THUTIAM CHAPTER-19 By : Tom Tom Putara

Episode kal lai dah luhna

Moderator: writers

Tomtomputara
Posts: 159
Joined: December 3rd, 2021, 1:17 am

THUTIAM CHAPTER-19 By : Tom Tom Putara

Unread post by Tomtomputara » July 4th, 2022, 11:05 pm

THUTIAM
Chap~19




By : Tom Tom Putara






In ka thlen hnu pawh chuan ziaawm lam pan a hnêkin ka Luhai chu a zual tulh tulh ni mai hian ka hria. In tihharh ka tum viau na a, ka intung peih ngang lo a ni ber e. Ka chhungrila khûr ru der der awm chuan min ti hlauthawng zual bawk a. Ka taksa chak tawk loh vang anih ka ring thla deuh ngawt bawk.






Zanriah pawh ka kîl peih loh tak hial ah chuan Nu Rinpuii chu a ngaih a ṭha thei thlawt lo. Ka nu pawh a va hrilh thuai a. Hetiang anga ka awm ngai loh thu a lo hrilh zel takah phei chuan a hlauthawng zual a. Pa Biaka phei chuan Damdawiin lama min kalpui thuai turin a rawn ti nghe nghe.






Kan ṭhenawm lawka awm, Pa Biaka nau fapa Rindika chu a ko ta nge nge a. Damdawiin lama kal chu an ti thlu ta nge nge e. Kei chuan engmah chu ka peihlo vel vek a. Ka ṭawng peih tawh lo a ni ber zawk a. An thusawi chu ka ngaithla kar thung. Nu Rinpuii chu a phi cheng a, a ṭawngkam leh khawsak dan ah chuan a hlauthawng ru hle tih pawh ka hrethiam mai.






Pa Biaka lahin râlkhat aṭangin a rawn tur sek a. Rindika chuan min kuahchhuak a, ka meng ngam lo hrim hrim. Ka luak a chhuak hlûi bawk a. Damdawiin lam min panpui lai pawh chuan luak chhuak leh Luhai chuan min bawh hneh viau bawk.






Doctor-te chuan min lo endik zung zung a. Hmanhmawh taka Thisen pek ka ngaih thu an sawi chu ka hria. Ka hlauthawng thar hle a, ka hmelah a langchhuak te pawh ani mahna! Doctor-chu ka bulah a rawn kal a, "Mami...engmah hlauhawm a awm lo ania. Thisen i tlachham ve deuh anih hi...i taksa chak loh vang te pawh a ni mai thei ania" a rawn tidam dap a. Ka thla a muang huai a, ka hlauhthawnna erawhin min kalsan chuang miah lo.






Ka thisen milpui kawl sa a awm loh thu an sawi ka hriat chuan ka thin a phu ru det det a. Mahse, Nu Rinpuii chuan Pa Biaka a bia tih ka hria. Hetah amah awm lo mah se rawn tihdan dan a hriat leh mai te ka ring.






Ka la meng ngam chuang lova, muthilh min phal sak hek lo. A khât tawkin Nurse chuan min ko sek reng a. A tawpah phei chuan ka chhâng peih zozai tawh lova, ka harh tih a hriat nan ka lu ka tiche leh ngawt ṭhin a. "Hlimi....hlauthawng miah suh. Thisen i dawng thuai dawn e. I thisen milpui, rawn pe thei che kan hmu hlauh e" Nu Rinpuii'n a rawn tih takah chuan ka thaw deuh huai a. Lawmthu sawi tur erawh chuan ka ṭawngchhuak peih lo.






Thisen thar ka dawng a, damdawi chi hrang hrang ka thisenah chuan an kâplut mawlh mawlh bawk a. Tunah chuan muthilh an phal ta bawk a. Ka mutchhuak lutuk chu ka insûm zo tawh lo.






Ka harh leh chuan zing dar 4 bawr vel a ni a, ka ni deuh chhulh a. Ka hawikual a, Damdawiin Khumah ka lo la mu reng. Ka lu a la hai deuh chhulh avangin ka mit chu ka chhîng leh vang vang a. Nu Rinpuii te hmel ka hmu miah lova, ka mutna Khum bawha muhil chu tunge anih ka hre thei hek lo. Rindika kha anih ka ring thla deuh ngawt a. A bâk chu in thinharh tum viau mahila ka taksa chaklo lutuk chuan min ṭhâm hneh em mai a, ka muhil zui leh ta bawrh bawrh a.






Thâwm ri deuh hat hat ah chuan ka harh zawk a. Khua a lo êng chiang tawh hle mai. Ka Khum bawha muhil kha ka en thuai a. A lo awm tawh lova, ka hawikual deuh ngial a. Ka chhungte hmel awm reng reng ka hmu lo. A ngaihna hrelo zetin ka meng phelh phang a.






Ka bula Damlo awmpuitu te ho chu an awm tlâng rei ve tawh tih hriat zetin an infiam bawrh bawrh hlawm a. Tumahin min be lova, min melh hrek hrek hlawm vek ni mai hian ka hria.






Ka mit chu ka chhîng leh vang vang a, ka mutna bula rawn ri khat khat chu ka en a. Ka va phu chiang tak... Ka mi ngei ruk em em, mipa chapo tak 'Ruata' an tih ngei kha a ni. "I lo harh tawh maw? I mutui hle mai" tih pahin eitur hrang hrang a rawn fûn luh chu a remfel mawlh mawlh a.






Mak ti tak leh lungawilo zetin ka melh reng a. A zawhna chu pakhatmah ka chhâng lo. Ka mutna bul chiaha Damlo, pa upa ve tawh lam chu a be mawlh mawlh a. Eitur te chu a pe ṭhen zui ve nghal a. Chu pa lah chuan lawmthu a lo hrilh mawlh mawlh a. A fanu ni ngei tur pawh chuan inthlahrung takin lawmthu a lo hrilh ve bawk a.






"I farnu nge i nupui?" damlo putarin a tih rual chuan keimah pawh min en miahlo chungin, "Ka nupui" a lo ti vat a. "Engnga!!?" aw thâm chhalhin ka lo ti ve thuai a. Putar leh a awmpuitu, hmeichhe tleirawl chuan mak tih hmel zetin kan pahnih chuan min thlêk tawn sek a. Ani erawhin a ngaih pawimawh loh hmel em em leh nghal. "A nupui ka nilo ania" ka tih leh lai chuan Ruata chu a nui huk a. Kan bula damlo mu te putu erawhin mak an tih hmel zual sauh bawk.






Ka bula rawn ṭhut pahin, "Engnge i ei chak? Ka lo siamsak ang che" a rawn ti su su a. A zawhna chhâng lo zetin, "Engvangin nge i rawn kal ve ngawt a?" ka lo ti ram hmak thung a. "Khawiah nge Nu Rinpuii te?" ka ti zui nghal hlak a.






"An rawn kal ṭep ang" ti ringawtin min chhâng a. "Eng emaw tal ei rawh aw? Ei chhiat lutuk vanga Thisen hloh, Thisen pek ngai i nih kha a zahthlak viau ania" nui huk huk chungin a rawn tizui a. Ka insehruh nasa tawh, ka thinrim zia leh lungawi loh zia chu ka awmdan leh hmelah hmu ngei se ka tih em avang chuan theihtawpin ka tilang rêng bawk a.






Bawnghnute chu No ah a thlizui karh karh a. "Nula ei chhe Thisen hloh" tih pahin No chu min pe a, ka Lu chu ka thle sawn a, ka mutna sir lehlam chu ka hawisan hmak a.






"Engmah i ei loh chuan i chau tulh tulh dawn ania. Eng emaw tlem tal ei rawh" rawn tih pahin ka kutah a rawn chelh a. Rang takin ka lasawn thuai a. A mitah tak chuan ka melh ngar a, "I haw thei tawh. Ka ngaihtuahawm loh" ka ti bung deuh nghat a. Mahse, ka thinrim rûk em avangin ka sawi tum dan erawh a ni bik lo. "Tak takin, zuk chhuk tawh rawh. Ka ṭha ania..." ka tizui leh a.





A ngawi vang vang a, "Lawk aw..?" tih pahin a chhuak zui nghal a. Rang takin, "Ka pu...ka pasal a nilo ania" ka va tizui thuai a. Chulai Khum a damlo mu chuan mak tih hmel zetin min en reng a. A tunu chuan, "I pasal turah kan lo ngai ngar ngar asin" chu mihring nena kan inkâr chu hriat an châk hle in ka hria.






Chu pa chanchin chu ka hriat ang ang hrilh vek ka rilruk lai chuan a rawn nui lut vur vur a. "I nu Rinpuii a rawn kal chiah anih chu..."a rawn ti lut a. Engtinmah ka chhâng lo, damlo dang mutna lam hawi chuan ka thle sawn zui leh nghal daih a. "I damṭhat leh veleh i mamawh tur eitur ṭha apiang ka leisak dawn che nia. Tunah chuan a awm ang ang hi tlem tal ei phawt rawh. Taksa chak i mamawh ania" a rawn tih pah chuan a nui hul hak a.






"Haw rawh" ti ringawtin ka chhâng a. Engtinmah min chhâng lova, keipawhin engmah dang ka sawi zui hek lo. "Anih leh...lo dam thuai ang che" a rawn ti nghut a. Engtinmah ka chhâng chuang lo. A indap that that a, ngawi rengin a chhuak zui ta nghal a. Ka thaw deuh huaiin ka hria...






Ka ngaihtuah zui neuh neuh a, chu mipa chapo zet chuan engvanga min awmpui ve ngawt nge anih? Pa Biaka te chhung hnaivai tak anih te ka ring ta deuh rum rum mai. Mahse, he mihring nen hi chuan kan in hmelhriat ṭan dan a fuhlo laklawh tawh a. A hmel ka hmuh phat aṭang khan ka haw leh nghal em em kha a ni si a. Keimah ber pawh chu ka in hrethiam lo lek lek mai. Natna Khum a mu, engmah tih theih nei hrih lo chuan duat tak leh a thiam ang tawka enkawltu chu engvanga haw tlat nge maw ka nih?






Nu Rinpuii chu a rawn nui lut var var a, hmanhmawh zetin a rawn pên phei sawk sawk bawk a. Ka Khum bula ṭhutna ah chuan a rawn ṭhu nghal thuai a. "I lo ṭha maw? Min ti mangang lutuk alawm" a rawn ti nghal sawk sawk a. Ka lo nui sak ringawt a, ka rilru ah erawh zawhna tam tak ka nei thung. "Khawiah nge Lalruata hi?" tih pahin a hawikual zak zak a.






"Engvanga kha pa khan min awmpui ngawt nge anih a?" ka lo ti bung deuh nghat a.





Nu Rinpuii chuan chiang takin min en kal a, a nui sâng thung. "Keimahin riahpui che ka tum a. 'In lam an ngaihtuahawm... Naupang an la tê si...zuk haw thla rawh. Keima'n ka lo awmpui ange' a ti tlat pek alawm" a lo ti thuai a. Nui deuh hak chungin, "Chu...ani awmpui kha i duh vak nange?" a rawn tih zawm zat a.






Ka mutna chu ka siamrem hret a, ka in tawlh rem hnu chuan, "Mi chapo lutuk anih kha...engtia ka chanchin te lo hre ve nge maw anih le? Ka harh hlawt a, ngeiawm takin min lo ṭawngkhum leh hman hram kha..." lungawilo zetin ka tizui niah niah a.






"I pa Biaka'n a lo hrilh a ni awm e" a rawn tihlai chuan, "Hmmm...ani hrilh kha a ngailo chiang em mai" ka lo ti nghat a. Nu Rinpuii chu a lo nui suk a, ka nuih lah chu a za ve lo nasa mai bawk si.






Ka mutna sira putar mu chuan kan lam a rawn hawi a, "Tlangval ngawi chawi tak kha anih hmel a. Mahse, i rawn harh chiah aṭang khan a mizia a danglam vek a. In inpawh hle ni turah ka lo ngaih nen.." a rawn ti ve nulh a. "Nizan chu ka mu ṭha thei meuh lova, ka meng reng a, a kalsan miah bawk si lo che a. A meng reng a, a en reng ringawt che a. Ka biak lah khan a rúl tâwk bakin min chhâng bawk si lova" a rawn tizui leh a.






Nu Rinpuii chuan, "Thisen pek vat kha i ngai sia. Ruata kha a rawn kal hlauh a, in lo inmil chiah nen a pe thei hlauh che a....a lawmawm tak tak a ni" a lo ti ve thuai a.






E khai leh! Ka rin loh lam hlir thu ka dawng ta mai chu ania. Ka huat em em, min kalsan a, hâw tura ka tirh khan ka nunna a chhanhim a ni ber anih chu! Chutah, amah ngeiin min la ṭhut tlaivarpui zui ania. Ka inthiam lo ru viau a, a chapo lutuk vanga ka ngei rûk deuh erawh a reh nghal duak chuang miah lo.






Nu Rinpuii chuan a Bag-rawn ah puar luah chu a hawng a, a thil ah ho chu a phawrh nghal zung zung a. "I ei peih loh pawhin Ruata tal kha chuan a ei peih ka ring maw le... A lo va haw daih ka ring lo bawk nen...." a ti mawlh mawlh a. "E taka, nizan khan i phone kan ken theihngilh a. I nu pawhin a rawn be ngun maw le.. Kha.....i be peih angem? Râlkhat aṭang chuan in ngaihtuah a na duh viau ania" rawn tihzawm pahin Phone-chu min rawn pe nghal a. "Ka be lawk ange" tih pahin ka hmet zui nghal mawlh mawlh a.






"Aw....hello...Bawihi..engnge i an? I ṭha em?Tunah khan engnge i an? I ziaawm deuh em?" hlauthawng aw hai rual loh chuan a rawn ti nghal sawk sawk a.





"Nu...engmah hlauhthawn tur a awm lo ania" ka lo ti thuai a. "Tunah phei chuan ka Luhai pawh a ziaawm tawh lutuk" ka ti zui leh a. Ka nu thaw deuh halh ri chu ka hre pha.






"A va lawmawm ve aw.... Pathianin ka ṭawngṭaina a ngaithla anih chu" a rawn ti dam diam a. "Anih leh Mami...duhtawk hrih phawt ang aw? Awm hahdam tum rawh. Nakinah kan inbe leh dawn nia" a rawn tizui leh a.






"Awle...rilru hahdam deuhin lo awm rawh. Ka ṭha lutuk ania" ka tih hnu chuan kan inbiakna chu kan titawp zui ta nghal a.





Doctor-in min rawn endik a, ka dinhmun ṭhat chakzia min hrilh chuan ka lawm hle a. Mahse, zan khat tal min enthlâk hrih an la duh avangin min chhuahtir phal ta chuang lo.





Pa Biaka chuan min rawn ngaihtuah hle mai a. Keimah tak chu min rawn be lo na a, Nu Rinpuii nen chuan an inbe deuh reng thung. Nu Rinpuii chu In lamah a la chhangchhiat deuh avangin min riahpui a remchang chiah lo deuh bawk si. Rindika chu a bia a, a in huam viau na a, keimah ber chuan kan la innel lem loh avangin ka huphurh ang reng viau.





Min hawsan dawn thlengin min ṭawng thlamuan mawlh mawlh reng a. An nupa chungah hian vuina tur ka nei lo chiang viau bawk. Ka ngaihtuahawm loh thu te, awmpui kher ka ngaih loh thu te chu hrilh nasa viau mahila Nu Rinpuii chuan a remti ngang ta si lova. Rindika lah a rawn thleng chawpchilh mai bawk si nen...kan in vai liam ta nge nge a.





Zan mut hma zawng pawhin Rindika nen chuan kan inbe tam lo hle mai a. Ka mi nel tawh te a ka rîk bawrh bawrh ang hi ka ni lo leh nghal. Rindika lah mipa ṭawng tlem lutuk a lo ni bawk nen...sawi tur kan haihchham dun viau mai.






Ka rilru ah zawhna tam tak a rawn piang a, keimah leh keimah, thutlukna felfai awm mang si lovin ka inzawt kual sek a. Nizana min rawn riahpuitu kha engtia Pa Biaka te chhungkua nen hian inpawh em em nge an nih ang? An ni pawhin ring ngamin a kutah min dah ngam sak chu a ni lawi bawk si. Ka ngei chi, a mizia ka tih theih loh em em chi chu engang chiaha an nel nge ni ang? Chung zawhna chu keimah ka inzawt a, ka ngaihdanin ka inchhâng zui mawlh mawlh bawk a.






Damdawiin aṭanga ka chhuah hnu pawhin Dawr lama kal an la phal mai lova. Akimi te ṭhiandun pawh ka ngai lek lek ta mai. Message-kan inthawn reng hlawm a. Anni pawh an buai viau a, Pa Biaka rawn haw nen, bungraw thleng thar buaipui an ngai bawk nen tlawh pawh min rawn tlawh hman ta chuang lo.






Kâr hnih chhung ngawt In lamah ka awm a. Ka damṭha tawh ver vawrin ka hria. Pa Biaka te nupa chungah chuan lawmthu sawina tur ka ngah hle mai. An fanu tak tak ang maiin min ngaihtuah em em a. Chaw ṭha tinreng min hlui a ni ber e. Ka nu nen pawh kan inbe deuh reng a. Rawn tlan phei a tum deuh ut ut hman na a, ka ziaawm chhoh leh tak em avang chuan a rawn ṭhulh leh hram chauh zawk a ni.






Pa Biaka chuan, "Hlimte...a hrim hrimin Ruata hnenah khan lawmthu i sawi tawh em? Nangmah ngeiin lawmthu hrilh ve hrim hrim la a ṭha ang" a ti dap dap a. "Doctor Malsawma ka rawn biak khan, 'Tlangval khan Thisen kha pe nghal lo sela chuan in nau dinhmun kha a chhe viau mai thei' a rawn ti hial asin" a rawn ti zui leh a.





"Nia...a lawmawm khawp mai. Mahse, lawmthu sawi dawn pawhin biak pawh ngaihna ka hre hlei nem.." ka lo ti ringawt a.





"Nakinah ka rawn thawn dawn che nia...i hman remchan hunah i lo va be dawn nia" tih pahin a tho a. A phone ri mek chu a melh a, pindan lamah a lut zui ta nghal a. Kei pawh ka thil ziahlai chu ka chhunzawm mawlh mawlh a.






Khumah chuan ka mu a, ka phone a Pa Biaka number min rawn thawn chu ka en reng a. Biak ṭan dan ka thiam loh bakah, ka zak ve deuh bawk si. Khati khawp khan ka ṭawngkhum a, ka hawtir hial a ni si a. A lo thinrim viau angem?





"I mu tawh em? Min hria em? Hlimi..." tih zawng chu ka thawn a, ka nghak ta vang vang a.



Ka phone ri ri ṭang chu ka en thuai a. "Mu lo deuh...i ṭha zel maw?" tih thu ka chhiar zawh rual chuan ka thaw deuh huai a.



"Ka ṭha zel e...i zarah..."



"Khaiii.... Keia zar ni lah love... Pathian vang anih kha"



"Ni tho a, nang awm lo la chuan tun hi ka thleng lo mai thei asin"



"Pathian remruat ania nge...."



"Tak takin...ka lawm takzet ania. I rawn len leh hmasak berah eitur ka lo chawi ve tawh ange" Nui lai lem chiahin min chhâng a, "Engnge i nuih rik ngawt? Pawisa ka neih ve lai alawm" tih ka thawn zui a.



"Awle..." a rawn ti leh ringawt a.



"Ka duhtawk san dawn che...min biak hne hmel em mai..." ka fiamthu lo. Min chhân danah chuan min be peih vak lo tih ka hrethiam ve alawm.



"Chutiang lam pawh a ni lo...ka buai pah lawk a"



"Anih chu!! Anih....remchangah kan inbe leh dawn nia" ka ti ve thuai a.



"Awle" a rawn ti leh ringawt a. Ka lungawilo ru viau na a, engmah phei chu ka sawi ri chuang lo.





Zankhua in thil awmdan chu ka ngaihtuah neuh neuh a. Bawihtei ka ngaihtuah chhuak leh thuai a. Ka ngai thar leh vawng vawng mai. A pa, Zuala pawh ka rilru rawn luahtu a ni zui chat a. Ngaihtuah tum lo viau mahila Bawihtei ka ngaihtuah chhuah apiangin rang takin a rawn lang zui ve thuai ṭhin.





Zuala chu ka rilru aṭanga paihbo tum viau mahila Dawr ah pawh khan a rawn luh nawlh ka ring ṭhin a. Nilengin chu hun chu ka thlir ru fo a ni si a. Theihnghilh tum tawh lovin ka taksa leh rilru in hnaih loh tum zawk ila a awlsam ber ka ring tawh zawk.





Zing thawh hma ka ngai, Dâwr a thlen phei ka rilruk tawh avangin mut hma ka ngai tih ka hria. Muthilh ngei tum chuan ka in siamṭha zui sat sat a.





Chaw eilaiin Pa Biaka chuan, "Vawiin chu kal i tum ṭalh a maw?" tih pahin min rawn melh rulh a.





"Ummm..ka va kal tawh ange. Ka damṭha tawh alawm. Chubakah, i bungraw hawn thar te pawh ka hmuchak tawh hrim hrim bawk a" ka lo ti thuai a





Ka damloh laia a mangan zia te, Ruata a be thei hlauh a. A ai lo awh tur te, thisen pek ka ngai tih leh Ruata'n min pe thei a lawmzia te chu a sawi mawlh mawlh a. Ka rilru ah zawhna tam tak a lo awm a. Mahse, khati khawpa Nu Rinpuii bula ka sawichhiat kha ngaihven tak anga lo zawh leh vel ka ngam chiah si lo. Nu Rinpuii hriatah phei chuan ka zawt duh teuh lo mai.





Dawr ka thleng chiah chu Akimi te pahnih chu an lo lawm kher mai. An thiam ang tawkin min lo lâwm der ve em em a. A la hma deuh a, min dâwr tur an awm lo bawk nen kan pathum chuan kan ri ve laih laih a.





Ruatfeli chuan kan bungraw thar leh a man zat te, chipchiar leh felfai takin min hrilh hre zung zung a. Ka ṭhutna a ṭhut pahin, "Hmanni ami ngeiawm zet kha a rawn kal leh tawh em?" ka ti zauh a.





A rawn la kal loh thu min hrilh rual chuan, "Kan thil neihsa ṭhing kha a ti ropui sia, a rawn lei leh daih tawh ang chu ka lo tia" ka tizui zat a, ka nui hul hak a. Engtinmah min chhang lo.





Pa Biaka pawh a rawn lang phei zuai a. Lehkha pawimawh hrang hrang chu min hrilhfiah mawlh mawlh bawk a. An ṭhianpa damlo kan a duh avangin min chhuahsan zui leh ta nghal a.





Tlai dar 2 a ri ṭep tihin mipa pakhat a rawn lut chhat chhat a. Ka hriat tawh ngei kha a ni ngei e. Mahse, vawiina a rawn lut erawh a zia a dang kher mai. Min en lova, ngawi rengin kan thil thar chu a enkual dan dan a. Akimi nen chuan an inzui deuh a. Zawi te te in an phun sar sar a. Akimi chu a nui leh sak ṭhin a. Ngaihven loh ka tum pawhin ka melh leh ralh ṭhin. Ruatfeli chuan midang rawn lut chu a lo buaipui nghal thuai a. Ka phone hmeh pahin Akimi te pahnih chu ka melh leh ralh ṭhin a. Nizan maia ka biak kha a ni tih reng reng hriat loh khawpin min rawn ngaihven miahlo nia!






Ka lam panin a thil lei tur chu a rawn pawm phei a. "Heng hi ka lo la ange. Engzatnge ni le?" a rawn ti nghal vat a. Ngawi rengin ka chhût mawlh mawlh a. A man zat ka hrilh rual chuan pawisa min pe nghal a. Akimi chuan a lo pack-fel sak nghal mawlh mawlh a.






"I ṭha zel maw?" tih pahin pawisa kîr ka pêk chu a ak ṭha mawlh mawlh a. "Ka ṭha e..."ka lo ti sap a.





A inher a, kal a tum chiah tihin, "I va hmanhmawh hmel ve? Rawn ṭhu ve phawt la?" ka huaisenna zawng zawng sawmkhawm in ka ti ve ta nge nge a.





A nui suk a, "Ril a ṭam khawp mai" a rawn ti zauh a. Nui sak chungin, "Rawn ṭhu ve phawt rawh. Keini pawhin engmah kan la ei hlei nem" ka lo ti thuai a. Akimi te pahnih chu an lo nui rah rah a.





Ka bulah chuan a rawn ṭhu a, a hmaa ka hriat, mipa chapo hmel tak kha amah ah hian hmuh tur a awm leh tawh miah si lo. Heti tak maia a mizia a rawn thlâk hlawk thei hi a mak ka ti takzet.





"Ka lawmthu sawina kha a thu ringawt ania. Vawiinah eitur lam pang a lawmthu sawi ka la bâ in ka hria" ka tihlai chuan a lo nui suk a. Akimi chu ka ko nghal a, kan duhzawng kan sawi diat diat hnu chuan Akimi chu a chhuak zui nghal a.





"Tak takin...min ngaidam dawn nia" ka ti leh sap a. "I ho em mai...nizanah kan sawi vek tawh kha..." a rawn ti nghut a. "Nia..." ka ti ringawt a. Kan pahnih chuan kan in en a, kan nui dun ta ringawt a.





Ei tur kan ei zawh hnu chuan fiamthu tih tak zetin, "Keimah bawkin ka lo pe ange" a rawn ti zauh a. Ka nghawk salh a, "Ka lawmthu sawina anih kha. Keimah ngeiin ka pe ang" ka lo ti thuai a. A lo nui ang tak vur vur a.






"Ka hmanhmawh deuh..ka phei ange. Zanah i phal tâk leh damlo ka rawn tlawh dawn nia" a ti pah zauh a. Ka lo bu nghat ringawt a, a chhuah pahin Akimi te pahnih chu a fiam pah leh zuk a.





Akimi chuan nui rah rah chungin, "A rawn kal hmasak nen chuan boruak dang ta riau a ka hriat....tiraw Ruati?" a rawn ti deuh kher a.





Ruatfeli lah a lo phûr ngang mai. "Thisen te in pek rawk rawk takah chuan thil a danglam ve bawk ang chu" a lo ti ve vat a.





"In chhe lutuk....engmah boruak danglam a awm lo" ka lo ti thuai na a. Keimah pawh chuan mak ka inti ru viau bawk. A hma zawnga ka ngei ruk em em kha a bula awm nuam ka ti thar riau a. A mizia erawh hriatthiam a har ka ti viau thung.





Zan dang ang chu nise mutzal mai mai ka châk leh viau ang. Mahse, a rawn lan mai beisei chungin thil ṭul lo tak tak ka khawih kual a. Pa Biaka fate hian min nêl viau bawk nen an lehkhazir chu ka chhaih deuh sek a. Nu Rinpuii chuan min nuih leh ringawt ṭhin a. Ka awmdan danglam viau chu mak a ti ru viau bawkin ka hria.





Door bell-rawn ri tlang chu ka lo chhâwn vat a. A rawn luh rualin Nu Rinpuii chu a nui deuh tat tat a. "Lo leng rawh" ka lo ti thuai a. A vawikhat rawn lenna a ni lo tih hriat takin Naupangho pawhin an lo nêl nghal em em a. Pa Biaka pawh a inbual zo a inthlak fel chiah a, ṭhutna awlah chuan a rawn ṭhu ve nghal a.





Sumdawnna lam thil te an sawi luam a, Nu Rinpuii nen pawh a khât tawkin an infiam leh zuk ṭhin a. Nu Rinpuii chuan, "Pa a... Lalruata hi chu a dangdai teh asin. Mi chuan an nakruh bo an zawng a, ani chu a Thisen bo a zawng" awmze nei taka kan pahniha min hmehbel pahin a fiam zuk a. Kan vai chuan a thusawi awmzia chu kan man thiam vek bawk a, kan nui deuh dar dar a.





Thingpuite kan in hova, inpawh takin kan infiam deuh reng hlawm a. Pa Biaka te chuan pindan lamah min luhsan ta diak a. Tunah chuan kan pahnih chauh kan ni ta!





"Ka va haw phei ve dawn tawh ange. Ka lênna te pawh an mu zo tawh a ni ber e" nuih hak hak pahin a rawn ti fiamthu nghal a.





"Min kâwm turin i rawn lêng emaw ka tia... Pa Biaka te nupa kâwm tura rawn lêng i nih chuan an mu tawh ngei mai e" ka lo ti ve deuh kher a.





"Hei...i damlo kan nan ka rawn ken che" tih sup pahin Bawraium leh Nihawichi bâwm chu min pe a, ka nuih a za deuh bawk si. Nuih na chi niin ka hre chiah bawk si lova. "Ka lawm e" tih pahin ka nui sak tho a.





"Eng ber nge i duh ang ka hre mai lova..." a rawn tizui phei chu ka nuih a za zual sauh a. Ka insûm viau na a, a lo hrethiam chiang hle bawk a. "Hei hi ka rawn keng tel bawk a" tih pahin Chocolate-min pe zui leh a. En reng reng pawhin a tlawm dawn lo tih a lang reng. "Ka lawm lutuk e" tih pahin ka nui sen sen a.





"Tidaih ila....ka 'U' dawn che nge...?" ka ti fân raih a.




"Min hmuhdan a zir ni rawh se. Keimah erawh chuan 'U' ka duhlo thung a" a nui suk a.




"Anih chuan...i duh ang zawkin ka ko dawn che nia" ka ti tak na a, a hminga koh fawk erawh ka inthlahrung viau thung.





Ka chanchin chu eng emaw zat a hriat ngei ka ring. Pa Biaka hnen aṭangin emaw Nu Rinpuii hnen aṭangin emaw a hriat tawh ngei ka ring a. Engangin nge min hmuh ang? Nuthlawi, sihhnip deuh hmuhin min hmu angem? Keimah leh keimah chu ka inzawt mawlh mawlh a.





"Tidaih ila...i nu hi amah in a awm tihna nge? Hmanni khan Pa Biaka khan a sawi zuai a" a rawn ti ta chiah rêng a.




"Nia, a khua a har ṭhin ngawt ang" ka ti ringawt a.




"I lungleng hi i lo ṭap ru fo lo maw? Nge, helamah a awm ve zawk?"




"Tu chu maw?" a awmzia hrelo der zetin ka ti vat a.




"I hriat reng kha..." nui vur vur chungin a ti leh ringawt a.





"Chutiang engmah a awm lo. Lunglei lamah pawh an awm chuang lo. Mahse, ka Nu erawh ka ngai ṭhin khawp mai" ka ti zui ve leh vat a. Bawihtei chungchang erawh min zawt anih loh chuan hrilh kher ka tum hran lem lo. "Ani pawhin a ngai viau ang che" a rawn ti ve leh ringawt a.





"Anih...in chhungkaw lam thung? I nu leh pa te an la dam em?" hriat ve ka duh tlat! Nupui neilai, in la tlangval taka lengchhuak pawh a lo ni mai thei a. Chu erawh ka ring em em chiah chuang lo. Chutiang nise Pa Biaka te kâ aṭangin ka hriat tawh ka ring.





"Pathian zarah ka nu leh pa hi an hrisel viau mai a. Nikum kum tawp lam aṭang khan ka nu hi a hriselna a pan ve ṭan deuh a" a rawn ti hmasa te te a. "Kan unau hi pali kan nia. Ka u chiah hmeichhia hi Kum 8 mi anihin a boral a. Kei hi a dawttu ka nia, ka nau chiah hi mipa a awm bawk a. Kan te ber hi hmeichhia a ni leh a. Ani pawh a inti nula ve ṭan viau tawh a. Mahse, keini erawhin kan la naute chei viau thung a" a rawn tizui leh mawlh mawlh a.




Min hrilh belh tur a la neih takin, "Chuan.....?" ka lo ti nghal thuai a.




"Englamin nge ka zawm ang?" nui suk chungin a rawn ti zui nghal a.




"Ka hre nang....i nupui fanau lam te?" ka melh pah zauh a.




"Aaaa...kan nu hian min nei peih tawh lova. Min chhuahsan daih a..." a rawn ti hul hak a. "Min chhuahsan lo tur ka zawng leh mek" nui huk chungin a rawn tizui a.





Ka thlêk hâ a, "I fiamthu nge fiamthu lo ka thliar hrang thiam miah lo ania" ka lo ti vat a.





Thutak hmel zetin a nui tawp hmak a, "Tak tak a, ka la hmu zo lo zel chu anih hi" a rawn ti zui ta daih a.





"Ka awihlo em mai" ka lo ti thuai a. "Thingpui in leh ang hmiang?" ka ti zui nghal zat a.





A phone a bih zuk a, "Ngawi rawh, ka duhtawk e. Zan dangah min la kawm nawn peih tak leh kan la in leh ang chu" alo ti thuai a. A phone a rawn ri ral ral a, a la zui nghal thuai a. "Aw ka nu..." a ti nghal vat a. "E...awle. Ka rawn haw nghal ange" a ti zui sawk sawk a. A hmel chu ngun takin ka lo en reng a. A phone a dah rual chuan, "Ka nau a nuam sam vak lova, ka va haw phawt ange" a rawn ti nghal a.





A thochhuak nghal a, rang takin ka tho zui ve nghal a. "A zialo hle mai. Chanchin min rawn hrilh ve zel la aw?" ka ti pah mawlh mawlh a. Kan in zui chhuak ta nghal a. "Anih leh phawt le...lo damṭha zel rawh" tih pahin min en kal a, nui sak chung chuan, "Muttui phawt le" a rawn tizui a. "Chanchin min rawn hrilh ve dawn nia" ka ti ve vat a. Ka en reng a, a tlan zui ta nghal a.






Mutna ah pawh chuan ka ngaihtuah zui neuh neuh a. Ruata mizia hi hriatthiam a har dawn riau in ka hria. Mipa rintlak tak nge anih anga, mipa holam ve tak tih pawh ka la thliar hrang thiam mai lo. Chanchin min rawn hrilh ve beiseiin ka ngaichang deuh reng a. Engmah a rawn sawi zui leh bawk si lo chuan ka ngaih a ti ṭhalo zual sauh bawk. Rawn betu kha a nu a ni tak tak angem? A nau chu a dam ṭha lo tak tak angem?






'Engnge chung zawng zawng chu ka lo ngaihven ve viau kher? Min rawn hrilh anih pawhin tih theih ka nei chuang lova. Dawt hlir min lo hrilh pawh nise engnge ka tan a pawimawhna ni chuang?'






(to be continue.........)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)