THURÛK_99 Chapter #22 By Floria Laldansangi

Episode kal lai dah luhna

Moderator: writers

Floria
Posts: 522
Joined: August 28th, 2017, 12:07 pm

THURÛK_99 Chapter #22 By Floria Laldansangi

Unread post by Floria » August 11th, 2022, 8:56 pm

THURÛK_99

By

Floria Laldansangi


Chapter < 22 >

<><><><><>

SAWMTEI...POV

Car chu ding dutin, U Hruaia lam ka hawi a, "lo lut la," ka ti sep.

Min rawn enin, "ka office-ah ka let ang," a lo ti let chu nui chungin, "keimah vangin in i chhuahsana mawhphurhna ka la ang chu," ka ti chu a rawn nui ri huk a, mit ti zim sulhin, "luh khung tur che in minsawm tihna em ni?" ka nui chhuak khak khak.


"Chutiang pawn ka sawi loh kha, zanriah pawh ila ei bik lo va," ka tih nuih vur vur chuan nui ve ta suk sukin a bu ve ta nghut.


Kan luh chuan naupang an mu tawh a ni ang, Ruati chauhin Tv a lo en a. Min hmuh rualin, "enteh, U Sawmte, saw saw U Rinfela Pa a ni lo'm ni?" Tv chu a kawk vâ.


"Engthil nge ni a?" Ka pan hnai ve vat a.

Chanchinthar an puan chu uluk fe hian ka ngaithla, "vawiin Dt. 25/8/20** khan CBI ten ralthuam ṭhahnem tak Nuai 150 man hû manin, a neitu diktak ni a puh, kan Home Minister nilai mek Pu Rokima chu CBI ten thuzawhfiah turin an la nghal tih kan thudawn na in a sawi..." Phawk lutuk hian ka meng a, ka mit ka khap fak fak bawk.


"U Hruai...."

"Khawnge U Hruaia kha?" Ka ti zet tawh choka lam ka hawi chu eng emaw hi a lo khawih rak rak mai. Ei tur siam a tum em maw ni le?


"Eng nge itih dâwn?" Ka pan hnai a, min rawn en zawkin artui chhukeh chuan, "ei tur ka siam dâwn," a ti ve mai.


"Rawng i bawl thiam em ni?"


"Chaw in la ei nange?" Ruati lam ka hawi a, "aw, kan buai deuha," ka ti thla ngawt a. U Hruaia lo nui ri suk thung.


"Ka siam dâwn em ni?" Rawn thawh a tum a.


"Ka siam thei mai ang," U Hruaia'n a lo ti sup. Nui var vara chair pawt chhuakin a ei tur siam chu ka en zui dauh dauh a, "rawngbawl thiam hmel pawh i pu lo," ka ti nui var var bawk. A pu miau lo va tin ni. A hmel leh pian en renrun hi chuan inla Pa deuh, insual hrat, pawisak nei lo deuh hi a ang bawk sia.


"Spaghetti siam chu a har hleinem," a khi suk, chu pawh nise a inhmeh chuang lo.


A ei tur siam che vêl te, purunvar hnehsawh taka a chansawm lai te chu hmuhnawm thlir takte hian ka lo thlir dauh dauh a. Min rawn ena ka hnara a kut ṭanga tuk zauhin, "i kut va sil rawh," a ti zui sup.


"Ka tho peih tawh lo mange," ka ti nung nung chu a hnar a lo tum dat. Naupang chhia deuh hian ka nuih let var var.

Peih lo deuh chuan ka tho leh ta ṭiah ṭiah tho a.


"A rim a tui..." Ka ṭhut rualin ka hmaa Aglio olio a siam chu a rim hip vang vangin, "ka lawm e," tih leh fork chu ka ban zat.


Nui ri huk hukin, "i la duh belh chuan a la awm a nia. Ruati rawn ei ve leh ta che," ka thil ei rualin ka ril ṭam zia ka hre chhuaka Ruati lam reng ka hrechang tawh lo.


"Ei rawh u, mut ka duh tawh zawk," tv off in a tho zui nalh bawk.


Thil ei pah chuan, "U Hruai, Rinfela Pa chanchin i hria em?" Ka melh ralh.


Min chhan a tum lo tih ngawi ngala a ei tur a ei mawlh mawlh danah a hriat theih.


"Mite hi ngaipawimawh ve la," ka ti ta ringawt chu a rawn nui chhuak huk, "engtia ngaih pawimawh nge i duh?" A mitmeng sawr sawr chu ka kuk fawk dâwn mawni?


"I hre reng, ka zawhna che i chhang ngai lo," ka lo ti bak hlar.

La nui reng chungin, "news ah an puang dur dur a, ka hre ve alawm," ka awih lo, in rawlhna a nei chiang lutuk. Chu erawh ka sawi zawm tawh lem lo. Pa Roa erawh a fihlim ka ring thung. Ani ang Pa dik lutukin sawtianga tamtham sumdawnna hlauhawm a ti dâwn lo hrim hrim.


Kan chaw ei kham, kan eina thleng pawh a silfai vek chu ka en haw haw ringawt mai.


"Inchhung chet ka rinai i thiam," puar pengpawngin sofa-ah ka ṭhu duai zui a.


"Chhuatah mu maila, sofa-ah i leng âwm si lo va," a lo bu ve nghat tho.

A mutna tur single mattress chu ka la chhuak a, polar blanket eh lukham nen a mutna tur ka siam zo ka hawi chhuak chu Phone hmangin thlang lam tukverh bulah a lo ding rûn chu niin.


"I mu thei a nia," a rawn hawi zawk, min chhânnan a bu nghut ringawt a, ka tibuai chhunzawm ta bik lo.

Room-ah lutin ka inthlak ve sawk sawk a, ka fate bulah ka mu zet tawh. Dimteia ka fate tih harh hläu zeta tho leh ṭhem ṭhemin, lukham nen chuan ka inpawm chhuak a. A lo mu ve dâwn chiah bawk.

"Eng nge i rawn tih dâwn?"


"Tawlh phei rawh, i bulah ka mu dawn," a mitko a san awk, min sawm pawh ni si lova keimah zawkin a bula mut ka tum chu mak a ti hle a ni ang.


"I ti tak tak em ni?" Lukham ka dahthla chu a lo ti dût dût.

"Ti tak tak e," tih leh ka mu thla zui a, ka lukham pawh chu ning leh ta siin a sira nawrin U Hruaia bân chu ka pawt a, ka kham zui zat a, a kawngah kuah zuiin, ka bei zu hle hle bawk.


Ka awmdan avanga nuihza tih hriat tak hian a nui nghawr dawt dawt a, min kuahzui ve ta hlu hlu chuan ka chalah fawp vang vangin, "min ngaihtuah em ni?" A ti zawi sup.

"Teuh lo," ka ti tak nâ-in, keimah avanga a Pa kut thlak a tawrhna mai ni lo, inzawmna hial tih chaha an vau kha pawi ka ti. Bakah, zan a mut theih loh ka hläu.


Nui nghawr leh dutin a thaw chhuak ham ham a, naute ang maiin min kuah ta hlu hlu in, ka hnungzang beng thek thek chuan, "thawhṭan karah khian inneihna hmang ang hmiang?" A ṭawng zawnga taksa che dutin a min nghawr ve dat dat te, a thawk zawnga taksa che te chuan engti zawng emaw takin ka taksa a fan a, minti danglamin, ka sa hat hat lehnghal.

"Umm.." Ka ti zawi sep. Mit ka chhing lui zui daih bawk. Ka lungphu rawn danglam ta chu rang takin ani pawhin a hria a ni tih hriat tak hian a thaw chhuak ve hawk tho.

ka tâi zawna a mipatna rawn che ṭual ṭual leh min do ta at chu chiang lutukin ka hre bawk chu chuan minti khur chhuak lek lek hial.


A thaw hawlh a, "Bawihi kan mut theih i ring meuh a maw?" Aw sak lam lek lek hian a rawn ti ban sup sup a, nuihza aw oawh a tep ruai bawk.

A âwmah ka lu nawrbetin ka ti che mat mat, "muhil rawh," ka ti chhuak chu nui nghawr dawtin, "zanin leh naktuk zan bak a ni tawh lo ang," sak zeta ti nghet churh chuan min kuah nghet zual sauh bawk. Thinphu dep dep leh kawchhung khur ru dar dar chung chuan Kan mu thei ngut ang emaw chu?


"Eng tiangin nge sum a dawn tih leh, Rokima leh Chhanhima hnen aṭang bakah, Minister emaw a thawhpuite hnen aṭanga a sum dawn tawh leh dawn dan engkim ka hre duh," U Hruaia ṭawng chu ka hre vuai vuai emaw ka tia, Pa Roa hming alam rik takah chuan ka harh chiang ta mah mah.

Tin, tu chungchang nge a sawi? Nge ni a, Pa Roa hian ralthuam leh ruihhlo tawlhah hian inhnam hnawihna a nei zawk tak tak le?


"Zairema hmingin em ni a awm?" A ti leh nghut.

Zairema a tih chu ka hre ṭhin, harh kur si chuan ka meng duh miah lo va, Zairema a tih chu ka ngaihtuah let rauh rauh. Mahse, ka hre chhuak mai thei lo, hriatna chu ka nei tawh chiang alawm.


"Eng nge itih?" A rawn mu leh tur chu zimar lui ṭiah ṭiah chungin ka lo ti der a. Nui ri suk suka rawn muthla ve chuan, min kuah lehnghal chial bawk, "bathroom ka hmang," a ti zawi sup. He mihring hian dawt sawi a thiam riaua ka hriat tâk chu ni!


Engmah sawi zui ta lo chuan kuahlet chialin ka muhil zui leh ta sêk sêk tho a.


"Anu tho tawh rawh," ka fanu in ka hmai a rawn beng thak thak.

"Reilote bawihte," ka meng thei thlawt rih lo.

"Anu tinge kan bulah i mut loh," ka fapa ka dulah a rawn lawn leh ta ngat mai. A mak thei a nia.

"Inbula ka mut loh vin..." Ka ti zet tawh, ka meng zui kawk, nizanah chhuatah ka mu a ni tih ka lo theihnghilh hmin hmiah a ni.


"Bawihte..." Tih leh ka fapa tawlhsawn tirin ka ṭhu chhuak vat a, ka hawi kual vut U Hruaia ka sira sofa chungah ke bawp khawkherh chunga coffee lo in ka hmuh chuan a ka melh nghal vak.

"Min kaih thawh tur alawm," tih melhin ka melh. Ka rilru hria ni âwm tak chuan a kiai suk duh lek lehnghal.


"Anu, kan bulah tinge i mut loh? Tinge nangma bialpa bulah i mut a?" Ka fapa lah hian a zawhna ka chhan hma chuan min zawt leh reng mai dawn si a.

U Hruaia chu ka melh leh ṭhin, minpuih a tum lo nasa mak bawk si.

Za lo deuha nuihin, "a hläu a, amahin a mu ngam lo va," ka ti chhuak chu a coffee in a hak ṭhelh. Hnehtu inti fe a melh chho vin ka dar ka san khum ak, min puih loh vaini.

Nui ve sung chung chuan a lu a lo thing mut mut ringawt lehnghal!

"A len tawh tawh nen," Emma-in a lo ti khauh, kan nui ta hak hak ringawt a.


Khawia thawmhnaw fai nge maw a neih hman ni? Guess t-shirt dum a hak leh Armani kekawr, khaki rawng tak lampang a hak te lah chu, a hmai a hmul ṭo dum chhah lutuk lo fai em em si nen chuan a inrem thlap mai lehnghal. Tho phang hmuh atan chuan a ṭha mah mah a ni.


"Min en reng chuan hna i tlai ngei ang," Coffee in zuiin a rawn ti sup. Ka harh zawk nia maw le.


Ka fate pawh chuan min lo en ve kar chu niin, hahthlak hian!

"Khawnge Ruati. Tho rawh u, mutna ka'n tifel ang e," ka ti zung zung.

"Pawisa ka thawn lawk a," a rawn lut chiah. A pawisa thawn hun a ni tawh tak e.


"U Hruaia'n sandwich a siam a, chaw pawh ka chhum lo a nia," U Hruaia chu ka en vat, ka fate lah chuan, "a tui rap mai anu, artui tamtawk a tel bawk," an lo ti hliai.

"Zingkarah chuan pai nuamlam ei a ṭha," ka hriat tura sawi pawh a ang lo, a tho zui nulh a, coffee no la in, "inti fai rawh, kan tlai dâwn," min rawn en zawk, coffee a siam zui rak rak.

Mak deuh chu, nimin lama thilthleng kha ka theihnghilh hmiah a, tute nge kan kawnga awm a, tute nge kan pahnih inkara dintum lam reng reng hre chang tawh lovin, tunah hian ka thinlung zawng zawngin ka hlim nia maw le!


Kan room-ah lutin ka intifai ve zung zung a, "couple t-shirt hak in inthurual em ni?" Ruati'n a rawn tih chuan ka in en vat. Guess kher ka lp ha ve chu niin.

U Hruaia kawr hak ang ha lui ka ang tawp, ka theihnghilh daih alawm. U Hruaia ka en vat a, awmze nei deuh hian a lo nui ang suk suk zui. A chang hi chuan a ngeiawm ve thei ngawt mai. Ka fapa nen hian an mizia hi a in ang riau lehnghal.



"Ka theihnghilh alawm. Ka va inthlak...." Ka darah rawn chelhin min nam ṭhu leh a, "hun a awm lo," a nui zui ruh ruh nia maw le. Ka va ngei tak aw!


"U Zea ten min lo fiam leh ang," ka ti zui nang nang, ka ril ṭam tawh nen a sandwich siam leh coffee min siamsak chu ka inzui ve mai bawk a.


"Anu, Ânupuiin a lo bia che," Emma-in ka phone a rawn ken chhuah chu la vatin speakers ah ka dah zui a.


"Aw U Nung."

"Eng nge inhriat a, naktuka inneih intih ni?" A rawn ti tán tán. U Hruaia ka melh vat.

"Ka hre hleinem."


"Tunah min hrilh chauha engtin nge Shillong aṭanga kan rawn chhoh hman ang ni?" A rawn ti leh hlar. A thinrim hi chu a hlauhawm ve thei bawk sia.


"Thawhṭan itih kha i fiamthu nange?" Keimah zawkin ka ti let haw mai.


"Nungi, helicopter rawn hmang rawh u," min chhang lovin U Nungi a ti be ta daih.


"Inpuahchahna hun a awm hleinem," ka lo ti ve leh.

Ka beka rawn fawp zauhin, "engmah itih a ngai lo," ti sup chuan a pensawn vuta a phone phawrhin midang a be zui daih lehnghal. A awihawmloh e, bakah a Nu leh Pa biak ve leh hrim hrim te pawh ka duh a sin.



"Engpawh nise Hruaitluanga ngel ngul kha a rilru i sawhsawn tir dâwn lo. Helicopter hman tur kan rawn zawng mai a niang chu. In mak chûk chûk e," a rawn ti leh hlak hlak, keimah pawhin sawi tur ka hre lo a bar chu a nih hi, ka hawi he he ringawt a nih si hi maw!


"Intih dâwna nghah nghah a ngai em ni? Tih vat kha a pawi lo. Nuam tuar hmat a sual ngai lo hetiangah," U Ṭhaa'n nui hawk hawk chunga a rawn tih chuan U Nungi pawh a nui chhuak ve awr awr.


"In ninawm nupa lutuk," ka lo ti hlak chu nui chhuak ta uar uarin, "tih hun che a nghak thei thlawt lo a nih kha," a nui zui uar uar lehnghal.

"Ka dah dâwn," a chhanna pawh ka nghak lo ka dah zui daih. An nupa biak leh zahmawh hi an tel hrâm zel. Lalnunpuii mah tih nak a laiin.

"Case thar a awm loh bakah, hna i nei tam lo tho a, vawiin chu kal lo mai rawh, Zodini ka be tawh a, a dawrah thawmhnaw in en dâwn nia," U Hruaia chu beidawng deuh hian ka en ringawt. Sawi ve viau pawh ni ila a lung a lianin a thute bakin a kal dâwn lo tih ka hria.

Khawlhring lunglian, mahni thuduh tih zawng zawng hi a nei zo a.

"I Nu te pawh biak ve leh hrim hrim ka duh a," ka lo ti hap chu a lo rûm nghut thung a.


"Myla, tumah ngaihtuah suh ka tih kha," a ti zawi sup. Sawi zui a duh loh zia a lang chiang viau bawk.


Vula a rawn luh takah chuan, ka khabea rawn chelhin, hmangaihnaa khat hian min fawp vang vang a, "vawiin chu nilengin ka buai dâwn a, Zodini a buaipui ang che," ka hmui bul chetah chuan a ti sup sup. Ka lo mur er er lehnghal.


"Naktip tut tutah kher a ngai em ni?" Ka'n ti leh ngial a. A mitmengah chuan, "ngai e," tihna bak ka hmu lo. Ka hmuiah fawp ta lo chuan ka chalah a fawp zui a, "min ring rawh ka tih kha," ti leh supa inla hrangin a pensawn pawk pawk.

Thaw dep dep hian a kal chhuak chu ka en dauh dauh ringawt, ka chala min fawh a piang lah hian min hmangaihna leh ngaihsakna ka hrethiam zualin ka inhre tlat lehnghal.


"Anu kan nalh em?" Ka fate chu ka en vat.


"Khawia kawr thar nge inneih?"


"U Vula khan a rawn keng a," Ruati'n a lo ti vat, U Hruaia ruahmansa a ni tih ka hriat avangin engmah ka sawi zui lem lo. Midang chu nise ka hriat loh va thilpek an lak avangin ka läwm lo leh viau ang. A nazawngin midanh thilpek hi ka lk tir ngai lo hrim hrim. Chapo lam a ni miah lo, naupang chu a âwm leh mawi tawka thilpek hi a tawk reng.

Mi an hmuh a pianga pawisa pek an beisei te hi ka hläu tlat ṭhin. U Nungi leh U Ṭhaa erawh hi chu ka khap thei miah lo fapa nei hek lo le.



Ka kut chu bengfai thak thakin, ka tho chhuak a, ka fate chu sofa lamah hruai pheiin, "ṭha deuhin ṭhu ula, thu hrilh tur che u ka nei," ka tih chuan an kuangkuah ve thlap.


"Ummm...engtin nge bul ka ṭan ang aw..."

"Anu, i bialpa nen khan nupa inni dâwn ti mai la," ka meng kawk, "inhria maw?" Teh zawk thlawt a.


"Aw, i bialpa in a sawi alawm, 'apa' kan nei tawh dawn a tia, nimin zan aṭangin 'kan apa' a ni tawh dawn a ti," ka fapa thu sawi zit zet chu meng hraw hian ka en hau ringawt.


"Naktuk alawm, nimin a ni lo," Emma-in a lo ti hlar. Nimin hi naktuk a tia, naktuk hi nimin a ti hlauh bawk a. Ka fapa hi chu a letling ve a nia.


"Ruati, engtikin nge ka fate a biak?" Ruati a lo nui vur vur a, "zingkarah khan, Drew-a pawhin naktuk aṭangin 'Pa' tiin a koh tur thu a tiam thlap kha. U Hruaia a fing khawp mai, naupang phalna a dil thlap a," a aw ri ah U Hruaia a ngaihsan zia a lang thei. Ka lo chhuang ru ve ngawt bawk a.

Ka fate chu ka en leh hehaw a, min uina pawh hi an nei eih lo em maw ni le?


"Pasal ka nei dâwn a, inthikthu a chhe miah lo em ni? I Pa Francis-a nen kan chhuah dâwn lêmin min ngên ziah a, lo lêng tawh lo tur tein i ti fo sia," ka ti chhuak thlawt, ka ngei lek lek zawk min ui lo lutuka ka hriatna chu, an nui vur vur a, "mahse, apa Hruaia ka duh zawk alawm. Chuan, apa Hruaia'n a sawi a, anu a neihloh chuan a thi dâwn a tia," Andrew-an a tih rualin ka nui chhuak hak, "kei pawh," Emma-in a lo ti vat.

Tih ngaihna hre lo leh sawitur hre lo zet chuan ka fate chu nui ṭhûin ka en ta ringawt a.

Engtin nge naupang phalna lak nachang te a hriat ni? Kei aiin, pênkhatin a pên hmasa zel zawng a nih.

"Pa chu induh tihna em ni?" Nui chung chuan ka ti leh a.


An ngawih deuh vang vang hnuah, "keichu ka duh ve tho, Sangsangi pawhin a nei a, kan school ami zawng zawngin an nei a," Emma-in a rawn ti siam siam.

"Kei pawh ka duh ve tho," Andrew-an a lo ti vat. Ka fate thusawi avangin ka tum miah loh vin ka mittui a rawn hnam sawk lehnghal. 'Ka fate hian ansawi thiam si loh leh hriatthiam si loh hian an nunah Pa chu an lo mamawh ve rêng em ni?' Tih min ngaihtuah tir nghal vawng vawng mai.


"In awm em?" Ka mittui chu ka khap let vat a, kawngkhar lam hawiin, ka hmel hmuh avangin ka ṭhutna aṭang ka ding zui vat.


"Professor...." Ka ti chuak sep bawk a. U Hruaia pa chu hawi kualin, "ka ṭhawng lutuk lo ang che tiraw?" A rawn lut a, ka fate ṭhu fel at chu enin, "an hmelṭha hle mai," a ti zui chu ka lo ṭhen sak ringawt.


"Eng nge ni ta?" Ṭhutna tur kawh hmuhin,"Ruati naupang hi room lamah lo va infiam pui mai ta che," ka ti zat bawk a.


Ka fate an luh rualin, "nizan khan chaw pawh ei lovin kan chhuah tir ta si che u a," a ti zui nang nang a.


"Kan ṭha alawm, pawimawh a awm zawk em ni?" Ka lo ti let vat.

A fapa ang chiaha mitmeng thim lam maha min enin, "Sawmte, kan fapa hi i thlah zawk thei em? I chanah indah la, Nu leh Pa chuan kan fate tan chuan a ṭhaber kan beisei vek si a. Chutiang bawkin kan fapa laka kan beisei hi a säng em em a, a bikin a Nu," A rawn ti chhuak ta churh churh mai. A sawi ka rin lawk mah nise tlem chuan ka la na ve deuh reng mai.

"Sir..."

"Ka hmingin min ko mai rawh," a lo ti vat.


"Pa Chawi, pawi ka ti mah se U Hruaia'n min kalsan te a nih ngawt loh chuan kalsan tumna ka nei lo."


"Kan fapa tán chuan a enkawl thei tu tur. Amah chuah ni lo, a fanu nena enkawl thei tur kan beisei a, a enkawl leh venhim reng ngai nangmah ang hmeichhia ni lovin," a tih dam dupna chuan engtin emaw min chhun veng veng nia maw le.


Ka hnuk a rawn ulh ringawt bawk. A aw ri damdupah chuan inhmuhsitna ka hre tel tlat chuan ka duh miah loh vin ka mittui a ko va, ka hrawk a rawn na nghal et et bawk.


"Keimah ang.." Ka ti thawp sap. Ka lei hmawrah a ral a ni mah zawk.

Ka mittui a rawn hnai zual kuar kuar a, mittui avanga khaw hmuh fiah lo ruaia Pa Chawia enin, ṭawng mai ka tuma ka kâ ka âng a nih chuan ka mittui a rawn tla dâwn a ka hriat tlat avangin ka ngawi leh deuh vang vang.


"Ramdangah emaw, Mizoram pawnah emaw hna i duh a nih chuan ka zawnsak thei che a nia," a tho zui a, "inngaihtuah la, ka phone number hi ka dah ang a, min rawn be dâwn nia," tiin lehkha them hi dawhkanah chuan a dah a, a pensawn zet tawh, thaw kawkin ka ding chhuak a, "Pa Chawi..." A rawn hawi let vual vual chu a mitah mit hnawm chapa enin, "naktuk hian inneih kan tum a, i sawmna chu ka hnawl ni rawh se. Mahse, ka tiam ang che, infapa in min enkawl a, min venhim ang zat chiahin, ka pasal leh ka mipa hmangaih a nihna angin ka enkawlin, ka venghim ang tih ka tiam ang che," ka ti chhuak zat zat chu min en he haw mai. Ka lo thaw chhuak ham ham thung.


Naktip maia kan inneih tur thu ka sawi chuan a ṭhawng viau a ni ang, engmah sawi zui tawh lo leh, mak tihnaa khatin a chhuak zui dun dun a.


Ka biang a rawn lum thla pup, ka fate rawn tlân chhuah tak avangin ka inhru hul vat vat a.


Kei ang hmeichhia hian an fapa hi ka phu lo tih ka hria. Mahse, mipa in fa neih tawh hnua kawppui anneih theih laiin engvangin nge keiang hmeichhia hian kan neih theih loh ang ni?


"Anu..." Andrew-an a rawn tih rualin, "Malsawmkim.." Rinfela aw ka hre zui a, ka hawi rang viau bawk.


Rinfela rui tih hriat taka rawn pên lut chhat chhat chu ka faten an hläu a ni chek ang chu, min rawn hnaihin, min kuah zui chawih chawih mai.

"Ice cream ka lei ang che u, chhuak ang u," Ruati'n naupang a rawn pawt chu an ṭang eihlo hrim hrim, a tlânin an tlân chhia a ni mah zawk.

"Eng nge i rawn tih dawn?"


"Pasal neih i tum amaw?"

"Chhuak rawh..."

"Zawhna ka zawh che u," ka lo ip chawih mai, a ring lutuk mah mah.

"Tum e.." Ka ti let ve vak.


"Ka fate pahrawn hrawn tir i tum a," a ti leh chher chher.


"Tihluihna hmanga custody i neih hnuah pasal neih i tum khanglang a," a tih leh chuan ka lo melh nghek.


"Tihluihna a tel lo, i pa hriatpuina thlap a nih kha."

"Phiangsena che. I bialpa rawn tirin min vau tir khanglang a ni lo'm ni?" Min ring chhe lutuk chu ka sa ve phat.


"Min rawn hnaih hlek suh.." Ka ti let ṭhak bawk a. Min rawn pan hnai chu ka lo tawlh hnung ve vat vat a. Mahse, thui erawh ka tawlh thei lo nasa, sofa ka hnungah a awm tlat tawh.


"Malsawm..." Min rawn hnaih a, dawhkan chu kal hualin a hlat thei ang berah tv hmaah chuan ka ding vat. Lalrinfela kut ram zia ka hria. Keiaia hrechiang an awm kher lo ang.


"Rinfel, buaina neihpui che ka duh tawh lo, min chhuahsan rawh," a tawplam chu ka ngen a ni mah tawh zawk.


"Engvangin nge ka chhuahsan an che ni, ka ta alawm inih? Hman aṭangin," a ti chher chher chu ka en ngawih ngawih ringawt.


Ka mittui a rawn luang ngiai ngiai a, "i ta ka ni ngai lo ang bawkin, ka ta ini ngai hek lo. Tin, hmana hmangaih ṭhintu che kha ka ni tawh lo, kan kawng ve veah tinge kan kal theih loh. Engkim hi a harsa zawngin siam suh," ka ti leh thlawt.


"I tel lo leh tihbuaina tel lo pawhin ka buai tawk lutuk mah mah. Keimah hian min thawk tir teh," ka ti chhuak leh ngial a. A mitmengah erawh min hrethiam hmel pawh a pu chuang lo. A rum tulh tulh emaw tih mai tur a ni zawk.


A hmel hlauhawm deuh kha chawpchilh a rehin, mitmeng chauh hmel tak hian min en a, "min hmangaih takzet em?" A rawn ti chhuak chu ka lo meng deuh kawk.

Ka lu ka lo thing vat vat a, ka mittui rawn tla zawih zawih chuan, "ka hmangaih ṭhin che, ka thinlung zawng zawngin ka duh ṭhin che mah se a ni tawh lo, hmalam ka pan tawh, chuvangin Rinfel, kei leh ka fate nun hi thlah zalen rawh, i hmasialna avangin minti na tawh suh," ka ti chhuak leh ngawih ngawih a, ka ṭap zawih zawih bawk. Ka ṭah chhuah em em chhan chu ka hre lo.

Rinfela vanga ṭap pawh niin ka inhre chiah lo bawk. Pa Chawia ṭawngkam min hmuhsitna khan min ti nâ niin ka hria. A ṭawngkam dam dap, a fapa a ngaihtuahna phena min hmuhdan chiang tak a zeh tel kha ka nihna mah ni se ka na thlawt tih bak ka sawi thiam lo.



"Malsawm.." Dawhkan kal hual ve chuan min rawn pan hnai ruak ruak a. Kawngkhar lamah ka lo awmsawn ve vat vat. Inhera tlân chhiat ka tum rilruru hman zawk.


"Kan fate nen Mizoram hi chhuahsan ang u. Kan paliin, Mizoram aṭanga hmun hla takah. Ka tiam ang che...." A tawp dawt. Ka hnungah bang emaw ka sut ka tih laiin, thli pui ang maiin min pel vuk a, U Hruaia'n Lalrinfela chu a rek chawt, sofa lamah a vawmin a vawm vial nawk a. Sofa-ah vawm lo se chuan cement bang a deng dawt ang a, a ruh a tliak nasa viauin ka ring, sofa pawh a ri ṭhawt thei hial nia.




Ka hmaa taksa lianpui mai, thinrim insang mar tih hriat tak che leh hrut chu, "U Hruai..." Mittui nen ka kuahbet vat, a thaw ri hrawih hrawih a, duhse chuan min thehsawnin a sawisa zawm thei tih ka hria, mahse zu rui a ni tih a hriat vang nge ka khap vang zawk ka hre lo, khawih zawm tumna nei lo chuan a ding khawng ngut ngut a.


A taksa ṭang ṭung leh sak ṭulh chu ka kuahbet tlat bawk.

"Sir..."


"Engthil nge intih phiangsen hlawm. Theh chhuak rawh u," a ti hrawk. A aw ring leh mar lutuk chuan min nghawr dawt dawt a, inchhung a khawk rum rum thei hial nia, ka kuahna chu ka tinghet sauh bawk.


Thaw zui hraih hraihin, ka kuahna kut chelh chuan, a rawn inher a, ka kut chu phelhin, thinphu zawih zawih a ka ding khur ti tih chu ka khabe ah rawn chawi kâng hretin, a thaw hawlh a, "a ti nâ che em?" A ṭawng pawh a la sehchilh deuh rap rap. Mahse, min biaknan erawh theih tawpin a thinrimna thunun a tum tih a bek pawng ṭawl leh khabe ruh lawk zual ṭûnah chuan a lang chiang mah mah.


"Na lo.." Ka aw chu a la khur lek lek a, ka mitmenga hlauhna pawh a la reh hauh lo.

Ânchhia ni âwm tak phuh chhuak hlukin, alamah min pawt hnai hrawkin min kuah nghal chawt a.


A thawklak rang tak leh lungphu ri dup dup chu thinrimna insum tum lutuk vang a ni tih ka hria. A taksa pawh a la sak takzet bawk.


"Ka ṭha a nia. Ka ti hläu che em ni?" Tunge maw lo ko le?


"Hlauh thawn tur a awm lo," ka ti leh sep sep. A la ngawi ngal a, a thawk lah ala rang sauh bawk si.


"U Hruai, ka ti hläu tak tak che em ni?" A chil a lem ri khawlh a.

Inla hranga mitmeng pawisak nei lo lutuk, sen rûma min en chuan, ka biang tawn tawnah na deuh tak hian a chelh a, "i tel ve tawhnaah chuan ka hläu ṭhin..." Harsat hmel taka ti chhuakin, "nasa takin," a ti zui leh hriah bawk.

Ka ṭahna avanga mittui hnawm chapa nuih var varin, a biang, thinrimna avanga sen ṭul leh mar tak mai, thim khup chu ka ban dâ dâ a.


Dimte a chulin, "ka ṭha a läwm, minti na thei hleinem," ka nui lui bawk.


"Ka Pa in engthu nge a hrilh che?" A lo ti bul nghut.


Meng lui deuh awkin, ka thle heu a, "i hria amaw?" Ka ti chhuak haw bawk a.


Lo rum nghutin, "engthu nge a sawi?" A ti leh chher chher.

"Engmah a sawi lo, kan inneih tur thu ka lo hrilh zawk a nih kha." A awih lo ngang mai, min en rûn rûn a, mit khap miah lo va ka en let takah chuan thaw hawlh hian, alamah bawk min pawt lehin miah kuah leh deuh vang vang.


Nui ta sen sen chuan a hnungzanga beng thak thakin, "pawisa min peka kalsan tur che a min hrilh i ring em ni?" Ka nui khek khek chu a lo rum nghut a.


Inla hrang lehin , "Lalrinfela kha a rawn kal hnai leh a nih chuan ka that duh ngei ang," min bia pawh a ang lo, a mahin thu a tiam niin alang mah zawk.


Ka lo ṭah nuih hak a, "a ngam tawh hauh lo ang," ka ti sep chu min rawn en nghal rûn. Mittui tling pama nuih var varin ka dingdi hip ak ak a, a biangah ka fawp zauh chu a lo thaw hawlh, a meng awk bawk.


Mahse, reiloah rawn nui ta suk chuan, "min fawh dâwn chuan hmuiah tur a nia," tih leh ka kawngah chelhin min nam awk a, dingdi hlip awk chuan min fawp nghal tawn tawn.


Nui chung chuan ka fawp let ve vat bawk a, ka natna leh nichina min ṭhawnna te kha fawhbo a tum emaw tih mai tur a ni.


"Awii...." Ka inla hrang rang lutuk, U Hruaia erawh a lo thaw hawk thung.


"Kawngkhar kik ta che," a ti hul huk bawk.


Laizeta a bula ding ṭha chuan, "Zodin..." Ka ti sep.


Nui vur vura hmui ti sawia a U en chho vah chungin, "khar hek lo che u," tih leh, "mothuam chu ka rawn keng a ha chhin rawh aw," a ti zat.

Thle haw in, "ka rawn pan...."


"Chhuah a ṭul lo, in ah a rawn kal thei," U Hruaia'n a lo ti sup a, ka lam rawn hawiin, "hnaah ka let a ṭul a, mamawh i neih chuan Vula hrilh ang che, pawnah sawn a awm ang," a ti sup sup. Min hrilh pawh a ang ṭhin lo, thu minpe a ang mah ṭhin zawk.



Hnial ta lo chuan ka bu nghat a, "min ngaihtuah suh," ka ti let sap. Ka chala fawpin, "Zodin, thawmhnaw pangai thlanpui ang che," tih leh a pensawn nghal pawk pawk. A taksa lian ṭha nelh nulh mai a inlak hran takah chuan ka ruak hawk a, ka taksa peng pakhat a kal telpui emaw tih mai tur a ni. Ka vqwt nghal sawng sawng thei.


"Naktuk aṭangin i pasal a ni tawn dawn," Zodini chu ka en ve vat a, ka nui ta ngawt bawk. Ka lo thlir nasa deuh a ni.


Thawmhnaw an rawn nawr luh chu phawk fea enin, "heng zawng zawng hi maw?" Ka ti chhuak thlawt. Hak chhinna ringawtah pawh kan chau hnawk ang chu, a rapthlak êm mai.


Mo kawr chauh ni lo, pheikhawk chi hrang hrang anrawn nawr luh chu kan inchhung a khat ngal dul lehnghal.


"In ṭan tawh em ni?" Lalnunpuii leh Lalrinnungi chu ka en vat.

"Inhman em ni?"

"Kan rawn thleng chiaha mothuam kan enpui danw che. Awiiii lalhruaitluanga hian a duat sual dâwn khawp che alawm," Lalnunpuii'n uar fahranin ka thuam tur en chuan a ti chhuak a, kan lo nui hak.


"Thaibawih zethup thiam tur maw le ka U hi chu," Zodini lahin a lo tuihnin zat zel bawk a.


Ka rinlawk ang chiah ka hak chhinnaah ka lu a hai zo vin ka luak a chhuak hnur thei tak tak.


"Hei bâk chu min inthlak tir tawh suh u," ka ti thlawt. An la nui ang hawk hawk zui. BO hniamin ka tlu mai dâwn!

"Kha kha a nalh kha," an lo bu tliar tliar.


"Ka U..." Zodini'n a tih rualin call chu a pick a.

"Lawk, a kawr hi ka entir ang che," ka lamah camera chu a rawn lek a, "eng nge a an, a nalh em?" A zawh phur nen, U Hruaia chu a reh vung vung.

A ṭawng dâwn tawh lo emaw tih hnuah, "a dar a lang tam lutuk, thlak rawh u..." Bul zet hian a rawn ti hluk a.


Lalnunpuii'n Zodini phone chu phih thla deuh sawkin, "i hak tur pawh a ni lo va, hmeichhe tána ni ropui ber turah inbuatsaihna hun darkar tlemte chauh i pek hnuah a kawr hak turah lehzel thû nei suh. Thikthu chhe over lutuk. Nangmah hrim hrim hi i over," tih leh a off daih lehnghal.



Zodini leh Rinrini an lo ding dir tlawk tlawk a, keipawh ka nui ve khek khek tho, a lungawi lo nasa ang chu aw!!!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)