ADDICTED_TO_YOU S2 Chapter : 19 By : Msi (Hmeichhe naupang tereuhte)

Episode kal lai dah luhna

Moderator: writers

Msi Miluhlulnui
Posts: 274
Joined: October 18th, 2019, 7:46 pm

ADDICTED_TO_YOU S2 Chapter : 19 By : Msi (Hmeichhe naupang tereuhte)

Unread post by Msi Miluhlulnui » July 3rd, 2022, 11:27 pm

ADDICTED TO YOU S2 CHAPTER - 19

BY : Msi, Hmeichhe naupang tereuhte



☆ Ka sawi leh țhin ang, an dinhmun hi a țha thut thei dawn lo tih hre kar ru, Mason nen pawh in ngaizawng mahse an dinhmun a țha ngawt thei dawn chuang lo. An nun hi a tir ațang ngaihtuah rawh u, a la tuar chhuak anga ala hlim em em ang, hlimna zawng zawng kan la neih tir vek ang. ☆



"Engthil nge thleng...?" Amber-i'n a bul a thlen rual chuan a lo ti nawn leh a mahse chu pawh keimah min en reng chungin. Amber-i'n a ban a vawn takah chuan a en ve ta chauh a.



"Englo Mason...," a aw te chu a khur a, a hlauthawng ve tak tak nge ka hrelo, mittui luang zung zung in Mason-a chu a en chho va. Ngawi reng a ding in ka lo en ve ran a a țhiante pawh kha an ni tho.



Kei erawh ka kut ka hmaah suih kawp in nghet zet zet hian ka hmer dun a ka hlauthawng nasa lutuk chu ka thlan fim te hi a rawn bawl chhuak țiam țiam hial in ka hre bawk.



"Sawi ta che," a ti bung leh nghut a, a ban a a vawnna ni ngei tur chu a melh deuh ngur bawk.



"Amber, kal phawt ang u zan lamah i sawi zawk dawn nia," tiin a țhiante chu an rawn țawng chhuak a mitmeng nelawm loh lutuk chuan Mason-a chuan a țhiante pahnih dinna lam chu a rawn melh a.



"Thil thleng sawi tur a awm a nih chuan hetah hian sawi rawh u," min rawn en ve ruala a mitmeng ka hmuh chuan mitmeng ți dai hian ka en let ve rân a, thil thleng a hriat hnuah chuan sawng aia mitmeng nelawm loh sawn min en ang a.



Ka tih pawh a ni lo ti mah ila ka awm laia bo a nih miau avangin a ni pawn ka lak a nih a ring ang a, eng ang pawn in sawifiah mah ila min rin loh miau chuan min huatna mitmeng nen a ni min melh dawn mi.



"Sawi rawh Amber," a ti leh nghut.



"Englo.... ka birthday a min pek...englo, kha zung....," a insût zui hraih chu, "sawi vat ta che," dawhthei lo zet hian alo ti chhum hmuk a Amber-i pawh a phu zawk nghe nghe.



"Ka birthday a min pek zungbun kha hetah hian ka dah a chuan kan chhuah zawk hlan in alo bo aniang ka hmu tawh lo, ka zawng vak vak a sofa te pawh hi ka hai let rem rum a mahse ka hmu chuang lo," insût feih feih chung hian a sawi a a sawi zo Mason-a mitmeng chu en hreawm ka ti.



Amber-i kut veilam chu la lawk in a kutzungțang chu a en a, "iva fimkhur lo ve," a ti chhuak hluk.



"Aih, chutiang lam pawh a ni lo ka bun na lai kha a thak a chuan ka phelh a ka bun theihnghilh aniang ka hriatchhuah veleh ka rawn kal nghal a mahse alo awm tawh lo ka zawng nasa tawh lutuk," a ti deuh țiau a, Mason-a rawn hawi chhuak chu ka lo en ve rân a a mitmeng ațang chuan a lungawi hlawllo tih ka hre thei.



"Mira... tunge lut leh chhuak awm a chung mite chu helaiah hian an kal em...?" Chiang lutuk a min en in chu zawhna chu min zawt a nghet lutuk a Amber-i kut a hmer chu ka melh zui zawk bawk.



"An lo luh hnu kha chuan tumah an lo lut lo a mahse....," ka tih lai mek chuan.



"Amah hian helai vela a kal thu hi a sawi, zawt rawh amah hian ala aniang," Amber-i chuan alo ti thawt thawt a a kawh pawh min rawn kâwk deuh vâ bawk.



"Mahse ka la hleinem," ka lo ti thuai a, Mason-a ka en chu min ring nge ring lo pawh ka hre thei lo, mitmeng danglam hauh lo chuan min en ngur ringawt a ka thin a phu dut dut a an vai chuan keimah ngawt min en a ka lak an ring vek a nih ka ring.



"Amber, amah hi a ni kher nang i dahna i hrelo aniang ka tih chu," a țhiannu chuan alo ti leh a.



"Ka hrechiang alawm mawle ka bun na a thak avangin hetah hian ka phelh a a bak ka hre tawh lo, midang an luh loh a amah bak a kal lo a nih phei chuan amah lo chu rin tur ka hrelo," a rawn ti leh bawrh bawrh, ka âng hiau a engtin nge thuchiang hre lutuk ang mai a a țawng zawt zawt theih zawk..?



"I hrechiang em...?" Mason-a chuan a ti nghut a, 'aw,' tih nan a lu chu uar zet zet hian a bu a min huat hmel lutuk min rawn en in Mason-a chu a kuah chial a pakhat lah in engah mah a ngaih hmel si loh.



"Ka kal ngei alawm mahse ka la lo hrim hrim, ka ti tak tak sofa lam pawh ka en lo hrim hrim dawhkan hnuaiah hian thil ka zawng alawm," ka ti leh zung zung a, ka lak a nih loh ang bawk in ka țang ve tlat dawn a ni tawp.



"Engthil nge i zawn...?" Mason-a chuan alo ti bul sup a.



"Seal kha ka zawng a mahse ka hmu lo, a bak ka khawih lo hrim hrim," ka ti leh zung zung, a thaw hawk ringawt a min rin loh hmel lutuk hmel in a chhunglam a nâ min siam chu ka duh lo kher mai.



"A te tham a insawi fihlim chu âwl ang chu, i awt a nih te chuan.....," Amber-i'n a tih lai mek chuan.



"A thil sawi chu i la em...?" Mitmeng danglam hauh lo a min en ngur chung chuan Mason-a chuan a rawn ti a, chhunglamah hian ka țim ur ur mai.



"La lo," ka lo ti zawi sap a, ka ring dik in ka hria min rin loh kha ka ring a, ni e.. a bialnu sawi ai chuan ka sawi zawk chu a ring kher lovang. Mahse, thudik zawn chhuah tum lova min puh tlang dawn a nih chuan keimah ațang chuan huatna chauh a dawng tawh ang.



"Ka rin che i ring em...?" A ti leh nghut a, ka lu ka thing nghat thung, beisei lo law law ila ka na tam lo zawk ang keimah pawh.



"Lo va chhuak rawh u," Amber-i kut a vawn na thlah pah chuan a ti sup a, min la en reng chutah pawh.



"Maw... Mason, i zawt hmasa dawn lo ami a lak ka ring kei chuan ka thil bo hi thil ho mai mai ah i ngai ami...? Nangma min pek a nih kha ka ngaihlu asin," a ti deuh țhat, thaw chhuak hulh in Amber-i lam chu a hawi a.



"Keiman ka buaipui mai ang lo va chhuak rawh, ka hnathawhna a nih hi," a ti leh nghut a.



"Mason," a ti hap.



"Lo va chhuak rawh," vin hauh lo chuan a ti leh a, Amber-i chu a thaw hak a, a ban phar in na zet hian a thaw zui leh hak.



"Min ring miah lova ni,"



"Ka rin loh thu che ka sawi lo Amber, lo va chhuak rawh ka ti mai chauh che a ni," nin hmel zet hian a ti let leh a.



"I awmdan hi a mak sak takzet a ni Mason, a hma kha i ang tawh lo kei chuan a hmaa Mason-a kha ka duh leh, min Hmangaih a min ngaihsak a min duat em em țhin tu kha," ti deuh tawn tawn in kawngkhar lam a pan tau nghawng nghawng a, a țhiante chuan an zui chhuak nghal vat a na zeta kawngka in khar țhuai ri ah chuan ka phu deuh zawk bawk.



"Ka la miah lo ka ti tak tak, a sawi ang rangkachak zungbun pawh chu ka hmu lo hrim hrim, dawt a in puh ka duh lo," ka lam a rawn hawi rual chuan ka lo ti leh zung zung a.



"Ka rin che i ring miah lo tak tak em ni...?" Tih zawng a sawi leh ringawt, kan pahnih chiah kan awm tawh a dawt a inpuh ai chuan ka dikna a nih ang in ka țang tluan parh dawn.



"Ring lo, i mitmeng ațang khan a hriat mai mahse ka la lo tak tak alawm awt turin hmuh pawh ka hmu lo," ka in sawi kuak loh hmel lutuk leh min ring lo tak tur bula ka in sawifiah reng pawh chu hreawm ka ti zawk lek lek a ni.



"Ka hria e, duhtawk rawh," a ti nghut a, ka lam pan chuan a rawn pen phei a mahse tawlhsawn ka tum lo ka dinna ngai a ding in ka lo en ve rân a.



"Ka la lo tak tak alawm," ka lo ti leh halh.



"Ka ring che lawm," dah vah hian ka en chho a, mit ka khap zui fak fak.



"Maw...?" Ka ti deuh hû a.



"Ka ring che, i hria tiraw..? Ka ring che, chuvang chuan i lak loh thu sawi tawh suh," chiang lutuk a min en chung chuan a sawi a, "mahse," ka ti chu, rang zeta min rawn hnaih chilh in ka kut ah chuan a rawn vuan a, nghet zeta hûm in a hmer zui vang vang.



"A tawk e, a tawk e. Sawi a ngai tawh lo a tir ațang khan ka ring che i mitmeng ațang khan ka hre thei alawm sawi a ngai tawh lo," a rawn ti dam thlup a, ka thaw huai a keimah chu ka veng deuh hawk tak tak.



"Mahse i bialnu khan ka lak a ring miau sia," ti halh in ka kut chu a la sawn a a ni pawh chuan a kekawr ipte ah chuan a zen lut ve leh vat tho.



"Thudik a hria lawm, a theihnghilh leh mai ang," a ti liam puat a, ka âwih thei lo. Min ring in ka lak a ring lo tak tak a, ka lawm takzet. A awmdan leh mitmeng ațang kha chuan min rin loh kha ka ring lutuk a.



Ka lawm lutuk chu nui ver ver hian amah chu ka en chho leh țhin, a bialnu a țan zawk ka ring kha ania mahse țan hauh lovin ka lak loh a ni pawn a ring ania chu bak bak chu a awm theilo.



"Marker a sen leh a dum va la la, note bu leh pen nen, min rawn zui ang che," ti a a kalsawn rual chuan kei a pawh chu hmanhmawh zet hian ka kalsawn ve nghal a, a sawi ang zawng zawng chu la khawm zung zung in a chhuak tur ka hmuh rual chuan rang zet hian ka zui phei ve nghal a.



Ka chhuak chiah in a ka hriat Ruatsangi bula a thu lo sawi avang chuan hnunglam ațang chuan mak ti zet hian ka en a.



"Maw...?" Ruatsangi pawh chuan a ti ve hial mai.



"Ka sawi ang chuan ilo ti dawn nia, kal ang Mira," a rawn tih chuan bu nghat in a kal chu ka zui phei ve nghal a. Ruatsangi kha a office hnawk thian fai tur leh CCTV room a kal a Amber-i te awm dar zat ang chen kha a footage la chhuak turin a hrilh bawk kha ania.



A room hi chu tifai tur bik an awm țhin mahse Ruatsangi a tihtir kher chhan erawh hi chu ka hrethiam lo kher mai.



"Khawnge kan kal dawn...?" Hotel piah daih kan thlen tawh avang chuan inthlahrung zet hian ka zawt a.



"Min lo zui tawp la, i kal a ni mai," tiin min la rawn chhang zui.



Step hlui ve tawh tak lo awm ah chuan kan chho a, helaiah hi chuan kan kal fo va a hmun hi a âwih nang in a nuam reuh phian a thingsehmim awm hun lai phei chuan a tla tam thei sia helai hmun ah hian a tla chhar turin kan va kal ngat zel.



Kan chho zela, kan kal chang a chhinchhiahna kan siam thing kan ker vel lo la awm ka hmuh chuan ka nui sak a, hnah thel ro a tam in kan rap ri hruap hruap a, ka pheikhawk mawng phah a nâl nen, a âwih deuh bawk nen tawlh leh zuk a awl duh ngei mai.



"I va kal thei ve," thaw chhuak hawk hawk in ka ti hliai a.



"Kawng ka siam alawm, ka rahna lai apiang kha lo rap zel rawh," a kal thui tawh bik lutuk chu ka hmai ni sa in a rawn ên bawk nen ka kut a hliah pah chuan ka en chho a.



"Enge kan tih dawn...? Chawl lawk ila," ka ti halh a, sawtah hnathawh tur a tam nen hnathawh tur kalsan a helai hmun daih daih a kan kalna chhan hi ka hre lo kher mai, a sawi duh bawk si lo.



Ka dinna lamah chuan rawn chhuk in a kut chu a rawn pharh thla a, "min lo vuan rawh kan thleng țep," tiin min en rûn a, a bek ah a thlan a luang ngiai ngiai a a sam a tukhumah a țawn bet vek bawk nen a nghawngah chuan a thisen zam chu fiah zet hian a lang a hah avang chuan a hmui a liak huh zui hlap bawk.



"Lo vuan la," a rawn ti leh sup a, ner deuh nang chuan ka en chho a, thaw hawk a nui deuh suk in a kut lehlan chuan a khup a dawm a, "vatin," a tih leh takah chuan muangchangin a kut chu ka han ban a.



Ka kutphah ka nghat chiah chu nghet zeta lo hûm in ka lawn tur chu ka zak ah rawn dawm in min pawt chho a ka ding fel chiah chu a âwm leh ka lu a in si chât bawk nen ka thaw deuh halh a.



"I thlan nasa lutuk," tih pah chuan ka bek chu rawmawl hian a rawn hru a, "aih, i hru zo thei dawn chuang lo," tih pah chuan a kut chu ka pawh thlak sak a dak vah a ka en chu ka tlak hlau ni âwm fahran hian ka kawngah a rawn dawm deuh chat a.



"Nangpawh i thlan nasat êm kha," ka tih chuan a nui suk a, a hrawk bâwk chu che thla zui rulh in a bek chu a tuai zui zeuh a, "ka lang pâ zawk em...?" Mitmeng de sâwt sâwt chung a min en chung chuan a rawn ti sup a, a nui deuh suk mai bawk.



"Chutiang pawh a ni lo, inher rawh kal tawh ang," tiin a kut ka kawng a awm chu ka pawh thlak sak a a ni pawh chu ding țha ve maiin ka tui in a hal leh hal loh te chu min zawt a a hal loh thu leh kal vat vat tur chuan ka lo hrilh zawk thung.



A kawng a chhoh deuh avangin min kai chho zela, mahse reilote ah hmun zâwl nuam deuh hi kan thleng hlawl a ni sa pawh ngaihsak lo chuan thlifim rawn thaw zui heuh heuh in hah avanga thaw deuh hak hak chung chuan ka maimichhing vang vang a, hetianga awm hian hringnun hi ava han hahdamthlak bik tak êm..!!



Vawi leh khatah ka awmna chu a rawn hlim deuh dûk a ka meng chhuak chu Mason-a chuan min lo en deuh ngur a ka phu țhelh nghe nghe.



"A sa lutuk, kan tihtur ti zung zung ila kan kal leh zawk dawn nia," hawisawn deuh vut in a ti sup a.



"Enge kan tih dawn...?" Ka ti deuh hâ, ka hawikual a han tihtur âwm ang ka hmu silo thing lian tak tak leh hnah ro leh ram pangpar te a ni ka hmuh ni.



"Thingkung bul ah flag a sen leh a dum ka phun zel a, chu ka thil phun na bul thing ah chuan flag rawng ang zel marker ka ken tir che khan 'X' lian zet zet in pathum i siam dawn nia," a ti a, ka hrethiam lo leh zual.



"Ngatinge chutianga tih kher a ngaih a..?? Ngatan nge..??" Ka tih chuan min rawn en in a nui suk a, "a hun alo thlen hunah i hre mai ang, kawng a insiam chawp vek a khawiah mah peng hrang suh ang che," thupe zet hian a ti a.



"I hlau ang em..?" A tih zawm zat avang chuan ka nui deuh hak a, a hrethiam lo hmel chuan ka nuih a ti za deuh deuh. Ramhnuai te chu kan kal țhan na ania ka ngam ve lawm le.



"Hlau love, heng lai velah hian thingsehmim tam lai chuan kan kal ziah alawm, mahse helai hmun hi ka hre ngailo reng reng ka vawikhat hmuhna," ka tih chuan in tih theih hmel fê hian min en a a nui deuh vur vur bawk.



"Ka hmuh chhuah liau liau a nih hi, le.. kal rawh le kawng tawp alo awm anga mahse peng awm chho ah khan kal suh aw, i rei chuan ka rawn um zui dawn che nia," tiin min nawr kal a kalna tur leh tihdan tur vel chu min hrilh a ama kalna tur leh a hlauh chuan amah au vak tur chuan min hrilh thlap bawk.



Heiha, min hrilh duh lo na nâ nâ chu zawh buaiin awmzia nei tawh lo a sawi ang ang in ti ila buaina awm lo ni mai.



Mahse hetiang vela amah nen chiah a hun hman erawh a nuam dangdai viau mai.



Ka kal zel a flag awmna apiangah chuan ka thai zela a sawi ang tak tak chuan kawng tawp alo awm a mahse a hmun a nawm êm avang chuan ka thlir kual vel a hetiang ang em em a ramhnuai dai raih leh thlifim tam naah hian ka la kal ngailo.



Flag inphun ka lakkhawm pakhat chu la kang in a hmawr zum chuan khawhma kung ah chuan eng emaw ka ziak a, khawmhma kung a thil eng emaw ziah hi kan chin avang hian kan tet deuh lai phei kha chuan kan feh haw hian pa te kan sah tir a hawl haw pah in eng emaw kan ziak neuh neuh a star te in bulah kan tung thlap țhin.



"Mira," rang zet hian ka hawi let a, Mason-a hahdam huai hmel ka hmu nghal zat.



"Ummm, i zo tawh mi...?" Ka lo ti var a, a ni erawh kawng dawm in a thaw hawk hawk mai.



"I rei sia i bo amaw tiin ka rawn zawng che alawm. Tinge..? I zawh veleh a rawn let lehnghal turin ka hrilh che kha," a ti deuh hluk. Min ngaihtuah ve takzet a nih dawn hi.



"A nuam êm a ka la rawn let lo mai mai, hei khawmhma kung ah hian thil lo ziak ve rawh a nuam lutuk," tiin ka kut lehlam chuan ka hui lauh lauh a.



"Ka ngaihtuah zia che hi i hria em...?" A ti leh hluk, "ka țhat vek hi, lo ziak ve rawh hmanhmawh la thosi tam si," ka tih chuan a rawn kal aniang hnah ro chu a ri deuh rak rak a.



"A ho em mai, thosi a tam chuan let tawh ang natna hlauhawm deuh i kai ka duh miah lo ania. Thosi hi thlawk thei chi ah chuan hlauhawm pawl tak a ni," a rawn ti teh daih, ka thil ziah lai chawl meuh in amah chu ka en a.



"I hlau ami...?" Kan ti chu a duh lo viau nge ni a ner nasa ngang mai.



"Hlau aw zawng lo..!! Natna a thlen theih thu ka sawi mai alawm kal tawh ang," a ti vîn deuh hluk a, ka nuih var var a Fibby-i'n ' i hriatchian hunah chuan mawl iti ngawt ang' a tih kha ka hrechhuak uar uar mai.



"A ho lutuk, hei lo ziak ve phawt rawh. Lo kal la, lo ti ve rawh a nuam teh mai ania," tiin a kutah chuan pawt in flag hmawr zum chu ka ken tir a a kut chu hûm puiin khawmhma thing ah chuan ka ziah tir a ka hnungzâng si chêt chuan a rawn ding bawk.



"I duh ziak la," tiin ka kut ka la thla a, "kan pahnih in," tih pah chuan ka kut chu rawn la kang in min hum pui a chhunglamah ka nui var var mai.



Ka beng bula rawn thaw lum deuh ham ham in a kut a a thai rual chuan ka kut chuan a thai kual ve zela kan thil ziah pawh rilru ah awm theilo, min rin avang leh thil thleng avang te hian chhunglamah ka nui ver ver reng a.



Hetiang hi ka tawng leh ang em ka hrelo, ka tawng leh dawn lo a nih pawn chen ka duh ama hnen ațanga ka hmuh hi midang hnen ah ka hmuh ka in ring hauh lo.



"I thil ziah pawh hi ka hrethiam lo," dak deuh vah chuan ka en a nui suk in min rawn en a, "nakinah ila hrethiam mai ang," tiin a mit in a melhna chu a sawn thla zela ka hmuiah chuan a tawp chawt.



Mahse rei a ni lo, in thing harh vat in a awm hrang deuh hlek a kei pawh ka ni tho, "fawh chak viau che mah ila i phalna thlap lo chuan ka fawp tawh lovang che," a rawn ti a, en pawh min en lo.



Ban tum a ka kut ka la kâng țawng ka tum chu a inher a, "kal ila, i nau te pawh an bang tawh ang. I haw tlai lutuk loh nan ka thlah nghal dawn che nia," tiin a kal zui daih a thaw hak in ka en reng ringawt.



Mi thar ang in ka awm tawh ang a tih kha a ti hlawhtling chiang a ni e, mahse ka tan a nuam lo lam lek lek zawk a ni.



In thleng min thlah a a motor ațanga ka chhuk amah a tlan chhuak chiah tih chuan office velah ka bag vel ka theihnghilh tih ka hre chhuak leh, ava han haihawt theih țhin tak..!! Ka phone pawh a awm daih lehnghal.



"Pawilo, tumah min call tur ka nei chuang lo bag ah pawh thil pawimawh awm hran chuang lo," tiin țhenawmte in lam ka pan a mahse Sawmtea ka hruai haw tur in ka hawng tur chu chahbi ka bag ah a awm tih ka hre leh hnuhnawh, ava han buaithlak țhin tak..!!



Țhenawmte inah lut vat in ka number ah chuan kan call a mahse ala la theilo lehnghal, Mason-a number ka hre bawk silo nen ava han buaithlak țhin tak.



Let leh mai ka tum lai chuan kan in kawtah chuan Hotel staff pakhat chu ka bag ngei khai chung chuan alo ding luau a, min hmuh rual chuan rawn kal vat in Boss in bag hi pe tura a hrilh thu leh let lehnghal a ngaih thu a sawi a lawmthu ka hrilh hma hma chuan a tlan let nghal vang vang.



"Ka la ve thei reng sin mawle," tih sap pah chuan bag chu zen in in chu ka hawng a Sawmtea pawh zuang lut vat in an sikul chanchin a sawi zui leh mawlh mawlh a.



An miss ten a fail chu tlai tin an stay back pui dawn tih a sawi chuan stay back lo tura nasa deuh a zir a ngaih thu ka lo hrilh vat a, zir vak vak tawh in tiam mahse kha tlaiah ball pet turin an rawn sawm leh a a kal leh hnu hnu tho kha maw.



Zanah chuan bed sheet ka thlak mawlh mawlh lai chuan kawngka an rawn kik a lo hawng mai tura ka hrilh rual chuan a reh vang vang a mahse mipa aw ngeiin a, "i u a awm em...?" A tih avang chuan ka tawp deuh chat mai.



"Ehe, au Vanlal. Ilo leng leh elaw...?" Sawmtea au ri hluai pawh chu ka hre zawm zat.



" I u a awm lo ami...?" Hmeichhe aw ka hre leh a mahse Fibby aw a ni thung.



Hmanhmawh lutuk ka siam rem zui mawlh mawlh a Kimkima'n ka awm thu a hrilh ruala room ațanga ka chhuak chu ka âng phiau mai.



"Enge in lo tih dawn...?" Manager pa thleng a ka hmuh avang chuan ka ti ringawt a, Fibby leh Manager chuan nui vur vur hian, "kan lo leng dawn," an ti rual dun a.



Mason-a ka en chu alo nui ve suk suk a, han sawi mai tur pawh ka hre mai lo, "ringawt chuan," ka ti leh ringawt a. An rawn lan hi ka beisei lo hlawm tawp a ni mai Fibby te thleng thleng hian.



"Min țhut tir ve em em la," Fibby thu sawi avang chuan ka harh chhuak zawk hi a ni ber, ka nau te lah an lo phur ve hawrh mai bawk si.



"Awi ah in fel si țhu ru țhu ru," ka ti zung zung a an han țhu fel chu inchhung hi a khat vek ni mai hian ka hria midang lo leng dawn ta se țhutna tur dang a awm tawh lo.



"Lo awm lawk ru aw, ka la tifel zo lo deuh a," ka tih chuan Manager pa chuan a ho thu leh ka thiltih lai tih zawm tur chuan min hrilh a kei a pawh chu tawi khawmuang lo chuan room ah chuan lut in bed sheet bal vel chu ka dah fel zung zung a ka phah thar chu ka pawt mar deuh sawk sawk bawk.



"Tihpui i ngai em...?" Ka hawichhuak chu kan room kawngkhar ngheng chunga inkuangkuah thân in Mason-a hi alo ding a a lian ang reng si a choka light rawn êng lut tur pawh a dang vek hial mai.



"Ngai love ka ti thei alawm," ka ti ve mai a, "kan lo leng hi i lawm vak lo a ang hle mai," a ti leh sup, ka nau te lah an khek ring sia Fibby khan engemaw a tihpui leh tawh ni.



"Aih, chutiang a nilo. In lo lang ringawt a," ka ti a.



"Chu, i lawm vak na nge...?" Ala rawn ti leh hram.



"Chutiang lam a ni lo ka tih kha, in lo lang ringawt a Manager te nen ka beisei lo che u lawm," ka tih chuan a kekawr ipte zen in a ding țha deuh a a thiltih engkim hi ka chik em em zel mai zawng a nih hi maw.



"Hnaah chuan Manager iti ang a, mahse pawn lamah erawh chuan Hriatkim tiin ho rawh amah pawn a duh zawk ka ring," a tih chuan ka bu nghat a.



"Khawi thingpui ka lo lum ang che u," ti a ka chhuak tur chu min lo pawt ding a, "enge ni...?" Ka ti vat, ka rilru a hmanhmawh ve ringawt chhan hi ka hrelo a bula ka awm hian ka zâm tlat zel bawk si.



"Ka ruala Aizawl kal chu i ngaihtuah tawh em...?" A ti sup a, ka sawi chiang viau tawh in ka hre sia.



"Ka theilo ka tih kha, ka nau te nilai ațang first term an exam dawn," ka tih chuan a ner deuh suk a.



"Tihdan kan ngaihtuah dawn nia, i kal loh chuan midang ka kalpui dawn sin," a ti deuh hluk, "chutiang ngawt a ni lo midang chu kalpui mai la tun țum chu min hrethiam hram rawh," a lu min thin khum nghut mai.



"Ka duh lo, nangmah nena kal ka duh alawm," a ti deuh hmuk, ka thaw halh a, "a theih loh a nih hi kei chu ka kal ve theilo alawm," ka ti chu room bangah chuan na lo zet hian min nawr bet a.



"Enge...?" Ka ti chu, "hmuh tir tur che tam tak ka nei, ka rual a i kal ngei ngei a ngai min zui rawh. I kal dawn loh chuan i kal theih hun ka nghak thei i nau te kan hruai dawn nia," a rawn ti sup, ka khel ah a rawn dawm a ka hnungzâng chu a thai leh zeuh zeuh țhin a za ang reng.



"Tinge tiang hian i tih kher a ka theilo tih i hriat ve reng kha," ka ti halh a, hnai lutuk a min en in a thaw lum deuh ham ham a, "hriatchian che ka duh ka tih kha," a rawn ti sup.



"Kha kha ka zawhna chhanna a ni lo,"



"Keiin ka chhan duhdan che ania lawm," tiin min chhang let a.



"Chuan," ti a chil lem deuh khulh in a hmui hnuailam chu a liak huh zeuh a ava han sexy chiang tak..!!



Ka beng bulah chuan a rawn kunhniam a ka thin a phu dut dut mai, "i hmui a fawh che hi min phalsak thuai thuai tawh rawh," ti thûm sup in ka beng hnuai chu a rawn fawp zui zeuh bawk a keimah chu ka kâng awk thei mai ka țêk chhawk ni ber hian ka hria.





Zingah chuan tlem a ka tlai deuh avangin Hotel pawh ka pan tlai deuh a mahse Hotel kawt ah chuan staff hi an lo ding fur hlawm a an lo phun deuh mur mur bawk.



Thil thleng a awm maw ni le ti a ka pan hnai chu an din khah êm avang chuan ka dingdihlip a mahse ka la hmu pha chuang lo.



Ka hmaa ding chu ka kheuh zeuh ringawt a, a rawn hawi rual chuan thil thleng chu ka lo zawt nghal vat.



"Staff pakhat ruang an chhar a Hotel hnunglamah," a tih chuan min țhawng kher mai. Ruang maw... chu pawh staff lehnghal. Engtin nge a thlen theih zawk..?



"Tu in nge hmu...?" Tiin ka zawt leh a.



"Hotel kawt phiat fai tu in thingkung ngheng a thi reng chunga alo țhut luau chu a sawi a, amah phei kha chu nikhaw hre lovin a awm a tunah damdawiinah an hruai mek a ti," a tih leh tak zelah phei chuan mak ka ti zual takzet a a râp in min râp tawh zawk a ni ber, ka hmul thi a ding nghal sung sung mai.



#ZAWMNA

"A ruang kha ka va hmu ve hman asin," staff pakhat thusawi chuan ka beng a verh zar mai, ka tawlh hnai deuh a ka beng chu ka chhi ru ve kar mai bawk.



"Engtin nge a awm..? Tunge han sawi teh...?" A bula ding chuan zawi lutuk hian a zâwt sa sa a, ka thin a phu dut dut a ka thu hriat chuan thla a ti muang lo reuh phian lehnghal. Heng laia awm zawng zawng hi kan phawk lêk vek vang nge ni a țhenkhat hi an phili chung vang zawk..?



"A tukhum ațang khan thisen tak zet a rawn luang chhuak a, a hmui pawh a duk vek mawle chuan a biang te kha a duk a a kut hmawr te kha a duk vek, a mit bulah te khan pem a awm bawk. Ka ti tak tak, a thihna ala reilo aniang an ti," a ti zui zat zat a, an sawi zawi bawk a midang chuan an hre ve kher lovang.



"Engtin nge i va hmuh theih reng reng a....?"



"Midang buaipui tur mai an awm loh avang khan Manager khan min hruai phei alawm. VC leh Police an ko nghal a an rawn thlen fel meuh chuan kei pawh Manager khan chhuak turin min ti alawm," a tih leh takah chuan dingdihlip âk âk chuan ka dak chhuak leh a.



Hotel kawt velah chuan kan khaw Vc te leh Police țhenkhat ding chu chiang lo ruai hian ka va hmu thei a kan dinna lai bawr kual velah chuan thing lian vak lo phun in eng emaw an zam phei a chu chuan a ti râpawm zual takzet.



"Amah chu i hria em..?" Tiin ka zawt a, ka țawng hria chuan an rawn hawi vat a an la phu zawk lehnghal, "ruang ka hmu kha i ti a amah chu i hre reng reng em...?" Tiin ka zawt nawn leh.



"Aw... morning shift kha kan chan ve ve ania kan floor chan pawh a in ang chiah chiah bawk a, Dawngdawngi kha ania te fel ât mai hmel fai deuh kha," a rawn tih chuan ka bu nghat ringawt a. A hranpa in ka hre lova mak tihna in ka khat tual tual a ni ber.



"Helam pang lo ngaithla ru le," Manager aw kan hriat rual chuan kan hawi nghal țhap a, engmah khawih lova Hotel bul a hall an sak țhutthleng dah lailawk nana an hman chhung chu ngawi reng a pan turin min ti a a mal te te chuan min luh tir a Police form ha hmeichhia chuan chiang fahran hian min lo en țhap hlawm bawk.



Hall kan lut fel diak tih ah chuan țhutna a țhu țhap tur chuan min hrilh a, Manager chu thing an dawh san ah lawn kang in kan vai chuan min en kual țhap a, "kan kim em aw...? In țhiante, in hmelhriat emaw kha an kim em...?" A rawn ti hmasa ber a kan in enkual zung zung a kan kim ta a ni ang tuman sawi an neilo.



"In hriat ang in kan staff pakhat chuan vanduaina tawk in keini pawn thuchiang hriat engmah kan la nei lova. A chhungte lam pawh kan hrilh hre tawh a, min țhawng a a ngaihna kan hre lo hle mai bawk. Heng lai thil hi pakhat mah kut lawng in in khawih tur a ni lo, thu zawh fiah vek in nih dawn avangin helaiah hian in lo awm țhap ang a a hunah chuan kan rawn sawi mai ang. Lo chiâi lo ula thuchiang kan hriat hma leh ho tu lam in rem an tih hma chuan tu hnenah mah lo sawi darh lo tur a ni, a țul chuan an mahni'n an sawi mai ang. Buaina dang in belh chhah thei tih in hre reng dawn nia," a ti deuh thlup thlup a, zawhna hrang hrang an lo zawt kual deuh zut zut a Manager pawh chuan a ngaihna a hre ngang lo a ni ang chhan ngaihna a hrelo.



"Boss a țha em...?" Hmeichhia a zawt tu chu ka en vat a, ka la hmu ngai miah lo bawk.



"A ni pawh a țhawng a ngawi rengin hetah hian lo awm țhap ula, Boss leh Hotel tan buaina siam loh in tum hram hram dawn nia. Tu mai pawh a țhawng a zawhna in ngah ang tih ka hria thudik a rawn lang chhuak vat turah ngai ila, Police ten an awmpui reng dawn che u a hlauh tur a awm lo ania," a tih leh tak ah chuan an ngawi zui țhap a.



Kei pawh chu ka țhutnaah ka țhu ngawi ve rân a, Mason-a chu ka ngaihtuahnaah a awm reng bawk. Engtin nge a awm ang a neitu a nihna ang in engkim a chungah a tla dawn a amah chauh in a hmachhawn âwm si a tih vel chu ka ngaihtuah kual ve sek a.



Ka chhunglam a ka hah lutuk chu hawi chhuak in ka thaw leh hak țhin, tu tih nge maw ni ang le. Nimin te kha chuan hna pangngai takin an thawk ho vek khan ka hre si.



Vawi leh khatah tlar hma lama țhu te chu an rawn țê deuh țhat țhat hlawm a hnunglam pang ho phawk lutuk a kan hawi phei chu Police form ha hmeichhia khan tukverh alo khar țha sawk sawk mek hi ka hmu a.



"Hlauh tur a awm tawh lo, a in kalh lova thli in a rawn theh hawng a nih kha," a ti zui mawlh mawlh a, ka hawi phawk deuh hra a ka thinphu a pangngai tawh miah lo mai bawk.



"A rawn hrang aniang a," staff pakhat aw ri chu hrechiang tak kan ni.



"I â mi...? A thih ve chauh kha," pakhat chuan a ti let a, midang chu ka enkual a an hmelah chuan hlauhna leh thlabarna a lang chhuak zut zut a, inkuah khawm rial in an țhu deuh țhap bawk a.



"Ka hlau e kei chu, a thi ringawt bawk si," ka bula țhu te chuan an ti zui sap sap a pakhat mittui chu a tling pam mai bawk.



Keipawh ka bang chuang lo, hlauhna ka chhungril ah hian a awm a amah hre em em lo mah ila ka țhu hnung bawk nen sir lam leh hnunglam chu ka thlek leh sek țhin. Ka awm a nuam lova, ka kut khur leh ringawt țhin te chu ka hmer dun leh vak ringawt țhin.



Kawngka rawn kik karh karh thawm ah chuan kan hawi tang hru hlawm a țhu ho vek ni mah ila kan in en hrek hrek tawh a ni ber.



An va hawn rual chuan Mason-a hi a rawn lang hlawl a keipawh ka thaw huai mai, midang chuan lo ko in an lo be nghal sup sup a mahse an zawhna chhang lo chuan a rawn hawi kual deuh ruai ringawt a tlar hnunglam a rawn hawi phei ve rual a min hmuh rual chuan a thaw zui ham ham.



Ka lo en ve rân a, Police nu kha bia in ka țhutna lampang pan chuan a rawn pen phei a midang chuan an lo en ngawih ngawih tawp.



Ka bul a rawn thlen rual chuan ka țhutna chair bulah chuan a rawn țhu hniam a, "min lo zui chhuak lawk la," ka hriat theih chang chang tur chuan a rawn ti sup a.



Midang chu ka enkual a kan lam an lo hawi țhup a an hlauhna in a kian san ta nge ka hrelo mak ti hmel leh thik hmel an pu fur hlawm hian ka hria.



"Mira," a tih chuan amah chu ka en vat a, "lo chhuak lawk la ka hman rei lova," a tih chuan ka bu nghat a, ka bag dah in a kal chu ka zui phei ve nghal a mahse kan chhuak tur chu police nu chuan min lo ti ding teh tlat.



"Enge tih in tum...? Thil thlen dan in hre vek inngaihzawnna lam buaipui hun a ni lo, hruai chhuah a theih lova sawi duh i neih chuan tikhan i sawi thei ang," alo ti zui hmak.



"A țha lawm, mahse ka khawih thei ang chu tiraw...?" Mason-a chuan a ti let sup.



"Thudik chu a inthup reng dawn lova a lang chhuak dawn tho tho. I khawih thei a mahse thuruk inthup a tam poh leh hai chhuah tur a tam ang a hai chhuah a awlsam phah thei tih i hre dawn nia," tiin a dinna ngaiah chuan a ding rân a, Mason-a erawh kun in a nui suk mai.



Thil tisual tu ber anga Mason-a a ngai chu ka haw lek lek mai. Ka chhunglam hian a tih a ring lova ti tur ah pawh ka dah hek lo, ka hria lawm a ni hi chuan tual a that dawn lo tih keimah ah hian a chiang ve êm a ni.



"I hlau em...?" Min rawn en a, ka lo en let ve rân in a a mitmeng a ka thil hmuh chuan ka awm a ti nuam sawng sawng hian ka hria.



"Hlau ve tho," ka tih chuan a rawn pen hma hret a, "Hriatkima bulah lo awm la buaipui tur che in ka hrilh tawh che a," a tih chuan ka nui mai a.



"A ngai hleinem ka țha lawm, ka hlau ve deuh mai a ni," ka ti a ka nui lui deuh var var bawk. A tan buaipui tur a tam dawn in a hahthlak tawh dawn nen buaina dang siam belh ka duh teuh lo mai.



"Ka ngaihtuah lutuk che a, awmpui theih che ka chak hle mai," a kekawr ipte zen in a thaw chhuak ham ham a, "ka țha lawm. Nangmah zawk kha," ka ti ți dai a, nui suk a min rawn en in a rawn pen hma leh hret a.



"Ka țha kei chu, Station lamah ka tlang ve nghal dawn a tu pawn thil an zawt che a nih chuan i hlauhna kha dah țha in inti huaisen la an zawh che ang i hriat ang zawng zawng chu dik tak vek in i chhang dawn nia," ka bu nghat nghat a, a thaw zui leh ham ham.



Hnunglam ațang chuan an rawn au tawh a, hawi pawh hawi let lo chuan a kekawr ipte a zen na kut chuan ka kut chu a rawn vuan a.



"Hriatkima bulah buaipui tur che in ka hrilh tawh a a thusawi engkim ilo âwih dawn nia. Zanah ka lo kal ang, i hria tiraw...?" Ka bu leh mai a, a ni pawh a țhawng in a hlauthawng ve viau ang. Mahse ho tu ber a nihna ang in a hnathawk te hmaah leh midang hmaah chuan hmel pangngai a lan tir a ngai si.



"Ka ngaihtuah che," ka ti chhuak phawng a, a rawn hawi chhuak mitmeng chu a hahdam in a de sâwt sâwt ni hian ka hria. Ka kut chu nghet zeta hmer in a hûm deuh vang vang a.



"Ummm... min ngaihtuah reng rawh, mahse tunah chuan ni lo, nangmah lo in enkawl țha la ka lo let leh ang tih ka tiam a che," tiin a rawn pen hma leh a tunah chuan ka kuah phak ah a ni a din tawh ni.



"Ka awm reng ania aw," ka ti leh hram a, nui suk a bu nghut in muangchangin a rawn âwn hnai a ka biang dinglam a rawn fawp vang vang in ka beng chu a fawp zui leh zeuh a.



"I hmui a fawh che min phalsak thuai thuai rawh ka tih kha aw," tiin a ding hrang deuh a mahse chutiang em em in min la hlat chuang lo.



"Ka kal dawn aw, ka sawi kha hre reng ang che," tiin ka beng ve ve ah rawn hup in ka chal ah chuan a rawn fawp leh vang vang a, "ka kal dawn aw, ka ngai che tih hre reng rawh," a tih rual chuan ka thaw chhuak deuh ham ham a keimah pawh chu ka lo hah rukna zawng zawng kha an kiam ta vek ni hian ka hria.



A kal liam lai chu ka en ve reng a Police nu khan lut tura min tih hnu chuan ka lut a, staff dang chuan ei loh hmel zet leh hriatthiam loh hmel zeta min en in an lo phun zui mar mar a mahse hrelo ang a lang chuan ka țhutna lam ka pan phei nghal vat a.



Mason-a chu ka ngaihtuah ve takzet bawk, a tan a harsat ve dawn teh lul nen min ngaipawimawh in a rawn kal vang vang a keimah ah a thutak ve ta niin ka hriat phah bawk.



A mal te te in zawhna min zawt diat diat a, an zawhna min zawh chu keipawh chuan ka hriat leh hmuh ang ang chuan ka lo chhang zela, nimina ka kalna te leh thildang dang te chu min zawt zel a keimah chu min zawt rei riau hian ka hre bik tlat bawk.



Ka chhuah dawn chuan min zawt tu pa khan min ko ding leh a, ka hawi let chu a țhutna ațanga ding in a rawn pen chhuak a.



" I bengbeh emaw bakilh a bo em...?" Chik lutuk a min en chung chuan min zawt a ka hrethiam lo kher mai.



"Bengbeh ka beh ngailo, bakilh chu ka kilh ve țhin mahse a bo pawn ka hrelo," ka tih chuan a bu nghut nghut a.



"I kal thei tawh ang," min tih chuan ka chhuak nghal vat a, bengbeh ka beh ngai tawp si lova eng thu nge maw min zawh ngawt mai le..?



Ka chhuah chuan Car pakhat bulah hian Manager kha alo ding reng a, min hmuh rual chuan min rawn pan vat a, "i zo tawh em ni....?" Tiin min lo zawt nghal vat.



"Aw... tinge helaiah hian i awm a Station lamah i awm ka ring a...?" Ka lo ti ve nghal vat a.



"Nia... Mason-a'n hruai tur che in min ti a lut la," a tih ruala Car kawngkhar a hawn rual chuan nuam lo ti zet hian ka țhu lut ve a.



"Nangmah ti hlau thei tur thil an zawt che em...?" A tlanchhuah rual chuan min zawt nghal chat a, "zawt lo, min zawh chu ka hriat ang ang in ka chhang a. Tinge ilo kal duh kher a...?" Ka ti leh, ka tan a nuam lo thil thleng vang hrim hrim pawn.



"Țhianpa in a ngaihtuah che a thlah haw tur che in min ti alawm, a ngaihtuahna i chhuahsan hleinem. I hlauh a ring lutuk a hawi kual zuk zuk a i tlan haw hlauvin min rawn tir a nih hi," a tih chuan ka ner nâng a.



"A va han â mai mai tak," ka ti zui hlak bawk.



"A nih enge chanchin...? Amah a țha tiraw..?" Ka zawt zui nghal zat a.



"Țha e, a țha mah mah alawm. Lungngai suh, an chhungkua hian thil an ti thei alawm an zawng chhuak em em ang hmelhriat țha an ngah a thudik chu an hai lang vat mai ang," ka bu zui nghat nghat a.



"A nih, eng emaw buaina te a nei em Dawngdawngi chuan mize danglam ang te," ka ti leh a, amah ka hre ngailo mahse hetiang teh tawp a tawp tur chuan hmelma a nei a nih ka ring.



"A neih âwm ka va hre lo ve a hna a tlin in a tho thâng a țha a, nui sâng in a hna hi a thawk țhin a nitin a in fiam ziah kan nia chutiang a ze danglam a neih âwm ka va hrelo ve," a ti zui dap dap a kei a pawh chu ka ngawi ve ta rân bawk.



In kan thlen chuan station lam a let leh a ngaih avangin a rawn lut kawi lova țhenawm khawveng in min hmuh rual chuan in lamah rawn lut khawm in thil thleng vel chu min lo zawt sup sup hlawm a chhan ngaihna pawh ka hrelo.



Mahse keipawn engmah ka hriat bik loh thu a chhang in an titi chu ka ngaithla mawl ve tawp a, thil thleng mak an tih thu leh engvang ngawt a thi nge a nih ang tih an sawi te chu ka ngaithla liam vel mai mai ni a ka hriat laiin ka ngaihtuahna luah tu ber erawh a ni tel tlat lawi si.


Ni e... engvanga thi nge a nih ang hmelma nei dawn se he khuaa hmelhriat nei lo lehnghal ania hmelma neih ngawt thu a awm silo, mi kut tuar ngei niin a hriat bawk si a mak takzet a ni.



Kimkima leh Sawmtea tlai ball pet tum pawh chu thil thleng avang chuan chhuah ka phal lova titau dun bur bur chung in TV remote an inchuh a an in tih țah phah ringawt lehnghal. Rilru ipik nen, a inrem lo țhin khawp mai.



Zanah chuan chanchinthar ah an puang ta ngei a Aizawl-ah chuan Venglai a an awm thu leh thildang dang chu an puang tel a. Kan Hotel pawh lang chuai chuai in video leh thlalak nen Mason-a leh a pa hming pawh chu a lam ri leh țhin bawk.



Hotel ding thar chauh a nih nang in thihna a thleng ta tlat a, Mizoram a deng chhuak leh ang a mi titi ber erawh a ni leh ngei ang.



Tv an en zawh chuan mu tura hrilh vat vat in kei pawh chuan in chu ka tifel deuh zung zung a, a khat tawk in ka phone chu ka en leh sek țhin. Mason-a'n min rawn call ring deuh bawk si ri har bawk si chuan a ni ka en leh sek țhin ni.



Puanchhia ka hruk mawlh mawlh lai chuan kawngka an rawn kik a thil ngaihtuah muk lai a ni bawk nen ka phu zawk mai.



"Tunge aw...?" Tih pah chuan ka hawng a mahse pawnah chuan Mason-a alo ding reng chu niin, "nangmah maw...?" Ka ti hû a, a kawrlum ipte zen in alo nui suk bawk.



"Lo len i phal em...?" A tih chuan ka in thing harh vat a, "lo lut rawh lo lut rawh," tiin a luhna tur chu ka kian a a rawn luh rual chuan khar lehnghal sawk sawk in ka kalh lehnghal daih a.



"I țha em nangmah...? Thil thleng a țha em...?" Chair pawt chhuak a a țhu chu ka be nghal sawt sawt a.



"Umm a țha vat mai ang," a ti ringawt a, a hmelah chuan zep nei a ang.



"Zep nei i ang," ka ti ringawt, a nui suk a.



"Lo țhu phawt la, i taksa ka lo dek hmasa," a tih chuan che lo a ding reng chung chuan ka en reng a.



"Vatin," a tih leh takah chuan ka pan phei a a bul ka thleng chu ka banah rawn vuan in a malchungah chuan min pawt țhu hnawk a, "khawnge i nau te...?" Ka tal dawn tih a hria aniang ka dulah a rawn kuah nghal zat.



"An mu tawh a," ti a a kut pawh thlak ka tum chu min dawm nghet sauh in ka darah khabe a rawn nghat a.



"Nih chuan, bengchheng siam lo ang aw an harh palh ang," a rawn ti thum sup.



"Nih chuan tiang hian awm lo ila," ka ti dek dek chu alo rûm nghut a.



"Rinhlelh an nei a," a rawn ti daih, ka che pawh ka tawp chawt a.



"Tunge...?" Ka lo ti vat.



"Mahse kei chuan ka âwih lo," a ti leh a, "tunge an rinhlelh a," tiin ka lo zawt leh.



"Dawngdawngi form ipte ah khan bengbeh leh bakilh an hmu a Amber-i ta ania, ka leisak a ni nghe nghe bawk. Mahse a tih chu a nih ka ring lo," a tih chuan ka ngawi reng a Amber-i bakilh leh bengbeh maw..? A nih chuan vawiin a kha putar in min zawh kha a nih ngei dawn chu..!!



Amber-i maw..? A ni teh daih daih, thil mak tak zawng a ni.

☆ Zawmna a thui thei tlat lo mai ☆



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)