LALÊNGTHEIA Chapter-1 BY Lalrinsangi Bee

Episode kal lai dah luhna

Moderator: writers

Lal Rinsangi Bee
Posts: 59
Joined: October 30th, 2020, 11:16 am

LALÊNGTHEIA Chapter-1 BY Lalrinsangi Bee

Unread post by Lal Rinsangi Bee » August 10th, 2022, 11:21 pm

ʟᴀʟᴇɴɢᴛʜᴇɪᴀ
Chapter-1
By: Lalrinsangi Bee






"May I come in sir?" Tih ri chu ka hre vuai vuai,first period atang a kan mutthluk chu le aw...
Lut thar a ni em maw ni?An hming leh nu leh pa hming te chu an sawi deuh nuai nuaiin ka hria.

"Laltlansangi kha ngati nge maw dawhkanah khan a bawh reng ni,ui emaw a inti leh tawh em ni?" Sir Dawngsatela mai mai chuhh...

Muangchang chuan ka thu ngil a,"Laltlansang,ui emaw i inti leh tawh em ni?" Min la ti hram ka ti.

"Zawhte emaw ka in tia" zawi te a ka ti chu a hre phak a ni ngei ang.
"Mihring i nih kha aw...zawhte i ni miah lo ania" thutak zeta a ti zo chiah tihin a thil explain lai chu a chhunzawm nghal mawlh mawlh a.

Ka thutpuinu leh ka thiannu em em Hadasha in "Sangzz" a rawn tih chuan meng mang hlei lovin a lam chu ka va hawi a.

Ka inrin hma in ka mit min han keu sak pek anih kha class lak lai a ni tih pawh hre tawh lovin "Lalmuanpui,mawl suh" ka ti vin thak a,a samah kek nghalin a eu dawrh.

"Laltlansangi leh Hadasha Lalmuanpuii kha ding nghal rawh u" rawn ti vîn thak avang chuan in melh rum hrep chungin muangchang chuan kan ding a.

"Nangni pahnih vang hian kan zirlai kan kal muan phah ziah tih hre ru,period chanve hi nangmah ni hauh nan hian kan hmang hi a ni ringawt" a tih chuan Hadasha-in ka hriat theih tur tawk lekin "Min hau lo mai se" a tih chuan kan nui ri nghal hak.

"In la nui ngam elaw?Eng nge ka class hi a nuam in ti hlawllo em ni?Eng vang a Political Science hi la nge in nih a?" A tih leh chuan aw ka thian kharh a.

"Dash-i nen hian MLA nih kan tum deuh a,kei tak phei chu ka aim hi Minister a ni ve hrim hrim a" ka tih chuan a chek hlak hlak.

Class chhung chu ka hawi kual thuak a,a hmasa ber a mipa thu ka hmuh chuan ka tawp chawt.

Rawn kal thar kha a ni ngei ang le.
Saw tiang em em a hmelthat mai chu leh,min lo en ve reng zui.

"Dash,dash" tih pahin Hadasha-i chu ka va nghawk sawk sawk.

Sir Dawnga lah chuan min la hau mawlh mawlh,a sawi erawh ka hre lem lo thung.

"Eng ngee?" Dashi'n zawi deuha a rawn tih chuan "A hmasa ber a thu pa khu enteh,a chhiat loh dan khu a êng phet phetin ka hria" ka tih chuan a nui ri nghal hak.

"Lalmuanpui,eng nge nuihzatthlak?Nuihzatthlak ka sawi em ni?Laltlansangi nen khan chhuak teh u,in hneawm em mai" a tih chuan Dashi nen chuan hmanhmawh deuhin nui ri har har chungin class atang chuan kan tlan chhuak.

Kan thiandun hian class atang a hnawhchhuah kan tawk ngun a,ngaiah kan nei a,pawnah inkawmna hun kan ngah tingah kan ngai a,kan hlim em em mai zel.

Kan school compound hi a zau a,thingkung sang tak tak a awm teuh bawk avang hian 'thing hmun' ti pawhin an sawi mai zel.

High School leh Higher a awm a,mahse kan building erawh a hrang thung.

Dashi nen chuan kan spot lamah kan chhuk thla dun hnak hnak a.

"Science class a mi Zawmpuia khan a star che an ti" rawn ti leh ringawt.

"Science student bialpa ka duh leuuu" kan spot kan thleng a,brick leh cubic,kan school building sak thatna tura an dah that kan rûk,kan rem fel at chungah chuan duhdah zetin ka thu nghal.

"Bialpa hlui ngainu" a sawi pawh chuan min rawn ben a tum a,keiin ka lo bum zeuh chu a balance hlohin a bawkkhup zawngin a tlu khut a.

"Mawliii" a rawn ti vîn that.
Ka lo nui dir char char thung.

Rawn tho vatin a rawn in bengfai thuak thuak a.
"12 kan pass chuan eng nge kan tih ang?" A thinrim tih reh tum takin ka lo ti zat.

"Kan ei ang a kan mu ang" ti hmukin a rawn thu ve nghal a.

"MLA nih kan tum kha" ka tih chuan a nui vur vur a.

"Political party hi din dun ve ang" a rawn ti khauh.
"Keichu independent candidate nih ka tum" ka lo ti leh.

Chutah kan inmelh ren rawn a kan nui nghal uar uar.
Thutak hmel deuh hian kan han inbe ve a,kan thutakna lah dawt vek a.

"Eee...tak a,hman ni-ah Hlimhlawpbawli te thianho in min lo rel ve ngam khanglang anih chu" tih pahin a chil a chhak fek.

"Engtin nge min lo rel?An va ngam zawk ve" pawr zetin ka lo ti nghal.

"Hadasha-i bialpa chu a ha a kuh te an lo tia" a hma a lungtum chu a pet chawrh.
A na a ti deuh nge ni a ner sawk a,a ke chu a then nghal nel nel.

"Kei engtin nge min rel?" Ka ti leh.

"Nang chu,mipa ngaihsak lo ang deuh a lang,a ruk a mipa lawm hle si te an ti che.
Chuan i hmel a chhia te an ti"

"Hlimhlawpbawli chuan hmelchhia min ti maw?" Ding thutin ka ke chu ka thinrimna a vang chuan ka per sawk.

"An tia...Hmingpuii ten min hrilh leh alawm" tiin a rawn ding ve nghal hluai.

"Hlimhlawpbawli'n ka hming a lam ri tih ka hriat ringawt pawh khan ka inten tawh" ka in sehruh nghek.

"Lunch break-ah an hre dawn alawm...The Setanians ho hian eng nge kan tih theih chu an hre dawn khawp" tih pahin a hma a thing chu ava hnek ve rawk a,a na a ti leh deuh nge ner sawk sawkin ka hmuh loh turin a kut chu a va thing nawk nawk a.

Bell a rawn rik avang chuan peih lo zetin kan room lam panin kan kal chho hna hna a.

"Tunah tiffin ei ila,Pci leh Jane-i va hrilh ve nghal ang" a tih chuan lu ka lo bu nghut nghut.

Pci,Jane,Dash leh kei hi Middle school atang a school kal ho char char kan ni a,Class-11 kan nih khan Jane leh Pci hian Geography an la a,kei leh Dash-in history kan lak tak bik avangin class khatah kan thu ho ta lo.
Kan thianho hming atan hming common lo leh bawnra ve tak kan duh avangin class-8 kan nih kum khan 'The Setanians' tih kan lo in phuah tawh.

Kan class panna corridor-ah chuan sir Dawnga nen chuan kan intawk leh a,"Zawhte mawl" a ti zeuh chu ka run tawk a tling leh em em.

Class chhung kan luh veleh a hmasa ber a thu Hlimhlawpbawli chuan min lo nuih sawh ve khanglang chuan ka thinrimna hi a ti pung ni mai hian ka hria.

A hmaah tak chuan ka va ding a.
Min hmuh loh der vel avang chuan a dawhkan chu ka chûm ri bur.
Class chu a reh nghal thiap.

No zet a min rawn melh chu ten hmel zetin ka lo ner sawk thung.

"I hmel i hriatchian hma chuan mi hmel awmdan lo sawi chhen suh aw,Hlim ha kuh" ka sawi zawh rualin ka hnunglam a awm Dashi'n "Kuh tha ve ropui sia" tih pahin alo nui hak.

"Mi tenawm pahnih" tih paha a ner leh sawk chu ka kutin ka tin uaih hman a,period khat a la awm tih ka hriat avangin ka kut ka dahthla leh thuai.

"I va han thianghlim bik em em,khawi maw i kut te chu,awii...i kut tin kar a bal dum awm te kha a var sar mai" ka ti duai duai a.

Thenkhat chu an lo nui hak,Lalhlimawmi erawh chuan a kut chu a dawhkan hnuai lamah a dah lut zal zal.

"Vawi khat pawh ka hming i lam leh anih chuan hre rawh,ka rek bawrh bawrh che ang a,kan class blackboard a ka khen beh leh hnuah che ka thutthleng atan ka hmang leh ang che" ka tih chuan thenkhat chu an lo khi tha a.

Dashi lah chuan "Ka ke sil rawngbawl hna i thawk ang" tiin alo tuihnih veleh hman tawh...

"Ka bialpa Hmingfakzela hi e...i lo sawi chhe leh anih chuan i hmai vun kha ka ham thler vek ang a zoo-ah sakei ei turin ka donate ang" a tih zawm leh zat.
Ka nuih za ru hle mahse ka nui duh hauh lo.

"Eng nge maw mi awm hle hle lai kha tia in rawn tih ve ngawt le?" A thut puinu Krista Silfaii,a hming lem atan a Sual Silfaii kan tih chuan a rawn chhan vat.

"Nang kan ti buai che pawh ni hlei lo,ngawi ula awm hle hle rawh u" ti nghutin ka ding mar a.

Ka hawi chhuak chiah chu,lut tharpa khan nuihzat hmel takin min lo en.

Hmeltha viau mahse min nuihzatna hmel saw ka 'I hate you' tlat.
Rum theih pa tawpin ka melh nghek a.

Chutah hawi sang vahin kan thutna lam,tlar hnung ber chu ka pan nal nal.

Thawm ri huk avang chuan ka hawi let vat.
Hlimhlawpbawli leh Sual Sifaiin Dashi chu an lo kek thlu chu niin.

Hmanhmawh deuh a va letin Sual Silfaii sam leh Hlimhlawpbawli sam chu ka man chawt a,a dak zawngin ka kek pawh a ni lo,a pawhin ka pawt a ni mah zawk.

Chunglam chu an duh lo chung chung chuan an hawi vûng mai le.

Dashi chu a rawn tho chhuak vat a,"Hlim ha kuh,i ka chip rawh,i ha a thlawk chhuak dawn" tih pahin a hmaiah tak a hnek sawk.

Ka thlah veleh chuan kan insual tan chu a ni ber mai.
Kan ri rum rum a,kan classmate te lah chuan thelh ta'nge pawh ti lem lovin min lo au dur dur.

Dawhkan kan bawhtlu rem rum a,kan thawm chu pui tak a ni.

Sual Silfaii nen chuan kan jnkhalh fal a,chutiangin Dashi leh Hlimhlawpi pawh.

Silfaii inrin loh lai tak mai chuan a hnarah ka hnek chawrh a,a ri nghal chek.

Chutah min khawih thei tawh lovin a hnar a dawm vung vung.

Va khawih leh ka tum chu ka banah chuan mipa tha chak zet hian a rawn vuan a.
"A tawk tawh" a ti nghut.
Tu dang ni lovin lo lut tharpa chu lo niin.

"Lo inrawlh suh" tih pah a Silfaii kun ngur chu va keh leh ka tum lai takin min pawm kang ta lawp mai.

"Heyyy...i mawl em ni?Min thlah rawh,Dashhhh" ka ti tuar tuar.

Chutah thawm a rawn reh duk a,kan miss Makimi chu alo pen lut a.

Min pawmna a tang chuan min thlah vat.

"Laltlansangi te bawk maw" rum deuhin a tarmit kar atang chuan min han melh kual dan dan a.

"Headmaster office-ah han kal nghal rawh u"

Muangchang chuan kan pen chhuak a,Silfaii chu a awm ngai a awmin ala kun ngur.

A hnar chu a dawm vang vang bawk.
"Miss,ka hnar ruh a tliak" kan pen lai kan tawp chut.

"Dawt sawi suh" ka lo ti vat.
"Laltlansang" miss in alo ti that.

"Tlansangi'n ka hnara a hnekna kha aniang" min han hmehbel hram chu le....


Ka chhang buai peih vello,a inhliam zawk anih avangin an tan dawn tih hriat reng reng.

"Remlalmuan,headmaster emaw zirtirtu dang han ko teh" Remmuana chu a tlan chhuak vat.

Miss chu thu hniamin Silfaii hnar chu a en dik a.
A tliak tak tak aniang a sawi bêi mai.
Thisen nen ala in chiah piah niaih zui a ka ten ru angreng.

"Tu hnar ruh maw tliak a?" Headmaster leh kan sir zing a ka star em em sir Puia an rawn lut.

Sir Puia'n min rawn melh chuan a nui suk a,ka lo lai lehnghal em em.

"Tu tih nge?" Headmaster-in a tih chuan Sual Silfaiin inti no zetin "Tlansangi" lo ti nem diai.

Headmaster-in rum zetin min rawn en a,"Ka tum a ni bik lo reng reng" min suspend lo hram rawh se.

"Insual hi kan school rules-ah phal a ni reng reng lo"

"Hmmpp...eng nge Dashi an lo khawih hmasak vel" zawi tein "A hnar ka tan bun nghal lohah" ka ti sep.

"Tawngthei si,thiam thei si lo,class point score tur ti chhe tu ni ziah mai,Sir Pui,hospital lamah lo han hruai mai ta che,Madam Hope-i hruai bawk la" min rawn melh a "Laltlansangi,Hadasha Lalmuanpuii leh Lalhlimawmi te kha ka office-ah rawn kal nghal rawh u" min hnungchhawn chiah.

"Thlawh phei a ngai em?" Hadasha a lo uang leh hman tawh.

Head chu rawn hawi letin "Lalmuanpui,kum khat chhung ka suspend mai ang che" a ti leh that.

Hadasha a ngawi hmak.

Headmaster office chhunga a dawhkan hmaah chuan kei,Dashi leh Hlimhlawpbawli chu kan ding ran a.

"Eng vang a insual maw in nih a?" A mithmul a kan ak.
A chal tliang hlarhah sawn tho rawn bet se ka hma a box hian ka vaw pawp chak.

"Tlansangi hian min rawn ti hmasa a" a'n zaidam hmel leh laileng khawp ahh..

"Ka ti kher lo che" ka ti ram hmak.
"Min ti" pawr ve lutuk.

"In hur" Dashi'n a rawn tih chuan ka nui phuh thawt.

"Lalmuanpui,khatiang kha ka office chhungah sawi ka duh hauh lo,i pa hnenah i awmdan zawng zawng ka sawi vek ang" va han tawngthei reuh tak.

"Sir,Lalhlimawmi te thianho hian min lo rel vak vak a,chuan keiman ka va hau a,chumi zawh veleh ka thutna a ka let leh kha Dashi au ri ka hria a,leiah Silfaii nen an lo kek dun a,Dashi ka va chhan anih kha" ka ti zuah zuah.

"Lalhlimawm chu chu a dik em?In buaina chu eng pawh ni se,kut thawh hmasa zawk zawkin thiam loh in chang dawn tih chu hria ula"

"Sir,anmahni khan min khawih hmasa alawm"

"Hlimhlawpbawl,dawt sawi suh,thu hretu ka ko palh ang e" ka ti vat.

"Laltlansang,chu chu ka sawi tur zawk anih chu.Lo tawng ve chhen suh" va han chhe tak e aw...Chalfilha tak hi chu.

Dashi chu a ngawi hmak tawh,kan head leh a pa hi in thiantha tak an nih avang hian an chhungkua pawh an inpawh a,Dashi a insual tih a pa in a hriat chuan Dashi chan tur chu hremhmun a ni ringawt dawn tlat.

"Laltlansang,in class-ah zuk kal la,Marcus Lalremsanga zuk ko rawh" a thu thei sia.

Muangchang a inherin kan class chu ka pan a.

Kan class-ah teacher an lo awm lo hlauh.
"Marcus Lalremsanga rawn kal rawh se" ka ti hmuk.Tu nge Marcus pawh chu ka hre chuang hlei lo a.

In herin headmaster office chu ka pan leh zal zal.
"Sangbawihtei chuhh...Headmaster hian a star chiang che a ko ziah mai che" kan class lehlam chiah a Sec:B room tukverh a rawn dakin Hmingsangzuala'n min nuihsawh zetin a rawn ti.

Ka tei thei der lo.
"A office chhungah ka va lut chiah chu ka hap bawrh bawrh alawm,indanna hi awm lo se zawng kan mualpho ngun ang chu" hawi sang vahin ka pen sawn a,ka hnung lama mipa nui ri hak vang chuan ka hawi let a.

Ehe!Lo lut tharpa êng phet pheta kha a nih hi.

"Heyy...nuih man cheng sawm" a nui tawp hmuk a,a kamiz ipte atangin chengsawm a rawn phawrh tak tak maw le.

"Kha le Laltlansang" ka kut a rawn hmeh belin chiang lutuk a ka mit a min enin a nui suk.

"Ka hming pum a min koh man sawmhnih" a hnungah ka zui dat dat.

"Kha chu zirtirtu te dil rawh,i hlawh hnem tawh ngawt ang chu" a nui ri leh hak.
A dik ve tho mai,ka hming pum a min koh hian sawmhnih dawng zel dawn ila chuan nitin hian a sang têlin ka la lut ang chu maw le.

"Marcus chu em ni i nih a?" A sirah ka va phei vat.

"Ni mai aniang chu Laltlansang" ka va ning e aw...

"I ninawm aw Lalêngthei" ka ti vin that.
Ding datin mak tih hmel zetin min en a.

"Ka eng thei lo" a ti leh hmuk.
"I êng reng,class-ah te khan,kha tunah pawh i êng phet phet" ti zuah zuahin headmaster office-ah chuan ka lut a.

"Sir min ko em ni?" Hmm...naupang fel.

"Aw,hei in class-ah buaina a thleng a ni awm a,a tu zawk nge thiam lo kan hre thei mai lo,nang thu hretu-ah ka rawn ti deuh che a" min biak dan leh Êngtheia a biak dan chu a va in nêm hleih reuh eee...

Engtheia chuan tan bik nei lovin thil thlen dan diktak chu a sawi ve mai bawk a,Headmaster chuan Hlimhlawpbawli te thiandun chu tun kar chhung suspend in tun kar ral hma ngei a an nu leh pa te school a rawn kal tir turin a ti a.

Kei leh Dashi pawh warning min pe bawk.

Office atang a kan chhuan chuan kan nui leh har har tawh.

"Laltlansang,i pawnfen siam tha rawh" tiin Engtheia khan min rawn kal pel hmak.

Ka pawnfen kan en chuan a hnuai lam alo inlip reng a,ka divide hmawr lam pang a lang thei che che.

"Heyy...Lalengthei" ka ti vak.
A rawn hawi let veleh "Thank you Gracias Khamsamida Arigato Merc" ka sawi zawh hma hma in.

"A tawk,keipawh le" a tia,class-ah a lut daih.

"Heyy...ti nge Lalengthei i tih ve ngawt?" Dashi'n alo ti vat.

"A êng phet phet zel a,Lalengtheia ni se a inhmeh alawm,Lalengthei ka ti ziah tawh dawn" ka nui vur vur.

Ka duh dawn tan riau mai he mihring hi.

Chawhma chauh class kan la a,lunch break-ah kan haw ta tham tham hlawm.

Ka thiante chuan "Spot ila" tiin min sawm sap sap.

"No no no my dear John,ka chhingmit kawpza a rawlin mangram lamah file khawih tur pawimawh tak tak a tam lutuk" ka tihsan daih.

Ka duh lo chung chu min hruai lui dawn lo tih an hria aniang chu,min ti lui tawh bik lovin min kalsan ta diak a.

Keimahin kan in lam chu ka pan hnak hnak.

Mak tak maiin Lalengtheia ringawt chu ka ngaihtuah.
In ka thlen a,ka room a ka mut der der hnu pawn ka rilru-ah a awm reng a,ka mitthla-ah zu han cham reng a.

A nui hmel ringawt pawh kha tahpui tham khawp a tha chu a ni ve a ni.

Ka mut chhuah tehreng nen kha pa vang vek khan ka muhil thei ta tlat lo.

Kan "hui" leh pap thin.
Nnna...Laltlansangi lerh lutuk hi chu a.

"Bawihte,bazarah changkha bai tur han lei lawk teh" ka nu a rawn au lang lang.

Sana ka en chuan 3:00pm alo pel duak tawh.
Ka awmhmun thawmhnaw chu ka thlak sawk sawk a,ka nu bulah chuan ka kal vat.

"Changkha kg chanve leh saum ₹50 man,Pi Hmingi ta kha lei rawh aw,a uih tui bik"

"Min lei chicks tir lo thei si,a tui lo ropui bawk sia" ka ti nuah nuah.

"Va kal mai mai teh,pawisa bang i nei dawn nia" a tih chuan phûr deuh chuan ka chhuak ve mai bawk a.

Ka hming chu Laltlansangi a ni a,kum-18 ka ni.
Û mipa pakhat ka nei a,kan school-ah,high school section-ah zirtirtu angin a thawk ve mek bawk.

Ka pa pawh hi high school zirtirtu tho niin kan school-ah erawh a thawk lo thung.
Ka nu erawh chu in chhung sekrek khawih hi a hna a ni deuh ber mai.

"Mami eng nge i lei dawn a?" Ka ning bazar kal hi,dawr lo kal pelh hi a harsa thin sia,dawrna turin pawisa min pe tlem thei si.

"Pi Hmingi bulah sawn kal lawk ka ngai a?" Ka ti daih.

Pi Hmingi lam chu ka pan vat vat a,hmun dang a kal buai leh ngai lovin changkha pawh alo nei tel hlauh.

Pawisa ka pek zawh chuan min rawn kir hun ka nghak reng a.
"Sangi duh dang deuh te i nei em ni?" A rawn tih chuan "Pawisa kir" ka lo ti vat.

"Pawisa kha ₹80 em ni min pek kha"
"Mmm..." Ka hmanhmawh ru angreng.

"Aw...saum kha tiang khan ₹50 ania,chuan changkha kha ₹30 a ni bawk a,a daih chiahin alawm i rawn ken" a ti ta mai.
Ka zak lutuk chuan nuihtlawnin ka kalsan nal nal.

"Lalanu mai mai chuhh...chak lo viau ang,a nahhhh" mi ka su dawt a,ka'n en chuan Lalengtheia khan min lo nuih ver ver.

"Ngati nge a Lalanu chuan a hau che em ni?" Ka sawi kha a hre pha a ni ngei ang.

"Pawisa a kir dawn atia,engmah a kir lo,pocket money pawh ka neih dawn loh phah" tûm barin ka kalsan a.

"Engtheinu lo ding teh" ka ding chawt.

"Engtheinu pawh ka ni lo"
"Lalengtheia ka ni bawk lo,kha i pocket money tur" ka kutah pawisa a rawn hmeh bel a,ka tawng leh hma in a tlan san leh daih.

Ka kut chu pharh a ka en chuan ₹100 note alo ni a,a la thar tha phian zui.

Inthlahrung viau mahila lawm taka min pek ania lawm le,lawm tak a ka lo dawn ve mai loh a takah.

Tak a!Cheng sawm pawh min pek tak kha.Khawl daih tur,emaw museum-ah dah ila,"Lalengtheia thil pek min pek hmasak ber" ti ila a tha ang.

In chhung ka lut chiah.
Ka nu lo nui vur vur chu rum deuh a melhin "A kir hnem hle mai ti raw ka nu" tiih dawhkanah chawhmeh ka dah tau hmak a.
Ka room-ah ka lut tlang daih.
Ka nu nui ri te chuan ka thin a tihrim belh chhah zual sawt.

Lalengtheia pawisa min pek chu ka en a,ka thinrimna theihnghilhin ka nui ver ver.

Hahaaa...cute lutuk mai a.



#End_Of_Chapter_1


Min Lo Chhiar Sak Ve Avangin Ka Lawm E🐝



Ads kha i click theihnghilh palh ang e aw...💋


[Ka story kallai Hello Ryan! zawh veleh pangngai tak a chhunzawm kan tum dawn nia.
In duh khawp lohna lai te kha comment lamah min lo hrilh ula,chuan fakna pawh kha a dawn a nuam reng ania😂]



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)