REMRUATSANGA CHAPTER - 17 BY Pâpuii Sailo

Episode kal lai dah luhna

Moderator: writers

Ruatpuii Sailo
Posts: 100
Joined: November 22nd, 2020, 10:57 am

REMRUATSANGA CHAPTER - 17 BY Pâpuii Sailo

Unread post by Ruatpuii Sailo » August 10th, 2022, 10:00 pm

REMRUATSANGA
Chapter - 17



Nun pangngai kan zawh chho leh tan a, in leng pawh kan nei meuh tawhlo.Chhungkaw member tlem sa nak alaia kan tlem leh zual chu a khawhar thlak leh zual. Naupang an awm hian min hnem hlauh zawk a, chuti nilo phei se chu kan In hi a reh viau ang.



Tlai khat Adina school bang rawn haw chuan " Khaw nge Bawihpuia te, vawiin i haw hnu khan Mala te an insual leh nghal " A ti a, "Tak tak em? " Ka lo ti hê hâw. "Rinmawia nen " A ti leh mai a, a school bang kha a rawn paw haw ka ti reng a ni. Adina sawi zel danin Rinmawian a pencil a paih sak vangin Malan a sual ni awm tak a ni. Rinmawia chu an class ami tho a ni a, an class-ah chuan a lian ber leh nghal.



" In hrem em? " Tia ka zawh chuan " Last period chhung zawng school ground-ah an inkuah tluan thak " Nui suk suk chung hian a ti leh a, hrem dan an hre tha ka lo ti khawp.



An tlai leng an rawn haw chuan an unauin ka hmaah din tirin thil awmzia ka zawt fiah a, Mala chuan min en tha vak ngamlo.Hliman "Rinmawian Nânau pencil tukverhah a paih sak daih a, chuvang alawm an insual " A ti niah niah a.



" Insual puilo in zirtirtute hnenah sawi ula, Zirtirtuten an hau mai dawn alawm. I insual pui avangin an hrem ve phah che kha i hre lawm ni? " Ka tih chuan Hlima bawkin " Chhunah pawh Nânau a tibuai reng tawh a, Nânau a thinrim ve tawh alawm " A ti leh chu ka ên haw ringawt. An intan unau thei si a buaithlak.



" Chhunah pawh a tihbuai daih tawh chuan keimah pawh min lo hrilh mai ta che u, i nu pawh inhrilh thei reng a. Nangmah pawhin Rinmawia hnenah chuan 'ka nau tibuai tawh suh' iti lo vem ni? " Adina alo ti ve chu " A lian si ka ngam teuhlo" Uar zet hian a lo ti. Ava han hahthlak tak!




" Min enteh Malsawm " Ka tichang fak chu zawi muangin min rawn en a, a inthlahrung hmel chu ka khawngaih ruk viau laiin ka intihlauhawm lui hram hram.



" Vawikhat mah insual tawh miah loh tur, midangin an hauh leh che pawhin keimah emaw i putea i hrilh ang a, keimahni'n kan hau mai ang.Hrethiam em? Naupang sual chauh an insual thin a, nangni chu naupang fel in nih kha " Dam dapin ka ti a. Insual tawhlo turin ka intiam tir bawk.



" Anû chu nânau thiamloh pawh a ni tawp silo, min tanlo ê.." Lalhlimpuia chu hahthlak ti zet hian ka melh a, Adina lo nui ru char char pawh chu ka hre reng.



" Insual chuan ka tan dawn reng renglo che u " Ka tih laiin " Rinmawia lawm sual, nânau pencil a paih sak a" A ti leh nui nui chu " A insual pui avang khan nânau pawh a diklo alawm, ka sawi kha naupang sual chiah an insual thin. In insual leh vaih chuan ka hrem dawn che u ania " An sual changa ka hrem thin dan an hre chiang bawk a, an bu uar khawp mai.



Kan kawr tur hak chhin a tul avangin zanriah eikhamin Zawmi nen a cousin te in lam kan pan a,a lo thui peih diam tawh. Zawmi kawr tur chu a simple viau nâ in a changkang tel chi kha a ni a, a kut hnu pawh a mawi viau. Ka kawr tur chu a pawl dal deuh hi a ni a, chupawh chu a mawi ngang mai. Kan ha chhin a, a dik thlap leh nghal, a hak pawh a nuam viau. Zawmin " A hnai telh telh a, ka huphurh tulh tulh maiin ka hria, innei leh lo mai ang ka ti dawn maw ni le " A ti chu kan nuih pui dar dar hlawm. Zomuanan hria se la chu a lawmlo leh viau mai thei a ni. Ka thiannu hi neih loh a hlau vet vet êm!



"Remruata nen hian engtik nge in tih ve ang? " Kan haw lam chuan min zawt a, ka nui ringawt. "Remruata hi a hmanhmawh hmel sia, in ti ve thuaiin ka ring deuh tlat " Amah bawk chuan a ti leh.



" Hmanni lawkah pasal ka then chiah a, inneih hi chu hmanhmawh chi a ni pawhin ka hre lo.A mawi pawh a mawilo, bakah ka pa a boral hlim hlawl a, a mitmu êm pawh a keh hmaa pasal neih chu ka tumlo hrim hrim, ka inpeih hun min nghak thei turah ka ngai " Ka ti deuh duah.



" Ni ve tho mai, Rammuana nen inkar thu tawp dan khati kha a ni a, pasal ineih leh nghal mai chuan i uire tak tak emaw te an ti ang tih a hlauhawm " Zawmi pawh chuan a ti leh hnuhnawh.



" Nula rimna kawng hla ber pawl ka niin ka ring" Remruata status ka hmuh chuan ka nuih aza viau. Chimawm chhuahin "Nula i rim thin maw?" Tiin ka va reply a, min rawn chhang let rang viau.



"Aizawlah lo awm leh mai rawh u, nge ni a palai ka rawn tir tawh zawk mai dawn?" A rawn ti chu chimawm chhuah lui zelin " I nula rim thin ka nilo ania, kei chu nula ka ni tawhlo. Fa pahnih ka nei tawh " Ka type lai pawh chuan ka nui vur vur mai. Engtin tak min rawn chhang ang maw!



" Oops, ka rawn tihsual liau liau anih chu ka pi. Mahse, nula aiin nuthlawi ka duh zawk mah a, kan insawirem thei nghal mai ang em? " Ka nuichhuak hawk. Mampuiin "Remruata chu sawi tur a hre tawh dawnlo emaw tih pawhin keimahni zawk kan dàng lel zel" Atih kha ka hrechhuak.




"Vawiinah i fapa te zawk hi a insual ania" Ka ti ta daih a, a seen vat a, min reply dawn emaw ka tih laiin a rawn call ta thung. Phone ka chhan rualin " Khawiah? Tu nen nge? Eng nge a chhan? " A rawn ti nghal zung zung.



" Vawiinah an class ami in a pencil a lo paihsak avangin a thinrimin a lo sual a" Ka ti a. " Ava ti tha ve " A rawn ti anih chu.



" Engtin maw itih? A ti tha a! " Ka ti deuh hluai " A chunga mawilo taka che laka a tihtur tak alawm atih, chuan a chak em? " Mipa ho tak hi chu aw!



" Ka hre lo" Ka ti bul hmuk chu " Tinge sawi sual ka nei em ni? " ala rawn ti.



" I fapa insual chu tha iti tihna mi? " Tiin ka zawt a, " Insualte chu tha ti biklo e, mahse khatia a sual let khan a pencil paih sak tupa chuan a paih nawn sak ngam tawh dawnlo a a tha alawm " Mipa leh hmeichhe ngaihtuahna hi chu ava han inpersan thei tak. Mipa ho hi chuan tun hun chiah hi an dawn a, nakin hun tur an ngaihtuah thleng pha ve lo reng reng.



Tuna atanga a insual kan hauh loh chuan nakin lawkah ngaiah a nei chho ang a, a buaina te tawngkaa chinfel aiin tharum a chinfel a tum zel ang tih ka hlauh avanga tun atanga insual that loh zia zirtir ka ni. Tharum thawhna hian buaina chinfel a hnekin a ti pun lun zawk ziah.


" Naupang bulah insual thlâwp zawngin tawngkam nei hlek suh ang che " Ka ti zui hlak hlak chu "Ka ngai che " A rawn ti thawp sup a, a tawng ri chauh hre mah ila ka lâi leh ringawt tawh.


"Ka fate nen khan ka ngai tawh che u a, ka hmu chak tawh hle bawk che u " A ti leh sup sup a, keipawh hian ka ngai ve deuh tho chuan ka hria, mahse ka sawi ngam teuhlo mai.



Thawhlehnia ka chaw chhum school atanga ka haw chu Tpa feh haw nen kan haw rual a, min bansan kha a tum zui ta nge min rawn be zui ta miahlo a. Ka pa boral bawra YMA zana an rawn kal ve thin bak kha kan inhmu meuhlo bawk. Kan titi dun mawlh mawlh kara "U Duhte,ka tum ve nasa lutuk ;mahse, ka la theihnghilh thei miahlo che " Atih chuan chhan dan tur ka bangbo viau. Tpa hi chi kan veng rawlthar zingah chuan a tawng tamlo nâ hian a fel pawl tak a ni a, mi pawh hian a nungchang tha lutuk hi an fak fo kha a ni ve a, tunah pawh a inthlahrung lutuk hian min ti inthlahrung let zawk daih.



" Pa Hmaa boral laia Hlima te unau nena inang deuh pa kha i bialpa em ni? " Tia min zawh chuan ka bu nghat a, a nui zui hak.



" Tp, bialnu te nei la, star tu che an tam êm kha, kei chu min hre zui reng miahlo ang" Kan boruak tih zangkhai tum takin ka ti a, " An lerh hlawm emai, ka duhzawng an nilo " Min chhan dan teh tawp chuan ka nuih a ti za viau.



Kan In thlen dawnah ka pen san a, zan lamah Peka te ho nena an rawn len tur thu a sawi chuan ka lo hnial bik lo.Kan In lam pana ka pen chhat chhat laia "Kan inthen chu nuam iti hle mai maw! Mipa chi hrang hrang i kawm kual zut mai ania " Rawn titu avang chuan a aw lo chhuahna lam ka hawi vat a, kan kawta tuizem kan hun bulah a lo ding reng chu niin, ka lo hawi vaklo nen ka lo hmu miah lo. A tawng danah Tpa nen khan min hmu dun chu a ni phawt.



" Chutah chuan ilo buaina tur a awm hauhlo" Ka ti hrawk.



" Remruata nge tun ami kha? Nge ni a i kawp zawk? " Ngeiawm zeta atih chuan ka thin a sa zak, " Nang anga tenawm ka ni lo e" Ka ti ram hmarh.



" Kawp mah la a pawi chuang hlei nem Remruata pawn a kawp kual vel mai mai tho che alawm" A thusawi chuan min ti hamhaih lek lek, ka chhan leh hmain amah bawk chuan " I bialpa Remruatsanga khawsak dan engmah hreloa ngaih tha deuha i awm hi hmangaihtu che tan chuan a rilru nat thlak zia i hrethiamlo ang, hmeichhe dang nena kawp atan chuan i uiawm lutuk, chuvangin ka hnenah lo let leh rawh " A ti a, Remruata chungchang a sawi chu hriatchian ka chak viau rualin dawt min hrilh anih ka ring deuh a, nakinah Remruata ka zawt chiang ang.




" Khawvelah hian nangmah chauh mipa awm pawh ni mah la, nang kher hi chu ka nei tawhlo ang che. Chuan, Remruata chungchangah dawta min bum tum hlek suh, nang anga tenawm a ni ve lo. " Ka ti hmarh hmarh chu " Khawngaihthlak lutuk" A lo ti hluk.



" Haw la, rawn kal tawh suh ang che " Tiin inchhungah luh san ka tum a, kawngkhar inkalh ka hawn mawlh mawlh laia a thu rawn sawi avang chuan tawp datin ka inher let a, "Eng maw i tih ang? " Ka tichhuak thei tawk.



" Kan nupa nun hmang lai hi hmu se engtin nge angaih ang tih ka hre chak ka ti anih chu " He mihring hi hetiang khawp hian a lo nepin, a lo tenawm tih hi kan inneih chhung khan ka lo hriat miah loh theih.



" I duh chuan pe rawh,kha chen kan innei a, engmah tilo a kan mut tlawn zuar reng chu a ring bik hauhlo ang " A beisei loh dan deuhin ka chhang nge a meng deuh awk a, mahse a insiamtha leh nghal thuai. A pe tak tak ang tih erawh ka hlau viau, nupa nih lai a mi pawh ni mah se, kan ngaihzawngte midang nen nuam an chen lai hmuh chu thil nuam zawk zawk a ni dawn lo. Kan inneih lai khan tum khat kha "video-in cover ve chhin ang" A ti tlat a, ka hnial nasa viau nangin a ti lui tlat bawk si, "nupa kan ni tho a, eng nge a pawina awm chuang ang. A leak out dawn chuang hlei nem" Tiin thiam takin min thlem a, ka rem ti ta hram kha ania. Mahse, vawi khat pawh ka en ve lo hrim hrim.




" Amah chauh nilo in mi zawng zawngin hmu ta se... " A hmui min peh sawih khum zauh a, "Rammuanawm...! " Ka lo ti tuar. A bula ka let theihna anih phawt chuan engmah pawisak a nei leh miahlo ang tih ka hria, chu chuan min ti hlauthawng hle.



"Chu chu thlen tir i duh loh chuan ka bulah lo let rawh " Ti supin, pawisak neiloh hmel zet hian a nui zui a, ka insehruh nasa viau. " Lo inngaihtuah ang che " Ti lehin a kal chu ka en zui tlawk tlawk ringawt.



U Rammuana thil sawi chuan ka rilru a luah zui reng a, video kha ala nei ngeiin ka ring. Engtin nge ka laksak theih ang? A hnena kir leh chu ka duh tawhlo hul hual. Tidarh ta tak tak ta se engtin nge ni ang? Adinan " Ka pa ralna tling khawm atang hian amah hriatrengna tur inchhungkhur bungrua lei ila ka ti deuh a, eng nge i ngaihdan? " Tia min rawn pawh chuan " A tha alawm, i tih dan dan a ni mai " Ka ti liam ringawt.



Adina hi ka hrilh mai dawn emaw ni aw ka tih rum rum laiin keimaha chinfel tum chhin phawt a thain ka hre leh deuh, bakah ka hrilh chuan anihna ang khawl khawl a sawi angai dawn a, ka pasal nena kan mu dun lai pawh ni se chutia ka nau han hrilh chu ka zah vang a ni pakhat.




Remruata nena kan inbiak pawh chuan ka rilruin thil dang vei zawk a neih miau avangin ka lo be tha vaklo nge "Zanin chu min be mai mai tlatin ka hria, i rilru min pe lo. Vawiin lam i chau deuh ania nge, muttui phawt mai " A ti a, ka inthiamlo ru viau nangin chutia a rawn ti chu pawi ka tilo viau.




U Rammuana hnenah khan inringtawk tak khan Remruata chuan video kha hmu mah se a hriatthiam ka rin thu kha ka sawi tak nâ in, chutiang chu a nilo ang tih ka hlau ru em em tho.



" Ka hnenah chuan rawn kir leh mai rawh, anih loh chuan kan video hi ka thehdarh a ni mai " Rapthlak hi ka va han ti tak! Chhan pawh chhang let lo in ka phone khumah ka theh thla a, thawk ka la zui ham ham. Rilru fim taka chet dan tur ka ngaihtuah angai a ni.Ka rilruah Atetei a rawn lan thut avang chuan ka phone chu banin ka call zui nghal a, U Rammuana bulah ala awm reng anih chuan ka hmang tangkai thei ngei ang.



" Aw au Duh, eng nge ni ta? " A rawn tih phak chap danah a muhil ka tiharh anih ka ring. Sana ka en a, mut chu a hun viau tawh , ka rilrua a rawn lan thut avang khan ka call chuk chuk ringawt a, dar zat lam reng ka lo ngaihtuah tawh lo.



" I muhil ka tiharh che mi? " Inthlahrung deuh tak hian ka ti a, " Pawi lo, eng nge ni ta? Tun ang hunah te " A lo ti var a.



" I u Muana bulah ila awm reng em? Nge ni a, hmun dangah i awm tawh zawk? " Ka tih chuan U Rammuanan hmun danga awm a phal loh avangin an pahniha an awm thuin min chhang chu ka thaw huai.



" Anih chuan Te, thil pakhat min tihsak teh a, ka inthlahrung viau nâ in a pawimawh lutuk a " A duhlo ang tih ka hlau viau; mahse, Atetei hi chu mi rilru tha tak a ni a, thil awmzia ka sawi chuan a laina zawk ni mah se u Rammuana hi a tanin ka ring lo ve tawp.



" Sawi la, ka tih theih zawng anih phawt chuan ka hniallo ang che " A rawn tih chuan " I u Muana laptop-ah khan video pakhat min lo zawn sak turin ka duh che a, kan video mawihnai vaklo a ni a,tunah hian min vau nan a hmang mek a, min lo delete sak thei ang em? A harsa ang em? " Ka ti ta zung zung.



" Ka thei ngei ang em tih ka tiam theilo che a, mahse ka lo tum chhin ang " A ti ta hlauh.




" Duhte, in awm em? " Pawn atanga rawn ti lawng lawngtu chu tu nge anih ka hre mailo. Ka lo chhawn vat a, Pi Buangpuii a rawn lang zui chu "Lo leng rawh, eng nge ni ta? " Ka lo ti var a.



" Leng hman pawh ka ni chiah lo, eng emaw sawi tur ka nei a, ka rawn kal lawk anih hi " A ti chuar chuar a, Pi Buangpuii hi a fel em em rualin hman vek vawk loh chuan biak chi miah loh, duh aia rei a bulah kan awm ziah,a tawng muang hi chu thuhran sawi tur hi angah em em reng zel.




" Lo thu ve hrim hrim tho la " A din reng avang chuan ka ti a, ani pawh a thu thla ve nghal mai bawk.



" Englo ania, khi primary sikul bula kan huan khi i hria ang a, niminah naupang hoin nimbu an lo lo a a ni awm a, a hmutu kan zawh khan Hlima te unau hi a sawi ve tlat mai a. Kan ui phei chu a ni hauhlo a; han hauh chiam pawh kan tum hranlo. Mahse, naupang mai an la ni a, a ruk arala thil an ti kha nakin zelah chin thanah an nei ang tih kan hlauh zawk avangin an chhungte ho ka hrilh hre hrim hrim ang ka tia, ka rawn hrilh che anih chu " A ti dap dap a, sawi mai tur pawh ka hre lo. Ka zak a, ka thinrim hle bawk tih zawng ka hria.




" Awii, a zahthlak hle mai tih bak sawi tur pawh ka hre lo, ka fate pawh hauh an ngai anih chu, a zialo emai. Min hrilh lo phei la chu ka hre miahlo ang tih pawh a sawi theih loh " Ka ti hluai a.




" Kung khat bak phei chu an khawih chuanglo a, an eina kawr leh an ei zawh peih loh ho paih nuaih lo phei se chu hriat pawh kan hre kher lo ang. " A tho zui tuah tuah a, " Ka zuk haw tawh ang e " Tiin a chhuak zui a, ka fate chungchang a chhe zawnga mi kâ atanga ka hria chu ka zak ngawih ngawih.




" Lalhlimpui, Vanmalsawm, rawn chhuak teh u." Pindana an awm chu ka ko a, ka rawl a vin tha viau.An unauin an rawn inzui chhuak zal zal a, kan In hi a zau loh avang hian tawng pangngai angah hi chuan pindanah pawh awm ila thutkhawmna lama thusawi hi a hriat phak vek a, Pi Buangpuii thil sawi pawh kha an hre ve chuan ka ring.



" Niminah ser in lo ru em ni? " Ka tih chuan ngawi rengin an kun chhal a,tun hnaia chin thalo an ching thar hi ka duhlo tak zet.



" Min chhang rawh u" Ka ti vin leh thak chu "Aw " An ti zawi ta sap. Ka thinrim laia hauh chiam ka duh loh avangin "Room bang ngheng sawn va ding ula, chunglamah ban phar ang che u. In dahthla thei ka tih hma chuan dah thlalo bawk ula " Dam diaiin ka ti ta zawk a. An inzui phei hna hna a, tîk pawh an ti ngam tawh lo.




Ka fate chu ka en thin, tun hnai an zia inthlak lutuk hi ka duh lo. Ka ngaihsak tawklo deuh em ni tih ka ngaihtuah,anih theihna lai chen pawh a awm tho. Ka pa boral boruak nen ka ngaihsak tawk hmanlo tih ka inhria. Mahse, thu tha chu ka hrilh reng reng thin asin maw le! Tin, helama kan awm hnu hian thian an kawm nasaa, chuvang pawh chu a ni thei tho. Kan thian kawmte a zirin kan mizia a danglam em em thei si a.Ka hrem hi nuam ka ti bik miahlo; mahse, nakin zelah mi tha tak ni tura ka duh chuan tuna ka la thunun theih lai hian sual kawng an zawh loh nan theihtawp ka chhuah angai thung si.



Adina leh Remruata an rawn inzui lut hlawl a, chutia naupang lo ding chu an mitmeiin thil awmzia min rawn zawt a, "An sual a, ka hrem anih hi " Ka lo ti hluk.



" Apute, ka ban a kham tawh e..." Khawngaihthla la zetin Hliman a lo ti.Ava han phakar reuh tak.



" Lalhlimpui, i putea chhan che beisei miah suh. Dahthla rawh ka tih hma chu i phar reng dawn tho tho " Ka ti tak nâ in kei tak pawh hian ka khawngaih ru deuh tawh,an ban a kham tawh viau ang.




" I hrem chhan ka hre thei em? " ka bula rawn thut thlak pahin Remruatan a ti sû sû, Adina erawh inthlak turin a lut nghal daih.



" Hetah lokal ula, pa Rra hi in ban phar chhan rawn hrilh rawh u " Chhanglo in naupang chu ka be daih a, "Kan ban kan la phar tho dawn mi? " Titu chu Mala a ni. Ka lu ka thin chuan rang zetin an la thla nghal vat.



Remruatan hrem an nih chhan a zawhlai chuan an unau chuan min rawn melh leh zawk thin a, tawngkam khat pawh ka chhak chhuak tawh lo. Remruatan thil ruk that loh zia a hrilh lai chuan an bu ve nghat nghat mai. Nakinah ka hrilh ve leh tho ang, thian pawh kawm tam rihlo se ka duh.




Thingpui ka lum a, naupang pawh thingpui hmeh lei turin dawrah an kal. Adina leh Remruata chu an titi dun malh malh a, naupang hnena an pa diktak hrilh chungchang vel a ni an sawi. Adina pawhin tha a tih viau rualin "An la hrethiam pha meuh ang emaw? " A ti thung. Keipawhin an hriatthiam chu ka ring chiahlo deuh.



Ka phone a ri a, Atetei anih avangin pindam lamah ka luhpui vat a, kawngkhar ka kalh thlap hnuah ka chhang chauh.



" Hei, Au Muana laptop chu ka enchhin a, i sawi video awm ang chu ka hmu miahlo. Mahse, file pakhat a lock tlat hi ka ringhlel deuh a. A password tur awm ang i hria em? " A rawn ti chu ka thinphu a rang nghal zaih zaih. A password ni thei âwma ka rin ka sawi chu a diklo zel leh nghal. U Rammuana haw thawm a hriat avangin kan inbiakna kan titawp ta rih.




File a lock tlat chu a ni thei mai ang em?A ni-ah lo ngai chhin ta ila a password chu eng nge ni ta ang? Ngah nge buaina ka tawh hian a thuahhnihna hi a awm tel ziah zel ni?



" Tunge i biak a? " Pindan atanga ka chhuak chu Adinan min lo zawt. Ka thiannu ka biak thua ka chhan laia Remruata min en chik lutuk chuan ka awm a ti nuamlo.




CHHIAR VEK ANG AW👇

Nizanah khan lo dah ka tum a, ka type reng bawk, chuvanga fb lamah pawh engmah sawilo ka nia. Mahse, ka lo muthlu leh pek daih🥺 ngati nge maw ni dawn ni, tunlai chu ka mut hi a chhuak em em reng zel🥴 zingah ka harh veleh ka type zawm leh nâ in zan lamah chanchin sawi paha full chapter a rawn dah law law mai kha tha ka ti ta zawk a.Fb ah pawh ka ngawi zawm ta zel, thenkhat chuan lê lo min ti ngawtin ka ring😝 Chuanin ka sawi duh ber, story hi update hun sawn ang aw, zanah ni tawhlo in khaw en laiin a awm tawh ang.Zantir lamah pawh a ni mai thei, Naktuk zanah pawh awmlo in friday zingah emaw a dawn chauh tihna anih chu, chutichuan ka nghak tlaivar tih kha a awm tawhlo deuh ang. Khatiang insawi khan nuamlo ka tiin ka inthlahrung thei lutuk.

STORY PAWH HI CHAPTER A TAM VAK TAWHLO MAI THEI BAWK, KA BUAI CHHO DAWN CHAUH SIA, INBEISEI LOH DEUHIN A TAWP THUT MAI THEI A NI.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)