SO FAR AWAY chapter-17 by Melis Hmar

Episode kal lai dah luhna

Moderator: writers

Melis Hmar
Posts: 28
Joined: May 3rd, 2022, 6:30 am

SO FAR AWAY chapter-17 by Melis Hmar

Unread post by Melis Hmar » July 4th, 2022, 9:47 pm

SO FAR AWAY


Chapter-17💫

By
Melis Hmar



" Morning " Choka ka luh rual chuan a lo ti var a.

" Morning " Za lo deuh chuan ka nuih a.

" Vawin chu dawr i kal theihlo tur thu ka hrilh tawh a, kal kher a ngai lo ang" Coffee min lo pek pah chuan a ti a.

" Nizan i mu tlai bawk nen, kal lo mai rawh " Ka tawng hma chuan a rawn ti leh a. A mah chu chik deuh in ka en tawp ringawt. A mood lah chu a that hmel em em leh nghal.

" I zin na chu a nuam em? " Coffee chu ka lem zeuh a.

"Nuam ve pangai a ni mai, awm ve la chu a nuam lehzual ang " Tiin min lo nuih suk a.

"Nangmah in mi hotel ah i thlen? "

" Keimah in ni chuang lo e, ka kalpui te nen kan thlenna a in ang vek, mahse room a hran " Ngaipawimawh lo zet in a ti a.

" Tu tu nge kal che u a? " Ka la ti ta talh a, Cindy-i kal ve leh ve loh ka hre duh.

" Kan hnathawk te pahnih nen " A ti leh mai a, Cindy hming a sawi lo chu a mak ka ti zawk khawp mai, nge a ni hian thup a tum zawk.

" Cindy a kal ve tih i sawi tel lo a " A mah en ran chuan ka ti a, min rawn en ve vat.

" A kal lo a lawm" A ti leh mai chu awih lo zet in ka ner suk.

" A nih hei hi enge? " Ka phone a thlalak chu hmet chhuak in a hmaah chuan ka lehk kang a. A thaw chhuak hawk.

" Dawt min hrilh kher a ngai hlei nem, tha deuh in a kal ve thu kha sawi la pawi ka ti reng reng lo" Ka aw ki pawh a sang tawh viau, a kal ve tih a zep kher kha ka thin a ti rim tlat.

" Kan rual chuan a kal lo a lawm , kan thlenna hotel ah khan a lo awm sa tih kan hrelo hrim hrim" A thusawi chu awih ngei se tih melh in min melh.

" Chuan room khat ah in cheng dun ta a " Ti el deuh chuan ka ti a.

" I ngai ang kha eng mah a thleng lo" A ti chhuak hrawih a. Ngeiawm zet in ka thaw hawk.

" A room shower a hman theih loh vangin ka room a mi shower a rawn hmang a nih kha " Tak run in a ti a.

" Chu chu ka awih i ring a mi? " Ngeiawm zet in ka ti chhuak a.

" Dawt ka sawi lo ka ti tak tak "

" Nia... Nangni chu in inhriat na kha a rei tawh a, inzawmna pawh in lo nei thuk tawh a " Ti el zet a ti in ka room ah ka lut hmak. Thlalak min lo thon tu no kha hmet chhuak in ka call a mahse a la thei miah lo, Cindy bak rinhlelh ka nei lo. Henu hi duh ai in a kal thui mah mah, ka ngawi mai mai bik hauh lo ang.


Dawr ka kal lo laklawh bawk nen ninawm duh tak a ni, min biak a tum reng a , a thilsawi ka ngaithla peih lo chu ka pehhel reng a ni deuh ber mai.

" Sawi tha ang... " Choka atang a ka chhuak tur chuiah chu ka hma ah tak a rawn ding. Chhanglo a kalsawn ka tum pawn min dang zel bawk nen a tawp ah chuan ka ' aw' hram.

" Sawi rawh "ka ti deuh hmuk.

" Engmah kan inkarah a awm tawh lo, duh ilang chuan a hma daih tawh khan a bulah khan ka let tawh ang " A ti charh a.

" Kha kha kan thu khel lai a ni lo" Ka ti leh hmuk. A hmai a tuai zui puat a.

" Ka room ah shower hmang tur bak in a lo kal lo, a hman zawh in a chhuak leh nghal, chuan kha thlalak kha a lak lai pawh ka hre lo" Ngenngawl zet in min en a, a hmelah chuan dawtsawi lo ziah pawh a hriat theih.

" Tinge i roomah kher? Hotel a hnathawk te pawh a hrilh theilo mi? " Ka la ti tal.

" A hrilh a lawm mahse khawvar hunah chiah a siam tu te an lo kal thei dawn chauh tih an sawi a"

" Min ring rawh " Ka biang tawn tawn ah vuan in chiang zet in min en a.

" Nangmah bak duh ka nei lo, min ring tiraw.... " A tih chuan ka lu ka bu nghat. A han insawi thiam leh tak tak chuan ka awih leh vek tawh.

" Ka hmangaih che! chu chu ringhlel ngai suh " Tiin ka hmuiah a rawn fawp a. Ka khi ver ver tawh, min hmangaih thu a sawi miau a lawm.


Room a awm hlan in cup noodles a awm loh lai a ka lei chu ka siam a, ka ei lai tak in a rawn chhuak a, choka a rawn pan nghal vat.

" Khatiang thil hrisel lo kha ei ziah suh " A ti deuh nghut a. A hma pawn min hau tawh a hrisel lo a ti tlat.

" A tui a lawm" Ka la ei lui zel tho.

" Thil tui ringawt hi a tha ber chuang lo, i riltam chuan ei tur siam mai tur lawm, kha tiang ei lo khan" A ti nuah nuah a, a hmuh loh lai in ka hmui ka ti pawrh vak.

" Paih rawh, eitur ka siam ang che " Ka thil ei lai rawn ban a tum chuan ka lo la sawn vat.

" Ka ei zo tep , ka ei zo law law dawn " Ka la ti ve talh chu hahthlak min tih hmel zet in a thaw hawk.

" Kha bak kha ei tawh suh ang che " Thu pe aw deuh in a ti nghal. Ei tur a siam zui mawlh mawlh a.


.
.
.
.

" In hmuh a va khat ve " Dawr ka luh hma chuan a bike in ka sirah a rawn ding chat.

" Tinge i hmai te chu" A hmai a pem leh dûk chu ka en kual a.

" Nopang ho nen kan han infiam lawk a nih hi" Ngeisam hmel zet in a hmui sir pilh chu a tawk zeuh a .

" Pangai tak te hian awm tum ve rawh " Kan ti ve thawr a.

" Ka pangai lo mi? I hriat kha hei ai a pangai a awm tur in tumah min zirtir tu tur ka nei lo tih chu" A ti ban charh a.

" I pa nihna tal hi hre ve la, a tan harsatna siam sak lo hram tum rawh" Ka tih chuan ho tih hmel zet in a then suk.

" Heng te hi chu a tih ve tur a lawm " A ti leh mai a. Tawng leh ka tum lai tak in ka phone a rawn ri a, ka chhang nghal vat. A thu rawn sawi chuan min thawng hi a ni tawp mai, ka phone ken lai chu ka thlauh lo chauh , ka tlu tur chu a bike atangin a kut pakhat in ka banah min rawn vuan hman hram.

" Tinge, thil thleng a awm mi? " A tih chuan a mah chu ka en a ka hmu phe vek tawh.

" Tun... Tun mai khan ka u in min kalsan chiah! " Ka mittui a rawn baw hawk.

" Ka u, ka u... " Mi â ang mai chuan ka phun sep sep a.

" Chuang rawh a awm na ah chuan ka hruai ang che" A ti ve thuai a. Chuang sawk sawk in hmanhmawh deuh in a tlan chhuak a . Kan tlan lai chuan, ka rilru in ka tawngtai mawlh mawl, an thu rawn sawi kha ka la awih hlawl loh vang a ni.

" U min kalsan thei lo nia, lo tuar tang tang rawh, ka lo kal min lo nghak rawh " Ka rilru chuan ka ti mawlh mawlh, ka mittui pawh ka dang seng lo.

HOME kan thlen chuan an lo ding khawm luih a, ka tlan phei phawk phawk a, ka u awmna chu ka hmuh hmasak ber pa chu ka zawt a, room pakhat ah chuan min hruai a.

Ka u chu min nung a ni tawh lo tih hriat tak hian khumah chuan a mu a, a taksa te chu a dâng vek tawh, mipa pathum vel in ka u ruang chu an lo buaipui a, ka u ruang bul a awm ve then khat pawh an lo in hnit ve feih feiih mai. Pan hnai in ka u chu kuah chungin ka tah khum ta nghek a.

" U, tinge ti hian i tih bik a, i sual khawp mai, hna ka zawng a nga kan cheng dun ang ka tih kha " Tap hawm hawm chung chuan ka ti a.

" U min ngai ve miah lo mi a? Mawh.... I nau ka lo kal hi, min en la a hma ang khan min fiam leh bawrh bawrh ta che, tinge i mut reng a " Ka u chu ka en ngawt ngawt ringawt.

" U min khawngaih ve lo mi? Tunge ka belh tak ang? in vai in min kalsan a , tuman min ngaihtuah ve miah lo nih hi . U i lo chhuah hun ka nghahhleh zia te hi i hria em? Mahse hei hi maw kan inhmuh leh dan chu " Ka u ruang chu ka kuah bet tlat, a taksa te chu a cher in a hrisel loh hmel ngawih ngawih.

Ka u khan a thih hunah chuan he mi HOME ngei a thlah liam a duh thu a lo sawi tawh vangin HOME ah chuan a vui na hunserh te pawh kan hmang vek a , hunserh hman hma in Ricco pawh Hmingi nen an rawn lang a, ka hmanhmawh lutuk na lamah engmah chanchin pawh ka hrilh hman ta lo kha a ni a. Nuni leh lawmsanga pawh ka hmu ve nawlh mai. Ka patea te nupa erawh an hmelh hmuh tur an awm lo.

Ka u chuan ûi tu a ngah khawp mai, a awmpui te pawn an ngeinat thu leh a rilru that thu an sawi ve mawlh mawlh a, an sawi dan in ka U hian natna benvawn a lo nei reng chu ni in , min hrilh lo tur in an hotu te pawh a lo hrilh thlap chu ni in!! A mah ka khawngaih na leh ka huatna chu a inzat vel ang.

Thlan lam kan pan dawn chuan mipa pakhat hian lehkha hi min lo pe a ka U in ka ta tur a a lo tih a ni awm e.

" An vai in an inhmu khawm tawh ngei ang" Ka Nu , ka Pa leh ka u thlan in tlar thla pût chu en in ka ti sep a. Riccoan ka darah a lo chelh vat. An haw deuh duak tawh a kan pahnih chiah in thlan ah kan awm tawh.

" An sual khawp mai, min ngaihtuah ve miah lo, mahni a awm tur in an vai in min kalsan bik a" Tham chel chuan ka ti a, ka mittui a rawn baw nghal hawk bawk. A lam hawi zawng a min kuai her in a awmah chuan min kuah bet a. Ka theih tawk a ring chuan ka tap nghal hawm hawm a.



In kan thlen chuan ka zawi hnawk thei, ka tap nasa bawk nen sofa ah chuan ka thu a ka melh ngai ka melh char char. Riccoan tui min lo pek chu ka in khawlh khawlh a, chaw ei tur a min tih chuan ka ei peih lo thu in ka chhang vat. A ni pawn a theih tawk in min ngaihtuah a, vawin ang ah te hian awm lo ta ang se chuan ka mal dan tur hi ka sawi thiam lo zawk.

Ka inbual fai hnu chuan ka room ah ka inkhung tlat a, Ricco pawn min rawn tibuai lem lo mahni a awm ka duh a ring pawh a ni mah na. Dawhkan a lehkha te in thlep ka hmuh chuan, ka u in ka ta tur a ziah kha ka hre chhuak zawk. chhuat ah thu in khum ngheng chung chuan ka chhiar a.


" Mate, ka va han chhuang tak che em! Nang ang nau hi ka nei lo ang che tih hi ka hlau ngawi ngawi . I U nih hi ka va han phu lo tak em. Ka hmachhawn ngam loh hun harsa tak tak rawn paltlang in tun dinhmun hi i thleng thei a, ka nu leh pa pawh kha la dam se chuan an chhung ve ngawt ang che.

Ka tihpalh ka natna chungchang engmah ka hrilh loh vang che in. Nikum kum tawp lam khan chuap Cancer ka ni tih kan hrechhuak a, kan han in enkawl ve mawp mawp a ,mahse duh ai in a lo nasa tawh lutuk a tihtheih vak a lo awm tawh lo a, ka thih hun kha ka nghak tawp mai a ni.

I hriat chuan min ngaihtuah dawn lutuk tih ka hriat sa vang in kan hotu te bulah pawh hrilh lo tur che in ka ti a, an mahni lam pawn hrilh tur che in min ti char char a, mahse ka thei thlawt lo ni. Ka pa in min boral san atang khan nun mumal ka zawh lo tan a i tan harsatna leh zahna hlir ka thlen che a, tunah ka natna lehzel hrilh che a harsatna thlen leh che ka duh tawh lo ni.

Ka nu hmel i hmuh ve chak thu i sawi apiang a, ' Ka nu nen chuan in in ang lutuk ' Ka tih ziah kha, ka ti mai mai lo nia. Ka nu chu maw a hmeltha lutuk ka hmeichhe hmuh tawh a hmeltha ber a ni, chuan a dawt chu nangmah.

A tir kha chuan kalsan che kha ka hreh a, mahse tunah chuan thlamuang tak in ka chawl theih tawh. I bialpa khan mo min rawn tlawh thin a sin, a fel in a innghah na tlak khawp mai , kan chhungkaw chungchang i hrilh vek dan ah nang pawn i ring hle a ni ngei ang. Ka farnu naupang te pawh kha tunah chuan pasal nei thei dinhmunah a lo ding ve ta reng tawh mai .

Mate i mal lo a nia, ka nu leh pa te nen kan lo thlir reng dawn che tih hre reng ang che. Chak tak a i awm a ngai tih hria la, chhel tak in awm ang che Mangtha..... " Ka chhiar zo chu ka tap chhuak hawk.

Kawngka bula lo ding Ricco-a chu tap pur chung in ka melh a, min lo pan hnai in a awmah chuan nghet tak in min kuah khawm a.

" A natna pawh min hrilh duh miah lo, min tihbuai a hlau vang in ka lak ah a zep char char a " A awma atang chuan tap chung in ka ti chhuak a. Ka khawngaih lutuk chu ka lung a chhe zual sawt. Rei tawk ka tah hnu chuan ka bulah chuan a thu ve ta reng a .

" Ka u i tlawh thin tih i sawi miah lo a " Kan thut ngawih reng lai chuan ka ti a. A dar ah ka lu ka nghat a , a ni in a kut pakhat in min kuah ran bawk. Min chhang lo in a nui nghawr dat ringawt.

" Tunah chuan keimah chiah ka ni tawh " Ka phun sep a.

" Khatiang in an sawi ngai lo " A lo ti vat a.

" Nangmah chiah i ni lo, keimah min la nei a lawm, mal bik riau ang khan in ngai tawh suh" A ti dam thluam a.

" Ka hmangaih ten min kalsan vek tawh a, nang pawn engtik niah emaw chuan min la kalsan ve tho ang.... " Ka sawi zawh hma in, " Khatiang khan sawi tawh suh, ka kalsan ngai lo ang che " A rawn ti hrawk a, tawi zet in ka nui a. A ni pawh hian kei min hne in hmeichhe dang pawh min la pansan ve thei tlat a ni.

" Ka bul a awm hi chhiatna a ni ngei ang , ka bul hnai a awm ten min kalsan zel mai " Ka ti tham chial a. A mah en tur chuan ka biangah a vuan a.

" Thil ni lo pui pui ngaihtuah suh, kei chuan ka kalsan ve dawn lo che, min ring rawh ,min kalsan a nih ngawt loh chuan kalsan che ka tum reng reng lo " A ti nghet charh a.

" Hetiang hian sawi mah la nakinah chuan min hne hun a la thleng ve tho ang" Ka la ti tlat a.

" A nih chuan inneih ang " A tih chuan za lo zet in ka nui a.

" I kiang a ka awm reng theih nan ka ta ni la, innei ang" A ti leh nghut a.

" Min khawngaih vang a mi? " Ka ti ta daih.

" Kha tiang a i ngai a nih chuan i thu, mahse kei chuan ka hmangaih vang che in neih che ka duh " A ti thum leh dut a.

" Min nei rawh, engmah thildang ngaihtuah suh, min ring la chu chu i tan a tawk, min nei ang tiraw..... " Ngenngawl zet a a tih chuan mittui nen ka bu ta nghauh nghauh a. Hahdam huai hmel a pu zui nghal.
.
.
.

Ka U in min boral san na pawh kar hnih lai a liam leh tawh, thlan ka kal deuh reng a ni mai. Dawrah pawh ka kal mumal thei lo, ka lung a leng em em reng a, ka Nu leh Pa ka ngai zual sawt bawk.

Vawin chu Inrinni a ni a Ricco pawh hna a kal lo a, keimah vang in a hna pawh a kal tha thei lo. Inchhung vel kan tifai a, chhhun thil ei tur ka siam lai in a lo inbual thung a.

" Khawi ah nge Lalhriattluanga chu?!! " Thinrim tak a au ri leh kawngkhar in khar chawr ri in a rual nghal. Choka atang in ka chhuak vat a. Ricco-a Nu chu thinrim tih hriat tak in a rawn lut a, Cindy in a lo ûm thuai bawk.

" Khawiah nge Lalhriattluanga? " Ka hmaah chuan a rawn au vak a. Ka la phu zawk leh nghal.

" Nangni pahnih hian hetah hian in lo cheng dun a maw?! " Min en kar chung chuan a ti leh a, sawi tur ka hre lo chu ka ngawi kar mai.

" Lalhriattluang min va han tizak ve " Ricco-a lo chhuak chu a lo tihkhum nghal buan buan a. A ni pawh a hmelah chuan a hrilhhai hmel khawp mai.

"Henu nen hian in chengdun a maw? " Min rawn kawk deuh sawk a, awm chu nuam lo duh tak a ni.

" Ka nu, henu a ni lo hming a nei ve " A lo ti deuh hrawk a.

" I aw ki kha san reng reng suh, ka duh duh in ka koh ang . Hmani kan lo kal pawh khan ka hmuh hnu i ang ka ti reng a ni" Min en pah chuan a ti zui hlak hlak a.

" Cindy hmani kan kal pawh khan an cheng dun tih hi i lo hre tawh ni maw? " Cindy bul ah chuan a ti a.

" Nute... Ka tan lo sawi chhuah kha a nuam lo a " Pawi sawi lo ang tak chuan Cindy in a lo chhang a. Ricco-a a lo thaw hawk.

" Cindy in min hrilh lo se chuan in cheng dun tih pawh ka hre dawn reng reng hlei nem " Ricco-a lam chu a en a.

" Lalthazuali hi Hmani khan a lo kal ve tih engvang in nge i sawi lo" A nu thilsawi chu ngaihsak lo in keimah zawk chu min bia a, a aw ah chuan a lungawi loh zia pawh a hriat theih.

" Lalhriattluang kha ti khan Cindy hming lam suh" A nu in a lo ti vin vak a.

" Ka duh duh in ka lam ang, nang nu kha ka hmuh theih ah inlan tawh lo tur che in ka ti che a ni lawm ni" Chang zet in a ti zui zat . Cindy ka va en chuan a hlauh hmel khawp mai.

" Kha ti khan mawi lo zet in mi be tur in ka zirtir che mi? " A nu bawk chuan a lo ti leh a, a ngaihpawimawh vak hmel loh.

" Ka nu i lo kal ta sa sa, ka hrilh nghal mai ang che. Melody nen hian inneih kan tum " A ti leh nghut a, a thilsawi chu sawi hun ka ti lo takzet, ka mit in ka va khap a, a hrelo der hmak.

" Tu... Maw.... Enge i sawi kha i hria em? " A nu chuan a ti halh a.

" Ka hre chiang khawp mai " A lo ti leh nghut.

" Thil atthlak pui pui sawi lo khan rawn haw ang che, nangpawh in inah lo va haw rawh " Awki pangai deuh a ti in min en a. Haw tum a an in her tawh chu, " Melody hi ka phal na lo chuan a chhuak lo ang" A la ti talh. A nu chuan a en vat a.

" Luhlul chuah lo khan ka sawi ang chuan awm mai rawh " An nufa tawng chu Cindy nen ngawi reng in kan lo en a ni ringawt, mahse kan hmel lan dan erawh a in ang hauh lo , a ni hmel chu nuam tih na leh chan tha zawk chang tih in hriat ngawih ngawih hmel a pu.

" Nankinah ka pa pawh kan la rawn hmu ang " A lo ti let hmak .

" A tha lawm, i pa in a pawm i ring a mi? Kei chuan Cindy lo chu mo a neih ka tum reng reng lo" Tiin an chhuak hmak a. An chhuak ta chu ka thaw nghal kawk thei.

" I thilsawi kha a hun lo e mai, i nu a thinrim em kha" Ka ti halh a.

" An la hre dawn tho tho a, tikhan a lo hre lawk a ni mai " A ti bung nghut a. Hahthlak ti deuh in ka melh tawp.

" I nu khan mo atan min duh lo tih kha a sawi ching bawk sia, inneih kha kan sawi that leh a ngai in ka hria " Ka tih chuan min melh no lo khawp mai. A nu ber in a min duh lo chuan ka tan a nawm lo dan chu pui tak a ni.

" Sawi that a ngai lo, ka nu chu a rei a nga a zia ve mai ang Lalthazuali khan a thluak a la suk sak hneh lutuk a nih kha " A ti leh mai a. Sofa ah chuan thu in a melh ngai a melh run a, a hmelah chuan a lungawi loh hmel ngawih ngawih.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)