ENCHANTING Chapter - 16 by Calm Bird

Episode kal lai dah luhna

Moderator: writers

Calm Bird
Posts: 101
Joined: May 1st, 2022, 8:28 am

ENCHANTING Chapter - 16 by Calm Bird

Unread post by Calm Bird » August 11th, 2022, 8:23 pm

Chapter - 16
ENCHANTING
by Calm Bird




"Kylos, duhtawk teh. Lut ang u" tiin a thianpa chuan inchhung lamah a kuah lut lui a, en zawm tawh loin Ranger-a chu ka melh chho ha a, ka nuih leh sen sen. "Haw ang le" tiin min pawm nawlh a, a bike-ah min thut tirin ka hmaah a rawn lawn ve zat a, a kawngah nghet zetin ka kuah nghal. "Tlan chak rawh, a lum" tiin ka tep chiap chiap a, mutchhuak ni chiah silo hian ka awm. Ka harh vek tho bawk si a! "Hrep hian" kan hnung lamah bike pathum vel hi an rawn tlan a, min um zui ni berin ka hria! Ranger pawh a tlan chak sawt bawk. "Min kuah nghet rawh" Ranger chuan a ti a, min thlawh pui a ni ringawt!





Nuam tizetin a hnungah ka bei a, ka kut chu a tshirt hak chhungah zen lutin a hnute zawnah ka tawp chat. Ranger chuan thaw hawkin "Awm tha rawh" a ti a, nui sen senin a darah ka lu ka nghat a, a beng zawnah chuan "Hmeltha min ti em?" Ka ti sup a, min chhanglo in a bike chu chak zetin a khalh. Glass atangin kan hnunga lo tlan vete chu ka melh a, kan inhlat tawh khawp mai. "Tinge? Christy ai khan ka zeilo ami?" Hmui ti pawrh tarh chuan ka ti a, a beng zawnah ka thaw lum ham ham bawk. "I zei lutuk, Christy aiin i zei. Le, a hma aiin min han kuah nghet teh, ka hnute kha khawih tawhlo la. I zei em kha" a tih chuan nui sen senin a kawr hak chhung atang chuan ka kut ka la chhuak a, a kawngah nghet zeta kuahin a darah ka bei leh nghal. "A aia nghetin" a tih leh vang chuan nghet zetin ka kuah a, a in-turn thut vang chuan ka rak that! Kan hnunga min umtu te pawh kan tlan pel a, an rindan a nilo nge an bike an ti ding tawp.






"Inah ka thlah ang che" khawchhung lam kan tlan luh chuan muang changin a tlan tawh a, lum ti tawhlo mahila ka la hai deuh chhulh tho. "Ka duhlo, i bulah ka awm dawn" ti nui nuiin ka kuah tha sauh sauh a, ka maimichhing tlat bawk. "I chhungten an ngaihtuah tawh ang che" a tih pawh chuan ka duh loh thuin ka chhang a, ngaihna hriat loh hmel zetin a thaw hawk. "Anih lo kal rawh" tiin a bike chu hotel kawtah a ti ding a, a bike atanga chhukin ka chhuk hun min nghak ran. Chhuk tumin ka insiam rem a, chhuk pawh ka chhuk tha hleithei lo. Ka zak hnuaiah dawmin a bike atang chuan min pawm thla a, ka kuah nghal thlawp. "I.....love you" a kawnga kuah chung chuan ka dak chho vah a, a hmel chu chiang zetin ka en bawk. Min melh chhuk ve run a, min la kuah ve reng. "Keipawn" ti a nui sukin ka biangah min chuk zeuh a, hotel chhung lam chu min panpui nghal.





"Ka room chahbi" a tih nghut chuan hnathawktu pakhat hian hmanhmawh zetin a chahbi chu a pe a, an zah hmel ngang mai. "Kal ila" tiin lift lamah chuan min kuah phei a, ka pai leh deuh khat khat thin. Lift a kan luh rual chuan eng number emaw ber hi a hmet a, lift chu a che riai riai. A room kawngkhar chu hawngin min kuah lut a, kawngkhar chu a khar nghal zat. "Min thlah tawh la" a tih pawh chuan ka la kuah tho. Engtinmah min ti bik chuanglo a, duhlo pawh nise ka kuah lui tho ang! Ka bialpa a nih hi.






"Ran..." khuma Christy lo mu chuan a ti a, a hming pawh a lam zawh hma chuan min melhin a tawp leh nghal chat. "Chibai le, ilo awm ve a ni maw?" Korean hoin midang chibai an buk khum thin dan ang chuan ka kun a, mak ti zetin a ang pam. "Eng nge ka room-ah i tih?" Ranger chuan a ti nghut a, a awmah chuan beiin ka muhil lek lek tawh. "Engvangin nge henu nen hian in awmdun zawk? Riah dun in tum em ni?" Christy chuan khum atanga thoin a ti a, night dress chhing zet a pink rawng a ha bawk. "I hriat ve zel a tulin ka hrelo, chhuak rawh. Vawikhat mah ka room-ah lo lut ve tawh ngai suh" Ranger chuan nelawmna pakhat mah neilo hian a ti a, kei chu ka muthlu lawp lawp. An thusawi erawh ka hre vek thei tho a, ka awmdan tak pawh ka hrethiamlo!






"Aih, ka chhuah chuan henu pawh hi a chhuak ve tur a ni! I bulah a awm bik tur a nilo" ti tuarhin ka lam chu a rawn pan nghal hlawk hlawk a, ka banah hmerin min pawt leng lawp a, Ranger-a ka kuah nghet lutuk lo nen chhuatah ka tlu nghal thlawp. "Chhuak nghal rawh!" Ranger chuan a ti thawt a, chhuatah chuan muin ka maimichhing nghal daih. Tho leh turin ka mut a chhuak tawh lutuk. "Ranger!" Christy chuan a ti tuarh a, an che vel en tur chuan ka meng siar siar a, Ranger chuan Christy bana hmerin kawngkhar lamah a hnuk dawr dawr a, ka maimichhin leh rual chuan ka muhil titih nghal der!






"Muttui le Duatnu" ka chala a rawn fawh zeuh lai chu ka mang hriat ruai ruai a, ka sirah a mu ve tih hriat takin a taksa lum zet chu ka feel bawk. A lamah saisirin ka kuah nghal thlawp a, hahdam tak ka ni! Rei loteah ka mutthilh zawm leh nghal. Ham bai baiin ka meng diar diar a, ka sirah tu emaw a mu tih ka hriat rual chuan chulam chu ka hawi vat a, Ranger-a ka hmuh rual chuan au tuarhin ka tlawh thla nghal pawp! Nizanah eng thil nge thleng?! Ka kawr ka hak leh hak loh en tur chuan ka indap nghal rawk rawk a, tshirt ka ta ni miahlo ka ha! Keimaha ka hak nge midang min hak tir??






"Hahdam rawh Duati" a tih sup ri ka hriat chuan phu zukin ka sira lukham chu ka ban nghal rawk rawk a, ka vawm nghal pawp. Alo la dawng chat zui. "Nizanah ka chungah eng nge i tih? Khawnge ka awm?" Hawi kual ruaiin ka ti a, kan awmna hmun hi ka hre ngailo! A room a ni lo bawk! "Hotel-ah" tiin a tho a, kawr engmah a inbel loh vang chuan a taksa nalh zet leh a tattoo chhutte chu chiang takin ka hmu, cotton jeans dum chiah a inbel! "Nanghi!" Ti thawtin khumah chuan ka ding hluai a, ka melh chhuk nghal ram. "Eng vanga hotel a min hruai nge i nih? Ka chungah tih i nei em?" Ka tih chuan ner nangin min melh a, khum bula couch-ah chuan a thu thla nghal zat bawk. A sam chu tuaiin min melh chho leh a, rum zetin ka lo melh thung.






"Haw i duh lo a, min kuah bet tlat a nih kha mawle, mi mutui lai min la tlawh harh zui" tiin a ner leh deuh sak a, awilo tak ka ni! Haw ka duhlo amaw? Ka kuah bet tlat a ti bawk a! "Dawt sawi sawi lo mai teh. Ka kawr hi" tiin ka inthlek leh a, nui sukin "Lungngai suh, i taksa si loin ka hak tir che" a tih chuan ka ang pam a, mak tizet chuan a hmel ka en a, a nui suk suk thung. "Nang... nang hian kawr mi" ka sawi zawh hma chuan min pawt chatin "Ka haktir ringawt che, engmah ka tilo ka tih tawh kha" a sawi zawh rual chuan zah lutuk avangin ka au tuarh a, a beng a hup nghal hmiah. "Engvangin nge i thlak ve ngawt? Ka awih i ring ami?" Khum atang chuan thinrim zetin ka chhuk thla a, ani erawh thoin khum bula dawhkan lamah chuan a phei a, zial chu la chhuakin lighter hmang chuan a la kai a, pak khu hlat hlatin tukverh bulah dingin a mei zu pah chuan a dak vauh vauh.






Thaw chhuak hawkin chhuata ka kawrfual hak chu ka chhar a, bathroom-ah lutin ka inbual a, ka thinrim zak bawk si chu ka che deuh sawk sawk a, ka thawm chu a ring ngang mai. "I bengchheng lutuk!" Shower a ka inphuh lai chuan a rawn au lung lung a, kawngkhar lam hawiin ka melh rum nghek. Ka inbual zawh chuan nizana ka kawr ngai bawk chu ka ha a, bathroom-ah ka inthlak nghal vek. "Tshirt kha i inhmeh zawk asin" a tih chuan chhanglo in ka sam chu towel in ka hru ro a, kawr engmah haloin a leather jacket chu a lawngin a ha a, a tattoo-te chu hmuh pawh ka hmu thiamlo, mahse a inhmeh reuh lutuk. Pack lah chu a nei ve khanglang a!






"Khawnge ka bag?" Ka tih chuan lehlam hawi zeuhin "Kylos-a inah khan a awm a ni maithei, ka la reng reng hleinem" a tih chuan ka ner nang a, engvanga lo kal kher kher nge maw ka nih le?? Lawk! Nizan khan Kylos-a'n min khawih a tum! Ka hriat chhuah rual chuan meng phawk vakin ka ka ka hup chawt a, engtin nge ka chungah a tih theih?? Ranger kha lo kal lo phei se chuan ka chhe vek a ni mai! Ranger-a'n pawna min chhuah pui atang khan engmah ka hre tawhlo a, ka inturah khan eng emaw a pawlh a nih ka ring. Zurui ang mai hian ka awm a, khatih lai khan engkim mai kha ka thu hnuaia awm angin ka ngai. "Kylos hnaih lo turin ka hrilh mawlh mawlh che kha" vei nuih sukin a ti a, a kekawr ipteah a kut pahnih a zen lut at bawk.






Sawi tur pawh hrelo chuan ka sam chu ka hruk zawm ta vel mai mai a, Kylos kha khatianga a chet kha ka ringpha hauhlo! "Chuan.." tiin ka sam ka hruk lai chuan min rawn kuah a, ka tal nghal laih. "Ka bialnu i ni tih nem nghet la, nizan kha chu i ruih vangin i chhanna ka pawmlo" a tih chuan ka che lai ka tawp a, ka towel ken lai chhuatah ka thlauh nghal, nizanah eng thu nge ka sawi? "Min chhang la" tiin ka nghawngah a rawn chuk zeuh a, a lu a nghat nghal bawk. "Ka,,, eng nge ka sawi?" Ka ti bah niai a, engthu nge ka lo sawi hman ni? "Min hmangaih thu" ti supin a nui nghawr dat a, ka taksa pawh chu a che ve laih. "Ka... uang uang lo mai teh!" Ti hlakin ka tal nghal vak a, mahse min kuah nghet sauh thung. "Ka uang hauhlo" ti supin a lam hawi tur chuan min kuai her a, a hmel pawh en ngamlo chuan a awm zawn ka melh ngawt ngawt. Eng ang pawn sawiin sawilo mahila thudik a ni tlat a, ka tang thiamlo!






"Come on Duati, i hmai a sen vek a nia" nui chung chuan a ti a, ka biang sa hat hat chu ka feel thei. "Chuan yes or no?" Ti supin ka khabeah min kuai dak a, a mitah tak chuan chiang fek fawkin ka melh a, a mitmeng chu a dam ruih mai. "Ka haw duh, ka chhungten min ngaihtuah tawh ang" ka tih chuan chek tlakin "Chhanna min pek hma he room hi i chhuahsan lo ang Duati" tiin khumah chuan a thu thla a, a mitmeng dum fiah zet chuan min en ngur a, min melh dan leh lutuk avang chuan ka zam lek lek!






"Ka... Ranger!" Ka ti ta vak ringawt! Ka lei zet zawt pawh chu nge a lo sawi thawt thawt ni! Nui hawkin "Aw tih chu a harsa viau em ni?" Nui chung chuan a ti a, thaw haka kawng dawmin ner nang chuan a che vel chu ka en reng. "Ka hlau alawm" ka tih chuan a nui lai chu chawlin a tum ta hmuk a, a thutak ta ran. "Ka bum che maw?" A tih sup chuan ka bu nghat a, a hmai tuai puata tho chhuakin ka lam chu ka mitah tak min melh ran chungin a pan ding a, ka awmdan ngaia awmin a che vel chu ka thlir reng ringawt.






"A hma ang kha a ni tawhlo, min ring turin ka duh che! Tunah chuan ka ti tak tak tawh a, ka bum heklo che... Ka hmangaih che, i hria em? Khawvela ka hmeichhe hmangaih hmasak ber i ni!" Ka dar tawn tawna vuanin ka mitah tak melhin a ti a, a thutak zia chu ka hmu thei. "Min hmangaih maw?" Zawi deuh chuan ka ti sup a, hmangaih tih a sawi rik rual khan ka thin a phu rang nghal dat dat a, eng emaw hian ka taksa chhung hi che dawt khawpin a fan chhuak vek! "Imm, ka ti mai mai lo. Ka hmangaih che" tiin ka hmai zawnah chuan a rawn kun hniam riai riai a, ka hmuiah chuan dim te hian a fawp a, ka indawh mawl tawp.






"Chuan i chhanna chu?" Inla hrangin a ti a, chil lem dawkin "Ka ring thei che tiraw?" Ka ti sep a, kiai suka ka sam ka benga zepin "Lutuk" bu nghatin a ti a, ka lei liak zeuhin "Aw" ka ti leh nghal sep. "Ka lawm e" tiin ka hmuiah bawk chuan min fawp leh a, a mi fawhna dam lutuk vang chuan ka pum chhung a za mer mer a, ka ni deuh chiai hian ka hria. Ka fawh let rual chuan a hma aiin a duhthawh sawt a, bangah min nem bet nghal rawk rawk. "Duhtawk ang" ka nghawng a fawh kual rual chuan ka ti chhuak sup a, thaw lak a tawi mat mai. Thaw ham hama ka nghawnga fawp kual pah chuan "Min ring rawh, thil dang kan tilo ang" a ti sup a, chil ka lem khawlh.






"A hmaa ka tih ngai loh zawng zawng ka ti vek ang tih ka tiam a che" tiin ka hmuiah chuan min fawp zauh a, nui sen senin ka bu nghat. "Tlan chak suh aw, chhunah minlo lam hun kalo nghak ang che" ka tih chuan a bu nghat a, min bye bye zeuh a, nuih seihin inchhungah chuan ka lut a, a bike tlan chhuak ri ka hre zawm nghal. "Nizan Sawmtei-te inah i riah dawn thu min rawn hrilh tlai lutuka, kan hlauthawng hman alawm mawle" ka nu chuan min hmuh rualin a ti nghal a, Sawmteii'n a inah ka riah thu a lo hrilh a ni ngei ang. "Nia, nizan rinaiin kan awm rei a" tiin filter a tui chu ka dawh a, ka in nghal khawlh khawlh. "Kha eng nge i nghawng ami kha?" A tih chuan "Maw?" Tiin ka nghawng chu ka khawih a, engmah ka khawih fuhlo. "Tinge a duk a? Engpawhnise va inthlak teh" a tih chuan bu nghatin inchung lamah ka chho a.






Room-a ka luh rual chuan khuma ka bag nizana ka khai ka hmu nghal zat a, darthlalang hmaah dingin ka nghawng chu ka en a, ka hmuh rual chuan ka rak chhuak lo chauh! Lalhruaitluanga mai mai chuh! Love bite engtik laiin nge ka nghawngah alo siam hman ni, a nui suk suk khan ka hre reng a! A langsar ropui si, phun nuah nuahin ka inthlak a, college chu chhun lamah ka kal chauh ang, zing lam class kan nang fuh hman tawhlo a, Kylos-a ka haw hlur bawk.






"Nangni pahnih kha, nge min rawn call loh a?! Mi'n kan ngaihtuah em em cheu a!" Sawmtei'in Ranger nena min hmuh rual chuan a rawn ti a, ka nui suk ringawt. "Awmlo lang chuan ka chhungte anlo mangang ngawt ang! I va han fel tak" tiin a darah ka beng thek thek a, min ei loh hmel ngang mai. "Remruat nizan kha" Kylos-a'n a rawn tih chuan Ranger-a'n min kuah nghal chawt a, Kylos chu rum zetin a melh bawk. A hmai chu a khem nuaih a, bandaid pathum lai a hmaiah a bel bawk. "Thlawk bo rawh" Kylos-a'n thil sawi tuma a an zuau lai chuan Ranger-a'n a ti hrawk a, min kuah miau avang chuan a taksa tang lutuk chu ka feel thei.









_____ _____ _____ ZAWMNA _____ _____ _____





"Ka..!" "A tawk, biak che ka duhlo. Khawngaihin min kalsan zawk rawh" Kylos chu melhin ka ti a, Ranger-a'n a kut a hum ruh tung a, Kylos a khawih mai loh nan ka dawm sak ta tawp. "Mahse.." "Kal rawh" ka ti leh nghut a, biak ka duhlo. Ka thian tha tak, mifel tak angin ka ngai a, mahse a ni chuan ka chungah khang thil kha tih a tum si! Ka rinna hi engvanga min tihchhiat sak reng nge maw an nih le? College ka kal atang hian engmah hi a dik thei tawhlo!





"Awle" ti supin a kalsawn a, Sawmtei chu a thaw ri hawk. "Vawikhat mah khapa kha be tawh suh, khang thilte kha engtin nge a tih theih zawk ni? Ka haw lutuk" Sawmtei chuan a ti hlak hlak a, Ranger-a chu thinrim tih hriat zetin a thaw chhuak leh hap thin a, a hmel entur chuan hawi chhoin a kut ka humna chu ka hmer salh a, min melh ve nghal vut. "Kal ila" ka tih chuan thaw chhuak hawkin ka kut chu a la kang a, a fawp zeuh. "Keipawh ka kal ang nge, banah Ranger-a nen in haw rual dawn tho ka nghak dawnlo che a nia" tiin a kalsawn a, Ranger chuan ka kuta kaiin min pensawn pui a, class chhungah chuan kan lut a, kan thut dunna thinah kan thu dun ta ran. "Khapa kha ka la sawisa khawp ang" hmalam melh runin a ti chhuak leh thut a, a hmel chu ka en nghal vut. "A ngailo, tikhan duhtawk ang. Buaina a tam mai mai" ka ti a, ner nangin min melh a, mitko kan akin hmalam ka hawisan daih.





Duh chuan police hnenah pawh ka report thei a, jail a tan phah thei tih pawh ka hria, mahse ka thian a lo nih tawh na thin avangin ka tilo. Insiamthat phah nan a hman ka beisei a, mahse a hma ang khan ka kawm thei tawh kherlo ang. Khang thil ka chunga tih a tum kha mak ka ti tawp theilo. Class kan lak chhung zawng chuan ka kut a tuai heuh heuh reng a, ka hau ngai lemlo. Kan inthen tuma a bula ka thu theilo ringawt pawh kha hreawm ka ti a, tunah ka bulah, ka khawih theihin a awm a, ka thla a muang hliah hliah.





"Duati, Canteen-ah chuan chawl tawh lo teng. Restaurant tam tak a awm a, tah chuan kal zawk ang" a tih vang chuan a bike in restaurant lam kan pan a, a chhung kan luh rual chuan mipui an lo zi ve mur mur a, college a ka mi hmuh thinte pawh an kat nuk. "Hey bro! Helamah!" Rohlua rawn auhna lam chu kan hawi a, an thianho chu an lo kim thap. "Kal ila, nge i duhlo em?" A tih chuan lu ka thing a, "anih" tiin a thiante lo thut bial laihna lamah chuan kan kal a, chair chu min pawhchhuah sak a, ka thutthlak rual chuan ka sirah a rawn thu ve nghal zat. A hmaa thil thlengte, ka hma ngeia min fiam thu an sawilaite kha ka rilruah an rawn lang zut zut a, ka na nawn leh a ni ber. Mahse hun kal tawh chu hun kal tawh a nih angin ka liam tir a ngai.






"Ranger, eitur order teh. Ka ril a tam" Alan-a'n a ti nghal ham ham a, Ranger chuan waiter a ko nghal zat. "Eng eng nge eitur in neih?" Tia waiter a zawh chuan waiter chuan an eitur neihte a sawi zat zat a, Rohlua bawk chuan "Pizza rawn ti rawh pizza,,, kan eitlang thei ber! Bawm thum aw, a dang a ngaih leh kan rawn order leh mai ang" a ti a, Ranger-a'n ka beng bula rawn kun hniamin "Eng nge i ei ve duh ang?" Tiin a rawn phun ser ser a, ka scarf awrh chu a siam tha zeuh bawk. "An sawi ang kha a ni mai" ka tih sup chuan inla hrangin eitur chu a order fel a, ka scarf chu ka siamtha a, khawlum lai laia scarf awrh chu ka lang maksak ngawt ta ve ang! Ranger-a'n ka nghawngah love bite siam miau hek! Ka hliah loh chuan midangin an hmu dawn a, a nilo zawngin kan thang vak a ni mai.






"In ni tihna mi nangni pahnih kha?" Fakawma'n a tih chuan Ranger-a a bu nghauh a, a thiante ho chu an 'aw' nghal dual. "A nih chuan ka chak tihna a nih chu, Ranger...Khawi pawisa, Remruati i duh chuan pawisa min pek theih kha" Fakawma chuan a ti nghal chuk chuk a, ner nakin an chelai chu ka en reng. "Khawi kan inchawinaa ka pawisa pek che kha min pe let thei" Jonathan-a chuan alo ti ve bawk a, Ranger-a chuan engmah sawi loin a wallet a phawrh a, pawisa tam tham zet a pe nghal a nih chu! Lungngawi lo zeta ka thutna atanga thoin restaurant atang chuan ka chhuak a, ka tawt up up thei. Khang thil a thlen hnuah pawh pawisa chungchang, an chak leh chak loh thu an la sawi amaw? Ranger-a'n hnial map loin pawisa a chak loh vangin a pe bawk a!? Infiamna lekah min le hmang angah ka ngai. "Duati" tiin ka ban rekah a vuan a, min pawh let rual chuan ka ding dat.







"Tinge i chhuah daih a?" Ka bana manin min pawt let a, ka tal thla nghal vat. "In bula awm ka duhlo" ti a inher ka tum chu ka ban tawn tawnah vuanin min melh chhuk run a, ka tah a chhuak ut ut. "Tinge?" A tih nghut chuan za lo zeta nui chhuak hawkin hmui pet sawi zeuh chuan ka en chho a, ka mitah tak min en ngur. "Hah, i uang em ni?? Inchawi nan minla hmang fo a maw?" Ka ti chhuak halh a, ka thin zawn a na ngut ngut. "Ka!" "A tawk! Tuna thil thleng kha sawi dan pawh ka thiamlo! Ka,,, i chaklo a, pawisa i pe a! Kei hi... ka rilru a thil awm hi ka sawi chhuak thiamlo zawk!" Ka ti ta vak a, ka sawi chhuak thiamlo tak tak bawk. Ranger-a'n a game play a tih tawp tawh thu a sawi a, mahse tunah lawk khan!






"I ngaih ang a nilo, Duati" ka kalsawn tur chu ka hnung atang min rawn kuah a, ka thaw chhuak hak hak. "I eng nge ka nih? Ka laka i rilru put hi ka hrethiam pha tawhlo!" Ka ti halh a, ka tah chhuak lutuk chu ka haw lutuk! "Ka hmangaih, ka hmeichhe hmangaih i ni" a ti sup a, a hmel en thei tur chuan min kuai her a, a mitah tak chuan ka melh nghal. He a mitmeng, min ngaihsakna leh hmangaihna mitmeng hi a lem a nih loh hram ka beisei!






"Ka tihpalh" zawi zet chuan a ti sup a, a hmelah pawh a inthiam loh zia a lang. Vawikhat,, vawikhat lek a tihpalh thu a sawi a, ka nem nghal vek a nih chu! Rapthlak hian! "Khawngaihin in hau lo ang, aw?" Ti supin ka biang chu a kutin a thai thla riak riak a, thaw ham hamin ka bu ta nghat. "Ka hmangaih lutuk che" ti supin ka chal chu a chalin a rawn ti si a, a maimichhing vang vang bawk. Kan bula thawm ri huk avang chuan harh chhuak thutin ka nam sawn a, thawm awmna lam chu kan hawi nghal ve ve. "Hmelate chuh!" Sehchilh zet chuan a ti a, an in sualna lamah chuan kal hlawk hlawkin mipakhat a kawr hnungah a pawt let hrawk a, a hnek nghal siah! Ka te that a, Ranger-a-te thian leh Kylos-a-te thian chu an in phek sual a, indimna tel miahloin an inhnek buan buan! Tih ber tur pawh hrelo chuan ka ka hupin ka ding khur hlawk hlawk a, ka chiai lutuk vang chuan engmah pawh ka ngaihtuah theilo!





Kan chhehvelah chuan mipui an rawn pung tan a, mipa dang ten thelh an tum pawn an thelh hleithei lo! A then phei chuan thelh an tumna lamah hliam an nei a, an lo khawih tel ve zel! "Police ko mai r'u! Ti ringawt chuan a dik theilo" ka bul lawka hmeichhia chuan a ti a, a thiannu chuan "Ni e, an inthah hma hian" a lo ti ve bawk. Inthah tih an sawi vang nge ka thin a phu rang nghal dup dup a, Ranger-a'n mipakhat leia bawhbeta a hnek ka hmuh rual chuan an lamah ka tlan nghal hlawk hlawk a, "Duhtawk rawh!" Ti tuarhin a hnek leh tur chu a banah ka vuan a, tawp chawtin min melh nghal run. A mitko a khem niaih a, a kamsir a thi bawk. "Awmsawn rawh" vawt zet chuan a ti a, lu ka thing vat. "Duhtawk rawh, Ranger" ka tap thei dawn hialin ka hria! Ka mittui tling pam a hmuh takah chuan thaw chhuak hrawihin a tho chhuak a, ka banah manin min kai phei dawr dawr.






"Ka thiante ka puih a ngai, ka tha vek ania... Tikhan lo awm rawh" a tih chuan rang zetin lu ka thing a, a kawr hmawrah ka kut lehlam lehlam chuan ka pawt trai. "Aih ...aih, police-te an rawn kal dawn, va thelh zawk ta che!" tap ti tih chuan ka ti a, a ngen in ka ngen a ni mah zawk! He mipa luhlul leh ngeng zet hi engtin nge ka siamthat theih ang?? "Duati.." ka bianga dawmin a ti a, "Police! Che tawh suh u!" Tih riin a zawmzat. Hlauthawng zet chuan Ranger chu ka melh, a hma a jail a a tan ang mai mai kha a nih ka ring tawhlo.






"Kalo let leh ang" tia kal a tum chuan a hnung lam atang a kawngah ka kuah bet a, min hmu theilo mahse lu ka thing vak vak. Ka mittuite chu an luang zung zung a, a kal ka phallo! Thaw hawkin a rawn inher leh a, chutih lai chuan police-te'n midang insual ve ho chu handcuff an bun tir mek bawk! "Hethil hi hmu velo la ka ti" ti supin ka kut a la a, a fawp vawng vawng. A kutchang thi ser ser chu ka hmu a, tinge insual hi an tum kher zel le!? Bike a in um zui te an ching a, Ranger-a leh a behbawm hote reng reng hi buaina vek an ni!






"Tap lo la" nui suk chung chuan a ti a, ka insut ri hraih hraih thung. "Nangpawh man i ni" hnunglam atang chuan police pakhatin a rawn ti a, hlauthawng lutukin police-pa chu ka melh nghal dawr. "Kan inhmu leh ta maw!" Ranger chuan ngeng zeta nui chungin a ti a, police-pa lamah chuan a inher nghal zat. "Ranger, tuntum chu i chhuak thei kher tawhlo ang" police chuan a ti thum dut a, an inbiak danah an inhmuh ngun hmel hle a, an in man ngun viau a nih hmel!






"I duh chuan i pate i phone thei a, thiamthu sawi tur i neih chuan court-ah emaw thahnaah emaw i sawi thei bawk ang" tih pahin Ranger-a chu handcuff a bun tir pah a, a lock ri nghal khap. An hnungah chuan ngawi rengin ka thlir reng a, hlauhthawnna in min tuam hlup hlup a ni ber! "A pahnihin ka tilo mai ang nge, ka chhuah theih leh theih loh chu kan en dawn em ni?" Nui sawng chunga mit siai zeuhin a ti a, police-pa chu a tham loh hmel hle! "Mahni pa zara nung ve satliah" police chuan ti supin Ranger-a kawr awmah chuan a kut lehlamin a tham a, an motor dahna lamah a pawt phei dawr dawr. "Ah..aih" lu thing vakin ka ti a, Ranger-a-te lam chu panin ka tlan dawr dawr a, motor-ah an lut fel chiah thung. "Minlo hrethiam la, i duh chuan a hranin i rawn kal thei ang. I rawn chuang ve theilo" motor bula ka din rual chuan mipakhatin a rawn ti a, motor chu a tlan nghal vat bawk. "Mahse!" "Khawngaihin" a tih vang chuan engmah sawiloin ka kalsawn a, a ni pawh a motor-ah chuangin a tlan chhuak ve nghal. "Engtin nge ka buaipui dawn che" ti sep sepin taxi ka phar a, police station lam pan turin ka hrilh a, ka phone chu la chhuakin call tur ber pawh hrelo chuan ka contack list ka thai kual vak vak.






"Kan thleng e" taxi driver tawng riah chuan ka ngaihtuahna atang ka harh zawk a, pawisa pein ka chhuak nghal vat. A vawihnih nan police station-ah ka lut leh a, chu pawh Ranger vang bawk! A insual vang zel a la ni zui! "Ka pu, tun lawk khan mipa rual,,, an insual vangin an rawn hruai lut a, ka hmu thei ang ngem?" Police pakhat lo duty na hmunah chuan ka kal a, a dawhkan ka kut pahniha nemin ka ti vat. "Ranger Lalhruaitluangate thian ho kha em ni i sawi?" Tiin file chu a keu a, "Aw" tiin ka bu nghat. "Ani hi cell 08 ah khan va hruai ta che" constable pakhat chu melhin a ti a, constable chuan bu nghatin chu lam chu min pan pui a, ka kuttin ka sik niap niap. "Minute reilote chiah hun i nei" tiin a kalsawn a, cell lam chu muang changin ka pan a, Ranger-a-te thianho lo awmkhawm chu ka hmu a, a then an ding a, a then an thu a, pakhat a mu bawk. "Ranger" bar hmaah chuan dingin ka ti sap a, an thianho chuan ka lam an rawn hawi dual.






Ranger chuan ka lam a rawn pan nghal a, bar pahnih chu vuanin min melh chhuk ran a, ka melh chho ve vah bawk. "Tinge ilo kal" ner nawngin a ti a, min biak dan avang chuan ka hawihai lek lek! "A hreawm em? I pa alo kal ang tiraw?" A mita en chung chuan ka ti a, lu a thin avang chuan hamhaih zetin "Uan hun a nih loh hi!" Ka ti vak a, tum hmukin min melh chhuk run thung. "Alo kal dawnlo, a chhiahhlawhte bawk alo tir leh ang" ti supin a khi suk a, a thusawi chu ka hrethiam hauhlo! Mahse mi an rawn kal dawn thu a sawi avang erawhin ka thaw huai thung. "A tha hlauh e, i hmai kha... a na em?" Tiin bar-ah chuan ka kut ka rawlh lut a, a mitko chu dimte, tih nat hlau zetin ka khawih a, ka kut chu a hum hnan hmiah thung.






"I hria em,,, ni dangah chuan tumah ka chanchin ngaihven turin an rawn kal ngailo. Jail-ah ka tang tih an hriat pawn" ti supin ka kut chu a hum nghet sauh a, a hmelah chuan eng emaw hi a lang chhuak bawk. "Kan driver-te an rawn kal a, chupawh mim bail chhuak tur ringawtin!" A tih zawm leh nghut a, za lo zetin a vei nuih suk bawk. "Nang chauh hi kei min ngaihvena rawn lang thin i ni" ti supin ka kut chu a fawp vang vang a, a thusawi chu ka hrethiam in ka hria! Ka pa alo kal dawnlo a tihte nen, a chhiahhlawh alo kal dawn a tih awmzia te pawh kha! Tumah ngaihsaktu neilo ang maiin alawm a tawng ni, an chhungkua hi an inngeih ka ring ta hauhlo bawk!






"I rawn chhuah hun kalo nghak ang, chuan i driver, nilo tupawh lo kal se,,, chupa chu alo thlen hma tah ka lo nghak ang che" ka tih chuan inthiam loh hmel hi a pu a, ka kut chu thlahin a kun ngal bawk. "Ranger" ti sepin a kut chu ka kut pahnihin ka dawm a, ka nuih sang bawk. Mahse min en turin a rawn hawi chho lo hrim hrim. "Min en teh" tiin a hmaiah chuan ka dawm a, muang changin a rawn hawi riai riai a, ngui hmel a pu bawk. "Inthiamlo duh suh, i inthiamloh chuan a lehpek thlen tir tawhlo la tiraw? Min ti hlauthawng thin a nia, zanah pawh i insual ka hlauh thin avangin ka muhil tha thei ngailo a, i in tina a ngem tih te ka ngaihtuah thin a!" Ka ti sup sup a, mak tih hmel zetin min en a, ka thaw chhuak halh. "Min ngaihtuah thin maw?" a tih chuan ka bu nghat a, a mitmeng dum fiah zet, tle ralh chuan min en a, mak a ti tih a hmelah a lang reng!





"Ka,,, ka phulo a sin!" A tih chuan lu ka thing a, a thiante lo awm vete pawh ka ngaihsak lo! Tawng leh ka tum lai tak chuan "Hun a tawp" tiin constable lo tawng vang chuan ka ngawi leh ta zawk a, bu nghatin "Awle" ka ti sep a, pen hnih vel ka pen hnuah Ranger-a en tur chuan hawi let lehin "I bulah ka awm a nia aw" ka ti sep a, a nui ve seih. "In thusawi kan hre miahlo" a thiante chuan chimawm zetin an rawn ti lung lung a, ka nui ri sup. Jail tan tawh hnuah pawh an la thawveng thei a, a tha lamah ngai ang.





Ranger chu station kawta thutna awmah thuin ka nghak ran a, amah lo bail tu tur pawh chu a rawn kal har zek! Tlai lam a ni der tawh a, pawisa nei ngat ila zawng ka bail chhuahna a rei tawh ang! Mi tam tak station-ah an lut chhuak a, tu ber nge Ranger-a bail chhuak tur pawh ka hrelo! "Pawn boruak kan hip leh thei ta!" An rawn tih lang langna lam chu ka hawi vat a, Alan-a station kawta rawn inzimar chu ka hmu hmasa ber a, a hnungah a thiante an rawn chhuak ve mai bawk.






Nui sun sunin ka thutna atang chuan phur zetin ka tho chhuak a, an lam chu ka pan vat. "Ilo la awm alaw?" Jonathan chuan min hmuh rualin a rawn ti sup a, nui sen senin ka bu nghat a, Ranger-a ka zawng kual nghal. "A rawn chhuak tep ang, an la inbia" ka hawi kual lai chuan Rohlua'n a rawn ti a, ka bu nghat. "Amah kalsan turin min ti sia, kan kal aw" Fakawma chuan ka dara beng thak thakin a ti a, "imm" ti supin ka bu leh nghat. "Kylos-ate thian kha engtin nge ni ve?" Ka tih chuan min melh nghal thap a, sawisual ka nei ta emaw ka inti hial! "An ni pawh an rawn bail tep tawh ang, an rawn chhuah rualin kan sawisa bawk ang" Alan-a chuan a ti a, ka ner nang a hmuh chuan ka chalah min pen kawrh. "Ranger-a hian a duh takzet che a nia, amah hi ringhlel lo la, ngaihtha deuh khan awm rawh." Tiin min kalsan a, an kal liam chu ka hau in ka thlir reng ringawt.






"Duati" ti supa ka kawnga min kuah chuan ka phu zuk a, a nui nghal hawk. "Sir, thlah i ngai em?" Mipakhat kawr var veka inthuam hiam a ti a, Ranger chuan a ngaih loh thuin bul hmukin a chhang a, a kut pahnih chu ka dawm sak vat. "Anih ka kal ang nge, i pain haw turin a duh che a, inbiak a duh thu sawi turin min ti nghal bawk a" a ti leh sup a, Ranger chuan rum nghutin "Ka haw dawn loh thu hrilh rawh" a ti a, an thusawi chu kalo ngaithla ve ran. "Mah.." "Let tawh rawh" a ti leh nghut a, an driver a ni ngei ang, a inthuam dan atang pawh hian! Kalsawnin car pakhatah hian a lut a, a inkhalh chhuak nghal.






"Tinge haw chu i duh loh a? I pain a hmuh duh che chu!" Ka tih chuan min la kuah reng chungin "Chulam chu kan sawi tawh rihlo thei ang ngem? Ka ngaih hman zia che hi" tiin ka nghawngah a rawn nul thuak a, ip zawkin "Midang an awm ve hi! Min thlah teh" ka ti nghal vat a, chimzawm zetin ka nghawng a rawn seh leh hram!






A bike-ah chuan a thu a, dingin a taksa ka ngheng rial a, khawpui pe ut chu kan thlir dun reng! Kawng pakhatah kan pahnih chauhin kan awmdun a, tuma chimbuai loh naah! Thli chu a thaw heuh heuh bawk a, ka kawngah min kuah rial a, ka chhipah min fawp leh zeuh thin. "Vawi tam jail-ah ka lut tawh a, tan hlen pawh pawi ka ti ngailo. Haw chhan tur leh min nghak tu tumah an awm ngailoh avangin! Mahse zanin chu jail atanga chhuah ka phur em em a, jail a tang tur khawpa ka che kha ka inchhir bawk, chu pawh ka tih ngailoh a ni! Nang tereuh vang hian" nui supin a ti a, ka nghawngah bawk chuan min nul leh thuak a, ka za ti chu ka tal deuh aih. "Anih chuan tang tawh miah suh! Nghah chhung i rei si, a ninawm tehmai a nia!" Ka ti a, nui supin a khabe chu ka chhipah a rawn nghat a, tuna kan awmdan hi a nuam takzet! Nuam tih piahlam a ni!



- End of Chapter 16 -

Like leh comment kha in hnutchhiah hram dawn nia💜

Ps: ig-ah Zolanui follow follow lo khan min rawn follow zawk r'o😂 @calmbirdiee tiin ka in dah e💕



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)