THURÛK_99 Chapter #26 By Floria Laldansangi

Episode kal lai dah luhna

Moderator: writers

Floria
Posts: 522
Joined: August 28th, 2017, 12:07 pm

THURÛK_99 Chapter #26 By Floria Laldansangi

Unread post by Floria » August 17th, 2022, 9:20 pm

THURÛK_99

BY

Floria Laldansangi


Chapter < 26 >

<><><>~><>


"Inṭha em?"

"Ka nupui hi a kut ṭhui a ngai ang," U Hruaia'n min kuahna aṭanga inla hrang chuan a ti a, a aw pawh a la chang ṭha viau mai. Kei aiin a hliamna daih zawk si a. Keia hliamte chu ka kiu tlem a pilh hlek chauh a nia.


"Ṭhui êm chu a ngai lo ang, a kiu a pilh deuh a nih kha. Damdawi in ah min rawn zui rawh u," Nurse pakhat hian a rawn ti zung zung a. A nuih a zat ruk hmel viau lehnghal, ṭhui êm a ngaih loh zia a hmu ve reng sia.


"I kal thei em?" Nurse thusawi ngai pawimawh lo zet hian a rawn ti leh sup, a hma aiin a aw hriat leh lo dawnsawn tlemin a nuam ta deuh.


Damdawi in kan pan chho a, "in ṭha em?" Rinfela kan tawk chho hlawl.


Keimah zawkin melh rawm rawmin, chhang duh lovin ka pên chak sauh va.


U Hruaia nena kan hliam min enkawl sak lai pawhin Rinfela chuan mi lo en rûn a.

"Rinfel, kan thih i beisei em ni?" Ka ti ta fak.

"Engvangin nge maw ka beisei ngawt ang ni?" Ti nung nung chuan Cindy-i a bulah a rawn ding ve chu a en zui a, "accident a awm antia, nangmah ni em ni?" Ka chhang lo. Ka en ngar ngar chu mak a ti nge nuam lo a ti zawk ni, "in na lova a lawmawmah ngai ang, i ward ah kan phei dâwn em ni?" Tiin, Rinfela chu a chelh zui zat.


A läwm tak tak phei chu ka ring miah lo, min rawn su turin an tir lo ang tih tunge sawi thei.


An kalsawn dâwn pawha Lalrinfela min enna, a mit aṭanga min ngaihtuahna te chu hmu lo lah ka ni hek law.

Mahse, rin tur a ni em tih pawh ka hrethiam lo mai pawh ni lo vin ka ring ngam lo zawk!

Ka ngaihtuahna chuan ka ṭah a rawn ti chhuak nghal et et. Ka lo ngai ṭha thei lutuk te chu â ka inti hluah hluah bawk a, ka bula lungawi lo taka ka pasal taksa lian zet ṭhu rûn mai chu ṭah chhuak ṭeu chuan ka melh chho leh ralh ṭhin. Ani erawh lungawi lo nasa tih hriat tak hian a en ngai a en ngur ngur thung. Nurse te pawh chuan an hläu ti tihin nia ka hriat hial ni.


Damdawi in aṭanga kan chhuak chu ka bânah chelhin min pên pui pawk pawk, a tlânin ka tlân a ni mah tawh zawk.


"U Hruai.." Min la pawt dawt dawt.


A car bul kan thlen rualin, "lut tawh.." Kawngkhar a hawng zui rawk a. Hnial ngam pawh a ni lo, ka lut zui ve ta vat. Rawn ṭhu lutin, hmalam a en nghal ngur chu tîm deuh taka ṭhut hnaih surhin, "U Hruai..." A bânah chelh chuan ka sawi dat.


A lo rum nghut a, "USB kha minpe rawh," a aw chu a ring lo nâ chang tak a ni. Ka meng phar nghal awk mai.

"I hria..." Mitmeng thîp dur khup maia min rawn en chu ka lo ip chawih thei. Thaw nghal dep depin chil ka lem khalh a.


"In..in ah ka dah," ka ti bah niah chu a thaw zui hrawih.

A hmai tuai puatin, "kha thil avang khan ka chân thei che tih i hria em Malsawmkim?" A aw chhuak tin mai chu hlauhna leh thinrimna in a khat a, a hriam hrak bawk.


Ka hmingpuma min koh vang nge ni a, a aw chang rût vang? Nge ni, ka nunna ka chân theih thu sawi lo va, min chân theih thu a sawi leh, a hlauhna lang chhuak vang zawk ka hre lo, ka mittui a rawn hnam ṭiam ṭiam a, mit khap fak fakin ka chil ka lem leh khalh.


Ṭah chhuak ṭeu chung chuan, "ka tihpalh," ka ti chhuak sep. Tuna ka hriat chhuah tak chu ka pasal bulah hian, ka no in ka ṭahbelh em em zel a ni tih hi a ni.


Thaw ta hawlh chuan, "lo kal teh," ti supin alamah min pawt hnai a, a awma min kuah bei chial chuan duat takin min chul zui ta hliau hliau, a taksa ṭang ruh ṭul mai inthlah dul riai riai chu chiang takin ka hre thei bawk.


"Ka hlauh lai chuan min vin tawh suh," ka ti chhuak leh ṭiak chu a lo nui nghawr ta dawt a, ka chhipa fawp vang vangin, "USB chu khawnge i dah?" A ti leh sup. In ah ka dah ka ti reng sia. Min ring lo em maw ni?


Inla hrang hlekin ka melh chho ralh a, "in ah ka dah tak tak alawm," min ring lo ang a ka ngai chu ka läwm vak lo, a lo thaw ham ham, Vula a rawn lut ve chiah bawk nen Vula a en zui rûn a, "police kutah ka dah," Vula'n a tih chuan a mitko veilam hi a san ak. Driver min rawn su ṭhelhtu kha a ni ka ring.


"A rui em ni?" Ka lo ti vat a.


Min enin U Hruaia en leh chuan, "umm.." Tih chiahin min chhang, ka ring miah lo bawk.

Eng emaw a sawi beisei deuh hian U Hruaia chu ka melh chho va, "in ah..." A ti ta sup chu, "hna kan thawh a ngai alawm," ka lo ti vat. Ka zawt zui bik ta lem lo. Zawt pawh ni ila a sawi dâwn lo tih ka chiang.


"I hliam..."

"A na lo, Vula station ah.." Thupe deuh hian ka ti chhuak zat a, ka inla boss ta vel lutuk chu a nuih a za a ni ang, nui ta huk chuan, "a sawi ang chuan," ti dûtin min kuah leh nghal hlu hlu, ka nui ve sen sen tho.


"U Hruai..." Kan tlân chhuah hnu fe ah ka ti sep a. A khabe hnuai aṭanga melh chho leh kiau vin, " ka U case-ah hian tutu te nge inhnam hnawih i hria em?" Ka mitah a rawn en chhuk rûn.

"Engvanga chutianga ngaihtuah chu nge inih?" Min lo ti let khauh. Ngaihtuah ve bawk ang chu maw le.


"Mi â ka nih loh hi. File password pawh ka risk dik thei tih i hre lo em ni?" Ka lo ti let hlar. Ka inlak fin hmel em em lehnghal.


A nui a, ka sam ka benga zeh pahin, "fiahna a awm loh chuan engmah a sawi theih loh alawm. Mahse, tun a chinah engthil mah i thu in ti tawh suh ang che. Chân ve che ka duh lo," min hril pawh a ni lo thu minpe leh tawh zawk. Tin, a aw tawp lama min chân a hlauh zia bawk chu a lang chiang leh viau ṭhin.



"I hre reng sia, hre lo angin i awm a?" Keimah zawk chuan ka ti hlak.


A hnar a lo tum dut a, ka chalah nalotea tuk kawrhin, "i thluak tereuhteah hian engthil nge awm ka hre duh alawm," a lo ti awlsam et lehnghal. Minbum tihna a nih chu!



"Min bum i va thiam ve," tih leh a awmah chuan ka bei ṭha leh ang sat sat a. Ka nui ru vur vur tho. Min lo zui ru lo se chuan tihpalh thil thuin ka thi daih tawh ang chu!


Mikhap kar leka thihna in min rawn nang chingta emaw tih hnuah, ka pasalin duat taka min kuahna âng chhunga bei hle hle chuan kawng pawh duhai a tawi ta mah mah emaw tih mai tur a ni.


Station kan thlen chuan ka la inla hrang mai lo, "Myla..." Ka lo thaw ham ham. Ka awm hrang châk viau lo a sin maw le.


Ka awmdan chu a hrethiam lehnghal vat tih hriat tak hian a nui nghawr dat a, "hetia i awm reng chuan ka hawpui mai ang che," a nuih a zat hmel takzet.


Inla hrang ve ta hrâmin ka hmui ka tih pawrh khum vak a, a lo nui hawk zui. A nui ri hian mi a fan hneh thei teh e. Ka taksa hi a nghawr ni maiin ka hre ṭhin.


"Lo va lut hmasa rawh," a ti leh tawh, ka mit ka ti zim lui ve vak chu nui suk a ka hnara a kut ṭanga rawn tuk zauhin, "USB i dahna chu sawi la," a ti leh zat.

"Ka pajama-ah, ka lut dawn," ka inhera, kawngka chelh zet tawh chuan hawi let lehin, "ka U case-ah engpawh hriat i neih chuan min hrilh ve ang che. Zep nei vaih teh, ka ṭhen che ni mai," ka ti vei hlak chu a lo rûm ri hrawih mai, "a thleng ngai dâwn lo," bul zet hian a ti hluk bawk a.

Inṭhen sawi chu a duh lo takzet tih a lang reng.


"Zep nei tawh suh tihna a nih kha," tih leh ka mitah a rawn en rûn chu car kawngka hawngin ka tlân chhuak nghal daih. Ka ṭawngkam hman a duh lo hmel pe dur kha ka hmu duh bik teuh lo!
.
.
.
"Ṭp...." Ka ti zet tawh, zawh chi ni a ka hriat loh avangin, "a ngai leh lo," tiin ka phone chu ka enzui leh vang vang.


Pa Chawia number chu ka call dâwn ṭhin a, eng nge ka sawi ang a, engtin nge ka koh ang tih ka ngaihtuah rauh rauh.


Min lo chhâwn dan tur chu eng pawh nise, va biak hmasak erawh ka tih tura ka dah avangin ka call ta nge nge a. Rei pawh a ring lo, "hello," a rawn ti dût a.


"Hello, Pa Chawi..." Ni theiin ka hre leh chiah lo, "Pa, Sawmtei ka...." A ri nghal tut tut. Phawk fe hian phone chu ka en nghal haw. Reilote te chu min biak ve ka ring a nia. 'A va patling hna lo' ka ti dâwn viau a, an fapa nupui atana an pawm loh kha ka ni miau si a. Sawisel theihna dan ka nei tlat lo.

"Chief,.inleng i neih saw?"

"Huh...." Ka ngaihtuahna ka lo kawm rei deuh nge ni, ka hawi chhuak heu mai. autopsy room kawngkhar bula Pa Roa lo ding nui ṭhû erawhin min ṭhawng viau thung.


"Pa Ro...." Ka ṭhutna aṭang ka ding zui at.

"Ka tibuai che u em?" A rawn lut a. Mit khap fak fak hian ka lo en ran.

"Buai lo ve," Ṭpa zawkin a lo chhang vat. Kei erawh tlemin ka la danglam deuh. Ka mitthlaah nizana a thiltih ka chhiar te kha a rawn lang ang zut zut bawk a.

"Eng nge i rawn tih dawn?"

"Lo ṭhu rawh," Ṭpa'n chair a pe a. Kei pawh chu muangchangin ka ṭhu thla ve bawk.


"Inhmuh a khat êm a, remchangah ka rawn tlawh kawi che. Eng nge i an? Hmanzana i Nu Rpi chetdan ka lo hria a, i ṭha maw?" A aw chhuakah chuan min ngaihtuah hmelin a inthlahrun hmel takzet. A ti der nge ni a, a ti tak tak zawk?


"Hriat sual a nei a nih kha," ka lo ti sep. A hmel chu uluk deuhin ka en leh ṭhin, tualthat tur khawpa a nunrawn ka la ring lo fan. Ka U case-ah hian inrawlh lo hrâm rawh se. Ni e, chu chu ka beisei ruk a la ni reng a ni.


"Kan Lalrinfela hi alawm tiraw?" A nui huk huk. Za lo deuh hian ka lo nui ve sak sak ringawt a.



"Thildangah hmuh che ka duh vang deuh bawk a nia," a tih leh chuan ka lo bu nghat.


"Hriatzeli aṭang thil hmuh i nei em?" Ka kut ka lo hum nghet salh, ka thawk ka chelh vat bawk. Ka awmdan inthlak chu a hriat ka hläu viau bawk nen, thawk ngaihna ka hre lo mai dawn.


Nui vur vurin, "a pasal hnen aṭanga a dawn, kan hna lama thil pawimawh tak dahkhawmna chip a kawl alawm maw le," a tih nuih leh vur vur chuan ka kawchhung a khawng nghal titih.


Thinphu dep depin ka lu chu muangchang hian ka ti che a.


Ka kâ ka âng dâwn tihah, "a thawmhnaw ho chu CID lamin an kawl vek alawm. A taksa lah kha Autopsies a ni ta bawk si lo va," Ṭpa'n a rawn ti vat. A rukin ka lo thaw ham ham mai. Ṭawng ila chuan ka dang awkah ka in sawi awk ngeiin ka ring.

A bu ta nghat nghat a, "a zia lo khawp mai. Hriat leh hmuh in lo neih takin tih thu hlaah a nia. Sawmte, ka kalsan ang che u," tih leh a tho zui a, "karleh lam chu i Nu Rpi piancham te a ni si a, chaw rawn ei phei ula, Hruaia te ho nen," a tih zawm leh chuan sak taka lo nui luiin, "naupang ho rawn tel tir kan tum dawn nia," ka ti chhuak ta hrâm a.


"Ni e, ka kalsan ang che u," a inher zui a, ding leh dutin, ka lam rawn hawia nui sung hian, "mahni ta lo kawl chu buaina a keng te ṭhin a nia Sawmte," a mitmeng inthlak chu chiang takin ka hmu. Min vauna em ni? "Ka kal ang e," tiin a inher a, a chhuah rualin ka thaw chhuak kawk. Ṭpa en chuan za vak lo hian ka ṭhen leh sak ringawt a. A taksa ka zai hawng a ni tih chu a hrechiang hle si a.

"Ruati..." Ka phone pickup pawh chu ka lungphu hi la la phu dep dep mai.

"U Sawmte, ka khawsik hi a reh thei lo va, naupang school i lam mai thei ang em le?" A aw ah pawh a nawm loh zia a hriat theih.


"Thei e, dár 3 a ni lo'm ni?" Ka ti vat.


"Aw ni e, ka läwm lutuk aw," a mah zawk chuan tiin a dah zui a. Damdawi te a ei ang chu maw.
.
.
.
.
Naupang school lam tura ka kal dawn pawhin U Hruaia a rawn la let miau si lo va, ka hawsan mai a niang chu.

Ka fate school gate pawnah naupang school bâng nu leh Pa kan awm ṭhap tawh. Naupang ṭhenkhat rawn chhuak tawh siin ka fate class rawn la chhuak lo chu ka lo bih leh duk duk ṭhin.

"Emma-i te nu i ni em?" Ka hawi a.


"Aw ni e."


"An class an hnufual dawn a nih hmel. Keipawh ka hre ve chiah a," a rawn nui sen sen.


"Eng nge an tih dawn?"


"December thlaa school function naa an hla sak tur an zirtir ṭan dâwn a ni âwm e. An naunawi si a, muangchanga zirtir chhoh an duh a ni ang," a tih leh duah chuan ka bu ta nghat. Shanel-i rawn chhuak ka hmu zui nen lawmthu sawiin ka pan ve ta vat a.


"Shanel..." Ka um dat dat. A pên chak tulh tulh hnuah a tlân titih chu tlân chak thutin ka pawt ding dawt a, "inbia ang.."


"Ka be peih lo che," a lo ti vak, midang nau hruai ve ho an rawn hawi zui nghal hrek hrek mai.



"Mahse, ka be duh si che alawm."

Min en rûn rûnin, "ka Pa ru tu inih hi," a ti leh nghek chu ka nui chhuak ta tawp a. Pangai tak emaw naupang a kum rual ang leka biak chi a ni lo niin ka hre ta a. Ka biakdan ki thlakin, "i duh leh ru let leh la ti nia. I ngam tawp nang," ka hawi vah.


"Misualnu..." Min nam dawt, a tlân zui chu um lehin, "Coffee in dun ang," tih leh ka pawt lêng dawr dawr.

"Min thlah rawh. Min chhan ru, min ruk a tum," a au a.


"Awwwww...chhan duh suh u, a nu ka nia..." Nui chunga au ve ta ringawt chuan, "ka nu a ni lo," a ti leh tuar tuar, ngai pawimawh duh lovin cafe awm hmasaberah chuan ka pawt lut a.


Ka thlah ruala tlânsawn leh a tum chu a hmaah ka lo ding zat. Kan in lenhleih nasa bawk si, "awmsawn rawh..." Kum 11 hmeichhe naupang te chuan min namsawn bik teuh lo mai.

"I theih leh chhuak la, ka dinna aṭanga khera tlân chhuah i tum," ka nui reng. Midang ṭhu ve ho chuan nutling chutianga ka awm ta chu min en duh ngang mai.


"Min lo zui tawh suh i hria em ruk hmangnu," a pensawn a, a kalna a piangah ka lo ding zel chu, "awmsawn rawh..." a khek ring teh e.




"I au vak vak chuan security anrawn kal mai ang. Ṭhu rawh, kan inbe rei lo ang," chair chu ka pawh chhuahsak a.


"Ṭhu rawh..." Min la melh ram ram, a ṭhu dâwn ta lo emaw tih hnuah a bag chu la thla in a sirah a dah a, a ṭhu ve ta nghat. Ka lo nui ru ver ver thung.


A hmaa ṭhu thla ve vat chuan, "eng nge i in duh? Ka fate chuan Strawberry Milkshake an duh a," ka tih zawh rualin, "i fate ka ni ve lo," a lo ti nghal hlar.


Ner lui nawkin, "i pa ka pasal a ni tawh tih i hre lo em ni? Ka fanu chu i nia lawm."

"Ka ni lo, ka ni dâwn chuang lo."


"Duh lo mahla i ni tawh tho tho. Emma-i leh Andrew-a te U."


"Ka ni lo..." A rak leh tawh.


"Rak vak vak zel suh, miin an en duh êm che saw," waiter rawn ding chu en chho vin, "Iced Latte leh strawberry Milkshake, medium," lo ti zatin min en ren runtu Shanel-i chu nuisangin ka en leh a.


"Zawhna ka zawt hmasa ang che. Engvanga min duh lo nge inih?"


"Ka duh lo ve tawp che." A ngawi a, min en ram ramin, "i hmelchhe si," a ti leh nghat, ka nui chhuak hak, "hmelchhia minti hmasaber tu ini. Ṭhenkhat chuan milar emaw minti a sin," ka awih lo ve e ka thusawi chu.

"i dawheh a nih chu a," a lo ti ve leh hlak a.


"A nih min duh ve bawk si loh chuan i Pa nen kan induh si a, i pa hi ka nei zo vek mai dâwn a sin," a mittui a rawn hnai nghal ṭiam ṭiam.


"Hei...hei..hei...ṭap ringawt suh, ka fiamthu a nih kha," ka nui ta khak khak a, "neih vek chi pawh a ni hleinem. Shanel, hmeichhe naupang fing tak ini tih ka hria, i pa i hmangaih hle tih pawh. I hmangaih chuan engvangin nge chance minpek ve loh ang ni. I tán leh i Pa tan," a in hnit ta feih feih lehnghal. Ka fiamthu a sin maw le, a va zia lo tak!


Kan in tur order rawn thleng ve chiah chu a hmaah dah vatin, "in rawh, a tui lutuk," ka ti chu, "ka hre ve reng," ṭah aw ṭiau hian a rawn ti chhuak chu ka lo nui ri leh ringawt, rinai takin a duhawm lehnghal.


"Shanel, i Nu ang chuan ka hmangaih thei lo maithei che a mah se theihtawp min chhuah tir hmasa ve la," thutak zawka tiin ka en kar a.


Mit khap fak faka mittui tlingpamin, "engtin nge ka hriat ang," a rawn ti ta sap.

Ka nui nghal var var, tlemin hma ka sawn tihna a ni.


"Kan bulah rawn awm la, emaw min bia la, i pa pawh bia la," sawi mai tur ka hre tawh lo nia.


Hawisawnin a in tur ka chah chu a in zui a, "min ti duhdah lo ang tih engtin nge ka hriat ang?" A rawn ti leh kauh.


Ka lu ka lo thing vat vat, "ka tiam ang che, a thleng ngai lo ang," ka ngawi deuh vang vang a, "hmeichhe zaidam tak ka nih loh avangin, thil i tihsual chuan ka hau ang che nga, ka vin ang che. Ka vuak chang che a awm bawk ang. Mahse, Shanel, ka fate, ka hrin ngei ngei pawh chutiang chuan a ni ka enkawl ni, a chhanchu puitling hian kan hmangaih loh mihring thuṭha hrilhin, kan hau vin, kan vaw ngai lo. Thuṭha min hrilh a, awmdan tur, tihdan tur min hrilhtu te chu min hmangaihtu te, kan hmakhua ngaitu te anni ṭhin," ka naupanlai ka mitthlaah a rawn lang zut zut.


Ka nu lak aṭangin zilh hauna ka dawng ngai lo va, chutiang bawkin fakna pawh. Ka hriat tamber chu exam-a topper ni tura min hrilhna leh ka result min zawh ṭhinna, ṭhenawm naupang leh, ka classmates keiaia ti ṭha an awm changa min khaikhinna kha a ni.

Ka nu lakah ka vui lek lek dâwna ka inhriatna chu ka duh miah lo. Ka nu dinhmun nen a in ang lo lutuk tlat.


Boruak hip kawkin ka thaw leh hawk a, ka in tur chu in zauhin, "Shanel, min haw tak tak lo tih ka hria," ka nui a.


"Engtin nge i hriat?" A lo ti ve leh, "min huat chhan tur i nei hleinem, i Pa i lak aṭanga ka lakbo i hlauh vang zawk a nih kha. A ni lo em ni?" A ngawi ta rauh rauh. Kei pawhin ka zawt nawn ta bik lo.


Mi hausa tak Nu a nei a, a Pa te lam lah rethei anni hek lo, duh duh nei thei, rangkachak fian pianpui an sawi naupang mah nise, a chhungrilah hian a khaw har a ni tih a mitmu dum fiah kak mai, tle ralah chuan chiang takin ka hmu thei.


A pa nena kan inneih a duh loh chhan lah he naupang mitmeng thük zawka en hian ka hmu fiah tulh tulh mai si a. Ka inthiam lo zawk lek lek bawk.


"Shanel, i Pa hi i lak aṭangin ka hruai hrang ngai lo ang. I pa, i mamawh huna awm reng tur a ni. Tin, keipawh min mamawh a nih chuan ka awm ang," ka thusawi chu a hrethiam pha meuh em ka hre lo mah se ka sawi chhuak leh ta tho.

Kan mamawh laia kan Nu leh Pa te hlut zia ka hriat chian êm vang a ni.


"Khawhar leh malin kan siam lo ang che," ka ti zawm leh sap, keimah zawk chu ka hnuk a rawn ulh ta ṭau lehnghal. A va zia lo tak!


Kan in zo chu inzui chhuakin, "zanin chu kan in ah chaw lo ei la. I Pa pawh i ngai lo em ni?" Min rawn en chho va. Min chhang duh ta lo emaw ka tih hnuah bawk a bu ta nghat. Nuih loh ka tum pawhin ka thei lo. Tiang hian kan inthlem thei ang tih tunge ring bîk ang le?


School lamah kan inzui chho leh hnak hnak a, Emma-i te pawh an rawn bang ve chiah bawk.


"Anu..."


"I tlu dâwn," ka fapa ṭhin hi chu aw.


"Min favorite tawh lo a ni lo'm ni," kuah paha ka ti chu a lei a chhuah tet mai. Ka nui khak khak.

"Tinge Anu bulah i din?"


"Tikhan an ti ngai lo, i U a nih hi. 'u' tia koh tur," ka ti chu an ner nawng nawng mai.


"Tinge ka U a nih ang?" Emma-in a lo ti vat. An pahnih a ka bula din hnaih tir chuan, "apa leh anu an innei tawh a, apa fanu chu in U tur alawm, a dik em?" Keimah min en lovin Shanel-i ding ve chu an thlek vang vang a.


"Bawihte..." Ka ti leh sep.

"Umm. Ni mai rawh se. Api'in a sawi a, 'apa in fanu lian deuh a nei a, kan U tur a tia, ka pawm mai ang," Andrew-an a ti zat zat. Ka nu hian engkim a lo hrilh sa a nih dâwn hi. U Hruaia "Pa" tia a koh nghal mai danah pawh ka Nu hian koh dan tur a hrilh a ni tih ka hria. Mahse, Emma-i erawhin vawikhatmah a la ko ve miah lo thung.



Emma-in a kut rawn lek chhuakin, "Andrew-a angin ka hau ve lo ang che. Anu-in 'U te chu zah tur' a tia, inkawm ang," ka ṭah rawn chhuak ringawt chu ka hrethiam lo, Pathian hnen aṭanga ka malsawmna dawnte hi ka phu lo lam deuh chu an ni e.


"Ummm..." Muangchangin Emma-i kut chu a vuan ve ta dâ dâ a, "kei pawhin ka hau ngai lo ve Lalemma," tih leh a U te in vuan chu pawt ṭhenin Shanel-i kut chu chelhin a thing ang nawk nawk a. Engti zawng emaw taka läwmna nasa lutuk avanga mittui tling deuh pam chuan ka nui hak hak.


"Aw le, aw le, a tawk Bawiha. Taxi kan chan a hun, I U Ruati dam lo nen, rawngbawl chawp kan ngai," tih leh naupang ho chu ka kai khawm a, kawngpui sirah chuan ka kai thla dat dat.


Taxi Stand kal tur chuan kawng hi cross a ngai ve khanglanga naupang nen chuan motor tam hun a lo ni nen a hlauhawm ṭhin.


"Kawngpui hnaih suh u aw."


"Ka Pi.." Ka bula mipa rawn ding chu ka en chho he haw a. Ka hre chhuak leh si. U Hruaia hnuaia hnathawk a ni tih, kan inneih ni khan ka hmuh zuai tak kha.

"Ka hruai haw ang che u," tiin a hawina lam chu ka en phei ve a, amah aia upa deuh tur hian a kut a lo vai zauh. Ani pawh ka hmel hmuh hnu a nih avangin ka bu ta nghat.

Motor tlem deuh chu nghakin, "kal ru le," tiin ka fate ho chu ka hmaah ka kal tir a, Zebra Cross chu kan kân ve diah diah.


Ka bula ding mipa chu melh chho vin, "engtin...." Chu zawng chu ka sawi hman, horn ri tuar ri ka hriat rualin, ka awmah min nam lêng lawpin, ka taksa in lei a deh a, ka kiu hmanga ka indan rualin, a taksa chu lei aṭanga vàn lamah säng takah a in vawrh chho va. Ka fapa te ho chu an rak tuar.


Chiang taka ka hmuh leh chu a taksa kawngpuia ri thla dup leh thisen mai ni lo, a chhip aṭanga a thluak per chuai chu a ni.


Ka mit ka chhing sawk a, ka ip chawih bawk!


Naupang ho an rawn ṭap chhuak chiah chiah a, motor horn ri zui chuah chuah mah se engkim chu a reh nghal ṭhuap ni maiin ka hria.


Ring taka ka fapa a rawn ṭah chuan ka harh chhuak a, ka tlukna aṭanga ṭhu chhuakin ka bawk vak phei rawk rawk, ka kuah khawm nghal nawk nawk a, ka fate khur zawih zawih chu ka theih dan danin khur ru ve der der chuan ka kuahbet tlat hlawm bawk.


"Anu.." Ka thaw dep dep, medical examiner ka nih hma aṭang tawhin mitthi ruang tamtak hi ka hmu tawh ṭhin, thihdan rapthlak tak tak pawh ka hmu in, mihring kaw chhung pawh ka haiin, ka phawrh fo bawk; Mahse...mahse, vawikhatmah tumah ka hmaah an la thi ngai lo. Hetiang ngat phei chuan.


Mipui tlân khawm sup sup leh, "in ṭha em? Nâ innei em?" Min rawn zawh tak sup supah chuan ka harh chhuak a.



"Shanel, i nau te hi i lo awmpui thei ang tiraw?" An mitmeng chiai lutuk leh hlauhnaa khat chu kuahbet reng thei ila ka ti.


"Shanel.." A bu ta nghat a, Emma-i te unau chu a kuahbet ve nghal ṭai bawk.

Kawngpui a ka bag tla chu chhar sawk sawkin, glove ka ah reng ṭhin chu ka phawrh a, "awmsawn rawh u, awmsawn rawh u. Police," tih leh ka badge chu phawrhin kawngpuiah chuan ka thu thla rawk rawk, "a thluak a chhuak vek alawm. "A su tu lah a tlân tlang daih lehnghal. "Naupang kha an ṭha em?" Mipui an ṭawng nuaih nuaih.


Ka bag ka ban deuh chu tleirawl pakhat hian, "ka lo pui ang che," ka bag chu a rawn la hnai a, ka kut lehlama zen rawk rawkin, ka kut khur dar dar nen U Hruaia ka call nawk nawk, "U Hruai...." A lak rualin ka ti chhuak dar dar, ka aw chu a chhuak ṭawk ṭawk.


"Ac..ac..accident a thleng...." Ka sawi chhuak thei lo teuh teh e. Chiai tur ka ni lo tih ka hria. Mahse, ka theih tawp ka chhuah chung pawhin ka kawchhunga hlauhna hi a reh mai thei lo.


"Khawnge i awm....?" Ka melh kual a.


Tlangval bawkin ka phone chu rawn lain, "hello.." Tih leh kan awmna kimchang chu sawi nghal zung zungin, phone ka bag-a a dah leh chu mit hnawm chapin ka en a, ka kut hnihin, kawngpuia a lu keh chu ka dawm khawm tlat bawk, thisen lah chu a luangkawi zeih zuih bawk si. ka tirilah min manin ka khur dar dar.


Ka mitmeiin nichin maia putar, car bula ding mipa kha ka zawng kual ruai a nia, ka hmu zo ta der lo.


"Ambulance a rawn thleng," an tih takah chuan police siren ri te nen ka hre nghal ruai ruai mai.


"Kan lo buaipui ang," ruang an zawn sawn rualin leiah ka ṭhu sawp hnawk. Ka fate dinna lam chu mipui kal darh sang sang karah chuan ka mit mittui avanga hnawm chap nen ka melh phei ṭawk ṭawk a, ka thaw ṭha thei lo, ka âwm chhung hi a rit lutuk mah mah.


Thil thleng chu a rangin, min ṭhawng lutuk bawk nen, ka chawmawlh ni maiin ka inhria.


"Chief.." Ṭpa a rawn lang hlawl a, ka ṭawng mai dawna ṭawng pawh ka ṭawng mai thei lo, ka lei hi phuarbeh ang mai a ni. A tawt a, ka thawk lak theih chhunglah chu a tawi tuk bawk si.


Ka mit ka chhing sawk, ka hmusual a nih ngawt loh chuan emaw, ka chiai avanga buai ka nih loh chuan chiang takin kha car khan keimah a ni min rawn bitum ni. Keimah hi!


Ka taksa a rawn khur chhuak hlawk hlawk, "ti...tissue..." Ka glove bun chu phelh nawk nawkin, Wet tissue min rawn pek chuan ka bân vela thisen kai chu ka hrufai sawk sawk.

Ka tha neih zawng zawng sàwm khawmin ka inbeng kang a. Ka fate dinna lam chu ka pan nghal ruak ruak bawk.


"Inṭha em? Nâ innei em?" An lu an lo thing mat mat.


"I kut kha a thi a nia," Shanel-i a rawn tih chuan ka kiu ka en vat, zinglama ka hliamsa aṭangin thisen a lo chhuak chu niin.


"Sawmte..." U Zela aw ka hriat rualin a hnungah U Hruaia hmel chang rût mai hi ka hmu zui a, vung zetin a rawn pên pawk pawk mai.


"Apa..." Naupang ho vin an lo ti vat. Keimah tak pawh chu ka thaw hawk hialin a nia ka hriat ni. Ka lam a rawn pan chu kawchhung la khur der der chungin ka lo thlek mawl tawp.


"Myla, Pathian leh!!!" Ti hrawih chuan min rawn kuah thlawp a. Eng emaw sawi hian ânchhia ni âwm tak hi a chhak chhuak sup sup.


"Nâ i nei em?" Inla hrangin min en kual thuak thuak, ka lu thingin ka chil lem khalh chuan, "ka ṭha..." Ka ti zawi sap. Ka aw chhuak pawh a la khur titih.


A thaw hawlh a, "inṭha hlawm em?" Naupang ho lam chu a hawi ve leh chiah.


U Hruaia hmel an hmu rualin an ṭah a chhuak thar ve nge, Shanel-i thleng chuan an ṭap ta chuah chuah a, keimah ber pawh chu ka mittui a rawn hnam leh ṭiam ṭiam mai.


Hetiang thil rapthlak tak hi ka mit hmuhah leh ka hmaah ngei ka tawng ang tih ka ngaihtuah pha ngai miah lo, mumang lamah pawh ka hmuh duh loh a ni.


"Ka haw pui ang che u," U Hruaia chuan a ti sup. Hnial lo tak ka ni.


"U Hruai, i nau te zinga upa zawk kha ka hmu ta hauh lo," ka ti chhuak ta sep. Ka zawng ru renga min rawn puih te ka ring a nia.


"Ka hria e..." Chang rût a ti hraih hian Andrew-a chu a pawm nawlh a, Vula'n Emma-i a rawn pawm ve bawk. Eng nge a hriat tak phei chu ka hre lo va, a läwm lo zual hmel chu hmuhnawm loh tak a ni.



Shanel-i ṭap ve par mai chu mittui tling pama enin, ka kut chu ka lek chhuaka, a lo chelh ve vat bawk.


A kut ka chelh ruala a taksa khur ru dar dar chu ka hre vat a. Ka en kawk, "i ṭha em?" Ka ti vat bawk.

A lo bu nghat a, "tlemtein ka hläu," a lo ti ve sap sap. Ka khawngaih reuh lutuk, puitling zawkmah ti khawp hian min ṭhawng a nia, ka fate ho phei chu engtiang a nâ in nge maw a ṭhawn ang ni.


Car chhungah pawh naupang ho chuan min nek chial reng mai. Shanel-i tak pawh ka taksa dai lovin a ṭhu duh lo a ni ber.

Andrew-a erawh kawngkhar lama ṭhuin, U Hruaia thilthlen dan a thiam ang angin a hril siam siam a, a ṭhawng ve vak lo zawk nge ni? Keini hmeichhe ho erawh ngai kan la awh hleithei meuh lo. Kan ṭhu ngawi ran ringawt. Keimah tak pawh ka lungphu hi a la dik lovin, ka mit pawh ka la chhing ṭha ngam meuh lo chu a ni!!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)