Zawnatha M. Beibiepha

Episode kal lai dah luhna

Moderator: writers

Cck Lalchhuanawmi
Posts: 322
Joined: August 5th, 2022, 8:54 pm

Zawnatha M. Beibiepha

Unread post by Cck Lalchhuanawmi » August 10th, 2022, 9:41 pm

Zawnatha M. Beibiepha
Bung khatna
Ziaktu: Cck Lalchhuanawmi

Zawnatha...

Champhai lama kan kudam lo enkawltu ka û Pâri te chhungkua chu call-in, vawiin lam an chanchin te ka zawt a.

Hetia buh hmanga sumdawnna ka ṭan tak hnu hian ka û Pâri hian, a zirtirtu hna chawlhsan ṭhak khawpin min puibawm a. 'COLLIN'S MIHLO RICE' hei hi company han ti ve ta ila, kan company hming ve a ni. Ka pu Collin Mihlo, min boralsan ta hming chawi liau liaua kan phuah a ni a, tuna sumdawnna pawh hi ama min kawhhmuh ti ila a sual chuang lo.

Mizorama kan buh bar zawng zawng, Retailer zawng zawng pawha buhfai bag intiang hmur mai te hi; inchhuang takin kan buhfai a nih hi!

Ka û Pâri pasal Umawia hian kan sumdawnna a lo hriatin, Champhaia an buh tharte ngaihven ve turin min lo ti a, tichuan; Champhaiah kan va inbun ve rawih nghal ta a ni. Umawia leh ka û te pawh ka hriat loh karin an lo inlêm kual a, tihian an fa pathumna tur a pai leh mek a ni.

Umawia chuan, " Takah Zawna ( Zawn-a ni loin Zawna), ka theihnghilh hman ṭep; Shillong-ah khuan Retailer pahnih laiin min lo bia a, an hmanhmawh angreng khawp mai", a ti a.

A tawpa tawpah chuan, Mizoram chhûng chauh loah pawh supply-na tur a awm ve ṭan dawn e, " Ka u, a ṭha lutuk alawm; an hmanhmawh a nih chuan thlawk chhuak nghal ila ni mai lawm, keini lam pawh naktukah kan lo chhuak dawn e", ka lo ti a.

" A nih chuan Saiha lo chhuak chho phawt ula kan sawi ṭha leh dawn nia", a ti a, inmangṭhain call kan ti tawp nghal.

Lungpukah kan awm mek a, driver, zuapa chang tawhte nen leiletah kan awm. La tlangval chinte erawh chuan riahna rûn an vai mawlh lo, tlangval ka ni ve tho a ka vai bik tihna ni lo nia. Mahni chhungte ṭheuh biain kan ri chel chul hlawm mai bawk.

Ka Umawia ka biak zawh chuan keima Daodao-i( Lamdan-dudu, Awmzia-Duatduati) ve ngei kha ka call a, signal a lo bo thut, ka ui mai mai a sin. Pawilo, ka haw hunah an college-ah ka kalchilh leh riap mai ang.

A tukah chuan truck sawmpahnih te nen inzui chhuakin Lungpuk chu kan chhuahsan ta a, tunah hian Phura-ah ka nau Zira hoin truck sawmpahnih tho, buhfai bag khat tlat nen min lo hmuak. Zira hi chu Primary School zirtirtu a ni a, tihian a theih ang angin min lo pui ve a ni.

Palak Dil kawng lamah kan inzui zel a, Pick-up khalhin hma ka hruai a, ka bulah ka ṭhianpa êm êm, Secretary ni bawk Dinga a ṭhu.

Phura ṭang pawh chuan kan inzui leh nguah nguah hlawm a, Dinga chuan, " Hetia kan inzui diah diah hi ka nuih a tiza tlat zel", khi vur chung hian a ti a, " A nuihzatthlak vak em ni?", ka tih chuan kut bengin a nui ta vak vak a, a chhan sawi a tum bawk si lo, min tibangbo ziah, " Aw, khatia nangma hmel, bangbo hmel kha lawm hmuhnawm chu, maw", thutak deuhin a rawn ti leh a, hepa tak hi chu.

Khumah ka bawk thlawp a, chauh a nâ ṭhin ngei mai, inbual fai ser sawr a, puar pang hi chuan mut pawh a chhuak awl. Reiloah ka muhil zui a ni ang chu ka phone ri chuan min tiharh a, zanlai a la ni zui, Dinga niin, " Zawna", ṭap ṭuau chung hian a la ti zui, " Eng nge ni ta?", thaw hrawk hian ka ti a, " Tetei an ru daih", a va buaithlak ṭhin mang e.


*** Lalrinnungi...

Ka nu leh pa te call-in night duty ka neih vanga ka haw theih loh tur thu ka hrilh a, chaw pawh min lo pe lo turin ka hrilh nghal. Damdawi ina mi ka ei an phal ṭhin loh avangin, night duty ka neih dawn hi chuan min lo pe ziah zel.

" Rinu (vai hminga Reenu angin), good luck", kut zungpui tipir vah chung hian Rushikesh chuan a lo ti a, lei chhuahkhum zeuhin ka lo nuih tawi tak, " Rinrin, ka haw phawt mai ang aw", Anisha pawh chuan intithei tak hian a lo ti, hemi te pahnih tak hi chu.

" In intithei rei lo ang mawle", nui ver ver chungin ka ti a, " Rinu, bye phawt, ka ngai dawn lutuk che", ṭah âw deuh hian Rushikesh chuan a ti leh a, min lo kuah bawk, a bengah lo pawt vatin, " Chairman fapa ve si ṭangkailo lutuk mai", zawi sap hian ka ti a, Anisha a lo nui chhuak hawk.

Rinrin tiin emaw Rinnung tiin emaw min ko hlawm mai zel a, Rushikesh-a erawh hi chuan Rinu tiin min ko bik tlat zel, min ko tawh lo tura ka tih pawhin awmzia awm chuang lo, Anisha te nen kan pathuma inkawm bur hi kan ni a, kan infiam dan te pawh hi a nâ ve ngaih ngaih ṭhin khawp.

Kawngka kik karh karhin ka nuin min lo hawn thuai a, " Ka chau lutuk", tiin ka kuah nghal a, min lo chul hliau hliau. Chaw ei hmain ka inbual a, ka harh sawng sawng. Chaw pawh ei peih lo chuan ka nu TV en chu ka ṭhutpui a, a malchungah muin Damdawi in lam chanchin te ka hrilh a, engkim hriat a duh ve ṭhin vangin engkim lo deuh te hrilh ve ṭhin a ngai.

" Len chhuah har te i duh em?",

" Duh lo mai, ka mut a chhuak", ham bai bai chunga ka tih chuan pindanah mu turin min ti a, inleng an awm thulha nu tling pumpa lo mu phar duai an hmuh chuan a chi dawn loh thu sawiin min tung tho a, inleng nei zing ṭhin zia zang hian, ka nu ṭhin hi chu, ka pa call-in ina ka haw tawh thu leh ka mut tur thu ka hrilh a, tluang taka lo haw turin ka chah bawk.

Karkhat dawn lai chu night duty ka nei ngai lo a, Chairman fapa hi chuan thil a tithei mawle. Rushikesh chuan ka lawm leh lawm loh min zawt a, ka lawm thu nui var chung hian ka hrilh a, a rang thei ang bera night duty min siamsak leh turin ka ti bawk.

A chhan min zawh chuan, " Don't Politics involve duh lo karte hei", lu thing nak nakin ka ti a, ka sawi awmzia ngaihtuah leh mekin a inhiat nuah nuah. A hriatthiam hnu chuan kiai sakin, " Aizwal ho tak hi chu a", a ti a.

Zanriah ei laiin ka pa chuan Aizawla haw chho tawh mai a duh thu a sawi leh a, kei erawh chuan ka duh loh thu bawk ka sawi leh. Tuna ka Doctor hna chu chan ka duh loh thu sawi lehin, ka nu leh pa te chu an duh chuan haw chho mai turin ka ti a.

Ka pa chuan, " Aizawla haw chho ka rawt apiangin i duh lo mai a, i hnamdang ṭhian lakah te khan i lo intlakral te hi ni mai lo maw", thinrim pawh ni chuang si lo, chang deuh fak hian a ti a, ka nu chuan a lo khak vat, " Ka pa, chutiang turah chuan min ngai suh, hnamdang karah awm mah ila; mahni hnampui te iai tur khawp chuan ka khawsa ngai lo ang", khap fap fap chung hian ka ti a, ka hmui ka pet tan tan, ka pa chuan haw chho ka duh leh lo takah chuan min awmpui leh hrih a ti tlu ta a.

Khuma ṭhu tau nghawngin Facebook, 'COLLIN'S MIHLO RICE' tih group-ah lut nghalin, an Pu ber Zawnatha thu thar post, Shillong-ah Retailer pahnih laiin buhfai supply tura an tihna leh Manipur Sawrkar nena an inbe mek a ni tih te chu ka chhiar thla ve den den a, comment pawh an tam.

A profile-ah lutin, " Engtikah nge min lo hruai dawn", zawi sap hian ka ti a, ka mittui a sur zung zung nghal. Amah vangin Aizawlah pawh haw duh loin Delhi-ah ka awm reng a, min lo hruai ngei a intiam vangin, a la theihnghilh bik êm lovang chu maw.

Theihnghilh daih tawh e, kan hun hman dunte chu sawi log, keimah chawpin min theihnghilh tawh!

" Ṭhaltui ang ka nghah ka enchim loh, Suihlung muangten ka lo nghak reng che", he hla hian zantin ka inawi mu ṭhin a, nghaktu a nei tih hi hrechhuak vat vat tawh sela, hei hi ka duh ber.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)