PRIDE AND PREJUDICE CHAPTER 1

Episode kal lai dah luhna

Moderator: writers

Krystal Vanchhawng
Posts: 127
Joined: October 5th, 2021, 4:42 pm

PRIDE AND PREJUDICE CHAPTER 1

Unread post by Krystal Vanchhawng » July 1st, 2022, 10:51 pm

PRIDE AND PREJUDICE

CHAPTER 1
☆☆☆☆☆☆☆

(English novel ka vawi1 ziahna tur ania,amak teh nuaih maithei. Ka tawng kauchheh hi a mizo ve thei thak thak a😂😂,Sap ni reng si,an tawngkam lo Mizo riau changte pawh a awm zeuh maithei a,kha chu lo hrethiam ula,Sap pawh hi an Mizo ve riau tih lo hre mai teh u😂😂. Chuan,Mizo tawng hman theih rengah English ka hmang nual dawn a,entirnan
Uncle Luke,Brother,mommy Balgoni tih angreng te maw. Pate Luke tih aiin a inhmeh zawk a,English novel anih angin English a tam deuh maithei😊😊😊.



Hmeichhe naupang,kum 13 mi tawng dantur vel hi ka ziak thiam lutuk lo,engawh chu nise,a kum phulohvin a puitling ah lo ngai mai r'u😂😂😂)




GEORGIA SMITH POV:


'Lei chu leiah,vaivut chu vaivutah tih ziak a ni si a,chuvangin,kan unanunu,Elizabeth Molly pawh hi vaivut ah a let leh a ni tih i hre thar ang u' titu Pastor chu ka melh kar a. A sira ka nu mittui lo hru zeuh zeuh pawh chu ka hmu reng. Mahse,a tuar em em vaklo tih ka hria. A tuartu ber chu kei,a fanu,Georgia Smith hi ka ni.






Aunty Molly hian kum 3 mi ka nihlai atangin min enkawl tawh a,ka nu ai pawha ka pawh leh ngainat zawk a ni. Ka nu,mi hausa nupui ni tura a fanu kalsan thaktu ai chuan hmangaihna pawh a ngah in,min duat hle. Mahse,tunah erawh,accident vangin min kalsan ta si. Chiang takin,ka nu leh a pasal te bulah ka chen angai dawn ta a ni.






Khua chu a cheng viau a,chhum pawh a chhah hle. Aunt Molly kan vui zawh chuan kawngpui lam panin kan phei sang sang a. Ka nu chuan min kuah a,min hnem beiseiin ka melh reng a. Mahse,a pasal secretary nge,mi pakhat tarmit dum vuah nen chuan an inbe ser ser reng a. Nghak reng duh lo chuan kawngpui lam ka pan san ta a.







Aunt Molly nen kan in chhete ah chuan chau zetin ka lut a,ka raincoat te chu ka khai thli thlawr a,in hru hul zui nghal thakin ka pindana kawrlum,Aunt Molly min phiarsak ngei mai,lum tha tak chu ka va la a. Inthuam nghal thenin sofa ah chuan ka thu a. Mahni chauha rei tak ka thut hnu chuan kawngkhar alo ri a. Ka puan pheikhawk chu thawlh sawk sawkin ka chhuak phei a. Ka nu leh amah zuitu pa kha anlo ni.








"Aw,bawihi,ka zawng nasa che asin" tih pahin ka nu chu alo lut a. A mi hruai pa chuan a hnungah alo zui lut ve nghal bawk. An kawr huh te chu an hru thuak thuak a,sofa ah chuan thu in kan in te chu a han thlek kual vel a.






"Insiam la,min zui rawh le" awlsam hmel zeta atih chuan ka sam khawih neuh neuh paha
"Mommy Balgoni,tunah chuan ka rawn zui theilo ang che" ka tih chuan a meng phar awk a. Balgoni hming ka lam tel khan nuam ati tih hmanni lawk atang khan ka hrechhuak tlat a ni..






"Engah maw?" Dam zeta atih chuan a bula ding reng pa chu melh zeuhin
"Ka school kalna hi ala laklawh a" ka ti leh a.
"Kum 13 mi tan mahnia chen ngaihna a awmlo. Va insiam rawh" vin deuh zawka atih chuan
"Uncle Luke pawhin a duh zawk ang. Uncle Luke chuan i thu a pawm zel kha. Karleh ah emaw min lo hruai la,kan zo tep tawh a" ka tih takah chuan a nem leh deuh a.






"A tha e,karleh atang chuan kan bulah i awm tawh ang. Kal ang le" tih leh thawh a rual a. Kha kha ka nu zia chu a ni. Balgoni tih leh Uncle Luke hming sawi chuan ka thu engmah a hnial ngailo.

.....................




Aunt Molly awmloh chin chu keimahin rawng ka inbawl a,ka che buai nasa thei hle. Amah vuitu Pastor kha kan inah hian alo kal fo thin a. Ani chuan nupui hmeltha tak a nei a. An 2 in eitur te min rawn ken thin. Chumi hmangte chuan ka inhnawh puar mai thin a. Ka nu ve kha chu a rawn lang nawn tawhlova,call lah a rawn call heklo.






Ka school kalkawngah chuan Luxury car nalh tak takin min tlanpel suau suau a. School kawtah chuan dingin driver ten an chhungkaw Princess leh Prince ho chu kawngkhar an hawn sak a. School compound a an luh thleng an thlir liam thin.





Ka in en,ka pheikhawk hlui ve tawh tak te,ka tiffin box a chhangthawp toast khawng urh tawh zawng zawng nen chuan he school ah hian ka lut zawm tawh dawnlo emaw tih mai a awl. Mahse,tunah pawh hian,ka pawisa emaw,Aunt Molly pawisa in emaw ka lut lo. Ka nu pasal,Luke Balgoni te company foundation hnuaia scholarship hmangin a ni ka luh. Chumi vanga min bully(ti duhdah) tamtak an awm bawk.





Mahse,pawi ka tilo. Aunt Molly khan min hrilh thin a,he'ng princess leh Prince ho hian hlimna tak tak annei lova,an inchhung khurah pawisa chungchang bak an sawi ngailo,hmangaihna tak tak an nei bawklo tiin..







'NORTON HIGH' tih kawtah chuan ka ding reng a. Millionaire tamtak fate chuan min kalpel zung zung a. Hnuailam bih chhal paha kan classroom lam ka panlai chuan tu emaw ka hmaah a rawn ding thut a. Anmahni anih leh mai hlauv taka ka en chhoh chuan vanneihthlak takin Steve zawk alo ni.






"Steve" ka tih hliai chuan ngainatawm em em in mi nuih leh a. Nidanga a tih ziah danin ka chhip sam chu a tuai thur zui bawk..
"Modern Princess chu ava ngui ve?" Tih paha a kal chuan a sira kalin ka zui mai a.
Aunt Molly chanchin ka sawi chuan pawi atih thu leh min tawrhpui thute a sawi a. A hmelah chuan min khawngaih takzet tih a lang.







Kan kal zel a,classroom kan thlen hma tep chuan ka hmai zawnah tak basketball alo thlawk fua a,ka hnarah a rawn fu sawk dawn emaw tia ka au thawt rual chuan ka hmaah tak Steve chu alo ding vat a.







"Steve" ka tih that rualin anlo thawm zui hak a. Hlauthawng zeta mengin,ball laka min chhanhim tumtu Steve chu ka kal hual nghal a. Mahse,a awmdan ka hmuh chuan ka hahdam nghal huai thei. Ball chu a awm zawnah tak alo man chat a,alo vawmtu lam ni awm tak chu lung nihloh hmel zetin a melh bawk.







A hawina lam ka en chuan ka tawlh deuh hrat a,anmahni bawk,misual unau leh an thiante. An thiante tih lemah,Steve pawh hi an thianho zingah chuan a tel ve reng a. Mahse,anni anga sual ani ve lo. Ani chuan midangin min tihnat loh nan min veng reng zawk thin.






A mipa zawk chuan ngeiawm fe in min melh a,a hmeichhia zawk erawh chuan Steve a bik melh thung. Anni unau leh an pawlte hi an hming takngial pawh ka hrelo,Steve tihloh chu. Min tihbuai peih em vangin midang ka zawt tawh a
'He school a lut chung hian an hming pawh ila hrelo maw?' Tiin min nuihzat a,chu chiah chu ka chhanna dawn awmchhun a ni thin. Chuvang in,zawh pawh ka zawt nawn tawh lova,an hming hrelo mah ila,misual tak chu anni tho tho.






"I tha em?" Tih pahin Steve chuan ka dar a rawn chelh a.
"Aw,ka tha. A fuhlo che tiraw?" Ka tih chuan a bu nghut a. A thiante lam hawi pahin
"Guys,in infiamna hi a tawk tawh viau" ati zui a. Anni chuan engah mah ngaihloh hmel fe in anlo nui mai mai a. Mahse,chupawh a zat vang lam a nilo,min huat vang a ni.






"Brother Steve,kan fiam ve mai mai alawm. I hriat kha,Modern Princess te tunge tibuai ngam ang?" Hmeichhe 1 chuan alo ti a. A hmel ka en chuan chewing gum thial sawk sawk pahin min lo melh rum ngar mai.






"Mate(Classmate, tih vela MATE ang zawk hi aw,Mizo in kan fate Mate kan tih ang kha chu ni hrihlo aw😂😂),i duhtawk thei tawh ang em. Gi hian hun harsa tak a tawk mek ania" tih pahin an hotu ve ber chu ava tawk leh a. Chupa chuan Steve chu lo nuih sak pahin ngeiawm fe chuan min melh a. Steve lamah chuan thle bakin eng emaw a hrilh sup a,inher in,an kal mai dawn emaw ka ti a. Mahse,a ipte a zen a,a pheikhawk ke artui chhuat dinglam rawn her zeuhin,tenawm tih hmel zeta mi melh pahin eng emaw a sawi sup a. A hmel awmdan atang chuan anchhia bak anih ka ringlo.







"Steve,anni kha tute nge. Tinge min tibuai reng a,an pawi ka sawi tawp silo?" Tap lek leka ka tih chuan beidawn hmel zetin a thaw hawlh a.
"Gi,hrelo la atha zawk. Thil tithei tak anni tih hre tawp rawh. Chuan,keimah lo chu tumah ring suh,helai ami te hi an inang vek. Nat i duhloh chuan tumah ring suh aw" thutak deuha atih chuan a ngaihna hrelo zetin ka lo bu nghat nghat a.





School hi nuam ka ti ngailo,mahse,pawisa ka nei lova,ka kal ve theihna awmchhun in ka kal zel mai a ni. Anniho ka tawh chang phei kha chuan tlan haw vang vang hi ka chak thin. Tunge annih ka hriatloh ang bawkin ka khinglet duh lova,mahse,min bully vanga tah tawp chang ka ngah thin. Mi rethei fanu mai ka nih vangin ka tawrh angai a,nakinah chuan ka tuh rah ka seng ve anga,mahni ke a ding thei ka nih hunah chuan an duh duha an pawh kawi mai mai theih chu ka ni tawhlo ang.







Kan result alo chhuak a,dan ngaite bawk,ka titha lutuk lova,ka tichhe em emlo bawk. Mahse,eng nge dang chuang,mark engzat pawh hmu ila ka dinhmun chu angai reng tho.






"Princess result chu kawimaw?" Tih pahin tu emaw hian ka lehkha kenlai chu a rawn pawt thla lawp a,khanu bawk kha a ni,a U kha a tello hlauh.





"Min pe let rawh" tia ka ban chuan a kut alo tisang zel a,a dar chen vel lek ka nih vang chuan ka ban pha bawk silo,ngam ngat ila sual let vak hi ka chak thin.
"Ehe,thiante u,enteh u,Foreign language ah hian 50% pawh a hmu zo lo anih hi" tih pahin a țhiante chu a hmuh a,an en chuan min nuihsawh rawn a. Tihtheih nei lovin an sirah chuan ka lo ding ngawi reng ringawt.







Anni aia ka tichhia chu thil thar pawh a nilo,anni chuan zirtirtu hran neiin foreign language an zir a,thla khatah dollar tamtak an seng thin. Kei chuan chutia zirna tur pawisa ka nei lova,school a kan zirtirtute lah,mi hausa school ania,private tutor lak hisap in min zirtir thin a,an zirtirna hriatthiam ka nei tlem hle bawk.







"Eng nge inlo tih?" Rawn ti nghal chhak tu chu ka en vat a,a U zawk kha alo ni. A hnungah Steve chuan a rawn zui bawk.
"Lia,eng buaina nge ilo siam leh tak?" Tiin Steve chuan a rawn ban vat a. Mahse,a U bulah chuan kalin alo thukru vat.





"A marksheet kha pe rawh,Lia,ka sawinawn tawhlo ang" Steve bawk chuan ati leh a,a hmel chu ka en vat,a thinrim hmel deuhin ka hria. Ka hmaa hmeichhia chuan a hlau deuh nge,a U chu nuih in
"Unaupa,enteh,French leh German tawnga a score zat hi" Atih chuan a U zawk chuan min melh run a,a sang bawk si,a meng rum bawk nen,a hlauhawm takzet.





"Pe rawh" atih chuan kan vaiin kan en vek a.
"Eng maw?" A nau zawkin atih leh chuan ka marksheet chu a pawtthla lawp a,en pawh enlovin Steve awmah chuan a rawn beng bet thlawp a.
"Min zui r'u" tih leh inher a rual nghal.





"Kha le" tiin Steve chuan ka marksheet chuar chu a timar a,ka kutah a rawn hmehbel zui nghal bawk.
"Ka lawm e aw" tih pahin ka la a,ka bag ah chuan theihtawpa mar turin ka khung nghal sawk sawk a.






"Englo ania Steve,school hi ka sawn maithei a" ka tih sep chuan alo meng zau awk a.
"Tinge?" Ati nghal vat.
"Ka nu te bulah ka awm tawh dawn a" ka tih leh chuan
"Khawiah?" Ati leh a.





"Keipawhin ka hre chiah biklo" ka ti zuai raih a,ka ngaihtuah ringawt pawhin ka hnual ve rawih thei..
"A pawilo,Gi. Keini pawh kan school kan thlak dawn thova. Tihian ti ang,heihi ka number ania,i nu hnen i thlen veleh min lo be dawn nia. Capital khatah te pawh kan lo awm maithei asin" tih pahin business card min pe a.






A card chu la in ka pocket ah chuan ka khung nghal a.
"Min lo be ngei ngei rawh aw" atih leh chuan ka en chho kal a.
"Aw le. Chuan,min theihghilh miah suh aw,anmahni ang khan min haw ve lo bawk la" ka tih sep sep chuan hahdam hmel deuhin ka chhipah kut alo nghat a.





"Englai mahin ka haw ngailo ang che" atih chuan ka hlim leh sawt. Ani hi awmlo se he school ah hian kal tur pawh ka awm tawhlo maithei a ni..





"Ka thlah kawi ang che,haw rual ila?" Tia min zawh chuan rang zeta tawlh hnungin
"Aih aih,angailo,ka nu in min lo hruai dawn?" Kut vai khum meuhin ka hnial vat a. A awih chiahlo nge min melh reng a,mahse
"A tha e,ka kal hmasa mai ang. Mangtha le" tia min zuih sukin a kal ta a.





A kal liam chiah chu ka thaw hak a,ka sir ban chu nghengin a car man to taka a luhlai chu ka en zui reng ringawt. Midang nen chuan an inzui chhuak zul zul a. Anmahni Car mai nilo,a vengtute car nen zawng zawng nen phei chuan zawh nawn ngailovin thil an tithei hle tih a hriat ngawih ngawih.






A car ah khan vawikhat chu ka chuang ve tawh. Mahse,Car changkanga ka chuan ngailoh vangin ka zeilo hle a,school kawt kan thlen chuan chhuk nghal mai ka tum a,a hawnna ka zawnlai chuan min lo kalhual mek bawk. A hawnna zawng paha ka lo bawh deuh rawk rawk laiin Driver chuan a thutna hmun atangin alo hawng thut si,ka inrin hmain ground ual au laitakah ka lum chhuak tawl a. NORTON ka luh chhung zawnga ka zahna min thlen zui a
'Luxury Car atanga lum chhuak hmasa ber ini' tiin min chhaih luai luai a. Ka chuang nawn duh tawh hauhlo.





School chu kan chawl a,Norton ah lut zawm dawn chu ni ila a zia ve deuh tawh dawn a,Steve leh a thiante ho kha an chhuak tawh a. Awmzia chu,misual unau leh midang tiamin College an kal tawh dawn a ni.



..............


Ni thum zet chu a liam leh tawh,ka nu min lo hruai hun chu ka nghak reng thin a. Mahse,alo lang thei bawk silo. Phone ka nei lova,Aunt Molly phone min hnutchhiah ve lah kha collector hovin ba aiah an la daih bawk si. Public phone hmang tur pawhin pawisa chu sawiloh,coins takngial pawh ka nei silo. Eitur pawh ka neilo tep tawh a,Pastor te nupa in min lo tlawh lohna a rei tawh bawk nen,chhangthawp tlawn 1 leh bawnghnute bur 1 chiah ka nei tawh,chupawh a chhe tawh nge,rim a nei tan tawh lehnghal.






A dan ngaite bawkin ka suitcase 1 leh ka bag chhe tawh tak,Aunt Molly in vawitam a thawm that tawh nen chuan in ka nghak leh ran a,chu chauh chu helai inchhunga bungraw awmchhun a ni. A dang zawng,kan gas stove,fridge leh chimney hlui vel chu ba aiah anla fai vek tawh.





Pawnah chuan hmeichhe tawng ser ser thawm ka hria a,sofa ata tho chhuak vatin kawngka kalhna chhunglam zawk chu ka pawt hawng a. Ka nu ngei chuan phone hmang chungin min lo hnungchhawn a,a be laklawh hle a ni ang,ka kawngka hawng thawm pawh a hrelo.





Ngawi rengin ka thutnaah ka let leh a,minute nga vel a liam hnu chuan a rawn lut ve ta chauh a.
"Bawihi,i tha em?" Tih a sawi hmasa ber a. Chhang lovin ka melh chho kal a. A zawhna ka chhan tak lohvah chuan
"Ilo insiam lawk vek a. A tha e,kal nghal ang aw" tih leh tu emaw hi a ko a.






Hmana alo hruai pa kha alo lut a,ka bag leh suitcase chu la in ngawi reng chuan a chhuak leh nghal a.
"Kal ang le" tih paha min kaih chuan ka zui vat a. Kawngka pui kan pelh hma chuan in chu ka thlek kual leh te te a,kum 10 chuang ka lo khawsak tawhna a ni a,ka ngai ve khawp ang.





Ka nu nen chuan ngawi rengin kan inkai chhuak a,kan in piah deuha Car manto takin min lo hmuahna lam chu kan thleng a. Ngawi rengin kawngka min hawn a,kan luh fel chuan ka nu chu a tum deuh reng hian ka hria a. Ka hlauh vanga ka ngaihbel nge,ka zui tur chu a hlimloh hmel tlatin ka hria.





Motor chuan kan tlan zel a,khawpui kan tlanpel hnu chuan khua a tlai ruih tawh,khawpui pela kan tlan chiah chu kan State lo mawi zia ka hre thar ve chiah. Tiang khawpin Illinois(i-li-nawi) ram ngaw vel hi a ropui ang tihngaihna ka hrelo. Mi tamtakin Wonderland leh Disney Land an hmuh a,ropui antih tluk zetin helai ram ngaw leh thingkung mawi tak tak hi mawi ka ti a,ka en ning theilo. A boruak te chu tlan pah pawh nise,ka hip duhthawh em em a,tiang taka boruak thianghlim leh thengthaw nuam hi ka tawng leh har hle dawn tih ka hre silo.




Darkar 2 vel kan tlan hnu chuan Chicago chu kan thleng ta a. Helai pawh hi a nuam leh em em alo nia. In tlemte hi inhlat deuh deuhin an sa a,khawpui thleng turin darkar tam fe kal angai bawk.






"Lokal rawh le" tiin ka nu chuan ka kut a rawn kai a. Ka bag chu ak tha sat satin ka hnaih vat a.
"Saw saw ania" atih chuan mak ti zetin ka en a,hla deuh atang kha chuan in a awm ve tih pawh a hriatloh,hnim a tam em em a,an gate liantak pawh hnim in alo khuh bo deuh vek hi alo nia.





"Mommy Balgoni,uncle Luke hian fa engzat nge a neih?" Tia ka melh chhoh chuan a thaw halh chu ka hre thei.
"2 annia,tha deuhin awm la. Min hnawhchhuah theihna turin awm hauh suh ang che,thil i tisual anih chuan ka hum thei dawnlo che ania" ka kut hum nat sauh paha atih chuan ka lo hlau hle a. Ka la hrechiang ve silo,misual tak leh mi thah hmang anni mai ang tihte pawh ka hlau.






"Ka sawi i hria em?" dam deuh zawka atih leh chuan gate lam hawi pahin ka bu nghat nghat a,ka nun leh hmalam hun zawng zawng inthlak thlengna hmun tur a ni tih hre ngat ila chuan,he gate lianpui hi thleng lovin ka tlan let leh ngei ang.






Gate dum lian zet,a chunglama zum fer fur chu a rawn inhawng ruau ruau a,ka nu chu kaiin ka kal hnak hnak a,ka rin ang alo ni leh hauhlo. An kawt zawl chu a zau em em a,Illinois a kan playground ai pawhin a zau zawk. Hnim hring leh pangpar in a hual vel a,fountain lian vaklo an hung zeuh zeuh bawk.






Kawt zawl kan kalpel a,kan hmaa in liantak ka hmu leh chiah phei chu ka khap fak fak ringawt. Norton High building pumpui ai pawh khan a lian zawk mah maithei,tukverh a tam em em a,a sangin a lian hle bawk.





"Khatin hawi vak vak suh" tih ri ka hriat vang chuan tha takin hmalam ka hawi ta a. Mahse,ka hawi sawn dawn khan inchung lam atanga min lo en tu an awm tlatin ka hria a,bag hrui pawh san zeuh paha ka hawi chhoh leh zawk chuan a chhawng sang bera pindan pakhat ah parda a phe zawk a,chu bak hmuh ka neilo.




"Kan lut dawn ania,ka sawi kha hre reng rawh" tih pahin ka nu chuan a awm a pho nghal lah a,a ring ti fanin a hawi sang nghal vah bawk.




Kawngkhar alo inhawng chiah tihah inchhung boruak vawt ka hre nghal a,sailungvara siam chhuat tle zul ka rap chiah chu ka tawlh thlu mai dawnin ka hria. Inchung chhohna step te chu a hmuh tlang theih dawn emaw tih tur khawpin a thianghlim a,chho sang deuh ila Vanram kan thlen hlawl te pawh a rinawm mai.





Ka nu nui sen sen ka hmuh chuan a hawina lam ka en a,kan hma lawkah anlo ding thup tawh.





"Kan lo lawm a che,Miss Georgia" tih paha min lo chibai tum tu chu ka nu pasal tih ka hre mai,an in nalh lutuk ka lo thlek kualna lamah chibai let nachang pawh ka lo hre lova,ka nu in min nghawk zawk chuan ka kut chu ka pe a
"Chibai le,Uncle Luke" tih pahin ka chibai let vat a..




"Tunah chuan he ina mi hi ini tawh a,i unaute pawh han hmu ve la. Lucy,Lylia te unau kha han ko te che" atih chuan nuih sang pahin ka nu chu Balgoni fate ko tur chuan a kal nghal a. An Maid ho pawh an let nghal sang sang bawk.





Uncle Luke chu ka ngaih ang ngawta sual em em a nilo phawt a,a fate ber hi ka hlauh chu anni. Misual leh mi hmuhsit ching tak,min diriam rengtu anlo ni ang tih ka hlau hle.




School a min tibuai thintu,Ryle leh Lia te ang kha anni ang tih ka hlau. Ni e,anni kha hmanni lawkah tv ah ka hmu a,chupawh,Car accident tenau vangin. Ta tang khan Ryle hming pawh ka hre ve chiah a,hming nalh tak a ni. A inhmeh hle bawk,mahse,a sual em a ni.




Khatia an accident mai mai news a an puang anih chuan mi challang tak fa anni ngei anga,an awmdan ah pawh a chiang reng,mahse,ka rin aia sang lehzual daih annih hmel.





Ka unau thar turte hmel hmuh hun nghakhlel leh huphurh ru taka ka lo din ngawih reng laiin Uncle Luke chuan
"Khi khi i unaute annih khi" tih paha a hawina lam chu ka en chhova,step tawpa lo ding mi pahnih te vang chuan ka tawlh hnung hrat a. Anni khi maw ka unau tharte chu,anni chu school a min chhaih nawmnah thin tu,ka chenpui hlauh berte kha annih khi.






Ryle zawk chuan rum fe in min melh a,Lia pawh chuti tho. Ngawi teh,nichin khan 'Lylia' antia,anih chuan Lia nilovin Lylia zawk maw. Chuan,News a an rawn puan khan engtin nge ka lo hriatloh theih,ka thin an tirim thin em a,khatia tawhsual an tawk kha ka lawm ru hle a,an hming tawp an puan pawh ka lo hrelo a ni.






"Aih,nu,ka haw leh duh,ka awm duhlo" tih paha ka nu ka ban chuan
"Enge maw i sawi le,ding tha rawh" tih pahin min lo kuai her a. Misual 2 dinna lam ka en chhoh chuan kuangkuah chungin min lo melh reng a,Ryle zawk phei kha chuan min huat hmel ngawih ngawih,a then sawk sawkin ka hria. Ni e,min hua tih chu ka hria. Mahse,tunah chuan min haw lehzual anga,min tiduhdah lehzual dawn bawk anih hi.





"Lylia,in unaunu hi a pindan turah hruai ula" Uncle Luke an atih chuan Lia chu nui sangin a rawn chhuk a. Midang hmuhloh tur chuan ka banah a rawn hmer vak a
"Kal rawh le,unaunu" tiin min nawr kal zui nghal. Chhan beisei takin ka nu lam ka hawilet a,kei a fanu chu min en lovin a pasal ngawt chu alo nuih a,ka tap lek lek tawh.





Step a kan lan theih chhung chu engmah a sawilo,ngawi rengin Ryle chu kan hnungah alo kal ve bawk. Ka pindan tur zawn kan thleng chiah tihah chuan min nem lut pawp pahin
"Ka lo lawm a che,unaunu,Steve i rawn umzui chu ni em lo maw?" mei nei deuhin min nuih ver ver a. Ryle ka en chuan a unaunu ai pawhin a thinrim emaw tih mai turin huat hmel tak chuan min melh rum reng ringawt.





"Engpawh chu nise,Steve hian hmeichhe naupang ang bakin a en lo che tih hre rawh" tih pahin ka awmah min nem sawk a. Ryle chu hnungzawngin ka su nghal pawp bawk. Min lo dawm ka beiseilova,min theh sawn pawh ka ring chiahlo bawk. Mahse






Min theh sawn deuh nawk pahin ka hmaah tak chuan a rawn ding a,a hmelah chuan a thinrim hle tih hai rual a nilo.
"Ka pa hmei fanu chu nanghi maw,inu ang chiah,mi tenawm pahnih" ten hmel tak chuan min tihkhum ve leh a. Chhan ka tumlai tak in
"Hremhmunah ka lo lawm a che" seh chilh deuh chuan ati leh a. An pahnih chuan an inzui chhuak nghal a,kawngka na fe a an khar rik thuai rualin phut zawk pah chuan khumah ka thu nghal hnawk a.




Anni unau nen khan engtin nge kan chenho theih ang??ka nu hian eng ang hremhmun ah nge min hruai luh leh tawh????



(A tawi nge a thui pawh ka hrelo. Regular in beisei ila,ka hman chang phei chuan Saturday zana rawn post te ka nei nawk maithei. Mahse,class kan tan tawh a,hmanloh chang chuan kar laklawh pawh nise,min lo hrethiam zel aniang chu.



Zan 1 na anih angin rawn comments suau² r'u aw,tiang hi ka la ziak ngailova,ka confi lo teh mai nia 🙂🙂)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)