahrung ve lutuk😩
Mahse ka hmangaih vek cheu hmm❣️

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***

Website story link ho awlsam zawka in zawn hmuh zung zung theih nan STORY FB group siam a ni e, in lo hmangtangkai theuh dawn nia... Whatsapp group pawh siam a ni e.
Group link : https://www.facebook.com/groups/991354610918230/



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)