By
Floria Laldansangi
Chapter < 37 >
<><><>~><><><>
" <Breaking news> Vawiin khan Law court-chuan CM corruption thubuai neihlai mek chu a chhuah zalen tih a sawi. Kan CM chu Sorkar pawisa a eiru tia puhna dan (Criminal Procedure Code & Prevention of Corruption Act) ang a fiah (Proved Beyond All Reasonable Doubt) a nih loh avanga man lo leh chhuan zalen a nih zawk thu thudawn na in a sawi," news ka chhiar zo chu zavak lo hian ka nui ringawt a.
"Inthlan leh hun chu Mizo mipui te hi ṭhangharh ila a ṭha viau tawh khawp ang. Inthlan dawna an mizia ang hi an pu hlen tak tak ngai lo tih te hi hre tawh tur chu kan ni," ti niah niah chuan, "Vote tawh lo tura campaign mai te hi nia ka duh ni," fiamthu thutak deuha ka tih zawm chu ka pasal motor khalh lai a rawn nui ri huk a. Ka nui ve khak khak tho.
"Ka in candidate ve mai dawn em ni?" Hnehsawh zetin stearing a kuai her zui zat. A va inhmeh tak!
"Tel lo mai rawh, i hna avang pawha hun i neih loh nak alaiin, ka pasal hmel ka hmu khat lutuk palh ang. Bakah, i ṭawngkam thiamin a daih lo, i hmelin hmeichhia bak a hip dawn si lo bawk nen," ka nui zui kiah kiah, ṭawngkam thiam a ngai ema sin. Min rawn enin a mit a ti zim zui salh a, a nui ve suk suk tho.
.
.
"I rawn lut ve dâwn lo em ni?"
"Car-ah ka lo nghak ang che," a ti deuh ṭalh chu a lam hawi ṭha sat satin, "i thik lo maw?" Mit khap lui zeuh zeuha ka ti chu ka hnarah a kut ṭangin a rawn tuk zauh a, "i pasal ka nih hi," a ti sup.
"A hma khan i thik ṭhin viau khan ka hre sia."
"Ka Nupui leh ka fapa lo piang tur nunna chhantu a ni tih chiah ka hria," a ti deuh nghut nghut chu za taka nui chhuak awr awrin, "um i thik tawh lo," tih leh ka inher a, car kawngkhar hawng chuan ka chhuak zat.
Nui vur vur chung chuan damdawi in lam chu ka pan a, min en zui reng a ni tih ka hre bawk.
.
.
.
"I va mal ve," ka ti lut nghal a.
"Lo lut rawh, Cindy-i a haw lawk a, a rawn let ṭep ang," a thiltih lai chawlin a sirah a dah zui a.
A lam pana ka pên chu ka dul zawn lo en deuh ngarin, "i dul a lian lo hle mai. Thla engzah nge inih tawh?" A lo ti zawi sup sup. A hrawk an zaina hi a ṭawng tam leh, aw rawl a pek rin hian a la na ṭhin a ni âwm e.
"Thla 3 leh kar 2. Engtik nge chhuah chu intum?"
"Thawṭan kar a ni ang chu," kan ngawi deuh vang vang a.
"Inpa in thisen minpe tih ka lo hria a, a ṭha em?" A rawn ti chhuak sup.
"Umm ṭha lutuk tawh e, i Nu eng nge a an?" Nu Rpi ka hmuh lohna a rei ta khawp mai. Dam chuan hun a kal chakin, ni hi a liam zung zung mai si a.
"A dam ṭha e ani pawh," a ngawi leh deuh vung vung.
"Ka lawm e," ka ti chhuak sep chu min en runin a nui ta suk a, "läwmthu sawi chhan tur i nei hleinem. Ka hna inpa in min venhim sak ringawt pawh läwmthu sawi tur zawk chu ka ni," ti deuh duahin, "naupang chungchang ka zawt thei ang che cu maw?" A tih zawm zat.
Kan inbiak dan chu inhre tir, inzah taka inbia hi kan ang riauin ka hria a, nuam ka ti dêr lo. Nel taka kan inbiak bawrh bawrh leh hauh bawrh bawrh hunlai kha ka ngaihtuah chhuak lo thei lo bawk. Ka ngai zawk rum rum mai. Kan in en dan, chezia engkim chu a laiin, kan khawr ru ṭût chu ka ngaitheilo ru viau bawk.
A zawhna chu eng nge ni ang tia ka en deuh kar laiin, "hre chhuak lo ila, zui lo che ila, naupang chungchang hi min hrilh tumna i nei reng reng em?"
Ka lu ka lo thing vat, "nei lo, ka damchhunga zep ka tum, ka fate Pa ini tih lah tuma lakah mah sawi ka tum hek lo," ka chhang rang lutuk chu ka inthiam leh chiah lo mah se ka ngaihdan diktak a ni thung.
"I thurûk_99 na tur a ni thei mai ang em?" A nui zui huk.
Nui ve ta hak chuan, "i hre zawk ang chu," ka ti sap a. Ani baka ka thuruk hre tam an awm lo ang, ho tete pawh lo chhiar kauh kauh peih kha a ni ve hrim hrim a. A thin ka tihrim changin, "i thurûk no. 4-na ka sawi chhuak dawn," tiin number te kha a pe thlap zel bawk si. Nunhlui ngaihtuahlet chuan ât hmel takin ka nui chhuak hak hak, a lo ât theih khawp mai!
"Ka tihpalh Malsawm," a mitmeng leh aw ri zawi supah chuan a inthiam loh zia bak hriat tur a awm lo.
"Tihpalh chhan tur i nei hleinem. Ka chungah emaw naupang chungah emaw pawh. I Pa vang a nih erawh chuan ka tihpalh, ka ngaidam thei lo a ni, ngaidam turin ka piangthar ṭha tawk lo tih i hriat kha," ka ti chhuak sep sep. Ka ngaihdan diktak a ni bawk. Ka ngaihdam theih pawh ka ring ngai hek lo.
Hriatthiam hmel takin a mit a lo chhing sak a, "naupang ho hi..."
"Lungngai suh, i duh hunah leh i ngaih hun a piangin i rawn hmu dawn nia. I hre chhuak ta sa sa an lakah pawh thup ka tum buai tawh lo. An kum han tam deuh sela, an piandan bakah, i chanchin chiang zawkin kan la hrilh dawn nia," ka ti zui chu za vak lova khi sak hian, "hrilh duh suh," a ti chu ka en haw mai. Zawhnaa khat mitmengin ka en haw a ni mah zawk!
"Mizoram pawnlamah Transfer dil ka duh a, a theih chuan....Chhattisgarh lamah," a ti ban chap chap.
"Tinge?" Ât hmel tawk hian ka lo ti. Damdawi in aṭang pawhin a la chhuak êm lo va. Chutiang ngaihtuah nghal te chu a.
"I Nu engtin nge ni dâwn, U Cindy-i pawh," ka ti leh zat.
"Min zui ang chu," ti supin min en deuh vung vunga, "naupangte pa atan chuan Hruaia bak tling an awm lo, an rawn lian ang a, min rawn hre duh a nih chuan a lawmawmah ngai zawk ang," a ti zawm leh chu ka mittui a rawn hnam sawk ringawt. A hmel landan leh a mitmeng a i thiam lohna, tling tawklo intihna ka hmu chiang lutuk chuan min khawngaih tir niin ka hria.
"Ka sawi tawh kha, i thisen, i fate anni reng dâwn tih," ka ti chhuak leh sap sap. A bak han hnem dan vak ka thiam bîk lo bawk nen.
U Cindy-i a rawn luh zui avangin ani pawhin engmah a sawi zui ta bik lo va.
"Sawmte i va rawn hma ve."
"Hna kal pahin ka rawn kawi," ka sana bun lai ka bih zauh a, "ka ṭhu rei tawh si, ka kalsan dâwn che u," ka tho zui vat.
"Inpa in a nghak che in ka hria," U Cindy-i chu a nui vur vur.
"Takan a, tun rinni lo awm tur hian Elevation Farm lamah naupang ho intih hlimpui kan tum a, Nana-i rawn telve sela, Shanel-i nen an inkawm ṭhin tho a," U Cindy-i chu ka en a.
Rinfela enin, "a tibuai lutuk ang chu. Kan Nana-i phei chu tih hi a har reuh a," a nui zui var var.
"Naupang vek anni dâwn a, tihbuaina tur a awm hleinem. U Tetei rawn hruai tel turin ka ti dawn nia, ka kalsan ang che u," tih leh ka ban vai zauhin ka chhuak zui ve vat. Rin aiin k ṭhu rei.
Damdawi in pawn ka thlen chuan U Hruaia leh hmeichhe nalh zet mai inbe lai ka hmuh chuan ka ding deuh dat, a hmeichhia lah chuan a nel hmel em em lehnghal a. Bakah, damdawi in a hnathawk a ni lo tih a thawmhnaw inhak chhin danah ka hre thei.
"Tunge?" A bul ka thlen rualin hmeichhe kal liamna lam en chuan U Hruaia chu ka melh chho ralh.
"A hming pawh ka hre tawh lo, Delhi ka kal ṭum khan an motor chhia ka buaipui a," ngaihtuah zawm lo tih hriat taka ti sup supin car kawngkhar chu a hawng zui a, lut tura min tihnan a thle bak bawk.
.
.
.
"I hna chawlhsan chu pawi iti lo ang maw?" Min rawn en zawk, hmalam bawk a en lehnghal rûn, "keimah zawk pawh ka chawl thei ka tih kha Bawihi," thutak zet hian a rawn tih zawm leh. A ti tak tak tih ka hria, tuna thiamna ka neih ang leh ka hna chelh tur hian eng ang harsatna nge ka paltlang a hria a, ka chawlhsan tur ka huphurh ruk zia pawh hrechiang ber tu a ni.
A lam hawia ṭhu ṭha sat satin, "naupang awplum loh lutuk chu a ṭha ngai lo. Duh leh nau nei felin, naupang ho hi lian deuh sela ka zawm ve leh mai ang a," hmalam hawiin ka ṭhu ṭha zui leh a, "keimah ang maia Nû ngaihsakna dawng lo va an seilen ka duh lo," ka ti zui sap, ka ngaihsak lo lui phei chu anni lo va, hna avanga buaisan fo leh awmbo san, inhmuh khat lutuk te hian Nu leh Fa inkar a hlat theih zia ka hrechiang lutuk a, chung chu an tawn ve ka duh. An harsatna leh hlimna, lawmna ansawipui theih, ṭhian ang a an kawm theih Nu nih ka duh a ni.
Mahse, ka chhungril khawi emaw lai hi chuan han chawlhsan ngawt hi chu a ui ve lutuk tih ka hria, ka bul ṭan dan, tun dinhmun thleng tura ka thil paltlang zozai te kha min rawn hrilh nawn reng bawk a.
Thla 3 chhung khan ka ngaihtuah nasa ngaihtuah pawh. 'Heichen ka thawk tawh a, ka fate pawh pangai takin anrawn seilian ṭan alawm le, naute pawh hring ila, hna nen ka kawp thei em em ang,' tiin keimah leh keimah ka inhrilh thul. Mahse, a tawpah erawh inchhung Nu berin a luahlum loh aṭanga an seilen bawk a ni ka hlauh leh tho tho ni.
Bakah, ka U case kan ching fel a, inhnam hnawih ve dang te, thil inthup tamtak, rinphak baka tam kan phawrh bakah, Education Minister leh tuirial MLA pawh kum 12 ve ve tang tura tih anni tawh a. Tin, ka U thah a nih chhan leh an nunrawn zia Mizo mipui kan hmuh tir thei hi ka läwm ru tawk viau mai.
.
.
.
"Kum 1 vêl awrh chauh kan thawk dun sia, i lak aṭang zir leh thiambelh lah ka ngah. Rei deuh thawh dun ka duh a sin le," Ṭpa chuan a ti ve niah niah.
Ka bungrua khung khawmin, ka melh zauh a, "min mamawh chuan min rawn bia la, ka lo zirtir ang che, fee a to lo ang," ka tih chuan a nui vur vur.
Kan office leh Autopsy room lam chu ka hawi phei a, ka en kual ruai bawk. Engtikah nge he hmunah hian dingin sawng hmanrua, mihring taksa leh kawchhung ka zai hawnna te saw ka vawn leh ang tih leh, ka suangtuah leh duhthusam hna hi ka zawm leh ang tih lah ka hre tawh si lo.
Ka mittui rawn hnam deuh sawk chu duh lovin mit ka chhing sawk a, thaw la kawka thaw chhuak lehin, "Vula ka kal ang e, min rawn be ve zeuh zeuh la," ka ṭap mai dâwn tak taka ka hriat chu le!
Inhnuai ka thlen thlak rualin U Hruaia'n ka box pawm a rawn la vat a, ka mit hnawm deuh chap chu enin dam raih hian min nuih suk a. A mita min khawngaihna chu ka hmuh hmaih miah lo bawk.
Midang awmna lam chu ka hawi a, an lo ding ṭhap, "Sawmtei chu aw, i va ngaihawm dawn vawng vawng ve," U Zea'n a rawn ti deuh vawng vawng.
"Inhmu tawh ngai lo tur ang mai," ṭah aw lek leka tiin ka nui lui hak bawk a.
"Nitina inhmuh ṭhin nen chuan a dang dâwn em a sin," ka chibai zui diat diat, "naute neih hunah kan rawn ri phei huk ang," an ti tliar tliar. Mizo chu Mizo nge nge kan ni, Delhi aṭanga ka insawn dâwn kha hetiang a ui tak min thlahna hmel hmuh tur kha a tam viau lo.
"I ṭah a chhuah chuan ṭap la," a tlân chhuah rualin U Hruaia'n a tih chuan chhuak lutukin ka ṭap chhuak ta hawm hawm a, "lo nei lo tawp che ila ṭha tur a nia. Ka nei che a ka rai nghal bawk si," ṭap pur chuan ka pasal car khalh lam hawiin ka ti chhuak nawk nawk.
Min rawn en ṭhin, thinrim ngam si lo va a lu min thin khum mut mutin, car hmalama tissue box chu banin a pawt chhuak a, "ka chawlhsan zawk ang ka tih kha," a ti sup chu ngei fe a mittui nen melh hrawkin, "ka rai ai i rai thei chuang em ni?" Bak hlaka ka tih chhuah nghek chuan a rawn nui ri huk. Car chhung zau zet chu a nui riin a khat.
"Chu erawh ka thei hauh lo," a nui huk huk chu mittui hru hul tawk tawka melh lej ram ramin, "Fiamthu ka thawh lo. Ka ril a ṭam, ei tur ka duh," ka ti zui hlak hlak.
Traffic light inthlak avangin a ding dat a, ka lam rawn hawi vatin, "i ṭam leh tawh a maw?" A aw ri bakah a mit thleng a mak a tihna chu a thup hman lo niin ka hria.
Chhang lo va ka lo melh rawm rawm avangin a lu thing vutin, "hetiang chuan a ṭha dâwn lo tawp mai, Doctor hnehah pumpui chakna i ei theih tur dil a ngai a ni," min ngaihtuahna a khatin a ti sup sup. Min bia pawh a ang lo.
Tlân chhuakin sana a bih zauh a, "Doctor kan hmu hmasa zawk dawn em ni?" Min rawn ena a tih chuan, "ka ril a ṭam hmasa," ka lo ti vat, tih ngaihna vak hriat loh hmel takin a nui leh ta huk ringawt a, keipawh chu ka nui ve ta sun sun tho. A ṭam tawh hi chuan a ṭam ve thei êm a ni. Kanpa pawh hian tih ngaihna tak hi a hre ṭhin law.
Kar liamta aṭang khan ka thil ei a tuiin, insum theih loh khawpin thil ka ei thei. Hetiang hian Emma-i te unau ka pailai khan ka awm lo reng reng. Mak ka ti hial zawk!
Pizza kan order leh nghah chhung pawh chu rei ka ti takzet, ka pum a ri rawk rawkin nia ka hriat ni. Ka awmdan chu ka pasalin nuihza insum tak hian min en ran reng a, a chang leh a nui ri leh suk ṭhin.
Dawhkanah a kiu nghatin, a kutzungpuiah a khabe nghatin, a kutchal chuan a hnar a chelh a, a kiai leh suk suk ṭhin chu ka melh lui leh deuh ram ram zel bawk a.
"I ei zo thei ang maw?" Pizza lo thleng chu ka ban vat.
"Theih loh pawhin ka hnawhlui ang," tih leh hawaiian pizza, extra cheese telh chu ka pawt fan zui duai duai a, ka'n keih zui a, pawhfan zui duai duai phei chu a va han manhla tak êm! Mitchhing lo va ei zawh atan chuan a uiawm mah mah bawk!
Kan sira ṭhu ve dang leh hnathawk ho vina ka thil ei min enna chu ka haider hmiah, vawiin chhunah pawh lunch kan ei naah min en hrek hrek hlawm tih ka hria. A tir chuan zak ve mah ila ka ṭam miau avangin ka zak duh ta bîk lo. Hetiang hi ka ni reng chuang lo va. Bakah, pahnih kan ni tawh miau alawm.
"Zanriah i ei thei tawh dâwn em ni?" Nui chungin a rawn ti leh ṭhin, ka hmui berh chu tissue la in a hrufai leh zauh zel bawk a.
Pizza ṭhial tuam tuam pahin, "thei ang chu," tih leh ka hmawm leh hmak, a hmui hnuailam pet zauh chuan hmuhnawm ti takin min thlir ta dauh dauh ringawt a!
Ka thil ei tam lutuk hi min ngaihtuah viau ṭhin mah se hmuhnawm ti tak hian min thlir dauh dauh thei zel tho.
.
.
.
Pizza, mipa 4 ei tur keimaha ka ei zawh hnuah pawh zanriah ka la ei ṭeuh tho mai. U Hruaia sawi ang takin ka pum hian a zo lo mai ang tih pawh a hlauhawm rum rum tawh.
"I puar lutuk i muhil thei meuh nange?" A nui ruh ruh. Khum lam a rawn pan chu ka lo melh vak a, a nuih a za sual sauh lehnghal.
"Ka mut a chhuak lo alawm," ka ngawi dat a, khumah rawn ṭhu in mit zîm sâta min enna chu nuih let var varin, "ice cream ka ei chak," ka ti nui vur vur chu a nui ri hawk. Keipawh ka nui ve hak hak tho.
"Sawm pahnih a ri dâwn si a," nui reng chunga a ti sup chu ṭhen lui vakin, "ka ngaihtuah ringawt pawhin ka chil a put," ka ti leh.
"Ka zu la ang e," a tih takah chuan rang fahran hian ka ṭhu chhuak a, "kan pahnihin chhuk ang," ka ti vat.
"Tho la."
"Ke in ka kal peih lo e, ka puar lutuka ka kal thei lo," ka ti chu a awih lo nasa, kei pawhin ka awih chuang lo.
A kut dahsawn sak nawk nawkin, a malah chuan ka ṭhu kai vat a, alam hawi zawnga ṭhu in, a kawngah ka pawmin ka kherhbet zui zat chu a ha var nalh lutuk lang ṭhiau va nui in, "ei tam lo turin intiam la," nui reng chunga tiin ka sam hma tla chu dimte hian ka bengah a zep zui zat.
"Ei tam lo ang, ka hritlang palh ang," thuawih fe in ka chhanglet var var, nui ri suka ka tukkhumah chelha min fawp vang vangin a inlak hran ruala ka hnar a kut ṭanga tuk zauh chuan, "keimah zawk hian i thu pek zawm loh chu tih theih ka nei lo a nih hi," ti sup sup in a tho zui nulh, a nghawngah ka kut suih zawma ka pasal thlek haw haw chuan inhnuai lam kan pan leh ta nge nge!
Ka ngaihtuah a, karhnih dâwn chu U Hruaia hian mut a kham lo nasa in ka ring a ni. Zanlai ril ṭam neih ka hrat bawk si. Ka ril ṭam pum ri rawk rawk hian minti harh fo va, tih harh duh lo mah ila a harhvang lutuk hian ka thawh chhuah hma hma in a lo ṭhu chhuak hman ziah a.
Inhnuaiah kan inzui thla leh hnak hnak nge nge zel bawk.
.
.
.
.
"Vula, chaw i va ei tlai ve," chokaah kan inpawm lut a, Vula'n zanriah a lo ei mêk chauh.
"Ka rawn thleng deuh chiah a, i ril a ṭam leh tawh em ni?" A nui vur vur. Chair-a min nghatin ka ṭhu ṭha sat sat.
"Ice cream ei ka châk," ka nui a, "i Nu chu eng nge a an?" Ka ti zat.
Ka thil ei thei lutuk nuih vur vurin, "a ṭha e. Läwmthu lo hrilh rawh a ti bawk a," a ti zui leh.
"Engmah a nih loh kha, mahni kala kan ve a ṭhat nen, a inhliam na lo va a lawmawm zawk," U Hruaia ice rawn dah chu ka ban vat.
Ka sirah chair pawt chhuakin a rawn ṭhu ve nghal a, "Vula, ka thusawi kha i ngaihtuah zui em?" Vula chaw ei chu a ṭhut chilh run.
An thusawi chu eng nge pawh ka hre chuang lo nâ chu, a pawimawh hmel viau thung.
"A vawt, a vawt..." Ka thil eiin minti phu masa lutuk!
"A vawt" pawh ka ti thei meuh lo zawk, duh aiin ka ice cream ei ka hmuam tama ka lem leh thei si lo, ka kâ chhung vawt lutuk a nâ zawk hial mai.
Chhah maina tur ka zawng a ka hmu mai lo lehnghal. Ka âng hlawi hlawi chunga thawh ka tum mêk laiin U Hruaia'n a kut phah ka hmaah a rawn dawh chuan ka chhak chhuak vat.
Ka ka chhung vawt lutuk chu boruak ka thaw chhuak zui vat vat. Ka lei a ti na zawk hial alawm le!
U Hruaia lah chuan Vula be sup supin, a kuta ice cream chu en zauhin tissue pawt chhuakin a dah a, a kut a hrufai chuan tissue min rawn pe ve zat. Min hmu lo emaw tih laiin min lo hmu ru reng chu niin, ka pasal ngaihsakna engtiklai pawhin ka chungah a awm reng a ni tih ka hriat nawn rualin ice cream suak a ei leh pawkin ka nui var var.
Ka rai hmasaka duattu ka mamawh zia leh duattu loh vang nge, tun ṭum ka rai chu ka inlak no zual bakah, min duatsual tak tak dâwnin ka hre tlat lehnghal!
"Vula, sipai ṭan i tum em ni?" An thusawi ka hriat lai berah zawhna ka siam hmiah.
Ka ice cream ringawt ka ngaihtuah na talangah an thusawi pawh ka hre mumal lo.
"Tum lo ve, Sir. Hruaia hnuai a thawh hi ka duh zawk. A bul aṭangin engkim ka thiam a, ka zirna man a tum bawk a, a hnuaia thawh bak tum ka nei lo," luhlul deuh hian a ti deuh tlat chu U Hruaia a lo thaw halh a, chair hnung a ngheng dat bawk.
Vula en vung vungin, "inngaihtuah rih rawh ka tih kha. Sorkar hnuaiah chuan ham ṭhatna dawn tur pawh a tam a, boral pawh ni la i hlawh zatve i chhungten an la dawng thei. Pension hlawh bakah, Lu man an dawng ṭhin te an chang vek dâwn," U Hruaia chuan a ti churh churh. Sorkar-a thun ngei chu a duh hle tih a aw ri ah a hriat theih.
Vula lahin a lu a lo thin khum mut mut a, "ka Nu pawh ka hrilh tawh kha, i hnuaiah ka thawk zel dâwn tih," a tho nulh. U Hruaia chuan luhlul tih hmel deuh hian a nau chu a en zui vung vung a, ka lo nui khek khek.
"Eng nge?" Tih en a min rawn enna chu nui ṭhû chungin, "i hnuaiah a thawk rei tawh lutuk a i luhlulna a chhun a nih saw," ka tih chuan a lu thing vut hian a kiai ve ta suk ringawt a, ka ice cream box kenlai chu rawn enin, "duhtawk tawh la," a ti zui sup.
Ka la ei tlem viau a sin le, ti ila vanilla flavors zawk hi a zatve ai tam ka lo ei hman a nih hi. Ka hre ve chiah!!!!
<>~>~>~>~>~>
Notice : Naktuk rinni zan aw hmelṭha ho
