MIRACLE LOVE CHAPTER - 45 by Amy Cck

Episode kal lai dah luhna

Moderator: writers

Amy
Posts: 432
Joined: May 15th, 2019, 8:49 pm

MIRACLE LOVE CHAPTER - 45 by Amy Cck

Unread post by Amy » June 29th, 2022, 12:33 am

Miracle Love ❤ by Amy Cck




Chapter - 45




Zing thleng pawh chuan ka bulah a thu tum bur a. Nizanah a mah leh a mah in kawm in a duh duh a ngaihruat kual a. Engmah sawi ve thei si lo chu ka ngawi reng bawk nen a in sawi thinrim ringawt a ni ber. Jenny in a biak pawh chuan a chhang bul hmuk hmuk a Jenny pawh a ti hrilhhai zo vek a. Kei engmah sawi ve thei lo chu hrilhhai zet hian min rawn melh leh haw thin a. Zoremsanga leu luau lah chuan hmeichhia ang mai a a ngaihtuahna vak kual vel vangin rum deuh in melh leh run run zel bawk nen ka thu ngawi kar a. Thil han ziak tur tak ngial pawn ka dinglam zawk hi a che thei si lo, ka awm dan chu a kai vel vek.




Kan pathum a kan thut thap lai chuan cabin kawngka chu a rawn in hawng a. Ka u a rawn lut ve hlawl mai. Tifin a rawn khai danah tukthuan min rawn pek a tum tih kan hre nghal mai. Jenny chuan a lo buaipui nghal vat a. Ka bulah rawn thu thla in enge ka an tih min zawh chuan Jenny zawk chuan a lo chhang a.





" Tak a I doctor khan I chhuak thei tawh mai thei tih a sawi tak a sin. Nangman i duh te a nih chuan in lamah treatment te pawh kan la zawm thei tho a. Mahse i duh leh duh lo a ni mai. I duh chuan ka nu leh pa te biak a ni mai. Chhuah chu I duh dawn em? " Tiin zawhna mit meng chuan min en a. Ka thei dan tawk chuan lu ka lo bu nghat a. Ka sir leh lam a Zorema ka en chu a lo la thu tum bur mai. Nizan atangin a mood a fuh ta lo lutuk chu kei pawn hreawm ka ti ve tan tawh.




" Canteen ah khuan bai tui deuh an siam a sin. Kan ei hma ka zu lei lawk teh ang. Antui chu awm tho mahse ka ei chhak tawp. " Jenny in ti a kal a tum chu ka u chuan, "ka lo zui ang che, "a ti ve mai a. A ding ve nghal uai chu ka melh haw mai. Bai mai mai lei tur a an pahnih a kal hi a ngai thlawt lo.




" Kan rei lo ang, Zorem lo awm ru aw. " Ka mit meng hrethiam ang mai chuan ka u chuan a la ti zui. Tawng thei ngat i la chuan pakhat zawk zawk kal lo tur in ka ti ang maw le. Tunah tak hi chuan Zoremsanga a tum lian si a mah nen chauha awm pawh ka huphurh.




Ka u te pahnih an chhuah hnu chuan kan thu ngawi duh reng a. Zoremsanga lah a melh ngai a melh run mai bawk si. A tawpah chuan ka kut ka chet theih lam chuan a darah ka va tawk zeuh a. Dik tak chuan ka taksa che thei lam pawh hi an la chak lo in an la zawi viau mai. Chutia ka khawih takah chuan min rawn melh ta vut a. Zawhna mit meng a en in ka mit hmul chu ka kan nghal zeuh a.




" Haw chu i chak viau em ni? " A ti ta daih chu nui sang in lu ka bu leh nghat a. Hetia awm reng hi ka ning tawh hrim hrim. Chutiang a na em em ka nei tawh lo bawk nen. A chang a ka luna leh ka hnar rawn thi leh zeuh thin hi a ni mai a. Ka tawngthei lo leh che tha thei lo hi chu a dam mai dawn pawn ka hre lo.




" Kei chu heta awm hi nuam ka ti. Nilengin i bulah ka awm theih bakah zanah i kiangah mu in i taksa kuah chungin ka muhil thei a. Eng thil mah a ruk a ral ngai lo in ka ti dun a. Eng vak ti lo mah i la ka buaipui theih vang che pawh hian nuam ka ti. " A ti sup sup a. A ngaihtuahna chu a naupang chhia tak zet. Kan haw hunah pawh kan in hnaih in a rawn kal fo thei dawn tho a. Chutia chhan chu ka duh a mahse ka thei si lo.




" In inah chuan a hming chuan ka rawn hmu thei tho che a mahse tun ang hian ka khawih in ka hnaih viau theih kher tawh lo ang che tih nang pawn i hre chiang, ka lak atangin i chhungten min lak sak angah ka ngai tlat che. " Ka ngaihtuahna hria ang hrim chuan a ti leh hmuk a. Ka tih theih tawk a thu sawi lo ngaihthlak chu ka hna a ni mai sia. Nizan ang mai a a in sawi thinrim ka hlau ru viau bawk.




" Kan in nei tawh mai dawn em ni? " Thu tak zawk a min en chung a a ti sup chu hrilhhai zet in ka en ve ringawt thung. Chutah za lo fahran a nui chhuak hawk in a kut chuan a hmai a tuai phawk a. " I duh lo em ni? Nge ni a pasal tlakah min ngai lo zawk? " A tih leh sup a. Ti nge ka tawngthei lo a, a zawhna ka chhang thei lo tih hre reng chungin chhan ngei ngei tur zawhna min zawh tlat le.



Ka u te an rawn lut leh a, chaw ei tur Jenny in a buatsaih mawlh mawlh lai chuan " In lamah tih tur ka nei a, ka lo ve phei hmasa a nge. " Tiin a tho vut a. Ka u in tifin a rawn ken kep vek tih a sawi chung pawn a hniala a chhuak lui ta tho a. Lungni lo zet chuan ka thaw hak a. Sawi awm leh awm loh pawh a ngaihtuah lo emaw ni, tun din hmunah innei sawi te chu a mah ka duh lo lam ni lo in, kei tawngthei lo leh kal chu sawi lo chet mai pawh harsat nen a in neih tum te chu, a tan phurrit chiah ka ni dawn tih hre reng chungin engtin nge min sawm theih zawk. Nge ni a ka chhang thei lo a la din hmun a hriat vang hian min kal san na hun reng chang tiin a sawi zawk.




" Tukin chu a va mak ve, ka rawn thlen atangin a lung ni vak lo nge a hmel kha a dik lo riau. " Ka u chuan a ti ve nuah nuah a. Tunah chuan kan chhungte lam pawh in biak chhiat emaw in hel kual reng kha kei ni an fate vang hian a rem chiah lo bawk nen an pangai ve ta khawp mai. Zorema chhungte pawn min rawn kan ve zut mai. U Lka phei chu a thawhna a ni bawk nen min rawn hmu fo a, ka hriat tak chu min enkawltu nurse la naupan hmel deuh kha a bialnu chu lo niin.




" Nizanah ka mutthilh chhungin an lo in hau nge ni an tum bur mai. Chuan engtin nge chhuah chu kan duh tlang em ni? " Jenny pawh chuan a tih zawm a. Kei berin haw ka duh ve bawk nen doctor in min rawn check rual in ka u chuan a lo be luam a. Rem lohna tur a awm lem lo bawk nen doctor pawh a phal ve mai a. Ka pa phone in thil tul an buaipui zung zung a. Ka nu erawh in lamah Eddie awm in a lo kal ve lo thung.





Chawhnu lam a kan chhuah dawn chuan Zorema pawh a rawn lang ve leh tawh a. A hmel chu ka en thin a a hlim lo riau a ka hriat vang chuan hreawm ka ti ve em em ringawt a. Wheelchair nen damdawiin atang chuan kan in nawr chhuak a. Ka u in motor a rawn ken vangin kan lut a, kan hnungah Zoreman bike in min rawn zui bawk.




In kan thleng chu ka thiante ho pawh an lo awm ve a, u Duati pawh lo awm in ka chhuak chu min lo lawm pui thiam viau mai a. Karleh mai a pasal a neih dawn vangin an inneihnaah ka tel min phut thute chu a sawi ve luam a. Ka lawm pui viau rual in a nin pasal a neih daih chuan Zorema ka lo ngaihtuah daih thung. Inchhang bung tih takah an unauah ro ro chuan an in pawh bik bawk nen.




A tlai ta bawk nen ka thiante chuan haw an tum ta hlawm a. Thlah an phut tlat bawk nen Zorema motor in a va thlah dawn a nih hmel a. Heng ho rawn leng hi chu an in ti lal thei hlawm lutuk a, an hahtlak a nia.




" Ka rin aiin i tha chak a ka lawm khawp mai. Tunah chuan damdawiin atang i rawn chuak ta bawk a hahdam deuh in pasal pawh ka nei thei ang. Zorema treatment lak zawh hma chu a bulah awm ka duh teh lul nen. " U Duatin ka bul a thu a a tih chuan ka melh ha mai. Eng treatment nge maw ni le.




" A hrilh loh che em ni a damdawi tih a bansan theih nan hian methadone a la mek a. That pawh a that pui viau chuan ka hria a. Mahse a effect ti mai i la, methadone hi a chak ang reng sia, treatment an lak lai a damdawi leh a kaihhnawih lam hi an khawih pawlh leh a nih chuan od a awl bikin thih phah na chance a sang si a, han kal san tawp mai chu ka rilru a nuam lo ve lutuk a. " A ti siam siam a. U Duati thu sawi lai chu ka lo en reng ringawt.




Kawngka lamah thawm a awm takah chuan kan hawi phei a. Zorema pawh a lo let chiah a nih hmel. Jenny nen an inbiak hnuin kan lamah a rawn phei ve a. " Bawihpui ka phei mai dawn a sin. I duh hunah lo phei ve mai rawh aw. " Tiin u Duati chu a haw phei a.




" Zo.. I roomah I mu hahchawl duh em, I mawng a na tawh viau lo maw? " Jenny in rawn phei ve pah a a tih chuan lu ka lo bu leh nghat. Ka ti ve thei tawk chu ka lu buk leh ka mit han hman vel hi a ni mai sia, a chhang chuan ka thina rim in ka tah a ti chhuak ve lek lek mai. Thla em pawh a la tling lo a hreawm ka ti em em a, tiang hian awm reng ta i la engtin nge ka awm ang.




" Kan kuah chho dawn che nge... "



" Kan pawm chho a nge. " Tiin Zorema chu a ding nghal uai a. Zo zet a min pawm kang lawp in inchung panna stepah chuan min chhoh pui a. Kan hnungah Jenny pawn min lo zui ve bawk. Khaw nge ka nu leh pa te hi an awm ka hre ta miah lo. Ka u chu Eddie a tlei lo lutuk a vah harh pui kha a nia.





" Zorem i hman hmawh viau em? Rawng ka bawl zo tep a lo la awm lawk la. A mah te chuan ka ngaihtuah deuh sia. " Ka khum a ka thu awn diai chu min en in a ti sep a. Tunah pawh hetiang hi ka nia, kei mah tal hian bathroom thleng thei tawh i la chuan a zia tur.




" Ka hman a lawm. " A tih ve takah chuan Jenny pawh thaw huaiin a chhuak zui a. Ka khum sir a a rawn thut thlak rual chuan ka lo en chik ngang mai.



" Ti nge kha tia min en a, mamawh i nei em ni? Nge bathroom kal i duh zawk? " Tiin ka thil ngaihtuah hriat tum zet chuan min en a. Lu ka thing leh vat a, thil hre chhuak zawk in ka kut hmang chuan ka bengah phone lem ka siam a. Phone ah te chuan ka type ve beuh beuh thei in ka ring. Ti nge a hma atanga ka lo ngaihtuah miah loh ni damdawiinah te khan.




" I phone I hmang duh em ni? " A tih takah chuan nui sangin lu ka bu leh nghat a.



" Khawnge an dah Jenny ka zu zawt lawk ang. " Ka tih tum hria ang mai chuan tiin a tho vut a, a chhuak zui nghal a. Rei lo teah a rawn let leh vat thung. Ka kut dam lam zawk a a rawn dah chu ka hmet eng zui pap a. Thil ka type mial mial lai chu min lo en ve reng bawk.




* Treatment I la tih ka lo hria a. * tih type in ka sent rual chuan a ma phone zawk chu a ri a, la in a en ve nghal vut.




" A dik a lawm. " Tiin a nin tawngka in min chhang thung.



* u Duati sawi dan chuan a thawk chak lutuk a tia. *



" A dik a lawm. "



* engtia rei nge i lak dawn? *


" A tello a ka awm theih hma a ni mai. " Tiin za lo fe in a kiai suk a.


* treatment i lak lai a i khawih leh chuan i thih phah theih a nia. *



" Ka hria lawm. " Tih zawng a min chhang chu thawk ka la hak a. Ka thil type ka khawr si a hahthlak ve det. Ka kutzung chal in ka hmet bauh bauh mai a.




" Kei mah vang in I hlauthawng em ni? " Ti a min entu chu en let in lu ka bu nghat.




" Ka nghei theih I ring lo tina maw? " A tih leh chuan lu ka thing rang viau thung.



" A nih chuan ti nge I hlauhthawn si? " A ti a. A mit mengah chuan ka ring lo emaw a tih vang nge hreawm ti hmel a pu deuh. Ka phone chu hmet engin ka type nghal vat a.




*I ti thei tih ka hria lawm, mahse ka chan mai ang che tih ka hlau a ni. * tih chu ka type vat a. Nui suk in a rawn awm hnai a ka hmuiah chuan a fawp ringawt chu ka hrethiam lo ngei mai.





" Chuti a nih chuan ka sawmna che kha pawm mai la. " Hnai tak a min en a tiin a nui suk a. Ka phone kenna lam chuan a awmah ka nem zui dawt.




" Ti nge min neih chu i duh lo a, i bul a awm ka thlakhlelh ang hian ka kiang a awm hi i thla hlel ve miah lo zawk nge. " A ti leh hmuk a. Ti nge maw a thin a tih rim dawn ziah mai ni.




*chutiang a ni lo. *



" A nih chuan enge a chhan chu? "




*i hmu lo der nge i hre duh lo der zawk, tun a ka dinhmunah hian pasal nei thei niin min hria em ni? * tih type in Zoreman a chhiar lai chuan hreawm ka lo ti ngawih ngawih.




" Enge i theih loh ang? " A la ti tal chu rum zet in ka melh leh nghek ringawt. Eng emaw sawi tum chu ka ka ka ang ve tak na in a ri chhuak thei tlat lo chu ka rilru na thar nen ka mittui chu a rawn luang ngiai ngiai ringawt.




" Heii... Bawihte ti nge i tah a? Kei chuan engmah dik lohna i neih ka hmu lo. Eng ang pawn awm in, tawngthei lo emaw che thei lo pawh ni la ka tan chuan i tha ber reng dawn. Chuvang chuan hetiang hi chu kan inkar ti hla tu nih tir suh. " Tiin min kuah hlu hlu a, kei erawh ka tah a chhuak zual sauh.




" Hetiang a i awm vang hian ka bul a awm tur in ka duh leh zual che a, ka hmuh phak loh a i awm chuan ka ngaihtuah zual che a, engtik lai pawn a ka hmuh theih a i awm khan ka hlim in ka hahdam thin. " A ti leh sup sup a. Mahse tiang chuan a phur tih rit tu ka ni zual mai mai dawn tih ka hre ve reng bawk si.




* tunah ti khan ti mah la nakinah chuan min la ning ang. * min kuahna atanga tal hrang a ka tih chuan a nui chhuak hawk mai.




" Lalpa leh, kei hian engtikah mah ka ning ngai lo ang che. " A tih chuan ka hahdam viau a mahse tun ang reng ka nih chuan awm zia a awm kher lo ang.



*

*


" A ho lutuk, Zorema ka buaipui vek mai ang che a tih kha. Ti nge i tum bur a. Duati pawh khan a phut ve em che kha. " Ka hma a ding a ti tu chu ka melh rawm. Vawinah u Duati te an in nei dawn a. A mipa te veng lamah kal ngai bawk nen Wheelchair nen a va inkhawm chu ka chak lem lo. Zorema pawn min buaipui in tiam mahse a u pasal neih ni a Nia kei lo buaipui tur dang a ngah lutuk tlat.




" Chu a lo thleng a nia. " A tih hnu rei lo teah ka roomah Zorema a rawn lut a, coat suit nen a in duang zui mai a, a chhiat loh dan chu pui tak a ni. A mah a palian in a sang vuah a. A taksa lah a zahawm tawk chiah in a in phut a. Pa Lsa an chhun ka ti mai u Lka pawh hi mipa chhelo tak a nia mahse ka mitah chuan Zorema hi a la chhelo zawk.




" Kan hman tawh em? " Ti a min melh chhuk chu ka lo tum bar mai.




" Hman e inhnuai thleng pawm thla mai la. Wheelchair hi ka lo keng ang. " Jenny lah chuan a lo ti sawk sawk a. Wheelchair chu thlep in a khai chhuak nghal daih zui.





" Ka lalfanu chu a bulah lalfapa ka thleng tawh chungin a va la tum kawh nasa ve. " Nuih za aw taka a tih leh chuan thawk ka la hap ringawt. Ka nat dan hi pawm dam ka tum fo thin, ka taksa a che thei lo a nih pawh in tawng tal tawng thei i la ka hlim deuh ang. Mahse tunah rih chuan ka hahdam thei hlawl lo.




" Ka hrethiam e. " Ti a rawn kal hnaiin ka hmai zawnah rawn kun in ka hmuiah chuan a rawn fawp zeuh a, " Nui rawh le. " Tiin a mah zawk chu lungkham neih loh hmel zet chuan a nui a. Ka sir a ka phone chu ka ban ta daih thung.




* lo kal chu ka duh lutuk a mahse ka dinhmun hi hrethiam hram ula. U Duati pawh ka zah lutuk mahse hetiang chuan ka hnawk mai mai. * tih type in ka hmuh a, ka ti ngun tawh bawk a ka type chak ve ta khawp mai.




" Chhuan lam ka ngaithla duh lo ka tih kha. Bakah kei ni pawh ti ve thut thei kan ni a, in zirnan kan lo hmuh ve kha a ngai. " A ti chu ka ner nasa mai. Ni tin kan in hmu a, nikhatah vawi khat tal ' min nei duh em? Emaw min nei tawh mai rawh? ' tiin zawhna ni siin min sawm ziah a. Mi pangai phak tawh i la chuan ' aw ' ti a ka channa a rei tawh ang. Mahse tunah chuan mahni pawh in enkhawl thei lo hian pasal ka neih chu van a rah ang a la ni.




" ' Aw ' Ti a min chhan veleh ka nupui i ni a nga i pasal ka ni nghal a ni mai. Chuvang chuan min nghah rei tir lo hram la. " Tiin min pawm leh nawlh a. Inhnuai a kan chhuk a pawnah min pawm chhuak in motor ah min pawm lut zui nghal bawk. Hnung lamah ka wheelchair a dah lut a. Ka u te nupa leh ka nu leh pate pawh an rawn kal dawn a kan motor in.




" Nui tawh la, I tum bur bur vang khan I kal loh phaj dawn si lo a. Ka u in hruai ngei ngei tur che in min ti bawk sia. Bakah vawin hi I tan ni bik a ni dawn a nia. " A tih chuan thawk ka la ham ham. Ni e, ni bik a ni khawp ang. Hetiang a inneihna a ka kal hi ka theihnghilh tawh kher lo ang.




Biakin a kan thlen chuan mi pawh an lo awm ve nual tawh a. Zorema chu monu nuta a ni ve miau a ka bulah awm duh mahse a rem ta chiah lo. Kei chu ka u te bulah ka thu a, kan luh khan Zoreman min nawr lut in wheelchair atanga min pawm sawn in biakin thutthlengah min nghat a. Ka chair chu thlep in ka bulah a dah a. Kan bul velah kan thiante ho pawh an rawn thu a, monu lam kan ni bawk nen Roa te nen kan thu ho thei a, an fel bawk a min buaipui thiam khawp mai.





U Duati leh a pasal turin thu an chham lai chu ngun takin ka en a, an in hmeh in hmuh an nuam tak zet. Inkhawm a zawh chuan pawnah kan chhuak a. Dikin min nawr kal ve zel a. Thla te an lak zawh chuan Zorema pawh ka bulah a rawn awm ve ta chawt. Inneihna lamah an mamawh ang che ti a ka hrilhna pawh a hre lo der hmak a. Biakin lamah ruai pawh an buatsaih vek vangin kan ei hlawm a.




Ruai kan theh zawh veleh Zoreman hreawm ka tih hlau in min haw pui ta nghal a. Nileng a wheelchair a thut chu a nuam vak lem lo. Motor chhung a ka thu chu ka dam sawng sawng hial in ka hria.




* kei mah vangin inneihna pawh i hmang nuam lo vek a. * tih type in ka hmuh a, a ner nawng thung.




" Awm lo la chuan tun ai in ka hmang nuam lo zawk ang. " Tiin ka seatbelt min rawn hren tir a. Chu mi rual a ka hmui a rawn fawp zeuh chuan ka lo ner nang.




" Kan tlan chhungin lo muhil rawh. I chau viau ang " A tih chuan ka hnial lo kawp mai. Motor a tlan chhuah tir rual in mit ka chhing zui ve ta vang vang.





Ka bul a thawm awm leh thinah chuan ka meng vai ruai a. Motor a muhil kha khumah ka lo awm reng tawh. Mahse ka room ni lo in Zorema room zawk a ni tih ka hre nghal. Ka hawi kual chu ka sir lamah Zorema chu inbual zo tih htiat zet hian a lo inthlak mek a. Ka mutui viau a nih dawn hi motor atanga kan chhuah lai pawh ka hriat loh.





" I lo harh tawh a. " Ka lam a rawn hawi min hmuh rual chuan a ti sup a. Ka in nem kang deuh chu min rawn pui zui nghal vat.




" Inhnuai lamah awm la awm nual a, nakin deuhah kan chhuk dawn nia. " A tih chuan ka hnial bik lo. Kan in kan hnaih tawh tho a, ka bul a awm tam a duh thu a sawi zing a, tunah pawh min thlah haw chuan a rei berah dar 10 thleng a rawn leng a nga, zanah ka room a rawn luh lah a chi tawh der lo, ka nu leh Jenny in min riah pui a, a in chhawk in. Chuvang chuan a ruk a rawn kal chu a ngaihna a awm lo.



Roomah chuan kan pahnih in kan awm tawp a. Kawngka a kalh bawk nen tuman min rawn chim buai lem lo. A guiter kha perh in min zai sak vel a, hman a ka keychain pek a la in khai va va te chuan lung a ti leng rum rum.




Kan awm rei ta phian a, in leng pawh an haw rem thawkhat tawh tih in ka phone hmetin haw ka duh tawh thu ka hrilh a. A ni pawh chuan engmah sawi lo in min rawn pawm kang zui nawlh a. Room chhuah san a kan chhuk chu an lo haw ve tawh chu niin. An nula 2 ten hnawm hnawk an lo ti fai mek a. Inhnuai kan thleng thla chu sitting room lamah pa Lsa leh nu Ruati an lo la awm a. Choka lam atang u Lka a lo chhuak vut bawk.





" Ee... Zonuni i la awm a ni maw? " U Lka chuan min ti a. Zoreman min pawn vu bawk nen hmai a uang lo khawp mai. Mahse ka din hmun an hria a, engah vak min ngai lo ang chuan an awm zui mai a. A eng chu hria ni maw pawn lama min pawm chhuak mai lo chuan pa Lsa te thutna lamah chuan min phei pui a. Sofa a min dah thla in ka bulah a rawn thu ve nghal zat..




" Duati chu a ngaihawm nghal rum rum mai. Ka naute neih chhun a ni tawh a sin maw le. " Pa Lsa chuan a ti a, nu Ruati zawk chuan a lo sawi zui pui luam a. U Lkan fiamthu in a lo lak sak bawk a. An hlim zui phian leh nghal. Kei erawh haw ka duh tawh viau, tui lum sa ver vawr a inbual a mut der der ka chak tawh.




" Mi hrang an awm tawh lo bawk a thil pawimawh tak sawi tur ka nei a. " Zorema chuan a ti ve sup a. A thu tak vei phian leh nghal. Midang ho nen chuan kan en thap mai.




" Zonuni nen hian inneih kan duh. " A ti bung nghut chu inchhung chu a reh tlawk tlawk mai. A tu a mai pawh chu kan hawi phawk hra a ni ber. Ka kut dam lam chu a shirt ah la pawt ru a a la hre lo der hmak zui. A nak a ka piai rual in a rawn hum bo zui hmak bawk.




" Bawiha i fiamthu a ni lo maw? " Hrawk then khurh pah a pa Lsan a tih chuan Zorema vhuan a lu a thing a.




" Ka thu tak khawp mai. " A la ti ang deuh deuh a. Hepa hi a a tak tak tawh a nih hi. Nge ni a ruih a nei leh tawh zawk. Ti nge thil ni lo lo a sawi.





" In tihderna chiah pawh ka ngai lo a nia. Vawinah i u kan thlahliam fel chauh a. Thil tih chi a ni em ni? " Nu Ruati chuan a ti a. Kei pawh chu ka lo thu ngawih reng ringawt.



" Zonun nuam lo tih phah suh aw, nangmah lam vang ni lo in kan hun tawng nen a in mil lo em a ni. " Nu Ruati bawk chuan min ngai chang tak in a ti leh nghal a.




" Ka hria mahse neih ka la duh tho. Ti hian ka ru a ni mai a. Min pawm pui rih lo a a la hma in ti a nih chuan... Ni e... Ka va dah let leh ang. Mahse kei mah zawk in makpa chhungkhung in ka va luhkhung mai ang. Kan in neih pangai in rem tih hunah kan lo kir leh mai a nga. "




Zoremsanga chu a a ta emaw tih tur in ka melh ngawt ngawt mai. A tih der ni a rinna ka nei laiin a thu tak lutuk chu ka rilru a lo ti hah. A ni hi chu a ngaihtuah tawh chu enge a nghaqng ti ngai tuah lo a tih tlang tawp ching chi a lo ni ve bawk nen.





" Bawiha i ti mah mah lo maw? Zonuni pawh a la dam chiang lo a, kar hmasa lawkah damdawin atang a rawn chhuak chauh a. Bakah vawinah kan farnu in pasal a nei fel chiah leh nghal. " U Lka chuan a lo ti ve bawk. Kei erawh ka zak chem chem a, thei ngat i la chuan ka tlan haw nrl nel ang. Ka awm dan hi ram changah hman a tum chiang lutuk. A chak loh dan tur hi!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)