HOPE CHAPTER 11 [UPDATE]

Episode kal lai dah luhna

Moderator: writers

youletrindie116
Posts: 8
Joined: May 17th, 2022, 1:41 am

HOPE CHAPTER 11 [UPDATE]

Unread post by youletrindie116 » September 30th, 2022, 9:54 pm

Hostel lam panin ka kal zui nal nal,keiai aia athinrim zawk vang te chuan ka haw hlur tawh.Ka room a ka pen luh rual in Bag ka vawm thla hnawka,khum lam pan zuiin ka bawk thla nghal thlawp.Ka awm chhûng ah hian min kher nget nget tu a awma chu chuan min ti hah vek thei.







Tumah hmuh leh biak ka duh rih loh vang chuan Phone ban vat in ka off zui a,mu tûrin ka in siam rem nghal.Mahni chauha awma in ngaihtuah ka mamawh ber rihin ka hria,ka awmdan mawilo tak vanga in chhir lo turin ka in fuih sauh sauh bawk.







Khumah mu hlun in rizai chuan ka in vur ṭha sauh sauha,enge ka duh chiah hi ni ta ang le.Rinsangpuia hnaihloh hi ka duh tak tak nge nia,hlat hi ka hlau hle zawk.A awmdan leh ṭawngkam ngeiawm tak te vang khan ka han haw dawn dawna,mahse tih hi a awm leh tlat ṭhin.






Hmeichhe dang bula a awm in nuamlo tihna ka nei lian hlea,ka bulah awm tam lo mahse a awm changin nuam ka tih zia ka hre tawh bawk.Tunah chuan min haw viau tawhin ka ringa, alakah chuan ka lâng tawh viau ngei ang.







Zanriah pawh ei peih lo in ka mu ta renga,lehkha zir lam alang theiloa ka ipik in ka awmdan apiang chu ka ning vel vek tawh.Mu hil thei chuanglo in zanlai dâwn thleng chu ka in let seka,ka hne ta deuh bawk nen ka khum bul dawhkâna ka Phone dah chu ban in ka hmet nung leh ringawt.






Ka ṭhiante min lo Call na leh Message a awm nuala,ka zawn ber erawh ka hmu hauhlo areh hian areh vung vung mai.Min lo biak rinna nei hauhlo chungin minlo bia em tih ka en nawn sek thunga,ka awm dan hian min ti hah vek tawh.Ka ṭhiante min lo biak na pawh chu chhang lem lo in mut hilh tum in ka in khuh ṭha leh sauh sauh.







Ka phone ri vang chuan ka harh zawka,meng chiang mang lo chuan ka bana ka en chian chuan ka nu Call alo ni a,ka lak rual chuan ka ṭhat leh ṭhat loh thu min zâwt hmasa bera,min ngaih thu leh in enkawl ṭha tûrin min chah mawlh mawlh bawk.Rei tak pawh in be lo in kan dah zui maia,tho chhuak in ka in bual zui nghal.








College ka thlen chuan thawk ka la hawk a, pangngai thei ang bera lan tum in kan nui lui vela awmzia a nei tamlo ṭhin khawp mai.Min hmuh rual chuan ka ṭhiante'n min rawn hnaih nghala,nimin lama thil thleng engmah an sawi chhuaklo,chu chuan ka awm ati nuam deuh.







Kar thara kan tlâng lawnna a hak tur leh ken tur te sawi khawm in kan nui ho leh dar dar thei tawha,keipawh ka thawl deuh huai tawh.Class ṭan hnu thlengin Hruaii hmel hmuh tur a awmlo-a,achhan erawh tumah ka zawt duh biklo.








Nilêngin Hruaii leh Rinsangpuia hmel ka hmu loa,ngaihven loh tum viau mah ila an pahnih a ka hmuhloh veve vang chuan chhûngril ah hreawm tihna ka nei.Khawnge an kal anga,enge an tih dun ang tih vel mawlh chuan ka rilru aluaha,an pahniha an kalloh rual danah an awm dûn turah ka ngai hmiah bawk.Tesin an in kârah engmah a awm loh thu sawi tawh mahse enge maw tak awm in ka hre thunga,chu chuan na min siam bawk,in zawmna pawh nei hauh silo hian a awmdan avâng hian ka na fo tawh chu anih hi.









Thil danglam engmah thleng lo in kar kan hmang tluan leh reng tawha, Rinsangpuia pawh hmu zeuh zeuh mah ila min be tawh ngai lo mai ni lo in min hria ang pawn a awm tawh ngailoa, aṭhiante kan zînga an lo tel ve pawhin akal hrang nalh zêl.Hruaii nên ka hmu dun foa,huat loh hmel zet in abulah chuan hlim hmel apu sarh reng zêl.








Weekend pawh a dân pângngai in ka hmanga,ka in khawm tih loh chu khawiah mah chhuak lo in room ah ka in khung deuh chawta,ka room piah chiah ami erawh hmuh tur awm lo in abo vang vang thung,hun nuam tak an hmang ani chék ang chu.








Kar bul kan ṭan leh ta a, naktuk mai hi kan kal hun tur ani tawh bawk.Chhuanlam ṭha tawk siam tûr ka hriat miau loh vangin ka kal ve ngei chu a ngai dawna, phûrna reng reng ka nei lo thung.Ka pehhêl reng thei dâwn biklo tih in hria in hmu reng chunga bânsan chu ka tum ta zawka, midang bula ka awm chuan pangngai thei ang ber leh hlim ber anga lan ka tum hrâm hrâm ṭhin.









Zanah chuan kan ṭhianho group ah kan ken tur leh in thuam dan tur te sawi ho nak nak in rei tak kan in kawm khawma,an phur hmel hlawm khawp mai.Midang hnêna ka rilru awmdan dik tak anga lan chhuah ka hlauh em vangin ka awmdan lo pui in ka khawsa ta ṭhîn a,ka ipik ati zual in ka tawt up up reng ani ber.









Ka ngai ṭhina mahse tihlan tumna ka nei lo thung,der dep tak leh chakloh na tam tak nei ni mah ila ka in duh tawkna bang hi ka dah sâng a,tuma vuak ṭhiah ka phallo bur bawk.






Naktuka kan kalna tur chu ngaihtuah in ka phur fa lua lo khawp mai,mahse ka pehhêl theih miau loh vang chuan hreawm taka nileng hun hman ka tum hauhlo thung.Kal chhuah hma kan ngaih vang chuan mut hma tum in khum lam bawk ka pan leha,rei rial lo in ka mu hil thei ve mai bawk.








Zanlama ka ken tur te ka siam sa tawh vang chuan ka thawh veleh in phih fai in ka in siam zuia, kan kalna tur ahlat tham deuh vangin chhuah hma kan ngai dawna,ka in siam lai pawh chuan zîng hma tak chauh ala ni.









"Engtin nge kan kal dawn, bus chuan ka van peihlo tak..."Tetei chuan ati nang nanga,tumah kal hran phal anih miau loh vangin scooty a keng thei bikloa,a hmel ah chuan bus chuan a huphurh zia ahriat theih.







"Kan zai vak vak dâwn nia bus chhûng ah anuam zawk daih ang"adara kuah pahin Tes in ati zui a,tlêm chuan aphur hmel ta deuh.Ṭhutna awl la tam deuh ber nia kan hriatna bus lam pan chuan kan in zui pheia,eitur neuh neuh keng nualin tlêm chuan ka phur ta deuh.








"Teresa hetah lo chuang ru"ti lâng lâng tu lam chu kan en ṭhapa, Zoparan kut vai lauh lauh in min lo ko a,kan vai chuan engmah sawi zawm lo in an chuanna bus lam pan chuan ka phei a.Kan luh chuan awm an lo tam vak loa,Hruaii hmel ka hmu nghal zat bawk, Rinsangpuia bana vuan ran in ahnung ber kil ah hian an lo ṭhu a,kan kalna lam an rawn hawi rual chuan ka hawi san nghal vat.







A hnuhnung ber tlarah chuan an ṭhianho an ṭhu veka,awl la awmah chuan Lawmzualan Puipuii a ṭhut tîr thuai bawk.An hma chiaha awl ah chuan Tetei leh Tes-i an ṭhu lut zui nghala, ṭhut pui tur ka neih ve loh vang chuan an ep chiah awlah keimahin ka ṭhu zui ve bawk.







Kan ṭhut fel hnu rei vak lo ah chuan midang pawh an lo lût ṭak ṭak a,kan Class ami te ai mahin kan Senior te an tam zawk.Kan class CR Nunfela chu rawn lut ve in ka bula ṭhut na awm ah chuan ṭhut ve arem leh rem loh min rawn zawta,lu ka bûk khum zeuh hnu chuan a rawn in hnawh zui ve nghal mai.











Kan luh kim hnu chuan kan tum ram panin kan tlan chhuak ta a,sana ka en chuan kan chhuak tlai hranlo in ka hria.Lânga kal tûr kan nih vang hian kan chhuak hma khawp mai,kan kal na tur hi Mizoram a tlâng sâng ber pawl a nia, tlawh nasat pâwl tak ni lo mahse kal tawk hi an awm ve reng ani awm e.







"Hla ngaihtlak i duh em"Nunfel an atih chuan pawi ka ti hranlo, ṭhut ngawt ngawt zawng a ninawm duh emai.A earphone phawrh in a phone ah a vuaha,a lehlam chu ka bengah arawn hnawha,a phone bawk chu hmet leh mual mual in ka hla duh deuh arawn play nawlh.







"Awi!i ngaithla ve ṭhin elaw"nui var var in ka tia,a hla duh ber pawl anih thu in min lo chhang.Tukverh darthlalang chu nghêngin a ri lo in ka phun rem sep sepa, maimitchhîng in ahla chu ka feel thei leh zual.







Engtik laiin nge ka lo muthilh pawh ka hrelo ka harh chuan Nunfela darah ka lu nghat in ka lo nghêng ar ar a,ka awmdan chu hrechhuak thutin ka ṭhu ngil nghal at."Muhil mai mai rawh pawilo"kiai suk hian ka bula mi chuan alo tive a,nui tawi tak in ka in siam rem zui thuaia nuamlo ka ti takzet.







Kan in kawm ngai emem pawh ani siloa han biak dan vak tur hi ka hre lo ṭhin,ani erawh hi chuan nel tak hian min be ve reng ṭhina a rûl tawk bakin chhan na pêk dân tûr ka hre ngailo thung."Kawng chanve kan thleng ṭêp, i duh phawt chuan muhîl leh rawh"ati leh supa,lu thing ner ner in ka mut chhuah tawhlo thu ka hrilh ve bawk.







Ruah tlêm in a rawn tla a,mutchhuak bawkin min zem leh ṭan tawh.Ka lo muthlu leh pek chu ni in ka harh chuan Nunfelan ka nghen chhan tukverh chu khar tum in min bawh kan hian tukverh chu alo ban ṭawk ṭawk a,ruah sur ri ka la hriat vang chuan alo theh niturah ka ngai.






A ṭhut ṭhat leh dawn lai tak chuan kawng chhe lai kan kal fuh angei ang Bus chu a nghing dawta,ka bula mi in ring hman lo chu ka hmaah tak arawn bawk thla thlawrha,chu mi rual deuh thaw chuan kan nghenchhan chu tlawh tu an awm tih hriat tak in a ri zui dup.








Nunfela a ṭhut ṭhat hnu chuan ngaihdam min dil nghal malh malha,"ruah asur tam deuh sia alo theh chea ruahin "inthlahrun hmel fe hian ati charh charha,kei erawh chuan lo tlawh tu chu tunge tih hriat tum in hnunglam ka hawi thung a, Rinsangpuia nên kan in a in tawng chat,rum zeta min melh zawk in a maimitchhîng zui nghala,be bik lo in ka in siam rem leh nghal thuai.








Nunfela inthiamlo hmel lutuk chuan ka awm ati nuamlo letling zawka,"aho lutuk i thiamloh anih loh kha"nui sang in ka ti a,a pawi lai arawn bawh fuh em loa ka haw hranlo khawp mai,a tih luih ani lo bawk nen.







Ruahsur pawh a hán ve tawha rei fe kan tlan leh hnu chuan kan thleng thei ve hram.Zi mar ar ar in ka tho chhuaka,ruah tla tawhlo mahse khua chu a nuam fahran lo hle,ramhnuaia kal tûr kan ni bawk nen khaw awmdan chuan min ti phur lo zo vek.








Ril aṭam ṭan dera, zirtirtuten eitur an pai sa te chu kan chhuah hmaa ei fel an rawta atih zia phian."Motor in rui ve em?keicu ka ni bur mai"tui in khawlh khawlh pahin Têtein ati a,midang pawn an awm nawm vak loh thu leh ruah tlak nual avanga kal an phur vak tawhlo thu te chu an sawi ve sap sap.







Kan in ei puar tlân hnu chuan kan kal chhan ber titur chuan kan in puahchah ṭan a,fimkhur tur leh kal hrang lo tûrin kan zirtirtu te chuan min hrilh bawk.Kan kal ṭan hnu rei vak loah chuan ni pawh a rawn lang ṭan a, marawhchu kawng erawh adiak in ala hnawng churh thung.








Puipuii leh Lawmzuala kan hma ah kal in an in chhaih nui uarh uarh renga,an fiamthu thawh te chu hnung lam aṭangin kan lo nuih pui ve bawk."Vangvat a awm vaih chuan aw keichu ka ṭap animai"fimkhur fahrana kal chung hian Têtein ati sap sapa,ahmelah a hlauh takzet zia ahriat theih.







"I hlau ve em?"min melh ha chunga atih chuan ka hlauh tehchîam loh thu in ka chhang ve mai, thingtlanga pianga seilian ka nihna vang nge hlauh tehchîam hi ka neih ka hre ngailoa,ka naupan deuh lai phei kha chu ka huai em vang khan min hauh phah zawk ṭhin a,i at huai min ti fo ṭhin.




Kan kalna china bawlhhlawh kan hmuh apiang chu a dahna tur kan khai ah chuan kan khung lût zela,rinai tak in tihfai tur chu a tamlo."Ka duh lo,hei ka mal ah hian che relh relh a awm ania la vat ru"ṭap pur in Tetei a au chiam.







"Khawi ka lo en ang ,lo che lo la"tiin ka ṭhu hniama,ka en nak chuan alo awm tak tak!!"I mitchhing rawh"tiin ka bul maia hnah chu bal in Vangvat lian ve pangngai tak awm chu ka lak saka,kan thlang lam ruamah chuan ka paih thla nghal bawk..






"A awm tawh lo e,meng tawh rawh i hre hma hlauha a zúk hmanlo che nihkha"tiin ka tho chhuaka,ka ṭhiante chuan min lo melh ṭhap.Hawi kual thuakin"Tinge?"ka ti thawr a,"Iva huai ve"Zopar an alo ti chhuak hap.









Nui hak chungin"khatiang mai mai hlauhawm loh"ka ti puat a,engmah sawi zawm lo in kan kal zui leh mai bawk.A hlauh emem in atih buai takah chuan ahma angin amahin akal ngam tawh der loa,Tetei chu mi si chet hian a kal a,ka bânah avuan ṭung bawk.






Kan hnung lama hmeichhe thlabar au ri vang chuan kan leh hawi thuai a."A thi nia,la vat rawh"ṭe chulin Hruaii chu azuang tawr tawr a,engmah sawi lo in kan en reng ringawt."Lo che sek lo la,ka la thei hleinem"kûn hniam in Rinsangpuian ati zui kha kha a,mittui tla púr in a ding khawng lah tawh.










A ṭhut na bul chiaha hnim hnah chu bal in Hruaii chawna Vangvat sei ṭial lian zet chu a la tâwk a,a vawm bo zui nghal bawk."I hlau ve lo emaw tia"ngeiawm rawng kai lek lek hian Puipuiin arawn ti chhuak hlawl."Ka hlau lo ka ti rêng rêng lo,dawtin min puh hlek suh"vin zet hian a ti khar khara,a la kai em tih hriat tum ni awm tak in a in thlek zui nghal.








"Huai hle mai"zawi sepa phunin Puipuii chu hmalam panin akal zui nal nala,keini pawhin kan zui ve nghal thuai.Tlema kan kal fal deuh hnu chuan an sawizui nak naka,"A in lâk huai tehreng nen ahlau ber ani reng sia"nui tet tet in Puipuii aphun phei char chara,keini pawh kan lo nui ve tawp ringawt.







Kan kal na achho angreng sia kan chau tlang fu tawh mai,ka thlan atla ṭan tawha keipawh,ni asat tak deuh vang chuan min hmet chau tel in ka hria."Chawl lawk ang ka hah tawh emai"tiin Tetei chu lei charah a ṭhu hnawka,a thaw zui hliam hliam bawk.







"Kha tui in rawh"ka tui bottle ah chu phawrh in ka pe a,abulah chuan ka ṭhu thla ve bawk.Kan hmaa kal te pawh hmuh phâk ah an chawl ve sap sap hlawma,kan hnung lamah lo kal anla awm nual bawk.








"Puii te chu anva kal chak ve"kan chawlh na a rawn thlen rualin Tes-in arawn ti zui zata, ahnungah Zopara leh Nunpuia an lo kal ve bawk.Anu entira phaia an kal vangin Jacob arawn tel ve thei lo thung."Khawnge tuaia tehi"tia Nunpuian zawh bik neiloa atih chuan "khuutaah kan hnung daihah an la awm, Lalhruaitluangi kal muang lutuka"thaw hlawp hlawp chung hian Tes in achhanga.







An awmdan vanga ka awmdan thlak danglam loh hram tum in ka in pet ruh nasa a,ka thaw ipik ṭun bawk."Khawpui nula awm in la no ho hi an buaithlâk"tiin Zopara a chek hlaka,"ka zu ngaihven dâwn maw ni"ati deuh sek bawk.








"Tui te ina kan han ṭhut chawlh vang vang hnu chuan kan kal ṭan leha,kan tlâng lawnna hi hmun hnih aṭanga achhip zawl pawh theih anih vang hian Group hniha in ṭhen in kan kala,kal kan tam lutuk loh vangin hnunglama kal tan pawh tihfai tur chu a awm chho ve reng.









Rei tawk fang kan kal leh hnu chuan tlâng chhîp chu kan han pawh ve ta hram,atam zâwk chu lo thleng khawm tawhin an chauh ve hmel hlawm khawp mai."Lo ṭhu ru hetah"tiin Puipui in minlo au zuia,an ṭhut na bulah chuan kan va ṭhu ve ṭhap.







"An lo la thleng ve na nge bawiha te hi"tiin Lawmzualan kan thlen phei rualin alo tia,an kal fâl deuh hlek vanga kan kalsan thu in kan lo chhâng.Tui te ina kan hahchawlh vang vang hnu chuan Rinsangpuia leh Hruaii tepawh an lo thleng ve hrama,an rawn in paw chho ka hmuh chuan ka na zawk thei.








Hmundang pan bik lo in kan awmkhawm laih na laiah chuan an rawn phei ve nghala."A ke a tina a,kan lo tlai deuh"biak bik neilo in ati nghal zung zung, pangchang zetin Rinsangpuia si chet hian a ṭhu a,a tui um ken lai chu a bula mi chu ape zui zat bawk.






"Engtin nge itih nat-a,khawmaw ka lo en"tiin Tes-in ahnaih nghala,na lo tê a akhawih pawh chuan a ṭe ṭhat ṭhat a,en pawh ka en ve lo."A zia maiang hahdam la"a enkual vel hnu chuan Tes in atuam ṭhat saka,alo 'ai ah'leh zeuh zeuh ṭhin.






Rinsangpuia ngaihsakna a dawn vang te chuan ka lo na veng veng thei,khatiang tak khân alo in pe zo chu ani sia; duat zo vek teh se!




"Lo kal khâwm ru le,,, ei leh in buatsaih ila kan in eipuar anga induh chuan thla te la in, in la hawi thawveng thei ang"Sir Andy an atih chuan kan tho suau,kan kal chau ve bawk nen ril a ṭâm duh angreng hle.







Kan in ei fel hnu chuan in seng fel sawk sawkin thla lâk hna kan ṭan chu ani ta ber a,a ke na ber chu a phur phur ah aṭang.Tlangchhip sang laiah te chuan ding khawm in thla te kan la a,ka ṭhiante ho chuan nuam an ti dar dar viau mai.








Khua alo tlai angreng tawh hlea,ni sat dan anep in a chawhnu ruih tawh mai,kawngpui pangngai kan thlen thlak leh meuh chuan ni pawh a tla fel hman tawh maithei tih tur vel ani.







Kal chhuak mai tura kan in buatsaih mawlh mawlh lai chuan Ka zun achhuak tlat peka,puan lian ve pangngai tak ka ken tho vang chuan tumah hrilh lem lo in tlêma hmun fal deuh han zun na mai tur zawng chuan ka kal hrang a.







Tlângchhîp aṭanga pen hleh deuh hlek kawng fai ve deuh lai chu zawhin ka kal thla zela,midang hmuh phâk lohna chin nia ka hriat na lai ka thlen chuan in siam rem in zunram ka thiar a.Ka kekawr zipper ka zih ṭhat hnu chuan kal mai tum in ka han pen a,ka kalna lai chu hmun rual rem lo ve tak anih vang chuan ka fimkhur hle.








Pen hnih bak ka pen hman lo tihah chuan ka lei rah chu thawp sut in ka ding nghet zo ta loa,in vawn tan tuma ka beih mek lai chuan ka pheikhawk hnuai nal deuh vang nge hnunglamah ka tawlh thla ta thut.Ka awmna lai chu a awih ang reng bawk nen in vuan tâng hmanlo in ka lum thla chu ani der.









Eng chen nge ka lum thlak tawh ka hrelo,ka lu ka sawh lai chu ka hre ruai chauh tawh.Ka harh leh meuh chuan khawnge ka awm ka hre ta hauhlo mai,hnim pik tak karah hian ka lo tâng a,ka che sawn theilo bawk.Engtiang chiaha rei nge ka lo awm tawh lah ka hre heklo,van lam ka hawi chhoh chuan khua athim ṭan tih ka hre theia,engchena thui nge ka lum thlak ka hreloa ka awmna lai chu ka hre hauh lo bawk.







Ka tân na hnim chu apik phui deuh mup a,ka taksa na lutuk vang chuan che sawn ngam lawk lo in thawk ka la leh hawk ṭhin.Ka ngaihtuahna abuai em vang chuan mangan ngaihna ka hreloa,ngaihtuahna atawi tak mai.Ka lu chu ahit mum mum renga,ka khawih nak chuan alo pawng ṭul mai.




Ka ke chet tuma ka lek kâng tur chu ka ṭhulh leh rang khawp mai,ka ke dinglam chu a ruh ka sawh ani ngei ang ka chet ngam lo.A nat lutuk vang chuan ka mittui atla sawk thei,khua lah chu athim telh telh leh ta nghala.Eng chhit tur engmah ka neiloa,ka Bag lah ka ṭhiante bulah ka hnutchhiah bawk si.






Rilru a fim tial tial a hlauhna in ka thauah min man ṭan ta,sava hram ri leh rannung eng eng emaw ri chiah chiah hriat tur a awm renga,dai tla in ka awm na lai a tih hnawm chup bawk vang chuan ka awmdan chu ahreawm tak zet.







Thâwm ka chhuah ngam loa,che sawn tûrin chakna ka nei tawh heklo.Ramhnuai chhap mup kâra awm ka nih vang chuan khawi hawi azim hlea,van sang takah thla chu eng ruai mahse ka awmna lai ên tûr khawpin a êng tawklo.Chingpirinu hram ri ka hriat rual chuan ka ip zawk thei,enge anih hremah ila a hram ri chuan ka kawchhûng hi ati so bulh bulh theia ka hlau tawh takzet.






Ramhnuaia mahnia vawikhat mah la kal ngailo ka nih bâkah hetiang hmun reh leh hlauhawm ah hian vawikhat mah kala awm ngai loa pachang chu har tak ani.Ka hlauh em vang leh ka ṭhiante bulah awmve ka chak em vang chuan ka biangah ka mittui aluang zawih zawih reng a,a lum thla pup pup thei.







Ka ril aṭam tawh hlea,ka tui a hâl emem bawk."Ka ṭhiante khan min zawng angem?min zawng emem ang,an mangang viauin ka ring bawk"keimaha phun melh melh in ka ti sep sepa,ka awm na chhak lam deuha eng emaw che hrat hrat thawm chuan ka hlauh na ati zual chiang kher mai.








Thawk pawh thaw ṭha ngam lo in ka ká ka hup bet tlata,ka awmna lai chu rawn hria in min ei zo maiang tih hlauhna chuan ka taksa chu ati khur dar dar.Ka che ngam tawh loa,ka taksa khur nasa lutuk bengdaih tum chuan ka bei ṭang ṭang bawk.









Rei fe athawm ka hriat hnu chuan khawilam nge a pan chiah tih ka hre thei tawhloa,a ri chu ahla telh telh a chutih rualin ka hlauhna erawh chhe te pawhin a kian phah hauhlo thung.Ka hlauhna nasat em vang chuan ka thlan tui in min chiah huh vek tawha,ka ban chup bawk.








Hauhuk huk ri dur dur ka hre zeuh zeuh a,eng ramsa nge tih hriat loh thawm a awm leh ṭhin bawk.Ka awmdan ngaia ka awm reng chuan min zawng pawh nise min hmu thei in ka ringlo.Ka kalna tur ka ṭhiante ka hrilh lo leh keimaha ka kal hrang chu pawi tihna hlîr in ka khat a,inchhîr in engmah awmzia anei silo.







Ka chhungte ka ngaia tuna ka awmdan hi hre ta se min van khawngaih dawn tak em.Ka chakna zawng zawng sâwm khawm in ka awm na lai chu chhuahsan ngei ka tum.Ka rilru in ka ṭawngṭai malh malh renga,sawi tur em em erawh ka hre hauhlo thung.Min chhanchhuak tûrin ka dil mawlh mawlh a,tu emaw tal lo tîr se ka ti takzet!!mahni chauh chuan ka awmna ramhnuai hi azau tham ema ka mal takzet ani.








Ka ke ruh na lai chu kal pui harsa ber tur lai chu ani,engtin nge ka tih ang tih ka ngaihtuah vang vang hnuah ka kawrbah hak lai phel in ka tuam ta ringawt a,achhawk phah dawn em tih hrelo mah ila ka ngaihtuah chhuah theih awm chhun ani rih tlat.





Ka lungphu adik theiloa,hetiang thil min Shock dawr thei hi ka vawikhat tawnna ani hial ang.Ka bul vel chu ka hmu thei riai riai chauh a,ka in hawl na tur chu ka dap ruk ruk.Ka zawn fe hnu chuan hawl mai theih tur thing ṭang lian deuh hlek chu ka dap fuh ta hlawl mai.







Ka huaisenna zawng zawng nên din chhuah tum chuan ka bei leha,vawi enge mawh ka hlawhchham hnu chuan ka chhuak thei ta hram,ka lo awmna lai kha tlêma hniam deuh leh hnim pik in a bawh khah lûk na lai anih vangin chhuak tur pawn beih fe angai reng ani.






Ka kalna én tu tur ka neih miau loh vang chuan kan ding leh ren rawn phawta,khawilam nge ka pan ang ka hrelo tak zet.Ka kal hran dawn khan min hmutu an awm ka hreloa,awm ta se chu min hmuh tawh awm tak ani bawksi.







Midang awmna hlat tham ve fe a ka kal vang khan helai daih daih hi min rawn zawn thlen ka ring loa,khawi emaw lai tak chu ka pan ngei angai ang.







Rannung hram chi chuah chuah kârah chuan ka theih tawpa chakin ka pen a,ka ke lehlam anat miau vang chuan kal chak harsa tak ani.Thla êng bak rin tur ka neih loh vang chuan ka in pal leh khut khut ṭhin,tho chhuak in ka kal zawm leh zela ka hah tawhin ka ke mawlh chu min tur na vang chuan ka khuasik hialin ka hria.








Ka hlauh na leh hahna in chawhpawlh chuan min ti chau tawh hle,dam khawchhuah ka duh anih chuan beidawng loa ka kal zêl angai si,ka awmna lai chu tuman an rawn zawn thlen ka ring lo a,beiseina ka nei hauhlo bawk.






Eng chena thui nge ka kal tawh ka hreloa,ka kalna lam chu kawng dik ani em tih takngial pawh ka hrelo.Ka lumna lamah ka puan bah kha ka thlauh ni ngeiin ka ring a,kawr ban tlawn ka hak lai kha Bag chhûngah ka dah daih bawk nen ka ban te chu an thak sup supa,a pilh nian bawkin ka hria.








Thui ka kal leh hma chuan ka kal san tawh lama thawm ri rawn hnai zêl chu ka hre pha kara,a ri aṭang chuan sa lian tak anih ka ring.In phen na tur remchang a awm miau loh vang leh tlân thei ka nih miau loh vang chuan ka lo nghak hi ani tawp tawh.Ka hlauh em vang chuan ka taksa pumin a khur chhuak veka,ka lung phu ri dup dup chu ka hre pha hial in ka hria.






Thawm ri lo chhuahna lam chu ahnai zela,ka hawl lai tiang lian lem lo tak chu hum ran in engpawh chu nise ka theihtawpa beihlet chu ka la tum fan.Ka awmna lai chu êng tha ve tak hian a rawn chhun pha det det ṭan a,ramsa chu an ni lo tih ka chiang thei ta.










A lo hnai zêl a,ka ken lai chu hum ruh tawh tak ka ni.Ka awmna aṭanga pen sâwm vel alo thlen chuan a ding dat a,a êng kena ka hmai zawn a chhun vang chuan ka meng ṭha theiloa,ka kut in ka hmai zawn chu ka hliah ta ringawt.







"Lalrinhlu"ka aw hriat ṭhan tawh takin arawn tih vâng chuan ka phu zawk thei hial,tu dang nilo in Rinsangpuia ngei ani.Min zawng angem tih pawh ka ngaihtuah loh laiin min rawn zawng hmua,ka tan chuan beiseina par chuai tawh, a zung chawpa ro mek chu lei ṭha pe a châwm nung zêl tura ka hnena rawn thleng ani.









Chhan pawh chhâng thei lo in ka mittui abaw zawiha,ka tiang ken lai chu ka paih thla hnawk bawk.Min rawn pan hnai in a awm si chet in min kuaha,a lungphu dup dup ri chu ka hre thei.A taksa rinchhana ka awm meuh chuan ka hnuk ulh azual in ka tap bang thei meuh tawh lo.







Keimah chauha ka awm lai kha chuan a ri pawn ka ṭap ngamlo kha a nia,he pa bula ka awm meuh chuan ka insum theihna te bang ṭhiah sakin ka awm a,duat taka min kuah na te chuan ka lung a ti chhe zuala,ka theihtawp nghet in ka kuah let ve bawk.







"Bang tawh rawh le,ka lo thlen tawh hi"dam dap a tiin ka sam pawr phung tawh chu a tuai hauh hauh paha,chutia min ṭawng thlamuan na te hlei hlei chuan ka mittui ako hnai zêl emaw tih tur in ka bâng thei lawklo.Duhtawka ka ṭah hnu chuan in hnit faih faih in ka dâk chhuak ve hrâm,ka mittui tlakna vangin a awm zawn chu a huh dap thei hial.







Ka dah chhuah rualin ka hmai zar tu sam chhâwl lêng te chu hui kiang in ka biangah a kut pahnih in a dawma,ka chalah fâwp in"Min ti mangang lutuk,ka hmu tawh ngai dawnlo che emaw ka ti hmana"thaw chhuak halh in ati a,ngawi rengin ka lo awm tawp thung.






"Vawikhat mah ka hmuh phak loh naah kal tawh suh ang che'thu pe aw zet hian dam thlup tho siin ati leh charh charh.Ka lu bûk khum in tlêm in ka in la hrang hleka,a hmel en tuma ka dah chhoh hnu pawn thla eng dul tak vang chuan ka hmu thei riai chauh ani..








A phone phawrh in a hmet nghal mial miala,"Signal a awm hlauh tum hnih"ti chhuak halh in tu emaw hi a phone a,"Aw bawiha ka hmu tawh e,ka lo lêt pui dâwn an vai khan kawngpuia let tûrin hrilh rawh"tiin phone chu a ak zui nghala,phawrh ṭha leh in a ti êng a,na ka nei em tih hriat tum ni awm tak in min en kuala,a chek zui hlak bawk.








"Khawi maw i ke kha ka lo en ang,phone hi lo chelh rawh "tiin min pe zuia,ka lo ban ve vat bawk.Ka tuamna chu phelh in a thlek vang vanga khawih che lutuk lo in atuam ṭha leh a,rawn hawi chho in a mitmenga min lainat na lang chhuak hian min en in"na dang I nei em?"tiin min zâwt a.


"A na vek"pangchang aw lek lek hian ka ti chhuak sap,dawt sawia ṭha awm taka lan buai ka peih vel lo.Ka chhan dan vang chu ni maw a nui suka,ka hmaah tak rawn ding in ka in rin hma hauhin ka hmui ah a rawn fawp thuta,ka hamhaih em vang chuan ka ding khawng reng ringawt."Damdawi anih kha"kiai suk a tiin ka hmaah bawk a ṭhu thla leh a."Lo kal rawh le"tiin min puak tum ni awm tak in a in siam rema,"min paw dâwn maw?"che châng lo hian ka lo ti ha.
"Lo lâwn vat"tiin min melh rana,sawibuai tawh bik lo in ka pan hnaia,zo zet hian min thawh pui lawpa akal nghal nul nul.

https://play.acast.com/s/6336ea9126666100129b6a62
https://play.acast.com/s/6336ea9126666100129b6a62?olo
https://play.acast.com/s/6336ea9126666100129b6a62?fan
https://play.acast.com/s/6336f7e8d5ba6300123c634f
https://play.acast.com/s/6336f7e8d5ba6300123c634f?olo
https://play.acast.com/s/6336f7e8d5ba6300123c634f?fan
https://play.acast.com/s/6336fbc226666100129b86bf
https://play.acast.com/s/6336fbc226666100129b86bf?olo
https://play.acast.com/s/6336fbc226666100129b86bf?fan
https://play.acast.com/s/6336fed33823e20012494689
https://play.acast.com/s/6336fed33823e20012494689?olo
https://play.acast.com/s/6336fed33823e20012494689?fan



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)