ENCHANTING Chapter -20 by Calm Bird

Episode kal lai dah luhna

Moderator: writers

Calm Bird
Posts: 101
Joined: May 1st, 2022, 8:28 am

ENCHANTING Chapter -20 by Calm Bird

Unread post by Calm Bird » August 18th, 2022, 9:28 pm

Chapter - 20
ENCHANTING
by Calm Bird





"Ranger khawnge i kal dawn? Daisy-i min auh zuina pawh chhanglo chuan chak zetin ka tlan chhuak a, khamite pahnih kha ka hmu reng a nih chuan doctor pa kha ka that duh mai ang! "Inah te hian awm ve thin em em teh. Tlaiah Daisy-ite an rawn len dawn kha" ka nuin a tih chuan chhanglo in inchungah ka chho tlang a, ka room-ah lutin kawngkhar ka khar ri bur. Ka jacket hak lai chu phelhin chhuatah ka theh thla pawp a, thinrim zet chuan bang ka chum ri leh bur. "Min ti a zo dawn" ti hrawkin ka hmai ka hup thawk a, vanvadakin ka thaw chhuak hrawih hrawih. "Hruaitluang" ka nu chuan ka room a lo lutin a ti a, ner nawkin khumah ka thu thla nghal dawt. "Chhuak tawh suh aw, mikhual ilo lawm ve lohin" a tih chuan melh runin "Ka mikhual an ni velo" ka ti nghut a, ka shirt hak lai hlipin khumah ka theh thla leh tawp.






"I nupui tur te alawm!" A tih chuan khum atangin ka tho nghal zawk. "Ka nupui tur a ni engtik laiin nge ka tih?" Ka tih nghut chuan ner nangin "I rem tih thu i sawi vek tawh kha!" A ti a, kiai sukin "Inhual chauh alawm ka rem tih. Nupui atan ka nei dawn ka ti tel hleinem" tiin ka wardrobe ka hawng a, off-white hoodie ka la chhuak a, shirt dum bawk chu ka la chhuak tel bawk. "Inhual i duh chuan inneih pawh i rem ti tihna a ni mai" a ti a, ka shirt inthawlh mawlh mawlh pah chuan "Inhual leh inneih a in ang lo. Ka hmeichhe hmangaih tih loh chu nupuiah ka nei ngailo ang" ka sawi zawng chuan Remruati ka mitthlaah a lo lang a, ka khi nghal suk.






"Hmangaihna mai mai! In innei ang nga i hmangaih ve mai dawn alawm! Fa te in neih phei chuan i..." "A tawk! Chulam chu ka nun a nia, ka thu! Min force tum reng reng suh ang che! Ka lo haw tawh dawnlo min lo nghak suh ang che u" tiin ka room atang chuan ka chhuak a, kawngkhar ka khar ri bur bawk. "Lalhruaitluang!" Ti a min auh lehna pawh ngaihven loin in chu ka chhuahsan a, ka nupui tur lehzel a ni min lo thlansak chhan tur a awmlo! Ka bike-ah chuangin chak zetin ka in khalh chhuak a, Fakawma in luah ka thlen chuan chhukin kawngkhar pawh kik lemlo chuan ka lut tlang a, an lo kim leh thap tawh. "Ilo kal dawnlo emaw kan lo ti hman a!" Fakawma chuan a zu no keng pahin a ti lawng lawng a, chhanglo chuan couch-ah ka thu thla dawt a, dawhkana zu bur chu lain ka in khawlh khawlh. "Vansangpuia kha i sawisa em ni?" Jonathan chuan ka hmaa rawn thut thlak pahin a ti a, ka nui suk ringawt. "Damdawiinah an in admit a, a hnar ruh a tliak a ni awm e" tiin a zial a pak a, ngatanmah ngailo chuan zu chu ka tlak leh pap.






"F.I.R. theh luh te kha an tum a, Sangpuia khan a mi khin tur a hre chiang a, an theh lut talo a nih kha" tiin Rohlua ka sirah a rawn thu thla a, beer cane a dawm vang bawk. "Tinge i sawisak reng reng a? Ka tel lo lehnghalin!" Alan chuan rawn tiin Jona sirah a thu thla a, lungngawi loh hmel zetin a ner nang. "Ka pawi a sawi tihna a ni mai" ti nghutin nghenchhan ka ngheng dawt a, mit ka chhing vang vang.







Remruati pov:-




"Awii bawihte" inchhung ka pen lut chiah ka nuin min rawn kuah thlawp a, a tah aw tiau bawk! "Nu tinge a?" Hamhaih zet chuan ka ti a, nghet zetin min kuah vak ringawt. "Khawi teh, rawn thut tir ve phawt la" ka pa chuan dam diai hian a ti a, ka nu chuan min kuahna phelhin a insut ri hraih a, thil thleng a awm em mawni? "Tinge a?" Thutthlenga thutthlak pah chuan ka ti a, ka U pawh a thu ve ran a, chhuat chu ding zetin a melh ngur. "Sawnteii'n min hrilh a.." ka pa in a tih rual chuan ka meng kawk. Ka thin a phu nghal dup dup a, thil tisual an man chhuah ang maiin ka awm. Ka nu chuan a kawr haklai hmawr hmangin a ka a hup a, a insut ri hraih hraih. "I..in hria maw?" Ti supin ka kun ngal a, ka kawr hmawr ka tham nghek. "Tinge min hrilh loh? Engahnge nangmaha tuar i tum?" A tih chuan ka pa chu ka melh zeuh a, hnuai lam ka bih lehnghal vat. A lungngai hmel kha hmuh a hreawm lutuk!






"Ka,, hrilh cheu ka tum alawm" ka ti sup a, ka nu a tap chhuak nghal hawk. Chu chuan ka mang a ti ang a, awm dan min ti thiamlo bawk. "A tul tul kan ti ang. Pawisa lam vang bawka zep i nih ka ring. A tul chuan loan kan la ang nga, taxi pawh kan tiral mai ang" ka pa chuan a ti a, a thutna atanga thoin ka hmaah a rawn thingthi a, ka kut pahnih chu lain nghet zetin min hum sak a, min hmangaihna mitmeng thuk zet chuan ka mitah tak min melh a, chu chuan min ti lungchhe takzet. "Bawihte, ka fanu neih chhun i ni a. Chan che hi kan duh lo, i dam leh dawn alawm. I dam theih nan chuan engpawh ka ti ang." A sawi zawh rual chuan ka tap chhuak hawk a, ka pain min kuah nghal thlawp. "Kan awm hi, i tan kan awm reng" tiin ka hnungah min beng dat dat a, a aw a lawi rat bawk. Tah a insum ve takzet ti ka hre thei!






"Thlai te kha ei tha rawh" ka nu chuan ka thlengah maian a rawn dah a, ala pangngai lo tih a hriat. "Awleeehh" nui var var a tiin ka ei nghal a, min melh mawl deuh tawp. "I doctor chuan engthu nge a sawi a?" Ka pain a tih chuan "Damdawi min chawh a, chemo khai nghal a chi loh a, nakina ka awm zel danin kan khai ang" ka ti sap sap a, a bu nghut. Ka U erawh ala tawng miahlo a, a changin min melh leh vung vung zel.






"I chhungte chuan engtin nge an tih che?" Kal pah chuan a ti a, ka nui suk ringawt. Lehlamah alo sawi kha a tha ang reng! Ka thawven pah hawk. "Min ngaihtuah khawp mai" ka ti sup a, ka sawi zawh rualin Ranger leh Daisy-i ka hmu a, ka thin zawn a na zawk. Daisy-i chuan Ranger-a banah kuahin a nui sang a, Ranger-a erawh chuan a ngaihsak tehchiam lo a nih hmel. A infiam nan a hmang lo ang tih pawh a sawi theih loh! "Christy rawn kal se Daisy-i saw kek nawk se! Ka ngei a nia Ranger-a a inti neitu em em zui! A ha a muat nasa ropui si" Sawmteii'n a tih chuan ka nui tawp. Huat a pe na thei reuh lutuk hi nuihzat lamah a kal zawk!






"Awii kha i hnar a thi a nia!" Sawmtei chuan a ti thawt a, ka hnar zawn ka khawih ve vat. Ka rawmawl chu la chhuak sawk sawkin ka hru nghal a, mahse a thi a chhuah belh zel! Ka taksa chhung chu a na ngut ngut a, na lo lai pawh a awmlo! "A thi belh zel a nia engtin nge kan tih dawn?!" Mangang zet chuan a ti chul a, engmah sawi loin washroom lamah a chak thei ang berin ka tlan a, Ranger-ate pahnih ka tlan pel fua. Ka hmai chu tuiin ka phih sawk sawk a, ka taksa chhung na ngut ngut vang chuan ka ner nawng a, ka hmui hnuai ka seh vak ringawt. Ka thaw chhuak hrawih hrawih a, rei loah Sawmtei a rawn lang ve vat. "Damdawiinah kal ang" a tih chuan "Ka tha" ka ti sup a, awihlo lutuk hian min melh a, ka kut pharin "Ka tha leh mai ang, nghak lawk ang" tiin bang ngheng chuan chhuatah ka thu thla a, tih theih nei lo zet chuan ka na dam hun tur ka nghak tawp. "Ka ka bag" ka tih sup chuan chhuata ka bag tla chu a chhar a, min pek rual chuan a chhung ka hai nghal rawk rawk.






Doctor damdawi, ka na a chhuah changa ka eitur a min chawh chu ka la chhuak a, ka kutah tam zet ka bun nghal tlawrh. Ka hmanhmawh tawh lutuk chu ka che reng reng a dik theilo, ka na vang chuan ka khur hlawk hlawk thei hial. Damdawi ka ei zo chiah Daisy-i tawng ri ka hriat avang chuan kawngkhar lam ka hawi dawrh a, Ranger nen chuan min lo en reng! "A hetih vang a nih dawn hi a nikhua loh em em! Drugs addict lek a lo ni a nih hi, ka awih theilo zawk. Belhchian a dawl lo hle mai" a sawi zawh rual chuan Ranger a kalsawn daih a, Daisy-i chuan a um nghal vat. "Khapa mai mai chuh! A ngai kawi chiang lutuk!" Ti a umzui a tum chuan a kutah lo manin ka melh chho a "Hrilh a tullo, engkim a hriat ve zel a ngaihna a awmlo" ka ti sup a, thaw hakin a bu nghat.






Ka na a dam hnu chuan ka hmai phih tha lehin ka damdawi tih buakte chu bawlhhlawh bawmah ka paih a, ka thlan a lo chhuak nasa hman takzet! "Engtikah nge i in entir leh dawn? In check up reng a ngai a ni lawmni?" Sawmtei vek chuan a ti a, ka bu nghat. Ka na a chhuah hunah sawi turin min ti a, va in report nghal a ngaiin ka hria.






"In enkawl tan a ngai tawh a nih dawn chu. Naktuk atang chemo kan khai ang nga, ka rin aiin a natna hi a zual chak" doctor-in a tih sup rual chuan ka nu lam ka hawi a, awih loh hmel tak hian a ka a ang pam. "Awle, mahse engzah nge sen ngai ang?" Ka pa'n a tih chuan insen ngai zat chu a sawi a, ka lo ip chawih thei. Damdawiin atanga kan chhuah chuan ka pain loan a va puk lawk tur thu sawiin bank lamah a kal hrang a, ka nu nen taxi hire in in lam kan pan dun thung. "Tawngtai tha ila, i dam leh vat mai ang. Pathian engkim ti thei a awm alawm" ka puan min sin that tir mawlh mawlh pah chuan a ti a, a che chu mu chungin ka thlir reng. College atanga in ka thlen hnuin ka na a chhuak leh a, eirawng ka bawl laiin a ni nghe nghe. Ka pa service lai ka nuin a be chuk chuk a, ka U pawh mangang hman tak a ni. Damdawiin lam kan pan nghal kha a nia!






"Nu, ka la sawi ngai miahlo a... Ka hmangaih vek cheu a nia aw, ka lo thi ta a nih pawhin a hma a in nun dan ang khan nung ula, lungngai a kun reng turin ka duh lo cheu a nia. Keimah vang leh lek phei chuan!" Ka sawi zawh rual chuan min kuah thlawp a, eng nge a ngaihtuah ka hrelo. Thi thut thei reng ka ni tawh a, hetiang thu sawi hi a ngai tlat! "Chutiang an sawi ngailo, i dam dawn ka tih tawh kha" tiin a inla hrang a, a mittui a tuai hul zeuh. "Zanin chu ka bulah mu la" ka tih chuan "Dawn e, dawn e,,, thil te kan sawi mai mai dawn nia" a ti a, ka sira a rawn mut thlak rual chuan ka kuah nghal chawih. Ka nu bulah hian awm reng thei ila ka ti takzet! Mahse Pathian'in min ti dam leh te a nih ngawt loh chuan kumkhua atan kan awm dun thei tawh dawnlo a, van atanga lo thlir ringawt bak tih theih ka nei dawnlo. Hmangaihte hmuh theih tho si khawih theih chuan loh chu thil hreawm tak tur a ni!






"I lo chhuah hun kan lo nghak ang che" ka nu chuan a ti a, ka nuih sen sen. Ka zam ru ve takzet. Room pakhatah hian min nawr lut a, ka chhungte leh ka thiannu Sawmtei ka en theih thleng chuan ka en a, operation chhung chu a eng pup. "Tui" ka mit chu ka meng diar diar a, ka nu tawng ri ang tak ka hre vuai vuai bawk. Ka dang ro lutuk chu a rapthlak zawk. Thawh pawh ka thawh theih loh vang chuan straw hmangin tui chu mu chungin ka in tawp a, ka mit ka la meng thei chuanglo. An tawng erawh ka hre thei vek thung. "Ranger" ka ti sup a, ka bulah awm se ka duh takzet. Ka hmuh mai theih inringin ka kut chuan ka khum ka dap kual ruai a, ka kut tu emawni'n min vawn sak rual chuan ka meng chhuak a, "Ranger" ka ti nghal sup. Mahse a hmel ka hmuh chian rual chuan ka ngui nghal vek. Ka pa ani! "Bawihte" ti supin ka kut chu a tuai heuh heuh a, Sawmtei khum mawng lama lo ding chu ka hmu phe ruai.






"I harh tawh maw?" Rawn titu chu dr.Rinkima a ni. Ka thil min khai sak chu a check zung zung a, a hmel hmuh hi chu a hahdam ve thlawt. "Engtikah nge ka chhuah theih dawn?" Ti a ka zawh chuan "Ka hre mai lo, i dinhmun azir a ni mai" tiin min chhang a, ka thaw hawk. Ranger-a be ngailo mahila nitin ka hmu thei tal thin asin! Tunah hian ka bulah awm ve se ka titakzet.






Kar khat lai chu damdawiinah ka awm tawh a, ka nu leh pa leh Sawmteii'n min riahpui deuh chawt a, Ranger ka ngaihtuahnaah a awm reng thin. Ka thlahlel ngawih ngawih hi a ni mai. "Ranger-a hming i mutthilh lai hian i lam reng zel a" Sawmtei chuan khuma thu chung chuan a ti sup a, ka nui tawi tak. "Ka lo hruai dawn em ni? Amah pawn i awmna min zawt thin a" a tih chuan lu ka thing vat. "Tinge?" A tih sup chuan "Ka thi tawh dawn a, ani nen chuan hma hun kan neilo. Hlim deuhin awm se chu chu ka duh ber! Eng ang pawn minlo duh ve mahse a theih loh, a theih loh bur. Ka tina mai mai ang. Ka hlata a awm hi a tha ber" ka ti a, engtinmah min chhanglo. "Ka'n inbual ang nge, ka nu pawh chu thil a va lei rei ve mawle" tiin ka inthlakna tur ka la chhuak a, bathroom-ah ka lut nghal. Ka inbual lai chuan thil ka ngaihtuah ngut ngut a, chutia ka in ngaihtuah lai chuan ka na a rawn chhuak leh a, chhuatah ka thu thla hnawk. Ka inbual zo tawh tho tiin ka thawmhnaw chu thei leh theiloin ka ha a, ka na ti chu ka then leh chak chak thin. Darthlalanga ka in en lai chuan ka hnar bawk chu a rawn thi leh a, ka mit a vai riai a, ka taksa chu rawn zawi thutin ka awn nghal riai riai.






_____ _____ _____ ZAWMNA _____ _____ _____





Sawmtei pov:-



Remruati bathroom atanga alo chhuah har em avang chuan ka phone khawih lai chu dahin bathroom lam ka pan a, chutih lai chuan Nu Zuali alo thleng ve chiah bawk. "Khawnge Mami?" Tiin a thil lei chu dawhkanah a nghat a, chhangloin hlauthawng ru zet chuan bathroom kawngkhar chu ka kik dat dat a, engmah thawm hriat tur a awmlo. Shower ri tak ngial pawh! "Tinge a?" Nu Zuali chuan a rawn ti ve nghal a, a hma aia ring chuan kawngkhar ka chum leh vak.






"Remruat?!! Lo hawng teh!" Ka hlauthawng tawh lutuk chuan ka ti a, kawngkhar chu ka chum chawllo bawk. "A chhungah a awm a nih chuan min rawn chhan a hun tawh, doctor Rinkima kha ka va ko ang nge" Nu Zuali chuan thil thleng hrethiam vatin doctor ko tur chuan a tlan a, keiin kawngkhar chu hawn tumin a handle chu ka sawi leh vak thin. Sawt mawh tak a ni!






"Khawi, awmsawn rawh" doctor chuan a rawn thlen rualin a ti a, kawngkhar chu engkhaw sawi set set loin a tlawh pawp a, mahse a inhawnglo. Tawlh hnung leh deuh hretin kawngkhar chu a tlawh leh pawp a, a inhawn rual chuan hmanhmawh zetin kan tlan lut a, ka thil hmuh vang chuan ding chawtin ka ka ka hup chawih a, nu Zuali pawh a ni tho! Doctor erawh kha chuan chiai miahloin Remruati thisen kara lo mu reng chu a pawm tho nawlh a, room atang a tlan chhuah pui nghal dawr dawr. "Nurse! Nurse! Tunah emergency room-ah!" Tiin a thawhpuite chu thu a pe a, emergency room lam chu panin Remruati chu an luh pui a, nu Zuali mangang zeta lo tap chu ka kuah a, Remruati pa ka call nghal vat bawk. Remruati hnar atang khan thisen bawk a rawn chhuak leh a, mahse tuntum chu a ka atang pawn a rawn chhuak tel!!






Pa Hmingtea leh a U lo thlen rual chuan ka thaw huai a, nu Zuali chu an hnem nghal mawlh mawlh. Mahse an mahni pawh an hlauthawng ve hle tih a hriat. "I chau em?" Remruati U Remsiama, ka bialpa ni bawk chuan ka bianga min chuk zeuhin a ti a, a chhungte thutna lam chu ka melh nghal vat a, kan lam an rawn ngaihsak lo hlauh. "Tikhan mi zingah rawn ti tawh suh" tiin rum zetin ka melh a, a nui suk duh chauh. A nau damloh vang nge tunlai hian a mitkhur a thuk thei em em a, a hma aimahin a cher bawk. Kan vaiin Remruati damlo hi kan tuar ni berin ka hria! Keipawh ka thil tih engkim a tuilo a, Remruati ka chan dawn anga ka inhriat tlat vangin ka tap ve thin hial!






A U nen pawh kan inngaizawng tih ka la hrilh lo a, amah a muhil zel bawk nen hrilhna hun ka neilo a ni. A hriat hun tur ka phur tawh hle a, vawiin pawh khan hrilh ka tum a mahse tiang thil hi a thleng ta si! Chuan U Remsiama hi chu ka duh na a rei ve tawh a, min duh thu a sawi tirh pawh khan ka awihlo hial zawk. Kylos erawh kha chu ka duh angin ka inngai a, mahse inhmel duhna mai mai a ni tih ka hrechhuak a, Remruati khawih a tum atang phei kha chuan ka haw hluah hluah tawh. Dawngite ho pawh ka kawm tawh ngailo a, drugs leh eng eng emaw an lo khawih thin tih ka hria a, ka hriat ni atang la la khan vawikhat pawh ka be leh tawh ngailo. Remruati hi ka thian neih chhun a ni a, ka chan a nih chuan ka ruak ngawih ngawih ang, ka engkim hre tu a ni a, ka nau ang hiala ka en a ni! Min kalsan ka phallo!






"Ka fanu hi chan ka duhlo! Ka khawngaih em mai keizawng!" Nu Zuali chuan a ti a, pa Hmingtea pawn a mittui a hru zeuh zeuh. Remsiama ka en chuan a ni pawh a ngui bam a, hlim kan awmlo! Ranger tihlo! Remruati ka riahpui apiangin Ranger-a hming lamin a tawngvai a, a ngai takzet a ni! Ranger-a pawh hian Remruati hi a duh ve hle in ka hria a, hetia a awm chhan tha tak a awm ngei pawh ka ring.






Remruati pov:-




Ka men rual chuan ka nu hmel ka hmu leh hmasa ber a, engvanga Ranger-a hmel hmuh inbeisei nge maw ka nih le? "Bawihi na i nei em?" Ka nu chuan a ti zung zung a, ka chhanglo. Engtin nge tun thlenga ka la dam theih ni? "Ilo harh tawh maw? I thisen test turin kan la a, i dinhmun kan hre thuai turah ngai ang." A ti a, chemo kan khai mek tawh bawk. "Ka dam phah dawn chuang lo a, in enkawl a tul kher pawn ka hre tawhlo" ka ti sup a, ka chhungte an ngawi dak. "I dam dawn ka tih tawh kha. Hmeichhe chak tak i nia lawm bawihi" ka nu chuan mittui tling piau chungin a ti a, ka thaw hawk.






Thla khat lai a liam leh ta a, ka mangah ka mipa hmangaih hmel ka hmu fo. A ni nen chuan thlaler, rose par hling neilo leh hnim hring tam tak awmna hmunah hmangaihna par kan tlan a, thihna a awm tawhlo. A ni nen chuan inkuah riala thu dunin van pawl mawi tak kan thlir dun thin a, zan a nihin thla eng bial nalh tak kan thlir dun thin a, duhthu kan sam dun thin bawk. Ka duhthu sam pawh engdang niloin a ni nena hlim taka kan awm reng theih nan a ni a, thil dang engmah duh kan neilo. Chu hmun nuam takah chuan infiam dunin kan in um kual thin a, nui thawmin a khat a ni! Mahse he khawvelah ve thung chuan mangram ami ang lo takin hreawm tinreng kan tuar dun a, thihna a awm bawk. Rose parte pawn hling an nei a, chu hling chuan kan pahnih karah buaina an thlen a, kan thinlung a chhun tlang thin bawk a, hliam min siam sak thin a ni. Natna tam tak a awm a, a ni nen chuan hlim takin kan awmdun ve theilo! Duhthu pawh kan sam theilo a, chu rose par hling zum tak vang chuan a ni!






"I inbual zo leh der tawh alaw?" Rawn titu avang chuan ka phu chiam a, Sawmtei a nui hak. "Ka sam minlo phiar teh, ka zawi lutuka phiar pawh ka phiar theilo" ka ti a, khumah rawn thu thlain dawhkana samkhuih leh samtawnna chu a la a, ka sam a phiar theih nan ka insiam rem nghal. Kar hmasa atang khan thisen pek reng ka ngai a, ka zawi tulh tulh bawk. Ka tha chakna a ni telin ka hloh a, thisen chaw kan khai tawp bawk. "Eng shampoo nge i hman a a van rimtui" ka sam a khuih lai chuan a ti a, nui sukin "Sunsilk" ka ti a, a hmui a ti pawrh vak. "Daw daw lo mai teh, sunsilk rim a nam hlawl lo" a ti a, ka nui hak hak ringawt. Ka sam a khuih lai chuan ka sam tam zet mai hi a khuih thla a, a che lai a tawp chawt. Ka hriat hlau zetin a sira bawlhhlawh bawmah chuan a paih a, mahse ka hmaa darthlalang atang ka hmu vek thung!






"Tunlai eng nge Ranger-a chanchin?" Ka tih chuan ka sam a phiar lai chu a chawl dat a, phiar chhunzawmin "I chungchang min zawt reng a.." a ti sup a, ka chungchang te alo ngaihven ve duh ang tih rin ngaihna ka neilo! "Engtin nge i chhan?" Ka tih sep chuan "I chanchin hrilh i phal bawk siloa an zin ka ti" a ti a, ka chhang zui tawhlo. "Therapy lak a ngaih kha aw tlaiah" ka nu lo lut chuan a ti a, ka huphurh ru hle. Tlai alo nih chuan sawi lawk angin therapy ka la a, ka chau hnawk thei. "A hmeltha tiraw?" Ka phone a Ranger thlalak en pah chuan ka ti sup a, ka nu chuan ka phone screen chu alo bih ve nghal vat. "Hmanni a kan ina lo kal kha em ni?" A ti sup a, nui sukin ka bu nghat. "Tinge ava rawn lang ngailo ve?" A tih sup chuan "A pawi hleinem, ka bula awmte apiang chu an tap zel a, a tah ve ka phallo. Nangni pawh tiamin" ka ti a, ka pa chuan kan titi alo ngaithla ve kur.






"Nilo, nilo Ranger!" Tiin ka au tuarh a, a lamah chak zetin ka tlan bawk. Mipa rual hian an sawisak rawn a, a bul ka thleng thei lo! A bula thlen tum chuan chak zetin ka tlan a, mahse ka awmna ngai rengah ka awm! "Aih!" Mipakhatin chema a vih rual chuan ka au tuarh a, ka taksa insawi dawt dawtah chuan ka thu chhuak hlawl. "I tha tiraw?" Ka nu chuan a ti a, ka thaw chhuak hlawi hlawi. Ka thlan chu ka nuin a kutin min hruk sak a, ka kuah nghal thlawp. "A tello chuan..." sawi zo theilo chuan ka tap hlawp hlawp a, ka hnungah min chul hauh hauh. "Ranger-a bawk ami?" Sawmtei chuan a ti a, engtinmah ka chhanglo.






"In lama haw ka duh" ka ti a, ka pa chuan a lu a thing nghal nghut. "Heta awm reng ka duhlo! Ka thih dawn pawn ka inah ngei thih ka duh" ka ti a, lainatna mitmengin min en reng. Sawmtei pawh keimah vangin college a chawl a, a chhan pawh ka dinhmun a thatloh vang a ni. Ka natna hian stage four lai kai tawh miau hek! Nizanah pawh kha mangchhia ka man zawh hnuin ka na a chhuak leh a, thisenin ka luak hial bawk. "Haw chu i duh viau em ni?" Ka nu'n a tih chuan ka bu nghat a, doctor a dil tur thu sawiin a chhuak a, kan ngui hlawm bar mai.






"I room ka lo tifel a" ka U chuan a ti a, ka room alo chei danglam a, hawi kualin ka nuih sen sen. "Ka khum ka ngaih tawh zia hi" tiin khumah chuan ka mu a, inchung ceiling ka melh nghal char char. "I thawmhnaw ho hi chu wardrobe a khung hma su phawt ila a tha ang" ka nu chuan ka thawmhnaw dahna bag rawn keng lutin a ti a, chau zetin ka mit ka chhin san daih.






Sana ka en chuan chhun dar hnih alo pel tawh a, inbual tum chuan ka inthlak a, doctor khan ina haw a phallo a, mahse a hnuah keimah ngeiin ka dil vangin a phal hlauh a, tunah chuan ka inah ngei ka awm tawh. Damdawi tam tak nen. Bathroom-ah chuan lutin ka lu suk hma chuan ka taksa ka tifai a, shower hnuaiah chuan dingin ka inphuh tir sang sang. Ka sam ka khawih lai chuan ka sam a tla a, shower herh tawpin ka kuta sam tam zet chu ka melh reng a, ka mittui a luang nghal zung zung. Bathroom a chhuar kan dah chu hawngin lu mehna ka la chhuak a, ka U ta a ni a, a bathroom-ah dahna tur a awmloh vangin hetah a dah a, ka kawl hlen phah daih.






Darthlalang hmaah chuan dingin ka in en a, lu mehna chu pluck-ah vuahin ka on a, ka sam tla ka hmuh apiangin ka rilru a na thar a, rilru nat reng ka peih tawhlo. Nawr kawlh ila, tla tur ta sa sa a ni tho tiin ka lu chu ka ziat a, sam tam tak chhuatah an tla a, ka lu ka ziah chhung zawng chuan ka tap a, ka na ve takzet!


- End of Chapter 20 -

Link hi click rawh: https://www.instagram.com/reel/ChcVDR-L ... MyMTA2M2Y= (Ranger-ate video)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)