SUMO DRIVER By Havali Adam (COMPLETED)

Moderator: writers

Havali Adam
Posts: 246
Joined: October 22nd, 2021, 9:46 pm

Re: SUMO DRIVER By Havali Adam (CHAPTER 5)

Unread post by Havali Adam » July 18th, 2022, 8:51 pm

.

_IMG_000000_000000.jpg



SUMO DRIVER

By

Havali Adam




Chapter 7




Thli chu a thaw deuh vûk vuk a, keini pahnih erawh kan la inkuah char char a, ka thla a va han muang hliah hliah tak tak em. Ka mittui te chu luang tur reng a awm tawh lo va, ka mi kuah mêk pa pawh chu kei ang bawkin chet sawn a tum bik hauh lo a nih hmêl. A âwm zawnah ka bek chu ka nghat ran a, ka ngaihtuahna a fim tawlh tawlh hnu chuan kan awm dan chu a dik lo tih ka hre chhuak nghal zut zut a, ka thin phu chu a rawn rang sawt em em bawk.




Meng kur chung hian a kawr hnung lam ka ṭhamna chu ka thlah dul tial tial a, ani ve thung chu a ngawi reng a, min kuah ngaiin min la kuah reng bawk a, kan awm dan chu a nih dan tur ni lo mah se nuam tih rukna riau ka nei leh tlat tawh. Min la kuah ngheh ang reng êm avang chuan chet sawn mai pawh chu ka tum leh ta bik lo va, ka inthlahrung deuh thut a ni deuh ber. Ka beisei loh lutukin ka thil nghen chu a rawn phu dup dup a, a kawr chhan aṭang paw'n a thin phut ran vezia chu ka hre thei.




"Mazar" ti deuh hluaiin awm sawn chu ka tum ta a, kei ang chiaha a thin phu rang lutuk chu ka hrethiam lo, ka thin phut ranzia te chu a hre ve vek ang em le, min melh chhuk run ringawt a, mahse chuti anga awm chu a inhmeh riau tawh zawk tlat a ni.



"Eng lo, i thin a va'n phu rang ve tho em em" ka ti chhuak ta phawng a, chu chu ka sawi tum ber pawh a ni chiah lo, awm sawn mai ka tum kha a nia, ka kâ aṭang chuti ang thu chu a chhuak ang tih rêng ka hre bik lo.



"Haw ang" ti nghutin a taksa aṭang chuan min nam hla dâwr nghal a, min nam nâ ang reng bawk si nen ka tlu lo chauh a, amah bawkin ka banah min rawn chelh leh hman lo se chu ka tlu thlawp ang a, lei charah chuan ka intauh nâ phian bawk ang ka ring.



"Hei, min lo nghak teh, min kalsan i tum ringawt em ni?" min ngaihtuah miah lova a kal nal nal chu ka ko ding leh a, thli thaw ri deuh vûk vuk te chuan ka thauah min man a, a ruala kal loh chu ka tum der lo a ni.



"Lo kal reng ta che" ngaitheih loh hmel zeta min en ran chung hian a lo ti bul hmuk a, lungawi vak lo chuan a dinna lam chu ka pan phei zel a, khaw awm dan chu ruah a sur dawn emaw thli a tleh dawn emaw a ni ngei ang.



"I kal deuh thut a nih khâ" ti niah niahin a iptê pui tlângah chuan ka pawt ṭai a, a kal chak leh dawn tih ka hre sa vek a, min ngaihsak miah lova a kal leh daih chu ka hlau ru viau bawk.



"Awi! I iptê hi a che thei Mazar" ti thutin iptê tlâng ka vawnna kut chu ka la thla thuai a, iptê chu a rawn che tak tak alawm, eng nge a chhungah awm ka hre hauh lo va, a awm ang tur ka ngaihtuah lai takin



"Chakai a awm" a rawn ti a, hlauh namên lovin ka hlau nghal a, a iptê ahna lamah pawh ding ngam tawh lovin a vei lamah ka insawn nghal daih a, engmah ngaihtuah chiang lova a kut ka vawn rual chuan min rawn en chhuk rang hle.



"Eng lo, i kut hi ka lo vuan mai, i kal chak bik thei si, min kalsan daih ka hlau alawm" a hma ang chiahin ka thusawi chu ka sawi tum ber a ni lo leh tawh, eng nge kei hi ka awmzia!? Engati nge ka kâ hi ka ven hman ngai miah loh!?



"Kal ang" tih leh min kaih sawk chu a rual a, a hnuh hian min hnuk dawr dâwr a, mihringin uitê a kai ang maiin ka inchan a, min kai ve ta rau rau min va han kai nuam lo ber kher chiang tak em.



"I thin a rim em ni?" min kalpui pawk pawk lai chuan ka ti ta tawp a, a awm dan vel chu thinrim a ang êm alawm, chuti angin tu mihring mahin mi an kai ngai lo, min kalpui dan sawk sawk chu a nuam lo ve thlâwt a ni.



"Ṭawngmawhpa!" ti leh vakin ka kut chu ka phih thla hmak a, rawn leh hawiin rei lo tê a ding a, inher leh nghalin hma lam pan chuan a kal leh ta nal nal a, kei lo hlau ru tawh bawk si chuan



"Lo ding teh Mazar, min kalsan ringawt tum ṭhin suh, hmeichhia ka nih hi hre ta che" tiin ka ko leh tawn tawn a, hmanhmawh ru zeta um zuiin a kutah chuan ka va vuan leh ta chawt a, kan inmelh no teh chiam lo khawp mai.



"Kal chak tawh lo ila, ka tlin ve lo. Chu bakah nang angin ka bawp pawh a sei lo va, a lian lo bawk a, kal sawk sawk kher tawh lo ang" ka tih mawlh mawlh lai chuan



"Ngawi tawh teh, ka hne" a rawn ti vin deuh hmuk a, a aw aṭang chuan min ninzia ka hre thei, ka lo ṭawng hnem palh viau pawh a ni maihna, mahse min vinna aw ri chuan ka thin a tirim ve leh tlat tawh.



"Nang ang ka ni ve hleinem, i ngawih theih ang khan ka ngawi thei lo a ni mai, chuvangin min vin kher suh" ka lo ti ve piap piap a, kan boruak chu a va han nuam lo chiang em.



"Hmeichhe buaithlak tak zawng i ni chiang e" tiin hma lam chu a hawi a, ka sawi vang nge ni min kaih tirha min kalpui sawk sawk ang em emin kan kal chak tawh lo va, a kut hrawl tak lah chu a thap lum nuam phian leh nghal.




Field tê kan thlen rualin current a rawn awm a, ka kut a vawnna chu a thlah chiang khawp mai. Field tê aṭanga kan in a hmuh phak reng tawh avangin hlauhna ka nei em em hran tawh lo va, tunah chuan Zualtea chu ka ten ru tak zet a ni. A thu hrimah Tlantea reng reng pawh a ṭhianpa mizia chu a hre chiang awm ropui si a, ngaihngam zeta min kalsan ringawt chu ka thiam lo thar em em a, engtin emaw ni taka hrilh fiah chu a ngai a ni.




Kan in kawt chu Mazara chuan kei aiin a thleng hmasa a, a awm dan chu min nghak deuhin ka hria. A bulah ka va ding chiah tihah in lamah chuan a kal leh nghal daih a, kei paw'n ka zui ve leh mai bawk. In chhunga kan luh chuan mak tih hmel deuh hian ka chhungte bik chu an lo hawi a, min en dan chu ka hrethiam chiah lo. Mazara chu ka pitei leh putea chuan a lo be nghal luam a, ani ve thung chu ngawi rengin a che mual mual a, a iptê aṭanga chakai lian ṭha zet zet a phawrh hnu chuan ka pate pawh an ngawi reng thei ta bik lo.




"Chakai i lo zu khawrh leh hman a ni maw? Nang tak hi chu âw, chaw te i ei tawh em?" tiin putea chuan a bia a, ani paw'n



"La ei chiah lo ve" a lo ti ve mai a, kan awm dan leh Zualtea min um dan vel chu hre lo ang maiin a awm a, kei erawh chu ringawt chuan ka rilru a luah thung.



"Chaw i la ei loh chuan hetah ei nghal mai rawh, chaw pawh a la awm ṭeuh tak alawm" pitei chuan hriat nuam zet hian a ti siam siam a, chakai lian ṭha tak tak an hmu chu an phur tlâng a ni ber.



"Ni lo ve pi Chhingte, ka nu amah chauhin a awm a, ka zu haw thla thuai zawk ang e" tiin Mazara chu a tho chhuak zui nghal a, pitei leh putea chuan a chakai pek chu hnial derna pawh nei miah lo hian an lo la mai a, mak ka ti ru kher mai.



"A nih kan lawm lutuk aw, i kal chânga min rawn hawn kep ziah erawh lawmawm viau mah se a nuam lo ṭhin" chu chu in a chhuahsan dawna ka pitei thlahna ṭawngkam a ni a, Mazara a awm lo chiah chu engtin emaw ni hian ka awm deuh tlatin ka hria.



"Khawi lai kawr tak chu rawn zawh chho leh ang maw!? Hei aifiar te a awm nual leh nghal a, Mazara hi chu tluan loh pawh a nei lo a nih ber hi!" ti sup supin putea chuan chakai chu a endik vel a, chutah pitei bawk chuan



"Tlawmngaih chhuah eng ang mah ila min pe lui leh tlat dawn bawk si a, ka hnial der duh ta duah lo law law a nih kha" a rawn ti ve leh nghal a, bucket chawpin chakai chu choka lamah a khai phei zui ta daih bawk.




Kan mutna pindana ka phei dawn lai takin Hlimpuii hnen aṭang phone call ka dawng hlawl a, in chhunga biak ai chuan pawna biak a ṭhat zawk ringin ka chhuak a, mahse in chu ka awm hlat lo khawp. A thil rawn sawi te chu ka hre ve tak na a, ka ngaihtuahna erawh ka pe thei hlawl lo. Ka thil tawn zawh chiah chu hrilh mai ka tum deuh ut ut a, sawi ṭulah ka ngai leh chiah bawk si lo, ka rilru chu a buai nuai nuai a ni ber.




Kan inbiak zawh chuan in chhungah ka lut ve leh mai a, kan mutna pindana ka luh hmain Tlantea a rawn haw a, hruai chhuak rang tak ka ni. Mi dang chuan min hmu kherin ka ring lo, Tlantea rawn lut lai chu an hmu hman mang lo zawk ang. In kawt hmun thim deuh laia ka din pui chuan hriatthiam loh hmel zet hian min en a, ka thinrim thar lutuk chu sawi hmasak ber tur pawh ka hre lawk lo, a ṭhianpa zah lohzia erawh ka sawi dawn hrim hrim hi a ni tawp mai a ni.




"Vawi khat mah i ṭhianpa zak thei lo lutuk kha min hmu turin lo kal tawh suh se, chiang deuhin ka hmuh duh tawh loh thu hi lo hrilh rawh. Nang pawh engati nge khati ang mi nen khan min awm fâl tir reng reng? Hawihhawm lo zeta chein i ṭhianpa khan min fawh a tum asin" ka thinrim lutuk chu ka sa vek theiin ka hria.



"Enga!? Chuti ang chuan Zualtea chu a awm maw!?" mak tih hmel zeta min en chung hian a rawn ti a, a awm dan chu ka hrethiam lo letling zawk, a ṭhianpa mizia zawng zawng chu a hre vek turah ka ngai hmiah.



"Ka pate bulah ka putea te bulah chuan ka sawi rih lo vang, a chhan chu nang paw'n hauh i tuar dawn tih ka hria, a lehpek a awm leh a nih chuan zanina thil thleng zawng zawng nen hian ka hrilh vek thung ang" ka tih leh chuan



"A rui emaw ni le, zu chu a in ve ṭhin ngei a, mahse rui chhe lutuk a ni ngai lo" a rawn ti niah niah a, ka thin a lo rim sa tawh bawk si nen ka insum leh thei ta lo.



"A zu in ṭhin leh in ṭhin loh lam a pawimawh rih lo, min fawh mai tum lovin kut min thlak a tum asin. Min um a, Mazaran min chhan lo phei se chu ka chan a chhe ngawt ang tih hre rawh" ti hmawk hmawkin a darah chuan ka nam deuh sawk a, in chhung lamah ka luhsan zui nghal ta daih.




Kan mutna pindana luh ka tum lai takin u Vli chuan min rawn pawt a, khawiah nge min kalpui a tum ka hre hauh lo, zanin chu pindanah ka lut hman meuh lo chu a ni e. In chhunga lut chiah si kha pawnah min kai chhuak leh a, ka thil tawn te chu a inkawkalh nuai nuai mai. Min din puina lai chu hmun thim deuh lai hi a ni a, in kawt lam ni lovin in hnung lam zawkah kan ding a, thim erawh a thim lutuk hran lo. Current a awm tawh miau a, current thim lai ai te chuan eng tur a ni hrim hrim bawk e.




"U Mazara nen khan in rawn haw rual a, in inkai lai kha ka hmu vek che u" a thu rawn sawi avang chuan ka meng phawk hle a, ani'n chik zetin min en thung a, chhan mai dan tur pawh ka hre lo.



"U Mazara nen khan in inkarah eng nge awm? Rama kan feh lahin in inhnim hnai ru viau zel a, maian pawh kha a baisak chiang che ti raw?" a rawn ti leh ta, ka chhung ril chu a ni et et a, ka zah mai bakah nuam lo ka ti ru ngawih ngawih.



"Aw ni e" tih thu chiah ka kâ aṭang a chhuak a, Mazaran maian min baisak thu chu zep pawh tum ila a theih tawh lo, chutah kan awm danah rinhlelhna a la nei leh zel a, mahse chu erawh a dik lo a ni.



"U Mazara nen khan in inkarah eng thil chiah nge awm Numam? Nangni pahnih hi in lo inngaizawng ru reng te a ni lo maw? Zanina in inkai lai ka hmuh phei kha chuan ka ringhlel zual sawt che u" a tih leh chuan rang zet hian



"A teuh lo mai u Vl, a teuh lutuk, Mazara nen chuan kan inkarah engmah a awm lo. Zanin te kha chuan puih ka ngai a, min pui mai chauh a ni" ka lo ti thuai thuai a, a hma ai zawngin min la en chik zui leh ta nghal a!



"Nang hian u Mazara hi i rualpui koh hmiah tihna em ni Numam? Ka pitei paw'n kum 30 ral a pelh tawh thu a sawi vek khâ, u Duhawmi aiin a upa daih zawk dawn a, nang lah chuan i lo rualpui koh vel mai mai a maw!?"



"Maw? Aih, ni lo, eng lo, ka rualpui koh hauh lo, ka hre bik lo" ka ti bah nawk nawk a, a zawhna min zawh thut ber kher chuan ka rilru zawng zawng a tibuai vek a, ka sawi tum loh dêuh deuh ka sawi a ni ber.



"Nang nu hi i dik miah lo Numam? Eng vangin maw u Mazara puih ngai chuan i awm a!?" a rawn ti leh ngat a, engkim chu hrilh vek law law ka tum ta mai, mahse ka nu leh pate bula sawi chhhuah ai chuan a ṭha zawk maithei a ni.




Chaw ei khama Tlantea min hruai chhuah dan te, a ṭhianpa Zualtea nen kan awm dan zawng zawng chu ka hrilh ta vek a, a hmelah chuan mak tihna hlir a lang a, Mazaran min chhan thu leh Zualtea laka min hum thu ka sawi lai te chuan a mit kô a lo san âk a, mak a ti viau pawh chu a awm lo hran lo. Mazara nena kan inkuah vel chungchang erawh engmah ka sawi duh lo, ngaihtuahna dang puin thil chi hrang hrang a ngaihtuah chhuak ang a, chhan fak theih loh zawhna min zawt leh palh ang tih ka hlau a ni.




"Ka pa hrilh la a ṭha ang Numam, Tlantea ṭhianpa chu hau hrep rawh se. Tlantea reng reng pawh engati nge chuti anga a kalsan ringawt che ni, hmeichhia phei chu thlah fal hauh loh tur zawk asin" ka thusawi zawh ruala a lo tih chuan



"Ni lo u Vl, ka pate leh ka putea te chu hrilh lo law law zawk mai ang. Kan hrilh a nih chuan Tlantea an hau hrep dawn tih ka hre lawk thei vek, heti hian ngawih liam pui zawk ang" ka lo ti ve leh thuai a, a lung a nih hmel lo khawp.




Engmah sawi belh tawh lovin in chhung lamah kan lut a, mut hun a lo ni ve tawh tho bawk nen kan pindanah kan lut tlang nghal a, Mazara nena kan inkai lai a lo hmu kher kher chu pawi ka ti thar hle a, min ngaih dan tur ka rilruah a awm reng mai.




Kan mut hnu thleng chuan ka thil tawn te chu ka rilruah leh ka mitthlaah an cham reng a, Mazara nena kan inkuah lai te, a taksa thlamuan thlak zeta ka awm lai te chu ka ngaihtuah chhuak zut zut bawk. U Vli zawhna min zawh te chu ngaihtuah let lehin Mazara chu ka lo rualpui koh hmiah tak tak hi a lo ni a, ngaihtuahna mai mai mah ni se Mazara lakah chuan ka inthlahrung thar khawp mai.




Ka pitei khan u Duhawmi ai pawha a upat zawk thu a sawi tawh ngei a, khangte kha lo ngaihtuah chiang ni ila chuan ka rualpui koh bik tawp lo vang. Eng pawh ni se kan inhmuh leh hunah emaw kan inbiak leh hunah chuan ka rualpui koh tawh tur a ni lo, a hawihhawm loh thlak êm mai.




Zingah chuan thawh ka'n hai chiang khawp a, chaw ei dawn tê ah chauh ka tho a, inthlahrun nâ duh tak a ni. Ka putea leh pitei te erawh chuan engtin mah min ti lo va, ka nu leh pa pawh an ngawi reng a, min zilhna ṭawngkam an chhak chhuak lo hrim hrim a ni. Tlantea chu ka hma zawnah a ṭhu a, zing dang ang lo takin a ṭawng tam lo hle a, a hmelah chuan inthlahrunna leh inthiam lohna ka hmu a, putea zawhna a chhang zeuh zeuh tih loh chu a ṭawng mang lo a tih theih.




Kemah zawkin nuam lo ka ti leh a, Tlantea chu ka khawngaih leh hnuhnawh a, chaw ei laia sawi chhuah chu a chi der bawk si lo. Ka putea chuan hna thawk lova awm hahdam vek a ṭhat thu a sawi mial mial a, mi dang paw'n kan lo thlawp hlawm khawp mai.




Ka buh phur vang tih hriat takin ka dar leh ka chhip te chu a nâ deuh ṭhum a, nâ ti lemah ka taksa chu a rawl a ni zawk mah. Chaw kan ei kham chuan ei inna kan seng fel zui nghal a, Tlantea chu ka zawng ru deuh a, mahse ka hmu miah lo, a inthiam loh hmel kha hmuh reng hrehawm ka ti a ni.




"Tlantea pawh ka zilh deuh hlak kha, ti kha chuan a lehpek a awm tawh lo vang" ka phone khawih lai ngaihsak tawh lovin u Vli lam chu ka hawi thuai a, a thawmhnaw a lo thlep fel mial mial a, min rawn en zeuh bawk.



"Tukin zingah khan ka ko hrang alawm, hlauthawng duh suh, tûma'n min hmu lo" ka en reng tih hria ni awm tak hian a rawn ti leh nghal a, ka phone chu hmet thimin ka ṭhu chhuak ta nge nge.



"Engati nge i lo zilh leh kher u Vl? Chuvang chu a ni maw chaw kan ei lai te khan a ngawihchawih em em ni, mi pawh a en ṭha ngam lo a nih khâ, dik tak chuan ka khawngaih hnuhnawh leh tawh zawk"



"Kha bak kha sawi leh ka tum tawh chuang lo, a lakah inthlahrung vak duh suh. Zualtea chu a ni ka hauh hrep châk zawk chu, a zak lo reuh ka ti hle mai" a la ti deuh hmuk hmuk a, a nau ka ni a, min ngaihtuah tih pawh ka hria, mahse Tlante chu lo zilh leh kher a ṭul ka ti tawh lo a ni.




Tlantea hmel chu chhun thingpui in thlengin ka hmu lo ta zel a, dik tak chuan nizana ka thil tawnah khan thiam lohna a nei em em hran lo. Keiin thinrim takin ka ṭawng khum tawh a, tukinah lah u Vli'n a lo zilh leh bawk a, ngaihdam dil chu ka ba a ni. Insum thei tawh lovin pitei chu Tlantea awmna ka zawt ta tawp a, sava a veh thu a sawi chuan ka awm a nuam deuh sawt a, sava chu veh daih tak rawh se, a rilru pawh a thawveng deuh mahna.




Tlantea sava veh thu ka hriat hnu lawkah Mazara chu ka rilruah a lo lang a, Tlantea nen chuan an awm dun a ni thei ang em tih te ka ngaihtuah leh ta vak a, ka thil ngaihtuah chu u Vli'n hria se min ringhlel leh tawh khawp ang. Mazara chu ka ngainat leh nat loh ka inzawt rilru roh rôh a, ka hre chiang thei tawh hauh lo.




A hmate kha chuan ka ngaina lo tih chiang takin ka hre ngei a, tunah erawh ka ngainat leh nat loh pawh ka hre thei tawh lo chu a nia, ka rilru dik tak chu hriat ka châk ngawt mai, ka rilru leh ngaihtuahnaa awm zut zut te lah chu rin thu vek a la ni bawk si.




Ka tih tur hre lo leh awm awl bawk si chu ka tei chhuak mai mai a, tlai lam dar 2 bawr vel a ni tawh a, ni pawh a sa lutuk lo. Kal tumna nei em em chuang lovin kawngah chuan ka kal a, Notice Board bula naupang kum 6 bawr vel áwm lo infiam chu kal pahin ka thlir a, hmawlh tê ah hian Rubber an lo khai a, an inperh thlak siak ni berin ka hria.




Hmeichhe naupang erawh hmuh tur an awm rih lo va, thingtlang nun chu changkang teh lûa lo mah se a nawm hmel ka ti, naupang infiamna tam lutuk chuan naupan ṭhat leha thingtlanga seilen min ti châk a ni. Dawr lian vak lo bula daihlimah chuan ka ding a, rei pawh ding lovin tawlailir lo awmah chuan ka ṭhu zui nghal a, naupang infiam dan mak zet leh an thawm chuan ka mit a titlai a ni.




Ka ṭhutna bul dawr hnuai aṭang naupang pathum vel hi an lo chhuak sap sap a, ka hmu deuh thut bawk si nen min tiphu ang reng. An la inbual fai lo tih hriat zet hian an hmel leh an thawmhnaw hak te chu a bal hle a, an inbe siam siam reuh hlawm a, dawrah chuan lutin thil an lei a, anni ang rual te chu School kal turah ka ring a, School kal lova an awm chu mak ka ti ru hle bawk. Dawr aṭanga an rawn chhuah hnu lawkah an zinga pakhat chuan




"Zawng leh ang u, kei chu a la awm ka ring" a ti tan tan reuh a, a chhang ei lah chu tui a tih hmel ropui bawk si.



"Kei chu ka duh tawh lo ê, chu bakah anu leh apa te'n pawisa chhar an phal tawh lo, dawr hnuaia mi phei chu an phal lo hrim hrim" pakhat chuan a lo ti ve leh a, ka nuih an tiza reuh khawp.



"I duh leh haw daih rawh, keini chuan kan zawng leh dawn, cheng 2 kan chhar hlauh phei chuan chhang chhung sen pahnih kan lei thei a ni mai" naupang ho tana cheng 2 lêk pawh a hlutzia chu ka ngaihtuah a, Aizawlah te chuan eng tham a ni tawh lo asin le.




Naupang tih takah an inthurual ve leh mai bawk a, dawr hnuaia an chhuk thla lai te chu ka en reng a, an len hunah pawisa chhar tih vel chu an sim ve mai ka ring. Middle School zirlai naupang ni awm tak tak hi an lo bang leh a, a ṭhen phei chu an rawn inum thla a, ka hlauh ang ngeiin pakhat chu a tlu bawk thlawp a, ka ṭhutna aṭanga thovin ka va pui thuai bawk.




Ka puiha ber lah chuan nâ a tih loh hmel em em leh ta nghal a, ka kaih thawh rual deuh thawin a tlan leh nghal nal nal a, mak ka ti khawp mai. Tawlailira ṭhu tawh lovin Venglai lamah chuan ka chhuk a, chhuk chhan ka nei em em pawh a ni lo. School naupang rual chuan ka kal ve zel a, a ṭhen phei chuan min en deuh hâw nghe nghe a, ka hmu lo der hmak thung.




Venglai ka thlen thlak rualin Mazara ka hre chhuak a, an in chu ka hmuh phakah a awm reng tawh a, va luh êm chu ka tum lo. Ka dinna bul lawkah MST Bus a rawn ding a, Bus aṭang chuan khaw mi ni ngei tur mi pali vel an lo chhuk sap sap a, MST Bus chuan ka rilru a luah zui leh nghal. Ka ute pahnih chu MST Bus-in an zin tawh ngei a, kei erawh ka la zin lo va, ka zin ve chhin châk a ni.




Mazara te in awmna lama kal ta lovin biak in lamah chuan ka kal ta zawk a, eng ka hria nge ni fan kual vel chu ka châk tlat a nih chu! Biak in bulah chuan Pastor Quarter hmun zawl zau nawm hmel deuh hi a lo awm a, a bulah thing a ding deuh ṭhup bawk a, a dai nuam ngawt ang. Quarter hungna bang bulah chuan theihai kung hi a ding a, a rah te chu a tui hmel tak zet.




Hawi kual hmasa tê tê in lung chu ka chhar a, biak in awmna leh Pastor Quarter awmna chu a fal ve deuh avangin tûma'n min rawn hmuh ka ring chiah lo. Uluk takin theihai chu ka vawm a, ka va han vawm ṭhelh chiang tak em. Ka ei châk bawk si, ka vawm tla thei bawk si lo, chutah mi in chung ka la vawm ri dawt zui.




Quarter hungna bang phenah chuan ka biru deuh vang vang a, ka awm dan chu ka ngaihtuah chiang a, ka lung ken lai chu ka paih chiang khawp mai. Tho ṭhem ṭhemin biak in lam chu ka hawi chho a, mi pakhat patling tih hriat tak tarmit vuah hian min lo en reng a, ka zak lutuk chu a tlanin ka tlan dawr dâwr a, hawi let tawh lo chiang tak ka ni.




In chhung ka luh thlengin ka thin phu chu a la rang em em a, hah vah ni tho mah se zah vang leh hlauhthawn vang a ni deuh mah zawk. 'Engtin nge min lo hmutu khan min ngaih ang le' tih tih ringawt chu ka rilruah a awm zui vawng vawng a, College lai kal ve tawh si ka chet dan leh ka thil tih duh chu a va mawi lo si êm.




Kan inbual zawh hnu lawkah Tlantea a rawn haw a, biak ka tum lai takin Information Mic aṭangin thupuan a rawn awm a, ka thu hriat chuan min ṭhawng chiang lutuk a, Tlantea pawh chu ka be leh ta lo va, ka ding mawl tawp a ni ber.




"Awi, a va'n awihawm loh" pitei chuan mak tih hmel zet hian a lo ti hluai a, kei ngei paw'n ka awih bik lo, mahse ka pite awm dan leh a ṭawng dan vel chuan ka ngaihtuahnaa awm chu a ni tih a nemnghet a ni.




Tlantea pawh chu keimah ang thovin a ding ngawi reng a, a hmelah chuan hamhaihna leh rin chiah lohna a inawm pawlh nawk nawk a, Information Mic aṭanga an thu rawn puan chuan a tua te pawh chu min ṭhawng a ni ber. Kei phei chu ka tha hial a lo khur thei a, ngaihtuahna pawh ka seng thiam lo.




(End of Chapter 7)




.



Link:
BBcode:
HTML:
Hide post links
Show post links

Havali Adam
Posts: 246
Joined: October 22nd, 2021, 9:46 pm

Unread post by Havali Adam » July 19th, 2022, 10:59 pm

SUMO DRIVER

By

Havali Adam




Chapter 8




"Ka va'n khawngaih reuh tak" pitei chuan a rawn ti leh a, kei chuan ka la awih chiah lo, ka la awih phal lo va, chuti ang ti duh mi a ni paw'n ka hre lo hrim hrim bawk, mahse khaw Information Mic-ah lai an puang si a, ka rilru a tibuai ru tak zet.



"Ka zu kal chhin!" tih leh Tlantea chuan tlan chhuah a rual a, kei pawh ka ding mai mai lo, ka tlan chhuak ve nghal ringawt a, ka chhungte hmai chu ka zah tawh lo reng reng.



Tlante chu ka ko vak a, mahse ka kohna chu hria ang paw'n a awm lo. Venglai lamah a tlan thla char char a, kei pawh chuti tho, um erawh ka um pha lo nasa hle a ni. Venglai tawn tirh ka thlen chuan Information Mic aṭang Mazara hming bawk chu an rawn puang leh a, an puan tawh sa tho an puang a, chuti ang ti duh turin Mazara chu ka la ring thei ngâng lo a ni.




Dawt pawh a ni maithei asin, thil engkim a hriat dik theih vek bik hleinem, hre sual hram se ka ti a, nasa takin Mazara chu ka khawngaih nghal ngawih ngawih bawk. Ka thin te chu a phu dawt dawt a, hlauthawng tak ka ni. Ni e, engtin nge ani ang mipa rilru ṭha lutukin zu lama inhnamhnawih a duh teh lûl ang ni? Tunah khan mipa rilru ṭha ka ti em ni?




A dik, ka rilrua rawn awm hmasa ber a ni a, dawt a nih ka ring lo bawk. Ka pa tih lovah ani tluka mipa rilru ṭha ka la hre lo, ṭawng chu a ṭawng duh loh ngei mai, mahse a rilru erawh a sual lo tih ka chiang a ni. Ka mamawh hun apianga min pui hreh lo tu chu rilru chhia ka ti ang maw!? VDP te phal loh zu lamah a inhnamhnawih ang maw!? A teuh lo mai, thu dik a ni thei lo hul hûal.




Mazara te in kawtah chuan ka ding reng tawh a, ka lut duh lawk lo va, ka inngaihtuah chiang hmasa tê tê phawt a ni. Tlantea te chu kal pawh ni se an khaw khat an ni a, ram lamah ni se an inrî bawk a, an innel tawn hle tih hai theih a ni lo. Kei ve hi eng nge ka nih ve le? An ina kal ringawt tur hian eng nge ka nih ve? Kei te chu chawlh laia zin ve mai chauh ka ni a, amah nen tak phei chuan kan inhriatna a la rei hauh lo, kei hi ka dik lo a ni.




Derhken par bulah chuan ka ṭhu ngawi ta reng a, vawi tam ka ngaihtuah nawn hnuah Mazara chu ka lo ngainain ka lo ngaihsak hman lutuk tawh tih ka hre chhuak ta bawk. Ka rilru puthmang chu mawi lo ka ti a, awm ang lo ka ti a, u Vli min rinhleh vang pawh ni miah lovin ka ngainat dan lah chu ngainatna satliah a ni lo leh ta zel a, chutah VDP-in zu a thlawr ruk avanga an man thu Information Mic-ah an la puang zui. Ka tawn ang maiin ka lo hlauthawng em em a, Mazara chu ka khawngaih tak zet a ni.




"A mak ê nu Biak, an hre sual a ni lo maw? U Mazara chu a lo ṭang ve chhin reng reng em?" Tlantea ṭawng ri bawl bawl ri ka hriat chuan ka ṭhutna aṭangin ka tho thuai a, pawn lamah an rawn chhuak tih ka hre thei bawk.



"Ṭang teh nâng, ka awih lo lutuk kha kei paw'n ka zawt nghal mawlh mawlh a, engmah a sawi duh bawk si lo. A pa a chhun leh lutuk hi chu a buaithlak lek lêk zel, thil eng emaw tak chu thup a nei chiang a ni" Mazara nu; nu Biaki awah chuan lungawi lohna tam tak a lang a, nu tan chuan a awihawm loh ngawt ang.




"U Mazara chu pha ve tal se a ṭha tur a nia, tih theih engmah kan nei bawk si lova ka han haw chho leh nghal mai ang e. VDP te chuan an zilh deuh hrep ang a, tlai chaw ei hmanin a rawn haw maithei asin" Tlantean a tih tâkah chuan ṭha deuhin an inthlah ve leh mai bawk a, thu dik tak hriat châknaa khatin Tlantea chu ka lo ko hrang zui nghal ta vat.




"A ni tak tak em ni Tlante? Kei chu ka la awih thei lo, Mazara hian zu a thlawr miah lo vang, VDP te zawkin an hre sual a ni ngei ngei ang" ka ti mawlh mawlh a, ani pawh tih ngaihna vak a hre lo a ni ang a thaw deuh hawk ringawt.



"VDP te hian engtin nge an tih dawn? Mazara chu Jail a tang dawn em ni? Ka pa hrilh ila pawisa hmangin a hruai chhuah theih ang ti raw? Engati nge maw a ni reng reng pawh rinhleh theih tura a lo awm ni!?" ka ti leh chuan



"Zaninah a rawn haw nghal thei ang ka ring, zilhna ṭawngkam a dawng nual ang a, ti tawh lo tura tihna te, pawisa a chawi maithei bawk" a rawn ti ve nghal a, Jail a tang dawn lo tih ka hre chiah chu ka thaw a veng huai mai.




Sawi belh tawh lovin kan veng lamah kan kal chho a, ka thu hriat vel avang chuan ka nguai vek a, in chhung kan luh lai te chuan ka chhungte min enna chu ka hmu lo der tlat ringawt. Zanriah kan ei laia kan thu khel ber chu Mazara VDP te'n an man chungchang a ni a, ka nu leh pa chuan an khawngaih ve hmel khawp mai.




Pitei phei chuan a sawi zawm nual a, Tlantean nu Biaki nena an inbiakna a sawi bawk a, thil eng emaw inthup a awm ka ring ve ta bawk. Chaw ei kham thlengin ka mood chu a dik hlei thei lo va, in kawtah ka tei deuh sêk a, Mazara hmu tura Venglaia zu chhuk chu ka duh rum rum a, mahse ka inrawlhna tur a awm lo tih ka hre chiang em em thung.




Kan mut hnuah pawh ka muhil thei mai lo va, Mazara hlir ka rilru leh ngaihtuahnaah a awm a, ngaihtuah loh pawh tum ila ka thei lo, thei ngat ila chuan puih ve ka duh a ni. Ani paw'n ka mamawh laiin min pui a, hlauh ka neihin min thlamuan bawk a, a laka ka thil bat chu ka hre chhuak leh ta zut zut mai.




A tuk thlengin ka mood chu a fuh lo tluang zel a, u Vli zawhna te chu ka chhang duh lo hrim hrim bawk. Chhan chi pawh a ni rih lo, Mazara nena kan inkar chu a ringhlel nasa zual ang a, rilru buai lai leh mood fuh loh laia chuti ang zawhna lo chhan chu ka peih buai lo a ni. Ka bula rawn awm a tum paw'n ka kal sawn zel a, mahni chauha awm ka duh rih a ni.




Kar khat pawh la tling lo mah se Mazara chu ka ngaihtuahnaa châm reng turin a awm tlat a, thingtlangpa ngaihtuah reng renga hun hmang tur chuan ka la inring chhin eih ngai lo. Ka putea chuan VDP te'n ruihhlo an do thu a sawi luam a, ka pitei'n a lo sawi zawm bawk a, ka pa pawh a bang chuang lo.




Ka pitei chuan VDP a dem thu a chhakchhuak deuh reng a, hruaitu tam zawkin zu an in ṭhin thute a sawi bawrh bawrh a, Mazara chu mana timualpho thei ringawt an nih bik lohzia te a sawi chuan dik ka tiru khawp mai. VDP te ang chiah hian sawrkar hna thawk te pawh hi an awm niin ka hria, ei ruk ṭhat lohzia sawia tlangau pui ṭhin tute bawkin a ni ei ru leh ṭhin, intimualpho thei kan ni lo asin le.




Ni te chu a liam a, ka ute lo lama an kal ṭhin laiin kei erawh inah ka awm ziah thung a, feh ka châk hlawl lo a ni. Ka chhan duh tlat loh avangin Vli paw'n engmah min zawt reng tawh lo va, Mazara hmel chu ka hmu tawh ngai lo bawk. Hmuh leh chu ka duh ngei a, ka hmu ngam rih lo a ni ber.




Chu bakah Tlantea hnen aṭang Aizawl lama a Service ni tin thu ka hre ziah a, zan lama tlan thlak pawh a nei ṭhin nghe nghe a, a chau thei ngawt ang ka ring. A hun lai khan pui thei ila ka ti a, mahse ka pui thei chuang lo chu a nih kha!




Inrinni a ni a, ni dang ang bawkin inah ka awm a, hmawlh nen buh pho ka veng pah reng bawk. Kawngpuiah chuan Hnahthial Sumo an rawn tlan zauh zauh ṭhin a, Mazara bawk chu ka hre chhuak leh nge nge zel. Aizawl lamah a Service leh ngei ka ring a, ka ngaihtuah angin ani chuan min ngaihtuah ve kher lo vang, ani chuan a motor khalh bak ngaihtuah a nei lo vang ka ring.




A hna a ni tlat a, a ngaihtuah lo phut thei ringawt ka ni lo tih ka hria, mahse phut ruk riauna chu ka nei thung si a ni. Tlai dar 3 leh a chanve velah ka chhungte chu an lo haw a, nilenga kan buh pho chu buh deng khawl lamah kan kalpui a, kan unau thum leh Tlantea chuan buh kan deng a, tawilailirin kan nawr haw leh thlap bawk.




Buh deng khawl chu ka vawi khat hmuhna a ni a, ka nu leh pa bulah pawh ka sawi zawm nasa khawp mai. Aizawlah te chuan a Bag ang zawngin Retailer-ah kan lei ziah a, pitei buh kan den ang chuan kan deng ve ngai lo hrim hrim, tun ṭum ka zin zet chu thil thar hriat ka ngah phah hle a ni.




Inrinni zan a nih avangin kan vaiin kan inkhawm a, thusawitu ka hmu chiah chu ka hawi chhuak ṭha ngam tawh lo reng reng. Kohhran ziaktu khan Pastor a nih thu a sawi ngei a, a awmzia chu theihai vawm thlak ka tum laia min lo hmutu kha Pastor lek a lo ni tihna a nih chu! A thusawi pah chuan min rawn en zeuh zeuh leh ta nghal a, min hre tawh lo hram se ka va'n ti êm, ka chhungte chuan êngmah an hre ve der bawk si lo.




Mut hmain Aizawl lama ka ṭhiante pahnih nen kan inbe leh a, kan inbe rei ang reng khawp mai. Sawi tur an ngah dun lutuk a, rei tak chu ka be ve ve nghe nghe. Aizawla haw thla tawh turin min ti chhên a, kei ve thung chuan haw châkna ka neih awm pawh ka hre lo. A mak lutuk, ka rilru chu ka hriatthiam phak bak a ni.




A tirah te kha chuan ka zin peih lo hle zawk kha a ni si a, tunah erawh kar leh maia haw tur kan nih tawh vang nge ni haw thlak chu ka phur leh phur loh pawh ka hre lo. Mut hmunah chuan thil chi hrang hrang ka ngaihtuah kual a, Mazara bawk chu ka rilruah a rawn lang leh zut zut a, ka ngaihtuahnaah leh ka mitthlaa a hmel a châm reng mai chu a mak a ni.




Eng thil fakâu nge amah ngaihtuah reng turin ka chungah a tih? Ka mitthlaa a hmel châm reng tur khawpin ka chungah a hawihhawm em ni? A teuh lo mai, a awm âwmin a awm tawp a, hawihhawm chhuah te chu khawi lamah, ka lua bungrua a tih tlak paw'n a ngawi reng ringawt a nih kha!




Amaherawh chu hawihhawm lo lutuk leh rilru ṭha lo a ni lo tih ka hre chiang em em tawh a, ka chungah a langa pâuvin ṭha uchûak lo mah se mi dawhtheih dan a nei roh tlat a, ka mamawh hunah min pui tur tak hian a lo awm ve ziah bawk. A chhan ka hre bik lo, amah pawh hian min puih a tum em em pawh a ni chiah lo vang.




Ka mipa hriat tawhah leh ka hmuh tawh zawng zawngah a ṭawngmawh ber a, a hmel ni se a rorum ber a, ka hmuh tirh phei kha chuan thinrim reng a ang ka ti a, insual a hrat hle ka ring bawk. Kar khat deuh thaw chu kan inhre ve ta, ka hmuh tirha ka rin ang kha a ni lo tih ka hre tial tial a, ram lamah te chawhmeh min siamsak hial a, chutah Zualtea lak aṭang min la chhan zui bawk a, ka tan chuan hriat reng loh chu a theih loh a nih ka ring ta ringawt.




A hmel rorum lutuk leh a mize danglam lutuk te chuan amah hriat reng a tiawl pawh a ni maithei, sual hmel deuh sia a sual miah loh vangte chu a ni ang a ruk taka ka ngainat tâk em em ni, mi dang erawh hrilh ka tum hauh lo.




"Numam, lo kal lawk teh" Tlantea chuan inkhawm tura ka insiam mial mial laiin a lo ti a, an pindan lamah min hruai lut a, Pathianni tuk a nih avangin inkhawm vek kan tum a, Tlantea phei chu a insiam zo vek tawh.



"Zualtea khan ngaihdam dil che a duh a, mahse hmaichhana dil che a duh lo thung. Man a tum che tih u Mazaran a lo hmu ve vek bawk si nen a zak khawp mai, keimah kaltlangin ngaihdam dilsak tur chein min ti tawp a ni" a tih chuan



"Ka ngaidam ni rawh se, a bul hnaiah ka awm duh tawh lo tih erawh a hriat ngei ka beisei. Ka phei dawn, ka la insiam zo lo" tiin ka lo chhang a, pindan aṭang chuan chhuakin kan pindanah ka lut a, ka insiam zo har hran lo.




Biak ina kan luh hnu chuan a rukin Mazara chu ka zawng a, ka bulah u Duhawmi an ṭhu ve reng bawk si a, ka hawi vak vak ngam chiah lo. Chu bakah biak in a ni a, inkhawm lai a ni bawk a, mi zawnga hawi kual vak vak chu a mawi lutuk hran lo a ni. Khuang khat hla sain ka zai dalh dalh a, mi tam lo mah ila kan zai chu a ring ṭha phian mai.




A sir berah ka ṭhu a, duh aiin ṭhutna chu a tawt ang reng. Ka nu leh pate pawh an rualpui ṭhutnaah an ṭhu ve ve a, boruak chu a lum lam hret a ni. Dar nawn dawn vel ṭepah min kal pel zawng hian mipa pakhat hi a rawn kal thaw fûak a, a rim aṭang chuan tu nge a nih ka hre nghal thei maw le, mak ve tak chu a ni.




Mi pakhat hian ṭhutna a lo kian sawk sawk a, a ṭhut thlak rualin che lovin a awm deuh vang vang a, a ṭawngṭai a nih ka ring. Dar chu a rawn ri a, kan zai tawp a, Chairman-in hun a hmang zui nghal a, kan unau chuan kan ṭhu ngawi ṭhap a, kan bula mite erawh an ṭawng ri deuh mur mur thung.




Mazara ṭhutna lam bawkah chuan ka mit a fuh leh ta char char a, mipa hang lutuk a ni lo va, a ngo lutuk hran lo bawk. A inthuam dante chu zir chiang ang maiin ka en chík em em a, en loh pawh tum ila ka thei miah lo. Kamis ban bul rawng dum hlang hi a ha a, kekawrah a Sai rawng an tih ang chi hi a ha bawk a, zep lovah chuan a inhmeh thlawt a ni.




A kamis hak chuan a kap êng ang reng phian a, amah a lian bawk si a, inthun pawh a inthun lo. Thilpek hlan dawna kan zai lai te chuan ka la en ru char char a, ka awm dan chu a awihawm lam hret chu a ni. Rei lo tê tê han hawi sawn te chu nei ve mah ila ka hawi sawn rei thei lo, engtin emaw ni tak hian Mazara chuan min hip tlat a ni.



A sam la hnawng deuh chap te chu hmuhnawm ka tiru viau zawk a, zirtirtu te'n pawl an rawn lak hnuah pawh ka ngaihtuahna chu hmun dang daihah a la awm a, chuti ang chu ka ni ngai hauh lo.




Ṭhiante zingah pawh biak in chhung a nih tawh hi chuan nungchang fel ber pawl ka ni ṭhin a, a chhan pawh eng dang vang ni lovin ka nu leh pa min zirtirna rah vek a ni. Tun ṭum erawh ka awm dan mawi lo zet chu nuam ka ti tlat lawi a, zirlai ngaihsak lova thil dang ngaihsaka ka awm hmasak berna a ni nghe nghe.




Inkhawm kan ban chuan kan haw tlang nghal a, kan inthlak nghal thuai thuai a, chawhnu inkhawm chu ka tum tawh lem lo. Thingpuite kan in a, mi dang in tur kan siam bawk a, in leng kan neih avangin Everyday lei turin dawrah ka kal a, dawr chu a lo lun reuh em em leh nghal.




A lun viau e ti lo chuan Everyday ber kher chu an lo nei lo va, dawr nghaktu chuan Venglai dawr lama an kawl thu min hrilh a, kei pawh Venglai lamah ka chhuk thla ve nghal mai bawk. Venglai dawrah chuan ka pitei te veng lam aiin an lo nei chikim a, Everyday chauh lo pawh ka lei nual a, ka duh ai ka rei ta mah mah bawkin ka hria.




Dawr aṭangin ka chhuak chiah tihah Mazara nen kan intawk hlawl a, a bulah chuan amah ang rual vel mipa pakhat hi a lo ding ve reng a, mahse amah ai chuan a tawi zawk thung. Kawng ken nachang hre lo khawpin Mazara chu ka chhoh melh ral a, ka thluak chhungah zawhna tam tak a rawn lut nghal zut zut bawk.




"Lo kal teh" zah pawh dawn lovin Mazara ka kai sawn a, a kuta vawn te chu ka inthlahrung tawh lo reng reng, a chhan ka hre bik lo, a ṭhianpa chuan min en duh voh voh khawp mai.



"Information Mic-a an puan kha a dik tak tak em? Zu chu i lo thlawr ru tak tak em ni? Ka awih dawn ṭhin a, mahse ka awih thei lo. Khati ang tih duh turah khan ka ngai lo che, thu dik tak min hrilh teh" in pakhat phena ka dinpui rualin ka ti nghal a, ani chuan min chhan a tum leh ta miah lo.



"Sawi teh Mazar, ka tih awmzia chu u Mazar. Ni lo, eng lo, Mazar, eng pawh ni se sawi phawt mai teh" buai chuar zet hian ka ti bah nawk nawk a, ka koh dan thlak ka lo tum vel kher chuan ka ṭawng a tibuai vek zawk a ni.



"Maw!?" ti thluk awn duaiin ka ban chuan a dul zawn velah ka nghawk deuh sawk a, chet sawn pawh a che sawn eih lo, chal tichuar nang hian min melh chhuk deuh run a, a hmel hi chu a va han ngainat awm lo ve chiang tak.



"Hre ta la i tan eng nge hlawkna awm?" a tih chuan chhan tumin ka ang zuai hman a, mahse chhan dan tur ka hre hauh lo, a zawhna ka ngaihtuah chian hnu chuan ka tan hlawkna a awm lo tih ka hre zui nghal a, chutah amah bawk



"Hre tur pawh i ni chiah lo" a rawn ti leh a, chutah zet zawng ka awm dan chu a dik lo tih ka hre chhuak a, mawl ka inti em em a, ṭha taka min hrilh ka lo rinna te chu chawp leh chilhin a bo nghal vek a ni.



"I sawi dik chiah, hre tur ka ni lo tak e. Ka lo ngaihtuah ve viau che pawh hi a ṭul miah lo, ka tihpalh ni rawh se" tiin ka inher a, a vawi hnihna atan ka ngaihtuah thu chu hmaichhanah ngei ka hrilh leh ta.




Kan veng lam pana ka kal lai te chuan keimah leh keimah ka inhau ru mawlh mawlh a, ani ang thingtlangpa ve mai mai ka lo ngaihtuaha ka lo khawngaih ve chiam chu a âtthlak tak zet a ni. In chhung ka luh laia min lo biakna te chu hriat mumal pawh ka nei lo, ka thil lei ho dawhkana dahin pindan lamah ka lut zui nghal daih a, dik tak chuan ka rilru a nâ a ni.




Khati teh thlawt khan ka hriat a ṭul loh thu min hrilh a, ka tan chuan dawnsawn a nuam hlawl lo a ni. Ka taksa che det detah chuan ka harh a, ka lo muhil tlang a nih hmel. Tlantea chuan len puiah min sawm a, ka ute pawh rei lovah an rawn lut a, leng turin an insiam zui malh malh a, kei pawh ngawi rengin ka insiam ve ta mai bawk.




Kan pali chuan Field puiah kan leng a, ka rin ai daihin Field-ah chuan phul a lo ṭo hnem a, inkhelh pawh a nuam viau ang ka ring. Chhun aṭang tawh mood fuh lo sa hrim hrim kha ka ni a, nuam han tihna pawh ka nei vak lo.



Ka unaute chu ka zui tawp a ni ber a, Transformer awmna tlanga kan kal te chuan ka ngawi reng a, u Vli paw'n ka mood a dik lo tih hriain chhaih hlim min tum ṭhin a, za lo zetin ka nui lui ringawt zel. Mazara min chhan dan hmek hmuk khan ka rilru a kap tlat a, ka rilru a tina bawk a, theihnghilh mai chu a harsa rih a ni.




"U Mazara te pawh an rawn leng ve dawn a ni ang a, chawlhni tlai dangah chuan a rawn kal ngai mang lo asin" Tlantea hawina lam chu ka hawi thla thuai a, ka ute pahnih pawh an hawi thla ve nghal a, u Vli chuan min lo en deuh kher bawk.



"Hawh u, i chhuk ang u" ti leh Tlantea chuan kal a rual a, keini paw'n kan zui thla ve mai bawk a, Mazara hmel hmuh erawh ka phur teh chiam lo hle.



A ṭhianpa nen an lo ni a, amah zawkin bike dum a khalh a, bike a khalh thiam tih chu ka vawi khat hriatna a ni nghe nghe. Tlantea chuan a be mawlh mawlh a, Mazara ṭhianpa chuan ka ute a rawn be deuh hlawl a, hawihhawm nachang hria tih takah ka ute pahnih chuan an lo chhang ṭha viau. Kei leh Mazara erawh kan ngawi reng thung a, min bia pawh ni se ka chhang let kherin ka ring.




Ka lo ngaina hman thawt thawt te chu ka inchhri rum rum a, thingtlangpa vang mai maia ka rilru a nâ chu ka tlawmngai a ni. Inhnaih takin awmho mah ila kan haw dawn thlengin Mazara nen bik chuan kan inbe lo tluan ṭhak a, zanriah kan ei lai te chuan chaw ei tuina pawh ka nei thei hlawl lo.




Inkhawm thlengin min ti châk lo zo vek a, ka nu leh pa'n inkhawm turin min nawr lui ṭâlh lo se chu ka inkhawm miah lo vang maw le. Chutah biak inah chuan kan sir takah Mazara chu a la rawn ṭhu zui a, biak in chhung ni lo se zawng ka melh hrep ngei ang. Inkhawm chhung zawngin ka rilru chu hmun dang daihah a awm a, phur lutuk lo mah ila Aizawl lama haw thlak chu ka duh tawh a ni ber e.




Mut hmain ka thawmhnawte chu ka khung fel thlap a, kei ang bawkin ka ute pawh anmahni chet chetin an che mawlh mawlh a, kan inbe lutuk hran lo. Aizawl lamah haw ka châkna leh châk lohna chu a inchen vel maithei, ka zan mu reng reng chu ka mu nghet lo hle bawk.




Zan dar 10 leh a chanve vel a ni tawh a, ka la mu meng kar a, ka bula mute pahnih erawh an muhil bawrh bawrh tawh a, thawm ri rek rek ka hriat danah Tlantea chu a la meng ve a nih ka ring. Kan mutna pindan kawngka chu pawn lam aṭang tu emaw ni hian a lo kik ri karh karh a, ka phu deuh zuk nghe nghe. Tho chhuakin kawngka chu ka va hawng a, ka hawn rualin Tlantea chuan




"Lo kal lawk teh, pawnah u Mazaran a hmu duh che" a lo ti a, mak ti zeta ka en laiin a kal sawn a, kawngka pui chu hawngin thawm dim ang reng tak hian a chhuak a, mak ti ru zetin ka zui chhuak ve ta ringawt.



"Ka lut leh nghal mai dawn aw, tlaiah khan a hmuh duh thu che min hrilh tawh a, ka lo theihnghilh daih alawm le" pawn ka thlen rualin Tlantea chuan a lo ti a, in chhung lamah a pen lut zawm zat a, tun ang zan rei tawha min hmu duh teh thut chu mak ka ti khawp mai.




Tlantea a awm lo chiah tihah ka kutah a rawn vuan a, hmun thim deuh laiah chuan min kai phei a, kan din hnu chuan a rawn ṭawng leh ta mai lo. A ngawi reng a, kan awmna a thim vek avangin a hmel pawh ka hmu thei lo va, min hmuh duh chhan chu eng nge a nih hriat a har khawp mai. Ka kut chu a la vuan reng a, dah thlak ka tum miah lo leh ta nghal a, a hma zawnga ka lo ngei ve tehreng nen min vawnna chu nuam ka ti leh viau lawi si.




"Naktukah chuan in haw dawn maw?" aw pangngai tak hian a rawn ti thum dup a, Tlantea hnen aṭang a hriat vek tawh tho ka ring a, ka chhang buai duh ta lo law law.



"Zu zuar an ni a, chu chu an eizawnna ber a ni bawk. An zu thlawr kha ka phursak mai loh chuan an phur zo bawk si lo va, puih an ngaih avangin ka pui ta a ni" tiin thu dang daih chu a rawn sawi zawm a, hrethiam lo tak ka ni.



"Engati nge chuti ang thu teh daih min hrilh? Eng chungchang nge ni reng reng? I thusawi hi pakhat mah ka hrethiam rih lo, ka lut dawn a nia" ka ti deuh hmuk a, ka la thinrim ru deuh tlat a ni.



"Ding teh" tih leh a hma aia min chelh ngheh chu a rual a, ka kal sawn thei lo chiang khawp mai, chuti anga a awm chhan chu ngaihtuah dan tak ngial pawh ka hre lo.



"Thu dik i hre duh a ni lo'm ni?" a tih chuan a thusawi hrethiamin ka chho en deuh hâw a, êng awmna chinah kan ding tawh a, a hmel tak run chu ka hmu chiang ta hle bawk.



"Tluang deuhin in kal dawn nia" ti leh supin ka kut chu a thlah a, a thlah chiah chu ka ruak huaiin ka hria, min hnung chhawn zawnga a kal lai chu lut ta mai lo chuan ka en zui vawng vawng a, ani hi a inthiam lo ve tihna em ni?




(End of Chapter 8)




.

Link:
BBcode:
HTML:
Hide post links
Show post links

Havali Adam
Posts: 246
Joined: October 22nd, 2021, 9:46 pm

Unread post by Havali Adam » July 21st, 2022, 8:53 pm

SUMO DRIVER

By

Havali Adam




Chapter 9




Aizawl lam pana kan tlan thlak chhûng zawngin nizana maia Mazara nen kan inhmuh dan leh kan thusawi chu ka ngaihtuahnaah a awm ngut ngut a, thu tam sawi lo mah se a ṭawngkam aṭang a inthiam loh a ni tih ka ring thiam mai a, rilrua awmtir reng erawh ka tum buai lo. Ka thei ang em ka hre lo va, ka thei dawn lo a nih paw'n ka theih dan kawng ka zawng tur a ni.




Tu min hrilh mah ka ngai lo, kei hian chiang takin kha thingtlangpa, Sumo Driver ve mai mai kha ka veiin ka duh tih ka hria a ni. Chutah ka mipa duh hmasa ber a la ni zui a, ka kum a la upat lutuk loh avangin Mazara ka duhna chu a reh ve leh thuai ka ring bawk.




Ani aia mipa ṭha leh fel tam tak khawpuiah an awm alawm le, min ngaina miah lotu leh min ngaihsak miah lotu lo duh tlat chu thil ṭul ber a ni lo a ni. A âtthlak tak zet zawk, ani aia ṭha mipa ka la tawng em em ang, kei hi Sumo Driver vang mai maia lungngai tur ka ni lo, ka theihnghilh hlen vang vang tur a ni.




Aizawl kan thlen hnu rei lovah ka ṭhiante pahnih an rawn lang nghal a, engmah ka lo hawn miah lo chu niin an lungawi lo dun khawp mai. Mawitei leh Hlimpuii hi chu kan tleirawl chhuah tirh aṭang tawh kan inah an rawn tal tam ve a, ka chhungte pawh an ngam em em a, ka pa phei chuan fiamthu ti tak deuh si hian a fiam uar hle a, anni pahnih erawhin engah teh vak mah an ngâi ngai lo thung.




Zanah an lo leng leh a, thil chi hrang hrang kan sawi a, ṭhiante bula awm zawng a nuam chiang e. A tuk maiah College kan kal leh tawh dawn a ni a, kan chawlh chhung chu a rei lo mah mah a ni. Kar tawpa riah khawm kan rawt a, Hlimpuii te ina riah kan tum zui ta bawk a, ka rilruah chuan ka ṭhiante bak an awm rih lo a ni. Ei rawng bawl ka thiam thu ka sawi chuan a them paw'n an awih duh lo, an awih lo lutuk chu a nuihzat thlak zawk.




Hlimpuii chuan kan zinna chungchang min zawt a, chutah erawh Mazara ka hre chhuak lo thei ta lo. Mazara nena kan awm dan leh kan inkara thil thleng vel tiam lovin engkim ka hrilh fai vek a, an la ngaithla tui thei em em zui. Thingtlanga ka thil tawn ṭhenkhat leh naupang infiam dan chi hrang hrang ka sawi te chuan kal ve an châk thu an rawn sawi chhuak hial a, zep lovah chuan kei paw'n zin leh ka châk a ni.




Mazara a ni emaw ni lo emaw ka pitei khua chu ka ngai hrim hrim a, buh ka ven lai te chu ka ngai thar em em a, Aizawl nen inchangkan hleih viau mah se thingtlang khua chuan min hneh deuh tlat tawh a ni. Tawlailir nawr te kha a nuam ru zek a, buh deng khawla buh kan den tir te kha a dangdai tak zet a, ka rilruah a cham reng mai.




Theihai vawm thlak ka tum lai mawlh kha ka theihnghilh thei lo, Pastor khan min la hmu chiang em em leh ta nghal a! Kar khat a ral a, keini pawh ni tin College-ah zirlai zir turin kan kal leh tlauh tlauh tawh a, Sir Francis-a chu ka ngaihbel nge pawh ka hre lo min hnaih ṭan riauin ka hria, mahse ka hriat sual a nih ka ring ru deuh tho.




Kan thil eina dawrah te thil a lo ei ṭhin a, ni dangah chuan a lo ei ngai miah lo. Ka ṭhiante pahnih lah chuan kan bula ṭhu turin an sawm ve ziah leh ta nghal a, a hnuah phei chuan sawm ngai lovin a rawn ṭhu tawp ta ṭhin a, ka bulah kher a ṭhu ziah leh nghal. College-a kan zirtirtu a ni a, a zirlai ve mai mai min beisei chu ka ring ngam chiah lo a ni.




A fel a, a Polite a, lehkhathiam a ni tih a che zia vel aṭang a hriat hle bawk. Ka bula a ṭhut te chuan nuam ka tih leh tih loh pawh ka hre lo, ka hamhaih ru deuh tlat a, ka ṭhiante erawh chuan min dem tawlh tawlh thung. Min dem ta viau chu thil awm lo pawh a ni tawh bik lo, vawi tam chhun thil ei laiin kan ṭhu dun a, ka rilru puthmang ang erawh a nei lo niin ka ring tawh bawk.




Thla khat a liam a, u Vli pawh phai lamah a chhuk fel leh tawh a, ka ngai reuh khawp mai. Inchhangbung kan nih vang a ni maithei u Duhawmi ai chuan ka kawm hnem zawk a, ka kawm ngeih zawk mah bawk a, mahse ka ngaina ve ve thung. Ka nu leh pa paw'n an be deuh reng a, Mizoram pâwnah daih a awm tawh bawk si a, an ngai ve hle a ni ang.




A chhuk dawn zanah ka room-ah a rawn lut a, Mazara nena kan inkar min zawt chiang a, ka hrilh ṭha duh ta chuang lo. Mazara laka ka rilru puthmang dik tak erawh a hriatthiam deuh tho ka ring, ka sawi duh lo tlat zel bawk si. A chhuk tuk chuan ka zirna lama ṭhahnem ngai turin min chah thlap a, Westlife thlalak min lo hawn ṭeuh a tum thute a sawi bawk a, mi dang chuan kan thu sawi chu ho an lo ti khawp.




"Numam, Office-ah min lo hmu lawk ta che" Class room aṭanga chhuah pahin Sir Francis-a chuan a rawn ti a, ka bula ṭhute pahnih chu kei ang thovin an lo meng buai nak a, rei erawh a ni lo.



"Ka sawi kha i la hria em Mawite? Sir Francis-a hian kan ṭhiannu hi a duh chiang alawm, a vannei bik ê" Hlimpuii chuan a lo ti nghal thawt thawt a, ei lo zetin ka melh ran a, a lo la nui mai mai zui.



"Kan Sir Francis-a leh kan ṭhiannu hi an inngaizawng ta tak tak dawn e, a fuh dawn lutuk" Mawitei ve thung chuan a rawn ti hluai a, ka ṭhutna aṭanga tho thutin ka kal ta daih a, an thusawi chu ka hre peih rih lo a ni.




Office kawngka zawn ka thlen chuan luh ka dil a, zirtu dangin ka luh theih thu an lo sawi a, Sir Francis-a dawhkan awmna lamah chuan ka phei zui nghal bawk. Nghak lawk turin min lo ti a, kei paw'n ngawi rengin ka lo nghak ve mai a, File vel a khung fel mawlh mawlh a, min hmuh duh chhan chu ka hre hauh lo. Office-a hmu lawk tur khan ka Classmate te awm laiin min hrilh a, a nuam duh chiah lo.




"Ka hman e, kal ila" a rawn ti leh ang lawi a, Office-ah emaw kan inbiak dawn ka ti a, ani lah chu a chhuak daih tawh bawk si, a ngaihna hre lo zetin ka zui ta tawp.




College building kawt kan thlen chuan a motor kawngka min lo hawnsak a, zirlai naupangin min lo en hrek hrek hlawm bawk si nen ka lut ta ringawt a, ka luh loh chuan min lo en hrek hrek tute thusawi chu ka hre thuai ang a, an sawi tur awm ang lah ka hre chiang ropui si.




"Dawrah kan pahnih chiahin chawl lawk ang aw, chawhnuah Class kan la ṭha tawh dawn chuang lo" motor khalh pah chuan a rawn ti a, kei erawh ka ngawi reng a, ka rilruah zawhna a tam hle bawk.



"Heti anga ka hruai chhan che hi i hria em?" a rawn ti leh a, a hmel chu rang zet hian ka en a, ani paw'n nui suk hian min lo en zeuh a, hawi sawn rang tak ka ni.



"Hre lo" lu thing nawk nawk chung chuan ka ti a, hlim hmel takin a rawn nui chhuak hawk hawk a, chungte hlei hlei chuan min ti bo a, kan awm dan chu engmah ka hrethiam lo, a bikin ka laka Sir Francis-a awm dan chu ka hrethiam lo lehzual.



"I la hre vat mai ang" a tih chuan a lam pawh ka hawi duh tawh lo, pawn lam hlir ka hawi char char a, kan din rualin hmanhmawh ru zetin ka chhuk thuai a, min kalpuina dawr chu a biru ang reng khawp mai.



"I duh dûh kha chah rawh" dawhkana kan ṭhut hnu chuan a rawn ti leh a, thil ei châkna pawh ka nei chiah lo, a awm dan vel chuan min la tihamhaih reng.



"Engati nge hetah hian min hruai Sir?" tiin zawhna chu ka zawt ta nge nge a, min chhang ta mai lo hian a nui leh suk a, ka thusawiah chuan nuihzat thlak a awm paw'n ka hre ve der si lo.



"Engtik zan emaw ni berah lo len ka tum a, a rem ang chu maw? I nu leh pate an awm ang em?" ka zawhna mil lo zetin a rawn ti daih a, chutah amah bawk chuan



"Ka lo rim dawn che alawm Numam, i hrethiam turah ka lo ngai asin, i hmel aṭang lah chuan i hriatthiam loh hmel bawk si" a ti leh a, a nui zui hak a, ka zak nghal chem chem.



"Sir, eng lo, min lo rim duh suh" mawl mang zet chuan ka ti deuh phawng a, chuti ang em ema sawi tlang chu ka tum bik miah lo, sawi dan tur ka ngaihtuah chian hmain ka sawi a ni mah zawk.



"I va lawmawm reuh tak! Zirtirtu ka nih avangin min zah tih ka hria alawm, mahse zirtirtu leh zirlai naupang an inngaizawng thei lo tih a awm kher chuang hleinem" a tih chuan



"Maw!?" ka lo ti hluai a, inngaihzawnna lam a rawn sawi kai nghal mai chu mak tihna in ka khat a, thil ei châkna nei loh sa nak a laiin ka châk lo zual sauh a, chu bakah Sir Francis-a nen chuan inngaizawng tur angin ka la inngai chhin lo hrim hrim a ni.



"I laka ka awm dan hi i hrethiam tih ka hria Numam, kei hian ka duh che a ni. Min duh ve em tih erawh ka hre lo va, hma ka la tawp dawn a nih ber hi!" thutak hmel deuh hian a rawn ti a, kei chuan sawi tur reng ka hre lo.




College lama kan let lai te chuan pangngai takin min bia a, tawi tê têin ka lo chhang thung a, min duh thu a sawi vang a ni mahna a bulah chuan ka lai ṭut tawh. Zirlai naupangte duh rawnin kei ber kher min han duh chu a ni a, a mak ka la ti ru reng mai. Kei lo mi dang hmelṭha leh fel an tam teh lûl nen nen, Sir Francis-a nena kan inbiakna chu kan ṭhiante'n hre ve ngat se zawng an phur teh ang chu!




College kan thlen hnu chuan zawhna chi hrang hrang ka ṭhiante pahnih aṭang ka dawng nghal zut zut a, an dilchhut dun zawt zawt lutuk chu ka thin pawh a rim thei lo. An zawhna chhang chuang lovin ka nui tawp a, anni lah chuan min zawt chawl hauh si lo. A tawpa tawpah chuan ka hrilh thawi thuak a, mi â lo tih takah an lo hrethiam nghal vek a, mahse keimah ber chuan ka la pawm thiam lo a ni.




Sir Francis-a chu ka duh leh duh loh pawh ka hre lo va, duh tur leh inngaizawng tur angin ka la inngai ngai lo a ni. Min rim tur thu kha tlang takin min hrilh hmiah a, min duh thu a sawi lai te khan ka kimki chawih a, dawnsawn dan kha ka thiam hlawl lo a ni.




Chhungkaw hausa tak an ni a, a hmel ni se chhia tia sawi tur a ni lo va, nungchang lamah pawh a felin a hawihhawm em em bawk. Ka zah ru em em a, chuvangte chu a ni ang duh tur ang zawng paw'n ka en thei rih loh. Zanah chuan u Vli hnenah Sir Francis-a nena kan inbiak dan chu ka sawi thuak thuak a, hrilh loh ka tum viau a, mahse ka hrilh ta tho.




Mazara laka ka rilru puthmang sawi chhuah ka harsat tehreng nen tun ṭum chu ka rilru ka sawi chhuak awlsam khawp mai, u Vli lah chuan min lo la duh pui em em zui. Sir Francis-a hmel chu a takah a la hmu ve miah lo va, College-a kan zirtirtu a nih thu ka sawi aṭangin min duh pui nghal em em ringawt a, kei ve thung chuan rilru siam dan tur tak ngial pawh ka hre si lo.




Min hrilh lawk aṭanga kar hnihna velah Sir Francis-a chu kan inah a rawn leng ta ngei a, ka nu leh pa chuan an lo hrethiam lawk lo va, engmah ka sawi bawk si lo nen an bo viau nghe nghe. Nula ka ni a, chhia leh ṭha hriatna hmang thiam chin tan chuan ka laka Sir Francis-a awm dan chu hriatthiam loh chi a ni lo. Mi puitling leh zir sâng a nihna chu hriat takin a che zia engkim chu a zahawm thlup a, ka pa lakah ngat phei chuan a hawihhawm hle.




An titi ni se a inrual khai em em a, a bikin ka nu chuan a be ṭha nghal sawt sawt hle a, min duh pui nghal viau ka ring ta ringawt. A haw dawnah chuan kan in kawt thleng ka thlah ve a, a kal tawh mai dawn emaw ka tihah pawh a kal mai lo va, sawi tur a vang bawk si, kan boruak chu a ṭang deuh ṭungin ka hria. Luh tuma ka inher rualin ka hnung lam aṭang min kuah thut a, chutah ring vak lo hian




"Ka rilruah hian i awm reng mai Numam" a rawn ti a, kei erawh ka nuam lo tihna a zual a, eng nge nuam lo ka tih chhan ber pawh chu ka hre chuang lo, Sir Francis-a chu Mazara nen ka khaikhin lo thei lo a ni.



"Ka va lut ang e, mut tui le Sir" ti sepin min kuahna aṭang chuan ka tal chhuak a, hawi let tawh lovin in chhungah ka lut zui nghal a, room ka luh hmain ka nu leh pa chuan min lo ko a, an sawi tur awm ang chu ka ring thiam nghal mai.



"Ngaihzawng i neih pawh kan lo ring chiah lo asin Numam, i lo nula ve tak tak tawh a nih dawn hi a, mipain an rawn rim ve tawh che a nia" nui sun sun hian ka pa chuan a ti a, ka ṭawng hmain ka nu zawk chuan



"In Sir Francis-a chu a fel hle mai, i zirn thlengin a pui thei dawn che a nih khâ, hmeichhe dang hel lova kan fanu a rawn hel chat che hi a lawm ka ti viau mai" a rawn ti ve nghal a, ka ṭawng chhuak ve ta.



"Sir Francis-a nen khan kan inngaizawng lo, a lo leng ve mai mai alawm, chuti angin kan inkarah engmah a awm lo. Chu bakah kan zirtirtu a ni a, kan zirtirtu nena inngaihzawn te chu ka duh teuh lo mai"



"I va â mai mai ṭhin tak! Ani ang mipa kha Aizawlah hian an vang teh asin, a fel ang reng bawk si, han induh tawn viau phawt ula a ṭha mai, a bak chu hunin a hril zel turah ngai ang" ka nu chuan nui var var hian a lo ti leh a, chhang tawh lovin ka room-ah chuan ka lut ta daih.




Mut hmunah chuan ka inngaihtuah a, Sir Francis-a nena inngaizawng tur chuan ka inngai thei thlawt lo a ni. Ka ṭhiante mai bakah ka chhungte zawng zawngin min duhpui tih chu ka hai lo, mahse ka rilru chhungril berah chuan min kaptu a awm tlat a, chu chu tu dang ni lovin Mazara bawk a ni. Aizawla kan thlen thlak ni aṭang khan theihnghilh tumin ka bei a, ka ṭhiante nen emaw ka chhungte nena kan awm khawm lai a nih loh chuan ka hre chhuak zel thung a, dik tak chuan amah ka ngai a ni ber.




Kar khat chhung khan langsar vûr ni si lovin kan inkarah thil eng eng emaw ni a thleng nual hman a, a kut hrawl leh lumna ngah tak te kha sik leh ka châk a, thingtlangpa kut a ni tih hriat taka a thap deuh hrup te kha khawih hrehawm ka ti lo reng reng, engtin emaw nuam ka ti zawk tlat a ni. Mazara nena kan hun hman dun rei lo tê suangtuahin zan dar 11 leh a chanve vel thleng chu ka mu meng kar a, ka chhungte lah chuan Sir Francis-a an ngaina nghal ropui bawk si, ka rilru chu a buai ru ang reng khawp mai.




College kan ban apiangin Sir Francis-a chuan min thlah haw ta ziah a, zirtirtu ṭhenkhat leh zirlai naupang tam zawk chuan kan awm dan chu an hre ve vek tawh a, min thiktu pawh an awm nual nghe nghe. Sir Francis-a ber chuan ka mang a tiang ru a, ngaihzawng anga ka en theih loh thu leh ka zah em em thu sawi tawp chu ka duh ṭhin a, a ngaih dan a lo ni lo viau ang tih ka hlau tho bawk si.




Ṭhat namên lovin ka chungah a ṭha a, chuta kara a rilru tina zawnga ṭawngkam chhah chhuah chu ka duh lo a ni. Hun te chu a liam zel a, thlasik boruak kan kai chho tawh bawk. College-ah chuan Sir Francis-a nen inngaizawng angin kan thang nasa hle a, sawi neuh neuh a tamin hriat nuam loh tak tak pawh a tam khawp mai.




Sir Francis-a chu zan tin deuh thaw kan inah a rawn leng ta ziah a, ka nu leh pa chuan pasal atan min duh pui tih chiang takin ka hre tawh a, chungte chuan ka rilru a timangang zual a ni. Sir Francis-a rilru tih nat ka hlauh rualin ka rilru a nuam thei chuang bawk si lo, mi dang hriat lovin ka mangang ru em em ringawt a ni.




"Ka room-ah min lo zui lut lawk la, thil ka lo hawn che a nia, sawi pui tur che pawh ka nei maithei" ka nu nen ei rawng kan bawl laiin u Duhawmi chuan a rawn ti a, a room lamah a kal zui nghal daih bawk.



"Ka va kal lawk mai ang e, eng tak chu min lo hawn ang maw!?" ti niah niahin u Duhawmi room lamah chuan ka phei a, room chhunga ka luh rualin kawngka a kalh nghal hmak a, a chet dan chu mak ka lo ti khawp.



"Hei hi han ha chhin teh, i inhmeh phian maithei a ni" a kawr min pek chu ka inthawlh ve mai bawk a, a sawi ang tak takin ka inhmeh zêk a, hak a nuamin ka vun rawng nen a inchawih hle.



"A va'n mawi reuh, ka duh lutuk" tiin darthlalang hmaah chuan ka ding a, ka inen dik vel mial mial a, lehkha zir lova a len chhuah ve ni a ni a, a lak aṭanga kawr dawn chu ka beisei lutuk lo.



"A ṭhat chu! Lo ṭhu teh Numam, thil sawi pui lawk che ka duh" thutak hmel deuha a tih chuan ka nui tawp riai riai a, khumah chuan kan ṭhu thla a, u Duhawmi awm dan chu ni dang a ang chiah lo a ni.



"Tuna i ngaihzawngpa hi i duh ve miah lo ti raw?" a rawn ti hlawl a, a ngaihtuah vak lo emaw ka ti a, mahse a lo ngaihven ru ve reng a nih dawn hi!



"Ka hre lo" hmun dang hawi pahin ka ti sep a, khumah chuan ka bawk zawm zat a, ka duh leh duh loh chu ka hre lo tak tak a ni.



"Amah hi chuan a duh viau che chuan ka hria, eng nge i rilruah awm? Ka pate sawi vang pawh ni lovin a ṭha turah ka ngai tawp a, mahse i rilru hi a buai hmel ka ti tlat"



"Dik tak chuan maw ka duh paw'n ka hre lo, ka zah em em zawk a ni. A rilru tih nat ka hlau bawk si, ka inhrethiam bik lo, ka rilruah hian mipa dang an awm tlat alawm"



"Mipa dang maw!?" mak tih hmel zeta a rawn tih chuan ka ṭawng sual tih ka hre chhuak nghal a, khumah bawk tawh lovin ka ṭhu pangngai thuai a, ka che reng reng chu a buai vek tawh.



"Ka sawi awmzia chu Sir Francis-a hi ka duh chiah lo, ni lo, ka hre lo, ka duh leh duh loh ka hre lo" ka ti bah nawk nawk a, min en reng lai chuan ka tho thut a, room aṭang chuan ka chhuak ta vang vang.




Choka lamah phei tawh lovin ka room-ah ka lut tlang nghal daih a, mawl inti zetin keimah leh keimah chu ka inhau zui nghal mawlh mawlh a, Mazara ka duh ruk em em thu chu sawi chhuak palh teuh tak ka ni. Sawi chhuak na ila chuan engkim a buai vek ngei ang, zawhna chhan sen loh ka dawng hnem dawn lutuk tih ka hria a ni.




Zanriah ei lai te chuan u Duhawmi chu ka melh ṭha ngam vak lo va, ani paw'n zawhna min zawt tawh em bik lo. Zanah chuan zan dang ang bawkin Sir Francis-a chu a lo leng leh a, kei aiin ka nu leh pate chuan an lo be ṭha a, kei chu ka lo ṭhu ngawi reng ringawt.




A haw dawnah kan in kawt thleng ka thlah leh tawp a, keimah chuan hmasawn ka tum lo hrim hrim a ni ber e. Ani erawh thla eng emaw zah chhung kan inah a lo chuangkai tawh a, hma a sawn em em bik a, ka chhungte'n min duh pui tawlh tawlh bawk a, a awm lo hran lo ve, a nungchang leh a hnathawhin a zir ve êm a ni.




"Hlawl che chuan, eng nge i rawn tih dawn? Lo lut rawh, awi i lo kal thut bawk si a, a mak ê" kalna tur ken pahin ka ti nghal zung zung a, Tlantea chu ka hmuh thut ka inring lo a ni.



"Khawiah nge mi dang? Khaw'nge pa Sangtea te hi?" a thil khai lai chhuata nghah pahin a rawn ti a, an len chhuah lawk thu sawiin tui in tur ka pe a, engtin nge kan in awmna chu a hriat pawh ka hre lo.



"In in hi ka rin lohna lam daih a lo nia, ka pa'n in awmna address ziakin min pe thlap zawk a, ka bo nasa lo hlauh. Landline Telephone-a lo biak che u kan tum a, in number kan hre leh si lo va, kan rawn chhuah har phah alawm" a tih chuan



"Eng nge i rawn tih dawn reng reng a?" ka lo ti ve mai a, a in tur thei tui chu ka siam melh melh a, an khua leh Aizawl inkar a hla ve si a, a chau viau maithei a ni.



"Phone ka lo lei dawn maw le, min kal pui ngei a ngai ang. Phone neih loh reng zawng a buaithlak em mai, ka pa berin lei a ti tlat bawk si a, ei chhiat inhuamin kan lei tawp dawn a nih hi!"



"Awi a va ṭha dawn ve, phone in neih chuan pitei te nen pawh kan inbe thei tawh ang a, a ṭha ngawt ang. Ka kal pui dawn che a nia, ka ṭhiannu nutei hian phone dawr a nei alawm"



"Ṭha tak lei a ngai chuang lo a nia, inbiak pawh theihna a nih chuan a tawk mai. Engtik velah nge pa Sangtea te chu an lo haw ang? Ka rawn kal deuh thut bawk si a, mak an ti ngawt ang" a tih laiin ka pate chu an lo lut a, inrinni ah hi chuan an chhuak zauh zauh a, mahse an rei lutuk ngai lo.




Tlantea hmel an hmu chiah chu zawhna chi hrang an zawt nghal a, sitting room-ah chuan an ṭhu phei ta daih bawk. Tlantea chuan an khuaah sawhthing leh hmarcha rate a ṭhat thu leh an hralh hnem thute a sawi lûam a, an pawisa hmuh aṭanga phone lei an tum thute a sawi chuan ka pa chu a inthiam lo thar hle a, a leisak theih thu sawi mah se Tlantea erawhin a lo duh hauh lo.




Tlai chhe lutuk lovah u Duhawmi pawh a rawn haw a, Tlantea hmel a hmu chu mak a ti ve hle a, kan chhungkua chu min ṭhawng hlawm khawp mai. Zanriah kan ei lai te chuan Tlantea chu a ṭawng duh barh barh hle a, ka pate'n zawhna an zawt awl bawk si lo va, a ṭawng chawl lo hrim hrim a ni.




Sir Francis-a chu a lo leng leh a, zan dang ang bawkin ka nu leh pa pawh an lo fel siam siam leh hle a, Tlantea chuan min lo en chiang khawp mai. Sir Francis-a ka thlah lai te chuan pawnah a rawn chhuak ve a, a awm dan chu mak ka ti deuh, Sir Francis-a chu a haw ta vat reng a, Tlantea a awm ve kur avangin min kuah miah lovin a haw ta ringawt bawk.




"I ngaihzawngpa em ni?" Tlantea chu ka en vat a, a hmelah chuan zawhna tam tak ka hmu ni maiin ka hria, min zawh dan teh tlawng lah chu chhan dan tur ka thiam mai lo.



"U Mazaran in awmna veng min zawt asin" a rawn ti leh chiah chu ka thin a phu nghal dawt dawt a, a hriat phâk hlauhawm khawpin a phu ring a, Mazara hming ka hre leh chiah chu ka buai vek a ni.



"A nih chû, lo la leng se a ṭha tak ang a, engtin nge a zawhna chu i chhan?" nui lui zeuh pah chuan ka ti a, ka nuih erawh a va han za lo chiang tak em, ani lah chu a nui miah lo leh nghal.



"In awmna veng ka hriat bik loh avangin ka hrilh ta lo, mahse ka pa lehkha ziah ka hmuh a, a hrethiam turah ka ngai hmiah, u Mazara nen hian inngaizawng emaw ka lo ti asin Numam" a thu sawi avang chuan ka phu leh ta dâwrh mai.



"A teuh lo mai, ani te chu, eng lo, ka....ani te chu ka hmel hriat satliah mai alawm a nih" ka ti bah deuh nuai a, chik zet hian min en reng a, awm rei tawh lovin in chhungah ka lut daih a, ka thinphu chu rang tak a ni.





(End of Chapter 9)




.

Link:
BBcode:
HTML:
Hide post links
Show post links

Havali Adam
Posts: 246
Joined: October 22nd, 2021, 9:46 pm

Unread post by Havali Adam » July 22nd, 2022, 9:16 pm

SUMO DRIVER

By

Havali Adam




Chapter 10




Pathianni tukah chuan kan vaiin kan inkhawm a, Tlantea pawh inkhawm thawmhnaw a lo keng sa thlap a, kan biak in len thu chu a sawi deuh chhen mai. An khuaa biak in nen a inlen hleih ve êm bawk a, a sawi reng pawh chu hriatthiamna chen ka nei tho.




Inkhawm banah Tlantea chu Mawitei leh Hlimpuii te nen kan len kual pui ve a, Sikulpuikawn Bridge-ah te kan kal a, ni sa viau mah se thil a thaw heuh heuh thung a, a nuam kan ti tlâng khawp.Tlantea pawh mipa mah ni se Mazara te ang rum rut lutuka ṭawng duh lo a ni lo bawk a, ka ṭhiante pahnih paw'n an nel thuai a, inrual khat ṭheuh ṭheuh chu thil kan sawi tlâng thei fû mai.




Kawng ṭhenkhatah erawh ṭawng dan chin tâwk thiam a ngai a, Tlantea chu thingtlangmi a ni tih theihnghilhin thil kan sawi palh ang tih a hlauhawm hle. An ṭawng thui lutuk dawn chuan ka ṭhiante pahnih chu ka signal vat zel a, anni pawh hrethiam takin an insum ve leh mai ṭhin bawk.




Thawhṭannia phone lei tumin ruahmanna chu kan siam ta a, a rawn kal hla vang vang bawk si a, College kal lovin phone lei tur chuan ka chawl tawp dawn a ni. Ka ṭhiante pawh ka hrilh vek tawh a, min chhaih titih hian Sir Francis chu an rawn sawi chhuak deuh kher a, Tlantea awm laia min chhaih vel kher chu a ṭul teh chiam lo a ni.




Tlantea lah chu hrethiam ve ni awm tak hian a awm leh ta nghal a, hriatthiam pawh a hrethiam tak ang, nizanah khan Sir Francis-a nen min hmu dun tlat. Zanah chuan u Vli room-ah kan mut tir a, harsatna engmah a siam lo va, a inthlahrung deuhin ka hria.




Inthlahrung lo se kan duh a, a nui hmel phenah chuan inkiltawih rukna leh inthlahrun rukna tlat alawm, chhungkhat ang maia kan awmho ṭhin avangin zalen tak leh ngampa takin awm bawrh bawrh se kan duh a, mahse Pathianni zan chuan a inthlahrung thar deuh tlat a ni. Kei ang kilh kelhin ka chhungte chuan an ngaihsak lo va, kei erawhin ka hrethiam vek thung.




Thawhṭanni tûk a ni a, zing aṭang ni chu a sa nghal phat a, khua a chhiat a rinawm loh hle. Tukṭhuan ei laiin ka pa chuan Tlantea chu Phone leina tur pawisa pek belh a tum thu a sawi leh a, Tlantea chuan a lo hnial nasa ngâng mai, mahse a hnial hneh ta chuang lo.




Chaw kan ei kham a, chhuak turin kan insiam zui nghal a, u Duhawmi erawh kan sawm buai duh lo law law a ni. MCS Exam a awm hnai a, a zirh ngawrh zual hun lai tak a ni a, ka pa paw'n tibuai lo turin min hrilh bawk. Dar 9 pelh hret velah Phone lei tur chuan kan chhuak ta ngei a, Bus-in Bazar lamah kan kal a, Hlimpuiin a nutei a lo hrilh sa vek tawh bawk a, hun rei tak kan hman ka ring lo.




Traffic Jam awm lovin Hlimpuii nutei dawr chu kan thleng phei a, phone thleng thar erawh a awm lutuk lo. Tlantea chuan Nokia phone chu a thlang a, Hlimpuii nutei chuan min lo tlawm nghe nghe a, a lawmawm tak tak a ni.




Phone dawr aṭanga kan chhuah hnu chuan ka pa ka be nghal a, BSNL lama thawk te ah hmel hriat a nei a, awlsam deuhin Sim Card chu la thei ka duh. A chhan chu chawhnu lamah Tlantea haw leh nghal a tum bawk si a, Sumo Counter thleng thlah phei a ngai dawn bawk nen kan tlai chhe duai ang tih ka hlau a ni. Zep lovah chuan Mazara hmel ka hmuh ngei ka ring a, ka hmu châk ru hle bawk. Ka rilru chu uirê deuh tlata ngaihna ka nei dawn a, mahse ka nei ta lem chuang lo.




Ka pa chuan min lo be leh a, kal tawp turin min ti a, keini pawh kan muangchang lo hle. BSNL building kawt kan thlen chuan hmeichhe pakhat hian min lo bia a, ka pa hming min zawt a, ka sawi ve mai bawk a, ka pa hming a hre chiah chu min tlawn nghal ni maiin ka hria. Awlsam deuh hian Sim Card chu kan nei thei tak tak a, Tlantea phei chuan mak a lo tih hmel khawp.




Mizorama Phone a rawn thlen tirh te kha chuan Sim Card nei tur ringawt paw'n kan intlar ṭhin kha a ni a, khang hun lai kha chuan Middle School kal rual vel lek ka la ni a, ka pa khan min chhuah vah pui hnem lo se chu ka hre kher lo vang. Tunah erawh Sim Card neih pawh a awlsam ta, ka pa chu awm lo se hun kan hmang rei viau maithei bawk. Min lo tihfel saktu chu ka pa ṭhiannu hi a ni a, a insawi dan chuan ka pa MCS nih lai vela a ṭhiannu a nih hmel.




Ni ên dan chu a danglam tial tial a, chawhnu hmel chu rei lovah kan hmu a, tlai dar 2-a chhuak tur an nih avangin Counter lamah kan tlang phei leh nghal bawk. Counter chu kan va thleng ta ngei a, ka phur ruk ang hûin nuam ka ti leh chiah lo.




Mazara hmel reng ka hmu lo va, a chhan chu a lo la thleng lo miau a ni. Counter chhunga sana intar chu ka en deuh chhen a, Tlantea ve thung chuan phone a khawih mual mual a, khawih dan tur vel ka hrilh nual tawh a, a hre chak khawp mai.




Dar 1 leh a chanve velah chuan Counter hma takah HAUHNAR TRAVEL Sumo ngei mai chu a rawn ding ta, phur zet hian ka lo ding hluai a, Mazara hmel ka hmu chiah chu ka awm hle hle thei lo a ni ber. Ka hmuh hmasak ber ang chiahin lukhum hma thlawk a khum a, T-Shirt rawng uk hi a ha bawk a, a awm dan aṭang chuan min la hmu miah lo tih ka hre thei. Tlantea chu Sumo bulah a phei a, kei erawh Counter chhungah ka la ding reng thung.




"U Mazar, ka bungrua vel hi a tam lutuk lo va, ka pawm mai dawn asin" tiin Tlantea chuan a be zung zung a, Mazara chu a lo bu nghat a, ka din lansarh ve tawh tehreng nen min la hmu lo cheu a nih chu!



"A hnung hi ka'n siam ṭha lawk ang e, ka rei lo vang" ti supin Tlantea chu a be zauh a, motor phena a kal pah chuan min rawn hmu ve ta, ngawi reng hian a rawn pen chhuak leh ngat a, kei chuan lai zetin ka lo nuih ringawt a, a hnen aṭang erawh engmah ka dawng let ve lo.




Motor hnungah chuan a lut tlang leh ta daih a, ka nui tawp chiang khawp mai. Tlantea chu ama buai buaiin a lo buai ve a, min ngaihtuah lutuk loh avangin motor hnungah chuan ka va kal ve ta râwih a, ka hmaa che mawlh mawlh pa chuan min en duh ṭhak lo maw le. Ka aw te chu ka'n thian ri kharh kharh a, kan inhnaih tehreng nen min la en duh chuang lo. A hnuah phei chuan a mood a fuh lo a nih ka ring ta tawp a, ka kal sawn zui ta daih bawk.




"Numam!" kawngpui lam chu ka hawi phei a, Sir Francis-a chuan motor chhung aṭang mak tih hmel deuh hian min lo en a, kawngpui sira motor hung ṭha sawk sawkin ka bulah a rawn kal phei nghal a, kan inhmuhna hmun chu a fuh teh chiam lo a ni.




"Engati nge vawiin lamah i hmel ka hmuh loh? Eng nge kan vengah hian i lo tih reng reng?" a hmelah chuan mak tihna a la lang nual a, Chanmari vengah an awm tih ka hre chhuak hnuhnawh a, min hmu pawh chu a awm lo chuang miah lo.




"Ka unaupa a rawn zin a, vawiinah a chho leh nghal dawn a, chu chu ka thlah lawk dawn a nih hi, i va haw hma ve?" pangngai tak chuan ka lo ti ve mai a, Mazara chu ka mitsir ru zeuh zeuh a, kan dinna lam chu a rawn hnaih tial tialin ka hria.




"I hmel ka hmu bawk si lo va, College-ah ka awm rei peih ta lo a ni. Ka lo thlah pui che ang a, an kal liam hnuah in in thleng ka va thlah ve thung dawn che a nia" nui paha a tih chuan ka nui tawi tak a, Mazaran kan ṭawng a hre pha vek bawk si a, nuam ka lo ka ti ta viau mai.



"Min thlah a ngai lo vang Sir, Bus a awm a, keimah paw'n ka haw thei lutuk alawm, i duh leh min va hawsan daih zawk rawh" ka ṭawngkam chu a mawi leh mawi loh pawh ka dawn lo, ka ngaihtuah chian hnuah erawh hriat a nuam lutuk dawn lo tih ka hre thung.



"Ka lo thlang ang che, a ho lutuk, ka chaw ei pawh a tui phah sawt maithei asin"



"A ngai lo tak tak a nia Sir, kan in awmna a hla bawk si"



"Chuti ang mai mai an ngaihtuah ngai lo, motor ka nei a, a awlsam lutuk zawk alawm"



"Thlah luih phet tum kha a fuh ber lo" rawn ti tu chu ka en nghal vat a, kei ang bawkin Sir Francis-a chu ka hawina lamah a hawi deuh vut a, Mazara erawh min hnung chhawn zawngin a la che reng a, rawn ṭawng kha amah a ni tih chiang takin ka hria.




"Min hrethiam la, lo ṭawng kha nangmah i ni mial em?" Sir Francis-a chuan Mazara chu a va din chilh titih a, hawihhawm viau angin lang mah se a hmel aṭang chuan a thin a rim tih ka hre thei, chuti anga a awm chu ka beisei miah lo bawk.



"Min chhang dawn nge ka ṭawngtir dawn che?" Sir Francis-a bawk chuan a ti leh hmuk a, a hma aiin a din hnaih zual sauh a, mahse Mazara chu a tiat miah lo maw le, an taksa chu a inlen hleih khawp mai.



"Nang Sumo Driver hi i inla ngeng ve deuh em ni? Eng vangin nge ka bialnu nena kan titina ah te i lo tel ve a?" tham lo deuha ti salh salhin Sir Francis-a chuan Mazara chu a kuai her a, Sumo hnunga a nam beh rawk lai chuan



"Sir!" ka lo ti hluai a, kan thawm hriain Tlantea chu motor chhung aṭang a rawn chhuak ve vat a, Mazara leh Sir Francis-a awm dan a hmuh chuan mak a ti ve hle a, Counter nghaktu putar pawh a rawn phei ve nghe nghe.



"Min thlah rawh le" Mazara aw chu ka beisei loh deuhin a pangngai viau a, tawi tê hian a nui pah zeuh bawk a, a nui hmel ka vawi khat hmuhna a ni a, nui mah se a nuihzat vang a ni lo tih ka hre chiang hle.



"Enga!?" tiin Sir Francis-a chuan Mazara chu a motor bangah a nawr ri deuh chawrh a, an inchen titih thûak a, pumrua ah erawh Mazara chu a lian zawk a ni.



"I beng a ngawng miah lo" Mazara chhan dan hmek hmuk chu Sir Francis-a huat a tling tâwk em em zel a, tlangval ve ve an ni bawk si a, mi hmai zah hauh lovin an inkhawih duh mai ang tih ka hlau ta hle.



"Sir, duh tâwk rawh, kal ang, haw tawh ang" tia va kaih sawn ka tum lai chuan



"Lo awm sawn rih teh" ti deuh hrawkin min nam kat dâwr dawr a, Tlantean min lo chelh lo se chu ka tlu chiang khawp ang, din ngil paha Mazara te lam ka hawi phei leh chiah chu



"Awi!" ka ti nghal ṭhawt a, Sir Francis-a zawk chu kawngpuiah a let tual a, ka mit ngeiin Mazaran kan Sir a hnek tlu chawrh lai chu ka hmu a, chu chuan nasa takin ka thauah min man bawk.



"Engati nge kut i thlak kher!? A ṭul miah lo, khawlaiah kan awm hi hre ta che" ti deuh hlawk hlawkin Mazara chu ka chho melh ran a, Sir Francis-a erawh a rawn tho chhuak thei mai lo.



"Awm sawn teh" ti hmuka min kal pelin kawngpuia che ṭuah ṭuah chu a kai tho lawp a, Counter chhung lamah hruai pheiin a ṭhut ṭhat tir a, Sir Francis-a lah chu a zawi hnuang a, a hnar aṭang chuan thi a chhuak duh khawp mai.



"Ngaihtuah ngaiin awm tawh lo vang che" min chhuk melh run pah hian a ti thum chhal a, engmah sawi leh tawh lovin Sumo lamah chuan a phei nul nul a, Tlantea ka en chuan min lo nuih var var daih a, Mazara thusawi chu ka la hrethiam thei lo.




"Mami, i ṭhianpa hi damdawi inah emaw kal pui la a ṭha ang, a hnar thi hi a reh mai hmel loh tlat" Counter nghaktu in a rawn tih chuan Sir Francis-a lam chu ka hawi thla vat a, a hma aiin a harh hmel tawh a, biak chu a huphurhawm hle.



"Sir, damdawi inah kal lawk ang, i hnar hi a thi nasa êm mai" ka tih chuan lungawi loh hmel zet hian min en a, mood fuh loh sa nen buaipui chiam tur chu ka ni miah lo maw le, mahse kan Sir kha a ni miau a!



"Bus chuan haw zawk mai teh!" nêm fahran lo hian a lo ti deuh hmuk a, a motor hunna lamah chuan a kal phei zui nghal a, ka chapona chu a rawn chhuak a, ngaihven buai vel chu ka tum tawh lo nasa a ni.




Mazara hmel chu hmuh tumin ka hawi kual vak vak a, Counter hmaa Sumo awm tawh loh danah an chhuak tawh tih ka hre zu nghal a, Sir Francis-a thlavang hauh ang maia ka lo vin kher kher chu pawi ka ti thar ta hle bawk. Rei awm tawh lovin Counter aṭang chuan ka chhuak a, Bus-a ka chuan chhung zawngin Mazara che vel chu ka mitthla ah a awm a, ngawi renga a luhlul tlatn chuan engtin emaw ni tak hian min hneh leh tlat tawh.




He pa ren run hi mi mak ve tak chu a ni e, kan inhmuh apiangin hriat zui vawng vawng theihna tur thil a hnutchhiah ngei ngei a, keiin ka lo hre zui vawng vawng ṭhin reng bawk. Thla tam tak hnuah chauh kan inhmu leh a ni a, chutah kan inhmuh dan lah chu duhthu a sam lo em em leh ta nghal a, mahse a hmel ka hmu leh hrim hrim pawh chu ka hlim phah, chuti ang khawp chuan ka veiin ka lo ngai tawh a ni.




Zanriah ei laiin ka pa'n Tlantea ka buaipui dan vel chu min zawt a, Mazara leh Sir Francis-a te awm dan chu ka sawi lang lo va, sawi chhuah chi pawh a ni lo. Engtin emaw ni tak hian hlim ruk dan riau leh zângkhai ruk dan riau ka nei tlat pek a, Mazara chu ngaihbel loh theih pawh a ni lo. A hmel hmu lo ta ila chuan ka hlim kher nâng, chutah ka hmuh lai ngeiin a la nui zui a, a nuih dan kha ngeiawm rawngkai mah ni se a nui hmel ka hmuh hrim hrim kha thil thar leh bawk a ni.




Zanah chuan Sir Francis-a hmel chu kan hmu ta hauh lo mai a, vawiin lamah khati ang khan kawngpuiah a let tual bawk si a, a taksa chu a la nâ deuh a nih ka ring. A lo leng lo chu leh lam kawng zawng tak chuan nuam ka ti a, ka nu leh pa erawh chuan an ngaichang ru deuh rengin ka hre thung. Zep lovah chuan Mazara kutthlak kha a nâ ngawt ang, Sir Francis-a te ang mipa sâng pawh an thal chiang hle kha a ni si a, ka vin chiam erawh inthiam lohna ka la nei reng mai.




"Ngaihtuah ngaia awm tawh lo turin min ti maw!? Eng a sawi tumna nge ni ang le?" ti hluaiin ka mu tawh chu ka ṭhu chhuak hlawl a, zan rei tawh mah se ka muhil thei lawk lo va, thil chi hrang hrang ka ngaihtuah kual vel a ni ber.



"Awi! Ani khan min ngaihtuah tihna em ni? A ni chiang lutuk, min ngaihtuah a ni. Min ngaihtuah avangin kut a thawh maw!? HMINGTHANPUI mawli, engtin nge i hriatthiam loh theih zawk?" tiin keimah leh keimah chu inhau mawlh mawlh a, ka thil ngaihtuah chhuah chu a tak ngei ni se ka va'n ti tehreng êm.




Hlim ru zetin khumah chuan ka mu leh a, ka thin te chu a phu dup dup a, Counter chhunga kan awm laia Mazara min biak dan chu ka bengah a ri nawn tluk tluk a, a laka ka rilru puthmang ang chiah chu ka lakah lo pu ve reng se ka ti a, mahse chu erawh ka ngaihruatna mai chauh a la ni thung. Engtin emaw ni taka hriat theih dan ka zawn a ngai tih ka hria, hriat ngei ka duh bawk.




Ka ngaihtuah kual nasa lutuk a, ka mut har phah khawp mai. Ka zing tho te chu ka zâng vah a, lawm lova nuih lah ka ngah em em a, u Duhawmi chuan min en deuh vawng vawng zel nghe nghe. Ka hlim êm asin, ka mipa duh ruk leh vei rukin min ngaihtuahna thu a chhak chhuak a nia, ani ang mipa ṭawngmawh lak aṭang chuan a beisei awm loh hle zawk a ni.




College ka thleng chiah chu ka rilruah Sir Francis-a a rawn lang nghal a, engmah hrethiam lovin ka ṭhiante pahnih chuan an rawn la sawi chhuak zui, a hming hriat reng pawh chu a ninawm lam lek lêk a ni. Dik tak chuan ka zah a, kan zirtirtu a ni bawk a, khati anga mawi lo leh hawihhawm lo khan Mazara lakah a chet duh ka ring ngai lo.




Mipa an nih avangin thiam chawp ka tum viau ṭhin a, ka thei chuang der lo, Mazara laka a chet dan kha ani ang tan chuan a mawi lo ve êm a ni. Sir Francis-a chuan chawhnu lamah Class a rawn la a, melh khat paw'n min melh eih lo va, nimina thil thleng avang chuan a danglam chiang khawp mai.




Zirlai te hmaah chuan ṭha takin zirtirna a pe tho va, a hnar bul vel erawh a duk deuh a, Mazara kutthlakna chu a lang chiang hle. Ban hun a lo ni a, ka ṭhiante pahnih chuan Sir Francis-a'n min thlah leh dawn emaw tiin min hawsan a, Bus-in ka haw ta daih, kan inkar leh nimin thil thleng vel chu an hriat ve kher ṭul ka ti rih lo a ni.




Thil hre chhuak thutin Bus Stand hmasa berah chuan ka chhuk a, Chanmari lama tlan Bus-ah chuan ka chuang zui nghal a, Counter-a kal chu ka tum deuh thut a ni. Dar zat ka en a, Sumo rawn thlen thlak hun vel chiah a ni a, Mazara chu hmuha ngaihdam dil bakah lawm thu hrilh ka duh a ni. Amahah chuan nasa takin beiseina ka nei thar a, thingtlangpa zunah chuan uai hneh tak ka ni. A lakah chuti ang rilru put chu ka tum bik miah lo, mahse hma hun hi hriat a lo har a ni e.




Counter ka thlen chuan Sumo ding hmuh tur a awm lo hrim hrim a, Counter lo nghaktu chu zah pawh dawn lovin ka zawt tawp a, ani chuan Mazara te an tlan loh thu min lo hrilh a, ka nguai nghal vek thei maw le. Kal lama hlim ru viau si kha haw lamah chuan ka hlim lo hle a, kan ina ka luh hnuah erawh ka chhungte hriat ka hlau hle thung. Chuti maia beidawn ka tum hauh lo va, ni dangah pawh hun a la tam alawm le, kan inhmu leh tur hi a ni hrim hrim.





"Tun lai hi Francis-a hmel kan va hmu khât ve Numam" zanriah ei laiin ka nu chuan a rawn ti hlawl a, u Duhawmi nen kan mit a intawng chat a, ka pa chuan chaw a ei mial mial thung.



"Nia, ka hre bik lo, a buai a ni maithei a ni" ka'n tithla ve rawk a, Sir Francis-a lo len tawh ngai loh chhan chu ka hre bik miah lo, ka thaw erawh a veng deuh huai a, chiang takin Sir Francis-a rawn len tawh ngai loh vang a ni tih ka hria.



"Hmanni zan khan i pa nen kan titi luam a, Francis-a hi makpa atan pawh a iai awm vak dawn lo thute kan sawi chhuak a, i u hi pasal i neih khalh nulh mai ang a!" ka nu thu rawn sawi leh avang chuan ka chaw ei a tawp hmak a, mi dang chu nui hlawm mah se ka nui ve thei hauh lo.




"Pasal neih ka la tum teuh hleinem ka nu, Sir Francis-a nen hian kan inngaizawng tak tak lo bawk" zep nei miah lovin ka ti ta tawp a, inngaizawng ang maia a dera nun chu ka ning ṭan tawh a ni.



"Ka va awih chiah lo ve Numam, a rawn len ngun êm khâ, nangmah hian i lo duh ve miah na nge?" mak tih hmel zet hian ka nu chuan min en a, ka pa paw'n min en chiang khawp mai.



"Duh lo" ka chhungte an ni a, anni bulah lo khawiah nge ka sawi chuan ang ni, chu bakah Mazara laka a chet dan khan ka hmuh dan a tidanglam vek a, kan Sir mah ni se engtin emaw ni tak hmuh dan ka nei tlat tawh.



"I va mawl mai mai ṭhin tak, ani chuan a duh ve êm che khâ, a haw dawn apiangte khan in inthlah zan tin ve ṭhin si a, kan makpa turah ka lo nghal hmiah tawh asin" a rawn tih leh chuan



"Min sawi pui tawh rih lo teh ka nu, ka chhungte in ni a, ka zep lo vang. Sir Francis-a hi ka duh chiah lo, kan Sir a ni a, a rawn len te chuan hawihhawm chhuaha lo biak kha thil mawi alawm a nih" ka lo tih zawm zat a, ka kham zui nghal daih bawk.




Ka nu chuan engmah a sawi chhunzawm tawh lo va, ka pa pawh a ngawi deuh hmuk a, an lung a awi chiah lo a nih hmel. U Duhawmi erawh a awm pangngaiin a awm tawp a, ani hi chuan a hma aṭang daih tawh a hriatthiam ka ring. Thleng ka sil lai chuan chemte chu fian emaw tiin ka zut palh a, ka kut chu thi ṭha duh zawih zawih tak a ni.




Damdawi hnawihin ka nu chuan min tuamsak nghal zung zung a, ka rin aiin a nâ daih, a kak thuk viau a ni ang. A tukah chuan kut tuam chungin College-ah ka kal a, zing kar aṭang tawh thil tih tum ka nei sa hrim hrim a, kal loh ngawt chu ka tum hauh lo. Ka intih nat dan vel chu ka ṭhiante ka hrilh a, min zawt miau hek.




Zirlai chu kan zir ṭha par par hle a, zirtirtu aṭang tûmah chawl an awm lo bawk. Chawhnu a nih chuan ka phur ru leh hle tawh a, a chhan chu Mazara hmuh ka tum vang a ni. Bang hma hlauh ila ka ti hle zawk a, a tawp bera Class rawn la tu lah chu Senior Teacher a ni a, a la hmanhmawh lo em em zui.




Dar 3 rik dawn velah Counter chu ka thleng phei a, HAUHNAR TRAVEL Sumo ngei mai lo ding ka hmu chiah chu hlim tak ka ni. Sumo chhung aṭang chuan Passenger an lo chhuak sap sap vel mek a, Mazara erawh ka la hmu mai lo. Sumo dinna bulah chuan ka kal hnai zel a, thil zawng ang maia kun ngul Mazara chu ka hmu ta. Koh nghal ka tum deuh ûk a, mahse ka koh ngai lovin min rawn hmu se ka duh avangin ka ko leh ta lo.




Che ri ruk rukin ka din lohna lamah chuan a chhuak daih a, ka lung a awi lo hman ṭep nghe nghe. Motor chunga bungrua chu a la thla mial mial a, a hawi lo ve chiang alawm, hawi leh hret se min hmu ni mai tur, chuti ang khawp chuan a hmuh turin ka ding langsar tawh a ni. Ni dang ang lo takin lukhum a khum tawh miah lo va, mahse lukhum a khum aiin pa ka ti daih zawk, a hmel rorum rut te chu hmuh nuam ka ti tlat tawh a ni.




"Mazar" ka insum thei tawh thlawt lo, min hmu har lutuk chu a awihawm loh zawk, min hmuh loh der te ka ring hman hial a, mahse a awm dan aṭang chuan min hmu lo tak tak a ang bawk si.



"Ka lo kal a" Sumo chung aṭanga min chhuk melh run lai chuan ka ti leh ringawt a, sawi tur chu baihvai tak ka ni, chu bak sawi leh tur pawh ka hre chuang lo.




Rei min en lovin a thil tih lai chu a tihzawm leh mial mial a, mi ṭawngmawh tak a ni tih hre sa lo ila chuan ka lung a awi lo ngawt ang ka ring. Kan be ve em em a, nuih khat pawh ka hlawh lo, chuti ang mipa mize pu lakah chuan ka rilru a awm tlat bawk si. Chuti teh lûain min rawn ngaihven lo mah se Sumo chung aṭanga a rawn chhuk lai chuan ka kut chu a rawn en chat a, ka lo tuam deuh bûr bawk nen a mitmengah chuan min ngaihtuahna ka hmu leh tawhin ka hria, nuam ka va'n ti ru tehreng em.




"Engati nge i kut?" ka beisei ang ngeia min ngaihtuahna awkâ ka hre chiah chu mi ang lo ang maiin ka khi ver ver a, hriatthiam loh hmel zet hian ani chuan min lo en run thung.



"Eng lo, nizanah thleng ka sil laiin chemte ka zut palh a, a nâ hran lo" tia ka chhan rualin ka kut chu a rawn la kâng a, a en dik vel a nih chu! He pa hian ka rilru ang a pu ve tak tak em ni ang? Lalpa, put tir hram teh!



"Fimkhur ta che" ti deuh hmukin ka kut chu a thlah a, ṭawng nêm fahran lo mah se min ngaihtuah ru hle a ni tih ka hre tawh a, ka lawm tâwk a tling em em tho.



"Mazar" ti sepin ka chhoh melh ral a, a laka ka rilru puthmang dik tak chu hrilh tawp mai ka duh a, mahse hmeichhia zawkin sawi hmasak chu a tlawm thlak ka ti bawk si, chutah kan la inupat hleih em em zui.



"Thil hrilh che ka duh a" ka tih leh chuan a inher daih a, Driver seat lamah ṭhu lutin eng emaw ni hi a va khawih a, a rawn chhuak leh a, ka kut nâ lo lamah vuanin Cement bang phenah chuan min dinpui ta daih mai.



"Sawi ta che" engati nge aw hriat nuam tak hi a kâ aṭang hian a chhuah ve ngai loh le, aw dam tak te chu a nei ve awm reng si a, hriatthiam hi a har ṭhin.



"Min zahpui em ni? Engati nge mi hmuh theih loh chinah min luh pui kher?" ka ṭawngkam chu a nêm thei ta bik lo, min tih dan vel leh min luh pui dan vel chu min zahpui a ang tlat a ni.



"Sawi mai rawh" a tih chuan ka thaw hak a, a laka ka rilru puthmang chu sawi leh loh mai ka duh rum rum a, kan inbiak dan vel chuan sawi min tiphur lo zo vek a ni ber.




Ka kut chu thlahin min hnung chhawn zawng hian a ding a, a kawng chu a dawm bawk a, a awm dan teh thut chu ka hrethiam leh ta hauh lo mai. Ka lama rawn inherin chiang lutuk tak mai hian min en a, ka inen reng emaw ka tih laiin a âwmah chuan min pawm bei deuh thut a, min kuah nghet em em leh nghal. A ngawi reng a, kei chuan kuah let nachang pawh ka hre lo. A duh thu ngeia min kuah vawi khatna a ni a, ka thinte chu a phu nasa hle a, dawnsawn dan ka thiam hlawl lo a ni.




"Ngaihtuah ngai reng mihring" thum chhal hian a ti sup a, min kuahna aṭang chuan zawimuang hian min nam hla tial tial a, a chet dan vel chu mak ka ti kher mai.



"Ni lo, ka hre sual ngei ang" ti lehin a awm dan chu a siam ṭha zui nghal a, ṭawng tuma ka ân lai chuan a kal ta daih a, koh pawh ka ko hman lo, kal vung tak a ni.




Sumo bul ka va thlen chuan Driver Seat-ah a lo ṭhu lut fel diam hman a, chhuak turin motor chu a lo tirum vut vut tawh bawk a, zah pawh ka dawn duh tawh bik lo. Mazara hian a laka ka rilru puthmang ang chiahin ka lakah rilru a pu ve chiang alawm, ni lo se khang thu te kha a sawi nâng, min kuah miah lo bawk ang.




"Mazar" tih leh a dara khawih chu ka rual nghal a, min lo en chiang khawp mai, a hnunga mi lo chuang ve te chuan min en deuh hrek hrek a, ka hmu lo der hmiah thung.



"Inenkawl ṭha ang che" ti supin hma lam chu a hawi zawm zat a, motor chu muangchangin a rawn lir ṭan a, awm sawn lo thei ka ni ta lo, ka awm sawn lo a nih chuan min chil a ni mai.




Ngawi renga dingin Sumo tlan liam lai chu ka thlir zui vawng vawng a, ka rilruah chuan eng thil dang mah a awm thei rih lo, hlimna tih chauh lo chu! Lawm avangin ka khi ṭhâw a, ka tawn ang chu tawng ve se hmeichhe dang pawh an hlim ve tho vang. Taxi horn ri chuan mi tiharh zawk a, motor tlanna dip khawpin ka lo ding chu niin, a zahthlak duh khawp, mahse ka hlim ru em em tho.




(End of Chapter 10)




.

Link:
BBcode:
HTML:
Hide post links
Show post links

Havali Adam
Posts: 246
Joined: October 22nd, 2021, 9:46 pm

Unread post by Havali Adam » July 25th, 2022, 8:45 pm

SUMO DRIVER

By

Havali Adam




Chapter 11




December thla kan chuangkâi a, Kristiante hunpui Krismas thla a lo ni leh reng tawh a, mi ṭhenkhat chu Bazar pui lamah an kâl an kal tawh mai. Ka nu pawh a inlei lawk ṭan deuh a, ani hi chu a kum tin tih dan a ni hrim hrim a, December thla tir lamah hian a inlei lawk ṭan ngei ngei zel. Mi dangte angin mipui zík tam hût hut laiin kan buai ve ngai loh phah reng bawk a, tun ṭum pawh a inlei kim titih leh ṭep tawh zawk maithei a ni.




Ka ṭhiante pahnih paw'n bazar lam chu an sawi ri ṭan a, kei chuan a hming maia kal pui ka tum. Kumin chu ka danglam tak zet, kum dangah te kha chuan pawisa heh ve thei tak kha ka ni ṭhin a, tun ṭum erawh ka awm tawp a, pawisa hmanral châkna ka neih ka hre lo. Ka ṭhiante paw'n mak min tihna chen an nei a, thi lei lam engmah ka sawi ngai bawk si lo nen mak min ti pawh chu ka dem hran lo.




Vanneih thlak deuhin Sir Francis-a nen kan chungchang min zawt tawh ngai lo va, ka lawm tak tak a ni. Ni e, Sir Francis-a hi chu ka mipa duh chi a ni ngâng lo. Amah aia duh hmasak leh vei ngawih ngawih ka nei tlat a, hausain changkang viau mah se kei nen chuan kan inmil thei lo a ni.




Mawitei leh Hlimpuii bulah pawh kan inngaihzawn loh thu leh a laka ka rilru ka pek tak tak theih loh thu ka sawi tawh a, Mazara nena an inkhawih dan erawh sawi lan ka tum lo tluan ta law law a ni. Chuvangte pawh chu a ni ang Sir Francis-a chanchin min zawh ngai tawh loh chhan, pawi ti lo tak ka ni. Amaherawhchu Sir Francis-a ber chuan ka ina rawn chuankai a ṭhulh miah lo thung a, a rawn leng tawh dawn lo emaw te kha ka lo ti vel a, mahse a ni teuh si lo.




Ka chhungte nen an inkawm ngeih tluang zel leh ta nghal a, ka duh loh thu an hre vek tawh si a, ka ngaihzawng ni ang maia an lo la be ṭha chiam chu ka duh lo hle. Chaw ei lai paw'n ka sawi ṭhin nghe nghe a, ka duh loh thu leh kan inngaihzawn loh thu sawi mah ila ka nu ber chuan engmah a ngai lo lui tlat a, thil a tiharsa vek a ni.




"Awi!" phu zet chuan ka ti thut a, pa Zothana chu ka bulah a rawn kal tih reng ka hre lo, min la din hnaih em em zui a, zu rim chu ka hre chiang hle bawk.



"Min tiphu alawm" ka ti leh sep a, an rawn len zan te a ni a, zu a in ka rin loh tehreng nen a in tho chu a ni a, zu ṭhat lohzia a taksaa a lan chhuah hunah chuan a la inchhir ve ngei ang.



"Khaw maw no pakhat kha min lo pe teh" chhum hmuk hian a rawn ti a, hrethiam lo zetin lo en hâw a, ka pek duh lâwk loh avang chuan amah zawkin a rawn la a, thingpui chu siam chhunzawm lovin a chet dan ka en reng ta ringawt.



"Sawi lo vang che" tiin no ah chuan tui fim kâk hi a thli chhuak a, a rim nam hak lo se chu zu a nih ka ring miah lo vang, chu bakah chuti ang chuan zu an lo pack ṭhin tih reng ka hre lo hrim hrim.



"Zu hi in tawh suh" ka aw chu a nêm hran lo, a lakah hi chuan nêm taka ṭawngin awmzia a nei lo va, hawihhawm chhuah pawh ka tum eih lo, ani pawh chuti tho, ka lakah hawihhawm a chhuah ngai lo.



"Naupang hnen aṭang zilhna ka dawn ka lo inbeisei reng reng hleinem" mei nei zet hian a rawn ti a, a zu thlit chhuah sa chu keng kângin vawi khatah a in zo vek a, chutah amah bawk chuan



"Nimbu a awm em?" a tih zawm leh nghal zat a, che hrutin kan Fridge chu a va hawng a, nimbu pakhat chu la chhuakin a kawr te nen chuan a ei hmawk hmawk a, zak lo ka va'n ti êm.



"Nitei tal ka hrilh ang" tiin thingpui chu ka chawh zawm mawlh mawlh a, amah vanga hun khawhral emaw muangchan ka tum hauh lo, sitting room lama ṭhu te'n rei min lo tih tawh viau ka ring bawk.



"A hre sa reng alawm, ani paw'n a in thei viau tak asin" ṭhen zeuh paha a tih chuan awm reina chi niin ka hre ta lo va, thingpui chu chawk zo thuai thuaiin sitting room lamah ka phei ta daih a, ka nitei pasal hmel chu ka hmu reng peih lo a ni.




Ka nitei fapa duhawm leh chum ṭha zet chu ka pawm a, ka chhaih nui ar ar bawk a, a nui duh reuh lutuk chu amah tilawmawm zualtu a ni. A biang leh khabe vela fawh kual den den chu nuam a ti em em a, kan bengchheng deuh a ni ang ka nu chuan hmun danga pawm turin min ti ta tawp a, kei pawh ka kal sawn ve mai a, kan inchhaih hlim ang reng si a, titi tui laklawh lai phei chuan kan bengchheng viau tak ang.




Ka room-ah naute chu luhpui ka tum deuh a, mahse u Duhawmin lehkha a zir tih ka hre chhuak a, ka luhpui leh ta lo. Ka room leh u Duhawmi room hi a inhnaih hle a, kan thawm a hriat chuan a buai mai mai ka hlau a ni. Chokaah rei lo tê ka awmpui a, a meng fiah reuh bawk si a, neih daih ka châk. Ka nitei nupa fa atan chuan ka ui, a hmelṭha ve êm a ni.




"Chhuahpui lo la ka va duh ve Numam, thlasikah hi chuan hritlang an kai hma a nia" kawngkapui ka hawn laiin nitei chuan a rawn ti lang lâng a, buk khum zeuh pahin



"Kawt velah hian a ni mai, awm pawh ka awm rei pui dawn lo" ka lo ti ve mai a, naute chu tuam ṭhain ka chhuahpui zui nghal a, ka tuam lûm ṭha tho bawk a, chuti maia hritlang a kai chu ka ring bik chiah lo.




Naute awi hliau hliau pahin vana arsi de sep sep te chu ka thlir a, Mazara ka ngai reuh ngei mai. Inngaihzawn pawh kan inngaizawng miah lo va, mahse ka ngai ve em em ringawt. Sir Francis-a a hnek te kha a va'n pa tak, Sir Francis-a khan a ti ve mah mah alawm, cho deuh angin a awm kher a nih kha! Mazara lah a lo duai bik der si lo, a kutthlak kha chu a dawl zo lo teh e.




Khati ang khawpa che hawihhawm lo Sir Francis-a ber lah chuan kan ina rawn len a ṭhulh phah der si lo va, chu chu ka buaina chinfel tur hmasa ber a ni. Dar 9 leh a chanve pelh hret velah ka nitei te an haw a, a pasal pa Zothana chuan min en deuh run a, rei lo tê chhung chu ka melh let ve hrep a, en pawh ka en rei peih hlawl lo.




Kum hei leh chen chu kan lo inhre ve tawh a, ka nitei nen kum 2 lai nupa an ni tawh bawk a, ka hminga min koh chu chhiar tham lek a la ni ang. Kei pawh ka bang bik chuang lo, an inneih tirh aṭang ka nel lo nghal em em ringawt a, ka ute angin nel takin ka be ngai lo va, a hming phei chuan ka ko ngai lo tluk a ni.




Krismas kan hnaih tial tial a, hunpui a hnaih tawh avangin zirna in lam pawh chawlh rih a ni a, Mazara hmu tur paw'n Chanmari lamah ka kal tawh ngai lo. Amah ngaihtuah reng rengin ni hmang ral ṭhin mah ila min ngaihtuah ve theih nâna awm chu ka tum tlat a, harsa ka ti hle thung.




Kha ni, a duh thu ngeia min kuah hmasak ber ni kha chu ka dam chhungin ka theihnghilh tawh lo vang ka ring. Ka danglam ang chiahin a danglam ve tih ka hria, chuvang chuan amah hmu lo zawngin ka awm lui hram hram a ni. Thil chi hrang ka tih kual phah a, a chang chuan Sumo Counter lama va phei chu ka duh rum rum ṭhin, mahse kal loh ka tum rih tlat.




Mipa a ni a, lung fing chin zeta upa tawh a ni bawk. Tlantea hnenah kan in awmna leh kan veng awmna a zawt tawh hial a, min ngaihtuah ve tak tak a nih chuan a rawn kal mai turah ka ngai. Ka vei em em thu ka lo hrilh hman lo te chu ka lawm hnuhnawh hle a, lo hrilh ta ila chuan ka inchhir hnuhnawh ngei ang ka ring.




Zan khat chu Sir Francis-a a rawn leng leh a, College kan kal tawh bawk si lo va, hun a nei deuh a ni ang a rawn leng zing khawp mai, ka chhungte bawk chu a ni hriatthiam har chu! Ka nu leh pa chuan makpa chei ang tak tak hian an lo chei a, an titi a inrual khâi si, U Duhawmi erawh room lamah lehkha a zir char char thung a, ani chu sawiselna ka nei lo.




Ka nu leh pate ve thung chu hrilhfiah an ngai reng a, hrilhfiah lahin an awih tak tak bawk si lo. Sir Francis-a nen chuan pawnah kan inzui chhuak a, haw a tum tawh avangin zan dang ang bawkin thlah chu ṭulin ka hria a, motor bula kan din chuan sawi tur a vâng leh ta hle.




Ngawi renga ka din laiin min rawn kuah a, lo dan pawh ka tum lo va, kuah let pawh ka tum chuang lo. Ka rilruin Mazara min kuahna nen ka khaikhin nghal a, inang lo tak a ni. Mazara taksa kha chu a lum thar thar a, khawpui mite angin rimtui inkap lo mah se a rim kha a tui lo chuang miah lo.




"Sir, lo leng tawh lo mai rawh" zah pawh dawn lovin ka ti ta tawp a, a hrehawm ve êm asin, a rilru nat hlau reng renga awmin ka rilru dik tak pawh ka sawi chhuak ngam lo ṭhin a, tunah chuan ka sawi chhuah a hun ve tawh te pawh a ni ang e.



"Eng vang chuan maw?" a rawn ti sup a, min en chhuk ran a, nuam lo tihna chu ka nei ru reng tho, mahse tun hun baka sawina remchang hi a awm kher lo vang, ka sawi lo a nih chuan hrehawm tuartu tur chu keimah leh bawk ka ni.



"A chhan chu ka duh ve lo che alawm Sir, min hrethiam hram rawh. Sual ka tih vang che pawh a ni lo, ka zah em em che a, keimahah chuan kan Sir bak i ni thei lo a ni" ka tih chuan mak tih hmel a pu lo va, thinrim hmel pawh a pu chuang lo.




"Kei chuan ka duh viau che asin, i awm dan engkim hi ka duh chi vek a ni. Min ngaina lutuk lo tih chu khang thla kal ta chhung khan ka hrethiam mai a, min duh ve theih mai pawh ka ring bawk. Ngaihtuah nawn leh la Numam, i theih i inring lo em ni?"




"Ka thei dawn chuang lo tih ka hria, ka ngaihtuah nawn ngun lutuk tawh zawk alawm, ka sawi chhuah dan hi hriat a nuam lo mah mah em Sir?" inthlahrung ru zet chuan ka ti thawp raih a, kan ṭawng ring hran lo, mahse kan thusawi chu kan hre chiang viau tho.




"Eng vangin nge i theih i inrin loh?" a aw aṭang chuan a lung a awi chiah lo tih ka hrethiam nghal a, ka nuam lo tihna chu a zual sauh bawk a, hmeichhe rilru chhe tak angin min ngai dawn mah se ka rilru dik tak erawh sawi chhuah ka tum ruh hle.




"Dik tak chuan maw mipa dang vei deuh mai ka nei a, ani chu ka thluak chhung aṭang hian a chhuak thei thlawt lo. Rilru khingbai zeta awm ai chuan ka hrilh tawp che a nih hi, ka tihpalh Sir" ka tih chuan



"Chu pa chu tu nge a nih? Kei aiin a hausa em ni? I nu leh pate paw'n min ngainat êm hi, an lakah chuan makpa ang chiah ka ni tawh asin" a rawn ti zung zung a, a thu rawn sawi duh dan chu ka ngainat zawng a ni ta hauh lo mai.



"Han sawi teh Numam, tu nge chu pa chu? Tu nge a pa? Nang ang nula hmelṭha meuhin i thluak aṭanga i paih chhuah theih loh mipa chu Aizawl mi hlun ngei a ni awm si a, kan Minister fapa hi em ni?"




"I ngaih dan hi a dik lo nasa a ni Sir, chu pa chu tu nge a nih ka hrilh thei lo che. Khawngaihin haw tawh rawh, min hawsan tawh la a ṭha ang" tiin ka tawlh hnung hret hret a, lungawi loh hmel fê hian min en reng bawk.



"Chuti maia kalsan che chu ka tum hleinem, engtik ni ah emaw chuan i chhungte ang chiah hian i rilru ka thlak theih ka ring tlat a ni" ti leh motor chhunga luh chu a rual a, kan in kawt aṭang chuan a tlan chhuak vung hle.



"I thei chuang lo vang" ti sepin kei pawh chu ka inher zui nghal a, in chhunga ka pen luh lai chuan ka nu hian chik hmel deuh hian min lo en ran a, ka room-ah chuan ka lut vat a, ka rilru chhungril chu a ipik ṭun mai.




Dik tak chuan ka duh loh thu ka sawi khan min kiansan a tum mai ka lo ring a, mahse a tum chuang hauh lo chu a nih si kha! Kan awm dan chu a buaithlak ka tih zawng tak, thil chiang fak awm si lovin a inzawm nuai a, min kiansan vang vang mah se pawi tihna ka nei lo asin le. Min kalsan mai a tum loh thu min la hrilh zawk leh ta nghal a, ngaihtuah loh tum mah ila ka thei ringawt lo, ka rilruah a châm reng zawk, a chhan chu min kam tlat a ni.




Zing khua a lo var a, zan lama thil thleng chuan min la chenchilh reng a, bazar pui tura ka nu min sawmna te chu ka chhang ṭha hlei thei lo. Bazarah chuan kal ta ringawt ila Sir Francis-a ka hmu ang tih ka hlau bawk si, chuti angin a chungah thil tih sual ka nei hran lo, mahse ka hmu zak deuh tlat tawh a ni.




Pei lo ru zetin ka nu chu Bazarah ka zui a, hunpui kan hnaih tawh bawk a, mipui thil leia zi nuai nuai chu kan tam hle bawk. A ṭhen pheikhawk zuara an au lauh lauh laiin ṭhenkhat erawh chuan kekawr kan duh leh duh loh te min zawt thul, eng teh lûa ti lo mah ila a ninawm ang reng khawp.




Kan haw dawn ṭepah Sir Francis-a chu ka hmu hlawl a, amah chauhin a la ni lo zui. Hmeichhe pakhat nen hian an ni a, induh tawn tih hriat takin an inkai a, ka va han ngaihnep belhchhah tak em. Min kalsan mai a tum loh thute kha a sawi vel luam a, tunah lêm hmeichhe dang a bazar pui leh lawi a, thik lo tak ka ni.




Ka nu chu ka kuai her a, Sir Francis-a te lam chu ka hawi tir a, a hmelah chuan mak tihna ka hmu zui nghal bawk. Ka nu chuan min lo en leh a, thinrim hmel deuhin ka lo awm a, ka nu hmaah chuan lem ka chan a ngai tlat a ni. Makpa atan a duh hliau hliau si, chutia kan hmuh theih tura an lo awm lang kher kher te chu lawm ru tak ka ni.




Tunah chuan makpa atan a duh ka ring tawh bik lo, thil engkim a mit ngeiin a hmu a, a hre vek bawk a, duh reng theih ni hek lo le. Kan haw lamah chuan a ṭawng tlêm hle a, a thil hmuh vang a ni tih chiang takin ka hria. Keimah berin ka duh lo bawk a, ka chhungte chuan duh miah lo se ka ti hle a ni.




In kan thleng chiah chu room-ah lutin ka mu nghal thlawp a, bazar boruak chu ka zo lo a ni ber. Inbual fai hmasa lova ka mu chu zanriah ei dawnah chauh ka harh a, chaw ei nghal mai lovin ka inbual zung zung a, tui lumin ka inbual thung.




Thlasikah hi chuan tui vawta inbual hi a phurawm teh chiam lo, tui lum char charin ka inbual ṭhin reng bawk a, thil hi chu a hun leh a hmun a awm vek a ni. Nipuite chu ni se tui lumin kan inbual peih tawp nâng, tui luma inbual chi ni hek lo.




Ka inbual zawh chuan hahdam deuhin chaw ka ei a, chhungkaw kim lova chaw ei hi kan nei khât khawp a, zanin erawh ka pa a Office lamah a la awm bawk nen kan ei hrang ta nuai a, ka pa phei chu a rawn haw lawk loh hmel nghe nghe. Dar 7 leh a chanve bawr velah a rawn haw ve ta chauh a, chaw ei ka lo siam nghal zung zung a, a chaw ei lai chuan Sir Francis-a a rawn leng leh a nih chu!




Ka nu chuan zan danga a lo len ṭhin ang chiahin a lo be siam siam a, a mak hi ka ti ve thlawt a ni. Chhun lamah khati ang khawpa chiang khan a hmu vek tawh a, chuti anga em ema makpa atan a lo duh mai chu thil mak tak zawng a va ni chiang em. Ka pa erawh engmah hrethiam lo tih takah pangngai deuhin a awm a, ani leh zel han hrilh chu tih chi ah ka ngai bawk si lo.




Ka nu chuan thingpui lum turin min ti a, ka lum ve mai bawk a, mahse an bula ṭhut chu ka tum hauh lo. Duh leh an pathumin titi se, an duh duh sawi se, makpa atan duh hle mah se pasalah ka nei dawn chuang lo. Pasal tih ṭawngkam ringawt pawh tunah tak chuan ka hre ning, chu bakah ka ute pasal nei lo an awm reng a, a naupang ber tana makpa lo hual lawk titih ringawt chu a fuh ber lo a ni.




Kar a ral a, Krismas chu kan hnaih leh ta sawt mai. Ka pitei te nen pawh kan inbe zing mawlh mawlh hle a, kan Landline Telephone number an hre tawh bawk a, a chang chuan an khaw PCO aṭangin min lo be ṭhin. Thil hi a danglam chak ve ngawt mai, a hma te kha chuan kan Landline number kha digit 6 a ni ṭhin a, khang hun lai kha chuan ka la naupang khawp mai. Hun a kal zel ang a, thil a la danglam chho zel tial tial ang ka ring.




Tlantea nena inbiak chang pawh kan nei ṭhin a, Mazara nena kan inngaihzawn leh inngaihzawn loh min zawt leh nulh nulh zel a, ka rilru chhungril dik tak zepin ka chhang mai a, mahse min ringhlel tih chu ka hre reng tho. A nihna takah chuan kan inngaizawng lo miau a, keima'n ka vei em em ringawt a, ka laka a rilru puthmang dik tak hria te chu hria ila kan inngaihzawn leh inngaihzawn loh a chiang mahna.




"Vli chu a rawn haw thei dawn lo a nih hmel, a laklawh viau a ni ang" chaw ei kan siam laiin ka pa chuan a ti a, tun hnaia u Vli ka biak khâtzia chu ka hre chhuak nghal a, ka nu chuan ka pa thusawi chu a lo sawi zawm zat bawk.



"Puitlin zirna zel a nia, mahse tawh sual a tawk ang tih erawh a hlauhawm ve tho mai" u Duhawmi chuan a lo ti ve a, ka nu ṭawng mawlh mawlh laiin pawn lam aṭang kawngkapui an rawn kik a, u Duhawmi chuan



"Lo lut rawh" a ti lang lâng a, keiin chaw ka lo khawrh mial mial thung a, chutah u Duhawmi bawk chuan mak tihnaa khat aw hian



"Nang maw!? Lo lut rawh, engtin nge kan awmna te hi i rawn hriat theih?" a ti hluai a, kawngkapui lam ka hawi chiah chu ka hawi sawn thei tawh lo hrim hrim a, kan ina a lo kal duh tak tak chu ka ring lo nasa a ni.



"Nang i ni maw Mazar? Hei zanriah kan ei dawn chiah a, lo ei ve nghal mai ta che? Lo kal rawh, Numam thleng han lak kep nghal teh" ka pa'n a rawn tih chuan ka kal sawn thei ta chauh a, thleng ka lak lai paw'n ka mitmei ru reng tho.



"Ka inei puar tawh e, min lak kep buai duh suh" chiang zet hian min en a, ka che lai chu ka tawp chat a, eng vanga a thusawi chu awih nghal em em nge ka nih ka hre hauh lo.



"Chuti tur em ni? Inei puar tawh mah la i vawi khat rawn kalna a ni bawk si a, tlêm tal chu rawn ei hram ta che" ka nu chuan a lo ti ve thung a, mahse Mazara chuan a hnial ta tho.




Chaw ka ei chhung zawng chuan ka mumal lo va, ka chaw ei tui leh tui loh pawh ka hre lo. Ka bek vel chu a za mer mer tlata hriatna ka nei a, Mazara chuan min en a ni ngei ang. Ka chhungte ei mial mial laiin ka kham hmak a, ka chhungte chuan min en hâw hlawm a, ka kham hma ve bawk êm a ni. Ka che vel reng reng chu Mazara chuan min lo en ran a, lai chhe tak ka ni.




Mazara bula ṭhu lo chuan ka room-ah ka lut ta daih a, ka thin te chu a phu rang em em zui. Ka âwm dawm vawng vawngin ka mit ka chhing a, ka awm dan chu a mawi lo tih hriain room aṭang chuan ka chhuak leh a, Mazara epah chuan ka ṭhu a, mahse ka be thei mai lo, ka lai tlat pek a nih chu!




Ka tih tur hre lo leh sawi tur hre lo lutuk chuan TV chu ka on ringawt a, Channel chu ka hmet sawn chhen a, en tur ka hre hlawl lo a ni. Min en run tu chu han be ringawt dawn ila sawi ber tur ka hre leh chuang bawk si lo, ka chhungte lah chaw an la ei tui tuam tuam hlawm bawk si.




A lam ka hawi apiangin min lo en reng zel a, ka en rei ngam ve thlawt lo a ni. Ani chu mipa a ni a, a zam ve miah lo te pawh a ni ang. Ka chhungte chuan chaw an ei kham a, thleng ka sil zui nghal a, sitting room-ah ṭhuin ka chhungte leh Mazara chu an titi a, ka chhungte chu an ṭawng char char a ni mah zawk.




Mazara chuan tawi fel deuh hian a hman rei loh thu leh a haw leh nghal thuai a ngaih thu a sawi a, a thusawi chuan ka beng a verh ta khawp. Thleng chu ka sil zo thuai thuai a, a haw tak tak hmaa Mazara hmel chu hmuh leh ka duh a ni.




"Hman deuh hlek te han ni la, han riak ve nghal mai la a ṭha tur, mahse i haw a ṭul tlat bawk si, fimkhur takin i tlan dawn nia" tiin ka pa chuan a ti dam dap a, Mazara thlah turin kan chhungkua chu veranda-ah kan ding ṭhap a, a haw mai tur chu ka ui ru khawp.



"Remchang a la awm mahna" ti supin Mazara chu kawngpui lamah a kal phei zui nghal a, kan in kawt aṭanga a tlan liam thlengin ka thlir zui vawng vawng a, ka chhungte luh hnuah pawh kei chu ka lut ve thei mai lo.




Kawngpuiah chuan kal pheiin ka ding vang vang a, Mazara chu ka ngai nghal em em ringawt. Min rawn hmuh beiseiin Sumo Counter lamah pawh ka kal tawh ngai lo va, ka duh ang takin kan inah ngei lo kalin kan inhmu ta cheng a, lungawina pakhat mah ka nei leh der si lo. Pakhatah chuan han inbiak vakna hun kha a awm lo ve chiang alawm, ka chhungte an awm ve kur bawk si a, an rem teh chiam lo a ni.




Chutia ka ngaihtuahna ka kawm melh melh lai chuan tha chak tak hian ka ban rekah manin min pawt dâwr a, ka ṭe chhuak tur chu ka kâ a rawn hup nghal a, a hmel ka hmu chiah chu chawp leh chilhin ka hlauhna zawng zawng a bo nghal vek thei maw le.




A kutzungchal chu a hmui zawnah a dah zeuh a, thawm siam lo tura min tihna ni maiin ka hria. Kei pawh chu ka ngawi ve mai bawk a, min kaih ang âng chuan ka kal tawp a, kan kal zel a, kawng sira Sumo inhunna bul kan thlen chuan mak ka ti ang reng hle. A tlan liam daih tawh tura ka ngaih kha a ni a, mahse a lo la tlan thui der si lo.




"Mazar" ka tih rualin nghet zet hian a âwmah chuan min kuah bet a, a taksa lum thar tharin min ur chiah chu ka lum chhuak vekin ka hria, vawt tihna ka neih awm pawh ka hre tawh lo hial zawk a ni.



"Ka hre sual lo tih ka chiang tawh a, mahse ka kawng ni lo ka zawh palh ang tih erawh a hlauhawm thung" thum chhala a rawn tih chuan a âwmah namin ka chho en vat a, a khabe phir chu ka vawi khat hmuhna a ni nghe nghe.



"Eng nge i sawi awmzia Mazar?" ka tih chuan ngawi reng hian ka lam a lo hawi thla a, kan inen hnai ṭha thawkhat bawk a, ka zam dan chu pui tak a ni.




Che sawn hrutin Sumo kawngka chu a va hawng a, ka kut erawh a la chelh reng a, Sumo chhung chu a thim vek a, eng nge a va khawih rik ruk ruk chu ka hre thei mai lo. A mi vawnna aṭang chuan tal chhuah ka tum bik lo va, a ruk tak chuan nuam ka ti a ni.




Polythene dum hi a rawn khai chhuak a, min chelhna thlahin a chhung aṭang chuan Muffler rawng dum leh vara ṭial hi a rawn phawrh chhuak a, ngawi reng hian min awrh tir mial mial a, kei chuan a chet dan vel chu ka lo en tawp ringawt.




"I inhmeh e" ti hniam ruihin a kut chuan ka biang a rawn nûl a, a kutzungpui chu ka hmuiah a tawp chat a, chiang zet hian min en chhuk run kher bawk nen ka dik lo kual vel vek tawh a ni.



"Mazar" chu thu bak chu sawi tur ka hre hlawl lo, rawn kun hniam tial tialin ka chalah chuan a rawn fawp zeuh a, a hmui lum leh nêm zetin ka taksa a rawn si chiah chu a reh tlawk tlawk a, ka mur chhuak vek bawk.



"Inenkawl ṭha ang che, Krismas hman nuam le" tih leh Sumo-a luh chu a rual nghal a, biak hman lo khawpin a che reng reng chu a hmanhmawh a, dik tak chuan ka la dik hlei thei lo, chu erawh ka chala min fawh vang a ni tih chiang takin ka hre thung.




Tunah chuan a tlan liam vawng vawng lai chu ka hmu ta tak tak e, mahse ka va han hlim si êm. Ka chal tawh ringawt pawh chu ka phal rih lo vel a, a mi fawhna chambang vel chu a bo zui nghal mai ang tih ka hlau a ni. Kan in lama ka kal phei lai te chuan a Muffler min awrh tir chu ka hnim vang vang a, ama rim chiah chiah a ni. Lawm avangin ka nui ver ver a, Mazara Muffler min pek chu mawi ka ti hle bawk a, ka thilpek dawn zinga ka roh ber tur a ni dawn tih ka chiang.




In chhunga ka luh rualin ka room-ah ka lut tlang nghal a, Muffler chu a them paw'n ka nghawng aṭanga lak sawn ka tum eih lo. Ka mu meng kar a, a chang leh ka khi leh ṭhâw ṭhin a, u Vli'n Westlife thlalak min rawn hawn ṭhin ai paw'n chu Muffler chu ka ngaihlu nghal em em a, a rimtui si, a mawi bawk si, ka va han duh ngawih ngawih tak êm. Mit chhingin ka hnim leh vang vang a, mahse thil eng emaw ni ka khawh fuh ta tlat mai.




Ka thil khawih fuh chu Muffler chhung kil deuh hlekah hian a lo inzep a, ka awrh bawk si a, ka la chhuak thei lawk lo. Ka khawih neuh neuh hnu chuan lehkha var inhthlep hi ka la chhuak hlawl a, chuti ang teh daih lak chhuah ka inbeisei lo hle. A bawk zawngin ka mu ṭha thuai a, chu lehkha inthlepah chuan eng nge inziak dawn ka hre lo va, mahse ka hre châk zek zek a ni.




"Inhmuh leh hun a awm beisei ila, chumi hunah chuan ka thil hriat duh pakhat chu chian a ni tawh ang" tih hi lehkhaah chuan a lo inziak a, a hawrawp chu a ṭha phian leh nghal a, chhiar a nuam tak zet.




"Ṭawngmawh ren run pa, ka laka i awm dan hi ka ngaihbel mai mai a ni palh ang tih ka hlau" ti sepin ka nui leh ta ver ver a, lehkha chu ka âwmah ka pawm bet a, min ngaihsak lo ang deuha lang siin min ngaihsak ru reng a, ka laka a chet dan vel chu ka vei zui leh ta ngawih ngawih mai.




(End of Chapter 11)




.

Link:
BBcode:
HTML:
Hide post links
Show post links

Local Advertisement

MOBILE SIAM ZIR DUH TAN!!!

Tech-Inn Mobile Repairing Traning Centre, Bazar bungkawn

Kum tin mi za chuang eizawnna kan siamsak a, Eizawnna tlaka thiam turin kan zirtir thin

Mizorama mobile siam zirna hmasa ber changtlung ber kan ni. Hrechiang duh tan Contact : 9612099411 / 9862016122


Havali Adam
Posts: 246
Joined: October 22nd, 2021, 9:46 pm

Unread post by Havali Adam » July 26th, 2022, 8:40 pm

SUMO DRIVER

By

Havali Adam





Chapter 12





Zingah te chuan zan lama Mazara min pek Muffler chu ka la awrh reng a, ka phelh phal thawt lo a ni e. A rim a nam vung vung bawk si, ka tan chuan chu aia thilpek hlu a awm rih lo a ni. Tukṭhuan kan ei lai thlengin ka awrh a, ka chhungte chuan ka thil awrh chu an ngaihven lo hrim hrim a, an hnen aṭang zawhna ka la dawng miah lo bawk.




Khua a ṭha lutuk lo bawk nen Muffler awrh pawh chu a inrem viau a, chuvangte pawh chu a ni ang engmah an hriat loh ni! U Duhawmi chu Exam a neih avangin a chhuak a, a kal dawnah ka pa'n a ṭawngṭaisak thlap a, zirna lamah chuan ka pa hi kan chhawr ve chiang alawm, kei ngei pawh hian tun thleng thil zawh ka la nei fô.




A bik takin u Duhawmi chu MCS Exam tur a nih avangin a ngaihsak zual a, lehkhabu pawh ama'n a leisak vek a, a kawl sa zawng zawng chu pein zir dan tur thlengin a hrilh vek ṭhin. Fate ṭhatna chauh duh ka pa kha a ni miau a, a ngaihsak lo thei lo a ni. A thusawi reng reng hi a dik thlup a, kan zirtirtu te ai paw'n a thusawi ṭhenkhat hi chu ka ring daih zawk.




Tih tur engmah nei lovin inah ka awm tawp a, chhunah chuan ka ṭhiante an lo leng a, Mawitei zawk chuan CD a rawn keng a, Vai film hmuhnawm deuh a neih thu a sawi a, kan DVD-ah kan play zui nghal a, a sawi ang chiahin kan Vai film en chu a lo hmuhnawm tak tak.




An ṭawng chu ka hrethiam chuang miah lo, mahse a chet dan vel aṭang kan ngaihruat thiam vek a, a changtunu ṭan chang pawh kan ngah mai. Kan film enin a zir vang nge pawh ka hre lo Mazara ka hre chhuak tlat a, a changtupa leh a changtunu te inbiak dan vel chuan kan pahnih awm dan min hriat chhuahtir lo thei lo a ni.




Vai film ka ninna pakhat chu an zai tel zel hi a ni a, mahse chu chu an inchhai dan a ni ve miau bawk si, lo nin theih ringawt pawh a ni lo. A changtunu chu a changtupa chhungte'n an duh lo va, mahse a tawpah an inneih ta tho va, mi rethei leh mi hausa dinhmun inthlauhzia ka hre chiang ta khawp.




Kar khat a ral leh a, Krismas chu hnaih vet vet tawh tak kan ni. Tape nei apiangin Krismas hla an play ri chuah chuah a, chu chuan hunpui kan hnaih tawhzia a tichiang hle. Mazara hmu turin Chanmari lamah vawi eng emaw zah chu ka kal thlawn tawh a, Counter nghaktu chuan a tlan tawh rih loh thu min hrilh ngei a, mahse a lo tlan thut tâkah tiin keimah zawk chu ka kal lui ziah a, ka la kal thlawn char char thung.




A Muffler min pek ka awrh chhuah ngun lutuk avangin ka ṭhiante hnen aṭang zawhna ka dawng ta ngei a, kei chuan ka lei a nih thu ka lo sawi ve zaih a, neih ve an châk avangin Bazara kalpui turin min tur chhen phah nghe nghe a, zep lovah chuan ka Muffler awrh chu a mawi ve thlawt a ni. Thingtlang mi a ni a, chutah mipa a la ni zui a, engtin nge ka inhmeh tur chu a hriat chat theih ka hre lo hle bawk.




"I pitei te khan Krismas hmang chho turin min rawn chah nasa hle a, mahse kan hman tlân hmel bawk si lo va, ka hnial ta a nih kha! Kum thar lama chho turin min sawm leh hram a, engtin nge ni ang?" chaw ei laiin ka pa chuan a ti a, ngaihtuahna thar ka nei nghal.




"Kei chu ka châk teh mai a nia aw" ka lo thuai a, ka chhungte chuan min lo en ṭhap a, ka ṭawng dan teh thut chu a fuh chiah lo tih ka hre chhuak a, chutah keimah bawk chuan



"Ka sawi awmzia chu pitei te khuaa kum thar hman chu ka duh deuh, mahse kan hman loh chuan pawi ka ti chuang lo" ka ti leh ta ringawt a, ngawi rengin chaw chu ka bar zawm mial mial a, ṭawng tawh loh chu a fuh ber rih a ni.



"A hma paw'n a peih lo ber leh a phur lo ber kha i ni si a, tunah lah i phur hmel em em thung a, zin chhoh chu i châk leh tak tak em ni?" ka nu ve thung chuan a rawn ti a, ṭawngkâa chhang tawh lovin ka lo buk khum nghat a, ka rilru dik tak an hria ang tih chu ka hlau ru hle.




"Kei chu ka theih pawh ka ring lo, exam leh hun hi a hla lutuk lo va, insawrbing zual ka duh a ni" u Duhawmi chuan a lo ti ve a, kan thil sawi dan aṭang chuan kum thar pawh kan hman chhoh theih ka ring leh ta lo.



"Kei pawh hi kan Branch lamin inhawn hma ṭul an ti viau a, pawisa dah lut leh la chhuak duh an awm deuh reng bawk nen ka hman ang em ka la chiang lo" ka nu'n a ti zawh rualin ka pa chuan



"Kei chu ka hman theih mai hmel a, Numami nen hian kan han hmang chho hram mai dawn emaw ni le, min chah nasa ve ang reng bawk si" a lo ti leh a, ka pa chu en zeuhin ka ei zawm leh nghal a, lawm ru tak ka ni.




Chaw kan ei kham a, u Duhawmin min awl a tum tlat avangin eina vel chu ka seng fel ta lo va, ka rilruah pitei te khuaa kum thar hman ringawt chu a awm leh tawh. Kan hmang chho a nih chuan Mazara nen kan inhmu leh ngei ang a, a va nuam dawn tak.




Amah khan kan inhmuh leh ngei a beisei a, kei paw'n ka beisei bawk a, kum thar chu kan inhmuh lehna hmasa ber ni se ka duh a ni. Thil pakhat erawh ka la hrethiam tluan tling lo, kan inhmuh leh huna a hriat chian tawh tur thu a sawi kha ka ngaihtuah fê hnuah pawh rin dan ka la nei thiam thei lo a ni.




Min hnaih inthlahrung deuh tlata hriatna ka nei a, mahse min ngaihven ru viau bawk si. Kan inkarah chuan eng emaw a awm ngei a, a la hriat chian theih loh mai zawk a ni. Ngaihtuah ngai reng mihring min ti kha a ni a, kei paw'n amah chu ka ngaihtuah ve reng tho.




Krismas ni chu kan thleng a, Krismas ni a nih miau avangin inkhawm kan ṭhahnem em em a, ni dangah inkhnawm ngai lo te chu an kat nuk a, a tua te pawh chuan nuam kan ti tlâng hle a ni. Inkhawm kan bang a, ina haw tlang lovin ka ṭhiante inah ka leng kawi a, ruai ṭheh huna thawmhnaw hak tur te kan sawi a, len lam kan sawi tel bawk. Krismas ruaiṭheh zawha len chu kan tum nghet bur a, chu chu kan kum tin tih dan a ni.




U Duhawmi pawh a tawm reng thei ta bik lo va, u Rinawma a rawn leng nghe nghe a, puitling ve ve an ni bawk sia inkawm dan an thiam khawp. Ka hmuh dan chuan u Rinawma hian a nghak ni berin ka hria, mipa ah chuan a fel pawl tak a ni. Sir Francis-a angin ka nu te'n an be ṭha hluak lo va, mahse kei chuan ka u tan pawh pasal tlâk tak niin ka hre thung.




Kan ina ka luh chuan ka pa hian Phone-in mi a lo bia a, an inbiak dan leh an ṭawngkam hman dan vel aṭang chuan putea te lam an nih ka ring bawk. Ka room-a ka luh rualin ka Phone chu ka phawrh a, Tlantea chu call ka tum ringawt a, mahse ka pa nen an inbia tih hre chhuakin ka call leh ta lo.




Ruai ṭheh tura ka insiam mial mial laiin ka ṭhiante an rawn thleng a, ka room-ah lo lutin an titi siam siam a, Hlimpuii chuan ngaizawngtu deuh reuh a nei a lo ni hmel a, Mawitei chuan min hrilh phur hle bawk. A tawpah phei chuan Hlimpuii chuan a rawn sawi chhuak ta nge nge a, a sawi dan chuan kan venga mi pawh a ni lo.




Ruai chu kan ṭheh ta ngei a, kum dang ang bawkin ka ei tam lo leh hle. Puipunna emaw chaw ei khawm velah hian chaw hi ka ei tlêm thei em em a, inah ka ei ṭha leh ngei ngei zel. Ka tih ṭhan tawh vang nge pawh ka hre lo ruai ṭheh lai tak hi chuan ka ei ve ṭeuh tho chuan ka hria, a hnu rei lo tê ah erawh rilṭamin ka awm ṭhin thung.




U Duhawmi chu u Rinawma nen an leng a, Bike-in an inphur chhuak ve ngei a, lehkha zir ngawt ngawt lovin hun thawl nei ve se ka duh a ni. Ka nu leh pa paw'n a leng chhuak ve chu pawi tihna an nei lo va, a leng chhuak khât ve êm bawk a ni. Keini pawh kan chhuak har hran lo, kan lenna ah chuan mipa an rawn tel nghe nghe a, kan hlim tlâng khawp mai.




"Numam" min kotu lam ka hawi chuan Sir Francis-a hmel ka hmu nghal a, ka ṭhiante thusawi pawh nuih pui thei tawh lovin ka nui tawp riai riai a, eng nge a rawn tih dawn ka hre hauh lo bawk.



"Inbe lawk teh ang" tiin ka banah chuan a rawn vuan a, min kai sawn nghal dawr dâwr a, ka laka a inla thunei viau chu ka ngaithei ta bik lo va, ka kut chu phih thlak tumin ka thing a, mahse a lo chelh nghet hle.



"Min thlah rawh Sir, i chet dan hi a mawi lo hle a, ka duh miah lo bawk" ka tih pawh chuan ngawi rengin min kalpui hmawk hmawk a, ka ṭhiante dinna lam chu ka hawi let a, mak tih hmel deuh hian min lo en ṭhap ringawt.



"Hetah hian kan pahnih chiahin awm ang, lenpui ah rawn sawm che ka tum sa hrim hrim a, hmun danga kal i duh chuan motor pawh ka keng" hmun reh laia min din pui rualin a rawn ti a, ka kut chu a thlah ve ta hram e.



"I bulah hian ka awm duh lo Sir, ka kal a nia, khawngaihin min lo tibuai rih tawh lo teh" ka tih chuan min chelh ding chat a, ka kut ka phih chhuah rualin a rawn vuan leh nghal a, kan awm dan chu hneawm ka tih zawng tak!



"Keimah nen chiah awm zawk ang, i ṭhiante kha chu i tel lo paw'n an hlim lutuk ang chû, kei erawh i tel lo chuan ka hlim thei hleinem, nge hmun danga kal chu i duh deuh zawk? Kan kal nghal thei reng alawm, ti rawh i kal ang"



"Sir, i mak êm mai. Heti ang hian awm tlat suh, min duh tawh bawk suh, ka duh ve lo che. Kan zirtirtu i ni a, i zirlai mai chauh ka ni a, kan inkarah hian engmah a la thleng lo va, a awm lo bawk" ka ti ta thlâwt a, ṭawngkam ṭha a chhah chhuah reng theih loh tlat a ni.



"Zirtirtu leh a zirlai chu an inngaizawng thei reng alawm, i nu paw'n makpa atana min awh thu a sawi nghe nghe asin, i nu duh dan chu i zawm duh loh ka ring miah lo" a la rawn ti hram a nih chu!



"Ka nu'n duh ringawt che mah se keiin ka duh ve hleinem che, keini pahnih hi zirtirtu leh zirlai mai chauh kan ni a, kan ni reng bawk ang" ti hmawk hmawkin ka inher a, ka kal sawn thuai thuai a, min rawn vuan leh tlat ang tih chu ka hlau ru khawp.



"In inkarah engmah a awm tawh lo emaw ka lo tia, a la awm reng si em ni?" ka ṭhiante bul ka thlen rualin Mawitei chuan chik zeta min en chung hian a lo ti a, ka thinrim laklawh bawk nen ka melh rum hle.



"Kan inkarah engmah a awm tawh lo, Sir Francis-a hi ka ngaih ang a ni lo tawlh tawlh a, kan zirtirtu a ni a, ka lo ngaihsan ve ṭhin tehreng nen, hetah hian awm reng lo teh ang u" ka tih chuan Hlimpuii zawkin



"Eng nge in sawi dun a? Kan hmuh phakah in awm bawk si lo, in inhau em ni? I lungawih loh hmel ropui si, kei pawh in inkarah thil a la awm emaw ka lo ti hman tak tak" a lo ti ve leh a, ka insum hman ta bik lo.



"Ka ning, sawi tawh lo vang u. A hming ringawt pawh ka hre duh tawh rih lo, hmun dangah kal ang" ti hmukin ka kal sawn a, anni paw'n min lo zui ve mai bawk a, ka hun tawn mêk chu a nuam teh chiam lo a ni.





Hmun danga kan kal sawn hnuah pawh ka mood chu a chhe tluang zel a, Sir Francis-a nen inhmu lo ila chuan ka hlim dawn vei tehreng nen, kan len kual chhung zawng chuan ka ngawichawi tluan ṭhak a ni ber. Ka pian tirha ta ka Krismas hman nawm loh ber a ni hial mai awm e, chuti ang khawp chuan ka mood a fuh lo a ni. Zan inkhawmah pawh chu ti tho, tlai lama la thil tawnin a zir lo ve êm bawk a ni.





Ka rin loh deuhin u Rinawma chu a lo leng a, u Duhawmi pawh lehkha zirin room-ah a inkhung ngut ngut duh bik ta lo. Thingpui ka lum a, thil ka hre chhuak zawk a, Mazara lo kal laia thingpui tal ka lo in tir lo chu âtthlak ka ti a, inchhir lahin awmzia a nei tawh der si lo. Ka nu leh pa chu an ṭhiante inah an leng rih a, kei pawh ka ṭhiante ina leng tur chu ka ni reng maw le, mahse ka peih thlawt lo a ni.





"Mamawh i nei em?" dawhkana thingpui ka nghah laiin u Rinawma chuan a lo ti deuh tlawng a, a hmel ka en chuan danglam hmel ka hmu chuang lo, u Duhawmi bathroom-ah a kal rih bawk si a, min be ve mai mai ni turah ka ngai.



"Engtia mamawh?" a zawhna chu ka hrethiam bik reng reng lo, mipa ngawichawi ve tak a ni a, kan inhriatna rei ve tawh tho mah se kan inbe khât khawp mai, u Duhawmi leh ka pate tih loh chu a be vak ngai lo hrim hrim.




"Krismas boruak kan hmang chho mek a, thil awh deuh te i neih tâkin ka ti maw le" pangngai deuh hian a lo ti ve leh mai a, tunah chuan a sawi tum ka hrethiam ve chiah, u Rinawma hi Mazara ang em ema ṭawngmaw a ni lo va, ngainat ruk riau dan ka nei tlat a ni.




"Nei hran lo ve, kumin chu thilpek ṭha deuh mai ka dawng tawh a, eng thilpek dang mah ka ngai tawh lo" nui ver ver ka tih chuan a lo khi suk a, dawt ka sawi miah lo, Mazara Muffler min pek aia ngaih hlut ka la nei lo tak tak.



"Eng lo" ka ti deuh tawp a, sitting room aṭanga kal sawn tum tawh ka ni a, mahse thil eng emaw sawipui ka duh teh thut a, u Duhawmi a rawn lang mai bawk si lo nen remchang ka la ve hmiah.



"U Duhawmi nen hian in inngaizawng em? In awm dan hi hriatthiam a har reuh tawp, in inngaihzawn loh ka ring bawk si lo va, mahse inngaizawng angin in lang lutuk leh chuang miah lo" ka tih chuan a ṭhen zeuh a, a lai ve deuhin ka hria.




"Ka la bur ve ngar ngar chu a nia, eng nge kan an dawn tih erawh hriat a har khawp mai" ti supin ka hnung lam chu a en reng a, keimah min rawn en lehin u Duhawmi a lo kal tih min signal zui nghal zat bawk.



"A ṭhat hlauh chu!" ti hluaiin ka tho va, nui ver verin u Duhawmi chu ka kal pel a, min lo en chik ngei mai, min en dan aṭang chuan zawhna a ngah hmel hle leh nghal.




Ka room-ah lutin ka bawk zâl mai mai a, ring lutuk lovin hla ka play ri ral ral bawk a, ka mut erawh a la chhuak lo khawp mai. Inah awm lo ila chuan ka ṭhiante nen khawi khawiah emaw kan leng chhuak leh tawh ngei ang, mahse ka leng chhuak peih ta tlat lo va, Sir Francis-a nen kan inhmu leh hlawl ang tih ka hlauh vang a ni pakhat.





Ani kha, ngampat dan riau a nei ka ti, ka nu leh pa'n an lo biak ṭhat ṭhin êm vang pawh a ni maithei. Hla dang play tura ka thawh rualin Tlantea hnen aṭang phone call ka dawng nawlh a, ka la rang khawp mai. Chhun lama kan hun hman dan te min zawt a, kei paw'n an hman dan ka zawt ve bawk a, kum thara kan hman chhoh dawn leh dawn loh lam min zawh chuan sawi phur tak ka ni.





Kan hmang chho dawn a nih paw'n ka pa nen chauh kan theih ka rin thu chu ka hrilh a, thil dangah kan pakai a, nuih vak vak chang pawh ka nei. Kan unauah mipa kan awm lo bawk a, Tlantea chu ka unaupa ang tak takin ka ngai a, kan inrual vel chiah bawk nen sawi tur kan ngah dun barh barh hle. Kan inbiak laklawh laiin ka nute an lo haw a, kan inbe rei zui ta lo.





Chokaah lutin Frigde aṭang tui ka la chhuak a, tukverh bula ka din avangin kan in kawta u Duhawmi leh u Rinawma ding dun chu ka va hmu a, an ṭawng ri erawh ka hre thei lo. U Rinawma chuan u Duhawmi kut chu a chelh reng a, an indin hnaih ang reng hle bawk. An awm dan chu ka en zui zel châk tlat pek a, tui ka in zawh hnuah pawh ka kal sawn duh mai lo.





A hma aiin u Rinawma chuan a din hnaih lehzual a, kei chu film hmuhnawm tak en ang mai ka ni. Zawimuang hian a kun hniam leh a, u Duhawmi khabe chawi kângin a biangah chuan a fawhsak zeuh a, awm sawn nghal mai lovin a hmuiah tak chuan a fawp zui leh nghal a, ka lo nui ver ver ringawt. U Duhawmi paw'n engtin mah lo dan buai vel a tum lo va, Mazara nena kan awm dan ka hre chhuak leh ta nge nge.





In chhunga u Duhawmi a lo luh lai te chuan hmu lo ang deuhin ka lo awm a, a room-a a luh rualin ka zui lut ve nghal a, zanin chu lehkha a zir thei hauh lo vang, zawhna ka va han ngah tak êm. A inzep vel a, u Rinawma nen an inkar a sawi ṭha duh lo vel a, ka hmu chiang ropui si, tunah chuan a kâ ngei aṭang an inngaihzawn thu ka hre tawh ngei ang, phat ngaihna a awm tawh lo hrim hrim bawk.





A lehkhabu zawng zawng chu ka khup vek a, lehkha zir tum ni awm tak hian a che melh melh a, u Rinawma nena an inkar dik tak sawi turin ka ngen lawm lawm bawk a, a sawi ṭha duh chuang miah lo maw le. Hmeichhe luhlul ngil ngel ve tak a ni a, mahse a luhlulna bak hi chu han sawisel vakna tur a awm lo, hmeichhe fel ve tak chu a ni.





"I room-ah phei rawh, lehkha ka zir duh" a tih pawh chuan a khumah ka mu tlat a, u Rinawma a duh thu sawi tura ngen mai bakah engti ang chiaha duh nge a nih chu ka zawt chhen a, min hrilh loh chuan a room-a ka riah dawn thu ka sawi zet zet a, a tih ngaihna hre lo chu min tawp ringawt.




"Sawi teh u Duhawm, sawi zah chi pawh a ni lo. Pawna in fawp lai kha ka hmu vek tawh che u, chuvangin sawi mai mai rawh" ka tih leh chuan phawk zet hian min en a, ka chala nam sawkin



"Mi enthla rual pawh i ni tawh lo HMINGTHANPUI, ching tawh reng reng suh" a ti deuh hmuk a, kei ve thung chu ka nuih a za tulh tulh a, u Duhawmi lai hmel chu hmuh a nuam reuh lutuk.




Sawi tura ka ngen ngawih ngawih avangin a tawpa tawpah chuan a rawn sawi chhuak ta nge nge a, a sawi danah chuan u Rinawm chu a duh ve tak zet tawh a ni. U Rinawma chuan nupuia neih hial a duh thu a lo hrilh tawh hi a ni a, inzep thei ka va'n ti dun ngar ngar tak. U Duhawmi erawh chuan hlawhtlina MCS nih phawt chu a duh a, inthup ru ranin an lo kal thui dun tawh khawp mai.





Ka ngaihtuah zui neuh neuh a, u Duhawmi pasal atan chuan u Rinawma baka ṭha ka hre lo. A puitling a, a mizia a nghet a, ka nu leh pate pawh Sir Francis-a te angin a be ṭha lûam ve ngai lo bawk. Eizawnna lamah ni se ngaihtuah awm a ni lo va, u Duhawmi pasal atan chuan iaina pakhat mah ka nei lo a ni. An inhmeh ka ti ru viau zawk a, innei thei ngei se ka duh pui hle.





Inrinni a ni a, kum hlui thlah ni tak a ni bawk. Ka pa nen pitei te khaw lama zin turin kan insiam a, ka nu leh u Duhawmi erawh kal buai an tum ta lo law law. Chaw ei khama chhuak mai nghal turin kan insiam sa diam a, chaw ei lai chuan ka pa'n phone call a dawng a, a lung lo hle leh nghal.




Ka pa chuan Kolasib-a zin thut a ngaih thu a sawi a, hna thil a nih avanga a zin ngei ngei a ngaih thu a sawi lai te chuan ka hnual vek a, chaw ei châkna pakhat mah ka nei tawh lo. Ka room-ah lutin ka bawk thlawp a, Mazara ka hmuh leh theihna tur a nih avangin kan zin leh lo tur chu ka rilru a nâ ngawih ngawih a ni.




Ka pa chu ka room-ah a rawn lut a, ṭha deuhin thil min sawipui a tum a, kei erawh ka lo ṭeu hlar thung. Ka ṭah te chu a chhuak et et a, Mazara hmel chu ka hmu châkin ka ngai ve tawh êm bawk a ni. Ka pa chuan phone call a dawng leh a, u Vli hnen aṭang a ni a, kan awm dan vel chu sawiin min en reng pah bawk.




"Ka hre lo, ka ngaihtuah bawk si alawm, kha amah hi han be teh" ti supin ka pa chuan a phone chu min lo pe a, lungawi lo zetin ka lo la a, ka pa chu room aṭang a chhuak zui nghal ta daih.



"A rem loh te chuan titau vel lo khan kal loh tum mai ta che, ka pa paw'n engmah a hre lawk bik nâng" u Vli chuan a lo ti a, kei chu ka ngawi reng a, kal lo tura ka inngaih chhin ringawt paw'n ka rilru a nâ thei.



"A thu hrimah engati nge chhoh kher chu i duh? I tihtauh phah vel a nia, kum lai hawla kan zin chhoh pawh khan nuam i tih miah lo khâ, Aizawlah khan kum thar chu hmang leh mai mai zawk rawh u, a rem lo êm mai"



"A rem bawk, duh chuan MST Bus paw'n ka chho thei reng, a rem loh vang ni lovin an phal lo ve hrim hrim a ni" ka ti bak deuh hlar a, chek ri tlak tlak pah hian




"Tun ang hunpui boruakah te chuan an service tawh hleinem, chu bakah Bus phei chuan ka pate'n an ngaihtuah lehzual zawk ang che. I chho duh tlat a nih chuan pitei te khuaah Sumo chu a awm ve khâ, mahse a lo rem kher ang emaw!" a rawn ti melh melh a, chawp leh chilhin ka harh chhuak nghal.




"Ka dah aw, ka pa ka va be teh ang" tih leh kan inbiakna tih tawp chu ka rual a, room aṭanga chhuak vatin ka pa bulah chuan ka phei a, a lo phun deuh bul bul a, Kolasib-a a zin thut tur chu a lungawi bik ngâng lo a nih hmel.





Ka pa hnenah chuan Sumo pawha ka chhoh hreh loh thu ka sawi a, an vai chuan mak an lo ti hlawm khawp mai. Min en ṭhap a, leh lam kawng zawng tak chuan ka awm dan chu an mak tih tham a tling ve reng. Kan zin hmasak zawkah lah khati ang khawp khan ka phur lo a ni si a, ka rawtna chu phal hram se ka ti a ni.




Min en reng a, a lama kal hnaiin ka va kuah ringawt a, chutah erawh a rawn nui chhuak ta hawk. Ka nu zawk chuan a phal loh thu a lo sawi nghal bawrh bawrh a, melh rum tak ka ni. Ka pa chuan a phone chu lek kângin pitei te lam a be zui nghal a, ka nu thusawi te chu engah mah ka ngai ta lo.





Ka kuahna aṭanga tal chhuah a tum lai te chuan ka pa chu ka kuah nghet zual sauh a, pitei te nen inbe reng pahin ka chalah min pek fawk phah nghe nghe. An ṭawng dan aṭang chuan Mazara Sumo khalh neitu te lam biak a ngai tih ka hrethiam nghal a, ka pa chuan an phone number dilin a be leh zui nghal a, ani hi chuan pitei te khuaa kum thar hman a phal chiang a ni.





"Dar 10 velah a rawn chhuak ang a, chawhnu lamah in chho dawn a nih chu" ka pa'n a rawn ti chiah chu zuan vak vak mai ka duh a, mahse an hriatthiam palh ka hlauh avangin ka insum hram hram a, room ka luh rualin kawngka ka kalh nghal a, khumah ka tal chiam ringawt.





Chhun thingpui in laiin ka nu chuan a phal loh thu a la sawi deuh reng a, eng ang paw'n sawi mah se ka pa berin a phal tawh a, ka kal dawn tho tho. Chu bakah Mazara ngeiin min lo hruai dawn a, ka hlim hi a ni tawp. Ka inchei dan turah chuan ka buai a, Mazara mawi tih zawng tur awm ang chu ka ngaihtuah a, ka hre hlawl lo. A Muffler min pek chu ka awrh dawn ngei a, mahse eng nge kawrah ka hak tâk ang?





Chawhnu dar 2 leh a chanve a pel tawh a, ka kawr hak turah ka la buai hle thung. Zing lamah kha chuan ka insiam lawk ve ngei alawm, ka pa nen kan zin dawn emaw ka tih avangin ka inchei ho lam viau bawk. Tunah erawh Mazara nen kan chuang chho dun dawn a, kawr ho lam mai mai ha thei ka ni lo, a mit la tak ka hak ngei a ngai zawk a ni.





A tawpa tawpah chuan kawr rawng dum lampang ka ha ta tawp a, kekawrah Jeans rawng pawl ka ha leh a, kawr lum uk chu hak turin ka la chhuak bawk. Kan in kawtah chuan ni hlim a rawn awm ṭan a, dar 3 kan hnaih thuak tawh a, ni hlim awm hun chu a ni ve tawh hrim hrim. Veranda-ah ka ding reng a, Mazara chu ka lo chang a ni ber.





Dar 3 rik dawn ṭêpah kan in bul kawngpuiah chuan Sumo a rawn ding ta, a khalhtu chu tu nge a nih hrilh ka ngai lo, ka hre chiang em em zawk a ni. Motor aṭanga chhukin ka bula bag ka dah chu a rawn la a, a chungah pawh dah lovin seat hnung lamah a dah a, kan thawl ṭha halh halh dawn hle a ni.




A rawn thlen tirha min en zeuh tih loh chu vawi khat pawh min melh leh tawh lo va, a thei hi ka ti ṭhin. Ka nu chuan ka chuan man tur a pe lawk thlap a, fimkhur turin min chah bawk a, min ngaihtuah hmel khawp. Min thlahna thu a sawi zawh hnu chuan kan tlan chhuak a, ka bula ngawi run pa chu biak ka châk ru reng, mahse min be hmasa turin ka phut ve tlat tawh.





Ka kawr lum hak chu ka phelh a, a Muffler min pek ngei ka awrh chu a hmuh atan ka ti a ni ber. Ka beisei ang ngeiin ka thil awrh chu a rawn en a, mahse a hawi sawn leh nghal daih. Ka lungawi lo ru viau a, motor chhungah kan pahnih chiahin kan chuang bawk si, a mi uap chu na tak a ni. A hmel chu ka en zeuh zeuh a, a va han pa chiang tak, min hmuh ruk reng ka ring.





"Min hrilh hmasa lo a" kan ngawih dun tlawk tlawk lai chuan a rawn ti sup a, chu thu chiah chu sawi mah se min biak hmasak avangin ka lawm hman em em tho a, mahse lawm ang deuha awm ka tum rih lo, ka lungawi lo laklawh tlat.



"Numam?" min en zeuh pah hian amah bawk chuan a rawn ti leh a, ka hming a vawi hnih lamna a ni a, a hmasa ber chu Counter-a kan inhhmuh hmasak ber ni kha a ni a, tuna min koh dan hi chu a dang zar ta mai.



"Eng nge i sawi tum ka hre lo" ka ti deuh hmuk a, lungawi lo ang deuhin lan tum mah ila ka theih rei ka ring tawh lo, amah chu va kuah chawng chawng ka duh tawh hial a ni.





Ṭawng leh chuang lo hian a khalh ngaiin a khalh reng a, mahse a tlan thui lo hle. Kawngsir lamah chuan muangchang hian a tlan a, motor a tih din rualin a lam chu ka hawi phei a, kan va han inmelh chiang teh kher em. Hawi sawn ka tum a, ka thei miah lo leh nghal. Min en reng chung hian ka lamah a rawn âwn tial tial a, ka beng te chu a sa hut hut a, chuti ang renga ka thin a phut ran chu ka la hre lo. U Duhawmi leh u Rinawma awm dan ka hre chhuak thut a, ka maimitchhing ta ringawt.





(End of Chapter 12)




.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)