Hello Ryan! Chapter-12 By Lalrinsangi Bee

Episode kal lai dah luhna

Moderator: writers

Lal Rinsangi Bee
Posts: 59
Joined: October 30th, 2020, 11:16 am

Hello Ryan! Chapter-12 By Lalrinsangi Bee

Unread post by Lal Rinsangi Bee » July 3rd, 2022, 11:20 pm

Hello Ryan!
Chapter-12
By: Lalrinsangi Bee






Ka bul a Muani thu nui thler duai duai chu tawp thutin "Lo inru tak tak ula,awii...mo thian a tan ka chak tawh lutuk" tih pahin a nui leh uar uar.

Zingkar atangin a rawn leng a,tukthuan a ei nghal a,tunah 2:30pm a ni tawh.

Saturday mahni se ka nawm sam loh em avangin inah ka awm a,ka nu in dawr a nghak thung.

Bawiha erawh Hmuifang tlangah an thian ho in trekking neiin weekend an hmang ho thung.

"Zobela hi pasal a tan min duhpui em?" A rawn ti teh thlawt.

"Duhpui loh thu awm hleinem,a neitunu tur berin i duh te chuan" ka lo ti mai a.

"Inneih a min sawm a ka hnial thin chhan ber chu Lalrosangi hi ania,kan inmil thei thlawt lo" a ti niah niah.

"Lalrosangi i nei dawn hleinem,chu chu thuhran,Zobela farnu diktak pawh a ni lo a,in cheng ho dawn chuang lo" ka lo ti ve bawk.

"A ni ve tho mai" tih pahin Ryana'n kan monthsarry a min pek teddy bear te reuh te chu a khalh niap niap a.

"A hrim hrimin Lalrosangi nen in insual hnu khan Zobela te inah i kal leh em?" Ka tih chuan khi sûng a rawn hawi chhuakin "Chaw vawihnih ka ei leh tawh" a ti ham ham.

Bela chhungte hian an ngaina a,an chhung te ve ve inkawmngeih sa an lo ni bawk nen,in nel tak an ni.

"E...tak a!Dampuii kha engtin nge a awm tak zel?" A rawn tih chuan keipawn ka hre chhuak thut.

"Hmanni-ah Ryan ka zawt a,a sawi tha duh lo lutuk a,ICU-ah a la lut zeuh zeuh a ni awm e,a khawngaihthlak reuh tak tak a ni" ka ve niah niah.

"Dikchiah,Ryan hian engtin nge a ni ang nula chhelo leh hmeltha,smart em em mai hnawl a nang a thlan theih che le?" Tih pahin ner nûngin min en a.

Muani bulah hian Dampuii leh Ryana te naute te leh an chhungte rem tih loh thu vel kha engmah ka sawi lo.

Sawi loh kha ka thlang zawk.
Mi nunhlui kan sawi lo chu ka ti lo,mahse a vai vai a phawrh chhuah sak hi tul ka ti lem lo.

"Khuanu ruat hi chu kan heti mai" tih pahin mit ka kan ak ak a.

"Ryana nupui i nih chuan sum chhiar bak tih tur i nei dawn miah lo ania" a tih chuan ka nui hak.

"Thawh chhuah pawh ala neih loh sawww" uar zetin ka ti a.

"Thawh chhuah neih neih a ngai lo an hausak tho saw" ala ti duh chauh lehnghal.

"Umama lah saw ka u nula senior lek lek tawh ti a kan chhaih fo nula phun chiar Lawmpuii a rawn rim zantin a,tun atang hian Umama hi a thaibawih tawh ni mai hian ka hria" tiin ala nui ker ker zui.

"I û hi sawi chhe ve ziah suh,nang aiin a zaidam" ka sawi zawh hma hma in "kei aiin a phun chiar" a rawn ti vat.

"Chu pawh ni se nang aiin a fel" ka la ti hram.

"A fel zawk chu kan hriat mai alawm" tih pahin lei a rawn la chhuah zeuh.

Hahthlak ti zetin ka nui ringawt.






>>>>>>>>>>>>Ryan's POV<<<<<<<<<<<<





Ka khumah chuan that chhe zet hian ka thu mu a,ka ban lukham a mu in Rae chuan a tablet a en a,a rawn nui chhuak leh hawk thin chu atthlak ti zet hian ka en reng a.

"Miss Hope-i hian engtin nge a duh theih che le?" Rawn ti thutin a thu chhuak hlawl.

"Chutiang sawi rual i ni lo" ka lo tihsan hmak thung.

Naupang te te si,lerh an zir tan riau mai.

Keini college kan kal laiin pakhat kan nei ve hman hram a,chumi tih lohah chuan Ngurthanpuii a ni leh mai a.

An ni ang rual kan nih hian star pawh ka nei ngai lo,ka star ve hmasak ber chu Angelina Jolie ania,chumi tih lohah chuan Ngurthanpuii bak ka la star lo.

Naupangin 'Duh leh Hmangaih' chungchang min sawipui an tum hi chuan ben pawp ania ka duh ni.

Raelynn pawh hian crush a neih bakah a rukin ngaihzawng a nei tih ka hre ru vek.
Kan hriat a hlauh em avangin ka hre lo der mai zawk a ni.

Ngurthanpuii zep zuap lah hian a lo thup pui leh nghal a.
Hremna ka la pe dawn khawp.

"I ninawm Au Mama a fel feeee zawk nang ai chuan sual thiam thei lutuk mai" tih pahin tûm bûrin ka room chu a chhuah san a,ka lo nui suk ringawt.

Engmah ti lo leh tuma chim buai loh a ka awm lai tak hian alawm Hope Ngurthanpuii zûnin min phuar zual thin.

Hmeichhia ang mai hian,ka ngai huam huam reng a,a lakah hian ka inti pa thei der lo.

Hmeichhe fel tak leh smart tak chu ni lo se,a thu thu in min tir kual zaih zaih tawh ang chu.
Ka duhna leh ka hmangaihna hian min ti aa zo tawh.

Inneih pui a ka sawm apiang lah hian min hnial kalh teh fo lehnghal.

A zing tho hmel atang a,a zan mu lai hmel thleng hian en reng turin awm se,man chawi pawn ka en reng peih ang.

Ka chhungte lahin inneih an sawi an sawi tawh a.
Ka dam loh laia a rawn riak,inru emaw min tih atang phei kha chuan a tur hian min tur a ni ber.

A neitupa ber tur pawn ka nghah hram hram lai hian an ngawi hle hle thei tlat lo hian ka thinram a ko chhuak lek lek thin.

Hope-i chhungte,Falkawn lam a mi te pawn min rawn be fo a,min chhaih zuk zuk fo,min ngaina der nge min ngaina tak tak tih hre lem lo mahila leng tur a min sawm te hian ka lawm ve thin.

Keipawn a chhungte kha ka ngaina,ka vawikhat hmuhna atangin an chhungkaw mi ni a in ngai nghal thei tur khawpin an chhungkua khan mi tih tlangnel dan an thiam phian.

Mahse,a nu in 'Fakte' min tih chang hi chuan lungawi fahran lo hian ka 'eih' ve zel mai bawk a.

Ka chhungte hovin 'Afak' min tih chuan ka hming pangngai tur rengah ka ngai a,Thanpuii'n "Afak" min tih ve thung hi chuan ka thinlung hi a nghawr dat hian ka hre thin.

A aw nen khan inhmeh ka tiin khatiang hlir khan min ko pawh nise ka haw lo chiang kher ang chu.

Ka phone rawn vibrate dar dar chu ka la kang vat a.
Nui sukin "Hello Hopie" ka lo ti vat.

"Ti nge min lo call leh miah loh a?" A rawn ti niah niah.
A hmel tur ka mitthla a,tûm bûrin a hmui chu a'n ti pawrh leh tarh ang a.
Ka ngaihtuahna avang a nuiin ka hmui chu ka liak zeuh a.

"Zobela nupui hual kha alo leng sia in inkawm duh takin ka ti maw le" ka ti tha ve mai.

"Zingah ka muhil min rawn kai tho a,3:45pm khan a haw chiah a" a tih chuan ka nui hak.

"A hman ve hle mai maw" ka lo ti sup.

"Aw...a tha ve lawm,ka lungleng te min hnem ve a" a tih chuan "Tu nge i ngaih a?" Ka ti ram hmak.

"Nangmah a ni mai alawm" a ti ve hluk.Cute reuh lutuk a.

"Min ngaih te chuan rawn sawi mai la,keipawn ngai em em che in ka room-ah mu chungin ka lo ngaihtuah che a" ka tih chuan "Over ziah suh aw Vanlalfak" tih pahin a nui hak hak.

"Nguri" ka tih chuan a reh hmak.Nguri tih hi duh lo viau mahse a inhmeh ru riau alawm.

"F*uck-aaa" a rawn tih chuan ka nui lo chiang kher mai.

"Ka hming i pawngsual ngam elaw Ngurthangvel" ka ti leh.

"I ninawm min chhaih hmasa,ka ning tlat ka dah ania" tih pahin call a cut daih.

Ka nui zui suk suk a.
Call a la duh dawn chuang lo tih ka hriat avangin ka call nawn duh ta lo.

Zanin chu titau thlem tur a va len a ngai dawn anih hi.
"Rocky lo kal teh" tiin ka ui pa duat,Delhi lam a kan enkawl reng thin,nimin a Aizawl rawn thleng ve chiah chu ka au a.

Thanpuii phei chuan ui kan nei tih ala hre lo hrim hrim.
Zanin ka len hunah titau thlem nan hruai ve ila a tha ang.

"Rocky,zanin chu i nu tur va rim ang aw" tih pah a nui vur vurin ka chûl hliau hliau a.

"Ryan,Ryan Vanlalfak" ka nu thawm ring thin lutuk hi chu ka hne takzet.

"Eng nge ni ta Nu Mahruai?" Ka tih chuan thinrim teu hlarin ka room chhungah chuan a rawn lut a.

"I nu ka nih hi ka hmingin mi ko reng reng suh" ala ti tan tan.
Ka nu thinchhiat leh thawm rin zia ngaihtuah hi chuan,a fa te hi kan la dam em em zawk hian ka hre thin.
Ka pa kan chhun zawk vang nge ni.

"Awww sawi rawh eng nge?" Ka lo ti hluk.

"I room-ah hian tawm reng suh,hnathawh tur te zawng ve rawh,khu inhnuaiah,dawrah te pawh an buai em em a,zuk pui ve laa" tih pahin ka thawmhnaw leh eng eng emaw hnawk niaih chu a thian fai mawlh mawlh.

"Ka dam loh hi" ka ti bung nghut.

"I dam mah mah aniang chu zantin Hope-i te in a leng tur pawn kan phal lo chung chungten i chhuak fo alawm" ala ti hmak.

"Hmangaihna hian dam loh a sawi lo" ka tih chuan a thinrim ka rin nen min rawn en miah lovin "Hmangaihna hi tawngthei se chuan a sawi ka ring" a ti duh lek chauh.

Kan unau hi chu inhnial kawngah hi chuan kan ngaihtuahawm loh,chhun tur 'Nu' kan nei tha em a ni.

"Hawh teh Rocky,Family Rap Legend sawi ang khan dawr lamah i zuk buai ve teh ang" ti hluaiin ka tho nawlh a.

Room atang a chhuakin inhnuai lam ka pan thla a.
Dawrah Thanpuii a thu lo tih hre reng chungin an dawr lam chu ka va thlek vang vang tho.

"Bawiha,kha laia cartoon bawm kha rawn chawi phei rawh" ka û in a tih chuan ka chawi phei ve mai bawk a.

Ka û hian eng hnaah khan nge a in ziak lut ve a,result a nghak mek niin ka hria.
A hna dil ber a pawh ka hre bau lo.
Kei ang lo takin a taima a,kei aiin lehkha thiam thei lo zawk mahni se a zir peih a,a school kal ve laite pawn top3-ah a lang ve zak zak thin.
Kei erawh result an puan ni chuan pass tawk tawk thin e ti lo chuan lawmman dawng tur a ka û hming an rawn lamin uar fahran a kut lo bengin ka lo au thin.

Kan tet lai atang tawhin damdawi in luh ngai khawp khawp a ka damloh ka la hre lo na a ka û erawh kumtin hian damdawi in hi a lut chhuak reng ni ber hian ka hria.

"Brand thar kan chah ho kha eng tikah nge alo thlen dawn?Chuan hman ni khan LED Watch leh Fogg product ho kha in chah tel bawk a ni lawm ni?" Ka û chu a tawng lang lang reng a.

Kei erawh kil khat a sofa-ah chuan thu in Rocky chu ka chul leh hliau hliau thung.

Tih tur hi an sawi loh chuan mahni tawp a va tih tur hi ka hre ve lo thin.
Ka thatchhiat vang an ti fo a,ka taima chu ka ti hauh lo,mahse tih tur hi ka hre hlawl lo.

An rawn sawi hian tih tur a ni tih ka hre ve leh chiah thin.

Ka nu min hauh tamna ber a ni bawk.
"Sawi ngai lo hian ti ve thin ta che de de dei dei" hi a ti ziah.



Ni lengin dawrah chuan ka awm tluan ve zak a.
Kan bungraw chah thenkhat chawhnu lamah a lo thleng bawk nen buai ve tak ka ni.

Kan intih fel zawh veleh ka û bulah "Dawr lo khar mai rawh" tiin ka haw chhoh san a.

Zan a ka lenna tur rilru a dah ranin ka inbual a,zanriah ka kil pawh chu ka hmanhmawh ru kher mai.

Chhan dang a awm lo,kha Hope Ngurthanpuii kha ka ngai tawh em a ni.
Ka ngaih thu leh ka hmangaih thu hi a hne khawp hian hrilh ka duh zawk ania.

"Vanlalfak,hmanhmawh suh i helh ang e" ka nu in a chaw hmuam lai thial chap chapin min melh rawm rawm a.

"None of your business" ka lo ti khauh.

"Sap tawng ka hmang e,rawn ti reng reng suh,i sap tawng thiamna te kha hna zawn nan te hmang ta che,kha vang kha a nih kha Hope-i pawn a neih duh loh che" a tih chuan ka harh kawk.

Thanpuii'n min neih duh mai loh chhan chu ka hna neih loh vang hi a ni mai lo maw le?

Hmeichhia chuan pasal atan nupui fanau nuam sa tak a siam thei leh hna tha tak nei an duh tih ka hria.
Hei vang hi a ni ngei ang min neih duh loh ni.

"Nichinah hmanhmawh thei ang berin a hmawm pawp pawp a tunah lem a chawl leh ang ngur ngur a" Ka nu in a tih chuan Rae leh ka û an lo nui vur vur.

"I tawng thei si Nu Mahruai" tih pahin ka tho hmak.

"Kha tin mi ko fo suh aw Vanlalfak" a ti ram hmak.
"In mak thin bawrh bawrh em mai" ka pa in a rawn ti ve phawng.

Ka kut sil zovin ka room lam ka pan a,ka nu chu a a la phun zui mawlh mawlh tho.

A fapa rangkachak hauh phalloh a bulah chaw fakin a awm a,a fapa thirchhe tuiek a room lama a kal hnu pawhin a la hau reng tho chu anih hi.

Ka inthlak sawk sawk a.
Perfume rim tui te chu ka'n inkah ve chhiai chhiai kha.

Room atang a chhuakin tv bul a car chahbi chu ka la a.

"Ka pa Ro,ka nu Mahruai ka va leng lawk ang e" tih pahin ka chhuak daih.

Mahruaitei chu a thinrim mai mai ang chu aw...

Varandah a Rocky lo bawk chu ko in car-ah ka luh tir a,ka tawnmang lasi te rûn lam chu kan pan ta nghal a.

An in kawngkhar bulah chuan kawngkhar an rawn hawn hun nghakin Rocky nen chuan kan ding rûn a.

Ngurthanpuii ngei chuan a rawn hawng a.
Tûm bûrin min melh rawm rawm a.

Rocky a zuk hmu chiah a min rawn kuah nghal vat a keiin ka lo pawm chat.

"Khuuuu,tu ui nge?Ka hlau ania a lian si" a ti nghal zung zung.

"Ka rawn hruai anih hiiii...Rocky,hei i nu anih hi chibai buk ta che" ka tih chuan "Heyyy...ka hlau aniaaaa" ala ti.

Ui a ngainat ka rin nen awww....

"A hlauhawm lohhh...engtin mah a ti lo ang che a fel lutuk" ka ti chung pawn a chhuk duh tlat lo.

"Chu pawh ni se" ti a sawi zawm a tum lai tak chuan ka zuk fawp thut a.

Ngawi hmakin min fawp let mawlh mawlh.

Kan inthen hrang chiah a "Ui ka hlau a" a ti sep.

"A hlauhawm loh,chhuk rawh le,i nu in hetia min hmuh chuan a tha lo ang" ka tih chuan a chhuk ve mai bawk a.

Mahse ka banah a la vuan tai reng thung.
"Rocky,i nu anih hi chibai buk rawh" ka tih chuan Rocky chuan hrethiam ni awm fahran hian a rawn pan hnai a,Thanpuii erawh in min vuan nghet telh telh thung.

A ke chungah chuan a va bawk a.
Thanpuii erawh a thla la muan hmel viau lo mahse a thaw huai mai.

"Lut ila" ka tih chuan "Kal sawn tir la" a lo ti vat.

Nui sukin "Rocky lut rawh le" ka tih veleh Rocky chu in chhung lamah a lut nghal a.

Keini pawn kan zui nghal bawk.
"Lungphu chawlin ka thi thelh a lawm" tih paha a awm a dawm chu a cute ka ti takzet.

A nu in min la hmu thei lo ni se la chuan ka fawp chiang ang chu.

"Fakte,hei in ui em ni?" Thanpuii nu in a tih chuan kan ta anih thu in ka lo chhang vat a.

Thanpuii ang lo takin a hlau lo a ni ngei ang a chûl hliau hliau a,Thanpuii erawh in rap hmel zetin alo en kur.

Rei lo te hnuah a nu chuan min mut san vat a.

Thanpuii erawh a thla a muang thei hlawllo.

A thinrimna a reha a tha phian,titau thlem tur an awm ta lo.

"Vawiinah Lalthlamuani nen min lo rel em ni?" Ka tih chuan min rawn en vat a.

"Teuh lo mai" a ti ban charh.
"Ka hahchhiau nasat dan atang khan min rel tih ka hre vek ania" ka tih chuan min rawn melh zawk a.

"Hmpp" a ti ringawt.
Engtin emaw tak chuan min sawi a ni ngei ang a confi lo em mai.

Engpawh chu ni se a tha lam a min sawi ngei ka beisei.

"Ngati nge min neih duh loh?" Ka tih chuan min rawn melh leh kawkin "Ka nei duh lo che em ni?" A ti hluk a.

"Hna mumal ka neih loh vang hi ti raw?" Ka tih chuan a nui hak.

"Hna mumal nei leh nei lo a ni ber lo,hna mumal nei lo pawh ni la,i rilru a puitlin phawt chuan ka nei ang che.
Aaa...chu loah pasal neih thut ka duh lo ka la naupang" a ti deuh duah.

"Ka chhungten an nei chak tawh che" tih pahin ka va kuah a.

"Kei chuan ka nei duh che" alo ti thung.
Nui ver verin a hmuiah ka va fawp vang vang a.

Amah zawk chu inla hrang vatin "I fapa min melh dan saw ka duh lo" a ti hmuk.

"Kan fapa anih saw" ka tih chuan a ner nang a.

"Ui ka ni lo" a ti leh hmuk.

"Anih leh fa tak tak siam i duh em ni?" Ka tih chuan min rawn melh kawk.

"Over suh aw...Vanlalfakkkk" a ti deuh hluai.

Ka phone a rawn vibrate dat dat avang chuan ka jacket ip te chu ka dap rak rak a.

Caller Id ka en chuan ka nu a lo ni.

"Hello nu Mahruai" ka ti uang chu Thanpuii nuih alo za nasa mai.

"Vanlalfak,uang fo teh suh Dampuii a boral ania" a tih chuan ka phu deuh zuk.

Thanpuii pawn a hre pha a ni ngei ang phawk hra in a rawn hawi a.

Ka ngawih reng avang chuan "Va kal ve ang che,mahse hre rawh,engtin pawn lo ti che sela ngawi mai mai ang che,rawn haw thuai la,insiam la,va kal ve nghal rawh" tiin call a cut hmak.

Thanpuii nen chuan kan in en reng a.
Ka kal ang nge Thanpuii kiangah ka awm dawn?

Ka rilru ka siamfel thiam mai lo.






#End_Of_Chapter_12






Min Lo Chhiar Sak Ve Avangin Ka Lawm E🤍✨


Kha kha kha Ads A Click Theihnghilh leh ringawt tawhhhh💋


Ka regu thei lo chung chung pawh a min lo chhiar sak reng thin avangin ka lawm.

Chapter-15 velah tih tawp ka tum deuh a.
A tawp thleng a min chhiar sak ka beisei.

In comment leh like ka hmuh zozai te hi ka phu lo ka ti takzet.

Weekend nuam tak in hman ka beisei a,tun karthar lo awm tur hi in tan malsawmna a nih theih nan leh nuam tak a hun hmang turin ka duhsakna sang ber ka hlan che u❤️

Next Weekend-ah in hmuh leh ngei kan tum dawn nia aw💖


A then tan Muttui💤
A then tan Ni Hman Nuam vek ule🌅



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)