THURÛK_99 Chapter #21 By Floria Laldansangi

Episode kal lai dah luhna

Moderator: writers

Floria
Posts: 522
Joined: August 28th, 2017, 12:07 pm

THURÛK_99 Chapter #21 By Floria Laldansangi

Unread post by Floria » August 10th, 2022, 8:09 pm

THURÛK_99

By

Floria Laldansangi


Chapter < 21 >

<><>~>~>


HRUAIA...POV

"Sir..."


File chu ka keu a, "khang account zawng zawng kha Rokima ta vek anni. Account holder ang a inziak te erawh atam zawk Mizoram-a cheng an awm lo thung a, vai anni tlângpui bawk," ka bu nghut a.


A account zawng zawnga pawisa awm hi belh khawm ila, a lo berah 3 Billions Rupee chuang chu a ni ngei ang. Heng pawisa te hi mipui pawisa tur leh kawng siamna tur, school sak ṭhatna tur leh thildang tamtak tih ngai leh, hmanraw chhe zawk hmanga sum a paipawn ṭhen te anni. Mizoram sorkar aiin kan Minister ṭhenkhat te hi chu an hausa zawk lo'ng maw?


"Sir. Heihi financial department aṭanga Nuai 58000 chhuak a ni a, Nuai 300 ṭheuh hi hming list i siam account pangaah a lut bawk a. A la bang zawng hi PFMS lamah chhûn luh a ni."


Ka nui hul huk a, "chhui tura ka tih che kha," file chu ka khup a, "a boral tawh. Mahse, maktak chu Rinfela hnen aṭangin râlna sum Sing 5 a nupuiin a dawng."


"Thildang a la awm em ni?" A ngawi vung vung chu ka en chho a.


"Ricky-a medical record thlak tura titu kha ka hre tawh a," ṭhu ṭha zawtin, "tunge?" Ka ti chang fuk bawk.

"Senior Inspector Zairema..." Dawhkan ka chum dat. Kanthaw zui hriah a, "Doctor zawk chu le?" A lu a lo thing mat mat a, "a la biak theih loh," ka thaw chhuak hawk.

"Lo lut rawh," kawngkhar inkik rualin Vula'n a lo ti vat a. Kei erawh ka thinrim ta ṭûn mai!

"Sir, Malsawmkimi Nu-in a hmu duh che," inbengdaih tuma thaw chhuak ham hamin, "rawn luh tir rawh. Vula, Hyderabad-a ralthuam awm kha CBI kutah hlan ang che...."

"Mahse Sir..."

Ka kut chunglamah ka lo vai thuak a, "ka sawi ang chuan tirawh," ka ti zui hluk.

"Ka hrethiam e...."

Sazu a kaw tawpa nawr dâwn leh, tunge a kuaa a tawmpui tih hre tur chuan an sahseh tur kan chhawp sak a ngai alawm.

Kawngkhar a chelh tawh, "Vula... Ka nupui vengtu dahbelh ang che..." ti supin, "a hre tur a ni lo..." Ka tih zawm leh.


"Yes Sir...." A nui vur vur. Ka hnuaia a thawh aṭangin kei hian tu hmeichhia mah ka buaipui khu chûk ngai lo tih a hria. Ka nupui hmasa ka neihlai ngei pawhin hetiang hi ka ni ngai lo tih a hriat avangin, Malsawmkimi himna turah erawh min phurpui ve thei viau zel.


"Ka tibuai che em?"

"Lo ṭhu rawh..."


"Pehhel kual lovin, ka hmuh duhchhan che i hria ang chu maw?" Hmeichhia, mipa rilru ang pu a ni tih a hriat theih.

"Eng nge a an?" A tih zawm zat.


A hmaa ṭhu thla in, "i tihnat hnuaah i rawn ngaihtuah leh si em ni?"

"Nu ka la ni reng tho si alawm," ka lo khi suk, "hmeichhe chak tak alawm a nih. Engvanga min rawn hmu nge inih? Malsawmi ṭhat leh ṭhat loh hre tur ringawt a i rawn kal ka ring si lo va."


"Ni e. Inneih intum tih ka lo hria a."

"A dik alawm," ka hmeichhe hmangaih na taka siamtu hi engtia lo chhâwn tur nge tih keipawhin ka hre mai lo. Ka Myla-i tina tu chu ka tán chuan hmelma an ni ngei si a.


"Nupuiah i nei duh tih i chiang amaw?"

"Eng thu nge sawi i tum?"

"Ngaihdan nih lohnan hmang suh, pasal tel lova fapawm a ni a. Thinlung takin i pawm tih i chiang em? Mahni hrin loh fa enkawl leh hmangaih harsat zia i hrethiam meuh maw?" A mitah chuan Malsawmkimi a ngaihtuahna ka hmu thei. Chu chuan min inthlah dul tir hret bawk.

"Mipa ka ni a, ka thiltih leh duhah ka chiang bawk."


"I Nu leh Pa ten an pawm dâwn lo tih pawh i hria ang chu maw?"


"Tu phalna mah lâk ka mamawh hauh lo mai," ka lo ti nghut a. A nui ve ta sak tho.


"Thildang erawh ka zawt tawh lo mai ang che. Mahse, Hruaitluang a thinlung hliamtu zingah i telve a nih chuan ka chhuah dâwn lo che a nia," ka lo khi suk a, "khawvêl pawh a duh a nih chuan ka pe ngei ang," ka ti nghet churh.

Hmangaihna a dawn ngai loh leh ngaihsakna a dawn ngai loh zawng zawng thlengin kei hian ka pe vek dâwn a ni. Mipa ka ni a, ka ti ngei bawk ang.


<>~><><><><>

SAWMTEI...POV


"Anu, hmanah khan tuin nge hau che a?" Ka mal chunga ṭhu chu ka fapa chu ka melh zawk a, "engtikah maw?" Ka ti liam puat. Thu mak deuh deuh mi zawh hi a ching a.


Hmui ti pawrh tarhin, "Api Ruatmawii te in ah khan i ṭah char char kha," a uar ang reng bawk sia, ka lo nui ringawt.


"Anu, i dam lo leh a mi?" Emma-i pawhin seat hnung aṭangin a lo ti ve bawk a. Min ngaihtuah ve reuh em maw ni an la hriatreng danah.


"Na lo ve, hautu pawh ka nei lo, ka ṭah a chhuaka ka ṭap mai mai," ka ti tak nâa ka fate hmelah erawh an awih hmel viau chuang loh. Bum hi an har ve zek zel bawk sia!


Ka Nu te in' ka ti dâwn nge 'kan in' ka ti zawk dawn pawh ka hrethiam ta lo ve. Ka pian dan chanchin diktak ka hriatna karkhat lai a ni ve leh ta. Ka Nu nen erawh kan la inbe leh ta miah lo. U Tetei nen erawh kan inbe tamin, ka Nu pawh a hriselna a tlakhniam thu a rawn sawi veleh zauh ṭhin.

Ka fate school-a ka dah hnuah ka hnathawhna lam ka pan zui nghal a.

Station ka thlen dawnah Mapuii call ka dawng nulh. Lunglei anzin an rawn haw tawh em maw ni?

"Aw Mapui.." taxi fare ka pe zui a, ka hawi let leh, car dum sawn minzui tlata ka hriat ni? Ka ngaihbel zawk nge?


"I ṭha em? Nizanah U Tetei nen kan inbiaa chanchin ka hre ve chauh a," a rawn ti zung zung.


Za vak lo hian ka lo nui a, "ka ṭha lutuk..." Ka ti sep. Car bawk chu ka en leh ṭhin, minzui tho tho vin ka hria.


"Tak tak maw?" A thaw deuh huai a, "a nunrawn thlak êm mai, a tir aṭanga hrilh che nise i hriatthiam dâwn nen," min lungawi pui lo tih hriat deuh hian a rawn ti chhuak leh a.

"Ummm.. Hringnun a nih hi," ka lo ti let ve mai bawk.



"Mapui, hna ka thleng ka dah rih dâwn a sin."


"Aw..aw..aw..i ṭhat leh ṭhat loh ka hre duh mai mai. Naktukah kan rawn haw dawn ka rawn lêng dâwn nia," ti zung zung chuan a off zui a.

Station ka lut chiah U Zea'n ring fahran hian, "damdawi in ah châm hlen tum te kan awm a, a buaithlak ṭhin khawp mai, indaih loh a natnen," ti deuh lawng lawng chuan a nui zui ruh ruh.


"I ninawm Lalzemawi.." Ka nui ve vur vur tho.


"Luak chhuak hnura damdawi in awm ka hriat awmchhun in ni," Ṭpa'n nui ṭhû-in a lo ti ve zat a. An lo nui dar dar.


"Inhman hle mai..." U Hruaia'n ka hnunglam aṭangin a rawn ti thûm dût chu ka hawi vat.

Min lo nuih suka ka bula rawn dingin, "Zea ti tura ka tih che kha iti em?" A zui sup.

"Kan hman em ni? Tea tihtur kan nei a ni lo'm ni," nui chungin ka lu ka lo thing mat mat ringawt!



U Hruaia pawh nui ve suk sukin, "office-ah min rawn hmu rawh," a tih leh chuan U Zea'n min rawn en a, "hna ka nei a keipawh," tive vatin nui ver verin ka pensawn vat vat. Min fiam an la châk tih ka hre reng.


"A va ho e aw...." U Zea'n a ti nang nang chu autopsy room pan chho pahin ka nuih khek khek.


A sawi erawh ansawi dik reng, damdawi in hming lam ringawt pawhin luak a chhuak mai dâwn tak tak alawm.


Ni lengin hna ngaiah kan buai ve leh lawp lawp a. Case hlui pawh ka en nawn ve leh thuak thuak bawk.


"Coffee ka lei dâwn a sin, i duh ve em?"

"Americano no sugar..." Ṭpa lam chu ka hawi a, "thanks..." Ka ti zui zat.


"A kha âwm ve..." Ti deuh nung nung chuan a chhuak ve mai bawk a.


Ka hnunga rawn ding chu tunge a nih hrilh ka ngai lo, a rim, a mi uapna aṭangin ka hre thei.

Ka tih ngai ka tih zawm malh malh a, "ka rawn luh pawh i hre nang?" Zawhna ni siin läwm lohna a ri tel.

Nui ru deuhin ka la inher duh chuang lo, "Bawihi..." Ti deuh nghut chuan, hnunglam aṭangin ka dulah a rawn zen a, min kuah zui chu ka nui chhuak ta khak khak.


"Min thlah teh..."

"Min hre lo der a maw?" A nui zui ve huk.


A lam hawia inherin, "hetah rawn chho fo suh.." Nui chung renga ka ti chu a läwm vak lo nge a hnar a lo tum dut a.

Ka hmai hnaih taka rawn kûn hniamin, "ka nupui ni mai tur ka hmu duh a ni mai a. Tunge min dang ngam ang ni," a ti dam raih chu tih ngaihna hre lo deuh hian ka lo nuih ringawt. Ni e, tu in nge maw tihtur hrilh ngam ang ni.


Ka hnunglama file chu a melh zauh, min rawn en lehin, "Myla, case hlui i hai leh a.." A aw chhuakah chuan case hlui ka hai chu a duh lo a ni tih ka hre thei.


A t-shirt hak var nalh taka sam zai pakhat awm chu ti faiin, "dik lo a awm tih ka hria a, khawiah ber hian nge dik lo tih ka hre si lo a tin ni," a khabe hnuai aṭanga melh chho kiauin, "a taksa exam-tu doctor kha a awmna chin ka hre thei lo va," ka ti leh chu a lo rum nghut a inla hrang vut hian a chhip sam tuai puatin, "Myla, inrawlh lo turin ka duh hle che tih i hria tiraw?" A aw chu a dam miah lo, a chang viau lo bawk. Mahse, lawm lohnain a khat thung.


Engvanga ka U case hi chhui lo tura min duh em em nge a nih ka hrethiam lo takzet.


"A chhan tal min hrilh la," ti hrâm chuan Ka inhersan deuhhmak bawk.


"A hunah engkim ka hrilh ang che."


"Engtik nge a hun? Min hrilh i tum lo zawk a nih kha," ka ti leh hmiar hmiar. Chhan sawi duh si lo, case ka chhui a duh bawk si lo. A ngaihna hriat a har êm a sin.


A thaw ri hraih a, "Bawihi...." A ti zet tawh, "ohh, Sir..." Ṭpa a rawn luh takah chuan a lam hawiin Ṭpa coffee min rawn pek chu ka bansan ta daih a.

"Chhuak tawh rawh, hna kan thawk dawn," a mitah pawh ka en duh lo. Coffee chu lem hlekin ka hawisawn leh daih bawk. Min en rûn rûn tih ka hria, ka haider lui tlat thung. A awmdan hi ka hrethiam ṭhin lo a ni. Zep a ngah lutuk te hi ka duh lo leh zual.

Thaw ri ta hulh chuan, "zanriah eina tur kan neih kha, ka lo nghak ang che," zawi supa tih leh a inher vut a, a chhuak chu ka mitsir zauh. Ka coffee no kenlai hian ka vawm zui pawp zawk dâwn em maw ni? A ngeiawm thei renrun lutuk mai.


Ka lakah hian zep a nei tih ka hria, engchiah nge a zep a? Engthil chiah nge ka hriat leh zawn chhuah a hlauh em em hi hriat ka duh a ni. Ka hre ngei bawk ang.


"I la thinrim em ni?" Car chhungah pawh ngawi ngalin ka ṭhu ran a. Khawilam nge min panpui pawh ka hre chuang lo.

"Myla, zawhna ka zawt che," a rawn ti leh nghut.

Pawnlam hawi ngar chungin, "ka zawhna zawng zawng min chhang chuang bik hleinem," ka ti let nghat. Tlawm zawk nih tum ang hrim hian a thaw zui ham ham a, engmah a sawi zui tawh bik chuang lo.


Car chhung zau tak, boruak rit ru tak chu ṭang ṭunga ṭhuin ka hip leh kawk ṭhin, U Hruaia hmel chang rût mai chu ka melh ru leh ṭhin bawk a. Inhau chiam kan ni lo va, mahse boruak ṭang at mai chuan ani pawh a ti lungawi chiah lo a ni ang. A hmel a chang ṭeng ṭung êm mai!


"Khawiah nge min hruai i tum?" Ka ti zet tawh, kan dinna tual zawl zau tak chu ka en phei a, mimal in a ni tih ka hriat rualin an In ah min hruai a ni tih ka hrethiam nghal bawk.


Car a ṭang a chhuak vut a, ka awmna lam kawngkhar rawn hawngin, "ka Nu leh Pa kan hmu ang," a ti zawi sup.


"Min hrilh miah lo va," lungawi lohna nasa deuh hian ka lo ti vat. Lungawih loh sa nak alaiin, a tihtur hi engmah min hrilh lawk ngai lo.



"Min zawt hleinem," a lo ti let khauh lehnghal. Ni e, ka zawt miah lo. Zanriah kan ei chhuak satliah dâwn emaw ka tih vang a ni.


"Min hrilh ve mai ta che. Thil har pawh a ni em ni? Min en la, ka inthuam dan te hi," ka ti hlak hlak. Jeans leh t-shirt nena luh ringawt bakah engmah ken loh pawh chu a ni thei dêr lo, vawikhat hmuhna tur lehnghal.


"Lo chhuak phawt la," dam ta thluam hian a ti leh ang lawi a.

Melh ram ram chuan ka chhuak ve ta nge nge, haw lêt chi ni tawh hek lo.


"Myla...." Ka kut rawn vawn a tum chu ka lo phihsawn daih, a rum nghut a, ring tun vaha an in lam ka pan vawh vawh chu ka hnungah min rawn zui ve mai bawk.

Kawngkhar zawn ka thlen chuan ka lut ngam leh lawi si lo chu tawi khawmuang deuhin, ka awmdan hrethiam tih hriat takin ka bulah a rawn ding a, a nui ri zui suk chu ka melh chho vak. Nuihza insum deuha mithmul kân âk chuan doorbell a hmet ve mai bawk a.


Nichina ka confi tehlul nen, "an lo thleng a nih chu," hmeichhe aw in a ti ri ka hriat chuan ka zâm ve khanglang lehnghal.


"I bulah ka awm," ka awmdan hrethiam tih hriat takin ka kawngah a rawn chelh vat, kawngkhar rawn inhawn rualin, "Sawmte..." Zodini nui hmel ka hmu nghal zat. Ka thaw nghal huai nâ in ka zâm nasa.

Ka âwm chhung hi a tawt nghal em em a, a Nu leh Pa sofa a lo ṭhu ka hmuh phei chuan pilbo daih mai ka duh rum rum.


"Sawmte...." College ka kal tirh a kan professor ni ṭhin, Prof. Chawimawia ka hmuh chuan khuk ral chem chem mai ka duh tak tak. An va zahawm tak!

U Hruaia chu rang lutuk hian ka melh chho a, "lo ṭhu rawh u...." Prof. Chawia chuan a ti leh.

"Inhmuh lohna a rei ta hle mai. Ka fapa hmeichhe min hmelhriat tir duh chu nangmah ini ang tih pawh ka ngaihruat thiam hleinem le," ti zui lehin a nui sun sun a.



Za lo lutuk hian ka nui hehehe satliah ringawt, han sawizawmpui dan tur ka hre mai lo, "i dam ṭha em?" Ka ti ta sep, ka thlanfim ten min rawn bual dawnin ka hre hial mai.


"Malsawmi maw inih a?" A nu chuan a rawn ti chhuak a. A aw chhuak leh min endan chuan ka nihna engkim a hre tawh a ni tih mimawl ber pawhin an hrethiam ang.

"Aw ni e," ti em em hian mihring fanu hi a zâm theih ngai em ni?

Zodini a Nu bulah a rawn ṭhu zui ve a, nuisangin, "ka pa hi in professor ṭhin a ni tih ka lo hre lo va. Nu ka U first love a nih hi," a nui zui ar ar. Za lo deuh hian ka lo ṭhen ve leh ṭhin.


U Hruaia chu hnar tum dutin, "sawi duah a ṭul ṭhin lo. Kan inneih tur thu hrilh che u ka duh ka tih kha," a ti zui sup sup.

A malah ka hmer vak, a mak teh tawp ṭhin.


"Ka duh lo, apa nupui i neih chuan apa ini tawh lo ang," Shanel-i a rawn au tuar, a ṭap zui nghal hliam bawk a. A pi ṭhutna lam panin a ṭap hliam hliam.


"I pa hi lêngtar se iti em ni?" Zodini'n a lo ti vat.


"Fa i nei tawh tih kan lo hria a," Prof. Chawia chuan a rawn ti kauh mai.


Ka bu nghat a, "phir ka nei alawm," ka lo ti ve sep bawk.


"I fate chu a pa te bulah dah i tum? "

"Nu..." U Hruaia'n a lo khak vat chu za vak lo hian ka nui a, a mal ka hmer leh salh, min lo pui lo se ka duh. A nu leh pa mitmenga ka tlin loh sa nak alaiin.


"Tum miah lo. "


"I fate nen chuan kan pawm thei lo che u tih i hrethiam ang chu maw?" A nu bawkin fiah zet hian a rawn ti leh a.



"Nu, engthu nge maw i sawi le? Ka u pawh fa nei tawh tho a nih hi."

"Zodin, lo inrawlh suh..." A pa in a lo khak vat.

"Inrawlh pawh a nih loh chu. Ka U pawhin fa a nei a, nuthlawi leh pathlawi anni a, hmeichhia a nih avanga a rem lohna bikna tur ka hre lo," Zodini chuan a tih zawm zat zat.


"Hmeichhia hian fa neih hnuah pasal annei nawn thei lo intihna a nih ber hi," lungawi lo tak hian a ti leh a.


"Zodintluang, a in ang lo, ani chuan pa tel lovin fa a pawm. I U nen khaikhin suh," a nu in a lo ti hlar.

"A danglamna ka hre lo. An fa neihdan a dang a ni mai alawm," a ti leh nang nang. Zodini'n ka thlavang a hauh lutuk chu a mak zawk hial.



U Hruaia taksa ṭang zui ṭawlh ṭawlh chu chiang takin ka hre thei a, ka en vat bawk.


"A fate a rawn chhawm luh dawn loh chuan kan pawm kan ti reng alawm," a nu chuan a lo ti leh hlar, min rawn en zui zat bawk.


"Pawi ka ti, mahse ka fate hi khawiah mah kal tir ka tum lo. Enkawl thei dâwn lo ni ila, ka pai tirh khan ka hmet thla ngei ang," ka nui a, U Hruaia melh ralhin, "ka tling lo tih ka hria alawm," ka ti zui sep bawk.


Lo thaw ri hraihin, "zanin hian inphalna dil tura rawn hruai ka ni lo. Ka nupui neih tur hrilh hriat che u hi ka mawhphurhna a nih avanga rawn hruai ka ni," dam ruih si, chang fuk hian a ti chhuak a, a ding zui vut bawk.


"Hruaitluang, khatiang khan minbe reng reng suh. Tû Nu leh Pa innge an fapa nupui tan sàwnfa pawm chu duh ang ni?" A nu in a rawn ti ṭhak. Ka lo ipchawih mai. Ka nihna mah nise ka awm ve lai ngei mai a tîmna tel miah lova a sawi chuan ka âwm chhung hi a chhun ve zak nia.


"Nu, midang sàwnfa pawm tiin i hmusit ngawt thei lo," Zodini a U ṭawng hmaa a rawn ṭawng chuan min ṭhawng leh zual.


"Tho rawh..." Zo zet hian min pawt tho nawk a, "karleha kan innei dâwn, inrem tihna lak ka tum lo," U Hruaia'n dam raih leh nghet churh si, luhlul tih hriat tak maia a tih leh chuan phawk fe hian ka en chho haw haa ringawt. An in chhungah bomb ka thlak emaw tih mai tur alawm!


"Nu leh pa phalna lo va neih pawh chu i ngam em ni?" A pa in a rawn ti dam ruih a.


"Innei rawh u," Zodini a rawn ding a, "in theihnghilh a nge? Keipawh fa lo avanga sàwnpawm lo leh nuthlawi hmingpu lo ka ni, in fanu chunga thleng thei reng a ni zanin a in awmdan hi," a rawn ti zui khar khar. Zodini en chuan ka hnuk a ulh lek lek zawk.

"Zodintluang..." Ka phu nasa lutuk, U Hruaia lamah ka tawlh nghal rak rak mai.


Ka kawngah a lo chelh vat a, thaw ri hulhin, "tikhan infate pawh kan famkim lo a ni tin inhria ang chu maw?" U Hruaia bawkin a rawn ti leh, a aw chhuak chu a ngeiawm lek lek zawk, vawikhat pawh a Nu leh Pa hmaa a aw ki a san chhin eih lo erawh chu a fakawm takzet. A dam raih reng mai a. Nelawm tak erawh a ni miah lo thung!


"Sàwnpawm inih kan duh loh vanga läwm ka tihtlak tir che ni," a Nu in a rawn ti leh hrâm.


"Hre rawh, zanin hian he inchhung hi kha hmeichhe nena i chhuahsan a nih chuan kan inzawmna a tawp ang," a Nu thusawi chu mak ti deuh hian ka en a, U Hruaia min chelhna aṭangin ka tawlh hla hret bawk. A chhanchu henghi thleng lo se ka duh takzet vang a ni. Tin, a nu leh pa hmel lah chu a thutak viau bawk si a.

Mahse, a lama min pawt hnai leh zatin, "ka duh thlanna ni lovin, duh i thlang zawk a nih chu," tih leh min inherpui vut a.


"Hruaia, i duhthlannaah i chiang a maw? Kei leh i nu hian kan pawmpui ngai dâwn lo a nia," a pa in a rawn ti ve churh churh, U Hruaia hian a pa mizia a lo chhun a nih hi, a dam ruih mai.



"A vawihnihnan ka duh loh kawng min thlan tir tum suh u," ti let sup chuan kawngkhar lam min panpui a.


"Apa.." Shanel-in a malah a rawn kuahbet vat.


Thaw hawka min vawnna thlahin a ṭhu hniam a, "Shanel, kum 11 ini tawh, duhthlang thei ini?"


"U Hruai..." Ka lo pawt vat. Naupang dinhmun khirha dintir a tum em maw ni?


Ka ṭhu hniam rawk rawk a, "Shanel..."


"Misual inih hi..." Mi lo nam deuh vak chu, ka lo ṭhu rem lo bawknen chhuatah ka ṭhu sawp hnak.


"Lalngaihawm..." U Hruaia aw khauh zet avangin Shanel-i chu a tawlh hnung rawk rawk. Keimah tak pawh chu ka phu nasa viau mai.

"Ka ṭha, ka ṭha..." Ka tho chhuak a.


Shanel-in a pa hlauh hmel taka mittui nena a enna chu ka hnaih zual a.

U Hruaia Nu Shanel-i bulah a rawn ding vat, ka hawi chhuah rualin U Hruaia a thle deuh sawk bawk a. Ka meng kawk, "Pa..." Zodini'n a lo ti ve ṭhat.


"Hmeichhe pakhat avanga i Nu leh Pa tuithlar itum duh tawk lovin i fanu lehzel khatianga ti tur kha eng huaisenna nge i neih?" A pa chuan a ti chher chher. Midang chu nise a vai thlu leh ngei ang. Mahse, a pa benna chu ngeng ngulh hian a ngawihpui vung vung.


U Hruaia hmel thim khup mai leh chang rût mai chu muangchanga dingin ka hnaih a, a kut ṭang inkarah chuan ka kut ka rawh lut riai riai bawk.


Engvanga a na hmel chuan ka thinlung hi tina ve veng veng nge a nih a, ka mittui rawn hnai ṭiam ṭiam nge a nih lah ka hre hek lo; Mahse, chiang taka ka hriat chu he mihring hi thlah tumna ka nei lo tih hi a ni.


"Shanel...." Mittui tlingpamin, a pi kuah tlata ding chu ka en chhuk a, za lo lutuk a nui luiin, "dinhmun khirh taka ka dah che avangin pawi ka ti; Mahse, min hrethiam la, i pa hi thlah tumna ka nei lo," ka chil ka lem khalh a.

Ka bula nghet taka ka kut chelhtu mipa mitmeng thim rup mai chu en chho vin, "thil pakhat ka tiam ang che, ka thinlung zawng zawngin i Pa hi ka hmangaih ang a, i mamawh hun a piangah i kiangah a awm ang tih leh, engtikah mah i pa hi ilak aṭangin ka ṭhen hrang lo ang tih," a tawp lam chu ka aw a chhuak ṭawk ṭawk. Ka hrawk a rawn na et et bawk.


Shanel-i tán chauha sawi ka ni miah lo, a Nu leh Pa te tan pawha sawi ka ni.

"A hmangaihna hi hmangaihna a nih loh chuan kei pawhin eng nge hmangaihna ka hrethiam tawh bik lo, chuvangin engtin nge ka hnar theih ang ni?" Ka ti chhuak leh sep sep. An ngawi ṭhap a, ka biang rawn lum thla pup chu ka hru hul tawk.


"Haw ang..." U Hruaia melh chho chuan ka ti leh sep.

Engmah sawi lovin min pên sawn pui pawk pawk a, "Lalhruaitluang, i duh i thlang tih hria ang che," a Nu a rawn au tuar tuar.


U Hruaia erawh a pen ngaiin a pên pawk pawk, vawikhat pawh hawilet sawi loh, a pên a bahlah lo hrim hrim. A vawikhat pên a zau si a, mittui nen ka tlân dat dat.

Car bulah chuan min dinpui dawtin, car chu a chum dawt a, mit ka lo chhing sawk. A thaw ri hriah hraih te chu ring tak a ni.

"I ṭha em?" Tîm deuh tak chuan ka ti sap. Ka lam a rawn hawi a, ka lo ip chawih mai, a mitmu chu a sen rûm a, a hmel dur khup te chu a rapawm lek lek zawk.


A lamah min pawt hnai hrawk a min kuah zui a, min kuahna chu a nghet lutuka ka thaw thei lo lek lek.

"Min thlah dul teh," ka lo ti vat. A thaw chhuak ham ham a.


"I Nu leh Pa te kha an dik lo miah lo a nia."


"Tun aṭang chuan kan pahnih hmalam chiah ngaihtuah tawh rawh," a lo ti bul hluk.


Ka ṭah nuih hak a, "ka hria e," tih leh inla hrang hlekin, a kawnga chelh chuan, ka en chho va, thla lah chu a engin, a hmel chang rût mai chu chiang takin a hmuh theihin, a hmelṭha tak kha tunah, thla êng hnuaiah hi chuan sakawlh te pawh a ang dawn mah mah zawk. Ka bialpa leh ka pasal tur, mipa zaidam a ni tih hre lo ila chuan tlân chhiat vawn vawn natham a ni.


"Myla, i duhthlannaah i chiang em?" Harsa tih hmel tak hian amah zawkjn rawn ti chhuak a.


Za vak lo hian ka nuih sen sen, "hringnun emaw eng thawntah pawh tawpna lungchhiat thlak tak ka ngaina ngai lo ang bawkin, ka hêl ṭang ṭang thin. U Hruai, ka chhungte emaw, i chhungte aṭanga emaw, ka nun hmasaa ka hmangaihah emaw tawpna hlimawm pakhatmah ka nei lo va, chuvangin kan pahnih thawnthu chu a tawpna hlimawm takin ziah ka duh a ni," ka ti sep sep a.


"I duhdanin a tawp ngei ang," nghet churha tih leh, a thleng ngei dawn a ni tih chian nan ka biang tawn tawnah chelhin min fawp zui vang vang bawk a. A mi fawhna ril leh thük tak chu ka feel veng veng. Ka ring hmiah bawk.

He mihring hian naktukah emaw tun darkarah ngeiah pawh inneih min sawm pawh nise ka hnarin ka ring ta hauh lo mai!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)