VOHBIK Chapter 11:

Episode kal lai dah luhna

Moderator: writers

Euricka
Posts: 183
Joined: July 23rd, 2022, 12:23 am

VOHBIK Chapter 11:

Unread post by Euricka » August 11th, 2022, 10:26 pm

VOHBIK


Chapter 11:



Nang, ram huai tenawm ka nun aṭang hian in thiar fihlim rawh ti chungin bathroom chhuah san tum in ka tho chhuak a.



Ti khawp a naa min siam tu hi ramhuai bak ani lovang,Nu Marini pawh ani tawp lo bawk ang.



Chhuat alo nal bawk si,kawngka zâwn takah chuan mawng sawh dawt in ka tawlh thlu a.Harsa takin ka in beng kâng a,ka hma zâwnah Nu Marini alo ṭhu reng tawh.



Hlauhna ka nei tawh lo,thinrimna leh natna in min tlâkbuak a.Hlau tak chunga ka hmachhawn leh anih chuan kei hi Lalrinsangi ka ni tawh lovang.


Hmai chhan ah kan in en reng a,tui tla tih hriat takin a hmui te chu a duk vek a,a mit hnuai zawng2 nen.A vun a dang bal a,a taksa lang thei lai chu a duk thluah2 bawk.



Ka hmaah tak chuan min en reng chungin chhuak em2 in a rawn ṭap leh ta mai."Dawih zêp nu,i ṭah khan eng kawng ro mah a su lo"ka ti fiak ṭhat a.



A bang nghal hmak a.Rum em2 in min melh leh.Min hneh dâwn in a in hre tawh lo aniang,a tlawm zâwkah ṭâng in,khawngaih min dil leh ta a.



"Sangte khawngaih takin ka pasal sual na hi min hai lan sak hram rawh,ka fa te tan a ka tih theih awmchhun ani tawh"a tih chuan ka khawngaih ve deuh a.


"Ka dam anga ka chhuah theih hunah ka pui dâwn che ania"ka tih chuan a lungawi ve ta nge,nui var2 chungin min kal san a.


Bathroom aṭang ka chhuak fel chiah a,ka nu a rawn lang hlawl."Ka zawng nasa lutuk che"ti chungin min kuah ringawt a.Ka lo hamhaih hman hle thung.


Ka khum lamah min kuah phei a,ka ke kawr huh te chu min thlâk pui a.Chhuah ka duh thu ka sawi chuan a rem ti lo nasa mai.


Tiang hawlin ka kal ve thei sawlh2 tawh a,in lam a in enkawl ka thlan zawk miau avangin naktuka chhuak tûrin Doctor pawh kan bia a.Ka duh thlanna a nih miau avâng chuan an lo rem ti ve mai bawk.Ṭingṭangi leh ka nu ngaihdan erawh ani chiah lo thung.



Ka nu bulah chuan ka chhuah veleh Pastor min pan pui tûrin ka sâwm a.Chu erawh a lawm zawng tak alo ni aniang,î hê lovin alo aw ve vat mai.


Naktuk ka chhuah ni anih dawn vang nge ka zan mu pawh ka helhhawlh aniang.Ka nu,tui tak a a mut pawh chuan keichu mut chhuak lam ai chuan ka harh telh2 emaw tih mai turin ka awm a.


Dar 1 a pelh hnu chuan msg a rawn lut hlawl.No.hriat ngai loh aṭang niin,"Doma,ka no.lo save rawh aw"tih hi alo ni a.Ka khi sak a,"ka save e"tiin ka chhang ve mai.


"Iva meng rei ve"tiin a rawn thawn leh a."Nia"tih zawngin kalo chhang.


"I chhuah theih hunah min lo hrilh la,kalo lam ang che"a rawn ti leh a.Mak ka ti ve deuh,a hmaa a nel awm loh nen,tûnah chuan khang zawng2 kha a bo vek tawh.Mipa nelawm leh biak nuam takah a in let daih.



Naktuka ka chhuah thei thu ka hrilh chuan a rawn phur khawp mai.Min rawn lam hman tur thu sawiin kan in mangṭha a.


Mut ka tum ve ṭan a,phone dah ka tum lai takin,Fakzuheha call a rawn lut.Tun ang zan rei tawhah lehnghal,a rui leh ani lo maw.



La duh lovin dah mai ka tum a,mahse a rik ngun tak em avâng chuan ka la ta hram a.



"Kha Police inla hmelṭha smart kha i chhawrthla ami?"a rawn ti thâwr."Mu rawh i rui anih kha"tiin ka lo chhang ringawt.


"Siali, Lalrinsang,naupan têt aṭanga i ṭhian duh tak Fakzuala ka nih hi.Engmah min hrilh dawn lo maw" a rawn ti leh chher2 mai.A rui chiang anih hi.



"Nilo,i lawm tawh em?"ka ti ta ringawt a."Hmingsang kan lawm dâwn em?"ala ti.An awm dun leh animaw.A reh vang2 a,"Kan la lawm chiah lo,Kan ṭhiannu hian
a tar hma ngei hian keini ringawt lo hi kawppui nei ve se kan ti"rawn ti tu chu Hmingsanga ani.A ruih ngai awm ka hre silova,engnge thleng ta hi.


"Hmingsang,ngatinge i ruih ve rikngawt,i inhmeh lo lutuk"ka ti chang fak a."Sorry"tih chauh in min chhang.


"Kalo call nachhan che chu i first love nimahila,pasal i neih loh ka hlau a.Kawppui tur i hmuh zawh loh chuan a free in ka in volunteer thei"Fakzuheha sawi ngei ani.A zak lo ania,ka first love ani tawp silo.




"Ka first love i nilo,i in dah sang mah2"tiin kalo chhang ve zel a."Oh ani leh lo,ka first love ini"a rawn ti leh a,Hmingsanga'n "keipawh"a rawn ti veleh.Chek hlakin,"In nawi duh lutuk,mu ru"tiin phone ka dah san tawp.




Khaw vâr dâwnah ka mu ve thei chauh a.
Ka harh chuan ka nu'n ka bungrua alo pack fel mawlh2 tawh.



In ni ve ṭhin tho em,hospital aṭanga chhuah dawn hian in dam nghal vek in in2 hre ve ṭhin em?Keipawh tukin chu ka tho dam phian a,hetiang renga ka tho dam dâwn anih chuan ka na te pawh an dam fel vat turah ka ngai.


Zing chaw kan ei laiin,Doma call ka dawng a.Chaw eikhamah tih tur awm ang2 te tih fel zawh hnua kan chhuah mai tawh tur thu ka hrilh nghal zung2 bawk.



"Ka lokal nghal dawn ania"tiin call kan ti tawp a."Be ṭha ang che"ka nu'n a lo ti vat a,ka nui ringawt.Anu case a ka puih vanga a lawmthu sawina kalo pawm sak ve animaia,chu bak engmah kan in kârah a awm lo.



Ngaihzawng nei ngai lo ka ni bik lova.Mahse ka neih lohna a rei ve ta deuh.Higher leh college ka kal lai khan ka nei ve zut ṭhîn a,mahse kan in mil thei lo ṭhîn kha ania.A ṭhen chu ka thil tawn ṭhîn vang hian min hlauh phah ta daih te pawh an awm nawk.



Ka nihna zawng2 nena min pawm thei tu ka hmu ve te anih ngai chuan,chu mi ngei chu ka nei anga,ka chhuah hauh lovang.



Chaw kan ei kham a,ka hmai te phihin ka in tuai fai ve deuh a.Ka khum lam ka pan leh chuan Doma pawh alo thleng der tawh.

Ṭingṭangi pawh alo awm reng tawha,min lo nuih var2 mai.Doma chu a melh leh zauh a,ka lam rawn hawi lehin min a mit a siai suk,eng a hria chu nimaw!



Doma chuan min hmuh veleh a ṭhutna aṭang a tho zawk a,sipai ang maia khawngin a ding a,min en reng bawk.Ka nu chuan min mit mei zeuh a,Doma en pah chuan,"kan va insil rei deuh ve tiraw"nui sangin a ti a.Ka insil rei pawh kalo hre silova,ka in uluk an tihna ani thei mai angem le.


Ka towel hman chu thlep felin ka thawmhnaw bawmah chuan ka khung ṭha nghal a.


Doma lam ka hawi chu,a din ngaiin khawng takin alo la ding reng.Ka nu nen in en in kan nui chhuak hawk a."Vala,sipai kan nilo ania"ka nu'n a tih takah chuan a in thlahdul ve ta deuh a.


Kan bungrua chu min khai chhuah sak a.Ka nu nen zui ve in,a seat hnungah chuan kan ṭhu dun a.A motor chhûng pawh a fai viau e,mi in cheng vawng ve tak anih dawn hi.

Ṭingṭangi chuan duty lai anih thu leh,a ban huna alo kal tûr thu sawiin min luh san a.



Doma pawh driver seat ah a rawn ṭhu lût a.Steering a vuan a,kan tlân chhuak tawh dâwn emaw ka tih laiin,a kekawr Ipte a zen leh ruk2 tawh.Lollipop tui chi bawk a rawn la chhuak leh a,kan pathum daih tur a la chhuak a.Ka nu nena kan ei tur pawh a kawr thleh sa thlapin min pe leh.Ka nu pawhin a zia chu mak ati viau ni tur ani.A en duh ngei mai.


Lollipop hmuam chung chuan a tlân chhuak a."Khawi lamah nge?"a rawn ti zauh a,ka nu chuan kan awmna alo hrilh nghal vat.



Kawng tluanin ka nu ṭawng kan ngai thlaa,Doma pawh hrehawm ati lo aniang,a khi ve suk2 mai.



Kan veng kawn kan thleng a,chawhmeh tlem a zawng kan lei kawi a.Kan tlân chhuak leh tûr chiah chu kan hma zâwnah hmeichhe pakhat mangang taka rawn tlân ka hmu a."Ding rawh"ka ti ṭhat a Doma leh ka nu chuan mak ti takin min en nghal hû bawk.



Ka hmeichhe hmuh chu motor hmaah tak ding in,mittui tla chungin min en char2.A hmui a thi kai nuai chu a hru zeuh a,"min ṭanpui rawh"chiang taka a tih hnu ah a ral riai2.



"Bawihte"ka nu aw ka hriat chuan,kan hma zâwn chu kâwk in,"hmeichhe rawn tlân kha in hmu lo ami?"ka ti ringawt a,motor hma lam an en a engmah an hmu lo aniang an in en leh ringawt ṭhîn.Ni e,an hmu lovang,ka hmuh lai ngeiin a ral anih kha.



Kan hnunga motor in horn a rawn pek takah chuan,Doma chuan "kan tlan thei em?"rawn tiin,lu kalo bûk khum a.Kan in lam pan chuan kan tlan chhuak leh ta a.


Duhawma pov:


Hnaih ka tum mek Lalrinsangi hi hnaih ngam chi ani chiah angem?rei lo tê ka zui pawhin thil mak kan ṭawng nghal ringawta.



A lan dan ah chuan tuna a na te pawh hi,heng thil mak tam tak a tawh vanga thlêngah ka ngai deuh.



Mihring hi vanduai tur hrim2 a piang hi kan awm angem le?Ṭhenkhat hi chu kan seilenna in a zir loh vang te pawh ani anga,ṭhenkhat erawh mahni tuh rah seng in,vanduaina kan tawng baw mai ṭhin niin ka hria.



Lalrinsangi hi chu a pian ken ve reng anih hmel a.Heng thil a tawnna hi a rei tawh angem le?Keimahah hian danglam rukna a nei tlat in ka hre ṭhîn a.Heng a thil tawn te vang hi nge ni anga thildang vang zawk tih erawh zawn chhuah ka duh tak zet.



Han hnaih takah chuan mi pangngai tak a ni leh lawi si a.Hmeichhe chak tak anga lang si hi,ngaihsak ngawih2 ngai ani tih ka hmu thiam chho ve a.Ka bulah hian a thla a muang angem?Nge buaina thlen tu ka ni zawk dâwn tih erawh ka hre hauh lo.Mahse ka theih chhung chu amah hlat loh a awm hram ka duh.


An in kan thleng a,an nufa chauha awm siin an inchhung chu mipa awm lohna tih a hriat hauh lo.



Ka phone a ri sek a,nimina kan mi man drugs dealers zing ami kha chhui chian deuh angai dâwn anih hmel.


Engemaw tawng tûra in hriat tlatna ka neih hian min tibuaiin vawiin pawh ka duh angin hun ka hmang thei leh dawn lo anih hi.



Rinsangi nu chuan thingpui te min siam sak a.Chaw ei tura min sawmna erawh lo hnar in,ka phone lo ri ve sek bawk nen,hna lamah let leh a hun tawha ka hriat avangin ka chhuah san a.



Station lam pan a ka tlân mek lai chuan ka phone bawk chu a rawn ri leh a.No.hriat ngai loh hnên aṭang ani lehnghal.


Phone chu ka la a,lehlam ami chuan,"min la hrechiang lo niin a lang,ka hnuaia thawk ka nau te i man kha i chhuah nghal lo anih chuan I chungah hian engnge ka tih theih ilo en dâwn ania"a rawn tih chuan ka Motor khalh lai chu ka ti ding a.



Chhang let ve in,"ka hna chu thil tisual tu te man a,dân anga diktaka chet ani.Nangni tih buai theih ka ni lo.Engnge i tih theiha,keiin engnge ka tih theih chu kan en dâwn ania"tiin phone ka dah a.



Station ka thleng a,ka pa te trial neih alo hun reng a.Court lam panin ka in khalh chhuak leh nghal.


Ka u Mala leh a ṭhian te chu,pawngsual leh tualthah case awrh tîr niin,IPC section 302 leh section 34 chuan damchhunga lung in tâng tûr a ro rel sak an ni.


Ka pa erawh attempt to murder case niin,IPC section 307 hmangin,kum 10 chhûng tang tura tih ani thung.



Court rorelna chu hnial chi rual ani silova.Thil tisual tu chuan an tawrh ngei angai dâwn ta anih hi.


In lam phone in,ka pa leh ka u te chanchin ka hrilh a.Nautei chu ṭap nghalin,a tuar thiam lo ve hle.


Ka haw hma in,ka nu thlanah ka kawi a.A pangpar ngainat em2 daisy ka ken sak bawk.Rei ngial ka awm hnu ah,ka nu thlamuang takin chawl tawh ang che tiin in lam ka pan san a.


Thlanmual aṭanga ka chhuah aṭang khan ka hnunga motor rawn tlân hian min la zui char2.Ding duh lovin ka tlân lui zêl a,ka hmaah Truck min sut tum ni awm taka rawn tlân a awm bawk a.Kawng a te bawk si,tlân chhuahna tur a awm tawh lova ka hriat avang chuan ka ding ta ringawt.


Truck aṭang chuan mi Panga an chhuk a,ka hnung lam motor aṭangin mi pali an rawn chhuak bawk.Hmanhmawh takin Inspector Ngura ka call a,a lak rual chuan ka awmna hrilh nghal in back up ka ngaih thu ka hrilh zung2 a.An rawn kal nghal tur thu a sawi zawh chuan ka dah a.


Khawilam misual rual nge maw an nih teh hrep ni.Vawiin hian man loh in ka chhuah dawn hauh lo.


Motor aṭang ka chhuk a,an hotu ve deuh ber chu ka hmaah rawn ding in,ka pumah a pet nghal zawt a.Ka samah rawn ṭhâm in,"kan pu ilo cho ngam amaw"tiin ka bekah chuan min hnek leh a.


Ka thisen a lum ṭan."Man loh in ka chhuah dawn reng2 lo che u"ti chungin ka hmaa ding chu ka tlawh thlu nghal a,min rawn hnaih hmasa apiang ka lo bei zêl a.Ka tukhum a rawn ri chawrh a,ka lu rawn hai zual in,chet lak leh ka tum chu,ka tukhum ah bawk a rawn ri leh a,ka khaw hmuh a thim ta riai2 mai.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)