Ka Vawk Pu Chapter 30

Episode kal lai dah luhna

Moderator: writers

Euricka
Posts: 183
Joined: July 23rd, 2022, 12:23 am

Ka Vawk Pu Chapter 30

Unread post by Euricka » September 30th, 2022, 10:22 pm

Ka Vawk Pu


Chapter 30:





Ka inthiar chhûng,ka kal bo hlau ang mai,kawngkaah dingin min vêng tlat a.Duh ang pawhin ka inthiar thei lo,ka thlim ta emaw tih mai turin min melh run run lehnghala.






Ka zawh hnuah pawh a dinna ngaiah dingin,min la en ngar ngar a.A bulah kal hnaiin,a hmaah chuan ka ding rên râwn a.Chet pawh ala chêt sawn eih loh avâng chuan,a hmai zâwnah ka kut vai in,"engnge i ngaihtuah?"ka ti zawi sap.






Ka biakna chu hria ang pawhin a lang lo,a melh ngai a melh tak reng avâng chuan a hminga ko leh in,a kut ka vawn sak nghal a.A ngaihtuahna aṭang a rawn harh chhuak ve ta aniang,a lu a thing nawka,a mit khap sukin,a kut chuan a nuai leh a.Phawk taka min en in,"Chawngmawi"ati buh nuai mai.





"I ṭha em?min hmu thei tiraw?"ngaihṭha lo tak chuan ka ti a.Min en dan kha min hria ang pawhin a lang lawk lo anih kha.




"Chawngmawii ka kianga a awm chuan ka ṭha animai"tiin min kuah leh hlu hlu a."Vawiin chu kan mu nileng mai dâwn em ni?"ka beng bulah a rawn ti sur sur mai,a za lutuk chu ka lo ip leh chawih mai.





"Mu tawh lovang,ka ril a ṭam"tâl chhuah tum chung chuan ka ti ve bawk a.A za ka ti tih a hre laklawha,min man bet in,ka darah a khabe a rawn nghat anih chu.Ka sa huat lai kher ani lehnghal,"Rinzam,a za ania"nui chung chuan ka tal vak vak a.






"I sawi ka hre thei lo"ti chungin a khabe chuan a rawn nawr leh tawk tawk mai."A za,min thlah rawh" a za bawk si nuih a za tel bawk nen ka tal vak vak hnuah min thlah ve ta hram a.





Min thlah rual chuan room aṭanga tlan chhuak in,pawnah ka tlân chhuak nghal vang vang."Chawngmawi"ka hnungah min rawn zui chu niin."Min rawn hnaih suh"tiin nizâna kan inthlakna hmun pan chuan ka tlan chho zel a.Ke lawngin ka tlân bawk si nen ke ana duh viau mai.





Nizâna kan in thlakna in ka ti ringawta,guest house ani zawk mah ang chu.Guest house kawt ka thlen rual chuan Fakzuala leh Hmingsanga te boxer chauh ha in,sam pawr chhapin an rawn chhuak ve mek bawk a.






Hmingsanga'n min hmuh rual chuan,a awm a hup nghal chawih mai.Fakzuala pawh chuan min lo en ve nghal a.A ka hup in, lêt turin a kut chuan zai zir in alo ti bawka.Engnge maw an hriat le,an kawr ha lo chu an zak viau ani phawt anga.





Ka hnung lam aṭang puan hlai takin vawk pu in min rawn khuh hlun a.A lum lum nen ani pawh chu engnge a hriat.





"In mit kha,lo veng ṭha tawh ang che u"Fakzuala te pahnih en chung chuan ati fiah leh fak mai.He pa thikthu chhiat zia hi,a ṭhiante ngei ngei pawh a thik duh ania.A nupui hmelṭhat vak loh zia hi a hrechiang lo tawp anih hi.





"Chawngi zing zingah engahnge Angel thuam nen i rawn tlân.I tho â zawk em ni?"Fakzuala'n a tih pawh chuan,ka bo telh telh.Vawk pu chu en in,"Engnge a sawi awmzia?"ka ti tawp.Ka beng bulah rawn kun hniam in,"Angel ang maia mawi ini a tihna"a rawn ti zawi sup a.






Chu veleh Fakzuala chu ka melh rum nghal a."Fakzual,min it viau suh"ka ti bak hlar mai.Ani lah chuan engahmah ngai lovin,"Tangkeui vanglai pawh i tluk lo"nui chunga tiin Hmingsanga chu a kuah lut leh ta daih a.






Heng non-mihring ho hian eng hmuhin nge min hmuh bik le.An ran vulh te nên min khaikhin ziah hlawm mai.Ran ka ang viau zawk emawni.






"Chawngmawi,han thlîr vel teh,tun aṭang chuan he hmun hi i ta ani tawh.A mawina hian ram tin ala hip ang"tiin kan chheh vela Eucalyptus leh coconut kûng ding ṭhup chu a kâwk kual a.




"Coconut kûng te chu vai ramah a tam si,a hip vak lovang"ngaihtuah vak lo chuan ka chhang liam puat a.Rawn nui chhuak hawk in,"naute tan a ṭha alawm"tiin ka pum a rawn chûl nghal.He pa hian fa a awt tawh hle aniang maw."Fa neih i chak tawh em ni?"a kut vuan chuan ka ti ta ringawt."Peter Pan junior neih ka chak tawh"tiin a nui leh suk mai."Chhûngkuaa football khel tham kan nih hma chu kan siam char char dâwn ania"ti a ka fiam chu a nui dawn emaw tih laiin,a ngawi daih a.





A lamah chuan in her in,"i duh lo em ni?"tiin a mitah chuan ka en kalh a.A mitmeng buai lutuk leh rilru hahna nei tih hriat taka a thaw leh hrâwk chuan ngaih a ti ṭha lo lek lek.Ka en reng tâk avâng chuan ka ngaih tih ṭhat nân za lo tak hian min nuih suk a."Apa team leh Anu team daih tur kan siam dâwn ania"tiin min pawm kang nawlh a.Zawi muangin zan hun kan hmanna in tê chu min pan pui leh ta a.






Khumah chuan dim tê in min nghat a.Puana min khuhna chu phelhin,ka nighty chu muang chang hian min phelh sak leh a.A thil tih tum hria in nui var var in ka lo dawh ve tawp a.*******









Hah tak hian ka chungah a bawk leh thlawp a.Ka beng bulah chuan a rawn thaw ri hawlh a.Keipawh thawk lo la ve in,ka pum a rawn ri rawk rawk mai.Ka chunga bawk mek chu a rawn nui nghawr dat a.Ka biangah fawp zauh in,"naute leh anu ril a ṭam tawh animaw"tiin a in beng kâng nghal a.





"Nichinah pawh ka rilṭam thu ka sawi tawh kha.Min ngaihsak lo lutuk"tiin khum sira ka nighty a hnawl tawm chu la in ka ha nghal a.Awi Lalpa,he thil chauh ha hian Fakzuala te kha ka hmu tak e,hei vang hi animaw khatiang khan an lo awm.






Vawk pu in ha ṭha mek chu lukhama vawm in,"sawi vat ta che"ka ti vin ṭhat.Ka zak lutuk hi ka sa chhuak vek tawhin ka hria.





"Inneih tûkah i tlân nghal anihkha"tiin ala khi sung zui a.Ka run lutuk chu lukham danga vawm leh in,"ka tlân loh kha"ti vin leh ṭhat in,ka thawmhnaw dang ka zawng nghal a.Ani lah chuan ngawi rengin ka thil zawng chu min lo en reng a.





Ka hmuh zawh tak lovah chuan,"khawnge ka thawmhnaw"tiin ka ṭek leh hlê tawh.Ka zawhna min chhang lovin,faifuk rût rût chung hian khum min siam san daih.Bedsheet chu suk turin a dah hrang nghal bawk a.Fel fai taka a siam hnuah min rawn en leh in,"in beng dai rawh Chawngmawi,Siakmawii pawh a thinrimin a hnar a nawr tawk tawk zel ania.Thinrim chuan khaw hmuh a har.Nizana i hak kha i ha leh dawn anih chuan bathroomah a awm"ati duah mai.





"Siakmawii ka nih loh hi"tiin bathroomah chuan ka lut nghal a.Nizana ka inbual dâwna ka dahnaah khawih chet miah lovin a ngai ang chiahin alo la awm.Ka in bual nghal ta ringawt a,thawmhnaw haa ka chhuah leh chuan alo awm tawh miah lo.






"Rinzam"tiin room aṭang chuan ka chhuak nghal a.Ka hmuh tak silovah chuan Guest house ah a chho anih ringin ka tlân chho ve nghal a.Rei lo tê pawh a hmel hmu lovin ka awm hleithei tawh meuh lo chu anih hi.






Guest house ka thleng a,Fakzuala te ṭhian dun chu Chinese checker khel in verandah ah chuan an lo ṭhu a.Vawk pu an hmuh leh hmuh loh ka zawh chuan an meng phawk leh hû tawh."Innei thar tih takah in in ngai hle mai maw.In pa pawhin a rawn zawn ve che kha.Inchhungah a awm ang."Hmingsanga'n a tih chuan, inchhungah ka lut nghal a.Ka inbual tih kha a hre ve reng sia,engvanga min zawng ve ngawt nge maw anih le.






In chung room ah chuan ka zawng chhuak vek a.Ka hmu mai bawk silo chu rooftopah ka chho leh a.Ala awm chuang lo,khawnge maw a kal daih le.






Beidawng takin inhnuaiah chuan ka chhuk leh a.Choka lama faifuk ri ka hriat avang chuan ka lut phei ve tawp a.Faifuk hlarh hlarh chung hian rawng alo bawl a.






"Haihawt lian,i nupui hi min theihnghilh in hetah ei tur ilo siam daih amaw"a eitur siam en dik pah chuan ka ti a.A faifuk lai tawp chat in,uluk tak hian rei fê min en a.Rawn nui leh suk in,"good morning,i ril a ṭam tawh em?"tiin min zawt leh daih.Ka rilṭam thu hi vawi engzatnge hrilh nawn a phut le.






"Ṭam"tih tawpa chhangin,a chawhmeh siam ho chu ka tem kual a.A tel chhuan laiah chuan artui thlâk in,butter fruit a pawlh bawk a.A kawngah kuah in a rawngbawl lai chu uluk takin ka lo thlir kual a.






A siam zawh hnu chuan chaw ei min siam sak nghal zat a."Kalvari zûn uaia te pahnih kha va ko la"tiin a mit ko a san zuk a."Yess boss"tiin ka nui var var a.Fakzuala te chu ka va ko nghal a.






Kan pali chuan kan kil bial laih a.Fakzuala chuan ṭawngṭaina hmang leh in,kan nupa chu thu ṭha min hrilh nghal bawk a.Rilṭam tawh nen a in rem viau lo ṭhin.







Vawk pu rawng bawl chu tui ti takin kan ei ho a."Chaw eikhamah kan haw san rih mai ang che u.Min mamawh chuan red zone in rawn hmet mai dâwn ania"chaw bar chung chuan Fakzuala'n a ti a.





"Ar lu kan rawn hmet dawn ania"vawk pu chuan lo ti liam puat in,ka thlêngah chuan arsa min rawn suah sak nghal a.






"Taka inneih certificate kha in roomah ka dah ania,Chawngi i pasal hi zah thiam la,nangpawh Hranga i nupui hi duat bawk ang che.Kalvari hawi zawng zêlin chhûngkua in din dâwn ania"tiin min fuih leh a.Vawk pu,Hranga a tih chu ka nuih a za ru leh hlè tawh.Vawk pu lah chu alo bu nghut nghut lehnghala,Hranga tih chu a duh reng reng emawni.






Kan eikham hnu chuan kan vaiin kan seng fel a.Thlengsil lah chu Vawk Pu leh Fakzuala'n an inchuh tlat lehnghala.A tawpah chuan "keiman ka lo sil ang"tiin an inkarah chuan in zep in ka sil ta ringawt.An pahnih chuan ka sil fai loh hlau in,chik tak hian min lo en dik a.






Fakzuala phone rawn ri hlauh chuan thaw ati veng ve deuh e.A kal sawn dawn emaw tih laiin ka bula ding chung chuan a la mai a."Martin,Bawiha,i mutui em?"atih chuan ka hawi chhuak zawk a.U Sangtei te nufa an lo ni reng mai,a fapa pawh hmuh loh karah alo lian tawh hle mai.






"Fakduheh toklet a duh"fiah lo tak hian alo ti ve a.A chum buang bawk si,a duhawm lutuk chu ka piai nawk nawk chak."Mmm Isua nu hming sawi phawt la kan lei ang"Fakzuala pawh chuan lo tiin a khi ve sung mai.Martin chuan chunglam melh in a ngaihtuah ve rauh rauh a."Mali"in ti thei tak hian a rawn ti leh,a nuih zawnga a mit a chhing vek te chuan ati duhawm ngawih ngawih.






"Fakzuheh,rawn lei tawh reng reng suh,a rukin ilo pe zela.A ha a chhiat vek tawh hi"U Sangtei chuan a rawn ti lang lang mai.






"Siam leh ila"ka beng bulah vawk pu in a rawn ti ru sur sur mai.A nâka nghawk sak zauhin,ka melh nghal rawm rawm mai."Sil zo vat vat la,in bual dun ang"awmze nei taka min melh in,a nui leh suk mai."Ka inbual tawh"tiin ka thleng sil lai ka chhunzawm leh a.






Ka sil zo a,Fakzuala te an in biak tui êm avangin,be ta lo chuan inchungah kan chho a.






Kan room turah lut in,ka thuam chhawm alo in hung dul mai.Mipa si an van fawm chikim em em,bal bawm thlengin a lo awm vek.Dressing table leh wardrobe te chu ka en kual a."Kalvari zûn uaia hian khum thlengin a lei vek"vawk pu chuan tiin khum zau takah chuan a mu thla nghal a.A mutna bul chu beng thakin,min siai suk lehnghala.Fakzuala chu tlem a zawng tal rulh ve a ngai ang.Apuii ṭhiannu ka nih vang em ni,hetianga alo in sên vak le.Ka lâwm rual rualin ka in thlahrung ngawih ngawih.






"Tah hian kan chêng dâwn tihna em ni?"vawk pu melh hâ chung chuan ka ti a.Chhungte ngaihdam dil lova hetia awm rikngawt chu a dik ber dâwn em ni.A nau te inneih ni ala ni zuia,hepa hian a ngaihtuah miah lo tihna nge,a rilru na hian min nei lui mai mai zawk.






"I duh lo em ni?"khum aṭanga rawn tho pah chuan a ti a,ka awmdan chuan a ngaih a ti ṭha vak lo ani tih a hmel aṭang chuan a hriat nghal a.





"Kan chhûngte bulah ngaihdam dil phawt ila"tiin min rawn pan hnaih lai chuan ka lo nuih tlawn a.Za vak lo hian a nui lui ve bawk a,"He Resort hi ka ta ania,i ta ani ve tawh bawk a.Chhungte ngaihdam dil ngai khawpa thil sual tih ka neih ka hrelo"tiin min rawn kuah leh hlun tawh.Hepa lunglen dan em em hi,a chhûngte rem ti lo chung min nei luia,chu chu a thiamloh ah a ngai miah lo tihna em ni.Engthil nge a ngaihtuahnaah hian awm ve ang le.






"Rinzam,vawiin hi i naute inneih ni anih hi"lungthlu zân lova a awma bei chung chuan ka ti ve bawk a.A rawn thaw chhuak hawka,"kan tello pawhin an innei thei.Keinipawh an tellovin kan inneih hi"a thu lak dân te lah chu,midang a ngaihtuah tawh lo reng reng.






"Chawngmawi,kan Khawvelah hian midang kan mamawh hleinem.Ka châwm zawh loh che i hlau deuh em ni?"min kuahna phelhin,ka darah chuan a vuan leh a.Ka chhânna nghakin min melh leh run run mai.





"Engtinnge min châwm ang"nuih in sum chungin ka lo ti fiamthu a.A tukhum a hiat leh nauh nauh a,"lungngai suh, Rotawta te chhûngkuain min châwm dâwn alawm"vei nei loh hmel tak hian ati leh daih.A vawk te pawh talh a phal ṭha ngai lo ania,vawk ringawta in nghah chu a tih chi dawn em ni.






"Ka hnaah ka lêt leh dawn alawm,nangin vawk i vulh bawka,kan in enkawl zo em em ang"ka ti ve tawp.Inneih hmaa rêl tur inneih hnuah kan rêl ve chauh chu ani si a.Vawk pu generation ah hi chuan thil reng rêng hi a kawkalh nuai dâwn anih hi.Fakzuala'n Kalvari lam hawi zawng zêlin a tih nen pawh a in rem viau in ka hria.






"Chawngmawi,min nei tawha,hna i thawk tawh lovang.Rotawta te min enkawl pui dâwn alawm.Resort ah hian an in tur kan sa mai dâwn em ni?"thil ala thutak lo ṭhin hi alawm ka huat em em.






"Ninawm,ka ngaihtuah pui peih tawh lo che"tiin ka bungrua ho rem fel dan tur chu ka ngaihtuah san ta daih a.






"Chawngmawi,min van ngai lo ve.Min hlat dân tur ringawt i ngaihtuah.Nitin,chhun zan zawmin ka bulah i awm ang,thildang i buaipui tur anilo"ka hmaah dingin a rawn ti leh hmuk mai."Hna thlengin i thik veka,engtinnge ka nun ve ang"tiin a sirah
chuan ka tawlh sawn leh a.






Ka darah rawn vuan leh in,"ka tellova inthiar pawh ka phallo.Engkim kan ti dun vek ang"inla neitu lutuka a ti chu ka ngaithei der lo.A kut paih thlâk sakin,"chung leh zêl te chu kan dah privacy ve ang chu,miin strict lutuk ang ti ang che"ti hlak hlak in,dressing table chu nawr sawn ka tum a.






"A pasalin a venghim hneh bik hle mai an ti zâwk ang.Ka ta i ni tih hre reng rawh"khauh deuh chuan a ti leh hmuk mai."Mmm min rem fel pui phawt la,kan sawidun leh dawn ania"hnial dân tur ka hre tawh lo chuan ka ti ta ringawt.Thuawih tak chuan min pui ve mai bawk a.





Fakzuala leh Hmingsanga te pawh rawn lût ve in,min rawn pui nghal a.Mipa pathum an awm tawh bawk a,kei chu chawl rih in,an tih tur sawiin ka lo kawk zat zat a.






Kan zawh fel hnuah,chhuatah chuan kan ṭhu dial a.Fakzuala lum ti chuan ac on leh zuaiin,a chapal phelhin a rawn ṭhu thla leh a."Faka,ka ngaihtuah phak loh min lo ngaihtuah sak veka,ka lawm lutuk ania.A vai chuan ka rul nghal vek thei lo che anga,mahse a zatve tal chu pêk che ka duh.Engzatnge i sên min hrilh la,ka lo thawn nghal dawn che ania"thutak deuh chuan ka ti ve a.Ani lah chuan ngaih pawimawh loh hmel tak hian min ner khum nâng mai.







"Chawngi,i pa ka ni tawh"tih chauha min chhangin,intihtheih hmel tak hian Hmingsanga chu a melh zauh bawk a.A ngaihna hrelo takin vawk pu ka en nghal hû mai.Ani lah chu kan thusawi ngaihsak lo zet hian,a en ngai en ngur ngurin a lo inkuangkuah hlun mai,eng tak chu ngaihtuah leh ang maw.Vawiin chu a awmdan mak tih châng ka nei fo mai.







Fakzuala chuan a aw thian leh khurh in,"I man pawh ka dawng vek tawh.Tun aṭang chuan I pa ka ni tawha.Min rulh lêt duhna rilru i put kha ka duh lo.Kalvari hawi zawng zêlin pafa kan ni ang"thutak deuh chuan a ti veleh a.Ka hriat miah lovin man hlanna te pawh an lo nei vek tawh anih hmel.Mahse ani kher pa anga en chu ava har dâwn ve.Ka nu in a hriat hunah chuan ka chan avan chhe dawn em.







"Hriatpui,keipawh i Patea ka ni tawh ania.I man te pawh ka ei ve a,eng thil hlu mah pêk theih che ka nei lo.Mahse,buaina i tawh apiangin min rawn hrechhuak hmasa ber zel ang che"Hmingsanga pawh chuan alo la ti.Non-mihring ho hian min pawngsual lo chauh chu anih hi.Engtiklaiin nge chung zawng zawng chu an lo rêl vek hman bik le.






"Kan makpa hian a tih nat che chuan,we will kill him,maw,kha kha animai"Fakzuala chuan lo ti lehin vawk pu chu a nuih sun sun a.Vawk pu lah chu khap lêk lovin a awmdan ngai bawk chuan alo la awm char char.






"Rinzam,kan thusawi kha i hria em?tiin a mal chu ka beng thawk a.Rawn phu zuk in,"ka lo lêt leh chiah e"tiin a sam kir zet chu nuaiin a khi sung mai.Khawvel dangah alo awm leh daih animaw.






Rum taka ka melh lai chuan,"nangni pahnih chu,zung kaih in tum em ni.In va tang rei bik ve"fiamthu ti tak deuh si hian a ti nghala.Fakzuala leh Hmingsanga te chu in en leh zauhin,"legend te inneih naah kan kal dawn"tiin an tho thurh mai.Saizami te inneih naa kal dawn chuan kal a hun tawh rêng ani.






An kal hnu chuan,ka phone awmna ka zawt nghal a.Nimina min lâksak hnu khân min pe lêt leh miah lo kha ania."Inbual phawt ang"tiin awmze nei tak hian min melh leh ralh tawh."Ka inbual tawh"lo tih san in,thawh mai ka tum chu min rawn pawm nawlh a.Bathroomah min luh pui nghal daih.






A in phelh ruah vek hnuah,ka kawr rawn phelh a tum chu,"ka ti thei"tiin ning zetin ka in phelh sawk sawk a.Shower hnuaiah chuan duhtaw takin min fawp leh tawh.(ngaihtuah zawm mai chi🤭)










Kan in bual zawh meuh chuan chawhnu her alo ni leh reng tawh a.Thawmhnaw te ha in,ni a nêm deuh takah chuan resort chhûng chu min fan kual pui a.Inneih nâna hman a duh vanga khâr rih anih thu a sawi chuan tuvakmah an rawn kal loh chhan chu ka hrethiam ve ta .







A hmun a zau bawk a,guest house a kan lêt leh meuh chuan ni a tla dâwn der tawh.Roof topah min chhoh pui leh in,ni tla tur chu in kuah rialin kan thlir dun a.








Ka ril a ṭam leh der tawh,vawiin chu ka dik thei meuh lo.Inhnuaiah chhuk in,chokaah chuan kan in zui lut leh a.Rawng ka bâwl phal lovin,chairah min ṭhut fel tir ât a.A rawngbawl lai chu hmuhnawm ti tak in ka lo thlir.A khat tawkin,"min nei hi i inchhîr em?"a ti sek bawk a.Amah zawk hi a inchhîr leh zawk te hi anilomaw.







Zanriah pawh tui ti takin ka ei leh a.Mipa rawngbawl thiam tawh laileng hi chu hmeichhia aiin an siam tui zêk zêl lehnghala.Ka vawk pu eisiam pawh a zawngchhang tlak dâwn khawp e.






Thleng pawh ka sil phal lovin amah bawkin a sil leh a.Min duat lutuk chu ka awm thiam lo lek lek mai.A sil chhûng zawng a bula awm tlat tura min tih avângin ka awmpui ve ngar ngar a.






A sil zawh hnuah room ah chho in,khumah mu chungin laptopah movie kan en dun leh a.Kan thil en lai ai mah chuan ka phone mawlh chuan rilru a kam tlat a.Ka nu mangang takin ka siam dâwn si a.Min biak tumin a bei leh nasa tawh ngawt ang.






Vawk pu chu inthlahrung deuh tak hian ka dil leh tawp a."Nakinah"tih chauha min chhangin,min rawn kuah leh hlun mai.Tui vak lo chungin movie chu ka en pui leh ta ringawta.Nizan kan mut tlêm vang nge ka mut lah chu a chhuak em em lehnghala.












Room kawngka in chum ri chuan min ti harh zawk a.Vawk pu pawh alo muthlu ve aniang,a rawn phu ve zawk mai.





Min kuah na phelh in,khum aṭang chuan a tho chhuak nghal a."Hlau duh suh,Bawiha te ṭhian ho bak an ni lovang"tiin ham bui bui chungin kawngka chu ava hawng a.






Ka beisei aia hmain,a nu leh pa te hmel ka hmuh chuan hlauhthawnnain ka khat nghal a.An hnungah ka nu leh ka nau te an rawn lut ve bawk.Ka nu chuan min haw viau dâwn emaw tih laiin,lainat hmel tak hian min en a.Ṭap tih hriat tak hian a mit a bui lâk bawk a.






Vawk pu pawh a beisei loh zawk a hmu tih hriat tak hian a lai lutuk chu Dinpuia kutah a kai ta ringawt.






"Bawiha,hetah hian animaw in lo awm.Mahni nau te inneihna ah pawh kal hman lo khawpin nupui neih i lo hmanhmawh ve vak a.I rilru puitling lo lutuk rah chhuah hi i hmu em"thinrim in sum tak hian ati a.Keipawh khum aṭang tho chhuakin,engkim tawrh in huamin vawk pu bulah chuan ka va ding ve nghal a.






"Pa,ti lo thei lova min siam tu kha tunge"vawk pu lah chuan alo ti.Ngaihdam a dil dâwn emaw tih laiin rin loh lutukin a chhang leh sia.An thin a ti rim zual vek dawn anih hi.






"Lalrinzam,tu fa nge maw inih le?"A nu'n rum taka en in a ti vin ṭhawt a."Keimah Lalrinzama Mrs.Dolly fapa,piang nawn leh pawh ni ila i fapa tho ka ni ang chu"uang zet hian alo chhang leh rauh a.Anu thinrim in seh ruh chu beng daih pawh tum lovin,a nuih sun sun ringawt.





"Bawiha,i nau kan thlah liam zo chiah a.Chhungkua kan mualpho ta sa sa,nangnipawh rawn haw tawh rawh u.Chhungkaw keh darh a ṭha ngai love"A pa chuan dam tak hian a ti leh a.A fapa chu hriatthiam hmel tak hian a en a,a lungngai tel tlatin ka hre leh nghala.





"Pawi ka ti khawp mai ka pa,kan lo haw thei rih lo"Vawk pu pawh a thutak sawt ta khawp mai.




Ka nu chu vawk pu hma ah tak rawn dingin,"Rinzam,ka fanu hi helai hmunah hian I awmpui angamaw,nunphung pangngai tak a neih theih nân,zirtirna ka pe ṭha asin.Henglai hmun fal lutuka khawhar taka a awm ka phallo"khur hlak hlak chung chuan a ti a.A theihtawp chuan a in sum ve tih ka hria.






"Engahnge ka fapa i dem.I fanu pawh hian thil a tisual ve tho.Hriatpui,ka fapa hi a naute inneih pawh lawmpui thei lo khawpin engahnge i zar buai."Vawk pu nu chuan thinrim taka min kâwk chungin a ti ve bawk a.Vawk pu lo ṭawng tur chu ka lo dang nghal a.







"Ka fanu hian a zar buai love,in fapa zawk hian zanah rui chungin a rawn tlawh tih in hria em.Ṭhenawm khawveng te pawhin a rawn zar buai zia chu min hriat pui vek"ka nu lah chuan tlawm zawk nih duh lovin alo la chhang ṭalh.






"In fanu hian zar buai hmasa lo se,ka fapa hian a buaipui lovang.Ka fapa hi ka hrechiang ve tawk,hmeichhia a ngaihsak ngai lo"Rinzama nu pawh a zâm duh bik lo.An rawl a ring dun si,an inhnial thawm chuan room chhung a fan chhuak vekin ka hria.






Chutia nu ber pahnih thinrim sen phiar in in chhân takah chuan vawk pu chu an hmaah a ṭhingṭhi ta ringawt.Thawm a reh nghal ṭhap a,vawk pu meuh ṭhingṭhi ta chu mak tiin kan en ṭhap hlawm mai.






Vawk pu chuan,a kut hum ruh ṭeuh chungin,"Min ngaidam rawh u,keima thiam loh vek ani.Chawngmawii ka duh luatah khua ka hmu zo tawh lo ani ber e.Ka pi khawngaihin i fanu hi ka bula awm phal sak hram rawh.A tello chuan keimah hi keimah ka ni thei ngai lovang.Sawrkar hna ka thawk lova hlawh tam tham tak ka nei bawk hek lo.Mahse he kut hi ka hman theih chhung chu i fanu hi rilṭamin a awm ngai lovang.Ka lungphu hi a phut chhûng chu mal tak leh khawhar takin ka siam ngai lovanga,a mittui ka ti tla anih pawhin hlimna vang chauha tla ani ang"tiin ngênngâwl tak chuan a dil a.Vawk pu meuhin tlawm taka ngaihdam a dil chuan ka thinlung a khawih takzat.







Keipawh a bulah ṭhingṭhi ve in,thinlung takin ngaihdam ka dil ve nghal bawk a.Ka nu chuan vawk pu chu kuahin,"ka fanu neih chhun ka ro hlu tak anih hi.I thutiama i ding zo lo anih chuan,khawvela nu rapthlâk ber i hmachhawn dâwn tih in hre reng ang che"tiin vawk pu kut chu la in,ka kut chu a vawn tîr nghal a.







"Hmingi ka fanu hi,i fanu ang chiahin lo en ang che aw.Hmanngaihna ka pêk zawh loh tam tak lo pe la.A chawr chhuahna inchhung ngai lo turin siam ang che"tiin vawk pu nu chu bia in a mittui a hru zauh bawk a.






Vawk pu nu chu rawn kun hniam ve in,kan kut chu an rawn vuan ve nghal a."Ka fanu,kan chhungkuaah kan lo lawm a che.Kan fapa mawl lutuk hmangaih taka enkawl tu tur kan nei ta che hi kan lawm takzet"tiin ani pawh a mittui a hru ve nghal bawk a.







Vawk pu pa erawh ngawi rengin an hnungah chuan alo ding a.Vawk pu chuan ka beng bula rawn kûn hniamin,"I nu hi ka pa first love anih hi"a rawn ti zawi sup mai.A pa chu en leh in,a lai deuh tlatin ka hre lehnghala.Nuih in sum ṭeuh in vawk pu thawh hun nghakin ka ṭhingṭhi ve ta reng a.







Room pawn lamah chuan thawm a rawn awm ṭak ṭak a.Fakzuala hmel a rawn lang leh hlawl mai.Chhuata kan ṭhingṭhi ṭhap a rawn hmuh rual chuan kan bulah a rawn ṭhingṭhi ve ringawt a.Vawk pu nên mak ti takin kan in en nghal hâw mai.






Fakzuala chuan ka nute chu en in,"ka pi duhtak te u,in fapa hi min ngaidam lul rawh u.Keima thiam loh vek ani,thil ṭha lo a thlen hlauin,Kalvari hawi zawngin ka lo insuih tir ve tawpa.He Fakzuheha aka Lalfakzuala hi khenbeh tlâk ka ni"uar fahran chuan tiin,a ṭap hial lehnghalin ka hria.Vawk pu chu ka beng bulah bawk rawn kun hniam leh in,"Vawk pu generation"a rawn ti ru leh sur sur mai.Non-mihring ho hi engtikah nge ka hriatthiam ve ang le.




🦋



(Edit hleithei lova min siam tu,min rawn call buai sek tu kha,vawihnih lo chhiar chhuak ang che🤭)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)