NANNY GIRL (CH-1)

Episode kal lai dah luhna

Moderator: writers

Irene H muankimi
Posts: 101
Joined: April 22nd, 2021, 7:12 pm

NANNY GIRL (CH-1)

Unread post by Irene H muankimi » July 4th, 2022, 6:44 pm

NANNY GIRL
Chapter 1


VANLALHMANGAIHI P.O.V.





Ka em ruak nena kan in panna stepa ka chhuk thla chu ka khi thla vur vura, ka rilru in ka nau te pahnih school fee ka dah hran hnu a,ka pa Damdawi leina tur pawisa ka la neih ban zat turte chu ka chhut pah melh melh bawk. Ka dinhmun hian a zir bawka ka rilru leh ngaihtuahna ah hian sum hmuh dan leh ren taka hman dan chauh zu awm a.




Inchhung ka luh chuan ka nu in kan tlai chaw hmeh tur Maian alo hik mek a,thutthleng seiah ka pa alo muhil bawk.




"Kha iva rawn haw hma ve? I in hralh thei lo em ni?" Tiin ka nu chuan min lo zawt vat a.




"Ni lo e, vawiin chu ka in hralh zo hma lutuk. Ip vel pawh kha zanah hian thlai a rawn thleng leh dawn sia ken buai ngai tawhlo turin Bazarah ka rawn dah nghal mai a nih kha" ti zung zungin ka em phurh chu ka dah tha a.





Ka nu tuilum lo lum sa chu inbual nana hmangin ka in bual zo chu ka dam sawng sawngin ka hria. Ka nu rawngbawl chu tih pui vak a ngaih tawh loh avangin ka nau te pahnih rora chhu a in hlawh an rawn haw chuan zanriah kan ei a. Chawhmeh tam kan mamawh lo, chi leh Hmarcha a awm chuan chawhmeh pakhat deuh chauh kan siam thin.




Ka chawhmeh zawrh ka hralh ban hi kan hmeh ve ber a ni a, Sunday sa turin Inrinni tlaiah Sanghatin kan lei leh ve leh bawka kan lung a awi ve em em thin tho.





Ka hming chu Vanlalhmangaihi a ni a. Ka nu leh pa te fa lak hi ka ni. Sawn ka ni in ka nu diktakin kum 6 ka nihin min boral san a. Ka nu leh tuna ka pa hi thian tha tak an nih avang leh an nin fa an neih theih lawk loh avangin kei enkawltu neilo kha min khawngaihin an fa atan min la ta a ni.





Ti chuan an hnen atang hian ka dawn ngai loh tur hmangaihna nasa tak ka dawng a. Fa an nei thei tawh dawnlo emaw an in tih hnu ah ka nu hian ka nau te pahnih hi a nei leh a.




Ka chhang chiah Pekkima a pian hian pawl riat ka ni a, an inkara kum khat chiah tla in kan pang ber Sawmtea hi a rawn piang leh bawk. Mahse, vanduai thlak takin ka pa in motor accident a tawka chumi atang chuan a kawng atanga a hnuailam zawng hi a zenga,hetiang a nih hma hi chuan tuna kan in nei tute taxi hi a khalh hlawh thin a ni.




Tin,ka nu pawn Bazar pui velah chawhmeh a zuar thin a,ka pa a accident hnu ah erawh ka pa enkawl a ngaih avangin kan in neitu te in a ti fai thin a. Chu chu kan in nei tu te hian kan in luah man aiah an ring a ni. Misual an ni lova an in kan luah man pawh ka pa chetsual hnu atang min dil duh tawh ngai lo. Ka nu inthlahrungin an in a tih fai saka anni pawn min hrethiam khawp mai.




College kal chhunzawma zirtirtu nih kha ka duhthusam thin ni mah se,kan chhungkaw dinhmunin a zir tak loh avangin 12 thleng chauh class ka kal a, ka nu lo tih thin angin Bazarah chawhmeh zuarin a kar lakah mi in ka ti fai thin bawk.



"A u,pawisa i van ngah ve" dawhkan rawn bawhin ka pawisa chhiar lai chu hmuhnawm ti zet hian Sawmtea chuan a en a.




"Nakinah hei aia tam hi nang chuan ila nei dawn alawm,lehkha tha deuhin zir la." Ka lo ti vat,ka nau te hi an kum ala naupangin naupang dangte anga awh nei ve vek an nih avangin an hmuha pawisa khawih vak pawh hi ka duh thin lo.




Tunah pawh Pekkima hi kum 10 chauh niin kan vengah a school ban hian rora chhu in a in hlawh thin a, Sawmtea'n kan tuboh chhe zet mai kengin a zui ve thin. Eng thammah va chhu lo mah se,a u rora chhutna bulah lo awmin a u rawn haw hma chu a rawn haw san duh ngailo.




Pekkima hi chu tlemin a lungfing deuh tawha, Sawmtea erawh naupang a rau rauah pawh a â ve chi tak tak kha a nih avangin a thiante neih ang ang hi ka duh ve ti chawt ang chi a nia.




"Kei chu Kawngtea toys ang ka duh ve e" a rawn tih chuan ka melh ralha zum zut hian min lo en renga ka nuih a zat rualin ka khawngaih let ling, Kawngtea hi kan kawmchhak kawngpui chhak leha awm an ni a, naupang sual chu a nilo,a toys te pawh Sawmtea hi a khalh tir ve fova mahse, a nu khian Sawmtea hi vawikhat Kawngtea toys a tih chhiat avangin alo hau hrepa, ta tang chuan Sawmtea pawh hian Kawngtea chu a kawm tha vak duh tawh lova.





Kawngtea erawh hi chuan a ngai khawpa kan in ah hian rawn kalin a rawn kawm thin a. Mahse, kan lal Sawmtea hian eng nge a hriat ni, a chang hi chuan ka kawm peihlo tiin a u rora chhutna a vai naupang a nu in a rawn hruai thin hi a kawm san daih zel a. A chhan han zawh lah hian 'a nu in min hau leh ang' a ti mai zel a.




Chutianga naupang mawl mai rilru sukthlek ti danglam pha a a hau a nih chuan a hau na thawkhat tih a hriata, ka nu in ngawih bo pui mai mai turin min tilo phei se chuan an in a han kala han hauh ve chiam ania ka chak. Kawngtea'n a toys thar nena infiam pui a rawn tum chang pawn a toys zawk hi awt ve tih hriat takin a thlek sak vung vung zela mahse, " i nu in i toys ka khalh ve a phal tawh lova" tiin ka best friend tia alo sawi ve thin chu a kawm tha duh tawh ngailo.





"Kha chu kan fees tur ania,naktuka rora kan hralhna in Kinder joy ang chi Cheng nga man ang kha kan lei dawn ania." A u in a rawn tih chuan a lawm leh em em a.




Tichuan ka nau te fees tur leh ka pa Damdawi man tur vel ka dah chhuah hnuah pawh tun tum chu khawl tlem kan la nei pha. Ka nu hnena pawisa ka pek chuan a mittui a hnai leh kuar tawh.




"I pa nen kan lo sawi duna Term thar chu i nau te pahnih hi Sorkar school ah sawn mai ila kan lo ti a,i tan pawn mi in tihfai kher a ngai tawh lova nga i hahdam deuh thei ang" a ti zawi sup a.




Kei an fa tak tak pawh nilo 10 thleng English medium a min kal tir laia,an thisen zawmpui ngei Sorkar school a kal tir an tum chu ka rem tilo reng reng. Ka thawh theih chhung chu ka nau te pahnih hian zirna ah leh zel chuan an thiante pawllo leh lutuka an awm ka phal ngai dawnlo.




Sorkar school a chhe lutuk e,tihna lam nilo in tet lai atanga English kan practices tam hi kan thanlenna kawngah a pawimawh hle a, a hniam berah pawl riat thleng tal hi chu English ah kal tir ka duh a ni.




"A ngailo, ka chhungkaw tana ka thawhah hian ka vui lova nuam ka ti zawk bawk. Ka nau te hi an thiante neih ang engkim pe ve theilo mah ila zirna tha erawh kei hian ka pe dawn a ni. Ka pa hriselna hi a pawimawh bera amah leh amah kha in enkawl tha se a bak chu keiman ka ngaihtuah vek mai ang" tiin ka nu chu ka hnial.




Zan 11:00 pm ah Thlai changin Kawnah ka chho a, chumi thlai ka buaipui zawhah Bazar pui lamah chhuna ka zawrh tur thlai ka zuk la leha, kharchhawng nutling ho kara kei nulat hmang ve tan chauh ka han khawsa ve chu e,a harsa in a hreawm duh thin khawp mai.




An chuhhelhin an tawngkam a chhia a, mihringte hmasialna Chiang takin Bazar hmunah chuan a lang thin. Mahse, he khawvel fair lo taka dam khawchhuah i duh a nih chuan chu thil chu i pawm thiama a hun leh a hmun ang zela i mizia leh nungchang pawh i her rem thiam a ngaia, eng tik lai pawn fair reng hi a theih loh tih hriat chian hle a tha bawk.




Chutih rualin diklo taka nun hman erawh tluk hlenna a ni tih hria la, i nun erawh uluk takin hmang thin thung ang che. Inrinni chuan nilengin Bazarah ka thu a, Sunday ka inkhawm leha a bak kar tluanin mi in tifai in mi hausa ho in chu ka lutchhuak kim khawp mai. Monday, Wednesday leh Friday ah erawh chawhma chhung in pakhat ti faiin Chawhnu lamah mi in ah kal kualin chawhmeh ka zuara chu chu ka nitin hun hman dan a ni.





Inrinni ka chawhmeh zuar chu nizan lama ka nu nen kan in biakna kha ka ngaihtuah reng maia,pi Lawmi'n Sap ram lama kal tura min sawmna kha pawm mai chi a ni em aw tih thlengin ka ngaihtuah.




Tlaiah ka nau te pahnihin ka thlai hralh ban te min rawn in ruh puiin kan veng thleng chu ke in kan haw thla a. Zanriah ka ei laia Pi Lawmi zui ka rilruk thu ka nu leh pa hnena ka sawi chuan ka pa chuan a phallo viau a. Ka nu erawh chuan rilru siam fel har tih hmel zeta min en in, 'i phur a rit mah mah a ni' a ti ringawt a.





Pi Lawmi hi UK a khawsa niin kan in neitupa causin a ni. Thla hnih liam ta khan zankhat riakin a rawn kala,chumi tum chuan amah zui turin min sawm a. A sawi dan chuan UK ah 'Baby Home', nauawmna neiin tah chuan he lai aia sum a tam zawk thu min sawi hmuh a.





A hnuaiah chuan zirlai pawh tamtak thawkin darkar bi in mi nau an awm sak thin a. Hlawh pawh a tha khawp mai, a number min pe a ka rilru thlaka UK lama kal ka duh a nih chuan amah be turin min ti bawk a ni.





Zanriah eina ka sil laiin Thansanga a rawn lenga,ani hi pawl 11 ka zir atanga ka bialpa ve a ni. Kan inkawpna a rei tawhin ka chhungte pawh hian an ngaina viau tawha, MZU ah tunah hian a lut mek a, lehkhazir a duham thin avang leh kei ka buai thin em avang hian kar tawp bak pangngai taka inkawmna hun pawh kan nei lo.




Ka nu leh pa an nupa room ah an awma,ka nau ten kan chaw ei dawhkanah lehkha an zira keini thutthleng seiah thu in kan inkawm thung.




"Naktuk chu thiante'n Birthday lawm paha ride an tia,lo kal ve ta che"




"Naktuk maw?"




"Aw,chawhma inkhawm banah kan kal a nga."




"Ka hrelo ,ka nu te ka dil ve phawt loh chuan" ka tih laia a hmel chu ka hmuh sual nge, a hmelah chuan lawm zan lohna hi ka hmua mahse,a reilo em a ka hmu sual pawh a ni mai thei.




Thansanga hian ka dinhmun engkim a hria a, kawng engkimah ka chhungte tih loha min fuih nasa ber tu a ni. Hnem ka ngaihin ka tan a awma,ka pa a accident a lehkha ka zir theih loh lai te pawh khan kan in ah rawn kalin min zir pui thin a. Amah vang liau liau hian 12 pawh kha ka pass thei a ni.




12 ka zir lai a ni a,ka pa accident kha. Ka rilru a buaia ka pa sum thawk chhuaktu ber hetiang a nih chuan ka nu thawhchhuah chauh chu kan chhungkua khan kan dam khawchhuah pui dawnlo tih ka hre si. Ka pa enkawl nan kan neih zawng zawng kan hmang veka,school chawlh ka tum lai pawn Thansanga hian min fuiha beidawnglo turin chuvang chuan ka tan chuan ka engkima engkim a ni ka ti lo theilo.




Ka nu te bula ka sawi chuan an phal viau maia, zan ka mut hma chuan a tuka ka thawmhnaw hak turte chu ka thlang leh hmasa te te a. Thansanga thiante hi hausa tak tak vek niin kan dinhmun a in an loh vang nge an zinga khawsak hi nuam ka ti vaklo thin. Mahse, Thansanga thiante an nih miau avangin phurlo deuh chung pawn an zingah chuan ka tel leh thin a, min tawngkhumna huat dawna huat tak tak theih si loh mahse,awm ti nuamlo tawk lek te hi an zinga awm min ti peihlo ber tu te a ni thin.




A tuka kan inkhawm tur chu Biakin pawnah min lo nghaka, chawhnu lam len ka hman thu ka sawi chuan a lawm khawpa,a lawm lai hmel hmuh tluka hmuhnawm chu ka tan a awm lo.




Mahse, inkhawm kan tana kan Kohhran secretary in " Sunday leh thalai bial intlawh tawn kha rokhawlna a awm avangin keini zawk hi feh chhuak zawkah kan tang dawna zaipawl ho khan chawhnuah hian sunday leha kan hla rem tur zir a ngai tih kha kan hre theuh dawn ania" a rawn tih avangin Thansanga ruala lenchhuah ka lo tum chu a tlawlh leh ta a ni.




"Kan in ah kal hmasa ila ka in thlak zawhah in inah kan chhuk a nga" tiin inkhawm kan van veleh a ruahmanna chu alo sawi zung zunga,ka theih loh tur thu han sawi chu ka hreh ang reng.




"Angaih tumah haw awiloh hla zir zawm tur aw" kan leader in arawn tih chuan inthlahrung deuh hian Thansanga chu ka en a.



"Eng nge a awmzia?" A ti deuh hmuk a.



"Thansang hriatthiam..."



"Ka rualin ilo haw dawn em?" Min lo tih khalh hmaka rilru hi a ti hah thin." Sawilo mai rawh, ka tan hian engtikah mah hun i nei ve ngai dawnlo a nih hi" tiin biak leh hman miahloh hian a kal daiha a hnunglam atang ka en zui vawng vawng.




Hla kan zirna ah pawh Thansanga ringawt ka ngaihtuah avangin kan hla zirah chuan rilru ka pe lo hle a,a hmaa kan lo rem sa tawh nilo phei se chuan hauh ka tawk ngun viauin ka ring. Kan ban veleh hmanhmawh zeta haw in Thansanga chu ka call a,a chhang theilo.




Ka pa phone hlui keypad hi ka rochuna a laiah rubber a tawn ngheh ngai a ni tawh a. Ka thalai pui ten Android phone an hmang ka hmuh te hian ka awt ve hle thin. Mahse,chutiang hmang ve tur chuan ka dinhmun hian a zir bawk silo.




Kan tukverh thlanglama ka dah lai chuan ka nu hi ka bulah a rawn thu a, " Sanga nen khan in leng dawn emaw ka tia?" A rawn tih dam thlup chuan lu lo thingin hla kan zir thu ka sawi a.





"Nu, pi Lawmi chungchang kha?" Ka tih chuan thaw halhin ka mal chunga ka kut chu rawn humin zawi te te hian a beng thek thek a.




"Ka fanu i ni hi ka lawm a, chutih rualin i phu ang nun nuam ka pe theilo che erawh min ngaidam dawn ania aw" hnukulh deuh tuna a tih chuan a thiamloh a nih loh thu ka lo sawi ve vat. Anni chuan fahrah enkawltu neilo kha hmangaihin min tuam hlawmin chhungkua min pe a ka tan chuan hei bak baka thil hlu hi a awm lo.





"Pi Lawmi chu i be tawh reng reng em ni?"




"La be lo,ka pa nena in rem tihna lak phawt ka duh a. Nu, kan awmna inhlat deuh dawn mah se, pawisa ka thawkchhuak tam zawk a nga,kan chhungkaw khawsak pawn hma a sawn chak zawk ang." Ka tih chuan lu a bu nghut a.




"I pa chu ka lo sawi pui leh dawn ania. I pa chuan ramdang a nihna angin a hlauhthawn pui che a, keipawh ka bang bik chuanglo. Mahse, pi Lawmi pawh mi dik tak a niin ka hria a, helaia rim taka i thawh ai chuan khutah nuamsa in i thawk thei zawk a nga tih chu ka ngaihtuahna a ni a." A ti ve dap dap.




Ka nu leh pa hlauhthawnna hi ka hriatthiam puia nawr vak pawh ka tum lo. Ramdanga hna thawk tura kal an chanchin tha hriat zui tur awmlo an lo awm ve nuk thin avang hian bumna tawkin ka zuk tal buai chiam ang tih chu ka pa hlauh ber a ni.





Monday atang chuan a ngaite in hun awl nei lek lovin ka buai leh char char a. Tlansanga lahin call a chhang thei bawk si lo. Mahse,rilru tih haha engtin nge awmzui a duh tih takngial pawh ngaihtuah nan hun ka nei lo.





Tlai khat ka haw chu ka nu leh pa ten pi Lawmi zui rem an tih thu min hrilh a. Lawm tur nge lawm loh tur ka hrethiam leh tlat tawh lo. Sum hmuh awlsam zawk leh hlawh tamna ni mahse, ka chhungte nena kan in then hrang tur ka ngaihtuah chuan a hmaa ka ngaihtuahna ang kha ka pu hlei theilo.




Mahse,thutlukna ka siam tawha kan chhungkaw tan pawh ka tih ngei a ngai tih ka hria. Ka buai avangin ka phone a thi tih pawh ka hre lova inchungte in ah han kal in pi Lawmi chu an mahni kaltlangin ka bia a.




Kum a tawp tep tawh tho bawk nen, kum thar lama inbe tha leh tur angin kan in biakna kan ti tawp a. Mihring rilru lo mak zia hi, a hmaa kal duh em em khan ka nu leh pa hnen atang phalna ka neih veleh kal ka chaklo leh a,tunah pi Lawmi berin aw pangngai taka min pawh loh avangin ka hnualin ka kallo leh mai ang tih chu ka hlau leh em em si. Diktak chuan tuna ka rilru put hmang pawh hi ka hrethiam bik chiahlo.




Kar aliama Thansanga chanchin hriat tur a awmlo. Chutih laiin pi Lawmi chuan pa Vena(kan in neitu te) te rawn bia in 'kum thar 5 January vela kal thei tur angin lo in puahchah se' tih a rawn sawi a.




Tunah December thla ni hnih thum chauhin kan chuangkai tawh lo a ni a,ka chhungte kianga ka hun hman theih chhung chu a tlem ta khawp mai.




Visa vel amah pi Lawmi'n min buaipui sak vek dawn avangin ka tan chuan lo tih ve vak tur pawh a awmlo. Serchhip lam mi kal ve tur hmeichhe pakhat a awma, pi Lawmi hi December thla tawp lamah Mizoramah a rawn chho a nga ti chuan a rualin kan chhukthla ve leh dawn a ni.
....
.....
.....


Zanah rin loh deuhin Thansanga a rawn lang hlawla, a tir khan ka hun awl neih apiangah biak ka tum ve thin a. Mahse,call a lak duh ngai loh avangin biak zawm leh pawh ka tum tawh lova mahse, tuna chutia kei pawh min hrilh lawk miahlo a a rawn lang thut chu mak ka lo ti viau mai a.




Ka nau te'n lehkha zir an ngaih vak tawh loh avangin an mu hma a,kan pahnih chauh chuan chaw ei dawhkan kila thu in kan in bia a,kan aw pawh ka chhungte tih harh kan hlauh avangin ka dim viau.





"Ka call i chhang duh silo a,kan inkar tih tawp i duhah ka lo ngaia" tiin lawmlo zet hian ka melh run a.




"Ka tihpalh a tir kha chuan ka lungawi loh em vang a ni a mahse, a hnuah kha chuan Assignment neuh neuh kan ngah em avangin phone khawihna hun pawh ka neilo a." Tia a in sawi thiamna chu ka ringhlello. Mahse, awm nuamlo deuha min siam erawh ka la lawm chuanglo. A lungawilo emaw zir tur a ngah emaw, ka rilru nawm nana vawikhat min rawn biak zawk kha a har miahlo.




"Thansang, ka dinhmun chu sawi ngai lova hrechiang ber tu i ni a. Kan inkar hi tihtawp i duh a nih chuan kei chuan ka danglo ang che. Bialnu i thil tihna apianga i kianga awm thei reng tur i duh a nih chuan ka kaltir ang che." Ka tih chuan ngunthluk fe hian min en a.





"Nangmahlo hmeichhe dang duh ka neilo. Ka sawi ang khan a chang chuan ilaka ka pangchanna hi ka lo ti lang leh thin a. Mahse, chungchu ka hmangaih em vang che a ni tih hria la ka duh. Nakinah hna te ka neih hunah he i nun hreawm tak atang hian ka hruaichhuak ang che. Tunah rih chuan min lo la nghak hram hram rawh aw" ka kut chelhin a sir zawngin a awmah min kuah bet a.




"Uk ah hnathawkin ka kal dawn" innghen chiala kan thut ngawih reng lai chuan ka ti sap a.




"Uk..! Eng nge a awmzia? Ngati teh thut nge? Ti nge engmah min hrilh ve loh?" Thu ngil atin lawm loh hmel zet hian a ti zung zung.




"Hrilh tur che in biak pawh i biak tlang theih loh alawm. Pa Vena unaunu pi Lawmi khan a hnuaiah min thawh tir dawn a. He lai aiin hlawh a tha a,ka nau te leh ka pa tan pawisa ka thawkchhuak tam thei zawk dawna tha min tih pui ve tho lo em ni?" Ka lo ti vat.




"Chutiang khawpa thutlukna lian chu kei min rawn miahlo in i siam thei a maw?" Tiin lawmlo tih hriat takin min en run a.




"Ka sawi kha,biak thei i ni lova. Kan inkar tihtawp i duhah ka ngaih avangin hrilh ve kher che pawh ka tumlo. Tunah ka beisei lutuk loh hnuah che i rawn lang leh thuta ka hrilh nghal che a nih hi" tiin ka thiamthu ka sawi ve zat zat. He thilah hian keimah ringawt min dem thei biklo reng a ni.





"Nangpawn hmabak tamtak ila neia,chu mi hma chuan keipawn hna ka lo thawk ve dawn a ni mai a. Shillong lamah zir zawm i tum a ni lawmni? Chutianga Mizoram i chhuahsan phei chuan kan in hmu khat leh zual sauh dawna kei pawh he ti laia ka awm leh khu lama ka awm chu danglamna a awm vak Chuang dawn em ni? Phone hmangin kan in be reng thei tho va" a thu ngawi ngur chu tih lungawi ka tum a ni ber.





A bianga ka fawh zeuh chuan rawn hawi thutin ka hmuiah a rawn fawpa,ka lo meng kawk. Min fawh zawm zel a tum chu lo dang vat in, 'ka chhungte an harh ang' ka ti a,a thut hmun atanga a ding chu ka en haw a. Nui suka ka kuta rawn kaiin kawngka bula pawn light kan on na chu off in pawnah min chhuah pui a.





Pawn thimah chuan banga min nam betin min fawp a nih chu. Keipawn ka thiam ang tawka lo chhang letin a duhkhawp pek loh chu ka thil hlauh ber a ni.
....
....
....

Tichuan ka nau ten school an chawla Kristian te hun pui ber Christmas in urlawkna chu vengtinah a kal mup mupa,keini unau pawh Thansanga hovin bazar kan tum.
Kum thar lamah eng nge kan hmachhawn dawn kan hriat avangin kan hun neih a tam thei ang ber chu hmandun kan tum a ni.




An car a kenga,ka nau te pahnih chuan nuam an ti khawp mai. Kan eitur zawng zawng a tum vek hnuah kan unau chuan thil min lei theuha, ka inthlahrung zawk. Sawmtea tan silai eng nge a hming pawh ka hrelo lian zet mai hi a lei saka, Pekkima erawh a fing ka tih kha Pheikhawk ₹1500 lai kan pawisa chuan lei dawn ila engtikah mah kan leilo ang tih tur chu a lei sak bawk.




Kei erawh, thi mawi tak leh t-shirt pakhat min lei thung. Thansanga nena kan inkawm hi mi thenkhat titi na atang sum vang tia lo sawi, an awm tih ka hria. Mahse, sum vanga ani hi hmangaih ka ni lova,ka dinhmun chhiat leh that lai ber pawha ka tana awm reng thin a nih avang zawk in a ni ka hmangaih.




"Hetianga kan unau tana sum i seng vak vak hi nuam ka ti miahlo ania" dawra kan chawlh lai chuan ka deuh hmuk.




"Keiin nuam ka ti alawm, thei phei ila chuan hetianga rim taka hna i thawh tawh loh nan hian ruk daih che ania ka duh. Mahse, ka hrechiang che a hna ka neih hma chu pasal tlakah min ngaidawn lo tih leh i chhungte hi i hmangaih tih nen. Chuavang chauh chuan ka la enliam rih mai mai che a ni" a ti kual deuh duaha engmah ka sawi ve duh tawh lo.



(Chapter hmasa ber a nih manah lo comment ve vek ru😁. Chuan story hi zan khat dan tur a ni tih kha hre vek bawk ila.)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)