Naupangte-a chapter 4

Episode kal lai dah luhna

Moderator: writers

Ellpee
Posts: 9
Joined: May 11th, 2022, 12:52 pm

Naupangte-a chapter 4

Unread post by Ellpee » June 28th, 2022, 10:17 pm

'NAUPANGTE-A'







By - Ellpee Ralte








Chapter - 4






A bialnu a nih ngei chu ka ring nghal bur. Ni e, hetiang tlangval chhelo leh hnathawh nei ṭha bawk si hi chu a single tawp lo ang a ze ngeng ngelh ngulh leh lutuk hi chu a duh tu te tan lo chuan a ngeiawm ve thei viau dawn na chungin a nihna leh landanin a zir hrim hrim a zia tak a awm.





Mahse a nu awmve laia an rawn inkuah lut kher chu ka hrethiam thei meuh lo, keimah zawk hi ka lo ip ru ṭeuh thei, tunlai ṭhalai inngaizawng ho hi chu a zah hi an hrelo lam mah mah ṭhin a ni.





"Bella ṭhu ta che, nangni pawh lo ṭhu ve nghal ru thingpui i in ho ang u" nute awmi chuan ti deuh zung zungin, choka lama che an nula (awmpui nula) chu thingpui no li lo la thuai turin a au zui nghal lawng lawng bawk.





Ka ep chiah sofa ah chuan Vincent-a leh a nula rawn hruai chu an ṭhu a kei nutei nen kan ṭhu thung, Vincent-a chuan min en deuh run runin a hnar a tuai zauh a, ka lo en ve kawr vang chu nge ni a mit ala sawn leh rang viau.





"E taka Christy hei hi kan ṭhenawm nila fel leh hmelṭha em em Isabella-i a nih hi" a tih deuh duah avang chuan kalo ip ru leh ṭeuh tawh, hmeichhe lian zawk zawk ka nilo a, ka nu ka chhun a ka vun hi a ngo viau, mahni chanchin sawi hi a nuam ka ti viau lem lo chuvangin ka ṭhiannu'n min hmuh dan a ṭhianpa min tih pui a tum ṭuma a sawidan hi kan sawi chhawng mai ange.






"Isabella-i chu ft 5 tling erh awrh tur vel chauh ni mah se kan school kal ho lai chuan amah aia lian fe fe ngamlo tu an tam lutuk, hmeichhe nu zim zem sam dar chen aia tawia tan duhve ngai miah lo kha a nia, a sa a panin a pian pawh nalh thlerh thlawrh tak a ni han sang deuh phei se chuan modelling lamah min kalsan deih duh hialin ania ka rin ni mahse a landan ang ngawt saw a ni bik lo zuam sual awl tak a ni a duh tawh loh naah chuan a kawlhin a huai sar vei reuh phian ania.





A ṭha ka tih ve na lai ber thunga chu a hmelṭha tih a inhriat lohna hi hmeichhia tawh phawt chu amah aia ṭha ah a dah hmiah hmiah tawp zel, a lerh loh vang nge ni hmelṭha viau e tilo hian bialpa hi a nei ngai meuh lo ka hriat chinah chuan pahnih chiah ala nei."





Ka ṭhiannu hi chuan thu hi a uar thiam ve deuh hleka, kha a thusawi pawh kha ngaihdan chintawk inlo thiam mai dawnnia.





"Bella hei hi Christy ania hemi khua a kan lo pem hma a bawiha thawhpui ṭhin a ṭhian hlun ve ber a nia he khuaah hian hna a hmu thar ve a " nute awmin a tih leh rual chuan Christy an tih nula hmel fel thlep thlawp leh class hmel zet mai chuan a kut a rawn phar chhuak vuta kalo chelh let ve chatin "ka lawmpui lutuk che" ka lo ti ve vat a bialnu chu a lo nilo tawp a nih hi.






"E nute ṭhenawm nula in nei hmelṭhain a fel hmel bawk sia keichu lan pawh ka rawn lang ṭha ngam tawh lo ang a" nuisang a nutei en paha a tih chuan nutei alo nui let ve hak haka "e ṭhat i chhuah viau loh chuan a luahlan vat maithei che nia" a lo tizui ve a, sawitur tui tam tur hreve heklo an thusawi chu nuihzatthlak tilo zetin kalo nuih pui ve sen sen ringawt.






"Taka Duhawm i hna thar chu enge a an hmel zirtir na i han pe vel tur ka mitthla ringawt pawh hian nuih loh a harsa ka ti ṭhin i inhmeh hlawl lo" nui hawr hawr paha tiin Vincent-a chu a beng dawt dawta.





Vincent-a hmel mawlh chuan ka nuih alo tiza ve leh chhawng, an rawn luh tirh a, a thlawh bosan hlau tak awma rawn kuah lut hlun si kha tunah lem ṭih hmel pu dui leh thlawh bo san daih se ti hmel pu taka an melh leh lawi si chu !






"Eng hna pawh thawk ila taimak hi a pawimawh hmasa ber a, kan taimak phawt chuan a insiam rem ve theih mai zel alawm"nutei'n nuih za ve vak lo tih hriat zeta a rawn ti deuh charh charh takah chuan Chrity uang hmel pawh chu a bo chawpchilh nghal, kei kan boruak vel avang chuan lo nui tat tat thung.





Thingpui te kan in zawh hnu chuan a lo tlai ve leh duai tawh haw mai tuma ka tho hluai chu nute awmi'n minlo be khawtawi leh rih "Bella bawihi i farṭuah pil kha kan la hnem angreng sia, tlem tal chu min laksak ve la" ti pahin a pawisa rawn phawrh a tum ta mai keiin ka lo hnial nasa.





Nutei'n farṭuah chungchang a rawn sawichhuah chiah khan kan Vincent-a chuan nuam a ti ta vaklo aniang chu tho vuta min lo melh zauhin, a kalsan zui hmasa ta thurh mai, nge ni vei ! a hmanna tur min han hrilh ṭha duhlo vela nutei'n min hrilh leh vek tho sia inthlahrun phah malek rawh se ka ti mai.





"Ka lung a dam theilo kei lah chuan ka ngeih nasa mai sia pawisa i la duhlo a nih pawn i nau nen khan chaw tal lo ei phei rawh u, a hrim hrim thu-ah hei eirel kati khaw tlai duai tawh bawk si che a, lo ei phei mai teh u" lungdam loh hmel zeta a tih leh chuan hnial leh chak viau mahila nutei lungdam nan tal tiin aw ka pawh ve ta tawp.






In ka thlen chuan a lo la inkalh ṭhiap msi Remmuana pui rauh hi eng chu a ti nimaw ! rawng alo bawl ka rin rilruk ve tehlul nen nutei sawmna kha ka lo hnial lui ang tih te pawh ka hlau leh hnuhnawh mange !.





Ka in tleuh zo whatsapp a ka lut chu Remmuana message alo awm ve va mai "U Hec-a hi a chhungte nen an inti thiamlo a, chaw kha lo chhum kep mai teh aw 🙆🏻‍♂️😁" ve leh thla rawk zela "Ṭhenawmah ka ei dawn inpahnihin induh leh inlo ei mai dawnnia ka haw tlai sia rawng pawh ka bawl ta lo mai in inbawl chawp ve tawh mai dawnnia🙆🏻‍♀️😁" tia ka reply hnu chuan nuisukin phone ka hmet thim hmak.





Kan unauin min sawm sia mahni ngawta va ei chu ka chak viau lem lo khawp mai, Remsangpuia leh Remmuana te pahnih teh hrep tunlai chu ka nunphung anti khawlh kham zing malh malh khawp mai.





Nute awmi te in kava thlen chuan an nula ten chaw ei anlo siam mawlh mawlh tawh a, inthlahrung fea siam pui ve mai ka tum chu nutei'n minlo khap rang kher mai mahse ka siampui lui ta tho.





"Zoi Vincent-a han ko rawh le" kan pahnih te leka kan kil hnu chuan a ti a, nula pawh chu a chhuak nghal vat "ngatimaw i nau chu a rawn kal ve loh?" min thlek ha paha nutei'n a tih leh chuan thil awmdan thup ṭhen deuh chungin ka hrilh ve mai.





Doorbell rawn ri tlang tlang chu an awmpui nula pakhat chuan va en vatin a rawn let leh chuan "ka pi rawlthar pakhat a nia tunge anih ka hrelo ka hawn dawn em ?" zawhna mitmeng taka nutei enin a rawn ti leh rih "aw hawn rawh" ti pahin a tho hluaia "ka va chiau au lawk ange aw Bella" tia min rawn en chuan ka lo buk khum nghat.





Tunang hunah tute tak ni ang maw mi rilṭam tawh nak alaia aw a va hunlo ṭhin tak.





"Bella hei i nau a rawn lang hlawl mai" nutei rawn letin a rawn tih lang lang chuan kalo meng phawk nasa mai a hnungah Remmuana hmel ka hmu zui ve zat "zoi kha tiffin ah khan chawhmeh ho hi han pack hlawm teh kan naua te eitur hi" nutei'n a tih chuan ṭul lo ti lutukin kalo khap a mahse ka thusawi chu engvakah alo ngailo Remmuana chu ka melh rum nghek ringawt.






"Pi angailo ka u pawisa hi pawisa ka dil anga noodles kan siam mai dawn alawm chaw ṭhing pawh ala tam mai" Remmuana'n alo tih leh lek phei chuan ka melhrum zual nute Awmi bulah khan rawng ka bawl sak vek thuin dawt kalo sawi ve khanglang tawh bawk sia.




Mahse nu fing ngang ania a sawi ri tawh em lo turah ngai ang kan buai deuh nuai nuai lai chuan Vincent-a a rawn lang hlawl mai Remmuana chu en deuh vung vungin ka ep chiah ah chuan dawhkan chu a rawn kil zui ve mai bawka.





"I ṭha maw sir ?" Vincent-a en paha Remmuana'n a rawn ti chu ṭullo ka lo ti takzet hepa pui hi a biak ṭawng zawh a inring chai a mawni "ṭha e, i rawn eive dawnlo em'ni?" a ka aṭanga chhuak awm pawha mawilo a fel fai hian a rawn ti khut mai mak ka va ti tehreng em!.





"Ei lo maiang ka ṭhianpa chaw ei a kalo sawm tlai kher a ni bawksia" Remmuana'n alo tih leh lai te chuan Vincent-a ngawt chu ka lo la en kei ve lem min chhan bung theih tehlul nen Remmuana erawh ṭha tak takin a chhang thunga a student a nih vang te pawh a ni mahna.





Remmuana a haw hnu chuan kei Vincent-a leh nute Awmi te chuan dawhkan zaupui chu kan kil ṭhapa, tlem te e tilo chuan kan inṭhut hlat hlawm viau "Nute naktuk chu cookies siam leh ka tuma hmanni a kalo pek cheu kha in eizo tawh em ?" nutei antui in lai mek melh chunga ka tih chuan phawk deuh fea minlo enin "bawihi cookies minlo pe a maw?engtikah maw?" a lo ti ang he haw hepa hian a hrilh ka ring veh vuah lo reng a ni.






"I lo awmlo a uVincent-a hi ka pek kha" ka tive deuh ngat rawn hawichho vutin min mrlh tur ngaih mai keiin ka lo nuih let ve sang thung. Zawhna mitmeng taka nutei'n Vincent-a a en kal hnu pawha a ṭawng tak mai loh avang chuan "Lalduhawm han sawifiah teh" dam lutuk lo hian a rawn ti vei nghat.





"Ka paih vek" a rawn ti nihchu mawle nutei nen "maw?" kanlo ti rual deuh ṭhawt "ka paih" rawn ti nawn lehin a rum zui deuh nghut ka va han khawng chak tak.




"Engvangin nge i paih ngawt midang thil pek tih bawrhban hi a malsawm lo asin" nutei'n a tih leh takah chuan rawn hawichhuakin "vanilla a tel alawm i ngeih loh kha" a thusawi zawh chuan min rawn melh pah zawk "awi nute vanilla i ngeih lo maw" ka lo ti ve thuai bawk.





"Aw chuvang chuan vanilla essence aiah hian khawizu kei chuan ka hmang ṭhina bakery lam hi chu dawra an zawrh vel pawh hi ka ei ngailo ka ei chak chuan keiman ka siam mai zel" vanilla ngeih lo ka hriat vawikhatna ni hialin ka hria chuan Remsangpuia khan vanilla aia khawizu a hman theih thu a sawi kha alo tidik tak tak a nih dawn kha.





Ka inthiam lo hmel a rawn hmuh tak vang chu nge ni"mahse bawihi i hriat loh vang ania inthiam lo duh miah suh aw, ei lo mahila duhawma'n chu a ei tho anih hmela, alo paih ringawt erawh i ngaihdam angai dawn a ni" chhan ka tum lai tak chuan pakhata lah chuan "ka ei lo e a" alo ti hluk nutei chuan a ṭawng chu a hre phalo aniang a en loh danah.




Keipawn chhan buai ka peihlo vanilla telh leh telh loh kha a en aṭang ringawt chuan a hriat ka ring hauh lo thung.





Kan ei fel hnu chuan awm pawh awm rei tawh loin in lam ka pan zui nghal maia, in ka thlen rual ruala Remmuana ṭim nek ka tum chu ka kal hmanhmawh hlawk hlawk khawp mai, kan tual farṭuah kung hnuaia Remsangpuia phone lo hmang chuan min tiding chawt mai.





Hnunglam min chhawn zawnga a awm avang chuan ka hnaih ṭhem ṭhem a, loud speaker a on avangin a aw mai bakah a mi biak aw pawh chu ka hrechiang thei tawh viau a nu aw ni ngeiin ka hria "naupang ṭit hian min ṭit tawh suh tlangval ka nih ve tawh hi" Remsangpuia chuan ti hlukin a rum zui nghal nghat a.





"Engangin lo tlangval tawh mahla i nu tan hi chuan naupangte ang lek ila ni tho" a nuin a tih rualin "naupang ka ni tawh lo tih hi hriatthiam tum teh" pakhat lahin a nu thusawi hrethiam lo zetin alo ti vin leh ṭhak nuih te pawh anti za lek lek zawk.





Naupang tih chu a haw ve hle a nih dawn hi !.





"Naupang i nih tawh loh chuan rawn haw vat la a nimai i thinrim na kha indanga va luh pui rual i ni tawh lo" nutein a rawn tih leh lang lang chuan a ngawih san deuh tlat tawh.




Nin hmel zeta thaw zui hawkin "min lo nghak duh suh zanin chu ka rawn haw lo ang" a ti a a nu thusawi leh tur pawh chu ngai pawimawh zui tawh hlek loin a dah zui hmiah.





A rawn inher chiah chu hnai fahrana lo hmachhawnin "Naupangte" ka aw ti thumin kan ti dut mai a nihkha, ava han phu nasa tehreng em a thlawk hman lek lekin ka hre hial.




Ka nuih zui uar uar takah chuan min rawn hnaih thuaiin "i va a ve" meng ling hlara min rawn melhin a rawn ti vei khar khar a, ka lo nuih zui leh nghek.




Inchhung a lut chu la nui pah hak hakin ka zui luta Remmuana chuan ka haua min lo enin "tinge a?" lo tiin ka nui hmel vang chuan alo nui zui ve ngawt bawk, "i u hi a á tawh a nih hi" naupangtea'n a rawn tih leh chuan melh ralhin "naupangtea vang vang hi lawm" a dara beng thakin ka ti a ka room ah ka tlan lut nghal daih.





"Engvangin nge khatiang khan min koh ve ngawta ?" a rawn ti zui lang lang chu ka hre hman chhan pawh chhang zui ta loin ka phone chu bihin ka nui zui tat tat ringawt.





Hun te liam ve zelin pawltlak thla pawh kan hnaih ve ta ruak mai, kum dang ang bawkin a vawt leh vur tawh, naktuk hi november ni 20 niin Remsangpuia birthday a ni a, nutein alo urlawk nasa bawka ho lam tak chuan a ral tir mai mai phal hauh lo ang.





Ka zing tho hlim hlawt chu ka tihdan pangai tein thochhuak mai poin phone ka en hmasa leh a,kimi call vawi 3 lai lo awm va va chu ka hmu hmasa ber a call let mai lo chuan whatsapp ka lut leh rih Joel Hospital group ah chuan nidang ang lo takin noti a lo tam ngang mai ka luh ruala ka thil hmuh chuan min ṭhawng ngang mai eng Dr Biaktea a thi anti a nih chu !.





Chanchin hriatchian chakin kimi ka call nghal thuaia, a ni pawn alo chhang rang khawp mai "kim Biakfekfawna chu a thi tak tak a mi !?" ka hriat sa ringhlel zeta tiin ka thaw halh a,"thi e dar 1 bawr vel khan a ni awm e, va lan ve nghal kha ṭha ka tia mahse call lah i chhang thei der silo a, i tello a kal ka hreh sia vuina hmang hman turin kal law law tawh mai dawnnia" a ti chuar chuar a, nizan kher kher a ka phone ka lo silent chu ka inthiam lo viau mai.






"A nih a thih chhan i hria em?" ka tih leh chuan natna nei sa a nih loh a thu sawi a, a thih chhan tak erawh sawi chiang ngam bik lo mahse suicide case a nih a ring viau mai, keipawh chu chu ka rindan chiah a ni.





Biakfekfawn-a kha tlangval hrisel ṭha pangai tak a ni a, he hospital a ka thawh hnu phei hi chuan damloh a neih awm pawh ka la hrelo hial. Tun hnai phei chuan Dr Joela damloh na avangin a rawn kal regu viau mai nimin mai pawh khan a rawn kal nghe nghe.





Dr Joela nen boruak an neih hat aṭang khan a rawn kal regu zuala, an chanchin pawh Dr Joela ber a rawn kal ngai meuh loh avangin ka hre zui ta lo kha nia, dam lohna neilo hmel pu hlawl lo mah se a zia erawh amah ang lo sawt tawh tak hi a ni ringawt.





Tukṭhuan ei kham chuan insiam zui sawk sawkin kimi nen khawhar inlam ka scooty in kan pan zui nghal a, Dr Biakfekfawn-a te awmna hi kan veng nen a inhnaih loh em avangin kal chhung a rei duh ngat ngat khawp mai.





Doctor ve meuh ani bawka khawhar in kal chu rinai takim an ṭhahnem viau mai kan thawhna hospital a thawk ho chu an kim ṭhep ṭhawp viau mai mahse Dr Joela hmel erawh ka hmu ve hauh lo.





Dr Joela pa thung chuan ruang te chu alo kil ve a, thusawi na hun te pawh a neive nghe nghe a vuina programme dar 1 ah kan hmanga kan zawh chuan ka phone vibrate reng avangin hmun fal chuhin ka kal hrang ta ringawt a.





Naupangtea nu alo ni "tinge call i chhan theih miah loh a, hei tih tur ka ngah lutuk kan nula te hi ka duh angin an zei silo a, lo phei hma mai teh" a rawn tih chuan vawiin hi kan naupangtea piancham a ni tih ka hrechhuak leh hnu hnawh.





Khawhar in a ka awm thu leh chanchin eng engemaw ka hrilh hnu chuan "aw a nih chu mawle, vawiin ni kher kher alo ni chu ava pawi thuah hnih tak, chaw ei hmana i rawn haw theih loh pawn i hriatthiam awm viau chu zanlam party te pawh ala awm alawm mawle" a ti leh zela.





Cookies siam dun te kan tum kha nia tunah hetiang teh nuaih hi kan ni leh sia a zia lo tak tak nutei chungah pawh ka inthiam lo viau tih ngaihna dang a vang hrep bawk si.





Thawh pui dang te sawi danin Biakfekfawna chu nizan khan inah haw loin hospital a riah a tum a niawm a, zanlam a nurse duty pakhat chuan chhungkaw lam problem avanga haw hma dil tumin doctor office chu a pan a, chutah chuan doctor Biaka hi chilphuan chhuak buaha chhuata a lo let zawi reng tawh chu a hmu ta niin an sawi.





Overdose a nih loh chu kan ring hlawm mawlh lo, mahse ka hriatthiam loh zawk tak chu mahni nunna hial hlut zolo tur khawpa siam tu hi tunge ni ta ang !? tih hi a ni, Dr Joela nen an inkar pún chho zelin a hrin chhuah chu a nih loh reng ka ring lo.





In ka thlen meuh chuan tlai lam dar 4 a ri dawn thuak tawh mai Remmuana call in zanriah an ei tawh em tih ka zawta an ei dawn vel mek thu a sawi avang chuan inthlak sawk sawkin nutei te inlam chu ka pan zui ve nghal.





An lo zi muai muai a, an laina hnai te chu an kim thawkhat viau a rinawm, inchhung lama ka lut chu nutei hmel ka hmuh mai loh avang chuan ka hawi deuh ruai a, ka hawikual na lamah chuan kil khata Vincent-a lo ṭhu ve luau chu ka va hmu thuai bawk.





Biak tuma ka pan chu "dk i lo thleng ve thei hram maw?" nghal zeta lo ti tu avang chuan ding chawtin aw lo chhuah na lam chuan ka hawi thuai a, inchung step zawha naupangtea lo pen chhuk tharh tharh chu ka hmu zui zat.




Ni dang ang lo takin coat suit pawl duk raih nen a induang ve thlapa amah ang lo takin a smart ve khawp mai.





"E he ! ti kha chuan naupangte i ang tawh miah lo ania" ka lo tih deuh hlut chuan a ner sawka "naupang ang maia min fiam kha duhtawk tawh rawh kum 22 val ka nih ve tawh hi" dak deuh vah chunga a tih chuan ka lo nuih khur char char.





"Lokal rawh chaw dawh ang" tia min rawn kuah chu ka lo nam sawn rang kher mai mak tih hmel zeta min lo melhin "he tlangval chhelo kuah hi i duhlo amaw?" a rawn ti ha a, lo nuih let tet tetin "tlangval kawr i inbel avang khan tlangval amaw ilo inti tak tak ange lo va dawh rawh nutei biak lawk ka duh a" tia kal mai ka tum chu ka banah na zetin a rawn hmer a nih reuh chu.






"Naupangte leh !" a kut chu ka phin thla sawka a hmel ka en chuan lo nuih sakin "kha lamah i nutei a awmlo" kitchen lam chu a kawk zui nghal va a, kal pel pahin a ban puamah chuan dimna tel eih loin ka hnek sawka, a ṭe ṭha duh leh pek khawp mai "nula tih atan chuan ava mawilo ṭhin ve" a tih leh hram avang chuan ka nui zui sak.





Nutei chuan engemaw hi alo buaipui nasa khawp mai ka va bih chian chuan cookies siam alo tum ve ngei chu niin "tinge nute chaw te ei ve phawt ta che" ka ti nghal chul a, "awi ilo va thleng phei hma leh si ve" tiin a cookies siam chu a thlek vuta "i cookies siam ang kha kan Hector-a sawn a ngaina lutuka, siamsak hram ka duh sia" alo ti charh charh a.





Tih pui ve ka tum chu "angailo ur chiah angai tawh chaw lo va ei rawh oven a ka dah hnuah keipawh ka rawn chhuak ve nghal ang kan nula te hian anlo vil tawh maiang chu " tiin a bula nula pahnih lo che ve mawlh mawlh te chu a melh zauh a, ka ril a ṭam ve tawh bawk nen nghak ta lo chuan ka chhuak zui ve mai bawk.





An eitur siam te chu a fresh in a tui bawka ka lim hnem ngang mai ka chaw ei lai zawng a naupangtea'n minlo ṭhutpui ve reng avang erawh chuan ka ei rei phah khawp mai, ani pawn ei rei minti ve deuh nge ni "satel nula zam suh i kiangah ka awm reng ania " alo ti deuh reng mai.





Zanlam party neih na tura kal chu phur vaklo mahila naupangtea'n ka kal loh hlauin min zui deuh chawt tawh mai bawk sia, ka kal tak ngang ngang chu a ngaih hmel.






Awm tlang loin inah ka haw leh phawta naupangtea'n a bike in min hruai haw a, engtianga inthuam tur nge tih ah chuan ka buai deuh riau "naupangte lo va phei mai la, ka hmanhmawh peih lo" ka tih lah chuan "hmanhmawh a ngailo kan tlaivar dawn alawm le" a lo ti sam zel mai bawk si.





Min nghak tu an awm hian insiam ka harsat riau zel min nghak tu saw hmanhmawh viau lo mah se ka awm a nuam thei chuang lo.




A tawp a tawpah chuan naupangtea chu ka room ah ko lutin ka dress tur ka thlan tir ta ringawt kawrfual senduk a nghawng sexy ve deuh, mal bul vel aṭanga kak thla hi a rawn thlanga "a sexy emai a zahthlak" ka tih pawn "zah tur an awmlo nula leh tlangval ho chiah alawm kan nih dawn" alo ti mai a.





A duh thlu ve ngang bawk si a, "birthday boy i ni bawka i thu chu lal zawk teh se" a tawpah chuan ka ti ta ringawt.





"Ka sam leh kawr hi a inhmeh hlawl lo minlo roll sak leh zawk la a hmanhmawh thlak chuang lo a" ka tih leh zet chuan a meng dur ta khup khup khawp mai "birthday girl amaw inti suh ka nalh chuan a tawk tu mit lak tumin nge i han ṭan ve viau le?" a ti hluk a, ka lo nuih hak ringawt.







(End of Chapter - 4)






(Sawi ang leh tum ang hian kan awm thei ṭhin lo rawn regu chhoh viau ka tum na a eng engemaw buaina neuh neuh vangin ka chawl leh vang vanga min lo nghak hram hram peih a, ka inthiam loh rualin ka lawm takzet zet a ni. In tello chuan engah mah ka chhuak dawn lo chuvangin min support a feedback min pe char char turin ka rawn ngen deuh tawp che u a ni. 🥹🥰🙆🏻‍♀️💜)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)