MR. EXCELLENT Ch ~ 16 by Sammy ♤

Episode kal lai dah luhna

Moderator: writers

Sammy R
Posts: 146
Joined: October 7th, 2021, 8:38 pm

MR. EXCELLENT Ch ~ 16 by Sammy ♤

Unread post by Sammy R » October 1st, 2022, 7:38 pm

MR.EXCELLENT
By ~ Sammy♤

Ch ~ 16



Ni, engahmah ka ngai lo anih chuan Sir Jona nena inthen maw? Hnai lo e, Sir Jona hi ka nei ngei ngei dawn. Mahse tunah rih chuan hetia buai hi a phu lutuk, Ramengi emaw Ruatpuii a biak changin eng angin nge ka ngaih hre ve rawh se.


..............


Ka nu leh Bawihtea bakah ka pi te Aizawl lamah an zin daih a, ka û leh U Adriana te nen chauh chuan kan awm a, exam kan zo tawh nen thawveng ham ham tak ka ni.


"Vawiin chu in hi lo tifai rawh aw" tukthuan kan ei lai chuan a ti a.


"Khawnge i kal dawn ?" ka ti let ha thung.


"Khawiah emaw, fianrial tawngtaina kan hmang dawn" a rawn ti a, U Adriana chu a lo nui a, a chaw ei lai chu a hak tep zui.


"Tak tak a, sawtah ram kan en fel lawk dawn" a ti tha leh mai a.


"Eng ram maw ?" ka lo ti leh a, mahse min chhan hmain ka û chu a tho a, a kham zui a. U Adriana nen chuan kan tho zui nghal zat.


"Adriana hian ram a lei a, 'in khaw hmun a ni sia, nakinah helama awm te pawh kan duh thut thei' tiin sawlai vengthlang lama Pu Muantea ram kha a lei a" chaw ei hmun tihfel lai chuan ka û chuan a ti a, 'inti inneih tum lutuk mai' ka rilru in ka ti hman.


"Pu Muantea ram te saw chu a min zo tawh lo em ni? Sawlai lo saw a tam nen a chhe lai kher" ka lo ti a.


"A chhe hleinem, i la hrechiang lo zawk anih dawn kha" ka u chuan a ti leh ngawt a. Ka la hrechiang lo ve reng bawk nen ka ngawi ta hmak.


"Tha deuhin lo awm rawh aw" tia min chahin ka u te pahnih chu an chhuak zui a.


Che nghal sawt sawt in tukverh darthlalang te chu ka nawt a, thawmhnaw suk tur tlem awm chu machine ah ka nuai tir bawk a, ka phone a Daduhi leh C.Sanga hla play chhawk in ka zai pui rat rat bawk.


"Dawn ve che maw lungrun, i zun ngaia suihlung len hi...." tukverh darthlalang nawh pah chuan ka zai rat rat a.


"Thiam rat rat ve" thawm rawn nei hmasa hawt lova rawn titu avang chuan ka phu nasa ngang mai. Tukverh darthlalang pakhat chu ka khar keh ringawt lehnghal.


"Awiii, tinge i khar chawrh kher a ?" Loryi chuan hlauhthawn hmel deuh hian a ti a.


"Keichu ka duh miah lo. I û in min hau dawn anih kha" tiin darthlalang keh them chu chhar a tum a.


"I in ât ang. A thu hrimin thawm rawn neih hmasak tur che ania" tiin ka pawtsawn a.


"Khatiang taka i phut ka ring hleinem. A nuam lo ee, anu ka va hrilh teh ang" tiin a phone a phawrh a.


"A ngai lo. In chungah leisa kan la neiin ka hria. Ka û te lo haw hunah kan siamtha leh mai dawn lawm" ka ti a, "Aih, a nuam lo" a ti tlat a, anu chu a phone lui ta tho.


Ka û phone ve nghal in ka hrilh a, an lo haw huna siam tura lo dah mai turin a ti a, Loryi bulah pawh a pawi loh thu ka sawi tir thlap.


"Tunlai chu ka che chhe thei hrim hrim" a ti a, keiin bawlhlawh ruhna nen darthlalang keh them chu ka rut a.


"Ka rilru hi a hah ania" tiin a thaw hak a.


"I ninawm, lo va thu rawh" ka ti a, thu duh lovin ka bulah rawn ding vei zur a.


"Tunlai hi i induh eeeeee" a ti a.


"Min en la, mi hman hmuh in mi min hmuh ?" tiin darthlalang dang chu ka nawt sauh sauh a.


"Awwww, nitin darthlalang i nawt em ni? I induh hrim hrim, Sir Jona pawn a sawi kha" a ti a. Ka thil chu chawl meuhin ka en a  "Engtin nge a sawi a ?" ka ti a.


"Engtinmah, hman zanah keiman ka bia a. 'Ruth-i hi i khuahkhirh em ni' ka va tia, 'tunlai chu a induh lutuk' a rawn ti" a ti a, ka ner nak.


"I zak lo mi, tinge i biak a ?" ka tih chuan "Ka thiannu bialpa chu enge ka biak zah nachhan tur" a rawn ti velah a, a thlirna lam zawng atang chuan dik ve reng bawk si.


"Lo va thu rawh i ninawm ?" ka ti leh ngawt.


"Josepha hi naktukah a rawn haw dawn tiraw ?" a tih chuan "Ka hre lo, mipa ka be ngai lo a" ka ti a, min ei lo lutuk hian "Over nu" a ti hluk.


"Chu machine chu ka herh leh teh" tiin machine rawn ri lamah chuan ka tir phei a, phun nang nang in a va herh veleh mai bawk.


"Nawt vat vat rawh, engmah pawh hi hrilh ve theihloh mai" a rawn ti a, "Aw le ka nawt zo e" tiin vawikhat ka nawt nawn leh thuak thuak a.


"Aizawl ah ka zin dawn asin" ka ti hluai.


"Thudang sawi daih zel suh. Josepha rawn haw hun tur chu i hre lo tak tak maw ?" a tih leh chuan "Hre loo, eng atan nge i tih, amah bia la" ka ti a.


"Ka bia a 'naktukah ka rawn haw dawn' chu atia" a ti a, "A tih ber a hnu, nge maw in lo in eng emaw ni deuh a ni lo maw ?" ka ti a.


"Chutiang lam a ni lo. Engtikah maw Aizawlah chuan i kal dawn ?" Zawh nawn hlau zet chuan a tih zawm zat a.


"Karleh velah aniang, Christmas ka hmang dawn a" ka ti a.


"Engaaa!! I hman daih ten. Ti awm lo thei lutuk, Sir Jona pawn a phal lo ang" a ti a, "Ka hrilh vek tawh" ka ti vei ham ham a, diktak chuan ka la hrilh lo a, Aizawla Christmas hman pawh ka tum tak tak chuang lo bawk.


"A va ho ve, hman ho dan tur ka ngaihtuah nasa tawh sin" a ti a.


"A pawi lo, damchuan kumtharah ka rawn haw leh dawn lawm" ka ti leh a, ka thusawi chu a awih hmel lutuk tawh.


"Hmang lo mai rawh. Kum dangah hmang mai rawhhhhhh" a ti a.


"Aih.... tlangval chhelo deuh deuh ka han hmu ange" ka tih chuan "Christmas laiin chhelo an awm lo. Mahni khaw lamah an haw darh zo vek zel" a ti a, "Hmmmm.... a ve ngawt zel a, kan inbulah pawh unau chhelo deuh an awm" ka tih chuan "Tak tak maw ?" tiin a meng nghal kuau va.


"Awm tak tak a, ka rualin lo kal ve mai rawh" ka ti leh.


"Ka chak ve tho, mahse kanpa lo haw dawn a" nui chunga a tih chuan 'sawi zel teh' tih melh hian ka melh a.


A sawi mai loh avang chuan "Tunge chu chu? Bialpa i nei tih i sawi ngai si lo a. A hmeltha em..." a dang ka sawi zawh hma chuan "A fel lutukkkk" uar fahran hian a rawn ti a.


"Hmmm.... Tunge ka ti reng alawm" ka ti leh.


"Aih ka sawi dawn lo, ka va haw phei teh ang" tiin a ding uai a.


"I zak em thu rawh. Tunge i bialpa chu sawi nghal rawh" tiin ka pawt thu a, "Ka nei loooo. Ka sawi ve mai mai nih kha" tiin a tlan a, kan in um chhuak ti tih.


"Aw ka hre vek. Josepha nen inni" tiin kawngkhar atang chuan ka au zui a, Sir Jona rawn lang ve chiah lehnghal.


"I duh duh dan khan ngai rawh" tiin Loryi chu kawngpui atang chuan a rawn au hram.


"A thing  au vak vak zel suh" Sir Jona chuan a rawn ti a, a nui vur vur bawk.


Nizan kan boruak a tha tehchiam lo a, tukinah pawh kan inbe lova, chutia a rawn nui leh mai chu mak ka ti.


"Eitur ka rawn keng" tiin inchhungah chuan a rawn lut a, choka lamah a tlang purh.


Ka phei ve a, dawhkanah chuan a thil rawn ken chu a chhawp chhuak a.


"Rawn ei rawh le" tiin min hui a.


"Hming ka nei ve reng" ka lo ti hmuk a, ka phei ve mai bawk.


Eitur chu ka en kual a, "Tinge hetia eitur te i rawn ken a ?" la tum deuh hmuk chung chuan ka ti a.


"Kan inneih huna kan awmdan tur vel ka ti chhin anih hi" a tih chuan tawng lova, eitur chu ka en kual a "Ka duh lo, thau tam na hlir anih hi" ka ti hmuk.


"Thau chu a tha lawm" a tih chuan "Tha se chu nitin thau loh tumin excer i la lovang" en kal chung chuan ka ti nghat a.


"Aww... keite chu min duh reng theih nan ka invawn that reng angai lawm" a tih chuan za lo tawkin ka nui a.


"Ka duh thin lai che kha chuan engtiang pawh khan ka duh che a, i rilru lerh lutuk khan hmeichhe dang attention neih vek i tum a chuvang mai mai anih kha" ka ti leh nghat a.


"GOD!" tiin a maimitchhing a, a âwm a thin zawn chu dawm in "Tuna i thusawi khan ka thinlung hi a ti na lutuk" tiin min rawn en a.


"I over hle mai" ka lo tihsan hmak.


"Rawn khawih la" tiin ka kut chu a la lawk a, a âwm zawnah chuan a dah a.


"Ka duh lo, thlah teh" tiin ka kut chu laksawn ka tum a, mahse a vuan tlat.


"Shh....Ka lungphu ri chu ngaithla rawh" tiin ka hmui ah a kut zungchal a rawn dah a, ka lo ben thlak sak.


Ngawi reng chuan kan ding dun a, eng lungphu ri mah ka hre thei lo.


"A phu lo aniang ka hre lo" ka tih chuan "i beng khan ngaithla rawh" tiin min kuah bet chawt a, ka ngaithla lo ang tih hlau awm tak chuan ka bek chu a vuan a, a kut lehlamin ka dar hnunglam a kuah liam phei bawk.


Chutia a âwm bei chet chunga ngaihthlak takah chuan a lungphu ri chu ka hre thei a.


"A va phu nasa ve" tiin keima âwm chu ka dawm vang vang a, "Kei ai daihin a phu nasa, lungphu tha lo i nei dawn a ni ang" tiin awm hran ka tum a, mahse min kuah bet tlat.


"Kan inhauh emaw, ka laka i lungawihloh apianga a phût dan a nih kha. Inthen i sawi lai khan ka lung hi a rawn zuang chhuak lo chauh. Khatih lai khan rawn zuang chhuak se, lo hmu thei zawk ta la. Ka thinglung hi nangmah chauh duh leh hmangaih a, nang chauh a luahkhattu i ni tih i hmu ngei dawn si a" a ti a.


"Hmmm" ka ti ringawt a, ka kuah let ve a.


"Ka nau te hi hle hle se, muhil daih rawh se" tiin a insawi a, ka hnung chu a beng ta thek thek mai.


"Ti khan min ti ziah suh" tiin ka ke ka per dat a. Rawn nui hawk hawk in "Ka tih mut nghal loh che chuan i thinrim leh dawn sia. Tunah hian i thinrim tawh lo tiraw ?" tiin min rawn en a.


"Thinrim e, ka kuah ve mai mai che nih hi" tiin ka inlahrang a.


"Dawn ti tam nu" tiin ka biang a khuap a, ka hmuiah a rawn chuks zeuh a, min en run run.


Ka lai ve deuh bawk si a, "Min en run run zel suh" tiin ka nam dak a, a nui hawk hawk.


"Ei tawh rawh le" ti lehin fian chu min pe a, "Ka duh lo.... Thau a tam lutukkkk" ka ti vak.


"Thau rawh, mipa dangin an lo melh tawh loh nan che" a tih chuan inti hmeltha vel tak hian ka en a, "Ka hmel hi en la, ka thau pawn ka hmeltha in ka chhelo dawn tho" tiin ka kawng chu ka dawm a, ka ding kawisawi kual vel a.


"Ni ee, i chhelo taih taih si" ka mawngah a rawn beng taih a, "Hur viau suh" tiin ka beng let veleh chawrh.


"Hmeichhe dang mawng pawh i beng ziah lo maw ?" ka ti a, "Aaaaa..... a awihawm loh thei. Nang chu i thik awm lo thei emai. Eitur te hi 'midang pawh i leisak ziah' min ti leh dawn tho em ni ?" a tih chuan "Aw, i lei sak ziah em ni ?" ka ti leh a.


"Lei sak lo, ka vawikhat lei sakna leh awmchhun tur" a ti a, ka la melh khui khui.


"Ka hmangaih ngawih ngawih te" tiin ka mawng chu a rawn beng leh a, "Amakk" ka lo ti vak.


"Aha, ka insuk ka theihngilh daih" tiin bathroom ah chuan ka lut a, ka thawmhnaw nuai chu tlen pawh ka la thleng lo.


Ka spin phawt a, tleng tur chuan ka la chhuak leh a, chawhtawlh lian lutuk ah chuan ka dahkhawm a. Bathroom kawngkhar bulah
chuan ding in Sir Jona chuan min lo en a.


Tap chu herh in tui rawn chhuakah chuan thawmhnaw chu ka tleng a.


"Min en reng lo khan min lo tihpui teh" ka tih chuan "Khatia ti lo khan machine ah khan dah leh a, tui i dah leh anga i nuai tir leh mai dawn lawm" a tih chuan "Aih, kut a tleng hian a fai zawk a" ka ti ve tlat.


"Khatiang te chu hmeichhe hna" tiin min la tihpui duh thak lo zui a.


Min lo en reng a, min lo nuih leh thin. Nupa, inkhata cheng tawh ang kan ni kan awm dan chu.


"Zanriah eiah min sawm la" a tih chuan "Sa kan hmeh dawn lo" ka lo ti a.


"Bawkbawn bai nen pawh pawi lo" a tih chuan "Min lo insukpui phawt la i rawn ei ve dawn nia" ka ti a.


"A pawi lo, nang chuan min sawm lo mai rawh. I u in min sawm tawh tho a" tiin a kut a kuangkuah at. Achang hi chuan cute deuha awm a tum ve thin ni te hian ka hria.


"Chutiang te chu enge min biak buai kher a" ka ti a, thawmhnaw chu ka tleng zung zung.


Machine a ka dah lai kha chuan a tam lo maw le, hetia ka'n tlen chiah hian a tam zia chu. Hmanlaia machine pawh awm hmaa nula leh nu, hmeichhe ho hrim hrim kha ka khawngaih, insuk te hi thil namai a ni lo tawp.


"Kan inneih hunah phei chuan nau zun phah te i suk a ngai dawn sia" a rawn tih leh chuan "Min lo be reng suh. Bakah tunlaiah tuman nau zun phah an su tut tut tawh ngai lo. Diaper a awm aw. DIAPERRR!!!" ka ti vak a, a nui hawk hawk.


Thawmhnaw chu ka tleng zo a, ka spin leh.


"Keichu ka peih lo. Tianga inchhung chêt a, insuk rawngbawl,  inchhung leh a chhehvel enkawl fai, pasal te tihlawm i'n la ngai anga chutachhapah i nu tih lungawi a'n ngai leh bawk anga. Ka peih lo pasal neih" tiin thaw hakin chairah ka thu a.


"I inngaihtuah hah anih kha, tui vawt hi in rawh" tiin min rawn pe a.


"Ka peih lo tak tak ania. Ka la inhuam lo, khatiang ti vek tur chuan. I nu a sual si, min duh lo bawk si. Rameng in a tlawn thiam si... Hmmp" tiin tui chu ka in khawlh khawlh.


#innghakhlel si a, nuam lo ka ti ve bawk si a, hei te hi ka lo dah hmasa ang aw.... Zanin tho 11 velah full in aw



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)