Zawnatha M. Beibiepha

Episode kal lai dah luhna

Moderator: writers

Cck Lalchhuanawmi
Posts: 323
Joined: August 5th, 2022, 8:54 pm

Zawnatha M. Beibiepha

Unread post by Cck Lalchhuanawmi » August 11th, 2022, 7:18 pm

Zawnatha M. Beibiepha
Bung hnihna
Ziaktu: Cck Lalchhuanawmi

Zingah chuan ka phone riin min ti harh a, " Um, Rushi", tep chuap chuap hian ka ti a, nizanah ka inngaihtuah lung puam leh avangin ka muhil lawk thei lo a, thawh ka hriat loh leh phah.

" Rinu, englo a nia", a ngawi leh daih, " Umm, sawi rawh, a nih loh chuan ka muhil leh daih dawn a nia", ka mu thla leh riai riai a, men pawh ka la meng peih lo, ka mit a thip hlurin ka hria. " Engmah ni lo, lo Damdawi in vat la ni mai", thupe âw deuh taka tiin call kan ti tawp a, keipawh ka tho ṭhem ṭhem nghal.

Damdawi in ka thlen chuan Anisha-i nen an lo nui dun hak hak a, Anisha-i hi a duhawmin a fel tehreng nen, Rushikesh-a hian rilru a pe thei tlat lo, keima lamah tun thleng hian a la âwn a, ka sawipui ve nasa tak nain a sawt chuang der lo.

" E khai, Mizo i ni elaw? Engtin nge i inhliam a?", la ṭhalai ve tak, kei aia kum thuma naupang Zika, a kuta pem thûk ve angreng tak chu ka ṭhuisak pah a, Mizo ho hi ka thawhna Damdawi inah an lo kal khat khawp a, 'eng a?' tih pui tur an awm loh chuan mal riaua inhriatna thlarau hian hna a thawk chak thei lutuk.

" Aw, Damdawi inah hian chaw chhumin ka inhlawh alawm", ka hre miah lo mai, " Engtik aṭangin?", â hui hian ka zawt leh a, kum li chuang lai a thawh thu a sawi leh chuan ka bobang ta hial, engtin nge ka lo hriat loh theih zawk le?

Damdawi in quarter-ah a farnu nen awmin, a farnuin college a kal laiin, tiang hian chaw a lo chhum ṭhin a, a fakawm e. " Kei chu mipa ka ni a, engpawh ti ila ka mawi sa a, ka farnu erawh hmeichhia a nih angin mi inchhunga a damchhung hun hmang tur a nih avangin, a iaiawm loh nan hetia lehkha a zir zel hi a ṭha a ni", khap eih lo hian ka en kar a, a thutak phian lehnghal.

A ngaihtuahna chu Meihlê pa ka hrechhuak zawk, amah pawh kha tiang rilru pu kha a ni, kan Mizo mipa te rilru hi a inang vek nih dawn hi, ka nui deuh hawk a, " Eng nge ni ta, ka dik lo em ni?",

" Ni lo e, i dik alawm", Damdawi in choka-a a intihpalhna a nih avangin thisen pawh chhuak tam hman lo a, chubakah mahni hnampui ngei kawm tur ka neih thar phah.

Facebook page-a ka duh berah chuan lutin ka thai thla zeuh zeuh a, a ni tela buhfai an thawnchhuah a tam ang bawkin an thar tam telh telh bawk. A duh ang takin hnamdang a chhawr mang lo a, thingtlang lo neia eizawngte leh leilet buh thar ṭhinte tan pawh a sumdawnna hi ṭha tak a ni.

A profile chu rei tawk fang ka en leh a, friend request ka thawn ngam bawk si lo; tlem lai deuhin a profile a lock ve khanglang a, ka buai mai zia chu. Profile a unlock theih nan ka Ṭawngṭai ṭhin vel, heiha huiha; tunah chuan a unlock leh ta hlauh a, ka 'Hallelui' lo chauh a ni.

" A mak e, engtin nge i thawk ṭhin tih ka lo hriat loh theih zawk le, a mak e; a thuhrimah nangpawhin min hre lo em ni?", Zika chu ka ti leh mawlh mawlh a, a ruk chuan min ning ngawt ang, ka ṭawng lah hi kal ve ṭhin ropui si a, " Ka sawi mawlh mawlh chu, choka-ah kan awm reng a, engtin nge ka hriat chat theih ang che.Hmuh chu ka hmu ṭhin che, Mizo i ni kher em tih erawh ka hre lo, North-east lam hi chu kan inang tlang vek si a",

" Chu pawh nise, min lo biak tawp tur lawm; nitinin 'aare bawkba kya what's you mean?' kan ti tluk tluk a, a ninawm ve lawm", tiin ka la chhang ṭalh, " K'u Nungi tak hi chu aw, i thothang hi ṭha ve tak chu a ni", nui sen sen hian a ti a ka lo nuih ringawt, kum kha leh chen han thawh hoa han inhriat loh mai mai.

Rushikesh chuan min lo call-in ka awmna min zawt a, eirawngbawlna hmun, chokaa ka awm thu ka sawi chuan, " Hei vang tak hi nia, Mizo an thawk ve tih pawh ka hrilh duh loh che, min theihnghilh hmin ṭhak der tawh a nia", lungawi loh hmel tak hian a lo ti su su a, ka theihnghilh tawp si lo a, Anisha damlo pawh kan ka tum reng.

Kan pahnihin Anisha kan tura inphur chhuakin kan school kal ho lai te leh Doctor kan zir lai te sawiin keimah chuan ka ṭawng mial mial a, Rushikesh erawh ngawi renga hmalam en ngurin steering a herh kawi zuk zuk thung.

Anisha te in kan thlen chuan amah chauhin khumah a lo inkhuh hlun a, a meng sen em em mai lehnghal, chutah ka ngaih a ṭha lo nghal.

Rushikesh chuan tim deuh daia en hruk hrukin, Anisha pawh nidang ang lo takin a ṭawng duh loin, mi pawh min en mang hlei lo leh ne ne kual mai maiin a kut a sik leh hluk hluk ṭhin a, an pahnih chuan ka en tawn sek mai, engtak chu thleng ang maw.

Anisha leh Rushikesh-te lo inhre ṭha hmasa zawk niin, inbe lum lam tak leh, intihthinrim chang pawh lo nei ṭhin tawh leh lo intihtauhkhum fo tawh ṭhin an ni a, mahse; vawiina an awm dan chu mak tlat. Anisha hian a rilru a hrilh ta mile, awi karei!!!

Ka tui in lai chu hakin ka phuh chhuak ṭhawt a, ka khuh nasa lutuk chu ka kawchhunga awm zawng zawng an chhuak vek dawnin ka hria, kan inṭhianna hi engtin tak chuan awm zel ang maw, Anisha hian min huat phah lo ang chu a!

Mut hmunah chuan ka inlet ka inlet a, ka ngaihtuahna luahtu ber pawh ka hre chuang lo. Phone chu lain ka han online leh te te a, online pawh nuam lo. Kan pathuma kan inbiak theihna tur group kan siamah chuan, " In mu tawh em ni?", tiin zawhna ka siam a, a tu amahin min lo chhang lo, an mu ngei tawh awm sia, kei lah hi.

Facebook bawk ka lut leh a, an page-ah ngei khan.

" Ka pa, ka pa, tho teh uuu, ka nu", an room kawngkhar chu ka chum vak vak a, ka phur lutuk leh hlim lutuk chu awm ngaihna ka hre lo ber, zanlai a nih leh nih loh pawh ka ngaihtuah tawh lo.

Tho phang tih hriat takin ka pa chuan, " Eng nge ni ta vak vak", meng mang hlei lo hian a ti a, ka nu pawhin ham bai bai chungin, " Lalrinnungi tak ṭhin hi chu aw, eng nge maw i hriat le?", thinrim ni chiah lo, chang ve fak deuhin a lo ti ve nghal a, ka inthiamlo hnuhnawh leh chu ka lo ṭhen ṭhaw ringawt.

Ka pain, " Eng nge ni ta?", a tih leh chuan, " Mizoramah haw tawh ang u", nui var chung chuan ka ti a, ka nu leh pa chuan, " Eng a?", an ti rual ṭhawt mai.

Damdawi in ka thlen rual chuan Zika bulah ka kal nghal a, Mizorama kan haw tawh tur thu ka hrilh chuan a ngui nghal rawih mai. Kan inhriatna la rei vak lo mah sela, titipui tur ka lo awm ve hrim hrim pawh a lawm thu te a sawi ve luam a, dik tak ang maw.

Banna thehlut tura ka kal laiin Rushikesh-a chuan min lo pawt ding a, " Rinu, inngaihtuah ṭha leh rawh", ngen ngawl tak hian a ti a, ka banrek a hmer ngawt ngawt mai bawk, " I ṭhiante kan awm hi, chubakah nangmah hmangaihtu pawh", ka thaw hrawk a, " Rushi, ka ṭhiante hi chan che u ka duh lo, tunah chuan hetia lo awm mai mai ka thei tawh lo bawk. Amah ka hnaih theihna tur a nih dawn phawt chuan",

" Chutiang sawi suh", ka ban chu a vai per lawp nghal, " Engmah sawi hma hmaa, naktukah ka kal nghal dawn a, Anisha nen ṭha takin min thlah dawn nia; ka ṭhiante in ni reng dawn tho, engtikah mah katheihnghilh ngai lo ang che u. Takah, Anisha pawh ka la hrilh lo, ka va kal nghal ang e", tih leh kalsawn ka rual a, khapa bulah kha chuan engmah ṭha takin a sawi theih loh.

Anisha ka hrilh chuan min beng vak vak a, " Rinnung, I tel loin engtin nge ka lo awm ang?", a ṭap pur mai, a darah chuan kuahin, " Duati, tunlai thiamna sang zel hi hman ṭangkaina hun kan nei thei tihna a ni mai lawm", vei nei lo zet hian ka ti a, a teu hlar.

Thlawhna pana phur leh hlauthawng ru zeta kalin ka hawilet leh zauh a, Zika, Rushikesh leh Anisha-te leh ka nu leh pa te chuan min lo vai lauh lauh. Ka pa pawhin a hna chawlhsan tura a dilna an pawm veleh an lo thlawk ve nghal ang.

Biepha-an min hmuh huna a awmdan tur te ka ngaihtuah a, " Meihlê pa, meihlê kheh ila i duh em?", tiin inla no zetin ka han ti ang a, " I no no nen", ka chala pen tai tai chungin a ti ang a, Aa, thleng phawt ang!

♡Rushikesh...

" Rinu, i thleng tluang maw?",

" Umm, ngaihzawng a lo nei daih a", daih chuan, " Maw? Rinu, Rinu lo chhuk thla leh daih mai rawh, kan welcome reng che a nia i hriat kha", thaw dep dep hian ka ti a, mi luhlul a ni a, a duh dawn chuang lo tih ka hria, " Aih, Rushi, ka bei dawn; nei let leh turin ka bei dawn", inringtawk tak hian a rawn ti leh a, ka thin a rawn nâ sawk!

Mizoram map en nghalin Siaha District chhungah chuan Lungpuk tih chu ka zawng a, te tak tein a lo inziak ve kalh mai. Thingtlang chenbeh ve taka Doctor hna a thawk tur chu, ka ngaingam lo a ni.

Khapaah khan eng nge a hmuh, ani ai kha chuan ka dah nuam thei fe zawk ang, hnam khat an nih vang maiin. Hmangaihnain ramri a kham lo ang bawkin, hnamah pawh thliar a nei chuang lo, hei hi Rinu hian tinge a hriatthiam theih miah loh.

" Rushi", Anisha-in hmel hlim taka a lo tih chuan ka en ringawt, henu hi chu engto hi a nei lo mawle, a thawveng em em ringawta ni mai. " Rushi, lo inring rawh aw", ngawt chuan, " Engah chuan maw?",

" Rinnungi pawhin a hmangaih a pan thei a nih chuan, keipawhin min rawn pan turin ka siam dawn che", min melh ralh chung hian a ti a.

" Anisha, ka sawi tawh kha",

" Het, tunah chuan Rinnungi a awm tawh lo bawk a, ka che nasa tawh ngawt ang, i hria maw? Min hnawl zel dawn pawh nila ka try zel tho ang che, bye bye", tih leh kalsawn a rual a, ka duh pawh ka la sawi hman lo, va hahthlak ṭhin tak.

Anisha hi Rinu lo ni hlauh sela ṭha tur!


♡Zawnatha....

Champhai lam panin Daodao nen kan inkhalh phei zar zar a, College chawlh a duh loh viau nain keiin ka tihlui tlat avangin min rawn zui ve a ni a, mi luhlul tak ni ve mah se, ka lakah hi chuan a nem leh nge nge ṭhin.

Hei tak hi nia ka duh chhan.

" Pick-up nen a zinpui che a, romantic lo thei e, Lamborghini tein zinpui che se la ṭha tur a nia, ka thinrim khawp mai", Dinga chuan a ti niap niap a, Daodao pawhin, " Lehkha ṭha taka zir tura min titu hian min chawlhtirin min zinpui leh ang lawi si a, a la hre khawp ang", tiin meng rum deuh ral hian min lo en kiau a, " Lalroding, ka Daodao hi lo fuihpawr suh, a let i tuar ve mai ang", nuih insum tak hian ka ti ve a, Daodao a lo nui sen sen.

" Champhai Zote venga nula ho kha min lo biak ula, pakhat lek te chu min lo hawnsak nghe nghe ula ṭha ang",

" Champhai Zote", Daodao nen thlûk fan duah hian kan lo ti a.

Dinga bawk chuan, " Beidaosa(Beidusaw), i lo puar haw luah palh ang e aw, ka rilru nâ dawn lutuk nia, fimkhur hle rawh, i lo puar haw vaih chuan ka pen chiang khawp ang che", a ti chu Daodao a meng bial kawk kawk mai, ka lo nuih hak hak a, min lo beng nghal chawrh chawrh. Lalrodinga mai mai chu a.

Tluang takin Champhai kan thleng a, ka u te inah kan innghat leh tawp, hmun hrang hranga hmelhriat emaw chhungte an awm duah pawh hi a ṭha ve hrim hrim.

A tuk Chaw ei kham hnuah k'u Mawia nen kudam leh buhfai chungchangte kan sawi a, Pathian zarah kan sumdawnna kan la tluanpui ve zel a, tluang zel thei ila tih hi kan duh ber a ni.

Daodao leh ka tute infiam chu ngawi rengin ka lo en a, kan inzuina a rei ve tawh nain, keimahah hian ka hriatthiam theih loh kim lo hi a la awm tlat zel. Tin, mak deuh chu, Daodao nen hian hmalam hun hi ka ngaihtuah ngai lo hrim hrim!

" Eng nge i ngaihtuah vung vung a?", k'u Mawia chuan a lo ti a, kan hmaa Buh incham phei duai ka thlir mai mai thuin ka lo chhang a, mahse; tu emaw, ka hriat ngai miah loh ka thinlungin a vei em em kha ka ngai ngawih ngawih thung. Ka thinlung hian tu nge a nih tih min hrilh thei bawk si lo.

K'u Mawia chuan kan buh thar ṭhin te tluka ṭha a awm loh thu te a sawi mawlh mawlh a, a fak hle bawk. A thawktu te, kan chhawra te ho pawh an taimain an rinawm bawk a, an hnaah an lungawi tih hriat taka an thawk ṭhin tih a hmuh ṭhin thu te a sawi a, mahni hna engpawha lungawi hi a ṭha.

" Ka u, thil pakhat ka lo zawt che",

" Aw, min zawt rawh, eng nge ni ta?",

" Accident ka tawh hmaa ka nun hman dan min hrilh thei ang em?", k'u Mawia chuan mak tih hmel deuh hian min lo en nghal a, " Hriat ka duh a ni, ka thinlung hi a khua a har ngawih ngawih, tu emaw zawn leh ngaih a nei a ni. Mahse, ka hre thei bawk si lo, mihring nge a nih a thildang zawk? Hriat ka duh", ngen ngawl tak hian ka ti leh a.

K'u Mawia chuan, " Kei ka hriat chhun chu ka hrilh tawh che kha, i u min hrilh ve tho kha a ni a, i u leh midang ho hriat chhun pawh i ṭhianpa Dinga sawi a ni a, Dinga berin a sawi belh te a nih loh chuan, hriat ka nei lo, mahse", a thaw hrawk a, " Daodao awm tawh a, i thinlung inbum tir suh", a ti a.

A dik reng, mahse; ka thei lo a ni. Daodao nen hmalam hun ka ngaihtuah thei lo te leh, ka hmangaih em tih pawh ka hriat loh te chu ka hrilh a. Daodao hi keima bul ṭan hmasak mah nise, a chang chuan ka thlahlel em tih pawh ka hre ṭhin lo.

Hnathawk ho bulah te chuan kala be hlawmin, an chhungkaw chungchang ṭheuh te leh, hlawh chungchangah te emaw harsatna an neih leh neih loh thu te sawi tir hlawmin, kan survey a ni ber ang chu.

Chutianga harsatna nei em em an lo awm lo a, an pu ber hi ka hmelṭhat thu leh ka hnuaia thawh a nawm zia bak an sawi lo. K'u Mawia chuan nui ver verin min lo nghawk leh zeuh ṭhin.

Daodao chu a kawngah nghet taka vuanin, a nâk nêm laiah chuan ka piai leh zeuh ṭhin a, ip chawih pahin min beng leh chawrh ṭhin, kiai suka, " Thin awrh", ti sapin ka fawp zui leh mial mial.

Ka ute an mu tawh bawk a tiin, tlemin ka duh thawh ve bawk. A ir nô lai te chu ka nûl thuak thuak a, a biang, nghawng leh a dul thep ve ṭat te nen lam. A bengbeh la thlain ka seh ner ner a, a âwm ka chul kual riak riak pah bawk. Thaw ṭha ngam mang si lo, chawl turin min ti duh bawk si lo, keipawh chawl duh chuang lo, chawlh hi a ṭha lo.

" I mit chhing rawh", a beng bula zawi sapa tiin kan awmdan ka siam rem thuai a, a âwm aṭanga muangchanga ka chul kual chu a lo kang leh dawr ṭhin. Chutih lai tak chuan khuh kharh ri hi ka ute room aṭang a lo chhuak a, Daodao ka fawp vat, a che tawh lo reng reng, a khawng hi ni ringawt!

Nuih tet tetin puan ka sin ṭhat tir a, a hmai a hup daih, " I va ho tak", ti leh sapin a a hmai a hupna kut chu fawp zeuhin a mutna room chu ka chhuahsan a, kei chu sitting room-a mu mai ṭhin ka ni a, sofa chungah kaiin ka mu chu ni der, lukham pakhat leh puannuam kan tih ang chi hi ka chan chu ni mai a, khaw lum lai a nih avangin puan pawh ka sin vak lo.

Zingah chuan Daodao a kimki sawt a, a zak thar a ni ber ang, arukin ka nuih ka nuih mai a, min lo melh rum leh nghek ṭhin.

Leilet hmunah Daodao hruaiin ka fanpui a, a vawikhat hmuhna mai chu a ni lo, ka hruai zing ve tawh khawp. Champhai Zotlang a ni a, Dinga'n Zote tia a sawi kha, " Dinga tan chuan Zote nula pakhat tal chu kan hawn dawn lo em ni?", nui huah huah chung hian a ti a, " Hawn lo ang, hnathawhna chang a hre lo ang a, ka tawrh phah lutuk palh ang",

" Nangmah anga hnathawhna chang hre lo hian maw?", lei chhuah tet chunga tiin kan inkaina thlahin a tlan ta daih a, " Ka Daodao, ka man hun che chuan i chak lo ang",

" Min man tum la", a mawng sawi auh auh chung hian a ti leh a, ka tlan ve ṭan chu au chiamin a tlan kual ta zak zak a, man hleih theih pawh a ni lo. A nui bâwk bâwk a, hnathawh loh ṭum a ni bawk a, insum leh inthlahrun tih pawh a awm thei dawn lo a, a zia.

Zanriah ei lai chuan Lungpuka Damdawi in ka hawn chungchang kan sawi ho a, Damdawi in leh Doctor tih pawh an awm lovin, health worker pakhatin a ṭhutchilh ve mai kha a ni a. Tin, Lungpuk hi a ṭhenawm khaw te reuh te te tana an chakkhai lamna ve ber kha a ni tlat a, chubakah damdawi lam thiam an mamawh hrim hrim.

Doctor mamawh a nih thu kan tarlang tawh a, ka zin chhung hian Dinga'n a lo tifel turah ka ngai, ka la be leh miah lo tak e.

Ei kham chuan Dinga ka be nghal a, " Aw, Delhi aṭang helai hmun chengker taka thawk duh a rawn kal mawle, a thiamna te ka enin ka la ta mai. Mi pathum hi tawk rih phawt se ka ti a, bakah tibuaitu an nei lutuk lo a, tibuaitu tih khan kawppui chungchang a nia ka sawi",

" Aw, aw, ka hrethiam. Lawkin, Delhi aṭang i ti em ni?",

" Aw, Delhi aṭang, hmeichhia a la ni zui, a hmelṭha em em lehnghal, min tihpui nghe nghe la ṭha ang", ka lo nuih hak a, " Amah leh, Serchhip aṭang mipa pakhat leh hmeichhia bawk Siaha ṭang", a tih zawm leh a, an thiamna te leh an tawn hriat lo neih tawh te min hrilh zel a, Delhi aṭang a tih chuan ka beng a tivir ber, Delhi-ah khan College kalin kum chuang fe ka awm tawh a, ani nen chuan kan lo inhre ṭhininka nun emaw hun emaw hman dan te kha min hrilh thei mial mahna tih chu ka ngaihtuah ngut ngut a.

Champhaiah tihfel ngai tizo a, k'u Mawia chunga rinna nghah leh tawp hnuin inngai tak chungin kan invai liam leh ta a.

Kawng tluanin Daodao a muhil a, chaw ei tur leh zunram thiar tura a harh tih loh chu keipawhin kaihthawh ka tum em em bik lo, hla kan ngaithla a, han men ve deuh tum ṭhin mah se, chu chuan a âwi mu leh zel a, min menpuiin emaw titi turin ka phut ngai lem chuang lo, mahse; khua har ve duh ṭhin khawp.

In kan thleng leh a, Daodao thlahfelin Office lam ka pan lehnghal a, ka nu leh pate pawh hian, " I mawng phe chiah hi kan hmuhchhun chu a ni tawh mai", min ti ṭhin.

Dinga nen chuan Office lama tihfel ngaite kan ti leh zung zung a, kei erawh Lungpuka ka chhuk thlak leh vat a ngai dawn a ni.

Zanah chuan Daodao-te inah ka chuangkai leh hram a, Dinga ka hruai ve bawk, " Beidaosa, i lo puar haw leh haw loh ka lo en teh ang che", tarmit vuah nghal vut hian Dinga chuan a ti a, " Zote nula kan lo hawn che kan pe tawp lo mai tur che sin", Daodao chuan a lo ti vat bawk a.

" Min hawn loh tih hi ka chiang bawk sia e",

" Keipawh ka lo puar haw bawk si lo a e, min pen thei lo", an inchhang tawk em em mai ni, kei erawh chuan ngawi rengin ka lo en a, ka lo nuih mai mai thung.

A tuk zing dar ruk aṭang Dinga nen Lungpuk lam panin kan inkhalh chhuak leh ta a. Phura-ah ni khat kan cham leh phawt, ka nauin ṭha taka a lo enkawl ṭhin chu ka lawm hle a, a Zirtirtu hna hi bansan turin ka duhpui bawk si lo, midang rinawm tak tur Phura kudam leh leilet leh hnathawkte enkawla viltu tur ruat mai a ngaih hmel a ni.

Tluang tak bawkin Lungpuk kan thleng a, Damdawi in kan pan nghal. Kan Doctor-te leh nurse ṭhenkhatte nen inhmelhriattirna neiin, thawh ho dan tur te, kan duty, mawhphurhna kan koa tla ṭha taka thawk tur tein kan infuih a.

Health worker, Pi. Kungi pawh sawmin ani nen te chuan ṭha taka thawh ho dan tur te kan rel a, rin aiin kan hlim dar dar phian, zanriah kil hona pawh kan nei nghal, Damdawi in hi a fal deuh hlek a, a hmun leh kawtkai a zau ṭha a, duhthusam a ni.

Ka ngaihbel nge phei chu ka hre lo a, kan Doctor pakhat chuan min en duh riau hian ka hria.

Damdawi in hian thawktu te awmna tur Quarter a nei nghal a, kan la sa ṭha fumfe lo nangin, a luah tlak ve viau tawh.

Pangngai taka hawnna hun pawh a siam theih ṭep tawh bawk.

Kei erawh leilet hmuna thlam ka pan leh nghal, Dinga erawh Kudam bula in lian vak lo kan sakah a awm mai ṭhin, kei chuan thlam lam ka ngainat deuh avangin ka awm chawt thung.

Daodao ka be tlang thei hlauh a, muah hlupin ka ngaih thu te ka hrilh luam a, lehkha ṭha taka zir turin ka ti bawk.

" Engmaw? Tunah khan eng nge i sawi?", a thusawi chuan ka beng a verh zar mai, " Engmah ka sawi lo", ti hlakin min melh nghal rawm rawm a, a pawi ka sawi ta ang maiin, mi ṭha deuha zawhna zawt ve te, phun nuah nuah chungin a kalsawn ta daih a ka lu a rawn nâ leh zawk, ka bing nghal chuai chuai.
Kha thu kha ka hriat ṭhan tawh chu a ni 'bobang' tih kha, kha Doctor Lalrinnungi nge mawni sawi kha, tu hnen emaw ṭangin ka hre tawh tlatin ka hria. Bangbo tih aia Bobang tia lam tlat kha.

" Zawna, i ṭha maw? Engtizia nge ni ta?",

" Aw, ka ṭha e", Dinga chu kuahin thildang ka sawipui ta daih a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)